Na Vu ni Nuinui

2021 S&I Lotu ni Tabagone Qase Cake e Vuravura

Sister Susan L. Gong

10 ni Janueri, 2021

Kemuni na taciqu kei na ganequ talei, e ka marautaki na tiko kei kemuni. Eda soqoni vata mai na veivanua tawani kei na veiyanuyanu ka semati vata ena loloma ni noda iVakabula o Jisu Karisito kei na noda yalayala me vukea na tarai cake ni nona matanitu. O ni solia vei au na vakanuinui ena vuravura vinaka cake. Ka dina sara era tiko e milioni na tamata ka da rawa ni cakacaka vata ka vuli mai vei ira. “Na i nuinui sai koya na noda rawa ni raica na rarama dina ga ni veisolegi tu na butobuto.”¹

Na noda i nuinui cecere sa i Jisu Karisito, na noda iVakabula. Ena Vukuna eda kunea kina na marau kei na vakacegu. E kila na kena itinitini mai na ivakatekivu. E yalataka, “Dou vakasaqaqara vagumatua, ka daumasu tiko ga ena vakabauta, ka na yaco me vinaka vei kemudou na veika kece, kevaka dou sa lako vakadodonu ka muria na veiyalayalati dou sa veiyalayalati kina vakataki kemudou.”²

Ia eda sega ni rawa ni raica na kena i tinitini mai na ivakatekivu. Eda “kila vaka tikina ga.”³ E rairai beka ni noda bula e tevuki ena sala eso ka duatani mai na veika eda a nuitaka tu. Eda se rawa ni “toso ki liu ka tudei vei Karisito, [ena] taucoko ni nomudou vakanuinui”⁴ baleta nida kila ni Tamada Vakalomalagi dauloloma e tiko na nona i tuvatuva vei keda.

Donumaka na veivakaroti meda tikoga-e-vale ena vuku ni mate dewa na COVID, au cakava tiko e dua na cakacakaniliga vou—ka vakatokai me tikitiki ni pepa ni cula lacadrau. E dua na sala ni nodra cula vata na vei tiki ni sulu lalai me basika kina edua na droini totoka. Taumada na cakacaka oqo e sega ni vaka na veika eda a namaka. O cula vata na veitikinisulu vakatobuicu ka me vebasai kei na kedra irairai ni sa na cula oti. E dredre sara me raici se ra na yaco vakacava na vei roka oqo me cokotivata ki na dua na ituvatuva matata. Ia vakamalua, ni o kotikoti ena vosota, ka yayanitaka vakavicavata, sa na qai basika edua na cakacakaniliga totoka.

Eda rawa ni vakila ni ituvatuva ni noda bula e se bera ni matata. E sega ni kena i balebale o ya nida waraka tiko na bula me qai tekivu. Oqo e gauna vakamareqeti ni bula se cava ga o sotava tiko ena nomu bula.

Oqo na gauna me vakacokotaki kina na taledi eso. E vakavulica o Peresitedi Nelson, “Na vuli sai koya na duidui ni kena vakanananutaki tu ga nomu rawa ni vukei ira na tani kei na nomu vukei ira sara ga.”⁵ Na veika vinaka ka yaga o vulica ni kua ena vakarautaka ka vakalougatataka na nomu bula taucoko.

Oqo edua na gauna mo vakasaqarai ira na dauniveituberi yalomatua ka bula dodonu—itubutubu se tubuda, qasenivuli, itokani, iliuliu ni Lotu, ka bibi duadua, ko Jisu Karisito—me vukei keda me tarai cake na bula vakaibalebale. Bucina na veiwekani e vakaibalebale vata kei ira era rawa ni vukei iko mo vuli ka tubu.

Oqo edua na gauna mo vakaogai iko ena inaki yaga eso. Ko lomalagi e sega ni waraka tiko me oti na mate dewa, vei au me lutu e 10 na paudi, se vei iko mo vakamautaka na tamata ka dau lewe tu ni nomu tadra me yaco mo tisaipeli dina—mo maroroya na nona ivunau, ka vakabibi mo lomana na Turaga kei ira na wekada voleka.

Ke da vinakata na inuinui e cecere cake kei na bula vakaibalebale ka titobu cake, eda rawa ni tekivutaka na veisiga yadua ena dua na masu ni vakavinavinaka kei na kerekere mai vuni yaloda, “Tamaqu Vakalomalagi, ni vukei au meu iyaya ni cakacaka e ligamuni nikua. Dolava na yaloqu. Solia vei au na vuku, na vakasama, na kaukauwa, kei na yalo qaqa meu cakava na ka au rawa ni cakava.” Qai vaqara na madigi mo itokani vinaka cake, edua na sisita dau loloma cake, edua na gonetagane vinaka cake, edua na neiba daulomasoli cake, edua na dauveiqaravi veivakauqeti, edua na itubutubu dauvosota cake. O Leo Tolstoy e vola, “E na rairai beka vei ira na tamata ni ra bula tiko ena nodra nanumi ira ga vakai ira, ia na ka dina sai koya na loloma duduaga era bula tiko kina. O koya sa tiko vua na loloma, sa tiko vua na Kalou, ka sa tiko vei koya na Kalou, ni sa loloma na Kalou.”⁶

O lomalagi e sega ni waraki keda meda taucoko sara se meda yaco yani ki na vuravura ni yalo me qai vakalougatataki keda. Ke da sa vakayacora tiko “vakadodonu na noda itavi,” eda “na rawata vakaidina na [keda] isau, io na vakacegu ena vuravura oqo, kei na bula tawamudu ena bula sa bera mai”r⁷

Na loloma i Karisito e dei. A vakasalataka na iApositolo o Paula:

“Niu sa kila vakaidina ni na sega ni rawata na mate, se na bula, se ko ira na agilose, se ko ira sa liu, se ko ira sa kaukauwa, se na veika sa yaco edaidai, se na veika ena yaco e muri,

“Se na ka cecere, se na ka titobu, se duatani na ka me tawasei keda mai na loloma ni Kalou, sa yaco ena vukui Karisito Jisu na noda Turaga.”⁸

Ia “me vakasinaiti kemudou mada na Kalou, o koya na vu ni nuinui ena reki kecega kei na vakacegu”⁹ ni dou sa vakararavi vua, mo dou vakasinaiti kina ena inuinui ena kaukauwa ni Yalo Tabu.

Na kosipeli i Jisu Karisito e dina. E kaukauwa. E totoka, ka bibi sara! Au cavuta na veika kecega oqo ena yaca i Jisu Karisito, emeni.

_______________________________________________