天使與驚奇
教會教育機構訓練轉播·2019年6月12日·教會辦公大樓一樓禮堂
彼得生兄弟喺佢嘅禱告入面用咗「家庭」呢個字，我喺嗰時同而家都好感動。我好興奮今晚同各位一齊參與呢場對我嚟講係家庭團聚嘅活動。韋伯兄弟、賓翰姊妹同埋克拉克長老嘅每一句說話都啟發咗我。我祈求我可以同以上三位相互呼應。
應用彼得生長老嘅說話嚟同你哋打招呼，我真係覺得大家係喺我嘅家庭入面，我都想你哋咁覺得。我知道理事會一定係咁認為，但我特別咁覺得。
自從我同派蒂喺54年前嘅夏天同教會教育機構簽咗第一份合約之後，總係會因為某啲原因同情況，令我哋幾乎每一年都會同你哋有啲關聯。當福音進修班同研究所進入我哋嘅生命、生活方式同人生時，我哋並唔知道呢個會係一段咁深厚同埋永久嘅關係。如果唔係身旁嘅教師、督導員、行政人員同埋其他人喺最初嗰幾年，向我哋展現嘅友誼同埋兄弟姊妹般真切嘅友愛，我真係覺得，惶惶不安嘅我哋可能無法相信我哋可以繼續落去。我哋喺呢個計畫最初所培養嘅關係，歷經半個多世紀之後，仍係我哋所擁有最美好嘅幾段友情。而嗰啲當然仲未包括喺呢一路上，我哋教導過且愛護嘅上百位——我諗應該已超過數千位——嘅學生。我希望喺教會教育機構入面，我哋永遠唔會失去嗰種好似屋企人嘅感覺。呢個係其中一個我哋想喺呢度服務嘅原因。
用呢份愛作為開場白，我今日想傳達嘅事係，教會所有總會持有權柄人員同總會職員係幾咁關愛同埋信賴你哋。喺我哋嘅議會同委員會入面，我哋投入非常可觀嘅時間；今日有咁多總會輔助組織人員喺度就證明咗，我哋係一齊做呢件事嘅。我唔知點樣俾個確實百份比，我諗（佢哋之後可以指正我）係大概所有總會持有權柄人員百分之30到35嘅時間，討論關於教會嘅年輕人。呢啲年齡層，一般嚟講，就係你哋受雇要教導嘅人，以及嗰啲即將準備被你哋教導嘅人。我哋傾過佢哋所處嘅世界、所面臨嘅挑戰，同埋年輕人比以往更早接觸到嘅社會同文化嘅現實。雖然呢啲現實唔係全部都係邪惡嘅，但係有啲的確係。呢啲年輕人需要獲得所有可以得到嘅幫助，好好彩，佢哋係可以得到嘅。呢艘船係神喺度掌舵，將會平安入港。佢已為呢件事做咗所有必要嘅準備。
舉個例，我從來都唔認為學生開始就讀福音進修班嘅歲數，同約瑟·斯密蒙得第一次異象嘅年紀一樣，只係個巧合。我認為天父覺得約瑟到咗14歲，就已經夠成熟嚟開始佢先知使命嘅旅程。我哋係唔係都可以假設，一般嚟講，呢個係其他年輕人可以開始對耶穌基督嘅福音有成熟見證嘅年紀，並睇住呢個（我哋希望）見證喺將來發展成一個強大指引嘅力量，直到永恆？
呢個都一定係主啟發我哋嘅計畫時要咁樣設計嘅原因——喺一個男仔或女仔開始邁向成熟嗰時，感動佢哋嘅心，增強我哋同佢哋嘅接觸，俾佢哋大量日常經驗，而唔係單單依賴主日學嘅經驗。當教會邁向一個更以家庭為中心，由教會從旁輔助嘅課程時，我哋可以自豪咁講，教會教育機構嘅平日同埋自修班嘅重點，一直都係朝呢個方向進行。目前嘅調整，令福音進修班同研究所，比以往更貼近教會推行嘅主要課程。
既然我講開呢這個主題，請容我講一下，主領嘅弟兄稱讚我哋，話我哋福音進修班嘅課程同教會每四年輪流使用嘅經文課程時間表同步進行。獲得咁嘅讚美係好好，但可以被理事會主席讚美仲更有意義。等我提醒你哋邊個係理事會主席。納爾遜會長喺宣達呢項計畫嘅時候，係咁樣講嘅：
