39:18

Maisugon diha sa Pagpamatuod kang Jesus

2021 nga Tibuok Kalibotan nga Debosyonal sa S&I alang sa mga Young Adult

Elder Gerrit W. Gong

Sa Korum sa Napulog Duha ka mga Apostoles

Enero 10, 2021

Minahal nga kaigsoonan, aniay nindot nga pangandoy alang sa bag-ong tuig—gikanta sa Kinatsila, “paglaum, nga gikalipay sa kalibotan—ang kahayag sa bag-ong adlaw miabot”¹

Si Sister Gong ug ako nasurprisa ug nabalaka sa dihang nagpositibo kami sa COVID-19. Salamat sa inyong mga mensahe ug mga pag-ampo alang sa among hingpit nga pagkaayo. Bisan og kami mipalayo sa uban, wala kami mobati nga nahilayo. Karon si Sister Gong ug ako nag-ampo og maayo alang sa tanan nga nag-antus sa kalisud sa pandemya.

Sa kalibotan, adunay mga 1.47 ka bilyon ka hamtong nga nag-edad og 18–30. Sa atong Simbahan, 2.3 ka milyon ka hamtong nga nag-edad og 18–30 nagpuyo sa 6 ka kontinente sa mga 180 ka nasud ug teritoryo. Mabasa ninyo ang Basahon ni Mormon sa sobra sa 114 ka pinulongan.

Si Sister Gong ug ako ganahan nga makigkita ninyo sa Rexburg, Idaho; Manaus, Brazil; Bogota, Colombia; sa tibuok kalibotan;² sa matag kontinente; sa matag sirkumstansya.

Nasayud ba kamo nga kita aduna nay North Pole Alaska Stake?

Nagpundok kita karon pinaagi sa teknolohiya. Mag-ampo ko nga ang Espiritu Santo mohiusa nato pinaagi sa hugot nga pagtuo, motandog sa inyong kasingkasing, ug moabli sa inyong dalan niining mahagitong panahon.

Minahal nga kaigsoonan, ang Dios buhi. Palihug sugdi ang pagbati sa Iyang gugma ug sa Iyang gahum nga mopalambo ug mousab. Tugoti Siya nga mogakos kaninyo “diha sa mga bukton sa kaluwasan”³ uban sa Iyang kasiguroan nga kamo adunay igo. Kamo adunay dili masukod ng balaang kapasidad nga mapalambo ninyo matag adlaw.

Karon mopaambit ko og tulo ka imbitasyon nga nakapadasig nako (1) sa pagpalawom sa akong relasyon sa Dios, (2) sa pag-usab sa umaabot karon, ug (3) sa pagpalambo sa akong kaugalingon. Ako mag-ampo, kon buhaton ang tanan, kini nga mga imbitasyon makapalig-on sa inyong hugot nga pagtuo ug makapaduol ninyo ngadto sa Dios ug niadtong naglibot kaninyo samtang makaplagan ninyo ang malahutayong kalipay sa Iyang dalan sa pakigsaad.

Unang imbitasyon: uban sa dakong malukpanong gugma, ang Langitnong Amahan misaad, “Hunonga ang inyong panag-away ug ilha ako nga mao ang Dios.”⁴

Nagdako ko sa siyudad apan ganahan motungas og bukid nga magdala og backpack. Gawasnon nga mosuhid, ang akong mga higala ug ako nag-hike sa tibuok adlaw, dayon nagtolda duol sa mga tampi sa lanaw sa kamingawan nga makita ang halapad nga kalangitan nga mabati ang tingog sa huyuhoy sa hangin sa kagabhion.

Karong bag-o, si Sister Gong ug ako nagdrayb sa dapit nga ngitngit ug nindot kaayo nga among nakita ang Milky Way. Sama kini kahayag niini nga litrato.

Ang Milky Way mao ang usa ka butang nga gikatingala sa mga tawo ug ingon og misteryoso ngadto kanila. Sa Insik ang, Milky Way mao ang “Tian He” (“suba sa langit”). Sa Belarusian, Estonian, Finnish, kini mao ang “paagi sa mga langgam.” Ang uban mitawag sa Milky Way ang “dalan ngadto ni Santiago.” Sa Cherokee, mao kini “ang paagi sa pagdagan sa iro”; sa Hebreohanon, “ang suba sa kahayag.”⁵

“Sa sinugdanan gibuhat sa Dios ang langit ug yuta. … Ug nakita sa Dios, nga kini maayo.”⁶ Ang Dios maalamon, gamhanan, ug maayo. Ang katuyoan, ka-elegante, ug kauyonan sa Iyang mga nilalang nagsaksi sa Iyang walay kinutoban nga gugma ug sa Iyang plano sa kalipay alang sa matag usa kanato. Si Alma nagpamatuod, “Ang tanan nga mga butang nagpakita nga adunay Dios; oo, bisan ang yuta, ug ang tanan nga mga butang nga anaa sa ibabaw niini, oo, ug ang paglihok niini, oo, ug usab ang tanan nga mga planeta diin naglihok sa ilang naandan nga paagi nagsaksi nga adunay Makagagahum nga Tiglalang.”⁷

Nagkinahanglan og mabuot nga paningkamot sa pagkalma ug “paghunong.” Magkinahanglan kini og espirituhanon nga kamatinuoron ug kamapainubsanon sa “pag-ila nga ang [Dios mao] ang Dios.”⁸ Usahay ang dili pagkabalaka sa mga butang nga dili kaayo importante makatabang nato sa pagpangita sa mga butang nga labing importante.

