“Ayaw Kahadlok … Kanako Hingpit ang Imong Kalipay” (D&P 101:36)
Usa ka Gabii uban ni Elder Quentin L. Cook
Tibuok Kalibutan nga Debosyonal alang sa mga Single Adult • Septyembre 11, 2016 • Washington D.C. Stake Center
Mapasalamaton ko nga makauban kamo mga young adult nga nagtan-aw niining debosyonal gikan sa mga dapit sa tibuok kalibutan. Sama sa giingon, kini nga debosyonal nagagikan sa chapel nga tupad gayud sa Washington D.C. Temple. Gituyo nako pagpili kini nga dapit tungod kay tupad kini sa templo. Mapasalamaton kaayo ko nga nagpuyo kita sa panahon nga ang mga templo nagkatap sa tibuok kalibutan. Nagkinahanglan kita sa mga panalangin sa templo ning malisud kaayo nga panahon.
Ang kalibutan literal nga daw nagkaguliyang.1 Adunay panagbingkil nga wala pa mahitabo sukad. Ang kalinaw sa hunahuna ug mga pagbati sa seguridad ingon og lisud ug gani imposibleng makab-ot. Ang akong mensahe ninyo karong gabhiuna mao nga dili kita angayng mahadlok bisan sa usa ka makuyaw ug gubot nga kalibutan. Ang mga kasulatan nagsiguro kanato nga makaangkon kita og hingpit nga kalipay tungod sa Manluluwas.2
Adunay talagsaong mga panghitabo nga nakulit sa daghan kaninyo diha sa inyong mga kasingkasing ug hunahuna sa positibo kaayo nga paagi. Inyong mahinumduman ang matag detalye sa panghitabo. Ang mga ehemplo maglakip sa pag-abli sa sobre nga gisudlan sa mission call, pagka-sealed ngadto sa kapikas diha sa templo, ang pagkaamgo nga ang Espiritu Santo misaksi sa inyong kalag sa katinuod sa Basahon ni Mormon. Kini ang mga matang sa gihambin nga mga panghitabo nga naghatag og kalipay nga dili lamang makatagbaw apan usab malungtaron. Makapaikag nga ang indibidwal nga mga panghitabo nga dunay kalabutan sa Manluluwas maoy kasagaran nga magdala og labing dako nga kalipay.
Apan dunay pipila ka panghitabo nga makapakurat kaayo, o makapahadlok, nga makaapekto kini kanato sa lawom nga paagi.
Ang pagkapukan sa Paril sa Berlin, ang pagpatay sa Presidente sa Estados Unidos nga si John F. Kennedy, ug ang terorista nga pagpang-atake niadton 9/11 maoy mga ehemplo sa makapakurat nga mga panghitabo diin ang mga tawo makahinumdom gayud kon asa sila ug unsay ilang gibati sa dihang ilang nadunggan ang balita.
Kadaghanan ninyo medyo mga bata pa sa dihang ang pag-ataki sa World Trade Center sa New York City ug sa Pentagon, dinhi sa Washington D.C. nga dapit, nahitabo karon gayud adlawa, Septyembre 11, 2001, 15 ka tuig ang milabay. Nagtuo ko nga kadaghanan ninyo (bisan asa kamo nagpuyo sa kalibutan) makahinumdom kon asa kamo ug ang mga pagbati sa kahikurat ug kadismaya nga nasinati ninyo ug niadtong naglibut kaninyo. Usa kadto ka panghitabo nga miguba sa pagbati sa kalinaw ug mipasamot sa mga pagbati sa kahuyang alang sa kadaghanan. Sama sa akong gihulagway kaniadto, makahuluganon kini alang kanako ug sa akong asawa, si Mary.
Ang among kinamagwangang anak ug ang iyang asawa hapit na manganak sa ilang unang anak ug nagpuyo tulo ka eskina gikan sa World Trade Center sa New York City sa dihang ang unang eroplano, nga gi-hijack sa mga terorista, mibangga sa North Tower. Misaka sila sa atop sa ilang apartment ug nalisang samtang nagtan-aw sila sa resulta sa ilang gituohan nga usa ka terible nga aksidente. Samtang ilang nasaksihan ang ikaduhang gi-hijack nga eroplano nga midasmag sa South Tower, ilang naamguhan nga dili kini aksidente ug nagtuo nga ang lower Manhattan padayon nga gi-ataki. Sa dihang nahugno ang South Tower, ang ilang apartment nalukop sa mga tipaka nga miulan sa tibuok lower Manhattan.
Naglibug ug nahadlok sa ilang nasaksihan, ug nabalaka sa lain pang mga pag-ataki, miadto sila sa mas luwas nga lugar ug dayon didto sa building sa simbahan sa Manhattan Stake sa Lincoln Center. Sa ilang pag-abut, ilang nakita nga daghang mga miyembro sa lower Manhattan nga nakahukom usab nga moadto sa stake center. Nahupay kami sa dihang mitawag sila aron pagpahibalo kanamo kon asa sila ug nga sila luwas. Wala kami matingala sa ilang nahimutangan tungod kay ang modernong pagpadayag nagtudlo nga ang mga stake sa Zion “usa ka panalipod ug … dangpanan gikan sa unos ug gikan sa kaligutgut sa diha nga kini ibu-bu nga walay pagkuto diha sa tibuok yuta.”3 Wala sila tuguti nga mobalik sa ilang apartment sulod sa usa ka semana ug nasagmuyo sa kamatayon sa inosente nga mga kinabuhi, apan wala sila personal nga nahiagum sa permanenteng pisikal nga kadaot.
