Salig sa Dios
S&I nga Tinuig nga Sibya Enero 2024
Biyernes, Enero 26, 2024
Usa kini ka panalangin nga mamulong kaninyo—kaninyo kinsa daghan kaayo ang nahimo aron giyahan ang bag-ong mga henerasyon ngadto kang Kristo. Ang inyong gibuhat mao ang buhat sa pagtudlo ug pagkabig. Ang inyong kauban mao ang Balaang Espiritu. Ang inyong ganti dili mahulagway. Sa mga pulong sa Manluluwas, “Unsa ka dako ang imong hingpit nga kalipay … diha sa gingharian sa akong Amahan!”1
Nagpasalamat ko sa unsay atong nadungog gikan sa komisyoner sa edukasyon, ni Elder Clark G. Gilbert, ug sa tigdumala sa mga Seminary ug mga Institute, nga si Brother Chad H. Webb. Nakadayeg ug nalingaw ko nga magserbisyo uban nila. Akong iawhag ang maalamon nga direksiyon ug tambag nga atong nadawat gikan sa matag usa. Sila nahibalo sa unsay ilang gipamulong. Naghinamhinam ko sa kalamboan sa seminary ug sa institute nga gireport ni Brother Webb. Mga pahalipay ug salamat sa tanan nga adunay tahas niana.
Nanghinaot ko nga mahinumdoman ninyo ang mga gisulti ni Elder Gilbert mahitungod sa pagtuon ug paghatag og pagtagad sa propetikanhong pamahayag ni Presidente Russell M. Nelson, uban sa lain pang apostoles ug mga propeta. Ang mga ehemplo nga iyang gikutlo mahitungod kon sa unsang paagi kini gihimo, ug epektibong gihimo, makatabang gayod kaayo. Mahimo ninyong kopyahon ang pipila niini ug mangita og inspirasyon alang sa uban nga magamitan niini sumala sa inyong mga kahimtang. Importante kini nga inisyatibo sa edukasyon sa Simbahan ug mohatag og mahinungdanon nga resulta.
Naghinamhinam kaayo ko—naintriga, gani—sa unsay gipahibalo ni Brother Webb kalabot sa may tema nga mga leksiyon diha sa seminary. Iyang gipasabot og maayo nga padayon kita nga mogamit sa ganid nga pamaagi sa mga kasulatan isip pundasyon sa kurikulom sa seminary apan dugangan nato og nagkadaiya nga mga leksiyon sa kadaghanan sa mga semana nga maghatag og pagtagad sa mga tema sama sa mga misyon, templo, pagpangandam sa edukasyon, mga kahanas sa pagtuon sa kasulatan, emosyonal nga kalig-on, mga kahanas sa kinabuhi, mga pagtulun-an sa mga propeta sa ulahing mga adlaw, uban pa. Alang nako, morag sama kini sa pagdugang og ubang prutas ug usa ka preskong pudyot sa timpla ngadto sa pie. Molami kaayo kini. Uban ninyo, matinguhaon ko nga makakat-on niini nga pamaagi, ug malipay ko nga makahatag og dugang pa niadtong naghimo og mga paningkamot ug mga sakripisyo aron motambong sa seminary. Gani, tagamtama ang pie!
