Ngaahi ʻUhinga ki he ʻAmanaki Leleí
Fakataha Lotu Fakaemāmani Lahi ʻa e S&I maʻá e Kakai Lalahi Kei Talavoú 2021
10 Sānuali 2021
Kāinga ʻofeina, ʻoku fakafiefia ke ʻi heni mo kimoutolu! ʻOku tau fakatahataha mai ʻi he ʻinitanetí mei he ngaahi konitinēniti kotoa pē mo e ngaahi motu ʻo e tahí, ʻo fakatahaʻi ʻe he ʻofa ʻa hotau Fakamoʻui ko Sīsū Kalaisí mo ʻetau tukupā ke langa hake hono puleʻangá. ʻOku mou ʻomi kiate au ha ʻamanaki lelei ki ha māmani lelei ange. Pea ʻoku moʻoni foki ʻoku lauimiliona ha kakai lelei ange te tau lava ʻo ngāue fakataha mo lava ke tau ako mei ai. ʻOku pehē ʻe Pīsope Tesimoni Tutu, “Ko e ʻamanaki leleí ko e lava ke sio ʻoku ʻi ai ha maama neongo e fakapoʻuli lōloó.”1
Ko hotau ʻamanaki leleiʻanga lahi tahá ʻoku ʻia Sīsū Kalaisi, ko hotau Fakamoʻuí. ʻOku tau maʻu meiate Ia ʻa e fiefiá mo e melinó. ʻOkú Ne ʻafioʻi ʻa e ngataʻangá mei he kamataʻangá. ʻOkú Ne talaʻofa mai ʻo pehē, “Fekumi faivelenga, lotu maʻu ai pē, pea loto-tui, pea ʻe fengāueʻaki fakataha ʻa e ngaahi meʻa kotoa pē koeʻuhí ko hoʻomou leleí, ʻo kapau te mou ʻaʻeva angatonu.”2
Ka ʻoku ʻikai ke tau lava ʻo sio ki he ngataʻangá mei he kamataʻangá. ʻOku tau “ʻilo fakakonga pē.”3 Mahalo ʻoku fou mai ʻetau moʻuí ʻi ha ngaahi tūkunga kehe mei he meʻa ne tau ʻamanaki ki aí. ʻE malava ke tau kei “vivili atu kimuʻa ʻi he tui mālohi kia Kalaisi, [pea] maʻu ʻa e ʻamanaki ʻoku mālohi haohaoa”4 koeʻuhí he ʻoku tau ʻiloʻi ʻoku ʻi ai ha palani ʻetau Tamai Hēvani ʻofá maʻatautolu.
Lolotonga ʻo e ngaahi fakataputapui mei he mahaki fakaʻauha ʻo e COVID ke nofo ʻi ʻapí, ne u ngāue ki ha ʻilo foʻou—ʻoku ui ko e tuitui monomono ʻo ʻuluaki fakatoka ʻaki e pepá. Ko hano liliu ia ʻo e ngaahi kongokonga tupenu īkí ki ha ngaahi kupesi fihifihi. ʻI he kamatá ʻoku faingataʻa koeʻuhí he ʻoku fehangahangai ia mo e founga angamahení. ʻOkú ke tuitui femafuliaki mo fakaholomui ha ngaahi kongokonga tupenu ʻi he tūkunga te nau ʻi ai heʻene ʻosí. ʻOku faingataʻa ke tala pe ʻe anga fēfē hono fakatahatahaʻi e ngaahi lanu kehekehe ko ʻení ki ha foʻi sīpinga ʻe taha. Ka ʻi hoʻo kosi, tuitui, toutou haiane, mo ngāue māmalie taʻetukú, ʻoku toki hā mai leva ha foʻi kupesi fakaʻofoʻofa.
Mahalo te tau ongoʻi ʻoku ʻikai ke fuʻu mahino e palani ki heʻetau moʻuí. ‘Oku ‘ikai ‘uhinga ia ke tau tatali ai ke toki kamata e moʻuí. Ko ha ngaahi taʻu mahuʻinga ʻaupito eni tatau ai pē pe ko e hā e taʻu ʻokú ke ʻi ai ʻi ho moʻuí.
Ko ha taimi ʻeni ke fakatupulaki ai e ngaahi talēnití. ʻOku akoʻi ʻe Palesiteni Nalesoni ʻo pehē, “Ko e akó ʻokú ne fakafaikehekeheʻi e fakaʻamu ke ke lava ʻo tokoniʻi ha kakai kehé mo e malava ke tokoniʻi kinautolú.”5 ʻE fakafuo mo tāpuekina hoʻo moʻuí kotoa ʻe he ngaahi meʻa lelei mo ʻaonga ʻokú ke ako ʻi he taimi ní.