Usa ka importante nga paagi sa pag-ila sa Dios nga mao ang Dios mao ang pag-ila sa Iyang impluwensya sa mga gilalang nga gihimo aron sa pagmaya sa kasingkasing. Kita mokanta:

Sa katahum sa yuta,
Ug sa kapanganuran,
Sa naglibut nga gugma
Sugod pa sa sinugdanan,

Kami moawit nimo

Salamat O, Ginoo.⁹

Laing paagi sa pag-ila sa Dios mao ang pagtan-aw sa kaayo ug kahulogan sa balaang mga relasyon—sa kalumo, sa wala damha nga mga panalangin, sa pagsinabtanay, pagpasaylo, pagsakripisyo.

Si Presidente Russell M. Nelson karong bag-o miingon nga ang art, literatura, ug musika makapalambo nato.¹⁰ Mao usab ang mga siyensya, kon sabton pinaagi sa hugot nga pagtuo.

Aniay duha ka inila nga mga talan-awon sa langit panahon sa kagabhion.

Gikan sa siyensya, ang usa ka imahe sa dakong wanang nga kuha sa Hubble nga teleskopyo nagpahinumdom nato, nga nakita sa bantugang mga propeta nga sila si Moises ug Abraham, nga ang mga nilalang sa Dios naglakip sa mga galaksiya nga anaa sa mga galaksiya, nga dili maihap, bisan sa mga dapit nga ingon og ang kalangitan walay sulod atol sa kagabhion.

Gikan sa art, nakuha ni Vincent Van Gogh ang Starry Night nga gipintal diha sa lona [canvas] sa wala pa mosubang ang adlaw. Ang pagsuhid pag-usab sa astronomiya sa kalangitan niadtong Hunyo 1889 nagsugyot nga ang bitoon sa kabuntagon ni Van Gogh mao ang planeta Venus. Ang bantugan nga art nagdasig og bag-ong mga paagi nga makita ang mga nilalang sa Dios.

Ang kaayo sa Dios makapalambo sa atong mga kalag. Ang kasaba, kaguliyang, kahugaw sa kalibotan karon nakapahimo nga lisod nga “mohunong” ug sa “[pag]-ila nga ang [Dios mao] ang Dios.”¹¹ Tungod kay naanad na kaayo ta sa mga butang nga dili na kita makamatikod niini hangtud nga kini mawala. Ang pagkataphaw, mga butang nga maanindot apan dili diay, mga ideya nga nakausik sa panahon makabalda ug makalibog. Ang kahadlok nga dili makaapil (KNDM) kinaraan, bisan og kita nagsige og tan-aw sa atong mga device. Ang uban naghunahuna nga ang kanunay nga pagka-busy [multitasking 24/7] makapadugang sa atong bili o kaimportante.

Naningkamot kita pag-ayo sa paghimo nga ang mga panghitabo sa atong kinabuhi mahimong “Insta-perfect” alang sa sunod nga post sa Instagram, bisan og nasayud kita nga ang “Insta-perfect” dili “insta-” dili sab “perfect.” Kita nabalaka sa bag-ong mga filter, nga dili usab katuohan, makaapekto sa pagpakita og pag-uyon sa mga tawo diha sa social media.

Sa dokumentaryo The Social Dilemma, ang mga batid sa teknolohiya mipasidaan, “Kon ikaw wala mobayad sa produkto, ikaw ang produkto.” Ang pipila ka eksperto karon nahadlok nga ang social media wala damha nakadaot sa mga katilingban ug sa personal nga pagkatawo. Nabalaka sila sa proseso sa social media nga gidesinyo sa pagpalambo sa online nga paggamit, pagpakigbahin, ug pagdawat og kwarta sa ganansya sa pahinumdom makapadugang usab sa mga pagbati sa pagduda, panagbahin ug depresyon.¹² Tingali ang importante nga aksyon nga nagpakita unsay gibati, kining mga tawo nga batid sa teknolohiya nanalipod sa ilang mga pamilya gikan sa hilabihang paggamit sa social media.

Ang [pag]hunong ug mapalandungon dili pag-inusara. Si Leonardo da Vinci miingon, “Kon Ikaw nag-inusara, ikaw nagkontrol sa imong kaugalingon.¹³ Ang paghinay-hinay nagpasabut nga mibati nga mas sayon ang paghunahuna og klaro ug mobati ug nindot. Dayon ang pagpasalamat ug pagkamapainubsanon, makabuka sa akong espirituhanong mga mata ug mga dunggan sa mga ebidensya sa Iyang kaabunda sa atong palibot.

Usa ka komentarista sa pinulongang Hebreohanon mipasabut nga ang termino nga [pag]hunong mahimong magpasabut nga “pasagdi.” Ang Hibaloi nga Ako ang Dios mahubad nga “ilha ang Iyang makaluwas nga gahum sa atong kinabuhi.”¹⁴ Sa laing pagkasulti, ang “[pag]hunong ug ilha Ako nga mao ang Dios” mao ang pagtugot nga ipatigbabaw ang Dios sa atong kinabuhi.¹⁵

Si Presidente Russell M. Nelson miingon, “Walay lain nga makabukas sa kalangitan sama sa kombinasyon sa nagtubo nga kaputli, hingpit nga kamasulundon, sinserong nangita, inadlaw nga pagbasa sa mga pulong ni Kristo diha sa Basahon ni Mormon, ug regular nga panahon nga ipasalig alang sa buhat sa templo ug family history.”¹⁶usa ka dalan sa pakigsaad sa paglahutay sa kalipay.