「從2020年開始，福音進修班的研讀課程會轉換成以年曆為基礎的時間表。班級研讀的經文，會與『來跟從我』課程所用的經文相同。透過在家中、在主日學，和在福音進修班研讀統一的教材，這項調整會提升以家庭為中心、由教會從旁輔助的福音研讀方式。
「各位在思考這項變更時，我要邀請各位沉思自己的未來。你們有潛力比以往的世代，對這世界產生更大的影響，這完全取決於你們對主耶穌基督的忠誠程度。你們每個人有責任要在自己的家，協助教導主的福音給與你同住的人。福音進修班及研究所，能幫助你把自己的家改造成信心的聖所——成為教導、學習、奉行和喜愛耶穌基督福音的地方。」
我唔知你哋點諗，但我做咗呢個計劃好耐，好多年都冇試過有教會會長咁明確同埋鼓舞咁對我哋講呢件事。納爾遜會長，我真係好感激。可以話，目前呢個時期嘅調整，無論大或小，總會弟兄談論、思考同埋直接處理福音進修班及研究所嘅人事同政策相關事宜，比起我喺教會教育機構呢幾十年嘅服務多好多。呢個真係一個好好嘅時候去身處呢個「家庭」入面！
而家，等我講下呢一切工作嘅核心、呢場會議嘅原因、我哋每日同每週教導嘅原因，亦就係我哋嘅學生，我哋關注同埋關愛嘅重心。
當呢個世界變得愈嚟愈世俗時，我哋必須學會為男女青年提供更多幫助，做更好嘅榜樣，佢哋所處嘅文化會時常否認，甚至更衰時會貶低佢哋必須捍衛嘅信仰。我哋忠信嘅年輕人同埋周圍有時敵對嘅世界之間嘅差距與日俱增，就算從整體上嚟睇都大致係咁。當然，呢個係後期時代預言中「肯定」會發生嘅事，但係要去處理同埋面對呢啲事並冇因為咁變得比較容易或者有趣。喺前面簡述嘅呢種世界入面，我哋嘅學生因為某些特徵而被親切稱為Ｚ世代。呢啲特徵強調咗我哋喺教學上嘅一啲挑戰：2
-
佢哋成日都係連接住某啲事。「他們從不認識一個沒有網路，或是手機〔或耳機〕的世界。…谷歌從一開始就〔為他們〕存在。」3佢哋可能從來冇睇過轉盤式電話，或喺所謂嘅電話亭打過電話。不過咁都冇所謂，反正呢班人鐘意傳短訊。
-
透過呢個無所不在嘅電子通訊網路，佢哋喺非常非常細個嘅時候，就已經接觸到張狂同埋具毀滅性嘅色情。
-
佢哋傾向於「〔支持〕同性婚姻和變性者權益……〔彷彿這是〕日常生活的一部分。幾乎所有Z世代的人都不會不認識一個LGBT團體的好朋友。」4由於咁樣嘅社交程度，做朋友同埋縱容行為之間嘅界線開始變得模糊不清，難以劃清界線。
-
「他們是後基督徒，幾乎多達四分之一（這些人不是後期聖徒的學生，但他們事實上是我們所關注的對象）。」「幾乎有四分之一（百分之23）的美國成年人，也就是三分之一的千禧世代被稱為『無信仰者』，完全不信奉任何宗教。許多Z世代在無信仰的家庭中長大，〔讓〕他們的生活缺乏任何宗教的經驗〔連相關的背景知識都沒有〕5。
-
最近一項有關澳洲青年對宗教嘅研究嘅研究結果引人注目；有百分之52嘅人唔認同任何一個宗教，得百分之37嘅人相信神。6
-
同時係牧師同作家嘅雅各·懷特，對於佢哋嘅靈性處境有詳盡嘅記載。佢話：「首先，他們迷失了。他們不只是生活在一個後基督文化的背景，並受其形塑，他們甚至沒有一絲福音的記憶〔或背景知識〕。這種靈性上的無知簡直令人吃驚。……〔第二〕，他們無人帶領。家庭給他們的指引寥寥無幾，即使想從網路上獲得，所獲得的指引更是少之又少。」7
-
根據USA Today所刊登嘅一篇文章，Z世代係最孤獨嘅小團體。8呢篇文章引用咗楊百翰大學2010年嘅一項研究結論，「孤獨對生命的影響與一天抽15根煙的作用一樣，比癡肥來得更危險」。9