Ang eroplano nga midasmag sa Pentagon diin duol kita karong gabhiuna, sa Washington D.C., usa usab ka terorista nga suicide mission nga dunay susama nga makagun-ob nga mga resulta.
Ang akong tuyo karong gabhiuna dili ang pagpahunahuna ninyo sa makalilisang nga mga panghitabo kaniadto. Gusto nako nga inyong hatagan og gibug-aton ang malipayon nga matang sa mga panghitabo nga akong gihulagway sa sinugdanan. Apan gusto usab nakong motabang kaninyo sa pagpamalandong sa mga pagsulay, kalisdanan, ug kakuyaw nga inyong giatubang o nahadlok nga inyong atubangaon sa inyong indibidwal nga mga kinabuhi. Ang uban tingali mga panghitabo nga makaapekto sa daghang mga tawo, ang uban personal kaninyo. Nakahukom ko nga mamulong sa tulo ka matang sa mga panghitabo: kadtong naglakip sa pisikal nga mga kakuyaw; kadtong naglakip sa espesyal nga mga hagit, ang uban talagsaon sa inyong panahon; ug, sa katapusan, kadtong naglakip sa espirituhanong mga kakuyaw ug mga hagit.
Pisikal nga mga Kakuyaw o mga Hagit
Ang pisikal nga mga kakuyaw mao ang labing sayon nga makita ug ma-ilhan. Bisan unsaon o asa kamo mokuha sa inyong inadlaw nga mga balita, ang pisikal nga mga kakuyaw, kagubot, ug trahedya maoy unang i-report—ilabi na sa telebisyon ug Internet. Usa ka rason niini mao nga ang kagubot ug kamatayon makapatandog ug kasagaran sayon nga ihulagway sa biswal nga paagi ingon man sa pagsulat. Ang kagubot ug kamatayon, duol o layo man, makakuha sa atong pagtagad ug makaguba sa atong kalinaw ug kahilom. Kon dili kita mobati nga luwas sa pisikal nga paagi, mobati kita nga huyang sa personal nga paagi.
Niadtong Marso 22, usa ka terorista mipabuto og pang-suicide nga bomba didto sa airport sa Brussels, Belgium. Upat sa atong mga misyonaryo anaa didto sa Delta checkout counter. Silang tanan nahiagum og grabeng kadaot; ang uban seryuso kaayo. Ang mga samad ni Elder Richard Norby, usa ka senior missionary, grabe ka seryuso. Bag-ohay lang nga mipasabut siya nga samtang ang kinabuhi dili na gayud mahimong sama kaniadto, “iyang gipili nga mosalig sa Ginoo ug dili mahadlok.” Dugang siyang miingon, “Magpakabuhi ko, ug akong tudloan ang akong mga anak ug mga apo nga kami [kinahanglang] mosalig sa Dios.”4
Ang Ginoo mipasabut nga bisan kadtong nawagtangan sa ilang kinabuhi, nga nagmatinud-anon sa ilang mga pakigsaad, “makakaplag niini pag-usab, gani sa kinabuhi nga dayon.”5
Natandog ko sa komentaryo ni Sister Fanny Clain, usa sa mga misyonaryo nga nahiagum og kadaut tungod sa pagbomba sa Brussels airport. Siya miingon, “Ang pagsinati niini nga mga matang sa mga butang nakapahimo nako nga mas makasabut sa mga tawo, tungod kay ang mga tawo dunay lisud nga mga butang sa ilang kinabuhi, mao nga karon duna na usab koy lisud nga mga butang, mao nga mas makasabut ko.” Samtang naningkamot nga maayo, siya miingon, “Kon mopili kita sa pagsalig sa Dios, atong makita kon giunsa Niya pagtabang kanato ug unsa kini ka talagsaon. Mas misalig ako Kaniya karon kay sa kaniadto.” Siya labing mapasalamaton nga siya nakapadayon sa iyang misyon.6
Sa atong premortal nga kinabuhi kita nasayud nga ang kabubut-on ug oposisyon gikinahanglan aron motubo, molambo, ug sa katapusan makadawat sa kahimayaan.
Didto sa premortal nga konseho sa langit, ang plano sa Amahan naglakip sa kabubut-on isip usa ka mahinungdanon nga elemento. Mirebilde si Lucifer “ug nagtinguha sa paglaglag sa kabubut-on sa tawo.”7 Tungod niini, ang pribilehiyo sa pag-angkon og mortal nga lawas gihikaw kang Satanas ug niadtong misunod kaniya.