Gusto ko nga mamulong sa usa ka problema nga daw mihampak kanato nga wala pa gayod mahitabo kaniadto sa atong bag-ong mga henerasyon. Nagpasabot ko sa tinuod gayod nga mga pagbati og tumang kabalaka ug depresyon ug ang pait nga resulta nga mahatag niini nga mga pagbati—lakip na, sa kinagrabehan, pag-abuso sa druga, pagpasakit sa kaugalingon, ug gani paghikog. Pipila sa mga istatistika:
Sa tibuok kalibotan, tali sa 2004 ug 2021, ang mga report bahin sa grabe nga depresyon taliwala sa mga ten-edyer misaka gikan sa 16.1% ngadto sa 29.2% alang sa mga babaye ug gikan sa 5% ngadto sa 11.5% alang sa mga lalaki.2 Sa mga batan-on nga nag-edad og 12 ngadto sa 17 anyos, 21% ang nakasinati og grabeng depresyon labing minos kausa sa ilang kinabuhi ug 15% sa miaging tuig.3 Kini nga gidaghanon wala pay labot sa dili kaayo grabe apan dakong hagit sa depresyon hinungdan sa sitwasyon ug kabalaka nga nakaapekto sa daghan pang kabatan-onan.4 Sumala sa WebMD, dul-an sa 60% niadtong nakasinati og tumang kabalaka nakasinati usab og depresyon, ug vice versa.5
Ang taas nga panahon nga pagtuon sa Simbahan bahin sa kabatan-onan nga miyembro nagpakita nga ang tibuok kalibotan niadtong 2018, 29% nakasinati og grabe nga kabalaka. Siyempre, managlahi kini sa matag nasod ug wala maghulagway sa tanang kabatan-onan sa matag nasod, apan ang gidaghanon sa grabe nga kabalaka, pananglitan, sa Estados Unidos, 28%; sa Chile, 32%; sa France ug sa Belgium, 16%; sa South Africa, 46%; sa Taiwan, 18%; sa New Zealand, 32%.6
Siyempre, daghang butang ang hinungdan o may kalabotan sa pagrabe sa depresyon ug kabalaka. Sa ubang mga kaso, tingali may kalabotan sa kaliwatan. Adunay daghan usab nga mga butang sa palibot nga maoy hinungdan, sama sa kalisdanan (lakip na ang truma ug pagsalikway) grabeng kahago, pamaagi sa pagpadako sa ginikanan sa mga anak, sekswal nga kasinatian, impluwensya sa grupo sa kaedad ug sa palibot, mga problema sa eskwelahan, ug batasan, uban pa.
Usa sa bag-ong butang nga may kalabotan nga mograbe ang kabalaka ug depresyon mao ang paggamit sa social media. Nakakuha kini sa pagtagad ug mga pagpasidaan gikan sa opisina sa US Surgeon General. Sa Estados Unidos, gibanabana nga 95% sa mga ten-edyer adunay mga link sa social media, nga adunay dul-an sa duha sa tulo ka bahin [two-thirds] ang naggamit sa social media matag adlaw. Nahibaloan sa mga pagtuon nga kini nga mga ten-edyer migahin sa kasagaran og 3.5 ka oras matag adlaw sa social media ug gireport nga negatibo ang epekto niini sa ilang mga panglantaw sa kaugalingon. Adunay piho nga mga sundanan sa pag-apil sa online nga nagtagna sa negatibo nga mga resulta: cyberbullying, sexting, ug doomscrolling, pananglitan. (“Ang doomscrolling,” diay—alang ninyo kinsa, sama nako, wala pa makadungog niini—nagpasabot sa paggahin og taas nga oras sa selpon o kompyuter nga nagtutok sa negatibo nga mga balita. Mao nga, alang sa uban, kana nga kinaiya mapugsanon ug morag panghupay sa magul-anong paagi.) Ang taphaw nga paggamit sa social media—nagpasabot nga, paggahin og oras sa pagtan-aw sa mga sulod sa social media nga walay tumong—makapadugang sa mga pagbati og kaubos ug negatibo nga pagkomparar, samtang ang tinuoray o may katuyoan nga paggamit sa social media (sama sa pag-post, pagkomentaryo, ug pagkonektar) walay ingon niana nga negatibong mga resulta.
Ang pagsiksik nagpakita usab nga adunay piho nga makapanalipod nga mga butang nga makatabang sa pagpugong sa kabalaka ug depresyon. Naglakip kini sa pisikal nga kalihokan, paghigugma, pagpadayon, ug pagkontrolar sa kaugalingon.