-
美國13歲嘅女仔入面，大約有百分之53對自己嘅身體感到唔滿意。當呢啲女仔到咗17歲，百分比增加到78。超過百分之50嘅少女同埋百分之30嘅少年使用唔健康嘅體重控制行為，好似係唔食正餐、禁食、抽煙、催吐或者服用瀉藥。10
-
最後，佢哋嘅注意力好短暫。有啲報導指稱Z世代嘅平均注意力大約係八秒鐘。11可能讀完前三點，佢哋嘅注意力就無法集中。
福音進修班同研究所教師係無法喺一夜之間解決所有嘅問題，但係總會弟兄確實要仰賴你哋具備豐富嘅知識、作好準備，同聖靈和諧，並喺問題產生時，可唔可以及時解決呢啲問題。有咗平日嘅接觸，你哋比教會中大部分——幾乎所有——嘅教師更能同學生有往來，因此要明智咁應對，總會弟兄肯定會需要同埋期望得到你哋嘅幫助，無論正式或非正式、喺教室內或教室外，將教會嘅政策、做法同教義教導他們。
向聖靈敞開心胸。喺你嘅課程計畫中預留一啲變通嘅空間，如果你需要稍微縮短課程嚟作見證，或者討論一個現代議題，請喺聖靈提示為合宜時咁做。
咁樣做時，你當然唔應該跨越界線，扮演近似聖職或輔助組織領袖呢類唔屬於我哋嘅角色。喺我哋嘅組織入面，要行喺鋼索上，從一開始就係一個挑戰，都將一直係個挑戰。走喺鋼索上需要有好嘅判斷同聖靈嘅指引，但呢個係值得接受嘅挑戰，總會弟兄會為你做嘅努力喝采。呢一切都係必要嘅，每個階段所傳達嘅信息必須清楚且一致。
「若吹無定的號聲，誰能預備打仗呢？……就當求多得造就教會的恩賜。」12
顯然，喺我哋嘅時代有咁強大嘅力量運作，福音教學都必須如此有力，以確保冇任何事物可以動搖我哋年輕人嘅信心，或者喺佢哋離開你嘅教室重返世界時，不致偏離佢哋嘅道路。呢種教學方式知易行難，但我哋大家都可以變成更好、更強嘅老師。我們可以感謝他們為我們所做的一切。喺面對呢件艱鉅嘅工作時，請記得我哋今日相處時，我講嘅呢一點：要記得學生唔係一個要被填滿嘅容器，而係一把待點燃嘅火。
身為福音教師，我哋要成為靈性嘅縱火犯。我哋嘅課程要成為點火器。我哋要成為縱火狂，不過要刪掉「狂」嘅部分，只要「縱火」。趁你哋將呢段話報告俾總會弟兄或者報警前，等我先講清楚。
喺摩爾門經中嘅每個重要教學情況入面，幾乎都會出現嘅詞，係用嚟形容一個人被「力量和權柄」教導嘅時刻，呢樣嘢一直令我印象深刻。13呢樣嘢係我自己教導時最渴望做到嘅，我希望你哋都係。
請唔好誤解我嘅意思。我唔係話要提高聲音、將課程呈現得好戲劇化，或者扮出虛假嘅情感。我所描述嘅呢樣嘢，基本上僅僅係一種精神，呢種精神藉由唔同嘅老師，會有唔同嘅表現方式。你哋必須做自己。你唔會係另一個布司·麥康基、培道·潘或是羅素·納爾遜，但如果問問自己呢啲教師點解對我哋有咁嘅影響，會對我哋大有益處。要向所有偉大嘅教師學習一切，但係你始終仲係要自然咁教導；用你自己嘅方式教導。但係，無論係用邊種方式，結果應係有力且具權柄嘅教導。