Ang uban nga premortal nga mga espiritu migamit sa ilang kabubut-on sa pagsunod sa plano sa Langitnong Amahan. Ang mga espiritu nga napanalanginan nga matawo niining mortal nga kinabuhi padayon nga adunay kabubut-on. Gawasnon kita nga mopili ug molihok apan dili gawasnon sa pagkontrolar sa mga sangputanan sa atong mga pagpili. Busa, ang atong mga pagpili motino sa kalipay o kagul-anan niining kinabuhia ug sa kinabuhi nga moabut. “Ang pagpili sa maayo ug pagkamatarung modangat ngadto sa kalipay, kalinaw, ug kinabuhing dayon, samtang ang pagpili sa sala ug dautan sa ngadto-ngadto modangat ngadto sa kasakit ug kagul-anan.”8
Dili nato mabasol ang mga sirkumstansya o ang uban alang sa desisyon nga molihok nga sukwahi sa mga sugo sa Dios. Kitang tanan responsable ug may tulubagon sa Dios kon giunsa nato sa pagpalambo og Kristohanong mga hiyas, mga talento, ug mga abilidad, ug kita responsable kon giunsa nato paggamit sa panahon nga gigahin kanato niining kinabuhia.
Ang doktrina kabahin sa katugbang [oposisyon] konektado kaayo ug usahay gikonsiderar isip kabahin sa doktrina sa kabubut-on. Apan tungod kay ang katugbang sagad moabut gikan sa gawas nga mga tinubdan o laing mga tawo, makatabang nga tan-awon kini sa tagsa-tagsa. Kini nga doktrina klaro nga gipasabut ni propetang Lehi sa 2 Nephi 2:11: “Kay kini gikinahanglan gayud, nga adunay katugbang sa tanan nga mga butang. Kay kon wala pa, … ang pagkamatarung dili gayud mapahinabo, ni ang pagkadautan, ni ang pagkabalaan ni ang pagkauyamot, ni ang pagkamaayo ni ang pagkangil-ad.”
Si Lehi mipadayon sa pagpasabut nga kini nga doktrina importante kaayo nga kon wala kini “wala untay katuyoan diha sa … pagkalalang” ug “[ang] kaalam sa Dios ug sa iyang walay katapusan nga mga katuyoan, ug usab sa gahum, ug sa kalooy, ug sa kaangayan sa Dios” makawang.9
Si Lehi mipadayon, “Busa, ang Ginoong Dios mihatag ngadto sa tawo nga siya molihok alang sa iyang kaugalingon.”10
Nasayud kita didto sa premortal nga kinabuhi nga ang paggamit sa kabubut-on moresulta sa oposisyon ug panagbangi—ang gubat sa langit maoy ebidensya niini nga kamatuoran. Nasayud kita nga agi og dugang sa gubat ug kasamok adunay dagkong masalaypon nga binuhatan sa tibuok kalibutan. Nasayud usab kita nga si Jesukristo andam nga mobayad sa bugti niini nga mga sala. Ang Iyang pag-antus, nga dili masabut, moresulta sa kadaugan batok sa sala ug espirituhanon nga kamatayon. Ang Iyang Pagkabanhaw mobuntog sa pisikal nga kamatayon. Duna kitay pagsalig nga human sa mortal nga kamatayon, kitang tanan mabuhi pag-usab. Sama sa atong mabasa sa Isangyaw ang Akong Ebanghelyo:
“Kining kadaugan ni Jesukristo mahitungod sa espirituhanong kamatayon pinaagi sa Iyang pag-antus ug mahitungod sa pisikal nga kamatayon pinaagi sa Iyang Pagkabanhaw gitawag og pag-Ula. …
“Samtang kita mosalig sa Pag-ula ni Jesukristo, Siya makatabang kanato nga makalahutay sa atong mga pagsulay, mga sakit-sakit, ug mga kasakit. Mahimong mapuno kita sa tumang kalipay, kalinaw, ug kahupayan. Ang tanang dili makiangayon kabahin sa kinabuhi mahimong mapahusto pinaagi sa Pag-ula ni Jesukristo.”11
Ang terible nga mga kasinatian sa atong mga miyembro human dayon maestablisar ang Simbahan didto sa Missouri nagpaklaro niini nga mga baruganan sa Pag-ula. Ang atong doktrinal nga mga hiyas direkta nga misumpaki sa mga nanimuyo sa Missouri nga dili sakop sa Simbahan. Daghang taga-Missouri mikonsiderar sa mga American Indian nga bangis nga kaaway ug gusto nilang mawagtang sa dapit. Agig dugang, daghang lumulupyo sa Missouri ang nanag-iya og mga ulipon ug nahulga niadtong supak sa pagpang-ulipon. Daghan ang nangita og yuta, bahandi, ug gani gahum.
