Eda Veivosakitaki Karisito, Eda Rekitaki Karisito.

Chad H.Webb

Vakailesilesi Liu, Semineri kei na Inisitute ni Lotu

Kakaburaki ni Vuli Vakayabaki ni Semineri kei na Inisitute ni Lotu • 12 ni June, 2018 • Olo ni Vale ni Koniferedi

Vinaka vakalevu sa totoka sara oya. Eda sa kalougata dina. E dua dina na madigi totoka na tiko kei kemuni kece ena siga nikua. Vinaka vakalevu ena veika kece o ni vakayacora tiko. Keimami lomani kemuni ka taleitaka dina na veiqaravi kei kemuni.

Au dauvakasamataka na madigi e tiko vei keda meda vakavulici ira na itabagone kei na itabagone qasecake ena Lotu ka vakasamataka vakawasoma ena sala eda rawa ni vakavulici ira ena kaukauwa mana me vukei ira me tara cake na vakabauta vua na Turaga o Jisu Karisito. Niu vakasamataka na taro bibi oqo, au nanuma kina na vakasama nei Elder Clark a wasea ena Janueri sa oti ni a kaya ni veisureti nei iVakabula meda vuli mai Vua e kena ibalebale taumada meda kilai Koya ka kenai karua meda vuli mai Vua. E kena ikarua, ni dodonu meda vuli mai Vua. A cavuta na vosa nei Elder Neal A. Maxwell, ka a kaya ni veisureti ni iVakabula mo dou “vuli vei au” ka semata, “E sega tale na sala ni vuli vakatitobu oqo ga.”¹

Au sa kila vinaka oqo ka vakadinata ni sala bibi duadua meda vukea na kena tarai cake nodra vakabauta na itabatamata e tarava o ya meda biuti Jisu Karisito me usutu ni noda veivakavulici kei na vuli mera kilai Koya na gonevuli, vuli mai Vua, ka sasaga tiko mera vakataki Koya. Ena veisiga, meda “veivosakitaki Karisito, … reki ena vuku i Karisito, … [ka] vunautaki Karisito.”²

E vuqa ko ni sa vakaio oti tiko ki na veisureti oqo, ka vakarautaka vagumatua na lesoni ena vakasamataki tiko oqo ka me laurai na madigi me vakadinadinataki o Jisu Karisito kei na Nona ivakarau vakalou, kaukauwa tawayalani, kei na Nona loloma tawadruka. Ena veikalasi oqo sa veivakauqeti vakalevu tiko kina na Yalo Tabu, levu na vakavinavinaka vua na iVakabula, vakaibalebale vakalevu ka yaga na kena bulataki, ka vuqa na itabagone era sa vakabauta tiko.

E dina, na sala bibi duadua meda vukei ira noda gonevuli mera kila na iVakabula o ya meda vukea nodra vakavakarau ki na cakacaka vakalotu tabu ni matabete ka maroroya nodra veiyalayalati.³ Me vukea nodra rawata na kalougata ni valetabu o ya mera vukei mera kila ka muri Jisu Karisito. Ia e tiko tale na ka meda cakava, ni ra tiko kei keda, ka na vukea mera vakararavi Vua kei na Nona ivakavuvuli kei na veisorovaki.

Ena kena oqo, meu vakatura e va na sala me usutu kina o Jisu Karisito ena noda vuli tiko kei na veivakavulici e veisiga.

1. Vakanamata ki na iTutu, iLesilesi, iVakarau, kei na iTovo i Jisu Karisito.

iMatai, vakanamata ki na itutu, ilesilesi, ivakarau, kei na itovo i Jisu Karisito. A sureti keda o Peresitedi Russell M. Nelson “meda vakayacora me noda lewe ni vuli yadua na ivakamacala vakaivolanikalou kei Jisu Karisito ena Topical Guide.⁴ Na veisureti oqo mena vukei keda meda kila vakalevu cake na veika a cakava o Jisu ka vukea meda kilai Koya sara—na Nona itovo kei na ivakarau.

