ផែនការនៃសេចក្ដីសង្គ្រោះ និងជំនាន់ដែលកំពុងពេញវ័យ

អែលឌើរ គីម ប៊ី ក្លាក

ក្នុងពួកចិតសិបនាក់

ការចាក់ផ្សាយអំពីការបំពាក់បំប៉នថ្នាក់សិក្ខាសាលា និងថ្នាក់វិទ្យាស្ថាននៃសាសនាប្រចាំឆ្នាំ • ថ្ងៃទី ១២ ខែ មិថុនា ឆ្នាំ ២០១៨ • មហោស្រពមជ្ឈមណ្ឌលសន្និសីទ

ថ្ងៃនេះ ខ្ញុំមានអំណរគុណដើម្បីថ្លែងទៅកាន់បងប្អូន ។ ខ្ញុំសូមគោរពដល់បងប្អូនចំពោះកិច្ចការដ៏អស្ចារ្យដែលបងប្អូនធ្វើ ។ បងប្អូនកំពុងធ្វើការងាររបស់ព្រះអម្ចាស់ដើម្បីជួយដល់ជំនាន់ដែលកំពុងពេញវ័យឲ្យរៀនកាន់តែជ្រៅជ្រះនៅក្នុងដំណឹងល្អនៃព្រះយេស៊ូវគ្រីស្ទ ។ ដោយគិតដល់ការងារនោះក្នុងចិត្ត ជាហេតុដែលខ្ញុំជ្រើសរើសនិយាយនាថ្ងៃនេះ អំពីការបង្រៀនផែនការនៃសេចក្តីសង្គ្រោះដល់យុវវ័យដ៏អស្ចារ្យទាំងនោះ ។

ប្រធានណិលសុនបានហៅពួកយើងទាំងអស់គ្នាឲ្យក្រោកឡើងឆ្ពោះទៅកាន់ឯកសិទ្ធិដ៏អស្ចារ្យ ដែលព្រះបានប្រទានឲ្យយើង ។^១ នោះជាការទទួលខុសត្រូវរបស់យើង និងជំនាន់ដែលកំពុងពេញវ័យ ។ ខ្ញុំដឹងថា យើងទាំងអស់គ្នាត្រូវតែធ្វើការកាន់តែច្រើន ដើម្បីជួយយុវវ័យដ៏មានតម្លៃទាំងនេះឲ្យរៀនពីផែនការរបស់ព្រះវរបិតាសួគ៌កាន់តែស៊ីជម្រៅ ។ ពួកគេត្រូវដឹង ហើយយល់ពីវានៅក្នុងគំនិត និងចិត្តរបស់ពួកគេ ពួកគេត្រូវស្រឡាញ់ ហើយរស់នៅតាមផែនការនេះ ហើយពួកគេត្រូវក្លាយដូចជាអ្វីដែលព្រះវរបិតាបានតែងតាំងពួកគេពីមុនលោកិយនេះ ។ នៅក្នុងកម្លាំងនៃព្រះអម្ចាស់ និងព្រះចេស្តានៃព្រះវិញ្ញាណបរិសុទ្ធ នោះយើងអាចធ្វើកិច្ចការដ៏អស្ចារ្យនេះបាន ។ ខ្ញុំដឹងថា នោះគឺជាការពិត ។

ជាច្រើនឆ្នាំមុន ខ្ញុំបានបម្រើបេសកកម្មនៅប្រទេសអាល្លឺម៉ង់ ។ នៅជំនាន់នោះ យើងបានប្រើក្តារមួយដែលមានក្រណាត់ទន់ៗ ហើយកាត់វាចេញជារង្វង់តូចៗដើម្បីបង្រៀនអំពីផែនការនៃសេចក្តីសង្គ្រោះ ។ រង្វង់តូចៗទាំងនោះតំណាងឲ្យពិភពមុនឆាកជីវិតនេះ ជីវិតរមែងស្លាប់ និងពិភពវិញ្ញាណ ព្រមទាំងនគរនៃសិរីរុងរឿងទាំងបី ។ តាមខ្ញុំចាំវាំងនននៃការបំភ្លេចគឺជាបន្ទាត់ក្រងិចក្រងុកខ្លីៗ ហើយថ្ងៃនៃការជំនុំជម្រះគឺជារូបចតុកោណមួយ ។ ឥឡូវនេះ ពួកអ្នកផ្សព្វផ្សាយសាសនាឈប់ប្រើក្តារក្រណាត់ទន់ៗនោះទៀតហើយ ប៉ុន្តែសូមជឿខ្ញុំចុះរង្វង់តូចៗនោះនៅមាន ហើយនៅល្អ ។

នេះគឺជាឧទាហរណ៍មួយមកពីមេរៀនថ្នាក់សិក្ខាសាលាព្រះគម្ពីរមរមនស្តីពីផែនការនៃសេចក្តីសង្គ្រោះ ។^២

រូបភាព

ផែនការនៃសេចក្តីសង្រ្គោះ

ឥឡូវនេះ ខ្ញុំប្រាកដចិត្តថា ដ្យាក្រាមនេះមានប្រយោជន៍ដល់សិស្ស ហើយមេរៀននេះគឺពិតជាការសង្ខេបដ៏អស្ចារ្យអំពីកត្តាគន្លឹះនៃផែនការរបស់ព្រះវរបិតា ។

ទោះយ៉ាងណា ខ្ញុំខ្វល់ពីរង្វង់ទាំងនោះ ហើយខ្ញុំមានការអញ្ជើញចំនួនពីរដល់បងប្អូន នៅពេលបងប្អូនបង្រៀនអំពីផែនការនៃសេចក្តីសង្គ្រោះ ។

ទីមួយ សូមការពារសិស្សកុំឲ្យគិតថា ដ្យាក្រាមនេះគឺជាផែនការ ។ ដ្យាក្រាមនេះពុំមែនជាផែនការទេ ប៉ុន្តែសិស្សងាយនឹងច្រឡំថា ប្រសិនបើពួកគេដាក់រង្វង់នោះត្រឹមត្រូវ នោះពួកគេយល់ពីផែនការហើយ ។