等我用記錄喺摩爾門經嘅一啲例子做說明。希拉曼書第5章敘述咗以佢哋祖父之名而命名嘅尼腓同李海嘅故事，佢哋被指示要喺柴雷罕拉地教導拉曼人。除咗教導呢班人極具桃戰，尼腓同李海都教導咗嗰群「叛離者」，一群從嗰度出去並加入拉曼人，而對抗神先知嘅尼腓人叛離者。我並不清楚你哋嘅感覺，但呢兩群充滿敵意嘅人所代表嘅觀眾，並唔會係星期一一早我特別鐘意見到嘅人。喺呢個時候，拉曼人充滿住敵意同埋憤怒，並因同尼腓人所起嘅衝突堅決要向佢哋報復，而衝突嘅起因大部分人卻早已唔記得咗。仲有，令情況更嚴重嘅係，嗰啲反耶穌嘅前摩爾門（喺佢哋用「摩爾門」呢個詞，唔係我），佢哋雖然曾經喺祭司定額組，但就變成咗當地嘅叛教者，有啲可能仲忠信咁傳過道，而家卻偏離正道。用一樣嘅教導去反對國度，而唔係支持。
即管係咁，講到嗰兩群令人備感困難嘅人，經文咁樣描述尼腓同李海：「他們以極大的力量傳道，使許多從尼腓人那裡出來的叛離者羞愧。……事情是這樣的，〔他們也〕用如此大的力量和權柄向拉曼人傳道，因為他們獲賜力量和權柄，使他們能講話，而該講的話也賜給了他們。」14大家可唔可以討論一下？停低諗一諗，如果教會教育機構中或教會中嘅每位教師都知道兩件事——講嘢時要點樣表達，以及陳述嘅內容——咁係幾咁好。即使係用自己嘅母語嚟教導，咁都會係實實在在嘅語言嘅恩賜。就我所了解嘅，嗰個正是嗰兩位人物所確實獲得嘅恩賜。佢哋用極大嘅「力量和權柄，使他們能講話，而該講的話也賜給了，而該講的話也賜給了他們……。因此，他們講的話令拉曼人大為驚奇。」15
驚奇一詞有冇令你諗起喺摩爾經中之前嘅記事？諗下摩賽亞書第27章，阿爾瑪同摩賽亞啲囝「到各地去反叛神」。而喺第11節講道：「主的天使向他們顯現；他好像在雲中降下，說話聲如雷鳴一般，使他們所站的地方都為之震動。」16
請原諒我即時再提出另一項評註。你哋覺得，係唔係真係爆發咗一次地震？你覺得如果喺嗰時每12公尺就用地震儀測量一次地震規模，會唔會測到五級、六級、八級或九級嘅大地震，造成深海入面嘅海嘯同埋地面上成個地形嘅改變？可能喇。。或者有時會。事情當然有可能係咁，但我傾向唔係咁覺得。我諗嗰次係主對個人發出嘅一種私人、度身訂做嘅地震。我諗阿爾瑪同摩賽亞嘅囝係感到大地震動，但係唔知係唔係都搖晃咗其他人。
你喺教書時一定試過咁。你講嘅某件事好有力咁震撼咗一位學生，觸動到佢靈魂嘅深處，以致佢哋臉色蒼白或流淚，或兩者都有，而喺佢哋右邊或左邊嘅學生卻好似完全冇事發生咁。呢個係喺傳道地區時常發生嘅事，你知道，你試過！一對同伴團喺某處嘅公寓大廈教導緊一個家庭。佢哋同一對夫妻上咗一堂驚天動地、改變人心嘅課程，將106號嘅層樓升咗上天，而隔離105號嘅鄰居正好開心咁睇住美國偶像，107號嘅住戶則想知道綠灣包裝工隊同舊金山49人隊嘅賽事積分。我唔知道以地質學嚟講，係唔係可以預測黎克特制規模嘅地震，但係我諗主同經文不斷應許會有私人嘅地震，令一位學生徹徹底底咁改變，等大地喺佢哋嘅腳前震動。請原諒我，我離咗題。
我哋繼續睇摩賽亞書第27章嘅第12節：
阿爾瑪同摩賽亞啲囝「驚駭萬分」，而「他們驚駭萬分，倒在地上，聽不懂〔天使〕對他們說的話……
「阿爾瑪和那些與他同行的人驚駭萬分，又都倒在地上；因為他們親眼見到主的天使；他聲如雷鳴，震動大地。……
「阿爾瑪驚駭萬分，變成啞巴，無法開口；是的，他變得非常虛弱，連雙手都不能動。」17
我祈求、思考同埋期望教會教育機構所能帶嚟嘅，就係真正令人驚奇嘅教導。我哋需要令嗰啲學生驚奇，藉由勇敢同誠實教導耶穌基督福音嘅教師——冇論係專業定係志願嘅——會運用已賜俾佢哋嘅「神的力量和權柄」18嚟震撼學生。你哋知唔知astonish（驚奇）嘅字源？我唔知道呢個字喺改良嘅埃及文或希伯來嘅字源係咩，但喺英文入面，呢個字源係喺「tonare」而來，即係指雷鳴。19