Me vakataka, e dua na itutu i Jisu Karisito na Dauveibuli. Ena veidusimaki nei Tamana, a bulia o Jisu Karisito na lomalagi kei na vuravura. Na Dauveibuli sa dua talega na Nona ilesilesi vakalou ka vosa ki na Nona veika bula. Ni da vulica na sala kei na vuna e bulia kina o Jisu na vuravura, eda na taroga “Na cava eda vulica baleta o cei o Koya? Na cava e vakavulici keda baleta na Nona inaki, Nona loloma, kei na Nona kaukauwa? Na itovo vakalou cava ni iVakabula e vakatakilai ena Nona ilesilesi ni Dauniveibuli?”

Mo nanuma tiko ni o Peresitedi Boyd K. Packer a dua na daudroini totoka ka dau taleitaka na ceu manumanu vuka kau. Dua na siga a pasidia tiko ena motoka a draivataka tiko o Elder A. Theodore Tuttle, ka dua na nona ceuceu a toka ena dabedabe e muri. Ena itakoso, a butuka kaukauwa na bereki o Elder Tuttle ka lutu mai ra na ceuceu o ya ka kamusu vakamatailalai. A leqa vakalevu o Elder Tuttle, ia a malumu tu ga o Peresitedi Packer. A kaya ga mai, “Guilecava. Au a cakava!” E rawa niu vakavinakataka.” A qai cakava vakakina. A vakaukauwataka cake sara ka vakavinakataka cake vakalailai. A vakamacalataka o Peresitedi Packer, “O cei a buli iko? O cei na nomu Dauveibuli? E sega ni dua na ka ena nomu bula e veve se ramusu me sega ni vakavinakataka rawa ka tudonutaka”⁵

Ni ra kila vinaka na noda gonevuli na ilesilesi i Jisu na Dauniveibuli, ka ra tugana na ivolanikalou e tukuna na Nona kaukauwa cecere me tudonutaka ka vakabula na Nona ka buli, ena gadreva na yalodra mera vakila na kaukauwa o ya kei na yalayala ki na nodra bula. Era na qai cakacaka ena vakabauta mera vakila na Nona kaukauwa cecere me tudonutaka na nodra leqa.

E dua tale na itutu tabu i Jisu Karisito o ya na Dauveivueti. E tukuna na ivolanikalou vaka 930 na Nona itutu oqo. Na cava e vakavulica vei keda na itutu oqo baleta na Nona itovo kei na ivakarau? Na cava na ibalebale ni Nona kaukauwa veivueti vei Alama, Saula, kei na marama a dautagane? Na cava na kena ibalebale vei Maciu, na turaga ka vola na Kosipeli?

Au taleitaka ni da vulica na veikacivi nei Maciu ki na Tinikarua ena wase vata ga ni itukutuku i Jisu ni caka mana tiko ka “vakabula kecega na mate kei na malumalumu kecega.”⁶ Na inaki ni cakamana oqo ni ko Jisu “sa lomani ira.”⁷ Ia cava na vuna o Maciu walega, vei ira kece na dauvola Kosipeli, a oka nona veikacivi ena cakamana oqo? E rawa ni dua na ituvatuva veitaravi ni tukutuku, ia au kila ni tiko kina e dua tale na ka e rawa nida vulica. A rawa beka vei Maciu me kila ni cakamana cecere duadua a cakava o Jisu o ya me vueti keda ena veivosoti, loloma, veilaveti, ka vakatakila o cei dina o koya kei na qaqa, me vaka a cakava kivei Maciu?