ទីពីរ សូមជួយឲ្យផែនការនេះកាន់តែមានអត្ថន័យនៅក្នុងគំនិត និងដួងចិត្តរបស់គេ ។ សូមជួយពួកគេឲ្យស្គាល់ និងស្រឡាញ់ផែនការរបស់ព្រះវរបិតា ។ ឥឡូវ ខ្ញុំជឿថា វិធីដើម្បីធ្វើកិច្ចការនោះគឺនាំពួកគេឲ្យចូលកាន់តែស៊ីជម្រៅក្នុងផែនការនោះ ។

ក្នុងស្មារតីនេះ ខ្ញុំបានជ្រើសរើសគោលការណ៍បីដើម្បីគូសបញ្ជាក់នៅក្នុងផែនការរបស់ព្រះវរបិតា ដែលខ្ញុំជឿថានឹងជួយដល់ជំនាន់ដែលកំពុងពេញវ័យឲ្យស្គាល់ ស្រឡាញ់ និងរស់នៅតាមផែនការដ៏រុងរឿងនេះ ។

គោលការណ៍ទី #១ ៖ ព្រះយេស៊ូវគ្រីស្ទគឺជាផ្លូវ សេចក្តីពិត និងជីវិត

ដូច្នេះគោលការណ៍ទីមួយ ៖ ព្រះយេស៊ូវគ្រីស្ទគឺជាផ្លូវ ជាសេចក្តីពិត ហើយជាជីវិត ។^៣ ព្រះអម្ចាស់ និងព្រះអង្គសង្គ្រោះយេស៊ូវគ្រីស្ទគឺជាស្នូលនៃផែនការនៃសេចក្ដីសង្គ្រោះ ។ ពលិកម្មដ៏ធួនរបស់ទ្រង់ធ្វើឲ្យអ្វីគ្រប់យ៉ាងក្នុងផែនការរបស់ព្រះវរបិតាអាចកើតឡើងបាន ។ សូមស្តាប់ពាក្យពេចន៍របស់អាលម៉ា កាលលោកបានពិពណ៌នាអំពីអ្វីដែលព្រះអង្គសង្គ្រោះបានធ្វើសម្រាប់ពួកយើង ៖ « ហើយទ្រង់នឹងយាងទៅ ដោយរងការឈឺចាប់ និងទុក្ខវេទនា និងការល្បួងគ្រប់បែបយ៉ាង…

ហើយទ្រង់នឹងយកដាក់លើរូបអង្គទ្រង់នូវសេចក្ដីស្លាប់ ដើម្បីទ្រង់អាចស្រាយចំណងទាំងឡាយនៃសេចក្ដីស្លាប់ដែលចងរាស្ត្រទ្រង់ ហើយ…ទ្រង់នឹងដាក់លើរូបអង្គទ្រង់នូវជំងឺឈឺចាប់ ដើម្បីឲ្យព្រះហឫទ័យទ្រង់បានពោរពេញទៅដោយសេចក្ដីមេត្តាករុណា…ដើម្បីទ្រង់អាចដឹងស្របតាមសាច់ឈាមថា តើត្រូវជួយរាស្ត្រទ្រង់បែបណាតាមជំងឺរបស់គេ ។…

ព្រះរាជបុត្រានៃព្រះស៊ូរងឈឺចាប់ ស្របតាមសាច់ឈាម ដើម្បីទ្រង់អាចយកដាក់លើរូបអង្គទ្រង់នូវអំពើបាបទាំងឡាយរបស់រាស្ត្រទ្រង់ ដើម្បីទ្រង់អាចលុបចោលនូវអំពើរំលងទាំងឡាយរបស់គេ ស្របតាមព្រះចេស្ដានៃការដោះលែងរបស់ទ្រង់ » ។^៤

ខ្ញុំចូលចិត្តខគម្ពីរទាំងនេះ ។ ពាក្យពេចន៍ដ៏អស្ចារ្យត្រង់ខនេះ អាលម៉ាថ្លែងអំពីតួនាទីដ៏សំខាន់នៃដង្វាយធួនរបស់ព្រះយេស៊ូវគ្រីស្ទនៅក្នុងផែនការនៃសេចក្តីសង្គ្រោះ ។ នេះគឺជាដំណើររស់ឡើងវិញដែលបានប្រទានឲ្យដល់មនុស្សទាំងអស់ ។ នេះគឺជាការអភ័យទោស និងការប្រោសលោះពីអំពើបាបសម្រាប់អស់អ្នកដែលប្រែចិត្ត ។ នេះគឺជាសេចក្តីស្រឡាញ់របស់ព្រះយេស៊ូវគ្រីស្ទដែលទ្រង់ព្យាបាល លើកស្ទួយ និងពង្រឹងយើងនៅក្នុងដំណើរនៃជីវិតរមែងស្លាប់របស់យើង ។ នេះគឺជាអំណាចនៃព្រះយេស៊ូវគ្រីស្ទដើម្បីរំដោះយើងពីសេចក្តីស្លាប់ និងអំពើបាប ហើយបើកផ្លូវឲ្យយើងទទួលពរជ័យនៃការលើកតម្កើង និងជីវិតអស់កល្បជានិច្ច ។