咁樣有冇幫你理解喺阿爾瑪歸信後，喺呢段對話之後佢講：「啊，但願我是天使，但願我能實現心中的願望，用神的號角，以震動大地的聲音講話，向每一個民族呼籲悔改！
「是的，我要以雷鳴般的聲音，向每一個靈魂宣講悔改和救贖計畫，使他們悔改而歸向我們的神，讓整個地面上不再有憂傷。20
我親愛嘅教會教育機構朋友，阿爾瑪點解要擁有天使般嘅影響力同埋好似神號角嘅雷鳴般聲音嚟震撼大地，係顯而易見嘅。道理好簡單，喺佢身上奏效嘅事，對其他人都有效！學生會訓喺地下三日嚟悔改，因潔淨嘅力量咁強大，佢哋唔可以，都唔會再偏離嗰個影響力，從此之後，完全徹底咁獻身嚟建立神嘅國度——呢個係有力嘅教導。這才是一種實用的真理，我哋會好似阿爾瑪一樣發現，我哋並唔係天使，喺面對學生時，我哋唔會每次都造成嗰種影響。但喺教會教育機構嘅召喚同職務嘅優點係，我哋有機會嘗試咁樣做，亦即係話我哋有機會重複喺課堂上嘗試。
現在番返去希拉曼書第5章。要記得尼腓同李海都唔係天使，佢哋只係賦有使命嘅良好凡人教師，佢哋以「如此大的力量和權柄」教導信息。呢兩個人見到有8000個拉曼人「接受悔改的洗禮」，加入神嘅教會。21有嚟自天降下嘅火，同聖靈之火喺入面燃燒，呢群聚集起嚟嘅「學生」嘅靈魂被真理點著咗。以我嘅經驗嚟睇，喺世界各地任何一個傳道地區，對任何一對同伴團嚟講，有8000人洗禮都會係個好好嘅地帶週報。
請再俾啲時間我講下另一個教師同學生嘅例子，佢唔單止點著咗自己嘅靈魂，為咗服務，佢仲令身體被燃燒以償付最終嘅代價。
自我青年時起，喺所有嘅標準經典入面，阿賓納代一直係我最敬佩嘅先知之一。阿賓納代出現時默默無名，佢冇任何祖先係先知，都冇顯示任何著名嘅家系。喺曾倪夫執意帶領嘅人民漸漸嘅衰落下，阿賓納代被召喚要向曾倪夫嘅囝挪亞王，一個可悲嘅繼任者，呼籲悔改。你哋都知道呢個故事。
挪亞立即發出死亡通緝令，而阿賓納代被迫要逃走。哩埋咗兩年後，阿賓納代再次出去教導並作見證。呢位先知喺呢件事中顯出孩子般嘅天真，令我忍唔住停低微笑。佢完全隱居咗24個月，仲偽裝，隱姓埋名，番嚟脫口嘅第一句話竟然係：「主這樣命令我：阿賓納代，去……預言。」22呢個時候，我不禁懷疑佢偽裝嘅效果，但係我哋對於佢嘅信心同埋決心，係無庸置疑。
阿賓納代大膽咁向挪亞王同佢嘅宮廷所行嘅憎行預言，令他俾人拉，最後被帶到佢口頭上所譴責嘅審判席前。呢位強大嘅先知遭受到呢個議會無情咁審問，佢「勇敢地回答，駁斥他們所有的問題，……使他們無言以對」。23佢從防守到出擊，宣講五又二分之一章節口嘅教義，名列成本摩爾門經中最有力嘅幾段教導。佢開始講咗冇幾耐，挪亞充滿住罪惡感同埋憎惡，下令將佢殺死。
呢一切場景喺我靈魂刻下難以抹滅嘅畫面，同安諾德·佛瑞伯格所展現嘅美妙畫作雖然唔係一樣樣，24但也都差唔遠，一樣美好。身為囚犯嘅阿賓納代，好有可能被當時會使用嘅鐐銬束縛。我哋唔清楚佢嘅年紀，佛瑞伯格將佢畫成一位長者或者畫得老一啲，但係經文冇講明。我唔知佢嗰時幾歲。佢身體強唔強壯？我哋都唔知道，只係佢岩岩先由隱居或隱匿咗兩年出嚟，居住嘅地方可能有，又或咗冇好多食物。（諗下以來加由烏鴉帶嚟嘅食物維生。25你見過烏鴉嘅爪未？我唔認為呢啲雀仔喺飛行中會拎到大份餐點。）我哋唔知道，但係阿賓納代可能覺得飢餓、疲倦，因為佢嘅處境，身體多少有啲虛弱。
