2:3

Kami Naghisgot kang Kristo, Kami Nalipay diha kang Kristo

Chad H Webb

Administrator, Seminaries and Institutes of Religion

Sibya sa Tinuig nga Pagbansay sa Seminaries and Institutes of Religion • Hunyo 12, 2018 • Conference Center Theater

Salamat, nindot kaayo kadto. Bulahan kaayo kita. Dakong pribilehiyo nga makauban kamong tanan karon. Salamat sa tanan ninyong mga paningkamot. Nagmahal kami kaninyo ug ganahan nga mangalagad ninyo.

Sama sa daghan kaninyo, kanunay kong maghunahuna sa atong oportunidad sa pagtudlo sa kabatan-onan ug mga young adult sa Simbahan ug maghunahuna kanunay kon unsaon nato sila sa pagtudlo nga mas kusganon sa pagtabang nila sa pag-ugmad og lawom ug malungtarong pagtuo diha ni Ginoong Jesukristo. Samtang naghunahuna ako niining importanting pangutana, namalandong ko sa ideya nga gipaambit ni Elder Clark kanato sa miaging Enero sa dihang miingon siya nga ang pagdapit sa Manluluwas sa pagkat-on kabahin Niya nagpasabut og una nga kinahanglang makakat-on kita sa pag-ila Kaniya. Ug ikaduha, nga kinahanglang magkat-on kita gikan Kaniya. Gikutlo niya si Elder Neal A. Maxwell, kinsa mihisgot sa pagdapit sa Manluluwas sa “pagkat-on kanako” ug midugang, “Walay laing paagi nga makat-on pag-ayo.”¹

Akong nasabtan ug gituohan nga ang labing importanting paagi nga makatabang kita sa pagpalambo sa pagtuo sa nagtubo nga henerasyon mao ang hingpit nga pagbutang ni Jesukristo diha sa sentro sa atong pagtudlo ug pagkat-on pinaagi sa pagtabang sa atong mga estudyante sa pagduol aron makaila Kaniya , sa pagkat-on gikan Kaniya, ug sa pagpaningkamot og maayo nga mahimong sama Kaniya. Matag adlaw, kinahanglan kitang “[mag]hisgot kang Kristo, … [mag]lipay diha kang Kristo, … [ug mag]sangyaw kang Kristo.”²

Daghan kaninyo ang misugod na sa pagtubag niini nga pagdapit, tuyo nga nangandam sa mga leksyon nga naghunahuna niini nga mga ideya ug nangita og mga oportunidad sa pagpamatuod kabahin ni Jesukristo ug sa Iyang balaang mga hiyas, sa Iyang walay kinutubang gahum, ug sa Iyang walay pagkapakyas nga gugma. Niini nga mga klase dihay nadugangan nga impluwensya sa Espiritu Santo, mas daghang pagpahayag og pasalamat alang sa Manluluwas, ug mas makahuluganon ug tukma nga personal nga paggamit, ug mas daghang batan-on nga naglihok sumala sa pagtuo.

Siyempre, ang labing importanting paagi nga makatabang kita sa atong mga estudyante nga makaila sa Manluluwas mao ang pagtabang kanila nga mangandam alang sa sagradong mga ordinansa sa priesthood ug motuman sa ilang mga pakigsaad.³ Ang pagtabang kanila nga mahimong takus sa mga panalangin sa templo mao ang pagtabang kanila nga makaila ug mosunod ni Jesukristo. Apan adunay laing mga butang nga atong mahimo, samtang anaa sila uban kanato, nga makatabang kanila sa pagsalig diha Kaniya ug sa Iyang mga pagtulun-an ug Pag-ula.

Niini nga katuyoan, mosugyot ko og upat ka paagi nga mas mabutang nato si Jesukristo sa sentro sa atong pagkat-on ug pagtudlo sa matag adlaw.