Agig kalainan, ang atong doktrina nagtahud sa mga American Indian ug ang atong tinguha mao ang pagtudlo kanila sa ebanghelyo ni Jesukristo. Kabahin sa pagkaulipon, ang atong mga kasulatan klaro nga walay tawo nga mahimo nga ulipon ngadto sa lain. Ang atong pipila lang ka nag-unang itom nga mga miyembro niadtong higayuna nagsimba kauban sa puti nga mga miyembro sama sa ilang gibuhat karon. Sa katapusan, ang atong katuyoan dili mao ang pag-angkon og bahandi apan ang pag-establisar og mga komunidad sa mga kaigsoonan nga naghigugma sa usag usa ug nagsunod sa mga baruganan nga gitudlo sa Manluluwas. Ang ubang mga nanimuyo sa Missouri nahulga sa dihang daghan nga mga Santos, nga nagsunod sa mga pagpadayag sa Ginoo, mibalhin ngadto sa Missouri.12
Miresulta kini sa hilabihan nga panagbangi ug pagpanggukod sa mga miyembro sa Simbahan. Ang mga kontra sa mga Santos midaut sa ilang mga tanom ug pipila ka mga building, mikawat sa kahayupan ug personal nga kabtangan, ug miabug kanila gikan sa ilang mga pinuy-anan. Ang pipila ka mga Santos gipapilitan og alkitran ug balahibo, gibunalan, ug gibun-og. Nagsulat ngadto ni Joseph Smith, kinsa nagpuyo sa Kirtland, Ohio, si William W. Phelps mipahayag, “Ngil-ad kini nga panahon, ang mga lalaki, mga babaye ug mga bata nanagan, o nangandam [nga managan], ngadto sa tanang direksyon.”13 Diha sa kasamok sa pagpapahawa, ang mga pamilya usahay nabahin ug daghang mga Santos ang nagkulang sa pagkaon ug ubang mga suplay. Naglisud sa pagsabut ang mga miyembro sa Simbahan nganong gipapahawa sila sa ilang gipuy-an human ang Ginoo misugo kanila nga magpundok sa Missouri. Human niya madawat ang makapaguol nga balita, si Joseph Smith nag-ampo aron makasabut. Ang Ginoo mitubag niining makahupay nga mensahe, nga karon makita sa Doktrina ug mga Pakigsaad 101:35–36:
“Ug silang tanan kinsa nag-antus sa panggukod tungod sa akong ngalan, ug milahutay diha sa hugot nga pagtuo, bisan sila gitawag aron sa paghatag sa ilang mga kinabuhi alang kanako sa gihapon sila makaambit niining tanan nga himaya.
“Busa, ayaw kahadlok bisan ngadto sa kamatayon; kay dinhi niini nga kalibutan ang imong kalipay dili hingpit, apan kanako hingpit ang imong kalipay.”
Ang Ginoo misaad usab kanato nga ang ganti sa pagkamatarung mao “ang kalinaw niini nga [kinabuhi], ug kinabuhi nga dayon diha sa kalibutan nga umaabut.”14
Sa ingon ang Pag-ula sa Manluluwas nagtugot nato nga makabaton og kalinaw ug kahilum bisan kon dunay pisikal nga mga kakuyaw.
Espesyal nga mga Hagit, Nga ang Uban Talagsaon sa Inyong Panahon
Isip mga young adult, agig dugang sa pisikal nga mga hagit, duna kamoy espesyal nga mga hagit, ug ang uban talagsaon sa inyong panahon. Nabalaka mo kabahin sa mga desisyon kalabut sa edukasyon, panarbaho, kaminyoon, ug pamilya. Ang mga baruganan sa doktrina kalabut niini nga mga desisyon nahisgutan na sa daghang mga pakigpulong ug nasabtan na gayud. Ang Manluluwas, sa pagbayad sa silot sa atong mga sala, wala mokuha gikan kanato sa personal nga responsibilidad kon giunsa nato sa pagpuyo ang atong kinabuhi. Ang kaimportante sa pagtrabaho, kakugi, paghago uban sa atong kusog, pagpalambo sa atong mga talento, ug pagsangkap alang sa mga pamilya kanunayng giproklamar diha sa mga kasulatan sukad sa sinugdanan. Sa Genesis ang Ginoo mipahayag, “Sa singot sa imong nawong magakaon ikaw sa tinapay, hangtud nga mopauli ka sa yuta.”15
Nagtuo ko nga kini nga mga konsepto sa doktrina gidawat gayud sa mga miyembro. Hinoon, sa komplikadon nga kalibutan adunay kalibug kon unsaon sa paggamit niini nga mga baruganan.
Sa akong unang pakigpulong sa kinatibuk-ang komperensya, 20 ka tuig ang milabay, mipakigbahin ko og daw kataw-anan nga personal nga istorya nga direktang may kalabutan niini nga mga isyu.16
Sa gagmay pa ang among mga bata, ang akong asawa, si Mary, ug ako nakahukom sa pagsunod sa usa ka tradisyon nga gitudlo sa akong amahan sa dihang bata pa ko. Makigkita siya kanako ug sa akong mga igsoon sa tagsa-tagsa aron sa pagtabang kanamo sa paghimo og mga tumong sa nagkadaiyang mga aspeto sa among kinabuhi ug sa pagtudlo kanamo kon sa unsang paagi ang mga kalihokan sa Simbahan, eskwelahan, ug extracurricular makatabang kanamo sa pagkab-ot niini nga mga tumong. Duna siyay tulo ka mga lagda:
-
Kinahanglang duna kami maayo nga mga tumong.
-
Makahimo kami sa pag-usab sa among mga tumong bisan kanus-a.
-
Kinahanglang magmakugihon kami sa pagkab-ot sa bisan unsa nga tumong nga among gipili.
