Espirituhanon nga Angkla
S&I nga Tinuig nga Sibya Enero 2024
Biyernes, Enero 26, 2024
Ang akong asawa, si Kristi, nagdako duol sa kabaybayonan sa Habagatang California ug ganahan kaayo og dagat sukad pa sa una. Usa sa iyang paborito nga mga butang mao ang pagbisita og mga parola [lighthouse]. Bisan kon nagpuyo kami karon nga layo sa dagat, nagkuyog kaming mibisita og mga 15 ka lainlaing mga parola, ug nahibaloan nako nganong ganahan kaayo siya niini. Nakahinuklog ko sa hulagway sa parola nga lig-ong nagbarog batok sa mga hangin ug mga balod tungod kay giangkla kini og lawom kaayo ngadto sa kinaladmang bato ug giseguro nga bisan pa sa kusgan nga mga unos, walay makapabulag niini gikan sa pundasyon diin kini lig-on nga gipabarog. Sa samang paagi, ang atong gilaoman mao nga ang atong mga estudyante makahimo sa pagsugakod sa bisan unsa nga unos nga moabot sa ilang kinabuhi. Salamat sa paghatag og espirituwal nga angkla nga ilang gikinahanglan ug sa pagtabang kanila nga makatukod sa ilang pundasyon diha ni Jesukristo.
Tungod sa inyong dili katuohan nga paningkamot sa milabay nga duha ka tuig, ang institute napun-an og 57,000 ka estudyante, ug ang enrollment sa seminary napun-an og 22,000 bisan sa kagamay sa potensiyal nga mga estudyante. Ania kita karon sa kinatas-an nga porsyento sa na-enroll nga mga estudyante sa seminary nga sukad atong nareport. Salamat sa inyong pagsanong sa pagdapit ni Presidente Nelson nga motabang sa pagpundok og usa ka henerasyon. Sama sa iyang gitudlo, bisan kanus-a nga mohimo kamo sa bisan unsa nga butang nga makatabang ni bisan kinsa sa paghimo ug pagtuman sa ilang mga pakigsaad ngadto sa Dios, nagtabang kamo sa pagpundok sa Israel.1 Dugang ngadto sa nagkadaghan nga enrollment, sa miaging tuig sobra sa 25,000 ka mga higala gikan sa laing mga pagtuo ang mitambong sa mga klase ug 9,000 kanila ang nabunyagan.
Salamat sa inyong personal nga mga pagdapit, sa pagpakigtambayayong sa mga lider sa Simbahan ug mga ginikanan, ug sa pag-awhag sa inyong mga estudyante sa pagdapit sa ilang mga higala. Ang inyong gibuhat nakahimo og talagsaong kalainan, ug dili lang sa gidaghanon sa nagpa-enroll. Ang tinuod nga kalainan mao ang inyong impluwensya. Kada adlaw, ang mga kinabuhi nausab samtang nagtambong sila sa inyong mga klase, samtang gibati nila ang inyong gugma ug hugot nga pagtuo, ug samtang gidawat nila ang inyong pagdapit sa pagtuon sa mga kasulatan ug pagpaminaw sa tingog sa Dios. Salamat sa inyong pagpakita sa inyong hugot nga pagtuo nga nakapanalangin sa nagkadaghan nga mga anak sa Dios samtang naghatag kamo og espirituwal nga angkla nga gikinahanglan kaayo nila.