1. Tutuki ang mga Titulo, mga Tahas, Kinaiya, ug mga Hiyas ni Jesukristo

Una, tutuki ang mga titulo, mga tahas, kinaiya, ug mga hiyas ni Jesukristo. Si Presidente Russel M. Nelson midapit kanato nga “ang mga pakisayran sa kasulatan kabahin ni Jesukristo diha sa Topical Guide himoon [natong] personal nga kurikulum.”⁴ Kini nga pagdapit gituyo sa pagtabang kanato nga mahibalo lapas pa sa mga butang nga gibuhat ni Jesus ug makatabang kanato nga makaila Kaniya—ang Iyang mga hiyas ug kinaiya.

Sama pananglit, usa sa mga titulo ni Jesukristo mao ang Tiglalang. Ubos sa direksyon sa Iyang Amahan, si Jesus milalang sa kalangitan ug sa yuta. Ang Tiglalang usa usab sa Iyang balaang mga tahas ug naghisgot mahitungod sa Iyang kinaiya. Samtang magtuon kita kon giunsa ug nganong gilalang ni Jesus ang yuta, tingali mangutana kita, “Unsa ang gitudlo niini kanato kon kinsa Siya? Unsa ang gitudlo niini kanato mahitungod sa Iyang mga motibo, Iyang gugma, ug Iyang gahum? Unsang balaan nga mga hiyas sa Manluluwas ang gipadayag diha sa Iyang tahas isip Tiglalang?”

Tingali inyong mahinumduman nga si Presidente Boyd K. Packer usa ka maayo nga artist kinsa ganahan mokulit og kahoy nga mga langgam. Usa ka adlaw pasahero siya sa sakyanan nga gimaneho ni Elder A. Theodore Tuttle, ug usa sa iyang mga kinulit anaa sa luyo nga lingkuranan sa sakyanan. Sa usa ka interseksyon, kalit nga mi-brake si Elder Tuttle ug ang kinulit natuwad ngadto sa salog ug nabali-bali. Nasagmuyo pag-ayo si Elder Tuttle, apan si Presidente Packer wala. Yano lang siyang miingon, “Kalimti lang na. Akoy naghimo ana. Maayo ra nako na.” Ug naayo niya. Gihimo niya kining mas lig-on kay sa kaniadto ug gani gipanindot pa og gamay. Mipasabut si Presidente Packer, “Kinsay nagbuhat nimo? Kinsa ang imong Tiglalang? Walay bisan unsa sa imong kinabuhi nga mabali o maguba nga Siya dili makaayo ug moayo.”⁵

Kon ang atong mga estudyante makasabut sa tahas ni Jesus isip Tiglalang, ug samtang mamalandong sila sa mga istorya sa kasulatan nga nagsaksi sa Iyang talagsaong gahum sa pagtarung ug pag-ayo sa Iyang mga gilalang, ang ilang kasingkasing mangandoy nga makasinati niana nga gahum ug saad diha sa ilang kaugalingong kinabuhi. Molihok dayon sila uban sa pagtuo nga makasinati sa Iyang talagsaong gahum sa pag-ayo sa unsay naghasol kanila.

Laing usa sa mga sagradong titulo ni Jesus mao ang Manunubos. Ang mga kasulatan naghisgot Kaniya niini nga tahas sa 930 ka higayon. Unsa ang gitudlo niini nga titulo kanato mahitungod sa Iyang kinaiya ug mga hiyas? Unsa ang kahulugan sa Iyang matubsanong gahum ngadto ni Alma, ni Saulo, ug sa babaye nga nasakpang nanapaw? Unsa ang kahulugan niini ngadto ni Mateo, ang maniningil sa buhis ug tigsulat sa Ebanghelyo?