Tungod kay nakabenepisyo mi niini nga tradisyon, si Mary ug ako nakahukom nga mopadayon niini nga tradisyon uban sa among mga anak. Sa dihang ang among anak nga si Larry lima ka tuig ang panuigon, ako siyang gipangutana kon unsay gusto niyang trabaho inig-dako niya. Miingon siya nga gusto niyang mahimong doktor sama sa iyang Tiyo Joe.17 Si Larry nakasinati og seryoso nga operasyon ug nakabaton og dakong pagtahud alang sa mga doktor, ilabi na sa iyang Tiyo Joe. Mipadayon ko sa pagsulti ni Larry kon sa unsang paagi ang maayong mga butang nga iyang gibuhat makatabang sa pag-andam kaniya sa paghimo sa trabaho sa usa ka doktor.
Paglabay sa pipila ka bulan, nangutana ko niya pag-usab kon unsay gusto niyang buhaton inig-dako niya. Niining higayuna miingon siya nga gusto niya nga mahimong usa ka piloto. Ang pag-usab sa tumong maayo ra, mao nga akong gipasabut kon sa unsang paagi ang iyang lain-laing mga kalihokan makatabang niya nga makab-ot kini nga tumong. Pagkahuman, daklit ko nga miingon, “Larry, sa milabay natong panag-istorya gusto nimong mahimong doktor. Unsay nakapausab sa imong hunahuna?” Mitubag siya, “Siguro ang pagkahimong doktor maayo, apan nakabantay ko nga si Tiyo Joe motrabaho kada Sabado sa buntag, ug dili ko gustong makapalta sa mga cartoons sa Sabado sa buntag.”
Sukad nianang panahona ang among pamilya mohingalan sa makalinga gikan sa maayong tumong isip usa ka cartoon sa Sabado sa buntag.
Dunay duha ka mga baruganan nga gusto nakong ipasabut og maayo gikan niining tinuod nga istorya. Ang una mao kon unsaon nimo pagplano ug pagpangandam nga makab-ot ang maayong mga tumong sa kalibutan karon, ug ang ikaduha mao ang epekto sa Internet ug social media sa atong matarung nga mga tumong. Ang matag usa niini mahimong mga cartoons sa Sabado sa buntag nga makapalinga kanato gikan sa kalipay nga atong gitinguha.
Nabalaka kaayo ko sa kadaghan sa mga young adult nga napakyas sa paghimo og matarung nga mga tumong o pagplano sa pagkab-ot niini. Nabalaka usab ko nga daghan ang mipakaubos ug mipaminos sa ilang kaugalingong mga talento ug kapasidad. Ang pagresolbar niining duha ka mga isyu makahatag og dakong kalipay sa inyong kinabuhi.
Usa ka bag-ong libro ni Professor Angela Duckworth, giulohan og Grit, nagpresentar og makaagni nga argumento nga daghan, kon dili man kadaghanan, sa mga tawo mopasobra sa bili sa ilang natural nga abilidad ug paminosan ang bili sa kakugi ug hugut nga tinguha. Iyang gipasabut nga ang tanang matang sa kalampusan mas naimpluwensyahan sa maayong kinaiya sa pagtrabaho kay sa tiunay nga pangisip o abilidad. Iyang gitataw nga ang mga tawo nga dunay determinasyon ug direksyon (nga gitawag usab niya og kadasig ug paglahutay) kanunay nga mas maayo og buhat kay sa niadtong dunay natural nga abilidad apan walay samang hugut nga tinguha.18
Sa batan-on pa ko wala tuyoa nga nakabantay ko sa score sa katakus sa pangisip sa usa ka estudyante, nga medyo ubos sa ordinaryo. Ako siyang giobserbahan sa eskwelahan nga wala magpahibalo ni bisan kinsa. Mikuha siya og lisud nga mga klase ug makugihon nga nagtuon. Sa kolehiyo anaa siya usahay sa duha o tulo ka mga study group alang sa samang klase. Sa katapusan nakaangkon siya og advanced degree sa usa ka pig-ot ug lisud nga kurso ug nakahimo og talagsaong mga pagdiskobre sa iyang natad.
Karon, wala ko magsugyot nga ang tanan kinahanglang dunay makab-ot sa akademiya, apan nagsugyot ko nga makab-ot ninyo ang daghan sa inyong matarung, takus nga mga tumong pinaagi sa pagplano, hugut nga tinguha, ug determinasyon, ilabi na kon inyong wagtangon ang Sabado sa buntag nga mga cartoon sa kinabuhi. Makakaplag usab kamo og dugang nga kalipay sa inyong kinabuhi.
Gusto nakong ipaniguro kaninyo nga makahimo kamo og lisud nga mga butang. Si Elder John B. Dickson, usa ka talagsaon nga Seventy, nga karon emeritus, kinsa dungganon nga miserbisyo sa tibuok kalibutan, mipakita niini sa makalingaw ug dili kasagaran nga paagi. Si Elder Dickson gitawag sa pagserbisyo isip LDS nga misyonaryo sa Mexico niadtong 1962. Sa wala pa siya mobiya, nahiling siya nga dunay kanser sa bukog sa iyang tuo nga bukton. Walay naglaum nga mabuhi siya og labaw sa usa ka bulan. Hinoon, paglabay sa 10 ka mga bulan mibiya siya aron sa pagserbisyo sa gi-assign kaniya nga misyon, nga putol na ang iyang bukton.19 Dili ko makalimot kon giunsa niya pagtudlo ang mga misyonaryo sa MTC nga makahimo sila og lisud nga mga butang. Gidapit niya ang upat ka mga misyonaryo sa pagduol sa atubangan ug makigsangka kaniya sa usa ka kontest sa paghigot og kurbata. Hunahunaa ang paghigot sa kurbata nga usa ra ang bukton! Bag-o lang nakong gihangyo si Elder Dickson sa pagdemonstrar. Atong tan-awon.