Ako mismo nagtuo nga ang kadaghanan nga makapawala sa kadasig ug kabalaka nagagikan sa pakyas nga pagsabot o paghinumdom sa plano sa Dios ug sa pagsalig sa Iyang gahom sa higayon nga motumaw ang mga problema. Kon walay kombiksiyon sa katinuod sa Dios, sa Iyang gugma, ug sa Iyang plano sa kalipay alang sa Iyang mga anak, ang linghod nga mga hunahuna motan-aw sa ilang umaabot isip mangitngit ug talandogon. Wala kita mangita og mga magtutudlo sa seminary ug institute aron mahimong mga magtatambag o mga espesyalista sa kahimsog sa pangisip. Kondili, naghatag kita og pang-alkontra nga mga butang diha sa katilingban nga makatampo sa nagkagrabe nga tumang kabalaka ug depresyon. Kita ang mga tighatag og paglaom. Kita mao ang tingog sa paglaom, ang paglaom nga nakagamot diha sa hugot nga pagtuo ug pagsalig sa Dios.
Ang pagsabot sa plano sa atong Langitnong Amahan bahin sa katubsanan—labi na ang mahinungdanong elemento niana nga plano, ang Pag-ula ni Jesukristo—naghatag gayod og kaseguroan. Kini makaugmad ug makapreserbar sa espirituwal ug sa emosyonal nga kalig-on—nahibalo sa mga pangutana sa atong pagpakabuhi ug sa atong katuyoan sa mortal nga kinabuhi. Kita nagtudlo, pinaagi sa lagda ug ehemplo, kon kang kinsa sila motan-aw alang sa kalingkawasan ug suporta. Tugoti nga ang mga pulong sa Manluluwas magpabilin sa ilang kasingkasing: “Gisulti ko kini kaninyo aron nga dinhi kanako makabaton kamog kalinaw. Paantoson kamo sa kalibotan apan ayaw kahadlok; kay nabuntog ko na ang kalibotan.”7 Ang atong pakigsaad nagbugkos kanato ngadto Kaniya, ug uban Kaniya kita usab makabuntog sa kalibotan.
Makatabang kita sa mga estudyante ug sa uban sa pag-establisar sa ilang personal nga pundasyon diha sa “lig-on nga sukaranan sa Manluluwas, nga mao si Kristo, ang Anak sa Dios,” aron “sa panahon nga ang yawa mopadala sa iyang mapintas nga mga hangin, oo, ang iyang mga pana diha sa alimpulos, oo, sa diha nga ang tanan niya nga ulan nga yelo ug ang iyang mapintas nga unos mohampak diha [kanila], kini walay gahom ibabaw [kanila] sa pagbitad [kanila] ngadto sa bung-aw sa pagkauyamot ug walay kataposan nga pagkaalaot.”8 Si Presidente Russell M. Nelson mipahayag niini nga paagi: “Ang Ginoo namahayag nga bisan sa dili ordinaryo nga mga hagit karon, kadtong kinsa motukod sa ilang mga pundasyon diha kang Jesukristo, ug nakat-on unsaon sa paggamit sa Iyang gahom, dili kinahanglan nga magpadala sa talagsaon nga mga kabalaka niining panahona.”9
Kita adunay dili ikatandi nga oportunidad sa kurso nga tun-an karong tuiga, ang Basahon ni Mormon. Walay laing kasulatan nga klaro kaayo nga nagpasabot sa plano sa katubsanan. Walay laing basahon nga nagtudlo sa mas madanihong paagi sa katinuod ug sa kahulogan sa Pag-ula ni Jesukristo. Walay laing bahin sa koleksiyon sa mga kasulatan nga adunay makapakabig nga gahom sa Basahon Mormon sa pagsaksi niini nga si Jesus mao ang Kristo ug nga Siya nakabuntog sa kamatayon, sa pisikal ug sa espirituwal. Ang Basahon ni Mormon usa ka yano nga pagpasabot sa kamatuoran sa ebanghelyo ug sa hingpit nga kalipay nga makaplagan diha sa pagsunod sa mga sugo sa ebanghelyo. Ang mensahe niini puno sa mga ehemplo sa pagbuntog. Ang Basahon ni Mormon mao ang pulong sa Dios, ug “ang hiyas sa pulong sa Dios”10 mao nga kini makaugmad og hugot nga pagtuo diha sa Manluluwas—hugot nga pagtuo nga mowagtang sa pagduhaduha, depresyon, ug kabalaka nga mahimong mobuntog nato ug mapulihan kini og kalig-on ug kaseguroan.