Makainteres nako nga nakat-unan nato ang pagkatawag kang Mateo ngadto sa Napulog Duha sa samang kapitulo sa mga istorya ni Jesus nga nagbuhat og mga milagro ug “nag-ayo sa tanang sakit ug kaluyahon.”⁶ Ang motibo alang niini nga mga milagro mao nga si Jesus “naluoy.”⁷ Apan nganong si Mateo lamang, sa tanang tigsulat sa Ebanghelyo, ang milakip sa iyang tawag sa taliwala niini nga mga milagro? Tingali gipasunod kini sa pagsaysay, apan naghunahuna ko nga aduna pay lain nga atong makat-unan. Posible kaha nga nakabantay si Mateo nga ang labing mahinungdanong milagro nga gibuhat ni Jesus mao ang pagtubos kanato pinaagi sa pagpasaylo, ug paghigugma, ug pagbayaw, ug pagpakita sa usa ka tawo sa iyang tinuod nga kaugalingon ug potensyal, sama sa Iyang gibuhat kang Mateo?

Laing paagi sa pagtabang sa mga estudyante nga makaila sa mga hiyas ni Jesus mao ang pagtutok dili lang sa mga panghitabo sa kasulatan apan sa unsay gitudlo kanato niadto nga mga panghitabo kabahin sa Manluluwas. Sama pananglit, nganong itudlo man nato ang istorya ni Ammon nga namutol sa mga bukton sa mga tawo nga mipatibulaag sa mga karnero ni Haring Lamoni? Aron ba mahisgutan ang kahalangdon ni Ammon? O kini nga istorya sa tinud-anay mahitungod sa pagkahalangdon sa Dios? Unsa ang gitudlo kanato niini nga istorya mahitungod sa Ginoo ug sa paagi nga mopanalangin Siya niadtong mosalig diha Kaniya? Ang kaugalingong istorya ni Ammon gitapos niining madasigon nga pagpamatuod: “Ako wala manghambog sa akong kaugalingon nga kusog. … Ako nasayud nga ako walay bili; … busa … ako manghambog sa akong Dios, kay diha sa iyang kusog ako makahimo sa tanan nga mga butang.”⁸

Pipila ka bulan ang milabay, nakauban nako ang usa ka grupo sa talagsaon nga mga magtutudlo ug gihangyo nako sila sa pagpili og bisan unsa nga istorya sa kasulatan o panghitabo sa kasaysayan sa Simbahan ug sa paghunahuna kon unsa ang gipadayag niini kabahin sa kinaiya sa Dios. Ang unang magtutudlo mitubag, “Daghan og asawa.” Ang una nakong hunahuna, “Salamat gyud! Wala na kay mapili pa nga mas lisud nga hilisgutan.” Apan sa pagsugod namo og istorya, nahitabo ang usa ka talagsaong butang. Ang mga tawo misugod sa pagpamatuod nga ang Langitnong Amahan nahigugma sa tanan Niyang mga anak ug gusto nga maatiman sila. Ang laing tawo mihisgot kabahin sa kaandam sa Ginoo sa pagpabuhat kanato og lisud nga mga butang, apan nga kanunay Siyang mosuporta kanato ug moganti sa atong pagkamasulundon. Ang laing tawo namulong kabahin sa Dios isip tawo nga nagmahal og mga pamilya ug gusto sa mga bata nga matudloan sa mahigugmaong mga ginikanan. Samtang nagpadayon ang pag-istoryahanay, nakaamgo ko nga ang Espiritu nagsaksi sa matang ug kinaiya sa Dios, nga gibati namo nga mas duol sa atong Amahan sa Langit ug sa Iyang Anak nga si Jesukristo, ug nga nadugangan ang among pagkaila ug paghigugma Kanila.

Si Jesukristo mao ang atong Tiglalang. Siya ang atong mahigugmaon ug mapasayloon, manggiloy-ong Manunubos ug Tigluwas. Siya usab ang Emmanuel, ang Kordero sa Dios, ang Mesiyas, ang Usa nga Balaan sa Israel, ug ang Tigpasiugda ug Tighingpit sa Atong Pagtuo. Samtang tutukan nato ang Iyang mga titulo, mga tahas, ug kinaiya, ug mga hiyas, ang Espiritu mopamatuod kabahin Niya, nga magdala og mas dakong pagsabut ug gugma kon kinsa gayud Siya ug mas dakong tinguha nga mahisama Kaniya.