Kon kita mohinay-hinay ug magtinguha pinaagi sa hugot nga pagtuo, ang atong panglantaw mausab. Usa ka adlaw sa pagpangandam isip usa ka batan-ong misyonaryo sa Australia, si Elder Marion G. Romney (dayon nahimong Apostol ug sakop sa Unang Kapangulohan), namalandong sa Doktrina ug mga Pakigsaad 76.

“Sa dihang nahuman siya og basa nasurprisa siya nga nakaamgo nga gabii na. … Mihangad siya sa kalangitan, diin misanag ang Southern Cross ug ang ubang mga bitoon sa dili kasagaran nga kahalangdon. Samtang naghangad siya sa katingala, ingon og siya gidala lapas niini pinaagi sa Espiritu aron makita ang mga butang nga iyang gibasa. Sa usa ka milagroso nga paagi, siya gihatagan aron masayud nga kadtong mga butanga dili bakak, apan mga tinuod sa labing tulukibon nga kahulugan.”¹⁷ Ang iyang biyograpiya nag-ingon, “Pagkahuman siya adunay mahangturong panglantaw.”¹⁸

Ang mahanturong panglantaw makahatag nato og tukma nga panglantaw. Sumala sa gipanagna, “Ang tanan nga mga butang magkaguliyang.”¹⁹ Ang Ginoo miingon nga ang Iyang tingog madungog pinaagi sa mga linog, unos, kamatay, tingog sa mga balod sa dagat nga mobanlas sa ilang kaugalingon lapas sa ilang naandan nga gilay-on.²⁰ Niining panahona, ang uban motawag sa maayo dautan ug ang dautan maayo;²¹ ang uban moingon “kaon, inom, ug paglipay; … kay ugma kita mamatay.”²² Apan ang espirituhanon nga kahayag ug kamatuoran mopapahawa sa kangitngit gikan diha kanato.²³

Ang Ginoo misiguro, “hunong.”²⁴ “Magmalinawon, uban ang labing dako nga kasiguroan, nga makasaksi sa kaluwasan sa Dios, ug sa iyang mga bukton nga ipadayag.”²⁵ Palihug, minahal nga kaigsoonan, “hunong, ug ilha nga ang [Dios mao] ang Dios.”²⁶

Karon, ang among ikaduhang imbitasyon: lig-ona ang mga relasyon karon nga mousab sa umaabot.

Karong bag-o, ako mapasalamaton sa pagpasalamat sa usa ka tawo nga wala nako mahimamat kaniadto apan kinsa nakapausab sa akong umaabot.

Ang iyang ngalan mao si Melba Oakes (walay relasyon ni Presidente Dallin H. Oaks).

Sa dihang si Melba nag-edad og 21 anyos, bag-o siya naminyo ug nagpuyo sa San Mateo, California. Si Melba ug ang usa ka 17 anyos nga kinabig nga ginganlan og Jean nagkahigalaay.

Ang bugtong miyembro sa iyang pamilya nga miapil sa Simbahan, si Jean nag-eskwela layo sa iyang panimalay. Ang uban sa pamilya ni Jean nanghinaot nga iyang kalimtan ang Simbahan didto sa bag-ong dapit.

Apan, sa gagmay ug yanong mga paagi, si Melba ug ang uban nagsuporta ni Jean. Sa dihang si Jean migradwar gikan sa high school, diha si Melba. Anaa gihapon ni Melba Oakes ang imbitasyon sa kasal ni Jean.

Nahigugma si Jean ug naminyo sa usa ka talagsaong lalaki nga ginganlan og Walter. Gani, sila naminyo makatulo ka higayon—sa usa ka kasal sa Intsik, seremonya sa Amerikano, ug pagkabugkos alang karon ug sa kahangturan diha sa balaan nga templo. Sa dihang nagkahimamat sila, si Walter adunay lig-on nga Kristohanong pagpamatuod apan wala pa makahibalo sa Ang Simbahan ni Jesukristo sa mga Santos sa Ulahing mga Adlaw. Mao nga si Jean ug ang uban mitudlo kaniya sa gipahiuli nga ebanghelyo. Nahimo siyang matinud-anong miyembro sa Simbahan ug patriyarka sa stake.

Sama sa inyong gitagna, sa pagpakigminyo ni Walter Gong, si Jean nahimong Jean Gong, ang akong minahal nga inahan. Karon ang akong inahan nag-edad og 94 anyos. Si Melba Oakes nag-edad og 98 anyos. Managhigala sila sa ebanghelyo sulod sa 77 ka tuig.

Karong bag-o, akong nahibaloan nga si Sister Melba Oakes nagpuyo sa St. George, Utah. Gitawagan nako siya aron sa pagpasalamat sa pag-usab sa akong umaabot ug sa akong pamilya. Sa pagtabang ni Jean Gong sa dihang siya ang unang kinabig sa pamilya, si Melba Oakes mipanalangin sa unsa na karon nga 4 ka henerasyon sa pamilya Gong niini nga habig sa tabil ug 34 ka nailhan nga mga henerasyon sa pamilyang Gong sa pikas habig sa tabil, nga miabut ngadto sa Unang Dragon Gong, natawo niadtong 837 AD.