Ikonsiderar ang pipila ka ehemplo:
Adunay pamilyar nga saad nga gipahayag ni Hari Benjamin: “Ug dugang pa niini, ako nagtinguha nga kamo kinahanglan maghunahuna sa bulahan ug malipayon nga kahimtang niadto nga naghupot sa mga sugo sa Dios. Kay tan-awa, sila bulahan sa tanan nga mga butang, sa temporal ug sa espirituhanon; ug kon sila magpabilin nga matinud-anon hangtod sa kataposan sila pagadawaton ngadto sa langit, nga pinaagi niana sila mahimo nga mopuyo uban sa Dios diha sa usa ka kahimtang nga walay kataposan ang kalipay. O hinumdomi, hinumdomi nga kini nga mga butang tinuod; kay ang Ginoong Dios namulong niini.”11
Hinumdomi ang mapasaligon nga pamahayag ni Nephi samtang nag-atubang siya og pagpanggukod ug depresyon sa panahon sa kamatayon sa iyang amahan:
“Bisan pa niana, bisan pa sa kamahinungdanon nga kaayo sa Ginoo, sa pagpakita kanako sa walay kataposan ug dili matugkad nga mga buhat, ang akong kasingkasing nakasinggit: O pagkaalaot ko nga tawo! Oo, ang akong kasingkasing nagmasulub-on … tungod sa akong kadaotan.
“Ako gilibotan, tungod sa mga pagtintal ug ang mga sala sayon nga mohasol kanako.
“Ug kon ako magtinguha sa pagmaya, ang akong kasingkasing mag-agulo tungod sa akong mga sala; bisan pa niana, ako nasayod kang kinsa ako mosalig. …
“O unya, kon ako nakakita sa mahinungdanon nga mga butang, kon ang Ginoo sa iyang pagpakig-angay ngadto sa mga katawhan, nakigsulti sa mga tawo sa dakong kalooy, ngano nga ang akong kasingkasing nagbangotan ug ang akong kalag nagpabilin diha sa walog sa kasubo, ug ang akong lawas nawad-an og kusog, ug ang akong kusog nagkawala, tungod sa akong mga kasakit? …
“O Ginoo, ako misalig kanimo, ug ako mosalig kanimo sa kahangtoran.”12
Si Alma mipasabot sa hingpit nga kalipay nga matawo pag-usab ug dayon sa pagsalig sa Dios:
“Ug karon, sulod sa tulo ka mga adlaw ug tulo ka mga gabii ako gisakit, gani uban sa mga kasakit sa usa ka gipanghimaraot nga kalag.
“Ug nahinabo nga samtang ako sa ingon gisakit uban sa kahasol, samtang ako gisamok sa panumdoman sa akong daghan nga mga sala, tan-awa, ako nahinumdom usab nga nakabati sa akong amahan nga nanagna ngadto sa mga katawhan mahitungod sa pag-anhi sa usa ka Jesukristo, usa ka anak sa Dios, aron sa pag-ula sa iyang dugo alang sa mga sala sa kalibotan.
“Karon, samtang ang akong hunahuna naghinuktok niini nga panumdoman, ako nangamuyo sulod sa akong kasingkasing: O Jesus, ikaw nga Anak sa Dios, maluoy ka kanako, kinsa ania sa apdo sa kapaitan, ug ako giliyokan sa walay kataposan nga mga kadena sa kamatayon.
“Ug karon, tan-awa, sa diha nga ako naghunahuna niini, ako wala na mahinumdom sa akong mga kasakit; oo, ako wala na samoka sa panumdoman sa akong mga sala.