ខ្ញុំចង់ឲ្យសិស្សយើងដឹង ហើយយល់ថា តើព្រះយេស៊ូវគ្រីស្ទពិតជាសំខាន់ខ្លាំងប៉ុណ្ណានៅក្នុងផែនការរបស់ព្រះវរបិតា និងចំពោះជីវិតរបស់ពួកគេ ។ ដោយសារតែពលិកម្មដ៏ធួនរបស់ទ្រង់ នោះពន្លឺរបស់ទ្រង់បំភ្លឺដល់ការបង្កបង្កើតទាំងអស់របស់ព្រះ ។^៥ ប្រាកដណាស់ ទ្រង់ « ជាពន្លឺនៃសេចក្ដីពិតនៅក្នុងទាំងអស់ និងតាមរយៈគ្រប់ទាំងអស់ » ។^៦ ពន្លឺនោះបានផ្ដល់ជីវិតដល់គ្រប់ទាំងអស់ ហើយនាំយក « ក្រឹត្យវិន័យមួយ ដែលតាមរយៈក្រឹត្យវិន័យនេះ អ្វីគ្រប់យ៉ាងទាំងអស់ត្រូវបានគ្រប់គ្រង » ។^៧ សូមគិតពីរឿងនោះ ! អ្វីៗគ្រប់យ៉ាងនៅក្នុងសកលលោករបស់ព្រះ កាឡាក់ស៊ីដ៏ធំបំផុតដែលមានតារារាប់រយពាន់លាន កម្ទេចតូចៗបំផុតនៃវត្ថុ រូបកាយរមែងស្លាប់របស់យើង វិញ្ញាណអមតរបស់យើង និងការរីកចម្រើនដ៏អស់កល្បរបស់យើងទាំងអស់នេះត្រូវបានគ្រប់គ្រងដោយក្រឹត្យវិន័យព្រះ តាមរយៈសេចក្តីស្រឡាញ់នៃព្រះវរបិតាសួគ៌របស់យើង និងដង្វាយធួនដ៏មហស្ចារ្យនៃព្រះអម្ចាស់យេស៊ូវគ្រីស្ទ ។

ដង្វាយធួនរបស់ព្រះយេស៊ូវគ្រីស្ទមានភាពសកលនៅក្នុងឥទ្ធិពលដែលវាមាន ហើយវាមានភាពផ្ទាល់ខ្លួនយ៉ាងខ្លាំងក្រៃលែង ។ ប្រាកដណាស់ សេចក្ដីស្រឡាញ់ សេចក្តីមេត្តាករុណា និងអំណាចរបស់ព្រះអង្គសង្គ្រោះយើងផ្តល់ពរដល់សិស្សយើងគ្រប់រូប ។ ខគម្ពីរបង្រៀនយើងថា ព្រះយេស៊ូវបានរងការឈឺចាប់ ទុក្ខព្រួយ និងក្តីលំបាកគ្រប់យ៉ាងដែលសិស្សយើងជួបនៅក្នុងជីវិតរមែងស្លាប់របស់ពួកគេ ។^៨ ទ្រង់លើកដាក់លើព្រះអង្គទ្រង់នូវអំពើបាបរបស់មនុស្សលោកទាំងអស់ដើម្បីឲ្យពួកគេអាចប្រែចិត្ត ។^៩ ព្រះយេស៊ូវស្គាល់សិស្សរបស់យើងម្នាក់ៗយ៉ាងច្បាស់ និងល្អឥតខ្ចោះ ។ ទ្រង់ស្គាល់ផ្លូវរបស់ពួកគេ ដោយសារទ្រង់ធ្លាប់បានយាងដើរលើផ្លូវទាំងនោះរួចហើយ ។

ពួកគេអាចត្រឡប់ទៅកាន់ទ្រង់វិញ មានសេចក្តីជំនឿលើទ្រង់ ប្រែចិត្តពីអំពើបាបរបស់គេ ហើយធ្វើតាមទ្រង់ដោយមានទំនុកចិត្ត និងទុកចិត្តថា ទ្រង់ស្គាល់ផ្លូវនោះ ។ ទ្រង់គឺពិតជាផ្លូវតែមួយគត់ឆ្ពោះទៅកាន់អ្វីៗដែលសំខាន់បំផុតចំពោះពួកគេ ។^១០ ទ្រង់គឺជាផ្លូវឆ្ពោះទៅកាន់ការអភ័យទោស និងការព្យាបាលដ៏អស្ចារ្យ ។ ទ្រង់គឺជាផ្លូវឆ្ពោះទៅកាន់អំណរដ៏យូរអង្វែង ។ ទ្រង់គឺជាផ្លូវឆ្ពោះទៅរកភាពជាគូកននៃព្រះវិញ្ញាណបរិសុទ្ធ និងកម្លាំងពីព្រះ ការលួងលោម វិវរណៈ ពន្លឺ និងអំណាចនៅក្នុងជីវិតរបស់ពួកគេ ។ ទ្រង់គឺជាផ្លូវឆ្ពោះទៅកាន់ភាពក្លាហាន និងការអត់ធ្មត់ និងទៅកាន់លក្ខណៈទាំងអស់នៃព្រះ ។ ទ្រង់គឺជាផ្លូវឆ្ពោះទៅកាន់សេចក្តីស្រឡាញ់ដ៏សុទ្ធសាធ និងឥតខ្ចោះ និងភាពសុខសាន្តដែលលើសអស់ពីការយល់ដឹងទាំងឡាយ ។ ទ្រង់គឺជាផ្លូវឆ្ពោះទៅកាន់ទំនាក់ទំនងនៃសេចក្តីស្រឡាញ់ និងការបម្រើ ដែលនាំមកនូវការបំពេញផ្ទាល់ខ្លួនកាន់តែស៊ីជម្រៅ មានអត្ថន័យ និងគោលបំណងនៅក្នុងជីវិតគេក្នុងពេលនេះ និងរៀងរហូតតទៅ ។ ទ្រង់គឺជាផ្លូវឆ្ពោះទៅកាន់ភាពតម្កើងឡើង និង ជីវិតដ៏នៅអស់កល្បជានិច្ច ជាមួយព្រះវរបិតាសួគ៌ និងក្រុមគ្រួសាររបស់ពួកគេ ។ បងប្អូនប្រុសស្រីជាទីស្រឡាញ់របស់ខ្ញុំ សូមបង្រៀនសិស្សរបស់យើងថា « អ្វីៗទាំងអស់ដែលល្អកើតមកពីព្រះយេស៊ូវគ្រីស្ទ » ។^១១ ទ្រង់គឺជាអ្វីៗគ្រប់យ៉ាងសម្រាប់ពួកគេ ។