Subo lang, ang ubang mga higala sa akong inahan wala na sa Simbahan. Ang usa mibiya human ang pipila ka miyembro mibaliwala kaniya tungod sa iyang kaliwat. Ang lain mibiya sa dihang mibati siya nga kinahanglang mopili siya tali sa Simbahan ug sa dili miyembro sa Simbahan nga mga higala. Ang ikatulo mitugot nga ang kalibotanong mga pagpamugos nakahimo og mga pagduha-duha mahitungod sa mga pagtulun-an sa Simbahan. Dayag lang, kamo nakasinati og mas grabe nga mga hagit karon.

Mahangturon akong mapasalamaton ni Melba Oakes ug sa tanan nga mitabang sa akong inahan sa dihang siya bag-o pa sa ebanghelyo. Gidayeg usab nako ang akong inahan. Siya makanunayon sa iyang hugot nga pagtuo ug maisugon sa iyang pagpamatuod. Siya ug ang akong amahan determinado nga magpabilin nga matinud-anon sa tinuod nga Simbahan sa Dios. Sila milampos bisan pa sa pagsaway sa katilingban ug sa pipila ka miyembro sa Simbahan nga dili ganahan og laing klase sa tawo.

Mga kaigsoonan, adunay mga Jean Gong ug mga Melba Oakes sa atong palibot—sa apartment, sa trabahoan, sa ward o branch, sa atong mga grupo sa mga higala ug mga asosasyon. Walay usa nga gusto nga hunahunaon nga nagkinahanglan og tabang. Matag usa nato mangita og mga pundok ug mga oportunidad sa pagsalmot. Kitang tanan nagkinahanglan og luwas nga dapit sa pagtinguha ug pagpangutana, usa ka luwas nga dapit sa pagkat-on ug pagsunod sa doktrina sa ebanghelyo ug sa kultura sa Simbahan. Gusto kita nga tan-awon nga mga hamtong ug mahimong responsable ug makasalmot isip mga hamtong.

Gusto kita nga ang Simbahan nga mahimong usa ka dapit diin kita dili mohukom sa usag usa ug kita maghinulsol kon adunay mobati nga sila atong gihukman sa masakit nga paagi. Ang atong matron sa Templo sa Guadalajara Mexico miingon nga ang balaan nga templo nagdasig kaniya nga “dili kaayo mohukom ug mohigugma og dugang.” Sakto siya. Palihug apil bisan og dili kamo hingpit. Kami nagkinahanglan kaninyo. Kon kita mahimong mapuanguron ug malukpanon, ug modapit sa uban sa paghimo sa ingon, ang atong komunidad sa ebanghelyo mahimong mas bukas, masabtan, ug madanihon. Sa usa ka pagsabut, kitang tanan mahimong bag-ong mga kinabig, mibalik nga mga miyembro, bag-ong mibalhin, nga nagtinguha sa pagbuhat sa husto.

Sa nabahin nga mga katilingban, ang mga disipulo ni Jesukristo makapaambit og komon nga pagkabalaan ug pagtabang sa katawhan nga mas labaw pa sa bisan unsa nga mga kalainan. Sa mangitngit, usahay sa mga panahon nga ang mga tawo dautan, ang mga tumutuo mopaambit ug morepresentar sa kamatuoran. Kon hain adunay espirituhanong kagutom sa yuta,²⁷ magsaulog kita Kaniya isip buhing tubig ug pan sa kinabuhi.

Sa mga tawo nga nagkinahanglan og pahalipay ug pakighigala, mahimong usbon nato ang komportable nga butang nga atong gihimo. Tupari sa paglingkod ang usa ka tawo nga nag-inusara sa paglingkod. Ilakip ang uban, hatagi og komplimento ang uban, ug awhaga, sa personal ug sa online. Ayaw paghukom kon ikaw wala masayud sa tibuok sitwasyon. Paminaw, adtoa, ug suportahi. Pangalagad kauban sa saktong panahon nga hunahuna o kasulatan. Bantayi ang mga emosyon sa mga ubang mga tawo. Pag-ampo kanunay.

Karon, ikaw mobang nako. Ugma, ako motabang nimo. Kita ania dinhi alang sa usag usa. Mao kana ang buhaton sa mga higala ug pamilya sa ebanghelyo.

Nasayod ko nga daghan kaninyo mao lang ang miyembro, o ang bugtong aktibo nga miyembro, sa inyong pamilya. Maisugon ug matinud-anon kamo, apan sa kasagaran lisud kini. Palihog panggunit pag-ayo sa gunitanan nga puthaw—o, sama sa gipahayag sa usa ka young adult sa Manaus, Brazil, “gunit pag-ayo sa gunitanan nga puthaw.” Mohukom nga kamo magmakanunayon ug dili matarog, usa ka lig-on nga sumpay sa inyong mga henerasyon. Bililhon kini.

Dili kaayo importante kon kita mao ang nauna nga henerasyon o ikaunom nga henerasyon sa Simbahan kay sa atong pagkalig-on sa atong pagpamatuod kang Jesukristo. Palihog itamon, amumaha, ug panalipdi kanang bililhong binhi sa hugot nga pagtuo. Tugoti nga kini mogamot ug mamulak diha ninyo ug sa inyong mahangturong pamilya.