2. Hatagi og Gibug-aton ang Ehemplo ni Jesukristo

Ang ikaduhang paagi sa pagbutang ni Jesus sa sentro sa atong pagtudlo mao ang pag-ila ug paghatag og gibug-aton nga Siya mao ang hingpit nga ehemplo, ang representasyon ug pagpahayag sa tanan nga mga baruganan sa ebanghelyo.⁹ Usa sa among mga magtutudlo bag-ohay lang nga mipaambit kanako nga alang sa pagtuon sa ilang pamilya sa kasulatan, nakahukom sila nga mobasa pag-usab sa Bag-ong Tugon. Apan niining higayuna, imbis motutok sa unsay gisulti ni Jesus, ilang tutukan ang unsay gibuhat ni Jesus. Ang pagtutok sa Iyang hingpit nga ehemplo nagdapit usab sa Espiritu Santo sa pagpamatuod kabahin Niya.

Bisan kon dili direkta nga gihisgutan si Jesus diha sa istorya nga atong gitudlo, mahimo gihapon kitang motudlo Kaniya isip ehemplo sa baruganan nga gihulagway sa istorya. Sama pananglit, human maila ug maanalisar ang usa ka baruganan, mahimo kitang mangutana, “Makahunahuna ba kamo og higayon diha sa kasulatan sa dihang si Jesus mipakita og ehemplo niini nga baruganan?” O, “Kanus-a kamo nakakita ni Jesus nga mipakita og ehemplo niini nga baruganan diha sa inyong kinabuhi o alang kaninyo?” Usa ka estudyante bag-o lang nga gipangutana niana kalabut sa ehemplo sa kalumo sa Manluluwas. Ang iyang mga hunahuna ug mga pagbati misangput ngadto sa malumong paagi nga ang Manluluwas kanunay nga mitratar kaniya. Kini nga kasinatian, diha sa klasehanan, nakamugna diha kaniya og lawom nga tinguha nga mahimong mas Kristohanon ug mas malumo ngadto sa mga tawo nga nagdepende kaniya, sama nga nagdepende siya sa Ginoo.

Mahimo ninyong tun-an ang tanang basahon nga nasulat sukad ug dili makakita og mas maayong paghulagway sa matag baruganan sa ebanghelyo kay sa makita diha sa mga istorya sa kasulatan kabahin ni Jesus ug sa Iyang mahangturong pagpangalagad. Ang pagpamalandong og mga ehemplo sa Ginoo sa Iyang mga tahas isip ang Jehova, ang mortal nga Kristo, ug ang nabanhaw nga Manluluwas mopalambo sa gahum ug kapasidad sa atong mga estudyante sa paghimo og epektibo, matarung nga aksyon. Modala kini sa atong mga leksyon lapas pa sa mga diskusyon kabahin sa mga pamatasan ug pagkontrolar sa kaugalingon ug mokonektar sa mga estudyante ngadto sa gahum sa Manluluwas ug sa mahangturong plano sa kalipay.

Aron sa paghulagway, unsaon kaha nato sa pagtudlo sa baruganan sa pagkamatinuoron? Isip lang ba nga “labing maayong polisiya,” tungod kay mas mosalig nato ang mga tawo kon matinuoron kita? O ang kaligdong anaa ba sa sentro sa kinaiya ni Kristo? Kon gusto kita nga mahimong sama Kaniya, kinahanglan ba nga makat-on kita sa pagsunod sa Iyang hingpit nga ehemplo sa pagkahingpit nga matinuoron? Ang sama nga mga matang sa mga pangutana mahimong ipangutana alang sa matag baruganan sa ebanghelyo.