គោលការណ៍ទី #២ ៖ បុត្រាបុត្រីរបស់ព្រះមានអត្តសញ្ញាណ និងគោលបំណងដ៏នៅអស់កល្បជានិច្ច

សិស្សរបស់យើងម្នាក់ៗមានអត្តសញ្ញាណ និងគោលបំណងដ៏នៅអស់កល្បជានិច្ច ។ ពួកគេម្នាក់ៗ « គឺសុទ្ធតែជាបុត្រា និងបុត្រីខាងវិញ្ញាណរបស់ព្រះមាតាបិតាសួគ៌ ដូច្នេះហើយមនុស្សម្នាក់ៗមានចរិត និងគោលដៅនៃព្រះ » ។^១២

ផែនការនៃព្រះវរបិតាសួគ៌ត្រូវបានរៀបចំឡើងដើម្បីជួយសិស្សយើងគ្រប់រូប ឲ្យបំពេញអត្តសញ្ញាណ និងគោលបំណងដ៏អស់កល្បជានិច្ចរបស់ពួកគេ តាមរយៈសេចក្តីមេត្តាករុណា និងព្រះគុណនៃព្រះអម្ចាស់យេស៊ូវគ្រីស្ទ ។ ខ្ញុំចង់ផ្តោតសំខាន់លើកត្តាបីនៃអត្តសញ្ញាណដ៏អស់កល្បជានិច្ចរបស់ពួកគេ ដែលខ្ញុំគិតថា វាសំខាន់ខ្លាំងឲ្យពួកគេយល់ ។

ខ្ញុំចាប់ផ្តើមជាមួយនឹងការពិតដែលថា សិស្សរបស់យើងគឺជាបុត្រាបុត្រីខាងវិញ្ញាណរបស់ព្រះ ។ សូមជួយពួកគេឲ្យដឹង ហើយទទួលអារម្មណ៍ថា ទ្រង់ពិតជាព្រះវរបិតារបស់ពួកគេដែលគង់នៅស្ថានសួគ៌ ។ តាមរយៈព្រះរាជបុត្រាសំណព្វរបស់ទ្រង់ នោះ ព្រះវរបិតាសួគ៌បានប្រទានពរដល់សិស្សយើងឲ្យមានឱកាស និងសមត្ថភាពដើម្បីរៀនឲ្យស៊ីជម្រៅនៅក្នុងផែនការដ៏អស់កល្បរបស់ទ្រង់—ដើម្បីបង្កើនចំណេះ និងការយល់ដឹង ដើម្បីទទួលបានសមត្ថភាពធ្វើកិច្ចការសុចរិតដ៏មានប្រសិទ្ធភាព និងប្រែក្លាយដូចជាទ្រង់ ។ នេះជាគោលបំណងដ៏ធំនៃកត្តាគ្រឹះដ៏សំខាន់នេះនៃអត្តសញ្ញាណអស់កល្បជានិច្ចរបស់ពួកគេ ។^១៣

ផ្នែកសំខាន់ទីពីរនៃអត្តសញ្ញាណដ៏អស់កល្បរបស់ពួកគេនោះគឺភាពជាម្តាយ ឬឪពុក ស្វាមី ឬភរិយាក្នុងគ្រួសារអស់កល្បជានិច្ច ។^១៤ អាពាហ៍ពិពាហ៍រវាងបុរសម្នាក់ និងស្ត្រីម្នាក់ត្រូវបានតែងតាំងឡើងដោយព្រះ ព្រោះនោះជាលក្ខណៈនៃជីវិតអស់កល្បជានិច្ច ។^១៥ នៅក្នុងទស្សនវិស័យដ៏អស់កល្បជានិច្ចរបស់ព្រះវរបិតាដែលគង់នៅស្ថានសួគ៌ នោះសិស្សរបស់យើងគឺជាម្តាយ និងឪពុកនៅក្នុងនគរទ្រង់ ។ នោះជាអត្តសញ្ញាណដ៏អស់កល្បរបស់ពួកគេ ហើយនោះជាផែនការរបស់ទ្រង់ ។ ហេតុដូច្នោះហើយ គោលបំណងដ៏អស់កល្បរបស់ពួកគេ គឺបង្កើតនូវអាពាហ៍ពិពាហ៍សេឡេស្ទាល និងគ្រួសារដ៏អស់កល្បមួយ ។

ទីបំផុត សិស្សរបស់យើងត្រូវដឹងថា ពួកគេជាពូជអ័ប្រាហាំ ជារាស្ត្រក្នុងសេចក្តីសញ្ញារបស់ព្រះ អម្ចាស់ ។ ព្រះបានសន្យានឹងអ័ប្រាហាំថា ពូជរបស់លោកនឹងយកដំណឹងល្អរបស់ព្រះយេស៊ូវគ្រីស្ទ និងបព្វជិតភាពដ៏បរិសុទ្ធ ( រួមមានពិធីបរិសុទ្ធនៃសេចក្តីសង្គ្រោះ ) ទៅកាន់គ្រប់សាសន៍ ដើម្បីផ្តល់ពរដល់ក្រុមគ្រួសារទាំងអស់លើផែនដីដែលនៅទាំងសង្ខាងវាំងនន ។^១៦ នេះគឺជាការប្រមូលផ្តុំនៃសាសន៍អ៊ីស្រាអែលដែលខ្ចាត់ខ្ចាយ ហើយវាគឺជាផ្នែកសំខាន់មួយនៃផែនការរបស់ព្រះវរបិតា ។^១៧ សិស្សរបស់យើងគឺជាពូជនៃអ័ប្រាហាំ ហើយគោលបំណងដ៏អស់កល្បរបស់ពួកគេគឺ ធ្វើកិច្ចការរបស់ព្រះដូចអ្នកបម្រើដែលទ្រង់ទុកព្រះទ័យ ។ ពួកគេមានកន្លែងសំខាន់ តួនាទីសំខាន់មួយនៅក្នុងផែនការរបស់ព្រះវរបិតា ។