挪亞王大叫：「把這人帶走，殺了他；……我們何必理他。……
「他們上前，想伸手抓他，但是他斥退他們，說：
「不要碰我，假如你們伸手抓我，神必擊打你們，因為我還沒說完神差我來傳達的信息。……
「因主的靈在他身上；他臉上發出異常的榮光，就像摩西在西奈山上與主交談時，臉上發光一樣。
「他憑來自神的力量和權柄說話。」26
～之力量和權柄，就係呢度。當我開始準備呢個講道，想講關於阿賓納代時，我唔記得，或者我唔知，呢件事係以同樣嘅字句完結，即係佢係以力量同權柄教導。喺紙上讀到文字嘅感覺，同用心靈之眼睇到同心所聽到如同雷鳴般聲音嘅感覺，係截然不同嘅！佢話：「不要碰我，假如你們伸手抓我，神必擊打你們。」27我好少喺讀呢段話嘅時候冇流淚啜泣嘅。呢段話喺我心中迴響起嘅，係唔知點形容嘅尊貴、勇氣、同埋巨大嘅力量。文中冇暗示佢大叫，都冇暗示佢有任何的動作。喺衛兵嘅看守下，又被束縛嘅佢，肯定冇辦法做好多事。但顯然佢所講嘅內容同埋表達嘅方式奏效咗。我用「顯然」呢個詞，係因為文中冇暗示任何一位衛兵作出任何舉動嚟移動佢，挪亞王同佢嘅祭司都冇一人喺之後令人聽得入迷嘅四個章節中多講一隻字。
我哋無法討論經文中呢類教導出現嘅所有美好例子，但係呢啲例子隨處可見。我邀請各位去尋找呢啲例子，加以思考，並祈求獲賜同我哋召喚相稱嘅嗰部分恩賜。
咁樣嘅教導方式既耗費心力，又難以捉摸。如果我知道點樣可以咁教，我嘅教導肯定會有更好嘅成效。但我確實知道呢一點，除非你對某件事充滿熱情，否則你絕對無法令你嘅學生對件事產生熱情。請允許我再講一次。除非你對某件事充滿熱情，否則你絕對無法令你嘅學生對件事產生熱情。當然呢份熱情嘅最終來源就如阿賓納代所講：「因主的靈在他身上；他臉上發出異常的榮光。」28，
如果聖靈係作出令人驚奇嘅教導嘅關鍵（的確係），咁成日用舊筆記或者其他教師嘅例子嚟教導，或喋喋不休咁解釋總會大會講詞中嘅演講係會有好大嘅風險嘅。以前嘅嗰啲內容喺首次被分享時係美好又令人驚歎嘅，所以你當然可以喺任何時候，使用任何你覺得可以為你嘅教導帶嚟生氣同埋變化嘅教材。不過，你喺現場講出呢啲說話時嘅感受，先係最重要嘅。呢樣係冇嘢可以取代嘅。「啊，但願我是天使，……我能……用……震動大地的聲音講話！」29要記得，學生唔係一個要被填滿嘅容器，而係一把待點燃嘅火。如果我哋真係可以將教導做得好好，有一日，我哋可能就足以配稱見到，嗰啲因為擁有將火點燃嘅能力而被燒死嘅人。請你哋出去，你哋呢班遍佈全球嘅榮耀嘅天使——要小心留意我哋說話嘅對象——請去令你哋嘅學生驚奇。我見證呢件事嘅神性。我見證你哋召喚嘅神性。弟兄姊妹，呢啲係主嘅事工。我冇將生命俾咗童話故事。我同你都冇將生命俾咗好似彼得形容我哋被指控嘅事，即係追求謊言、追求謠言、或追求狡猾編製嘅大話。呢個係真理。呢個唔係設計狡猾嘅神話。我已經奉獻咗我嘅生命、你已奉獻你嘅生命、我識得嘅最好嘅人都已經同埋一直奉獻緊佢哋嘅生命。呢個係全能之神嘅真理，願佢永遠祝福你嘅教導。奉耶穌基督嘅名，阿們。
Intellectual Reserve, Inc. © 2019版權所有。版本：5/19。「Angels and Astonishment」譯文。Chinese。PD# 000