“Ug, unsa nga hingpit nga kalipay, ug unsa ka kahibulongan nga kahayag ang akong nakita; oo, ang akong kalag napuno sa hingpit nga kalipay labaw sa akong kasakit! …
“Oo, ug sukad niana nga panahon gani hangtod karon, ako naghago sa walay paghunong, nga ako makakabig og mga kalag ngadto sa paghinulsol; nga ako makadala kanila sa pagtilaw sa hilabihan nga kalipay diin ako mitilaw; nga sila unta usab matawo sa Dios, ug mapuno sa Espiritu Santo. …
“Ug ako gibuligan ubos sa mga pagsulay ug mga kasamok sa matag matang, oo ug diha sa tanan nga matang sa mga kasakit; oo, ang Dios miluwas kanako gikan sa bilanggoan, ug gikan sa mga gapos, ug gikan sa kamatayon; oo, ug ako mibutang sa akong pagsalig diha kaniya, ug siya sa gihapon moluwas kanako.”13
Kinsa pa ang adunay mas labaw nga rason sa kabalaka ug grabe nga depresyon kaysa kang Mormon, kinsa mituaw, “ang nagpadayon nga talan-awon sa mga pagkadaotan ug sa mga pagkasalawayon anaa kanunay sa akong panan-aw sukad nga [sila] makahimo sa pagtan-aw sa mga pamaagi sa tawo.”14 Apan, bisan pa man sa tibuok kinabuhi nga gubat ug truma, siya nakasulti pa ni Moroni, “Akong anak, pagmatinud-anon diha kang Kristo; ug hinaot pa unta nga kini nga mga butang diin ako misulat dili makaguol kanimo, aron dili makaingon sa imong kamatayon; apan hinaot unta nga si Kristo mobayaw kanimo, ug unta ang iyang mga pag-antos ug kamatayon, ug ang pagpakita sa iyang lawas ngadto sa atong mga amahan”—Iyang Pagkabanhaw—“ug sa iyang kalooy ug pagkamainantoson, ug ang paglaom sa iyang himaya ug kinabuhi nga dayon, moabot sa imong salabotan sa kahangtoran.”15
Gihulagway ni Alma ang kaugalingong ehemplo sa Manluluwas sa pagdumala sa dili matukib nga pag-antos ug kon unsaon nga kita, imbes mawad-an og paglaom, modangop ngadto Kaniya alang sa kahupayan ug kaayohan.
“Ug siya magpadayon, mag-antos sa mga sakit ug mga kasakit ug mga pagtintal sa matag matang; ug kini aron ang pulong matuman nga nag-ingon nga siya modala diha kaniya sa mga sakit ug mga balatian sa iyang mga katawhan.
“Ug siya modala diha kaniya sa kamatayon, nga siya mahimo nga mohubad sa mga higot sa kamatayon diin naghigot sa iyang mga katawhan; ug siya modala diha kaniya sa ilang mga kahuyang, nga ang iyang kasingkasing mahimo nga mapuno uban sa kalooy, sumala sa unod, nga siya mahimo nga masayod sumala sa unod unsaon pagtabang ang iyang mga katawhan sumala sa ilang mga kahuyang.
“… Ang Anak sa Dios mag-antos sumala sa unod nga siya unta modala diha kaniya sa mga sala sa iyang mga katawhan, nga siya unta mopapas sa ilang mga kalapasan sumala sa gahom sa iyang pagluwas; ug karon tan-awa, kini mao ang pagpamatuod nga ania kanako.
“Karon ako moingon nganha kaninyo nga kamo kinahanglan gayod nga maghinulsol, ug magpakatawo pag-usab; kay ang Espiritu miingon nga kon kamo dili magpakatawo pag-usab kamo dili makapanunod sa gingharian sa langit; busa duol ug pagpabunyag ngadto sa paghinulsol, nga kamo mahugasan gikan sa inyong mga sala, nga kamo mahimo nga makabaton og hugot nga pagtuo sa Kordero sa Dios, kinsa mokuha sa mga sala sa kalibotan, kinsa gamhanan sa pagluwas ug sa paglimpyo gikan sa tanan nga dili matarong.”16
Diha sa Basahon ni Mormon, atong makat-onan ang tinuod nga kahulogan ug proseso sa pagpakatawo pag-usab ug “[pagkahimong] usa ka santos pinaagi sa pag-ula ni Kristo ang Ginoo.”17 Kon atong magiyahan ang atong kabatan-ona ug ang mga young adult ngadto sa espirituhanong pagpakatawo pag-usab, ang depresyon mahanaw ug ang bisan unsa nga kabalaka sa ilang kinabuhi (nga moabot atol sa paghatag og pakigpulong nga isibya sa tibuok kalibotan), madumala ra. Bisan ang kamatayon mismo dili makahulga sa ilang kalinaw sa higayon nga sila matawo sa Espiritu ug makakat-on sa pagsalig sa Dios.