សូមឈប់មួយសន្ទុះ ហើយគិតពីពរជ័យដ៏បំផុសគំនិតដែលពិតជាអស្ចារ្យដែលព្រះវរបិតាសួគ៌សព្វព្រះទ័យប្រទានដល់សិស្សរបស់យើង ។ ប៉ុន្តែសិស្សមួយចំនួនរបស់យើងនៅតែឆ្ងល់ថា តើព្រះមានអត្តសញ្ញាណ និងគោលបំណងដូចនេះសម្រាប់ពួកគេដែរឬទេ ។ សិស្សមួយចំនួនអាចមានអារម្មណ៍ថា ការប្រែក្លាយដូចជាព្រះវរបិតា ការធ្វើការដូចអ្នកបម្រើដែលទ្រង់ទុកព្រះទ័យ ឬការផ្សារភ្ជាប់អស់កល្បនឹងដៃគូជាទីស្រឡាញ់ និងការមានកូនអាចជាការណ៍មិនអាចធ្វើបានចំពោះពួកគេ ។ ពេលពួកគេឆ្លុះកញ្ចក់ នោះពួកគេពុំអាចឃើញអ្វីដែលខ្ញុំបានពិពណ៌នានៅថ្ងៃនេះទេ ។ ប្រសិនបើសិស្សរបស់អ្នកមួយចំនួនមានអារម្មណ៍បែបនោះ សូមលើកទឹកចិត្តពួកគេឲ្យឆ្លុះកញ្ចក់នោះម្តងទៀត ។ សូមប្រាប់ពួកគេឲ្យឆ្លុះកញ្ចក់ដោយភ្នែកនៃសេចក្តីជំនឿ ហើយពុំគ្រាន់តែមើលមុខពួកគេនោះទេ តែមើលព្រះភក្ត្ររបស់ព្រះអម្ចាស់យេស៊ូវគ្រីស្ទដែលនៅក្បែរគេដោយអំណាច និងសិរីរុងរឿង និងសេចក្តីស្រឡាញ់ដែលគ្មានដែនកំណត់ដ៏ឥតខ្ចោះ ។ ទ្រង់ពុំបានយាងមកដើម្បីដកពរជ័យពីពួកគេនោះទេ ។^១៨

គោលការណ៍ទី #៣ ៖ គ្រប់អ្វីៗទាំងអស់ដែលព្រះយេស៊ូវគ្រីស្ទថ្វាយព្រះនាមទ្រង់ឲ្យនោះគឺជាផ្នែកនៃផែនការ

ព្រះយេស៊ូវគ្រីស្ទពុំគ្រាន់តែជាផ្នែកសំខាន់នៃផែនការរបស់ព្រះវរបិតាឡើយ ប៉ុន្តែព្រះនាមទ្រង់ ព្រះចេស្តាទ្រង់ កិច្ចការទ្រង់ និងបុគ្គលិកលក្ខណៈទ្រង់ត្រូវបានដាក់បញ្ចូលគ្នា ។ ខ្ញុំចង់ឲ្យសិស្សយើងដឹង និងយល់ថា គ្រប់អ្វីៗទាំងអស់ដែលព្រះអម្ចាស់យេស៊ូវគ្រីស្ទថ្វាយព្រះនាមទ្រង់ឲ្យនោះគឺជាផ្នែកនៃផែនការរបស់ព្រះវរបិតា ។

សូមគិតមួយភ្លែតអំពីអ្វីៗទាំងនោះ ។ តើព្រះអង្គសង្គ្រោះបានប្រទានព្រះនាមទ្រង់នៅទីណាខ្លះ ? នេះគឺជាបញ្ជីមួយនៃអ្វីៗដែលមានព្រះនាមព្រះយេស៊ូវគ្រីស្ទដែលខ្ញុំជឿថា វាសំខាន់បំផុតសម្រាប់ឲ្យសិស្សយើងដឹង និងយល់ ៖

សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ៖ ឈ្មោះនៃសាសនាចក្រគឺជាសាក្សីមួយដែលវាត្រូវបានបង្កើតឡើងតាមរយៈ និងដឹកនាំដោយព្រះអម្ចាស់យេស៊ូវគ្រីស្ទ វាគឺជាសាសនាចក្ររបស់ទ្រង់ ។^១៩ សាសនាចក្រគឺជានគរព្រះលើផែនដីនេះ ។ តាមរយៈសាសនាចក្ររបស់ព្រះអម្ចាស់ នោះព្រះអង្គសង្គ្រោះគាំទ្រដល់បុគ្គលម្នាក់ៗ និងក្រុមគ្រួសារនៅក្នុងការស្នើរបស់ពួកគេសុំជីវិតអស់កល្បជានិច្ច ហើយរៀបចំផែនដីសម្រាប់ការយាងមកជាលើកទីពីររបស់ទ្រង់ ។ សាសនាចក្រ—សេចក្តីពិតរបស់ព្រះអម្ចាស់ និងសាសនាចក្រដ៏សកម្ម—គឺជាផ្នែកសំខាន់មួយនៃផែនការរបស់ព្រះវរបិតាសម្រាប់សេចក្តីសង្គ្រោះនៃកូនចៅរបស់ទ្រង់ ។
បព្វជិតភាពដ៏បរិសុទ្ធ តាមរបៀបនៃព្រះរាជបុត្រានៃព្រះ ៖ បព្វជិតភាពដ៏បរិសុទ្ធគឺជាអំណាច និងសិទ្ធិអំណាចនៃព្រះ ។ វាត្រូវបានផ្តល់ឲ្យដល់បុរសដើម្បីឲ្យពួកបរិសុទ្ធថ្ងៃចុងក្រោយដ៏ស្មោះត្រង់អាចធ្វើកិច្ចការរបស់ព្រះអម្ចាស់ជាមួយនឹងសិទ្ធិអំណាចទ្រង់ ព្រមទាំងដោយព្រះចេស្តាទ្រង់ ។ តាមរយៈអំណាច និងសិទ្ធិអំណាចនោះ នោះយើងទទួលពិធីបរិសុទ្ធនៃសេចក្តីសង្គ្រោះ ហើយទទួលពរជ័យដ៏មហិមានៃផែនការដ៏រុងរឿងរបស់ព្រះវរបិតា ។^២០
ដំណាក់នៃព្រះអម្ចាស់ ៖ យើងរស់នៅក្នុងគ្រានៃការសាងសង់ព្រះវិហារបរិសុទ្ធដ៏ច្រើននៅទូទាំងផែនដីទាំងមូល ។ យើងរីករាយដែលព្រះអម្ចាស់បានធ្វើឲ្យរឿងនេះកើតឡើង សម្រាប់បុត្រាបុត្រីដ៏ស្មោះត្រង់ជាច្រើនរបស់ទ្រង់ ដើម្បីទទួលពរជ័យនៃព្រះវិហារបរិសុទ្ធរបស់ពួកគេ រួមមានទាំងការផ្សារភ្ជាប់គ្រួសារអស់កល្បជានិច្ចនៅទាំងសង្ខាងនៃវាំងនន ។ ពិធីបរិសុទ្ធក្នុងដំណាក់នៃព្រះអម្ចាស់ភ្ជាប់ពួកយើងទៅនឹងអំណាចនៃភាពជាព្រះ ពិធីទាំងនោះគឺចាំបាច់សម្រាប់បុត្រាបុត្រីរបស់ទ្រង់ក្នុងផែនការនៃសុភមង្គលរបស់ព្រះវរបិតា ។^២១
ព្យាការីនៃព្រះអម្ចាស់ ៖ ព្រះអម្ចាស់បានមានបន្ទូលអំពីព្យាការីរបស់ទ្រង់ថា ៖ « ដ្បិតពាក្យសម្ដីរបស់លោកនោះហើយ អ្នកនឹងបានទទួលហាក់ដូចជាបានមកពីព្រះឱស្ឋរបស់យើងផ្ទាល់ » ។^២២ ព្យាការីនៃព្រះអម្ចាស់គឺជាអ្នកមើលឆុត និងអ្នកទទួលវិវរណៈ ។ ពាក្យសម្តីរបស់លោកគឺជាព្រះបន្ទូលរបស់ព្រះអម្ចាស់សម្រាប់ពួកយើង សម្រាប់ពរជ័យរបស់យើងក្នុងជីវិតនេះ និងភាពតម្កើងឡើង និងជីវិតអស់កល្បជានិច្ចរបស់យើងនៅបរលោកនាយ ។ ព្យាការីនៃព្រះអម្ចាស់គឺជាផ្នែកមួយដ៏អស្ចារ្យនៃផែនការរបស់ព្រះវរបិតា ។
ព្រះគម្ពីរមរមន ៖ សក្ខីបទមួយទៀតអំពីព្រះយេស៊ូវគ្រីស្ទ ៖ ព្រះគម្ពីរមរមនគឺជាសាក្សីមួយដែលថា ព្រះអម្ចាស់យេស៊ូវគ្រីស្ទគឺជាព្រះអង្គសង្គ្រោះ និងព្រះប្រោសលោះ ថាយ៉ូសែប ស៊្មីធ គឺជាព្យាការីនៃការស្តារឡើងវិញ ហើយថា ព្រះអម្ចាស់បានស្ថាបនាសាសនាចក្ររបស់ទ្រង់នៅថ្ងៃចុងក្រោយនេះ ។ វាក៏មាននូវការបង្រៀនដ៏អស្ចារ្យអំពីផែនការរបស់ព្រះវរបិតាវាមាននូវទីបន្ទាល់ដ៏មានអនុភាព ។^២៣ ដោយសារហេតុផលទាំងអស់នេះហើយដែលព្រះគម្ពីរមរមនគឺជាផ្នែកសំខាន់មួយនៃផែនការនៃសេចក្តីសង្គ្រោះដ៏អស្ចារ្យនេះ ។

បុត្រាបុត្រីរបស់ព្រះវរបិតាសួគ៌ ៖ ព្រះយេស៊ូវគ្រីស្ទថ្វាយព្រះនាមទ្រង់ទៅលើបុត្រាបុត្រីរបស់ព្រះវរបិតាសួគ៌ដែលចុះ និងរក្សាសេចក្តីសញ្ញាពិសិដ្ឋ ។ ទ្រង់ថ្វាយព្រះនាមទ្រង់លើបងប្អូនដែលបង្រៀននៅពេលអ្នកចូលរួមព្រះវិហារបរិសុទ្ធ ។^២៤ ទ្រង់មានព្រះបំណងថ្វាយព្រះនាមទ្រង់លើសិស្សរបស់បងប្អូន និងលើទីបន្ទាល់ដែលពួកគេនឹងថ្លែងទៅកាន់ពិភពលោក ពេលពួកគេចូលរួមក្នុងការប្រមូលផ្តុំនៃអ៊ីស្រាអែល ។^២៥ នេះជាផែនការរបស់ព្រះវរបិតា ។

អ្វីៗដែលយើងបានលើកឡើងនៅត្រង់នេះ—ហើយមានអ្វីផ្សេងទៀតដែលយើងអាចលើកឡើង ដូចជាគ្រប់សាលាប្រជុំទូទាំងពិភពលោក និងការអធិស្ឋានរបស់យើងទៅព្រះវរបិតាសួគ៌—គឺជាអ្វីៗដែលព្រះយេស៊ូវគ្រីស្ទបានថ្វាយព្រះនាមទ្រង់ ។ វាគឺជាផ្នែកមួយនៃផែនការ និងការបំពេញនៃការព្យាករ ។ ដូចប៉ុលបាននិយាយជាយូរមកថា « សម្រាប់ការកាន់កាប់ត្រួតត្រាក្នុងកាលដែលពេលពេញកំណត់ [ ព្រះវរបិតា ] បានមកដល់ ដើម្បីនឹងបំព្រួញគ្រប់ទាំងអស់ក្នុងព្រះគ្រីស្ទ ទាំងរបស់នៅស្ថានសួគ៌ និងរបស់នៅផែនដីផង » ។^២៦