Elder John B. Dickson:[Naghigot sa kurbata.] Nasayud kamo nga kitang tanan adunay mga hagit sa atong kinabuhi. Kini usahay pisikal o emosyonal o pangwarta o daghan pang mga matang, ug kon magpositibo lang kita ug mosunod sa mga lagda, dunay hugot nga pagtuo sa Ginoo, dunay pagtuo sa atong mga kaugalingon, makaya nato ang bisan unsa nga moabut. Makahimo pa gani ta sa paghigut sa atong necktie. Dunay gusto nga makiglumba o makig-wrestling?
Salamat, John.
Sa MTC, gilupig ni Elder Dickson ang upat ka mga misyonaryo, gamit ang iyang ngipon, iyang mga abaga, ug iyang dughan sa talagsaong paagi. Palihug hibaloi nga makabuntog kamo sa kalisdanan ug makabuhat og lisud nga mga butang.
Si Professor Duckworth mitimaan nga “ang kadasig komon. Ang paglahutay talagsaon.”20
Usa sa mga pagtuon nga iyang gikutlo naghatag og gibug-aton sa kaimportante sa aktibo nga pagpangandam alang sa kinabuhi, lakip ang paglahutay, kamapadayunon, kamatinguhaon, ug ang “kahilig nga dili biyaan ang mga tahas kon mag-atubang og mga babag.”21
Miingon usab siya nga ang tawo kinahanglang dunay halangdong tuyo nga makatampo sa kaayohan sa uban.22 Siya namahayag:
“Bulahan gayud kadtong dunay halangdong tumong nga importante kaayo sa kalibutan nga nagdugang kini og lawom nga kahulugan sa tanan nilang buhaton, bisan unsa pa kini ka gamay o ka laay buhaton. Ikonsiderar ang sambingay sa mga bricklayer:
“Tulo ka mga bricklayer gipangutana: ‘Unsay imong gibuhat?’
“Ang una miingon, ‘Nagpahimutang ko og mga bika.’
“Ang ikaduha miingon, ‘Nagtukod ko og simbahan.’
“Ug ang ikatulo miingon, ‘Nagtukod ko sa balay sa Dios.’
“Ang unang bricklayer adunay trabaho. Ang ikaduha adunay panginabuhi. Ang ikatulo adunay calling.”23
Ang akong hagit ninyo karong gabhiona mao ang pagsusi sa inyong mga tumong ug pagtino hain niini ang nagtugot kaninyo nga matuman ang mga obligasyon sa pamilya ug nagpabilin kaninyo sa inyong dalan sa pakigsaad ug nagtugot kaninyo nga makabaton sa kalipay nga gusto sa Ginoo alang kaninyo. Hinumdumi, ang pagbaton og tumong nagtugot kaninyo nga makadaginot og panahon ug paningkamot pinaagi sa sayo nga pagplano ug dili mataligam-an ang importante nga mga panginahanglanon ug tagal sa panahon.
Ako nang hisgutan karon ang epekto sa Internet ug social media sa mga desisyon.
Ang Internet ug social media nakatampo og daghang kaayohan sa atong modernong katilingban. Dako kini og bili! Mamahimo usab kini nga Sabado sa buntag nga mga cartoon nga makabalda kanato sa pagtuman sa atong tinuod nga katuyoan sa mortal nga kinabuhi.
Kinasingkasing nakong hangyo nga kitang tanan motimbang-timbang kon giunsa ug kanus-a nato gigamit ang Internet ug social media. Ang klaro nga pagsusi kinahanglang mao kini: Nakatabang ba kini sa uban natong takus ug importanteng mga tumong, o nakapugong ba kini sa atong pag-uswag? Nagpasulabi na ba kita sa social media tungod sa kahadlok nga naa kitay dili mahibaloan kon dili nato kini susihon kanunay? Ang pagpadayeg sa kaugalingon diha sa pipila ka social media miresulta ba sa pagduhaduha sa atong kaugalingon ug pagbati nga dili angayan? Mas grabe pa, ang Internet migiya ba kanato ngadto sa mga imahe ug mga sulod nga law-ay, dili angay, o pagpangilad nga makaguba sa pagtuo? Gitago ba nato ang atong pagkatawo ug mihimo og bati nga mga komentaryo o opinyon ngadto sa uban? Ang social media nakabalda ba sa panahon nga kasagaran natong gigahin sa relihiyusong kalihokan sa panimalay o de-kalidad nga panahon sa pamilya? Ang gidugayon sa panahon nga gigahin sa mga dula ug walay mga pulos diha sa Internet nagpugong ba kanato nga epektibong maningkamot sa seryusong mga tumong? Gidapit ko ang matag usa kanato sa paghunahuna niini nga mga pangutana, mohimo og kausaban, ug maghinulsol kon gikinahanglan aron sa pagpanalangin sa atong mga kinabuhi.