Si Arthur Henry King nindot nga mitudlo niini nga ideya dihang siya miingon, “Nagsimbolo kita [sa maayo] diha sa usa ka tinuod nga indibidwal—si Jesukristo, ang Anak sa Dios. Siya usa ka tawo, dili usa ka baruganan, usa ka tawo nga naglakip sa tanang baruganan. … Ug ang pagsunod sa usa ka tawo lahi kaayo kay sa pagsunod sa usa ka baruganan. … Dili nato angayng sulbaron ang pilosopikanhon nga pagkakomplikado sa pamatasan. Wala kini labut niana. Kinahanglan kitang magtuon sa mga Ebanghelyo, motan-aw unsa ang gibuhat ni Kristo, ug maningkamot nga ipahisama ang atong mga kaugalingon diha sa iyang gibuhat. Tungod kay mabati nato ang espiritu sa Agalon, ang gugma sa Agalon, ug tungod kay gisubsob nato ang atong kaugalingon diha sa ebanghelyo, nga masayud kita kon unsa ang kinahanglan natong buhaton. Ang ebanghelyo nga atong gitipigan sulod kanato makapahimo nato sa bisan unsang higayon nga mobati kon unsay angay natong buhaton sa usa ka sitwasyon.”¹⁰

Dunay gahum nga moabut kon atong ikonektar ang atong mga paningkamot sa pagsunod sa ebanghelyo ngadto ni Jesukristo. Kon mobati kita nga nagpakaaron ingnon lang nga naglihok o nga ang pagsunod sa ebanghelyo nahimong lista sa mga buluhaton nga angayng tumanon, tingali mipahilayo kita sa tinubdan sa grasya ug kalipay nga atong gitinguha. Tingali naghimo pa gani kita sa tanang sakto nga mga butang apan makita nga wala kita makakab-ut sa tumong. Ang ebanghelyo dili listahan sa mga panginahanglan; kini ang maayong balita nga si Jesukristo mibuntog sa sala ug kamatayon. Si Jesukristo ang mahinungdanong tawo diha sa plano sa atong Amahan sa Langit sa pagtabang kanato nga mahisama Kaniya. Siya ang hingpit nga ehemplo kon unsaon nato sa pagpakabuhi ug ang tinubdan sa balaanong makaabag nga gahum nga atong gikinahanglan. Samtang makat-on kita sa pagsunod sa Iyang ehemplo ug mokonektar sa atong mga paningkamot sa pagsunod sa ebanghelyo ngadto Kaniya, makakaplag kita og kalipay sa pagkahimong Iyang mga disipulo.

3. Pangita og mga Sumbanan ug Pagkasama ni Jesukristo

Ikatulo, kinahanglang mangita kita og mga sumbanan ug mga pagkasama¹¹ sa Manluluwas diha sa mga kinabuhi sa mga propeta ug ubang matinud-anong mga lalaki ug babaye sumala sa narekord diha sa mga kasulatan. Sama sa gitudlo ni propeta Jacob, “Ang tanan nga mga butang diin gikahatag sa Dios gikan sa sinugdanan sa kalibutan, ngadto sa tawo, mao ang naghulagway kaniya.”¹²

Tungod niini nga ideya, sa dihang gitudlo nako ang Daang Tugon sa seminary, mibutang ko og dagko nga mga piraso sa papel sa likuran nga bongbong sa klasehanan. Sa ibabaw sa matag papel akong gisulat ang ngalan sa usa ka propeta sa Daang Tugon. Sa dihang nahuman na kami sa pagtuon og usa ka seksyon sa Daang Tugon, gihangyo nako ang mga estudyante sa paghunahuna sa mga butang nga ilang nakat-unan mahitungod sa propeta nga among gitun-an ug sa unsang paagi ang iyang mga kasinatian nagpakita daan o nagpahinumdom kanila sa Manluluwas. Human makat-on mahitungod ni Adan, ang mga estudyante misulat og sama sa, “Si Adan anak sa Dios.” “Imortal siya.” “Miadto siya sa tanaman.” “Boluntaryo niyang gidawat ang kaugalingon niyang kamatayon aron kita mabuhi.” Dili madugay adunay tawo nga mangutana, “Naghisgot pa ba gihapon kita kang Adan, o si Jesus na ang atong gihisgutan?”