Dua tale na sala mera vukei na gonevuli mera kila na itovo i Jisu o ya sega walega ni raici na itukuni ena ivolanikalou ia ena itukutuku e vakavulica baleta na iVakabula. Me vakataka, cava eda vakavulica kina na italanoa kei Amoni ni a musuka na ligadra na tagane a cemuria na sipi nei Tui Lamoni? Me tukuni beka kina na qaqa nei Amoni? Se na italanoa oqo e baleta tiko na cecere ni Kalou? Na cava e vakavulica na italanoa oqo baleta na Turaga kei na sala e vakalougatataki ira era vakararavi Vua? Na italanoa kei Amoni a tini ena ivakadinadina totoka oqo: “Au sega ni dokadokataka na noqu kaukauwa. … Au kila niu sa ka walega; … o koya … au na dokadokataka ga na noqu Kalou, niu sa rawa ni kitaka na ka kecega ena nona kaukauwa.”⁸

Ena vica na vula sa oti, au a tiko kei na dua na ilawalawa qasenivuli kau a kerea mera digitaka e dua na italanoa mai na ivolanikalou se gauna mai na itukutuku makawa ni Lotu ka vakasamataka na ituvaki ni Kalou. E sauma mai na matai ni qasenivuli, “Levu na watina.” Na ka au nanuma rawa, “Vinaka vakalevu! O na sega ni digitaka e dua tale na ulutaga e dredre cake.” Ni keimami sa tekivu veivosaki, a yaco e dua na ka vinaka. Era sa tekivu soli ivakadinadina na tamata ni Tamada Vakalomalagi sa lomana na luvena kecega ka gadreva mera kauwaitaki. E dua a kaya baleta na gagadre ni Turaga me kerea na ka dredre vei keda, ia sa dau tokoni keda ka sauma na noda talairawarawa. E dua a kaya ni Kalou sa lomana na matavuvale ka gadreva na gone mera vakavulici maivei ira na itubutubu dauloloma. Ni toso na veivosaki, au vakila ni sa vakadinadinataka tiko na Yalo na ituvaki kei na itovo ni Kalou, ni da sa voleka vua na Tamada Vakalomalagi kei na Luvena o Jisu Karisito, ka da sa kila ka lomani Rau vakalailai cake.

O Jisu Karisito na noda Dauveibuli. Sai koya na noda Dauveivueti ka Dauniveisereki dauloloma, veivosoti, ka yalololoma. O Koya o Imanueli, na Lami ni Kalou, na Mesaia, na Yalo Savasava i Isireli, sa Tekivuna ka Sauma Talega na Noda Vakabauta. Ni da vakanamata ki na Nona itutu, ilesilesi, ivakarau itovo, na Yalo ena vakadinadinataki Koya, ka kauta mai na kila cecere kei na loloma baleti Koya dina kei na gagadre levu meda na vakataki Koya.

2. Vakamatatataka na iVakaraitaki i Jisu Karisito

Na ikarua ni sala me usutu o Jisu ki na noda veivakavulici o ya meda kila ka vakamatatataka ni o Koya na ivakaraitaki vinaka, ka taucoko kei na vakaraitaki ni ivakavuvuli ni kosipeli.⁹ E dua na qasenivuli a wasea vei au ni nodratou vuli ivolanikalou vakavuvale, e ratou sa na wilika tale na Veiyalayalati Vou. Ia ena gauna oqo, e ratou sa na sega ni raica na ka e kaya o Jisu, e ratou sa na raica na ka a cakava o Jisu. Nida vakanamata tu ena Nona ivakaraitaki uasivi ena rawa ni sureta na Yalo Tabu me vakadinadinataki Koya.

Ni sega mada ga ni tukuni o Jisu ena italanoa eda vakavulica tiko, eda rawa tikoga ni dusi tiko Vua me ivakaraitaki ni ivakavuvuli e tukuni tiko. Me vakataka, ni kilai ka dikevi na ivakavuvuli, eda na taroga, “Vakasamataka mada e dua na gauna ena ivolanikalou a ivakaraitaki kina o Jisu ena ivakavuvuli oqo? Se, “Gauna cava o sa raici Jisu kina me ivakaraitaki ni ivakavuvuli oqo ena nomu bula se ena vukumu? Dua na gonevuli a tarogi me baleta na ivakaraitaki ni iVakabula ena yalomalua. A vakasamataka ka vakila na sala malumu a dauqaravi koya kina na iVakabula. Na kila oqo, ena kalasi, a tauyavutaki vua na gagadre me na bula Vakarisito cake ka kauwaitaki ira na tamata era vakararavi tiko vua, ni ravi tiko o koya vua na Turaga.