Palihug magpaka-Melba Oakes o Jean Gong; lig-ona ang mga relasyon karon nga mousab sa umaabot nga 1, 5, o bisan 77 ka tuig.

Kini modala nato ngadto sa atong ikatulo nga imbitasyon: pagpalambo sa inyong kaugalingon pinaagi sa pagsalig sa tabang gikan sa Ginoo ug moapil sa buhat sa Ginoo.

Samtang makat-on kita sa paglihok pinaagi sa hugot nga pagtuo ug kakugi, ang Ginoo sa pag-ani pinaagi sa balaod sa pag-ani makapanalangin nato uban sa “hingpit nga kalipay sa bunga sa [atong] mga paghago.”²⁸ Samtang kita motrabaho nga makugihon ug motrabaho nga maalamon, ang mga oportunidad moabli. Unsay gitawag sa uban nga swerte, atong giila nga mga panalangin. Nasayod kita nga ang mapainubsanon nga pag-ampo ug matinuoron nga determinasyon mosangpot sa mga milagro sa Iyang panahon ug sa pamaagi.

Ang basahon sa Mga Taga-Galacia sa Bag-ong Tugon naghulagway sa balaod sa pag-ani nga “ang ipugas sa tawo mao usab ang iyang anihon.”²⁹ Kinahanglan nga “dili kita magtinapulan sa pagbuhat ug maayo kay kon magmadasigon kita moabot ang panahon nga makaani gayod kita sa bunga niini.”³⁰ Sa laing pagkasulti, kita moani unsay atong gitanom—ang maayo gipahiuli alang sa maayo, ingon man ang pagkamatarung, kaangayan, ug kalooy.³¹

Sila si London ug Luke Brockbank, matinud-anong mga mibalik na nga misyonaryo nga bag-o lang nasilyo sa balaang templo, miingon nga nakat-on sila sa balaod sa pag-ani uban sa ilang mga pamilya diha sa tanaman samtang nagtubo.

[Start video transcript]

London: Aw, momata mi og sayo kaayo mag-una sa mga buyog ug wala pay init ug maningkamot kutob sa mahimo sa pagpangibot og sagbot, pagtanom og daghang tanom, ug maningkamot nga manubo kini gamit ang abuno ug ugang mga dahon, ug pagmintenar sa tanan sa iyang kaugalingong tukmang panahon.

Ang gipasabot nakom, nga ang tanan ganahan ug malingaw nga mamu-po sa bunga—ug mangaon samtang namu-po niini—apan moingon ko nga ang pagguna mao ang labing lisud tungod kay ikaw magpungko, ug pagtaudtaod mosakit na ang tuhod. Ug ang imong mga kamot mahugaw. Mahugaw ang tumoy sa among mga tudlo ug ang among mga kumagko magberde tungod sa pagpangibot og sagbot.

Elder Gong: Mao nga sila miingon nga ikaw adunay berde nga kumagko.

London: Oo, magtuo kamong tungod kini kay maayo mitubo ang mga tanom; tungod kini kay ang mga sagbot gipangibot.

Luke: Si London naghisgot bahin kon unsaon nimo sa pagbuhat sa tanang nag-unang buhatunon sa pagpananom. Kahibalo mo, kinahanglan kamong moabuno ug motanom. Di mo makapaabot nga ang tanaman maayo og tinuboan kon kausa ra sa usa ka semana mo moadto.

[End video transcript]

Elder Gong: Akong gipangutana si London ug si Luke bahin sa atong Manluluwas isip ang matuod nga punoan sa parras kinsa moamuma nato sa espirituhanon paagi.³²

[Start video transcript]

London: Kon atong atimanon ang mga tanom sa tanaman, kinahanglan natong abunohan aron nga kini adunay sakto nga sustansya aron magpadayon sa pagtubo. Susama kana sa atong pagpamatuod tungod kay dili ra kita mabuhi sa usa ka espirituhanong kasinatian. Magkinahanglan kita nianang kanunay nga pagbag-o sa mga kasinatian. Ang paghinumdom sa atong espirituhanong mga kasinatian—nindot kini nga mga butang nga palandongon, apan kanunay kitang nagkinahanglan og dugang.

Luke: Ang bugtong butang nga makabaton kita og 100 ka porsiento nga pagsalig anaa sa Manluluwas. Ug ako naghunahuna nianang paagiha siya ang tinuod nga parras, nga kita makasalig Kaniya kanunay. Ug kon kita maningkamot og maayo sa pagsubay sa atong kabubut-on ngadto sa Iyang kabubut-on—nga Siya ania kanato ug kita anaa Kaniya—ang Manluluwas mao gayod ang makatabang ninyo nga molampos.

London: Gihigugma nako ang Manluluwas, ug ako adunay lig-on kaayo nga pagpamatuod Kaniya ug sa unsay Iyang gihimo alang nato. Siya gayod sama sa usa ka suod kaayo nga higala, usa ka tawo nga dili gayud mobiya kaninyo. Tungod kay ako nakasiguro nga kitang tanan adunay buotang mga higala nga mibiya nato, nga wala paabota o gipaabot. Bisan hain niini, dili kini makalingaw nga kasinatian. Apan nindot kaayo nga makahibalo nga ang Manluluwas di gayod mobiya, nga Siya anaa kanunay kanato, ug nga Siya anaa aron sa paghupay nato ug sa pagtabang nato kon kita nanginahanglan.