Sa paningkamot nga makapadayon sa pagkaplag og daghan pa ug mas maayong mga paagi sa pagpanalangin sa atong mga estudyante, pipila ka tuig na ang milabay, among gisulayan ang usa ka bag-o nga kurso sa seminary. Sulod sa usa ka semester nagtudlo mi og first-year nga mga estudyante sa seminary sa inusab nga bersiyon sa kurso sa institute nga Mga Sukaranan sa Pagtuon sa Kasulatan. Human sa usa ka semester, ang mga estudyante niadto nga mga klase dako kaayo og bintaha sa ilang mga kadungan base sa ilang abilidad sa pagsinati og makahuloganong personal nga pagtuon sa kasulatan ug pag-apil sa mga diskusyon sa klase. Sa susamang higayon, ang programa nga gitawag og Pagmalamposon sa Pag-eskuwela nakasinati og dakong kalamposan sa pagtabang sa mga estudyante nga mahimong mas maayo sa ilang pag-eskuwela ug mahimong mas andam alang sa umaabot nga mga kahigayonan sa edukasyon. Kining duha ka kasinatian nakadani sa atensiyon ni Elder Gilbert, ug nagsugod siya sa madasigong pag-awhag kanato sa pagkonsiderar kon unsa ang gitudlo sa Ginoo kanato.
Samtang nanghitabo kini, nagsugod ang mga diskusyon sa mga sakop sa Departamento sa Misyonaryo kon unsa pa ang mahimo sa seminary aron makatabang sa pag-andam sa umaabot nga mga misyonaryo. Ang ubang mga diskusyon nanghitabo sa mga sakop sa Departamento sa Templo mahitungod sa pagtabang sa mga motambong sa templo sa unang higayon aron makabaton og makahuloganon nga kasinatian ug makasabot sa mga pakigsaad nga ilang himoon. Ang uban nakigsulti sa mga sakop sa Departamento sa Welfare ug sa Pagbarog pinaagi sa Kinaugalingong Paningkamot nga mga Serbisyo mahitungod sa pagtabang nga matubag ang nagkadako nga panginahanglan sa emosyonal nga kalig-on ug pagbarog pinaagi sa kinaugalingong paningkamot. Sa samang higayon, ang dugay nang gitinguha sa daghan nga mas makatutok sa mga pagtulun-an sa modernong mga propeta gihisgotan usab.
Sama sa mga sanga sa katubigan nga nagdagayday ngadto sa suba, daghang mga ideya ang nagkahiusa ug ang tanan maingon ta nga nagtudlo kanato ngadto sa susamang direksiyon. Samtang among gikonsiderar ang mga posibilidad, naamgohan namo nga ang seminary anaa sa talagsaon nga posisyon. Ang ubang maayo nga mga tawo, sama sa mga magtatambag sa eskwelahan o mga terapista sa pamilya, makatabang sa pagtubag sa mga hisgotanan sa mga panginahanglan ug makatabang kaayo, apan talagsaon kita sa atong abilidad sa pagtubag niana nga mga hisgotanan pinaagi sa lente sa gipahiuli nga ebanghelyo ni Jesukristo. Nakaamgo usab kami nga talagsaon kita bisan gani dinhi sa Simbahan tungod lang sa mismong gidaghanon sa oras nga atong gikauban ang kabatan-onan matag semana.
Anaa usab kita sa talagsaon nga posisyon sa atong kasaysayan. Sukad nga gipahiuyon ang atong eskedyul ngadto sa Dali, Sunod Kanako, kita karon nagtuon sa samang basahon sa kasulatan isip indibidwal nga mga miyembro, mga pamilya, ug ubang mga klase sa Simbahan. Nakapahunahuna kini namo kon makahimo ba kaha kita sa paggahin sa uban natong bililhon nga oras sa direkta nga paghisgot og piho nga mga hisgotanan sa konteksto sa atong pagtuon sa mga kasulatan. Inubanan niining mga sanga sa hunahuna nga nagdagayday ngadto sa suba sa atong panghunahuna, magpadayon kita sa paghupot sa pipila ka sukaranan nga mga ideya. Mapasaligon kita nga kanunayng nakasentro ni Kristo, nagbase sa kasulatan, ug nakatutok sa mga tigkat-on. Kanunay kitang maningkamot sa pagdapit sa Espiritu Santo ug motutok ngadto sa atong tumong sa pagpalawom sa pagkakabig ngadto kang Jesukristo ug sa Iyang gipahiuli nga ebanghelyo.
