Diha sa Pulpito

Ang Dios Mipadayag Niini ngari Kanako

Ni Rachel H. Leatham

Kining bag-ong series nag-highlight sa kinabuhi sa mapahinungurong kababayen-an ug sa ilang mga mensahe, nga gikuha gikan sa libro nga At the Pulpit: 185 Years of Discourses by Latter-day Saint Women (2017). Ang pinili nga mga kapitulo anaa sa churchhistorianspress.org/at-the-pulpit.

Litrato ni Rachel Leatham sa maayong kabubut-on sa Church History Library; frame gikan sa Getty Images

MAHITUNGOD NI SISTER LEATHAM

Si Rachel Hannah Leatham (1884–1979) nahimong ikaduhang babaye nga naapil sa opisyal nga report sa komperensya sa Simbahan sa dihang namulong siya sa overflow nga miting sa kinatibuk-ang komperensya niadtong Abril 5, 1908.

Apil siya sa unang henerasyon sa wala maminyo nga kababayen-an nga nagserbisyo og proselyting nga misyon alang sa Simbahan. Sa dihang 22 anyos na siya, gi-assign siya nga moserbisyo sa Colorado Mission niadtong Septyembre 1906.

Sa pag-uli niya sa Siyudad sa Salt Lake pagka-1908, si Sister Leatham miboluntaryo isip usa ka guide sa Temple Square Bureau of Information. Ang bureau miabli pagka-1902 nga dunay tinguha nga makahatag og tukma nga impormasyon ug miapud-apod og mga sinulat sa Simbahan ngadto niadtong mibisita sa Temple Square.

Atol niining panahona, ang kinatibuk-ang komperensya gipahigayon didto sa Tabernacle sa Temple Square. Dihang puno na ang Tabernacle, ang mga nanambong gigiyahan paingon sa overflow nga mga miting sa duol nga Assembly Hall. Dihang puno na ang Assembly Hall, nagpundok ang mga tawo sa nataran duol sa Bureau of Information Building, diin gipahigayon ang mga tulumanon alang sa overflow nga miting sa komperensya.

Kini nga mensahe usa ka kinutlo gikan sa pakigpulong nga gihatag ni Sister Leatham atol sa overflow nga miting sa kinatibuk-ang komperensya niadtong Abril 5, 1908. Ang punctuation ug capitalization gi-standard.

Siguro usa ko sa pinakamalipayong mga babaye sa kalibutan, ug ang ebanghelyo maoy mipabati nako niining paagiha, kay nasayud ko nga ang ebanghelyo tinuod. Nasayud ko nga ang Dios nga atong Amahan, ug ang Iyang Anak, nga si Jesukristo, mianhi ug midala sa ebanghelyo ug miestablisar niini ug namulong ngadto kang Propeta Joseph Smith. …

Gibati nako nga kon mabuhi ko sa kahangturan, dili igo ang akong pasalamat sa akong Langitnong Amahan alang sa mga panalangin nga miabut sa akong kinabuhi, alang sa pribilehiyo nga makasangyaw sa kalibutan ug makadala niining pagpamatuod, nga magsulti kanila bahin sa ebanghelyo nga napahiuli, bahin sa awtoridad nga gihatag ni Kristo ngadto sa Iyang mga sulugoon, ug sa mga panalangin nga giandam alang niadtong naminaw ug mituman sa mga pulong sa kamatuoran, kinabuhi, ug kaluwasan. …

Usahay maghunahuna ko nga kitang mga batan-on sa panimalay wala makaamgo sa hingpit sa mga responsibilidad nga gisangun kanato. Wala nato kanunay hinumdumi nga kadtong nangulo kanato mga tigulang na, ug kon ang atong mga amahan ug mga inahan mawala na, makabaton kita sa responsibilidad sa pagpadayon sa ilang buhat; nga kita ang umaabut nga responsable nga katawhan sa Zion. Ato bang gibuhat ang atong bahin, ug ato bang giandam ang atong mga kaugalingon aron makahimo kita sa buhat nga nahimo sa atong mga ginikanan?

… Ato bang masulti ang mga saad nga gihimo sa Dios kanato, kon sundon nato ang Iyang mga sugo? Pamilyar ba kita sa karaang rekord bahin sa mga lumulupyo niini nga kontinente, ang Basahon ni Mormon? Ug pamilyar ba kita sa mahinungdanong mga kamatuoran nga gitudlo diha ug niadtong mga basahon nga nagtudlo kanato sa katahum sa buhat diin kita nalambigit karon? Nahadlok ko nga dili kaayo kita pamilyar sa mga baruganan sa ebanghelyo ug dili kita ingon ka makugihon kon unsay angay natong maabut.¹

Kon asa daghan ang gihatag, daghan ang gikinahanglan; ug nahibalo kamo, matag usa kaninyo, kon unsa kadaghan ang nahatag ngari kanato, ug unsa kadaghan ang gikinahanglan diha sa atong mga kamot [tan-awa sa Lucas 12:48; D&P 82:3]. Ato bang giandam ang atong kaugalingon aron dili kita mapakyas? Magpakabuhi kita pinaagi sa matag pulong nga magagula sa ba-ba sa Dios [tan-awa sa Deuteronomio 8:3; Mateo 4:4; D&P 84:44]. Magpakabuhi kita sa ingon aron kanunay Siya nga andam nga moangkon kanato, ug mopanalangin kanato, ug mohigugma kanato.

… Ganahan kong mosulti pag-usab nga nasayud ko nga ang ebanghelyo tinuod. Dili tungod kay nasayud ang akong amahan niini, dili tungod kay ang akong inahan kanunayng nagtudlo niini ngari kanako, apan nasayud ko nga ang ebanghelyo tinuod tungod kay ang Dios mipadayag niini ngari kanako. Ang Iyang Espiritu mipamatuod sa akong espiritu [tan-awa sa Mga Taga-Roma 8:16], ug ang akong pagpamatuod mao ang labing bililhong gasa sa Dios ngari kanako.

Hinaut nga ang Dios mopanalangin kanatong tanan, kini akong gipangayo sa pangalan ni Jesus, amen.

Mubo nga sulat

1. Ang binulan nga mga sulat ni Sister Leatham ngadto sa iyang mission president nagpakita sa iyang kakugihan. Niadtong Pebrero 25, 1907, misulat siya, “Naningkamot ko sa pagbuhat sa akong katungdanan ug nakakaplag og dakong katagbawan sa akong mga paningkamot” (Colorado Denver South Mission General Minutes, 166).