ហេតុផលដើម្បីមានក្ដីសង្ឃឹម
ការប្រជុំធម្មនិដ្ឋាន ស&វ ទូទាំងពិភពលោកសម្រាប់យុវមជ្ឈិមវ័យ ឆ្នាំ ២០២១
ថ្ងៃទី ១០ ខែ មករា ឆ្នាំ ២០២១
ប្អូនប្រុសស្រីជាទីគោរព ខ្ញុំមានអំណរបាននៅជាមួយប្អូនៗ ! យើងមកពីគ្រប់ទាំងទ្វីប និងកោះទាំងឡាយក្នុងសមុទ្រ ដើម្បីជួបជុំគ្នាតាមអ៊ីនធឺណិតដោយរួបរួមគ្នាក្នុងក្ដីស្រឡាញ់នៃព្រះអង្គសង្គ្រោះរបស់យើង គឺព្រះយេស៊ូវគ្រីស្ទ និងក្នុងការប្ដេជ្ញាចិត្តយើងដើម្បីជួយកសាងនគររបស់ទ្រង់ ។ ប្អូនផ្ដល់ឲ្យខ្ញុំនូវក្ដីសង្ឃឹមថានឹងបានពិភពលោកមួយដ៏ប្រសើរ ។ ហើយពិតណាស់ មានមនុស្សល្អរាប់លាននាក់ដែលយើងអាចរួមគ្នា និងរៀនសូត្រពីពួកគេបាន ។ ប៊ីស្សព ដាសម៉ូននិយាយថា« សេចក្ដីសង្ឃឹមគឺការអាចមើលឃើញថា មានពន្លឺ ទោះស្ថិតក្នុងភាពងងឹតទាំងស្រុងក្ដី » ។១
សេចក្ដីសង្ឃឹមដ៏ធំបំផុតរបស់យើងគឺនៅក្នុងព្រះយេស៊ូវគ្រីស្ទ ដែលជាព្រះអង្គសង្គ្រោះរបស់យើង ។ តាមរយៈទ្រង់ យើងរកឃើញអំណរ និងសេចក្ដីសុខសាន្ដ ។ ទ្រង់ជ្រាបដឹងពី ទីបញ្ចប់តាំងពីការចាប់ផ្តើមមកម្ល៉េះ ។ ទ្រង់សន្យាថា « ចូរព្យាយាមស្វែងរក ចូរអធិស្ឋានជានិច្ច ហើយចូរមានជំនឿ ហើយគ្រប់ការណ៍ទាំងអស់ផ្សំគ្នាសម្រាប់សេចក្ដីល្អដល់អ្នក បើសិនជាអ្នករាល់គ្នាដើរដោយទៀងត្រង់ » ។២
ប៉ុន្ដែ យើងមើលមិនឃើញពីទីបញ្ចប់តាំងដើមដំបូងមកបានឡើយ ។ ព្រោះយើង « ចេះមិនទាន់សព្វគ្រប់ » ។៣ ប្រហែលជីវិតយើងនឹងបង្ហាញឡើង តាមរបៀបខុសៗគ្នាពីអ្វីដែលយើងបានសង្ឃឹមទុក ។ ប៉ុន្ដែយើងនៅតែអាច « ឈានទៅមុខដោយខ្ជាប់ខ្ជួននៅក្នុងព្រះគ្រីស្ទ [ ហើយ ] មានការភ្លឺថ្លានៃសេចក្ដីសង្ឃឹមដ៏ឥតខ្ចោះ »៤ ពីព្រោះយើងដឹងថា ព្រះវរបិតាសួគ៌ជាទីស្រឡាញ់របស់យើងមានផែនការមួយសម្រាប់យើង ។