Samtang mainampoon namong gikonsiderar kon unsa ang mahimo niining tanan sa atong paningkamot sa pagpanalangin sa kabatan-onan, napahinumdoman mi nga si Elder David A. Bednar nagtudlo sa kamahinungdanon sa pagtuon sa kasulatan sa tulo ka paagi: ganid, pinasubay sa hisgotanan, ug pinasubay sa tema. Nagtudlo siya:
“Ang pagbasa og basahon sa kasulatan gikan sa sinugdanan hangtod sa kataposan mopasugod sa pagdagayday sa buhi nga tubig ngari sa atong kinabuhi pinaagi sa pagpaila kanato sa importante nga mga istorya, mga doktrina sa ebanghelyo, ug mahangtorong mga baroganan. …
“… Ang pagtuon pinasubay sa hisgotanan makapadugang sa kaladmon sa atong kahibalo.”
Midugang si Elder Bednar:
“Ang makugihong pagsiksik sa pagdiskobre og mga koneksyon, mga sundanan, ug mga tema usa ka parte sa unsay gipasabot sa ‘pagbusog’ sa mga pulong ni Kristo. Kini nga paagi mobukas sa ablihanan sa espirituhanong tinubdan, molamdag sa atong salabotan pinaagi sa Iyang Espiritu, ug momugna og lawom nga pasalamat sa balaang mga kasulatan ug gikusgon sa espirituhanong pasalig nga madawat lamang sa ingon niini nga paagi. Ang ingon niana nga pagsiksik magtugot kanato sa pagtukod diha sa lig-on nga sukaranan sa atong Manunubos ug sa pagbuntog sa hangin sa pagkadaotan niining ulahing mga adlaw”2
Kay nasayod nga kinahanglan kitang magmatinuoron sa atong dugay nang gibahandi nga kasaysayan sa ganid nga pagtudlo sa kasulatan ug magpadyon nga makabenepisyo gikan sa atong pagpahiuyon sa Dali, Sunod Kanako, ug kay nasayod usab nga ang atong kabatan-onan adunay piho nga mga hagit ug panginahanglan sa pagpangandam alang sa ilang mga kaugmaon, among gipaabot ang mosunod nga rekomendasyon ngadto sa Hunta sa Edukasyon. Ako na karong basahon ang gikan sa minutes sa board.
“[Ang Administrasyon sa Seminary and Institutes of Religion] mirekomendar nga maghimo og kurikulum sa seminary nga magtudlo sa Dali, Sunod Kanako sa ganid nga pagtuon sa kasulatan 3–4 ka adlaw matag semana, ug mga leksiyon pinasubay sa tema 1–2 ka higayon matag semana (giugmad gikan sa mga hisgotanan sama sa misyon, templo, pagpangandam sa edukasyon; mga kahanas sa pagtuon sa kasulatan; emosyonal nga kalig-on; mga kahanas sa kinabuhi; ug mga pagtulun-an sa ulahing adlaw nga mga propeta). Ang pinasubay sa tema nga mga leksiyon ibase usab sa mga kasulatan ug makatutok sa mga baroganan sa gipahiuli nga ebanghelyo ni Jesukristo.”
Ang rekomendasyon madasigon nga giaprobahan aron ipatuman sa tibuok kalibotan sugod sa Enero 2025.
Palihog timan-i nga kada semana magpdayon kita sa pagtudlo sa mga kasulatan sa ganid nga paagi. Gikinahanglan nga magpadayon kita sa pagtabang sa atong mga estudyante nga magbaton og pagsalig sa ilang abilidad sa pagtuon ug pagsabot sa mga kasulatan ug pagkahibalo ug pagsunod sa mga baroganan nga gitudlo niini. Magpadayon usab kita sa pagtabang sa kabatan-onan nga makakaplag og mga tubag sa ilang mga pangutana pinaagi sa mga baroganan sa pagkab-ot og espirituwal nga kahibalo ug pag-angkon sa mga benepisyo sa doktrinal nga kahanas. Bag-ong pinasubay sa hisgotanan nga mga leksiyon, gitawag nga “pagpangandam sa kinabuhi nga mga leksiyon,” idugang usab ngadto sa bag-ong kurikulom. Kini nga mga leksiyon mohisgot sa piho nga mga panginahanglan sa atong mga estudyante sa seminary sa mga paagi nga mopadayon sa pagsentro kang Kristo, nakabase sa kasulatan, ug nakatutok sa tigkat-on.