Si Elder Neal A. Maxwell kausa namulong bahin sa “tawhanong kalisdanan,” sa kamatuoran nga ang tanan matapos diha sa kamatayon. Ang atong mga kalamposan, atong mga naangkon, atong mga pakig-uban ang tanan adunay kataposan, ug kon wala nay mas labaw pa, nan sama sa gisulti sa “Tigsangyaw” diha sa Ecclesiastes, “ang tanan walay kapuslanan.”18 Ang kamatayon usa ka kamatuoran, ug kita mapugos sa pag-ila nga kon walay usa ka gahom nga mobuntog sa kamatayon, ang atong kinabuhi adunay gamayng katuyoan aron molahutay. Maayo na lang, kita nasayod nga ang kamatayon nabuntog, ang kinabuhi adunay katuyoan ug kahulogan, ug ang tanan dili kawang. Pinaagi sa Iyang Pag-ula, si Jesukristo mibuntog sa tawhanong kalisdanan sa kamatayon, ug karon, sama sa naobserbahan ni Elder Maxwell, “adunay personal na lamang nga mga kalisdanan [atong indibidwal nga mga sala, mga sayop, ug mga kahuyang], ug gikan usab niini mahimo kitang maluwas pinaagi sa pagsunod sa mga pagtulun-an niya nga miluwas kanato gikan sa dakong kalaglagan.”19
Niining tanan, kita nagpasiugda og mas halapad nga panglantaw nga makuha sa bag-ohay nga kapulongan ni Presidente Nelson, “Paghunahuna og celestial!” Kita kinahanglan nga motabang sa atong bag-ong henerasyon nga isalikway ang kinaiya nga “Kaon, inom, ug paglipay, kay ugma kita mamatay” nga nag-anam ka daghan nga makita diha sa daghang kultura. Kini makahatag og kapildihan nga pamaagi sa kinabuhi mobaliwala sa mahinungdanong plano sa katubsanan ug kalipay ug nagtutok lamang sa hinanali nga mga kalipay. Mosangpot kini ngadto sa dili makapalahutay nga mga sundanan ug mga paagi sa pagpakabuhi. Usa kini ka direkta nga dalan paingon sa makaluya nga kabalaka ug grabe nga depresyon. Si Presidente Nelson mitubag niini nga isyu sa iyang pakigpulong sa kinatibuk-ang komperensiya sa miaging Oktubre. Mitambag siya:
“Ang pagka-mortal mao ang usa ka master nga klase sa pagkat-on sa pagpili sa mga butang nga adunay dakong bili. Daghan kaayong tawo nagpakabuhi ingon og kining kinabuhia mao ang tanan. Apan, ang inyong mga pagpili karon motino og tulo ka butang: asa kamo magpuyo hangtod sa kahangtoran, ang matang sa lawas nga kamo mabanhaw, ug kadtong inyong ikauban sa pagpuyo sa kahangtoran. Mao nga, paghunahuna og celestial.”20
Sa usa ka libro nga bag-ohay lang niya nga gimatala nga giulohan og Heart of the Matter, si Presidente Nelson mipasabot niini nga panghunahuna, nga nagkutlo og makuyaw nga personal nga kasinatian. Miingon Siya:
“Daghang higayon sa akong kinabuhi, nga nakig-atubang ko sa kamatayon. Ang usa niadto nahitabo didto sa Maputo, Mozambique, sa hinapos sa Mayo 2009. Samtang nangaon sa mission home didto uban ni Elder William W. Parmley, ang Presidente sa Area sa Africa Southeast, ug iyang asawa, si Shanna, ug uban sa presidente sa Mozambique Maputo Mission, nga si Blair J. Packard, ug iyang asawa nga si Cindy, tulo ka tawo nga armado og awtomatik nga mga armas ang misulod sa lawak.