Sa rawa mo taleva na ivola taucoko e volai ka sega ni kunea e dua na ivakaraitaki vinaka cake ni ivakavuvuli ni kosipeli me vakataka na italanoa kei Jisu Karisito kei na Nona cakacaka tawamudu. Na tugani ni ivakaraitaki ni Turaga ena Nona itavi vaka-Jiova, na Karisito vakayago, kei na iVakabula sa tucaketale ena vakaukauwataki ira na gonevuli ka gu mera caka mana, ka dodonu. Ena muataka na lesoni ena taudaku ni veivosaki baleta na lawa kei na kila-ka ka semati na gonevuli ki na kaukauwa ni iVakabula kei na ituvatuva ni bula marau.

Ena ivakaraitaki, eda na vakavulica vakacava na ivakavuvuli ni daudina? Oqo sa “lawa vinaka duadua,” baleta era na vakabauti keda na tamata keda sa daudina? Se na caka dodonu sa usutu ni itovo i Karisito? Keda meda sa na vakataki Koya, e dodonu meda muria na Nona ivakaraitaki vinaka ni daudina? Na mataqali taro vata ga ena rawa me tarogi kina na ivakavuvuli yadua ni kosipeli.

A vakavulica o Arthur Henry King na vakasama totoka oqo ni a kaya, “Eda vakaraitaka na [vinaka] ena dua na tamata dina—o Jisu Karisito, na Luve ni Kalou. E tagane o Koya, sega ni ivakavuvuli, e dua sa oka kina na ivakavuvuli kece. … Na muria e dua na tamata e duidui mai na muria tiko e dua na ivakavuvuli. … E sega ni gadrevi meda cakacakataka na veimataqali ituvatuva vakafilosofi dredre ni lawa. E sega ni dua na ka me na caka kina. Meda na vulica na Kosipeli, raica na cakacaka i Karisito, ka saga mo dikevi iko ki na ka e cakava. Sa baleta ni da taura na yalo ni iVakavuvuli, na loloma nei iVakavuvuli, eda sa kila na cava o ya kei na ka meda cakava. Na kosipeli eda sa tawana vei keda sa rawa kina meda vakila ena gauna cava ga na ka meda cakava ena ituvaki cava ga.”¹⁰

E tiko na kaukauwa ni da semata noda sasaga meda bulataka na kosipeli i Jisu Karisito. Kevaka meda nanuma tiko ni da sa kuitaki tu ga meda bulataka na kosipeli ka sa lisi ga ni cakacaka, eda sa na rairai cagutu laivi mai na ivurevure ni loloma soliwale kei na reki eda vakasaqara. Eda rairai cakava na veika dodonu kece ia eda kunea ni da sa calata tiko na usutu. Na kosipeli e sega ni lisi ni ka me caka; sa itukutuku vinaka ni o Jisu Karisito sa bokoca na noda ivalavala ca kei na mate. O Jisu Karisito na usutu ni ituvatuva nei Tamada Vakalomalagi me vukea meda na vakataki Koya. Sai Koya na ivakaraitaki uasivi ni ivakarau meda bula voli kina ka ivurevure ni kaukauwa vakalou eda gadreva. Ni da muria na Nona ivakaraitaki ka semata noda sasaga meda bula ena kosipeli ki Vua, eda na kune reki.