Nianang panahona, usa ka estudyante ang sayo nga miabut sa klase aron ipaambit kanako ang iyang kasinatian sa pagtuon sa mga kasulatan. Sa miaging gabii nagbasa siya kabahin sa mga sangputanan sa Pagkapukan ni Adan diha sa Moises 4, nga nag-ingon, “Mga tunok usab, ug mga sampinit kini modala nganha kanimo.”¹³ Tungod kay nakat-on na siya sa pagpangutana, “Sa unsang paagi kini nga istorya nagpamatuod kang Kristo?”, naagni siya sa pagpangutana, “Nasayud ba si Jesus sa dihang namulong Siya kang Adan nga moabut ang adlaw literal Niyang isul-ob ang mga sangputanan sa Pagkapukan isip korona nga mga tunok?”

Ang among mga estudyante nakakita og laing ehemplo diha sa kinabuhi ni Joseph sa Ehipto, miila og sobra sa 60 ka paagi nga siya usa ka pagkasama sa Manluluwas. Ang mga estudyante mipasabut nga silang duha gimahal sa ilang Amahan, gikalagutan sa ilang mga igsoon, ug gibaligya sa bili sa usa ka ulipon. Ilang nabantayan ang mga pagkasusama sa ilang mga tintasyon ug sa kamatuoran nga ang Dios kanunay nga uban kanila. Kini nga mga koneksyon labaw pa kaayo kay sa usa lang ka butang nga makapainteresado. Ang mga kinabuhi sa pinili nga mga propeta sa Ginoo mga pagkasama Kaniya ug nagtudlo kanato sa Iyang balaan nga mga kinaiya. Kon gamiton sa epektibong paagi, kini nga panglantaw sa mga kahimtang makatabang nato nga mas makaila ni Jesus ug mas mahisama Kaniya.

Ang akong asawa, si Kristi, bag-o lang nga mitudlo niining sama nga istorya sa kasulatan kabahin ni Jose sa Ehipto ug nangutana sa klase, “Unsa nga Kristohanon nga mga kinaiya ang inyong nakita diha sa ehemplo ni Jose?” Gihisgutan namo ang iyang abilidad sa paghimo sa matag pagsulay nga usa ka panalangin. Gihisgutan namo ang iyang pagkamasulundon, iyang pailub, ang iyang kaandam sa paghinumdom niadtong nanginahanglan, ug ang iyang kaandam sa pagpasaylo. Ang pangutana nakapahinumdom nako sa usa ka milabay nga higayon nga nagtuon niini nga istorya ug naghunahuna kon sama sa unsa kaha sa dihang gipadayag ni Joseph ang iyang kaugalingon ngadto sa iyang mga igsoon. Ang mga kasulatan nag-ingon nga “nangalisang sila sa atubangan niya.”¹⁴ Mapanglantawan ba nimo kon sama sa unsa kana nga higayon ug unsa kaha ang ilang gibati, nasayud sa unsay ilang nabuhat? Apan mitubag si Joseph kanila, “Dumuol kamo kanako … Ako mao si Jose nga inyong igsoon. … Ayaw ninyo ikasubo … kay ang Dios nagpadala kanako sa pag-una kaninyo aron sa pagbantay sa kinabuhi.”¹⁵ Samtang gihanduraw ko kana sa akong hunahuna, mas nasabtan nako kon sama sa unsa nga mobarug kita sa atubangan sa Ginoo sa Adlaw sa Paghukom. Sigurado nga mahunahuna nako nga atong mahinumduman ang atong mga sala ug tingali mobati nga “malisang” nga anaa sa Iyang presensya. Apan mahunahuna usab nako Siya nga moingon samtang pabarugon kita Niya gikan sa atong pagluhod, “Duol kanako, paduol kanako, ako ang inyong igsoon. Gipadala ako sa Dios aron sa pagbantay sa kinabuhi.”