[End video transcript]

Elder Gong: Salamat, London ug Luke. London, Luke, ug ako nag-istorya bahin sa kaangayan ug kalooy diha sa balaod sa pag-ani. Atong anihon kon unsay atong gipugas. Apan ang Dios midugang usab sa Iyang kalooy sa atong mga paningkamot. Sa gikaingon ni Pablo, “Ako ang nagpugas sa binhi, si Apolos ang nagbisibis sa tanom apan ang Dios mao ang nagpatubo niini.”³³ Kon ang Dios mohatag og dugang, siya moabli sa mga bintana sa langit ug ibu-bo ang mga panalangin, sa ingon wala nay igong dapit nga kabutangan niini.³⁴ Makita sa espirituhanong mga mata, ang malumong mga kalooy sa Ginoo sa kasagaran mas molabaw pa sa unsay atong naangkon pinaagi lamang sa atong trabaho.

Usahay ang kinabuhi walay hustisya ug dili makiangayon uban sa malisod, mangitngit, ug mamingaw nga mga higayon. Uban sa matarong nga tingoha ug masulundon nga paningkamot, mobati kita nga nahimo nato ang tanan nga gisugo kanato. Apan ang mga butang wala mahitabo sumala sa atong gilauman. Lisud kini. Mobati kita nga walay paglaom, dili malipayon, tingali masuk-anon. Sa maong mga higayon, palihog hinumdomi, ang mga paagi nga dili nato masabtan, ang “Anak sa Tawo mikunsad ubos kanilang tanan.”³⁵ Siya nakasabot tungod kay Siya miagi niini.³⁶ “Tan-awa,” ang atong Manluluwas miingon, “Gikulit ko ang imong ngalan diha sa akong mga palad.”³⁷ Siya misaad, “Kining tanan nga mga butang makahatag kanimo og kasinatian, ug alang sa imong kaayohan.”³⁸

Maghulat kita sa Ginoo uban ang paglaom ug usahay kahingawa. Ang Iyang mga saad sigurado: “Kadtong mosalig sa Ginoo makabaton ug bag-ong kusog; manglupad sila daw agila, managan sila ug dili kapuyan, manlakaw ug dili maluya.”³⁹ “Mahimong may paghilak sa gabii, apan sa pagkabuntag mobanos ang kalipay.”⁴⁰ “Walay kasub-anan sa yuta nga dili mahupay sa langit.”⁴¹

Sa Iyang panahon ug pamaagi, himoon sa Dios nga matarong ang mga inhustisya, mga kasubo, ug mga kahigawad. Alang sa andam ug mapainubsanon, ang Iyang ebanghelyo mohatag nato og ikaduha ug ikatulo nga kahigayonan, kapitoan ka pito pa gani.⁴² Kadtong kinsa motuman sa mga sugo sa Dios “mabulahan sa tanan nga mga butang.”⁴³

Sa atong panahon, uban sa grabing pag-antos ug tawhanong panginahanglan bisan asa, gibati nato ang makakombinser nga hinungdan ug balaang katuyoan sa pagtanyag og Kristohanong pagserbisyo. Alang nato, ang gugma sa Dios ug sa silingan nagpasabot sa oportunidad ug responsibilidad tungod sa paghimo og mga pakigsaad. Usa ka bag-ong survey sa Simbahan nagpakita nga ang mga young adult miila ug mitubag sa dinalian nga tawhanong mga panginahanglan sa Uropa, Tunga-tunga ug Habagatang Amerika, sa Caribbean, Asya, Africa, Amihanang Amerika, ug sa Pasipiko, ug hapit sa bisan asa sa tibuok kalibotan. Kamo ug ang inyong mga higala, sa paghisgot og pipila:

nagtahi og mga mask,
nagsuporta sa mga sentro sa dangpanan alang sa mga babaye,
nagtabang sa pagpanglimpyo ug pagpanghatag og tabang tungod sa natural nga katalagman,
naghatag og nutrisyon sa mga bata,
naglig-on sa lokal nga mga komunidad, ug
naghatod og pagkaon ngadto sa punduhanan og pagkaon.⁴⁴

Niining COVID nga pandemya, ang atong mga miyembro, ang atong mga higala, ug ang atong Simbahan naghatod sa atong labing dako sukad nga makitawhanong tabang, sa 1031 COVID-19 nga mga proyekto sa 151 ka nasod. Kadtong nanginahanglan nakadawat og sobra sa 28.4 ka milyon ka personal protective equipment (PPE) nga mga aytem, 3.5 ka milyon ka aytem nga pagkaon, 1.8 ka milyon ka mga hygiene kit, ug 1.07 ka milyon ka piraso sa medikal nga ekipo ug mga suplay.

