Unsay Akong Mahimo aron Magtudlo nga Mas Sama sa Manluluwas?

Ni Tad R. Callister

Kinatibuk-ang Presidente sa Sunday School

Samtang nagserbisyo ko isip mission president sa Toronto, Canada, usa sa akong mga assistant miduol nako ug nangutana, “President, unsaon man nako aron mahimong mas maayo nga misyonaryo?” Ang una nakong tubag mao, “Maayo man ang imong gibuhat.” Ug sa tinuod, maayo siya. Pero nagpadayon siya sa iyang pangutana, mao nga naghunahuna ko kadiyot ug dayon mitanyag og usa ka sugyot. Uban sa pahiyum, positibo siyang mitubag.

Gipakigbahin nako kining yano nga kasinatian ngadto sa uban namong mga misyonaryo. Sa wala madugay ang ubang mga elder ug mga sister miadto sa ilang interbyu ug nangutana, “President, unsaon man nako aron mahimong mas maayo nga misyonaryo?” Kanang yano nga pangutana gikan sa usa ka misyonaryo maoy nakaingon sa diwa sa paglambo sa tibuok namong misyon.

Sa samang paagi, ang mga magtutudlo makadawat og mapuslanong tambag kon sinsero nila kining ipangutana sa Ginoo ug sa ilang mga lider: “Unsay akong mahimo aron magtudlo nga mas sama sa Manluluwas?” Misaad ang Ginoo, “Magpaubos ka; ug ang Ginoo nga imong Dios moagak kanimo pinaagi sa kamot, ug mohatag kanimo og tubag sa imong mga pag-ampo” (D&P 112:10).

Nagdilaab nga Pagpakabana

Si J. B. Priestley, usa ka English nga nobelista, kausa gipangutana kon giunsa niya pagkahimong ingon ka banggiitan nga manunulat kay walay usa sa talentado niyang mga kaedad ang milampus og maayo. Mitubag siya, “Ang kalainan tali namo dili ang abilidad, apan sa kamatuoran nga samtang … sila … igo lang nalingaw sa talagsaong ideya sa [pagsulat], ang akong pagpakabana nagdilaab!”¹

Isip mga magtutudlo, tingali mangutana kita, “Kontento na ba kita sa atong kasamtangang mga abilidad sa pagtudlo, o nagdilaab ba ang atong pagpakabana mahitungod sa pagtudlo sama sa Manluluwas?” Kon mao, andam ba kita nga mopadaplin sa tanang garbo ug dili lang maghulat sa instruksyon apan aktibo usab nga magtinguha niini?

Ang Pagpaubos Mao ang Yawe

Kita adunay daghang maayo kaayo nga mga magtutudlo niini nga Simbahan, apan ang kamatuoran mao kini, bisan unsa pa kadaghan ang katuigan sa atong kasinatian, o pila pa ka degree ang atong gihuptan, o unsa kita kapinangga sa mga sakop sa klase, kitang tanan mahimong molambo ug mas mahisama sa Bantugang Magtutudlo, kana kon mapaubsanon kita. Tingali ang pagtino sa kalidad sa usa ka sama ni Kristo nga magtutudlo mao ang pagkahimong matudloan. Ang pagpaubos usa ka kalidad nga parehong nagdapit sa Espiritu ug nag-atiman sa atong tinguha nga molambo.

Usahay, makahimamat ko og mga presidente sa Sunday School nga nasagmuyo tungod kay usa o daghan sa mga magtutudlo sa ilang ward o branch mibati nga eksperyensyado o malampuson na kaayo sila nga wala na sila magkinahanglan og dugang pa nga instruksyon o motambong og mga miting sa teacher council. Nakapaguol ni nako tungod kay wala pa ko makahimamat og magtutudlo nga dili na molambo sa pipila ka paagi.

Nasayud ko nga bisan kon ang labing eksperyensyado nga magtutudlo moadto sa mga miting sa teacher council nga dunay mapaubsanong kasingkasing ug nagdilaab nga tinguha nga makakat-on, ang maong magtutudlo maka-dawat og balaanong mga panabut ug mga impresyon kon unsaon nga molambo siya. Nakatambong na ko og daghang miting sa teacher council ug kanunay kong mobiya nga dunay pipila ka bag-ong panabut o tinguha nga molambo sa usa ka kahanas o kinaiya nga kinahanglang mapalunsay ug mahingpit.

Ang Panginahanglan nga Mopalambo og mga Kahanas sa Pagtudlo

Ang uban maghunahuna usahay sa mga kahanas o mga pamaagi sa pagtudlo isip yano ra nga mekanikal o sekular nga mga himan. Hinoon, kon mapalambo, kining mga kahanas motugot sa Espiritu sa pagpili gikan sa nagkadaiyang mga opsyon nga mas makatubag sa mga panginahanglan sa indibidwal nga mga tigkat-on. Kinsa man ang mas molambo, ang tawo ba nga misulay sa pagputol og kahoy gamit ang iyang pocketknife [korta], o ang samang tawo nga migamit og chain saw? Sa parehong mga sitwasyon, ang samang tawo dunay samang kusog ug kinaiya, apan ang naulahi mas molambo tungod kay siya dunay mas epektibong himan nga magamit. Ang mga kahanas sa pagtudlo mahimong balaan nga mga himan sa mga kamot sa Espiritu.