Kon atong tutokan ang mga sumbanan ug mga pagkasama ni Jesukristo, niana makatabang kita sa atong mga estudyante sa pag-ila sa Iyang mga hiyas ug mga kinaiya pinaagi sa pagpangutana og sama sa:

“Unsa nga Kristohanong mga kinaiya ang inyong nakita sa kinabuhi niini nga propeta?”
“Kanus-a kamo napanalanginan tungod kay si Jesus nagbaton niini nga hiyas?” O, “Sa unsang paagi nga gipakita sa Manluluwas kini nga kinaiya alang kaninyo?”
“Unsay inyong mabuhat aron mahimong mas sama ni Jesukristo ug maangkon kini nga balaanong hiyas?” O, “Unsay inyong nakat-unan mahitungod sa inyong Amahan sa Langit ug ni Jesukristo nga nakadasig ninyo sa paglihok diha sa pagtuo sa pagsunod Kanila?”

Ug kon ang mga estudyante mohatag og mga tubag sama sa “mag-ampo” o “mobasa sa mga kasulatan”, mas maayo nga ato silang tabangan nga makonektar kadto nga mga buhat ngadto sa Langitnong Amahan ug ni Jesukristo pinaagi sa pagpangutana nila og sama sa:

“Sa unsang paagi malahi ang inyong mga pag-ampo kon makaila kinsa ang inyong giistoryahan?”
“Sa unsang paagi kamo magtuon sa mga kasulatan nga makatabang kaninyo nga mas makaila sa Manluluwas ug mas mahisama Kaniya?”

Kini nga mga matang sa pangutana makatabang sa atong mga estudyante nga makapalambo og mas dakong gahum ug kapasidad sa pag-ila sa Manluluwas ug sa pagkat-on gikan Kaniya.

4. Paghatag og Lunsay nga Pagpamatuod kabahin ni Jesukristo

Ang ikaupat nga atong mahimo mao ang paghatag og lunsay nga pagpamatuod kabahin ni Jesukristo.

Kinahanglang maghisgot kita Kaniya nga mas kanunay ug mas kusganon ug uban sa dugang nga pagtahud, pagsimba, ug pagpasalamat. Kinahanglan ipaambit nato ang atong kaugalingong pagpamatuod, ug kinahanglang mangita kita og epektibo nga mga paagi sa pagdapit sa atong mga estudyante nga mopaambit sa ilang mga pagpamatuod sa usag usa. Sa usa ka bag-ong diskusyon sa klase kalabut sa baruganan sa pag-ampo, usa ka magtutudlo midapit sa mga estudyante sa pagkonsiderar kon unsa ang gitudlo kanato sa pagdapit sa Ginoo sa pag-ampo ug sa Iyang saad nga motubag mahitungod sa kinaiya sa atong Amahan sa Langit. Dayon gidapit sila sa pagkonsiderar sa mga hiyas sa Manluluwas, nga nagtugot kanato sa pag-ampo diha sa Iyang ngalan. Uban niining yano nga mga pangutana, ang usa ka leksyon sa pag-ampo nahimong oportunidad sa mga estudyante sa paghatag og pagpamatuod sa gahum ug gugma sa atong Amahan sa Langit ug sa Iyang Anak, si Jesukristo. Mibiya ang mga estudyante nga dunay dugang nga pasalamat sa ilang relasyon ngadto sa Dios ug sa talagsaong panalangin nga gihatag kanato sa pag-ampo diha sa ngalan ni Jesukristo, kinsa mao ang atong Manlalaban sa Amahan.

Laing importanting paagi sa pagpamatuod mahitungod ni Jesukristo mao ang pagtugot sa mga pagpamatuod sa mga propeta, karaan ug moderno, nga madungog diha sa atong mga klasehanan. Si Apostol Pedro miingon nga kita “gipili sa Dios ingon nga mga saksi. … Siya misugo kanato sa … pagpanghimatuod nga siya mao ang gitudlo sa Dios. … Kaniya ang tanang mga propeta nanghimatuod.”¹⁶