Kini nga mga leksiyon motugot ninyo sa paggamit sa mga kahanas, mga kasinatian, ug mga gasa nga inyong naggamit isip mga magtutudlo sa ganid nga pagtudlo sa kasulatan. Dili ni pagbalik sa sinugdanan. Wala mi maghangyo ninyo nga mahimong mga eksperto sa bisan unsa niining bag-o nga mga hisgotanan. Gani, manghinaot mi nga walay usa ninyo nga mopuli sa papel sa ginikanan o terapista, magtatambag, o espesyalista. Mohangyo lang mi ninyo nga magpabiling lig-ong nakagamot diha sa mga pagtulun-an ni Jesukristo segun sa gilatid niining bag-ong nagkauyon ug giaprobahan nga mga materyal.
Aron sa pagtabang kaninyo nga maandam sa 2025, bag-ong mga materyal nga ipadala ninyo inig ka Hulyo 2024, nga maglakip sa Dali, Sunod Kanako ug mga leksiyon sa pagpangandam sa kinabuhi. Awhagon ko kamo sa pagrebyo niini nga mga leksiyon nianang panahona ug usab moawhag kaninyo nga magsugod sa pagpakigbahin niini nga pahibalo ngadto sa mga ginikanan, lokal nga mga lider, ug opisyales sa eskwelahan sa pagtabang sa pag-awhag sa dugang kabatan-onan nga mo-enroll sa seminary. Pinaagi sa pag-usa sa pamaagi sa ganid ug pinasubay sa tema nga pagtuon sa ebanghelyo, naglaom kita nga makaabli og espirituwal nga pundohanan nga wala pa nato makita sa una.
Ang atong panghinaot mao ang pagtabang sa pag-andam og henerasyon sa kabatan-onan nga masayod kon unsaon sa pagtuon sa mga kasulatan ug madani sa mga pagtulun-an sa buhing mga propeta. Usa ka henerasyon sa kabatan-onan nga adunay emosyonal nga kalig-on kinsa adunay mga kahanas ug kapasidad nga molampos sa pag-eskwela, mahimong matarong nga mga amahan ug mga inahan, ug kinsa mangulo sa Simbahan ug sa ilang mga komunidad. Ang atong panghinaot mao ang pagtabang sa pag-andam og henerasyon sa kabatan-onan nga makasabot sa mga pakigsaad sa templo, kinsa adunay lawom nga pasalig sa pagsunod niini, ug henerasyon sa mga misyonaryo kinsa mga takos, kwalipikado, ug adunay espirtuhanong kadasig, ug andam nga morepresentar sa Manluluwas sa pagdapit sa kalibotan aron moduol Kaniya.
Ang atong panghinaot mao ang pag-andam og henerasyon sa mga disipulo ni Jesukristo kinsa lawom nga nakabig ngadto sa Iyang gipahiuli nga ebanghelyo sa tibuok nilang kinabuhi. Salamat usab sa pagpundok og henerasyon ug sa talagsaon ninyo nga impluwensiya diha kanila. Nasayod kami nga daghan ang gipangayo gikan kaninyo. Salamat sa tanan ninyong gihimo nga makapahingangha kaayo. Samtang padayon kamong magpakita sa inyong hugot nga pagtuo, nagtuo ko nga makakita kamo og mga milagro, nga ang Ginoo andam sa paglig-on ug pagprotekta sa atong mga estudyante ug mobarog batok sa mga unos niining ulahi nga mga adlaw. Ang Ginoo mopadayon sa pagtabang kaninyo. Mao kana ang Iyang gibuhat. Mao kana ang Iyang kinaiya. Mopamatuod ako Kaniya sa sagrado nga ngalan ni Jesukristo, amen.