Mga Rason aron Molaom

2021 nga Tibuok Kalibotan nga Debosyonal sa S&I alang sa mga Young Adult

Sister Susan L. Gong

Enero 10, 2021

Minahal nga mga kaigsoonan, dako kaayo nakong kalipay nga makauban kamo! Nagkapundok kita sa virtual nga paagi gikan sa matag gipuy-an nga kontinente ug gikan sa mga isla sa kadagatan nga gihiusa sa gugma sa atong Manluluwas nga si Jesukristo ug sa atong pasalig nga motabang sa pagtukod sa Iyang gingharian. Gihatagan ko ninyo og paglaom alang sa usa ka mas maayo nga kalibotan. Ug siyempre adunay minilyon pa nga maayong mga tawo kinsa pwede natong mapundok ug ikatambayayong ug diin kita pwede nga makakat-on. Ang “paglaom” miingong si Bishop Desmond Tutu, “mao ang pagkakita nga adunay kahayag bisan pa sa tanan nga kangitngit.”¹

Ang atong labing dakong paglaom anaa kang Jesukristo, nga atong Manluluwas. Pinaagi Kaniya kita makakita og hingpit nga kalipay ug kalinaw. Nasayod Siya sa kataposan gikan sa sinugdanan. Siya misaad, “Pangita nga makugihon, pag-ampo sa kanunay, ug pagmatuohon, ug ang tanan nga mga butang maghiusa sa paglihok alang sa inyong kaayohan, kon kamo maglakaw nga matarung.”²

Apan kita dili makakita sa kataposan gikan sa sinugdanan. “Dili hingpit” ang atong mga nahibaloan.³ Tingali ang atong kinabuhi nagsubay sa panghitabo nga lahi kay sa atong gilaoman. Mahimo gihapon kitang “mopadayon sa unahan uban ang pagkamakanunayon kang Kristo, [ug sa] usa ka hingpit nga kahayag sa paglaum”⁴ tungod kay nakahibalo kita nga ang atong mahigugmaong Langitnong Amahan adunay plano alang kanato.

Atol sa pagpuyo-sa-balay [stay-at-home] nga mga mando nga kinahanglan gayod nga sundon tungod sa COVID nga pandemya, naningkamot kong makakat-on og usa ka bag-o nga kahanas—kini ginganlan og paper piece quilting [pagsumpay-sumpay og tahi sa mga gagmay nga panapton]. Usa kini ka paagi sa paghimo sa gagmay nga mga panapton ngadto sa kuti nga mga desinyo. Sa sinugdanan ang proseso kasagaran dili mao kon unsay gilaoman. Magtahi ka og mga piraso sa panapton sa ibabaw ug ilawom ug paatras ngadto sa kon unsay ilang hitsura sa kataposan nga sundanan. Lisod nga makita kon sa unsang paagi kini nga mga gagmayng bulok [color] moresulta ngadto sa usa ka han-ay nga sundanan. Apan sa hinay-hinay, samtang mapailubon ka nga magbalik-balik sa paggunting, pagtahi, ug pagplantsa, usa ka maanindot nga desinyo ang motumaw.

Tingali mobati kita nga ang plano alang sa atong mga kinabuhi dili pa klaro. Wala kana magpasabot nga kita maghulat nga magsugod ang kinabuhi. Kini mga bililhon nga mga katuigan dili igsapayan kon asa na kamo dapit sa inyong kinabuhi.

Kini usa ka panahon sa pagpalambo sa mga talento. Si Presidente Nelson nagtudlo, “Ang edukasyon mao ang kalainan tali sa paghandom nga makatabang kamo sa ubang tawo ug sa paghimo aron makatabang kanila.”⁵ Ang maayo ug mapuslanong mga butang nga inyong makat-onan karon mohulma ug mopanalangin sa inyong tibuok kinabuhi.

Kini mao ang panahon nga mangita og maalamon ug matarong nga mga tigtudlo—mga ginikanan o mga apohan, mga magtutudlo, mga higala, mga lider sa Simbahan, ug, labing importante, si Jesukristo—sa pagtabang nato nga makatukod og makahuloganon nga mga kinabuhi. Pagmugna og makahuloganon nga mga relasyon niadtong kinsa makatabang ninyo nga makat-on ug molambo.

Kini mao ang panahon nga magmatinguhaon nga moapil diha sa maayo nga mga katuyoan. Ang langit dili maghulat nga ang pandemya matapos, nga ang akong timbang mokunhod og 4.5 ka kilo o nga ikaw maminyo sa tawo nga imong gipangandoy aron nga kita mahimo nga tinuod nga mga disipulo—sa pagtuman sa Iyang mga sugo, ilabi na sa paghigugma sa Ginoo ug sa atong mga silingan.

Kon gusto kita og mas dakong paglaom ug mas lawom nga kahulogan sa atong mga kinabuhi, angay nga sugdan nato ang matag adlaw pinaagi sa pag-ampo sa pasalamat ug sa usa ka kinasingkasing nga pangamuyo, “Langitnong Amahan, himoa ko nga instrumento sa Imong mga kamot karon. Ablihi ang akong kasingkasing. Hatagi ko og kaalam, imahinasyon, kalig-on, ug kaisog sa pagbuhat sa unsay akong mahimo.” Dayon pangita og mga oportunidad nga mahimong usa ka mas matinuoron nga higala, mas mabination nga igsoong babaye, mas maayong anak nga lalaki, mas manggihatagon nga silingan, mas inspirado nga tigpangalagad, mas mapailubon nga ginikanan. Si Leo Tolstoy misulat, “Bisan og ang mga tawo ingon og nagtuo nga importante lamang ang paghunahuna sa kaugalingon nilang panginahanglan alang sa mas maayong pagpakabuhi, apan sa tinuod ang gugma ang labing mahinungdanon alang sa mas maayong pagpakabuhi. Siya nga adunay gugma, nagsunod sa Dios, ug ang Dios kabahin sa iyang kinabuhi, kay ang Dios gugma.”⁶

Ang langit wala maghulat kanato nga mahimong hingpit o nga kita moabot sa sunod nga kalibotan aron kita panalanginan. Kon kita mohimo “og mga buluhaton sa pagkamatarung,” kita “makadawat sa [atong] ganti, gani ang kalinaw niini nga kalibutan, ug kinabuhi nga dayon diha sa kalibutan nga umaabut.”⁷

Ang gugma ni Kristo sigurado. Si Apostol Pablo mitudlo:

“Bisan ang kamatayon o kinabuhi, o mga anghel, o ang mga langitnong pamunoan o mga gahom, o ang mga butang karon, o sa umaabut nga kapanahonan,

“Bisan ang kalibotan sa itaas o sa ilalom wala gayoy bisan unsa sa mga binuhat nga makapahimulag kanato gikan sa gugma sa Dios nga naato pinaagi kang Kristo Jesus nga atong Ginoo.”⁸

Unta “ang Dios nga tinubdan sa paglaom magpuno kaninyo sa tanang kalipay ug pakigdait”⁹ samtang kamo mosalig Kaniya, aron kamo unta mapuno sa tumang paglaom pinaagi sa gahom sa Balaang Espiritu.

Ang ebanghelyo ni Jesukristo tinuod. Kini puno sa gahom. Kini maanindot, ug kini importante! Gisulti ko kining mga butanga sa ngalan ni Jesukristo, amen.

_______________________________________________