Ko e taimi ʻeni ke fekumi ki ha kau faiako poto mo angatonu—mātuʻa pe ngaahi kui, kau faiako, ngaahi kaungāmeʻa, kau taki ʻo e Siasí, ka ko e mahuʻinga tahá, ko Sīsū Kalaisi—ke tokoniʻi kitautolu ke langaki hake ha moʻui ʻoku ʻaongá. Fokotuʻu ha ngaahi vā fetuʻutaki lelei mo kinautolu te nau lava ʻo tokoniʻi koe ke ke ako mo tupulakí.
Ko e taimi ʻeni ke kau maʻu pē ki ha ngaahi ngāue ʻoku leleí. ʻOku ʻikai ke tatali mai e langí ia ke ʻosi e mahaki fakaʻauha ʻoku mafolá, ke u holoʻaki ha pauni ʻe 10, pe kia koe ke ke mali mo e tokotaha ʻokú ke fakaʻamu ki aí ke tau toki hoko ai ko kau ākonga moʻoni—ke tauhi ai ʻEne ngaahi fekaú, tautefito ki he fekau ke ʻofa ki he ʻEikí mo hotau ngaahi kaungāʻapí.
Kapau ʻoku tau fie maʻu ha ʻamanaki lelei lahi ange mo mahuʻinga ange ʻi heʻetau moʻuí, mahalo te tau kamata e ʻaho kotoa ʻaki ha lotu ʻo e fakafetaʻi mo ha tautapa fakamātoato, “Tamai Hēvani, tuku ke u hoko ko ha meʻangāue ʻi Ho toʻukupú ʻi he ʻahó ni. Fakaava hoku lotó. Foaki mai ha poto, faʻa fakakaukau, mālohi, mo e loto-toʻa ke u fakahoko ʻa ia ʻoku ou malavá.” Pea kumi ha ngaahi faingamālie ke hoko ai ko ha kaungāmeʻa mamae ange, ko ha fefine angalelei ange, ko ha foha lelei ange, ko ha kaungāʻapi angaʻofa ange, ko ha tokotaha ngāue fakaetauhi ʻoku tataki fakalaumālie ange, mo ha mātuʻa kātaki lahi ange. Naʻe tohi ʻe Lio Tolosatoi ʻo pehē, “Neongo ʻoku pehē ʻe he faʻahinga ʻo e tangatá ʻoku nau moʻuí ʻi heʻenau tokangaʻi lelei kinautolú, ka ko hono moʻoní ko e ʻofá pē taha ʻoku makatuʻunga mei ai ʻenau moʻuí. Ko ia ʻokú ne maʻu e ʻofá, ʻoku ʻi he ʻOtuá ia, pea ʻoku ʻa e ʻOtuá ia, he ko e ʻOtuá ko e ʻofa.”6
ʻOku ʻikai ke tatali mai e langí kae ʻoua kuo tau toki haohaoa pe ke tau tūʻuta ki he maama ka hoko maí kae toki tāpuekina kitautolu. Kapau te tau fai ʻa e “ngaahi ngāue ʻo e māʻoniʻoní,” te [tau] maʻu [ʻetau] totongi, ʻio, ʻa e melinó ʻi māmani pea mo e moʻui taʻengatá ʻi he maama ka hoko maí”7
ʻOku pau e ʻofa ʻa e ʻOtuá. Naʻe naʻinaʻi ʻa e ʻAposetolo ko Paulá:
“ʻE ʻikai ʻi he maté, pe ʻi he moʻuí, pe ʻi he kau ʻāngeló, pe ʻi he kau pulé, pe ʻi he ngaahi mālohí, pe ʻi he ngaahi meʻa ʻi hení, pe ʻi he ngaahi meʻa ʻe hokó,
“Pe ʻi he māʻolunga, pe ʻi he māʻulalo, pe ʻi ha meʻa kehe ʻe taha kuo ngaohi, ʻe ʻikai mafai ia ke fakamāvae ʻa kitautolu mei he ʻofa ʻa e ʻOtuá, ʻa ia ʻoku ʻia Kalaisi Sīsū ko hotau ʻEikí.”8
Fakatauange ʻe “fakafonu ʻa kimoutolu ʻe he ʻOtua ʻo e ʻamanaki leleí ʻaki ʻa e fiefiá mo e melinó”9 pea ʻi hoʻomou falala kiate iá, ke mou mohu ʻamanaki lelei ʻi he mālohi ʻo e Laumālie Māʻoniʻoní.
ʻOku moʻoni ʻa e ongoongolelei ʻo Sīsū Kalaisí. ʻOku mālohi. ʻOku fakaʻofoʻofa, pea ʻoku mahuʻinga! ʻOku ou fai ʻeni ʻi he huafa ʻo Sīsū Kalaisí, ʻēmeni.
________________________________