ក្នុងអំឡុងពេលបង្គាប់ឲ្យនៅផ្ទះដោយសារជំងឺកូវីដ ខ្ញុំបានរៀនជំនាញថ្មីបន្ថែមមួយទៀត—ដែលហៅថាការដេរដោយការដានតាមក្រដាសជាមុន ។ វាគឺជាវិធីមួយក្នុងការច្នៃកម្ទេចក្រណាត់ទៅជាការរចនាដ៏សាំញ៉ាំមួយ ។ ដំបូង ដំណើរការវាផ្ទុយពីការស្មាន ។ ប្អូនដេរបំណែកក្រណាត់ចូលគ្នា តែដេរក្រឡាប់ចុះឡើង និងដេរបកក្រោយពីគន្លងដែលវានឹងលេចជារូបរាងចុងក្រោយ ។ វាពិបាកនឹងឃើញថា ពណ៌តូចៗទាំងនេះនឹងក្លាយទៅជាគន្លងដែលស៊ីគ្នាណាស់ ។ ប៉ុន្ដែបន្ដិចៗម្ដង ពេលយើងកាត់ ហើយដេរវាចុះឡើងៗដោយអត់ធ្មត់ នោះម៉ូតរចនាដ៏ស្រស់ស្អាតមួយនឹងលេចរូបរាងឡើង ។
យើងអាចមានអារម្មណ៍ថា ផែនការសម្រាប់ជីវិតយើងមិនទាន់មានភាពច្បាស់លាស់នៅឡើយ ។ តែនោះពុំមានន័យថា យើងរង់ចាំឲ្យជីវិតចាប់ផ្ដើមទេ ។ ពិតជាមាននូវឆ្នាំដែលមិនអាចកាត់ថ្លៃបានមិនថាប្អូននៅទីណាក្នុងជីវិតរបស់ប្អូនក៏ដោយ ។
នេះគឺជារដូវកាលដើម្បីអភិវឌ្ឍទេពកោសល្យ ។ ប្រធាន ណិលសុន បង្រៀនថា « ការអប់រំគឺខុសគ្នារវាង បំណងប្រាថ្នា ដើម្បីអ្នកអាចជួយអ្នកដទៃ និង ការមានលទ្ធភាពអាច ជួយដល់ពួកគេបាន » ។៥ ការណ៍ល្អ និងមានប្រយោជន៍ដែលប្អូនរៀនសូត្រនៅពេលនេះ នឹងកំណត់ជីវិត ព្រមទាំងផ្ដល់ពរជ័យពេញមួយជីវិតប្អូន ។
នេះគឺជារដូវកាលដើម្បីស្វែងរកគ្រូបង្វឹកដ៏វាងវៃ និងសុចរិត—ឪពុកម្ដាយ ឬជីដូនជីតា គ្រូបង្រៀន មិត្តភក្ដិ ថ្នាក់ដឹកនាំសាសនាចក្រ និងអង្គដែលសំខាន់បំផុតនោះគឺ ព្រះយេស៊ូវគ្រីស្ទ—ដើម្បីជួយយើងកសាងជីវិតដ៏មានអត្ថន័យមួយ ។ សូមបង្កើតទំនាក់ទំនងដ៏មានអត្ថន័យជាមួយអស់អ្នកដែលអាចជួយប្អូនឲ្យរៀន និងរីកចម្រើន ។
នេះគឺជារដូវកាលមួយដើម្បីឧស្សាហ៍ចូលរួមក្នុងប្រយោជន៍ល្អ ។ ស្ថានសួគ៌មិនរង់ចាំទាល់តែជំងឺឆ្លងរាតត្បាតនេះចប់ ទើបឲ្យខ្ញុំស្រក ៥ គីឡូ ឬទើបឲ្យប្អូនរៀបការនឹងមនុស្សក្នុងក្ដីស្រមៃរបស់ប្អូន ដើម្បីឲ្យយើងអាចក្លាយជាសិស្សដ៏ពិត—កាន់តាមបទបញ្ញាតិរបស់ទ្រង់ ជាពិសេសបញ្ញាតិដែលស្រឡាញ់ព្រះអម្ចាស់ និងអ្នកជិតខាងរបស់យើងនោះទេ ។