“Sa kagubot nga misunod, ang usa ka tulisan mition og pusil sa akong ulo, mipahibalo nga patyon ko nila ug dagiton ang akong asawa, ug dayon mipusil. Ang pusil miklik lang apan wala mobuto. Ang wala pagbuto nakapasuko sa tulisan, kinsa mipatid sa akong nawong ug nahagba ko sa salog. Segurado ko nga mao na kadto ang akong kataposan. Nahinumdom ko nga naghunahuna, ‘Mobiya na ko niini nga kinabuhi ug moadto sa pikas kinabuhi. Nindot kaayo kini nga kasinatian.’
“Sa samang higayon, ang laing tulisan mition og pusil sa likod ni Wendy ug miuyog sa iyang lingkoranan sa pagsulay og bira niya, nga nag-ingon, ‘Kuyog ka namo! Kuyog ka namo!’
“Pinaagi sa nagsunod-sunod nga milagroso nga mga panghitabo—ug salamat kaayo sa bayanihon nga mga gibuhat ni Sister Cindy Packard—ang among kinabuhi naluwas. Hinuon, samtang anaa ko sa pipila ka makuyaw nga mga kahimtang kaniadto, akong naamgohan kon unsa ka talandogon ang kinabuhi ug pipila lang ka butang niini nga kalibotan ang adunay mahangtoron nga bili. Samtang kadto nga mga tulisan mihulga sa among kinabuhi, wala ko maghunahuna mahitungod sa mga ganti o mga degree sa edukasyon o mga pagdayeg. Naghunahuna ko mahitungod sa akong pamilya ug sa mga pakigsaad nga akong gihimo ngadto sa Ginoo.
“Nahadlok ko nga daghan kaayo nato ang nagpuyo sa atong kinabuhi nga ingon og kini nga kinabuhi mao lamang ang tanan, nga ang kinabuhi dili magpadayon human sa kamatayon, ug unsay atong gibuhat dinhi wala nay kalabotan sa umaabot. Dili gayod kana tinuod.
“Kinahanglan nga kita dili mabalda ug mabira tipas sa dalan sa pakigsaad pinaagi sa ‘madanihon nga mga butang sa kalibotan,’ buot ipasabot sa mga pagdayeg ug mga pagtagad sa katawhan. Kana nga mga kalihokan dili importante didto sa sunod nga kalibotan. Unsay mahinungdanon gayod mao kon kita naghimo ba og pakigsaad ngadto sa Dios ug nagtuman niini.”21
Ang akong pag-ampo mao nga kita makatabang sa tanan kang kinsa kita adunay impluwensya nga mohimo og pakigsaad ngadto sa Dios ug motuman niini. Motabang nila nga makaugmad og hugot nga pagtuo ug pagsalig sa Dios ug makakaplag og paglaom. Motabang nila nga maghinulsol ug magpabilin diha sa makatubos nga grasya sa Manluluwas ug makakaplag og kalinaw. Motabang nila nga magpakatawo pag-usab isip “mga anak ni Kristo, iyang mga anak nga lalaki, ug iyang mga anak nga babaye”22 ug makakaplag og kalipay. Ug hinaot nga inyong madawat ang makapahimuot nga pulong sa Dios, “Maayo! Buotan ka ug matinumanon nga sulugoon.”23
Ako mohatag ninyo sa akong lig-on ug segurado nga pagsaksi bahin sa Pagkabanhaw ni Jesukristo. Ang katinuod sa Iyang Pagkabanhaw nagmatuod sa kamatuoran sa unsay atong gitudlo sa ebanghelyo ni Jesukristo ug nagkompirmar nga Siya aduna sa tanang gahom didto sa langit ug sa yuta—nga Siya makatuman ug motuman sa Iyang mga saad. Siya buhi! Kamo mao ang Iyang tinugyanan nga mga magbalantay sa karnero, ug ako mopanalangin kaninyo uban sa Iyang gugma ug uban sa mas dako nga kapasidad sa pagtudlo ug pag-atiman sa Iyang mga karnero. Sa ngalan ni Jesukristo, amen.