Sa ingon, gikan sa uma ngadto sa lamesa, labaw sa 700 ka trak sa pagkaon ug ubang kinahanglanon ang mibiyahe og 2.5 ka milyon ka kilometro gikan sa atong sistema sa bishops’ storehouse sa Simbahan ngadto sa 380 ka pundokanan sa pagkaon, sa mga pinuy-anan sa walay mga panimalay, ug mga ahensya sa kalooy. Gipangutana ko unsa ang tipikal nga 18-wheeler truck. Ang truck nagdala og 3,264 ka delata sa karning baka o pabo; 7,488 ka delata sa mais, batong, o hiniwa nga mga tamatis; 6,528 ka delata sa stew, soup, o chili; ug, ang akong paborito, 792 ka garapon sa atong inila—ug kini mao ang akong paborito—nga hinimo sa Simbahan nga peanut butter, puno sa nutrisyon, enerhiya, ug maayong kabubut-on.

Ang atong mga trak mokarga usab og prutas, mga lagutmon, ug mga pudding nga gihimo o giproseso didto sa atong 19 ka uma sa Simbahan, 3 ka prutasan, 4 ka himoanan sa delata, 1 ka gatasan, ug 3 ka operasyon sa pagpamuhi. Tingali nagpuyo kamo sa komunidad diin ang atong Simbahan nakigtambayayong kauban sa lokal nga mga grupo sa paghatag og pagkaon ug sa ubang mga kinahanglanon.

Ang pagpanghatag og pagkaon sa tibuok kalibotan ug seguridad sa pagkaon maoy atong gikabalak-an. Ang United Nations nanagna nga ang mga pagkabalda tungod sa COVID makapadugang og 130 ka milyon ka indibidwal nga magutman og taas-taas nga panahon. Samtang nagsugod pa lang, ang atong makitawhanong mga amot nagpadayon, gikinahanglan, ug gikalipay sa naigo nga mga dapit sama sa Somalia, Yemen, D.R. Congo, Haiti, ug Zimbabwe ug sa nagkasungi nga mga rehiyon sa Syria, Yemen, South Sudan, D.R. Congo, ug sa Sahel nga rehiyon sa Africa, ug uban pa.

Ang gigutom nga mga bata nagkinahanglan og pagkaon. Uban sa usa ka humanitarian partner, kita nakahatod og 30 ka milyon ka pagkaon ngadto sa mga bata sa eskwelahan sa siyam ka naglambo nga mga nasod. Ang matag plato sa pagkaon naglakip og 482 ka makapatunhay sa kinabuhi nga mga kaloriya sa lugas, protena, mga utanon, ug mga prutas.

Sumala sa atong nakita, ang atong Simbahan mihimo og makitawhanong mga donasyon sa tibuok kalibotan ug naghatag usab og dakong suporta sa Amihanan ug Habagatang Amerika ug sa ubang mga dapit diin daghang mga miyembro sa Simbahan nagpuyo.

Ang mga refugee ug ang mga tawo nga napugos sa pagbiya sa ilang mga panimalay apan wala mobiya sa ilang nasod maoy dakong hagit sa humanitarian. Ang atong Simbahan mao ang usa sa unang moresponde sa daghang mga krisis sa refugee. Uban sa atong mga partner, kita mohatag og pagkaon, panglimpyo, tubig ug mga butang panghinlo, mga shelter kit, sinina, personal protective equipment, ug suporta sa edukasyon, didto sa Latin America, Uropa, Africa, Asya, ug Tunga-tungang Sidlakan.

Kita motabang ug motuman sa lokal nga mga panginahanglan. Kita motahod sa lokal nga kostumbre ug kultura. Pananglitan, ang makapakugang nga 2004 nga tsunami sa Indonesia nga mipatay o mibilin og wala makit-i nga gibana-bana nga 228,000 ka indibidwal. Ang atong tibuok kalibotan nga Simbahan nga puasa mitabang sa pag-ayo sa mga moske, pagpalit og mga makina sa panahi aron sa paghimo sa tradisyonal nga sinina, ug pagtukod pag-usab sa mga panimalay ug mga eskwelahan. Ang mga lider sa Islam misulti namo, “Kami nagpuasa, mao nga ang mga donasyon gikan sa pagpuasa adunay espesyal nga kahulogan alang namo. Ang inyong pagpuasa ug pagsakripisyo nagpakita sa inyong hugot nga pagtuo ug gugma sa Dios.”

Isip mga disipulo ni Jesukristo, ang atong pakigsaad sa Dios ug sa usag usa nagdapit nato nga mahimong maayo ug mohimo og maayo. Abi ninyo, ang atong Simbahan mohatag og makitawhanong tabang nga walay pagtagad sa kaliwat, sa giapilan nga relihiyon, o sa nasyonalidad. Ang atong makitawhanong mga kalihokan wala gamita sa pagsangyaw sa atong mga pagtuo. Makigtambayayong kita sa tanang mga relihiyon, o sa walay relihiyon. Motubag kita sa dinalian ug taas og tagal nga mga panginahanglan. Magpabilin kita samtang magpadayon ang panginahanglan, bisan og dugay nang nawala ang mga kamera sa balita. Motabang kita sa pagpalambo og bili sa kaugalingon ug pagbarog sa kinaugalingong paningkamot. Gibati nato ang mga panalangin sa Langitnong Amahan samtang atong ipadayag ang atong gugma sa Dios sa paghimo sa tanang posible alang sa atong kaigsoonan—sa Iyang mga anak nga lalaki ug mga anak nga babaye—bisan asa, sa matag paagi nga atong mahimo.