3. Raica na iTuvaki kei na iVakarau i Jisu Karisito

iKatolu, meda raica na ituvaki kei na ivakarau ni¹¹ iVakabula ena nodra bula na parofita kei na tamata yalodina eso era sa tukuni tu ena ivolanikalou. Me vaka a vakavulica o Jekope, “Na veika kece sa solia na Kalou vei ira na tamata mai na vakatekivu kei vuravura sa vakatakilakilataki koya.”¹²

Baleta na vakasama oqo, niu a vakavulica na Veiyalayalati Makawa ena semineri, au a vakabira na pepa lelevu ena lalaga ni rumu ni kalasi. E cake ena pepa yadua au a vola ki na na yaca ni dua na parofita ni Veiyalayalati Makawa. Ni oti na neimami vulica e dua na tiki ni Veiyalayalati Makawa, au a kerei ira na gonevuli mera vakasamataka na veika era sa vulica baleta na parofita kei na veika e sotava sa yaloyalo ga se ivakaraitaki ni iVakabula vei ira. Ni oti nodra vulici Atama, era vola na gonevuli na ka vakaoqo, “O Atama e luve ni Kalou.” “A tawamate rawa.” “A gole ki na were.” “A taura ga vakaikoya na mate meda rawa ni bula.” Ena sega ni dede ni dua ena taroga, “Eda se tukuni Atama tikoga, se da sa tukuni Jisu tiko?”

Ena gauna o ya, a gole totolo mai ki kalasi e dua me mai wasea vei au na gauna e dau vulica kina na ivolanikalou. Ena bogi a wilika kina na revurevu ni Lutu nei Atama ena Mosese 4, ka kaya “Ena vakatubura talega vei iko na kau votovotoa kei na soni, ia ko na kania na co ni vanua.”¹³ Me vaka ni sa vulica me taroga, “E yaco vakacava na itukutuku oqo me tukuni Karisito?”, a muataki me taroga, “A kila beka o Jisu ni vosa tiko vei Atama ni dua na siga ena tauca na revurevu ni Lutu me sala vakavotona?”

Era a kunea na gonevuli e dua tale na ivakaraitaki ena bula nei Josefa mai Ijipita, e 60 tale na sala a ituvaki vata kina kei na iVakabula. Era kaya na gonevuli ni rau ruarua a luvena na Tamada, cati mai na tacidrau, ka volitaki me tamata bobula. Era raica ni tautauvata na nodrau temaki ka sa tiko ga kei rau na Kalou ena veigauna. Na isema oqo sa levu cake sara mai na dua na ka e taleitaki toka. Na nodra bula na parofita digitaki ni Turaga era sa vakataki Koya ka da vulica kina na Nona ivakarau. Ni vakayagataki vagumatua, na matailoilo oqo ena vukei keda meda kilai Jisu vakavinaka cake ka vakataki Koya.

Na watiqu o Kristi, a vakavulica talega na italanoa oqo nei Josefa mai Ijipita ka taroga kina na kalasi, “Na itovo Vakarisito cava o raica ena ivakaraitaki i Josefa?” Keimami a veivosakitaka na nona gugumatua me vukica na veivakatovolei me dua na kalougata. Keimami a veivosakitaka na nona talairawarawa, nona vosota, nona gadreva me nanumi ira na vakaleqai, ka lomana me veivosoti. Na taro oqo a vakavuna meu nanuma kina na noqu a vulica kina na italanoa oqo ka raitayalotaka se a vakacava beka na gauna sa vakatakilai koya kina o Josefa vei iratou na tacina. Na ivolanikalou e kaya ni “ra sa taqaya e matana.”¹⁴ O raitayalotaka rawa beka na gauna o ya kei na ituvaki ni yalodratou, ni ratou sa kila na ka e ratou a cakava? Ia a kaya o Josefa vei iratou, “Dou toro mada mai vei au, koi au ko Josefa na tacimudou. Mo dou kakua ni rarawa … ni sa talai au na Kalou meu liutaki kemudou me ia na veivakabulai.”¹⁵ Niu vakananuma na ka oqo, au sa kila vinaka kina na vakacava tu na gauna meda tu kina e mata ni Turaga ena Siga ni Lewa. E rawa sara niu raitayalotaka ni da na nanuma na noda ivalavala ca ka “lomaleqa” ni da tu e Matana. Ia au rawa ni raitayalotaki Koya ni kaya ni sa tauri keda cake a talega “Toro voleka mai vei au, o au na tacimu. Sa talai au mai na Kalou meu veivakabulai.”

