Kamo Dili Makapugong sa Unsay anaa sa Akong Kasingkasing
Ang tagsulat nagpuyo sa California, USA.
Paghulagway pinaagi ni Toby Newsome
Sa dihang ang Simbahan unang miabut sa Ghana niadtong 1978, ang gobyerno wala gayud makasabut niini ug sa mga gipangbuhat niini. Miresulta kini sa daghang mga hungihong. Samtang ang Simbahan milambo sulod sa 10 ka tuig, mao usab ang mga hungihong. Nahinumdom ko nga nakadungog sa mga tawo nga moingon nga ang Estados Unidos nagpadala og mga tawo aron maniid sa among gobyerno. Kana, inubanan sa tanang gipakatap nga basahon nga batok sa mga Mormon, nakapasuspetsa kaayo sa gobyerno.
Ang Pagpugong
Niadtong Hunyo 14, 1989, gisirad-an sa gobyerno ang among mga building sa Simbahan, gipapauli ang mga misyonaryo, ug gidili ang tanang opisyal nga kalihokan sa Simbahan. Gitawag namo kini nga panahon sa “pagpugong.” Apan isip usa ka 18 anyos nga babaye, ang tanan nakong nahibaloan mao nga adtong usa ka adlaw gipahibalo nga dili na mi mahimong moadto sa simbahan. Duna pa gani mga sundalo nga nagbantay sa mga building aron masiguro nga magpalayo mi.
Kay dili na man mi mahimong maghimamat sa among mga chapel, nakadawat mi og pagtugot gikan sa mga lider sa Simbahan nga maghimo og mga sakrament miting diha sa among mga panimalay. Kon wala moy naghupot sa priesthood sa inyong panimalay, giawhag mo nga moadto sa usa ka panimalay nga dunay usa. Makapalibug kadto nga panahon apan usa usab ka espesyal kaayo nga panahon. Gipakigbahin namo ang among mga pagpamatuod, ug mas nakapasuod kini namo.
Unsaon man Nimo Pagtawag ang Imong Kaugalingon nga usa ka Mormon?
Sa usa ka higayon atol sa pagpugong, kinahanglan kong mobiya sa akong panimalay aron moadto sa usa ka boarding school. Sa dihang miabut ko didto, usa sa mga magtutudlo nakadungog nga usa ko ka Santos sa Ulahing mga Adlaw. Direkta siyang nakigsulti nako aron maghisgot sa negatibong paagi mahitungod sa Simbahan ngari nako. Daghan kaayo siyang mapintas nga mga pulong nga ikasulti. Kanunay kong naghunahuna, “Nganong initan man ko nimo ug magsulti niining mga butanga? Mituo ko sa mga pagtulun-an sa ebanghelyo, apan tawo ra gihapon ko.”
Usa ka adlaw iya kong gipangutana kon unsaon pa nako pagtawag ang akong kaugalingon nga usa ka Mormon. Wala ba ko mahibalo mahitungod sa pagpugong? Karon, sa among kultura, dili mi motubag-tubag sa mga hamtong. Mao nga ang kamatuoran nga usa siya ka magtutudlo nagpasabut nga dili ko makahagit niya. Apan nianang higayuna, naamguhan nako nga duna gyud koy pagpamatuod. Wala ko masayud kon giunsa paggawas niining mga pulong sa akong ba-ba, apan ang Espiritu mianhi nako, ug mibarug ko ug miingon, “Ang Simbahan anaa sa akong kasingkasing. Ug walay bisan kinsa nga makapugong sa unsay anaa sa akong kasingkasing.”
Ug human niana wala na ko niya hilabti.
Pagka-Nobyembre 1990 ang gobyerno mitapos sa pagpugong ug miingon nga ang among mga miyembro sa Simbahan gawasnon na nga mosimba pag-usab. Wala mi mga radyo o mga telebisyon sa school campus, mao nga nakahibalo lang ko tungod kay kana nga magtutudlo nakadungog ug daling mipadala og tawo aron mapahibalo ko. Sa dihang nakakita siya nako, miingon ang akong magtutudlo, “Ang ban sa inyong Simbahan gitangtang na! Makasimba na ka pag-usab.”
Malipayon siya para nako.
Dili Sila Makapugong sa Unsay Anaa sa Inyong Kasingkasing
Kadtong nagpabilin sa Simbahan ug dungan nga nagsimba atol sa pagpugong nakamugna og mas lig-on nga mga relasyon. Nahimo kaming tinuod nga mga managsoon. Bisan karon, nga naglain-lain na mi og mga dalan, kon dunay mahitabo sa usa ka tawo, makadungog gihapon mi mahitungod niini. Gibati namo nga mora mi og mga pioneer.
Ganahan kong mosulti sa mga tawo nga kon nasayud kamo nga ang inyong mga gituohan tinuod ug kamo dunay pagpamatuod mahitungod niini, makaangkon kamo og mga pagsulay apan ang inyong pagtuo dili kinahanglang matarug. Kon nasayud kamo nga ang usa ka butang tinuod ug mituo kamo niini, walay lain nga makakuha niini gikan kaninyo. Dili sila makapugong sa unsay anaa sa inyong kasingkasing.