បងប្អូនប្រុសស្រី សូមជួយសិស្សយើងឲ្យដឹងថា អ្វីៗទាំងនេះដែលពួកគេស្គាល់ច្បាស់—សាសនាចក្រ បព្វជិតភាព ព្រះវិហារបរិសុទ្ធ ព្យាការី ព្រះគម្ពីរមរមន ខ្លួនពួកគេ—ទាំងអស់នេះមានព្រះនាមរបស់ព្រះអង្គសង្គ្រោះ ដោយសារអ្វីៗទាំងនោះនៅទីនោះដើម្បីនាំយើងទៅកាន់ព្រះយេស៊ូវគ្រីស្ទ ដែលជាផ្លូវនាំទៅរកភាពសុខសាន្តក្នុងជីវិតនេះ និងភាពតម្កើងឡើង និងជីវិតអស់កល្បជានិច្ចនៅបរលោកនាយ ។

ឥឡូវ ខ្ញុំនឹងបញ្ចប់នាថ្ងៃនេះជាមួយនឹងគំនិតមួយអំពីតួនាទីនៃផែនការរបស់ព្រះវរបិតានៅក្នុងជីវិតប្រចាំថ្ងៃរបស់សិស្សយើង ។ គំនិតនោះមកពីបន្ទូលរបស់ស្តេចបេនយ៉ាមីនថ្លែងទៅកាន់រាស្ត្រទ្រង់ ។ នៅពេលចាប់ផ្តើមការថ្លែងរបស់ទ្រង់ ទ្រង់បានថ្លែងថា « សូមឲ្យអ្នកប្រុងស្ដាប់តាមយើងវិញ ហើយសូមបើកត្រចៀកអ្នក ដើម្បីឲ្យអ្នករាល់គ្នាអាចបានឮ និងចិត្តអ្នក ដើម្បីឲ្យរាល់គ្នាអាចបានយល់ និងគំនិតអ្នក ដើម្បីឲ្យសេចក្ដីអាថ៌កំបាំងនៃព្រះ អាចបានលាតត្រដាងបង្ហាញដល់អ្នកចុះ » ។^២៧

ខ្ញុំចូលចិត្តឃ្លា « ដើម្បីឲ្យសេចក្ដីអាថ៌កំបាំងនៃព្រះ អាចបានលាតត្រដាងបង្ហាញដល់អ្នកចុះ » ហើយខ្ញុំចង់អនុវត្តវាចំពោះសិស្សយើង ។ ឥឡូវ ស្តេចបេនយ៉ាមីនបានថ្លែងយ៉ាងច្បាស់ថា « សេចក្ដីអាថ៌កំបាំងនៃព្រះ » ដែលទ្រង់ចង់បង្ហាញដល់រាស្ត្រទ្រង់ គឺជាធាតុចាំបាច់នៃផែនការនៃសេចក្តីសង្គ្រោះដ៏មហិមារបស់ព្រះវរបិតា ។ សម្រាប់គោលបំណងយើង សេចក្តីថ្លែងការណ៍របស់ស្តេចបេនយ៉ាមីនមានអត្ថន័យពីរ ។ ទីមួយ វាមានន័យថា ប្រសិនបើសិស្សយើងបើកចិត្ត និងគំនិតរបស់ពួកគេ ហើយយើងបង្រៀនដោយព្រះវិញ្ញាណ នោះសិស្សយើងនឹងឃើញ ហើយយល់ពីផែនការនេះ ។ ប៉ុន្តែវាមានន័យមួយទៀត ។ ប្រសិនបើពួកគេយល់ពីផែនការនេះនៅក្នុងចិត្តពួកគេ នោះផែនការនេះនឹងក្លាយជាផ្លូវដែលពួកគេឃើញខ្លួនពួកគេ និងពិភពលោកជុំវិញពួកគេ ។ ផែនការនេះនឹងក្លាយជាទស្សនរបស់ពួកគេ ។ សិស្សរបស់យើងនឹងឃើញផែនការនេះ ហើយផែនការនេះនឹងជួយពួកគេឲ្យឃើញ ។

តើសិស្សយើងពិតជាអាចឃើញផែនការនេះដោយរបៀបណា ? ថ្នាក់រៀនរបស់យើងគឺជាផ្នែកដ៏សំខាន់នៃដំណើរការនេះ ហើយព្រះវរបិតាបានធ្វើអ្វីៗជាច្រើនដើម្បីលាតត្រដាងបង្ហាញផែនការរបស់ទ្រង់ដល់ពួកគេ ។ សូមបង្រៀនសិស្សយើងថា ពួកគេអាចឃើញផែនការនេះ ៖

នៅពេលទារកកើត និងគ្រប់ពេលដែលនរណាម្នាក់ស្លាប់ ។^២៨
នៅក្នុងព្រះវិហារបរិសុទ្ធ នៅក្នុងពិធីបរិសុទ្ធសម្រាប់មរណជន ។^២៩
នៅក្នុងពិធីបរិសុទ្ធនៃសាក្រាម៉ង់នៅថ្ងៃឈប់សម្រាក ។^៣០
នៅក្នុងការប្រែចិត្ត នៅពេលពួកគេអធិស្ឋានទៅកាន់ព្រះវរបិតាសួគ៌សូមការអភ័យទោសនៅក្នុងព្រះនាមព្រះយេស៊ូវគ្រីស្ទ ។^៣១
នៅក្នុងព្រះគម្ពីរមរមន ដែលជាសក្ខីបទដ៏មានអនុភាពអំពីព្រះយេស៊ូវគ្រីស្ទ ។^៣២
នៅក្នុងការឃើញ ការស្តាប់ និងការធ្វើតាមព្យាការីនៃព្រះ ។^៣៣
ការប្រសិទ្ធពរបព្វជិតភាព ។^៣៤
នៅក្នុងថ្នាក់សិក្ខាសាលា និងថ្នាក់វិទ្យាស្ថាន ជាកន្លែងដែលពួកគេទទួលអារម្មណ៍នៃក្តីស្រឡាញ់របស់ព្រះគ្រីស្ទ ពន្លឺ និងព្រះចេស្តាទ្រង់ ។^៣៥
គ្រប់ពេលដែលពួកគេអធិស្ឋានទៅព្រះវរបិតាសួគ៌ក្នុងព្រះនាមនៃព្រះគ្រីស្ទ ។^៣៦