Bag-ohay lang, si Elder Robert D. Hales mihimo og usa ka pahayag nga nakapamalandong nako pag-ayo. Miingon siya, “Kita motan-aw, maminaw, mobasa, magtuon, ug mopakigbahin sa mga pulong sa mga propeta aron mapasidan-an ug maprotektahan. Sama pananglit, ‘Ang Pamilya: Usa ka Pamahayag ngadto sa Kalibutan’ gihatag dugay na sa wala pa nato masinati ang mga hagit nga karon giatubang sa pamilya.” Ug dayon gidugang niya kini nga hunahuna, “‘Ang Buhi nga Kristo: Ang Pagpamatuod sa mga Apostoles’ giandam nang daan alang sa panahon nga mas gikinahanglan kini nato.”¹⁷

Dili ako tawo nga maghisgot sa mga kaguol ug kagubot, apan nahimong klaro nganong ang pamahayag gihatag nga nag-una sa kusog nga mga hangin nga naghuros batok sa tradisyonal nga mga pamilya. Ug ang pagkadungog sa usa ka propeta nga miingon nga ang dokumento nga “Buhi nga Kristo” gihatag “nang daan alang sa panahon nga mas gikinahanglan kini nato” nakapahunahuna nako nga ang dugang nga mga hangin mohuros, mohampak sa pagtuo sa atong mga estudyante ug atong mga anak.

“Ang Buhi nga Kristo: Ang Pagpamatuod sa mga Apostoles,” namahayag, “[Kami] mohalad sa [among] pagpamatuod sa pagkatinuod sa Iyang dili katupngan nga kinabuhi ug sa walay katapusan nga gahum sa Iyang labing dako nga sakripisyo sa pag-ula. … Siya mao ang Halangdong Jehova sa Daang Tugon, ang Mesiyas sa Bag-o. … Siya naglakaw sa mga dalan sa Palestina, nag-ayo sa masakiton, naghimo nga ang buta makakita, ug nagbuhi sa patay. Siya nagtudlo sa mga kamatuoran sa kahangturan. … Siya mihatag sa Iyang kinabuhi aron sa pag-ula sa mga sala sa tanang katawhan. … Siya mibangon gikan sa lubnganan para mahimong ‘nahaunang gibanhaw sa mga nangamatay.’ … Siya ug ang Iyang Amahan nagpakita ngadto sa batang lalaki nga si Joseph Smith, sinugdanan sa dugay nang gisaad nga ‘kapaigoan sa kahingpitan sa mga panahon.’ … Kami mopamatuod nga Siya sa umaabut nga adlaw mobalik nganhi sa yuta … [ug] momando isip Hari sa mga Hari ug mohari isip Ginoo sa mga Ginoo. … Si Jesus mao ang buhi nga Kristo, ang imortal nga Anak sa Dios. Siya mao ang halangdong Haring Emmanuel, kinsa nagbarug karon sa tuong kamot sa Iyang Amahan. Siya mao ang kahayag, ang kinabuhi, ug ang paglaum sa kalibutan. … Salamat ngadto sa Dios sa dili katupngan nga gasa sa Iyang balaan nga Anak.”¹⁸

Kini nga pagsaksi sa mga propeta sa Dios gihatag sa wala pa ang panahon nga ang atong mga estudyante ug atong mga anak labing magkinahanglan niini. Kinahanglang tabangan nato sila nga makapatubo og lig-on nga pagpamatuod diha sa ilang mga hunahuna ug mga kasingkasing. Wala nay labaw pa nga atong mabuhat nga mopanalangin sa atong mga estudyante kay sa pagtabang kanila nga makaila ni Jesukristo. Kinahanglang tabangan nato sila nga mahigugma Kaniya, mosunod Kaniya, ug tuyo nga maningkamot nga mahimong sama Kaniya. Ngadto sa pagsaksi sa mga propeta sa Dios akong idugang ang akong mapaubsanong pagpamatuod nga si Jesus mao ang Kristo, ang Anak sa Dios ug Manluluwas sa kalibutan.

Sa sagradong pangalan ni Jesukristo, amen.