Ni da vakanamata ena ituvaki kei na ivakarau i Jisu Karisito, eda na vukei ira na gonevuli mera kila na Nona ivakarau kei na itovo ka vukea mera kila mera na vakataki Koya, ena tarogi kina vakaoqo:

“Na itovo Vakarisito cava o raica ena bula nei parofita oqo?
“Ena gauna cava o sa kalougata kina baleta ni sa tu vei Jisu na ivakarau vakaoqo?” Se, “Sa vakaraitaka vakacava na iVakabula na ivakarau oqo ena vukumu?”
“Na cava tale o rawa ni cakava mo vakataki Jisu Karisito cake kina ka rawata na ivakarau vakalou oqo?” “Na cava o sa vulica baleti Tamamu Vakalomalagi kei Jisu Karisito e uqeti iko mo cakacaka ena vakabauta mo muri Rau kina?”

Ni gauna era saumi taro kina na gonevuli me vaka na “masu” se “wilika na ivolanikalou,” eda na vukei ira mera semata na ivalavala oqori vua na Tamada Vakalomalagi kei Jisu Karisito ena tarogi na taro vakaoqo:

“Ena duidui vakacava na nomu masu ni ko kila o cei o masu tiko kina vua?”
“O na vulica vakacava na ivolanikalou ena sala ena vukei iko mo kila cake na iVakabula ka mo vakataki Koya sara?”

Na mataqali taro vakaoqo ena vukei ira na gonevuli mera kaukauwa cake ka guta mera kila na iVakabula ka vuli mai Vua.

4. Cavuta na iVakadinadina Savasava baleti Jisu Karisito

Na ikava ni ka eda rawa ni cakava o ya meda cavuta na ivakadinadina savasava baleti Jisu Karisito.

E gadrevi meda na vosa tiko Vua vakawasoma ka vakaukauwa cake ena veidokai cecere, qoroqoro, kei na vakavinavinaka. Meda wasea yani na noda ivakadinadina, ka raica na sala mana mera sureti na gonevuli mera wasea na nodra ivakadinadina vakai ira vata. Ena dua na kalasi ni ivakavuvuli ni masu, a sureti ira na gonevuli e dua na qasenivuli mera raica na veisureti ni Turaga baleta na masu kei na Nona yalayala mena sauma mai, me vakavulici keda ena ituvaki ni Tamada Vakalomalagi lomani. Era sa qai sureti mera raica na ivakarau ni iVakabula, e rawa kina meda masu ena Yacana. Ena taro rawarawa oqo, sa na vuki na lesoni ni masu me nodra madigi na gonevuli mera soli ivakadinadina baleta na kaukauwa kei na loloma ni Tamada Vakalomalagi kei na Luvena, o Jisu Karisito. Era lesu na gonevuli ena vakavinavinaka levu ni ra sa veimaliwai kei na Kalou kei na kalougata cecere sa soli vei keda meda masu ena yaca i Jisu Karisito, o Koya na Dauveimeautaki kei na Tamada.