សូមជួយសិស្សឲ្យដឹង និងទទួលអារម្មណ៍ពីសេចក្តីពិតដ៏អស្ចារ្យនេះ ៖ ពេលពួកគេឃើញអ្វីៗទាំងនេះ នោះពួកគេកំពុងឃើញផែនការរបស់ព្រះវរបិតានៅក្នុងសកម្មភាពហើយ ។ ប្រសិនបើពួកគេបើកដួងចិត្ត នោះព្រះវិញ្ញាណបរិសុទ្ធនឹងធ្វើជាសាក្សីដល់ពួកគេថា ផែនការនៃសេចក្ដីសង្គ្រោះគឺជាការពិត ហើយផែនការនោះគឺសម្រាប់ពួកគេ ។^៣៧ ពេលសេចក្តីជំនឿរបស់ពួកគេលើព្រះយេស៊ូវគ្រីស្ទ និងការយល់ដឹងរបស់ពួកគេកើនឡើង នោះផែនការនេះនឹងក្លាយជាទស្សនវិសយរបស់ពួកគេស្តីពីជីវិត និងខ្លួនរបស់ពួកគេ ។ ពួកគេនឹងឃើញខ្លួនពួកគេនៅក្នុងផែនការនេះ ហើយពួកគេនឹងចាប់ផ្តើមឃើញពិភពលោកជុំវិញពួកគេដូចព្រះអម្ចាស់ទតឃើញ ។

ផែនការនេះនឹងក្លាយជាប្លង់ដែលពួកគេប្រើដើម្បីយល់ពីកង្វល់ បញ្ហា និងឧបសគ្គនានាដែលពួកគេជួបប្រទះ ។ ប្រាកដណាស់ នោះជាអ្វីដែលយើងបង្រៀនយ៉ាងច្បាស់នៅក្នុង ឯកសារគោលនៃចំណេះចំណានខាងគោលលទ្ធិ ។ ខ្ញុំសូមដកស្រង់វា ៖ « ដើម្បីពិនិត្យមើលគោលគំនិតខាងគោលលទ្ធិ សំណួរខាងគោលលទ្ធិ និងបញ្ហាសង្គមដោយទស្សនវិស័យដ៏អស់កល្បជានិច្ចមួយ នោះយើងគួរពិចារណាវាក្នុងបរិបទនៃផែនការនៃសេចក្ដីសង្គ្រោះ និងការបង្រៀនទាំងឡាយរបស់ព្រះអង្គសង្គ្រោះ ។… ការធ្វើដូចនេះ អនុញ្ញាតឲ្យយើងព្រាងសំណួរជាថ្មី…ហើយមើលទៅគំនិតនានាដោយផ្អែកទៅលើបទដ្ឋាននៃសេចក្ដីពិតរបស់ព្រះអម្ចាស់ ជាជាងដោយការទទួលយកការសន្មត…របស់លោកិយ » ។^៣៨

ប្រសិនបើសិស្សយើងធ្វើតាមលំនាំនេះ នោះផែនការនៃសេចក្ដីសង្គ្រោះនឹងក្លាយជាផ្លូវដែលពួកគេយល់ពីខ្លួនពួកគេ និងការទទួលខុសត្រូវ ឱកាស និងពរជ័យរបស់ពួកគេ ។ វាជារបៀបដែលពួកគេនឹងស្វែងរកអត្ថន័យ និងគោលបំណងនៅក្នុងជីវិតរបស់ពួកគេ ។ ដោយមានព្រះវិញ្ញាណបរិសុទ្ធណែនាំ និងបង្រៀនពួកគេ នោះពួកគេនឹងមាននូវអ្វីដែលប៉ុលបានហៅថា « មានគំនិតជារបស់ផងព្រះគ្រីស្ទ » ។^៣៩

បងប្អូនប្រុសស្រីជាទីស្រឡាញ់ ខ្ញុំអធិស្ឋានថា ផែនការនៃព្រះវរបិតានឹងមានក្នុងចិត្តរបស់បងប្អូន ថាបងប្អូននឹងឃើញខ្លួនបងប្អូនក្នុងផែនការនេះ ហើយថាផែនការនេះនឹងក្លាយជារបៀបដែលបងប្អូនឃើញពិភពលោកនេះ ។^៣៨ ខ្ញុំសូមថ្លែងសាក្សីថា ផែនការរបស់ព្រះវរបិតាគឺពិត ។ ព្រះវរបិតារបស់យើងមានព្រះជន្មរស់ ។ ព្រះយេស៊ូវគឺជាព្រះគ្រីស្ទជាព្រះអង្គសង្គ្រោះ និងជាព្រះប្រោសលោះរបស់យើង ។ ខ្ញុំដឹងថា ទ្រង់មានព្រះជន្មរស់ ។ នេះគឺជាសាសនាចក្រទ្រង់ ។ បងប្អូនកំពុងធ្វើការងាររបស់ទ្រង់ ដើម្បីបង្រៀនផែនការរបស់ព្រះវរបិតាដល់ជំនាន់ដែលកំពុងពេញវ័យដោយព្រះចេស្ដានៃព្រះវិញ្ញាណបរិសុទ្ធ ។ ខ្ញុំថ្លែងទីបន្ទាល់ដូច្នោះ ក្នុងព្រះនាមនៃព្រះយេស៊ូវគ្រីស្ទ អាម៉ែន ។

© 2018 by Intellectual Reserve, Inc. All rights reserved. អនុមតិជាភាសាអង់គ្លេស ៖ ៣/១៨ ។ អនុមតិឲ្យបកប្រែ ៖ ៣/១៨ ។ ការបកប្រែនៃ « The Plan of Salvation and the Rising Generation » ។ Cambodian ។ PD60006246 258