Sa paghisgut sa itaas, hingpit akong nasayud sa dakong kaayohan nga mahimo sa social media kon gamiton sa saktong paagi. Ang natampo lang niini sa family history nagklaro kanako nga ang Ginoo midasig niini nga teknolohiya.
Human sa akong pagpamulong, akong i-post kini nga bahin sa akong pakigpulong sa akong Facebook page. Gusto nako nga inyong ipakigbahin kanako ang inyong mga kabalaka kabahin sa social media apan usab kon sa unsang paagi ang social media usa ka panalangin sa inyong kinabuhi.
Gusto usab nakong bilinan kamo og dugang panghunahuna kabahin niini nga hilisgutan. Daghan na kita og nadunggan kabahin sa pagpakatinuod diha sa social media. Ang tinud-anay nga pagkasama kang Kristo mas importante pa nga tumong kay sa pagpakatinuod. Isulti ko kini pag-usab: Ang tinud-anay nga pagkasama kang Kristo mas importante pa nga tumong kay sa pagpakatinuod.
Espirituhanong mga Hagit
Maghisgut na ako karon sa espirituhanong mga hagit.
Usa sa labing mahinungdanong mga responsibilidad niini nga kinabuhi mao ang paghimo ug pagtuman sa sagradong mga pakigsaad uban sa Dios. Nagkinahanglan kini nga atong susihon ang dili takus nga mga tinguha ug ipalayo ang atong mga kaugalingon gikan niini. Susihon usab nato ang dili angay nga mga ekspektasyon nga tuyo o dili tuyo natong gibutang sa Dios. Kanunay kitang magtinguha sa pagkat-on sa kabubut-on sa Dios alang kanato. Padayon kitang motutok pag-usab sa hugot nga pagtuo, paghinulsol, ug makaluwas nga mga ordinansa. Ang Manluluwas, kinsa mibayad sa bili alang kanatong tanan nga lapas sa unsay hingpit natong masabtan, wala mohimo sa Pag-ula aron makatutok kita sa kalibutanong mga tumong o, usab, alang sa kaugalingong walay hinungdan nga lingaw-lingaw ug mga dula. Hunahunaa ang katuyoan sa Ginoo sa dihang Siya namahayag, ““Kay tan-awa, mao kini ang akong buhat ug ang akong himaya——ang pagpahinabo sa pagka-imortal ug sa kinabuhi nga dayon sa tawo.””24
Ang uban daw mosulti o magpasabut, “Dili ba matagbaw ang usa ka mahigugmaong Amahan sa Langit kon mas minos ko kay sa unsay angay kanako? Iya ba gayud nga ihikaw kanako ang mga panalangin tungod lang kay ganahan kong moinom og alkohol ug kape?” Subo lang, sayop kana nga pangutana ug nagpakita og kakulang sa pagsabut sa plano sa Amahan. Ang tinuod nga pangutana mao “Unsaon nako nga mahimong matarung, mahigugmaong tawo nga gusto sa akong Amahan ug sa Manluluwas nga ako mamahimo?” Ang mga kasulatan namahayag, “[Diin] daghan ang gihatag daghan ang gikinahanglan.”25
Sa kalibutan nga ang mga ganti ug tropeyo kasagaran nga madawat tungod lang sa pag-apil, ang mga sumbanan ug mga ekspektasyon daw dili makiangayon o gani mapintas. Tinuod kini ilabi na niadtong moinsister sa pagsunod sa ilang kaugalingong dalan nga dili motuman sa plano sa Amahan, bisan unsa pay mga sangputanan.
Daghan ang mangatarungan sa masalaypong binuhatan ug mogamit isip ilang depensa nga, “Si Jesus mitudlo kanato sa paghigugma sa tanan.” Siyempre, tinuod kini, apan kasagaran kadtong nag-awhag niini nga posisyon daw mobaliwala sa Iyang sama ka importante nga tambag, “Kon nahigugma kamo kanako, inyong pagatumanon ang akong mga sugo.”26
Dili angay nga ipakigsabut nato ang mga kondisyon sa atong relasyon ngadto sa Dios nga Kapangulohan. Ang pagbaton og masulub-on nga kasingkasing ug mahinulsulon nga espiritu mao ang unang gikinahanglan aron makasugod diha sa dalan sa pakigsaad nga pasiugdahan pinaagi sa bunyag. Ang mapainubsanong pangamuyo ngadto sa Dios maoy gikinahanglan. Sama sa gitudlo kanato ni Haring Benjamin: “Kay tan-awa, dili ba kitang tanan mga makililimos? Kitang tanan wala ba magsalig diha sa sama nga Binuhat, ang Dios, sa tanan nga kabtangan diin kita aduna … sa matag matang?”27
Ang atong mga hagit mahimong lisud, ug ang uban gani dili makiangayon. Kini ang hinungdan sa atong mga kasubo ug pagpadangat og simpatiya sa uban. Mao usab kini sa pisikal nga mga sakit nga moigo sa atong mga lawas. Naglakip kini niadtong mga inosente ug giabusohan. Naglakip kini sa kawad-on ug kasamok nga mipuno sa palibut diin kita gipakatawo. Naglakip kini sa natural nga mga gana ug mga hilig nga tingali wala nato pilia. Magguol kita sa mga pagkaadik nga resulta sa usa ka sayop nga pagpili; daghan kaayo ang dili makiangayon o dili makatarunganon niini nga kalibutan.