Ang training ug pagpraktis, pag-role-play, pagtuon, ug pag-obserbar makatabang sa usa ka magtutudlo sa bisan unsa nga lebel sa kahanas aron mapalambo ang mga kahanas nga mabasihan sa Espiritu—sa pagtabang kanato nga magtudlo nga mas sama sa Agalon. Daghan niining mga kahanas mahimong mapalambo diha sa mga miting sa teacher council.

Ang Ginoo Makahulma ug Makaporma Kanato

Ang uban mahimong mobati nga dili gyud sila makatudlo sama sa Manluluwas—nga ang maong paningkamot lapas na sa ilang mga kapabilidad. Si Pedro tingali naghunahuna nga usa ra siya ka yanong mangingisda; si Mateo, usa lang ka gipanghimaraut nga maniningil og buhis. Apan pinaagi sa tabang sa Manluluwas, ang matag usa nahimong usa ka gamhanang lider ug magtutudlo sa ebanghelyo.

Kini nga abilidad sa Ginoo sa paghulma ug pagporma kanato susama sa kasinatian ni Michelangelo sa pagkulit sa unsay gikonsiderar sa daghan nga pinakamaayo nga buhat nga nahimo sukad sa kamot sa tawo—si David.

Sa wala pa dawata ni Michelangelo ang proyekto, duha ka laing tigkulit, sila si Agostino di Duccio ug Antonio Rossellino, gisangunan nga mohuman sa mga estatuwa. Ang duha parehong nakasugat sa samang problema: ang nga kolum mao ang hustong gitas-on ug gilapdon, apan grabe ang diperensya sa marmol. Si di Duccio ug dayon si Rossellino misulay sa ilang artistikanhong pagtrabaho niini nga kolum, apan wala mosalir. Dunay daghan gyud kaayong diperensya.² Sa katapusan, ang matag usa miundang. Nakita ni Michelangelo ang samang mga diperensya, apan nakita usab niya ang lapas pa niini. Nakita niya ang buhi, nagginhawa, talagsaong porma ni David nga karon kasagaran nakapahingangha sa mga tumatan-aw sa unang higayon nga makita nila kini.

Sa samang paagi, namahayag ang Dios nga ang kahingpitan sa Iyang ebanghelyo “ikapahayag pinaagi sa mahuyang ug yano ngadto sa mga lumulupyo sa kalibutan” (D&P 1:23). Nakita sa Dios ang atong pagkadili hingpit ug mga kahuyang, apan nakakita usab siya og lapas pa niini. Siya adunay abilidad dili lamang sa pagtabang kanato nga mabuntog ang atong mga kahuyang apan ang paghimo niadtong mga kahuyang ngadto sa mga kalig-on (tan-awa sa Ether 12:26–27). Makatabang Siya nga malunsay ug mahingpit ang atong mga kahanas ug mga kinaiya sa pagtudlo aron makatudlo kita nga mas sama sa Manluluwas.

Mga Paagi nga Makatudlo Kita nga Mas Sama sa Manluluwas

Ang mosunod mao ang pipila sa mahinungdanong mga elemento nga tingali mapaningkamutan natong tanan aron makatudlo nga mas sama sa Manluluwas:

Magtudlo pinaagi sa Espiritu, kay nasayud nga ang Espiritu mao ang naghatag og kinabuhi ug kadasig ug kahulugan sa atong mga leksyon (tan-awa sa D&P 43:15).
Mag-focus sa doktrina, ilhon nga ang doktrina sigun sa gitudlo diha sa mga kasulatan ug sa buhing mga propeta dunay nag-ubang gahum nga makausab og kinabuhi (tan-awa sa Alma 31:5).
Mahimong tinud-anay gayud nga tigkat-on, kay nasayud nga ang ideyal nga magtutudlo usa usab ka ideyal nga tigkat-on (tan-awa sa D&P 88:118).
Magtinguha og pagpadayag, kay nasayud nga kauban sa matag tawag nga motudlo moabut ang katungod nga makadawat og pagpadayag aron mapalambo ang calling sa usa ka tawo (tan-awa sa D&P 42:61).
Magpakita og gugma pinaagi sa pag-ila sa pangalan sa matag sakop sa klase, pag-ampo alang kaniya sa tinagsa, magbaton og personal nga interes sa matag usa (ilabi na niadtong dunay espesyal nga mga panginahanglan), ug pagtabang sa makahuluganong paagi niadtong wala motambong (tan-awa sa Moroni 7:47–48).

Usa ka Personal nga Pagtimbang-timbang

Si Apostol Pablo mihatag niini nga tambag: “Susiha ang inyong kaugalingon sa pagsuta, kon kamo nagapadayon ba sa inyong pagtuo” (2 Mga Taga-Corinto 13:5). Mahimo kining i-paraphrase aron mabasa sa mga magtutudlo, “Susiha ang inyong kaugalingon sa pagsuta, kon kamo nagtudlo ba diha sa pamaagi sa Manluluwas o sa inyong pamaagi.” Ang sinugdanan sa tuig usa ka tukma nga panahon sa pagpahigayon sa maong pagsusi. Sa samang paagi, gidapit kamo sa pagtubag sa mga pangutana sa personal nga pagtimbang-timbang nga nag-uban niini nga artikulo. Sa pagbuhat ninyo niini, ang Espiritu motabang kaninyo nga masayud kon unsay angay ninyong i-focus aron mahimong mas sama ni Kristo nga magtutudlo, ug unsaon ninyo pagbaton ug pagpalambo sa gikinahanglan nga mga hiyas ug mga kahanas sa pagbuhat sa ingon.