Mga kaigsoonan, samtang kamo magkat-on, motubo, ug moserbisyo, ug samtang kamo maningkamot nga magmaisugon sa inyong pagpamatuod kang Jesukristo, palihug pagmapailubon ug pagmasinabtanon sa inyong kaugalingon. Kanunay natong gilisod-lisod pag-ayo ang atong kaugalingon. Ang Ginoo midapit kanato sa pagduol kon unsa kita, sa paghimo sa tanang mga butang diha sa “kaalam ug kahusay.” Wala Siya magpaabot nga kita modagan og paspas kay sa atong kusog, basta kita makugihon ug maisugon.⁴⁵

Usahay, tingali mobati kita nga wala kaayo kinahanglana o dili kaayo mapasaligon kon ang Ginoo wala mosugo nato sa paghimo og “dagkong mga butang.”⁴⁶ Apan, sa kasagaran ang labing gikinahanglan sa Ginoo mao nga ipadan-ag nato ang atong kahayag matag adlaw. Hinumdomi, si Jesus mao ang tinuod nga parras. Ang inyong espirituhanong pagtubo ug kalipay bililhon ngadto Kaniya.

Sa katingbanan, sa pagsugod niining bag-ong tuig, ako moimbitar kaninyo sa pagdawat sa hingpit nga mga panalangin sa tulo ka mga imbitasyon:

“Hunong ug ilha nga ang [Dios mao] ang Dios.”⁴⁷ Tugoti ang Iyang kaayo ug mga nilalang nga modasig sa inyong hunahuna, mokalma ug mosiguro sa inyong kasingkasing, ug mopamatuod nga Siya naghulat sa pagpalig-on sa inyong personal nga relasyon.
Usba ang umaabot karon. Amumaha ang mga relasyon sa daghang henerasyon nga mopanalangin ninyo ug niadtong naglibot ninyo sa katuigan nga moabot.
Salig sa Ginoo sa pag-ani sa pagtabang ninyo nga kamo molambo. Samtang kita mosalig sa tabang sa Ginoo ug moapil sa buhat, ang Ginoo sa pag-ani makahatag nato og kabuhong. Ang Iyang mga panalangin mao ang hingpit nga kalipay.⁴⁸

Tulo ka dugang nga mga aksyon motabang ninyo sa paglig-on sa inyong hugot nga pagtuo ug mahimong maisugon sa inyong pagpamatuod kang Jesukristo:

Takus nga maghupot og magamit nga rekomend sa templo. Palihog buhata bisan kon ang templo dili pa hingpit nga bukas. Palihog buhata bisan kon kamo kinahanglan pang mohapsay og pipila ka butang sa inyong kinabuhi.
Pahibaloa ang inyong bishop o presidente sa branch kinsa ug asa kamo. Kon kamo wala pa maghupot og calling sa Simbahan, palihog ikonsiderar ang pag-ingon, “Bishop (o presidente sa branch), kon ang Ginoo aduna nay calling alang nako, malipay kong moalagad sa atong Simbahan.”

Matag usa nato nagkinahanglan og mga pako ug mga gamot—daghang mga tawo nga atong ikauban ug gamay nga pundok diin kita makaserbisyo kanunay kauban sa mga kaedad ug maamumahong mga lider, lakip sa bishop kinsa naghupot sa mga yawe.
Samtang kamo manuktok, mangayo, ug mangita, palihug paghimo og personal nga kahimtang nga moamoma sa hugot nga pagtuo ug motabang ninyo sa pagtuman sa mga sugo sa Dios. Gihatag ang mga sugo sa Dios kanato tungod sa Iyang gugma nato aron sa pagpanalipod ug pagpanalangin nato. Palihug pagpuyo nga takos aron ang Espiritu Santo mahimo ninyong kauban ug motabang kaninyo sa pagpangita sa unsay inyong labing gikinahanglan ug gipangita. Ayaw tugoti ang kalibotan nga magpakaaron-ingnon nga motanyag kaninyo og mga butang nga dili mahatag niini.

Minahal nga mga kaigsoonan, ang Dios mao ang atong Mahanturong Amahan. Ang Iyang Pinalanggang Anak mao ang atong Manluluwas nga si Jesukristo. Ang mahangturong mga ordinansa, mga pakigsaad, ug doktrina makita diha sa Iyang giahiuli nga Simbahan nga gitawag sa Iyang ngalan: Ang Simbahn ni Jesukristo sa mga Santos sa Ulahing mga Adlaw. Ang Pagpahiuli sa kahingpitan sa ebanhelyo ni Jesukristo nagpadayon, gikan ni Propeta Joseph Smith ngadto ni Presidente Russell M. Nelson karon. Ang Basahon ni Mormon ug ang balaang mga kasulatan nagpamatuod, sama nako, nga si Jesus mao ang Kristo.

Minahal nga mga higala, ipadan-ag ang inyong kahayag!⁴⁹ Padayon sa pagkamatinud-anon sa inyong mga pakigsaad ug pagmaisugon sa inyong pagpamatuod kang Jesukristo. Hinaot nga ang Dios mogiya ug manalipod ug mopanalangin kaninyo sa inyong matarong nga mga pangandoy ug mga tingoha. Hinaot nga kamo makakaplag sa koneksyon sa pakigsaad ug kalipay sa Iyang ebanghelyo, dapit ug luna diha sa Iyang Simbahan—nga mao ang atong Simbahan. Sa sagrado ug balaan nga ngalan sa atong Manluluwas nga si Jesukristo, amen.