Unsa man ang atong buhaton? Kinahanglang magmabination ug manggiloy-on kita ug tagdon ang tanan uban sa pagtahud, bisan kon mopili sila og dalan nga nasayud kita nga wala mahiuyon sa plano sa Amahan ug mga pagtulun-an sa Manluluwas. Apan kon gusto gayud nato nga magmabination, kinahanglan usab natong itudlo ang paghinulsol. Dili mabination, ug wala kita mobuhat og pabor ni bisan kinsa, kon dili nato awhagon ang atong mga minahal sa pag-usab sa ilang mga kinabuhi ug sa pagdawat sa Pag-ula sa Manluluwas. Adunay talagsaon, mahangturon nga mga panalangin nga naghulat niadtong maghinulsol.
Ang Manluluwas Mismo miklaro niini sa pakigsulti ngadto sa mga Nephite sa dihang miingon Siya, kabahin niadtong maghinulsol, “Ako mohukom kaniya nga walay sala sa atubangan sa akong Amahan niana nga adlaw sa diha nga Ako mobarug aron paghukom sa kalibutan.”28 Mipadayon Siya sa pag-ingon, “Ug walay mahugaw nga butang nga makasulod didto sa iyang gingharian; busa walay makasulod sa iyang kapahulayan gawas niadto kinsa nakahugas sa ilang mga saput sa akong dugo, tungod sa ilang hugot nga pagtuo, ug paghinulsol sa tanan nila nga mga sala, ug sa ilang pagkamatinud-anon hangtud sa katapusan.”29
Palihug hibaloi nga mamahimo kamong limpyo. Inyong makaplagan ang kalipay nga inyong gitinguha niini nga kinabuhi. Kinahanglan walay usa nga mobiya niini nga debosyonal nga maghunahuna nga imposible na kamong matubos. Matubos gihapon kamo. Sa kinauyokan kamo anak sa Dios. Makabaton kamo og paglaum ug kalipay. Makausab kamo sa inyong kasingkasing ug maaghinulsol. Makapasaylo kamo ug mahimong mapasaylo.
Ang paghinulsol mahinungdanon sa plano sa Amahan. Sa Basahon ni Mormon, atong makat-unan ang relasyon tali sa kalooy ug kaangayan. Giestablisar ni Kristo kon sa unsang paagi ang kalooy ug kaangayan magkaabut.30
Ganahan ko sa malaumon nga mga pulong nga gisulat ni Eliza R. Snow:
Ang mahimayaong plano sa kalipay makiangayon ug maloloy-on. Nasayud kita kon asa kita gikan, nganong ania kita dinhi niini nga kinabuhi, ug asa kita paingon human kita mamatay.
Kamo usa ka hamili nga henerasyon. Ang mga kasulatan tin-aw nga sa katapusang mga adlaw adunay “pagkadautan ug mga pagkasalawayon.”32 Hinoon, ang mga Santos, diyutay ra ug nagkatag sa tibuok yuta, “[paga]sangkapan sa katarung ug uban sa gahum sa Dios sa dako nga himaya.”33 Ang Ginoo misaad nga Siya “mopanalipod sa mga matarung” ug kita “dili kinahanglan mahadlok.”34
Dili kamo kinahanglang mahadlok, bisan pa sa mga kakuyaw ug mga hagit nga inyong atubangon. Mapanalanginan ug mapanalipdan kamo kon magtinguha kamo og matarung, maayo nga mga tumong. Pagplano ug pagbuhat uban sa hugot nga tinguha ug determinasyon, likayi ang dili hustong paggamit sa social media ug sa Internet, ug saligi ug tutoki ang hugot nga pagtuo, paghinulsol, makaluwas nga mga ordinansa, ug ang maulaong sakripisyo sa Manluluwas samtang molahutay kamo hangtud sa katapusan. Ang pagtutok diha sa templo makatabang ninyo sa pagkab-ot niini nga mga tumong.
Sa pag-usab sa Mga Taga-Roma 12:12, “Maglipay diha sa paglaum, mapailubon diha sa kasakit, ug matinud-anon sa pag-ampo.” Inyong malikayan ang Sabado sa buntag nga mga cartoon sa kinabuhi ug matagamtam ug makab-ot ang tanan nga gisaad sa Manluluwas kanato.
Ako mopamatuod mahitungod sa kabalaan ni Jesukristo. Tungod Kaniya dili kita angay nga mahadlok, kay diha Kaniya hingpit ang atong kalipay. Sa pangalan ni Jesukristo, amen.
© 2016 pinaagi sa Intellectual Reserve, Inc. Tanang mga katungod gigahin. Pagtugot sa Iningles: 6/16. Pagtugot sa paghubad: 6/16. Hubad sa “‘Fear Not … in Me Your Joy Is Full’ (D&C 101:36).” Cebuano. PD60002153 853