E dua tale na sala bibi me vakadinadinataki kina o Jisu Karisito o ya me rogoci na nodra ivakadinadina na parofita, ena gauna makawa kei na gauna oqo, ena kalasi. E tukuna na iApositolo o Pita ni da sa “na ivakadinadina digitaki mai vua na Kalou. … E vakaroti keda o Koya meda … vakadinadinataka ni sai koya e lumuti mai vua na Kalou. … Era sa dau tukuna ko ira kecega na parofita.”¹⁶

Dua na gauna sa oti, a kaya kina o Elder Robert D. Hales e dua na itukutuku ka vakavuna meu dikevi au. A kaya, “Eda vakatawa, vakarorogo, wiliwili, vuli, ka wasea na nodra vosa na parofita me ivakaro ka taqomaki kina. Me vakataka ‘Na Matavuvale: Ai Vakaro ki Vuravura Raraba’ a soli ni se bera sara ni da sotava na ibolebole sa sotava tiko na vuvale.” A qai kuria na vakasama oqo, “‘Sa Bula na Karisito: Na nodra iVakadinadina na iApositolo’ sa vakarautaki oti tu me baleta na gauna eda na vinakata dina kina.”¹⁷

Au sega ni dua e dauvakalolovirataki se vakacacani, ia sa laurai levu tiko na vuna a soli makawa kina na ivakaro ni bera mai na cava rerevaki sa ravuta tiko na matavuvale savasava. Ni da rogoca e dua na parofita me kaya ni ivola “Sa Bula na Karisito” a soli “mai e liu ena gauna eda gadreva dina kina” e vakavuna meu vakasamataka ni so tale na cagi era na ravuta tiko na nodra vakabauta na gonevuli kei ira na luveda.

“Sa Bula na Karisito: Na Nodra iVakadinadina na iApositolo” e kaya, “Keitou tukuna na neitou ivakadinadina ena dina ni Nona bula sega ni vakatauvatani rawa ka tawayalani na savasava ni Nona isoro cecere ni veivakaduavatataki. … O Koya o Jiova sa Cecere Sara ena Veiyalayalati Makawa, ka Mesaia ni Veika Vou. … E taubale ena gaunisala mai Palesitaina, ka vakabulai ira na tauvimate, vakabulai ira na mataboko me rai, ka vakaturi ira cake tale na mate. A vakavulica na dina ni veigauna tawamudu. A solia na Nona bula me sorovaka na ivalavala ca kei vuravura. … A tucake mai na mate me yaco ‘kena imatai vei ira sa moce no.’ …. O Koya kei Tamana rau a rairai vei cauravou Josefa Simici, me vakatikora mai na ‘itabagauna ni taucoko ni gauna’ sa yalataki tu mai. Keitou vakadinadinataka ni na lesu tale mai o Koya … [ka] veiliutaki me nodra Tui na Tui ka nodra Turaga na Turaga. … O Jisu na Karisito sa bula tiko, na Luve ni Kalou tawamate rawa. Sai Koya na Tui Imanueli qaqa, sa tu nikua ena yasa imatau nei Tamana. O koya na rarama, na bula kei na inuinui kei vuravura.” Me vakavinavinakataki na Kalou baleta na isolisoli cecere duadua ni Luvena sa vakalou.”¹⁸

Na ivakadinadina oqo ni parofita ni Kalou a soli mai ni bera na gauna mera na gadreva kina vakalevu na luveda. E dodonu meda vukei ira mera teivaka vakatitobu na ivakadinadina ena nodra vakasama kei na yalodra. E sega na ka meda cakava rawa mera kalougata kina na noda gonevuli me vakataka noda vukei ira mera kilai Jisu Karisito. Meda vukei ira mera lomani Koya, muri Koya, ka lomadra mera saga mera vakataki Koya. Ki na nodra ivakadinadina na parofita ni Kalou au kuria kina na noqu ivakadinadina ni o Jisu na Karisito, na Luve ni Kalou ka iVakabula kei vuravura.

Ena yaca tabu i Jisu Karisito, emeni.

© 2018 mai na Intellectual Reserve, Inc. Dodonu kece e taqomaki. Vakadonui me Vakavalagi: 3/18 Vakadonui me vakadewa: 3/18. iVakadewa ni “We Talk of Christ, We Rejoice in Christ.” Fijian. PD60006246 858