ប្រសិនបើយើងចង់បានក្ដីសង្ឃឹមដ៏អស្ចារ្យ និងអត្ថន័យស៊ីជម្រៅជាងនេះក្នុងជីវិតយើង នោះយើងអាចចាប់ផ្ដើមរាល់ថ្ងៃដោយការអធិស្ឋានដឹងគុណ និងការទូលអង្វរដោយស្មោះសរមួយ « ព្រះវរបិតាសួគ៌ សូមឲ្យទូលបង្គំធ្វើជាឧបករណ៍មួយក្នុងព្រះហស្ដទ្រង់នៅថ្ងៃនេះ ។ សូមបើកដួងចិត្តទូលបង្គំ ។ សូមប្រទានដល់ទូលបង្គំនូវប្រាជ្ញា ការស្រមៃ កម្លាំង និងចិត្តក្លាហានដើម្បីធ្វើអ្វីដែលទូលបង្គំអាចធ្វើបាន » ។ បន្ទាប់មក សូមស្វែងរកឱកាសដើម្បីធ្វើជាមិត្តស្មោះត្រង់ ប្អូនស្រីល្អ កូនប្រុសល្អ អ្នកជិតខាងសប្បុរស អ្នកផ្ដល់ការងារបម្រើដ៏បំផុសគំនិត និងឪពុកម្ដាយដ៏អំណត់ ។ ឡេអូ ថុលស៍ថយ បានសរសេរថា « ទោះជាមើលទៅឃើញថា មនុស្សរស់ដោយព្រោះការបំពេញតម្រូវការរបស់ខ្លួនឯងមែន ក៏ការពិតគឺថា មនុស្សរស់ដោយព្រោះក្ដីស្រឡាញ់ប៉ុណ្ណោះ ។ មនុស្សដែលមានក្ដីស្រឡាញ់ គឺនៅក្នុងព្រះ ហើយព្រះនៅក្នុងមនុស្សនោះ ព្រោះព្រះទ្រង់ជាសេចក្តីស្រឡាញ់ » ។៦
ស្ថានសួគ៌មិនរង់ចាំឲ្យយើងបានឥតខ្ចោះ ឬឲ្យយើងទៅដល់បរលោក ទើបប្រទានពរឲ្យយើងនោះទេ ។ ប្រសិនបើយើងប្រព្រឹត្ត « កិច្ចការទាំងឡាយដោយសេចក្ដីសុចរិត » នោះយើង « នឹងបានទទួលរង្វាន់របស់ [ យើង ] គឺសេចក្ដីសុខសាន្តនៅនាលោកិយនេះ និងជីវិតដ៏នៅអស់កល្បជានិច្ចនៅបរលោក » ។៧
សេចក្ដីស្រឡាញ់របស់ព្រះគ្រីស្ទគឺពិតប្រាកដ ។ សាវកប៉ុលបង្រៀនថា ៖
« ទោះស្លាប់ ឬរស់ ពួកទេវតា ឬអំណាចអ្វី ការអ្វីនៅជាន់នេះ ឬទៅមុខ ឬឥទ្ធិឫទ្ធិអ្វី
ទីមានកម្ពស់ ទីជម្រៅ ឬរបស់អ្វីដែលកើតមកឯទៀតក្តី នោះពុំអាចនឹងពង្រាត់យើងចេញពីសេចក្តីស្រឡាញ់របស់ព្រះ ដែលនៅក្នុងព្រះគ្រីស្ទយេស៊ូវ ជាព្រះអម្ចាស់នៃយើងរាល់គ្នាទៅបានឡើយ » ។៨
សូម « ព្រះនៃសេចក្តីសង្ឃឹមប្រទានឲ្យអ្នករាល់គ្នាបានគ្រប់អស់ទាំងសេចក្តីអំណរ និងសេចក្តីសុខសាន្តដ៏ពោរពេញ »៩កាលប្អូនទុកចិត្តលើទ្រង់ ប្រយោជន៍ឲ្យប្អូនបានសេចក្ដីសង្ឃឹមជាបរិបូរណ៍ដោយព្រះចេស្ដានៃព្រះវិញ្ញាណបរិសុទ្ធ ។
ដំណឹងល្អនៃព្រះយេស៊ូវគ្រីស្ទគឺពិត ។ វាពេញដោយអានុភាព ។ វាស្រស់បំព្រង ហើយសំខាន់ ! ខ្ញុំថ្លែងរឿងទាំងនេះ ក្នុងព្រះនាមនៃព្រះយេស៊ូវគ្រីស្ទ អាម៉ែន ។
_______________________________________________