Pangitaa ang Hingpit nga Kalipay sa Matag Adlaw nga Kinabuhi

Mary G. Cook

Usa ka Gabii uban ni Elder Quentin L. Cook

Tibuok Kalibutan nga Debosyonal alang sa mga Single Adult • Septyembre 11, 2016 • Washington D.C. Stake Center

Giisip ko nga usa ka dakong panalangin nga kauban kamo karong gabhiona.

Sa pag-anhi nato dinhi sa mortal nga kinabuhi, gidala nato ang atong balaang kinaiya isip mga anak sa Dios. Ang atong indibidwal nga bili gikan sa langit. Kon kita nakasabut sa atong balaang kinaiya ug ang katuyoan nga ania kita dinhi, mahimo natong mabuntog ang mga hagit ug pagsulay ug magpabiling tinuoray ug matinud-anon sa atong mga pakigsaad. Ang paagi kita mobati sa atong kaugalingon motino kon unsa kita kamalampuson dinhi sa atong mortal nga panaw. Ang atong pagtamud sa kaugalingon mapalambo kon matubag ang pipila ka tawhanong panginahanglan. Mohisgut ko og tulo: ang panginahanglan nga higugmaon, ang panginahanglan nga dawaton, ug ang panginahanglan nga molampus o makab-ot.

Kon kining mga panginahanglan dili matubag, kita mobati nga wala higugmaa, wala dawata, o wala magmalampuson. Kini moresulta sa pagbati nga nahigawad, nawad-an sa kadasig, walay kalipay, pag-inusara, ug kamingaw. Kitang tanan nag-atubang niini nga mga emosyon.

Nakigsulti ko sa usa ka higala niadtong miaging adlaw kinsa nagpakita kanako sa usa ka survey sa mga batan-ong mga estudyante sa kolehiyo. Dihang gipangutana unsay ilang gihunahuna nga kinadak-ang kabalaka, daghan ang mitubag nga “pag-inusara o kamingaw.” Mahimo kitang mag-inusara bisan minyo o dili minyo.

Kitang tanan mobati og pag-inusara sa lain-laing higayon sa atong mga kinabuhi. Si Presidente Gordon B. Hinckley nagsulti makausa: ““Ako nagtuo nga alang sa kadaghanan kanato ang labing maayong medisina sa kamingaw mao ang pagtrabaho ug pagserbisyo alang sa uban.” ¹

Sa akong hunahuna maayo kana nga tambag.

Si President Thomas S. Monson nagsulti niini: “Usahay ang kawalay kadasig mongitngit sa inyong agianan; ang kahigawad mao tingali ang kanunay nga kauban. … Pagsalig sa Ginoo, kita…maniguro ang atong mga tiil lig-on nga gitanum diha sa dalan sa pagserbisyo ug ang atong mga kasingkasing ug kalag gipahinungod sa pagsunod sa ehemplo sa Ginoo.”²

Pagkugi ug pagmatinguhaon sa pag-apil sa buhat sa Simbahan. Pakigsuod sa inyong Langitnong Amahan pinaagi sa pag-ampo ug pagtuon sa kasulatan. Pangitaa ang mga ehemplo sa mga kasulatan diin ang uban nakabuntog o nakaatubang sa kamingaw. Hunahuna si Moroni ug unsa siya kamingaw samtang iyang gihimo ang talaan sa kalaglagan sa iyang katawhan. Misulat siya:

“Busa ako mosulat ug motago sa mga talaan sa ilawom sa yuta; ug asa ako paingon, kini dili igsapayan.

“… Kay ako nag-inusara. Ang akong amahan namatay diha sa away, ug ang akong tanan nga mga kabanay, ug ako wala nay mga higala ni dapit nga kapaingnan; ug hangtud kanus-a ang Ginoo motugot nga ako mabuhi ako wala masayud.³

Sa akong hunahuna importante nga atong hinumduman nga sa tinuoray wala gayud kita nag-inusara. Ang Manluluwas nagsaad kanato og kahupayan. Kon kita takus, ang Espiritu Santo mao ang atong kanunay nga kauban. Ang iyang impluwensya makatabang kanato sa mga panahon sa pag-inusara. Kita mahimong mag-inusara, apan kita dili kinahanglan nga mingawon. Ganahan ko sa himno “NagkinahangIan Ko Nimo Matag Takna.”⁴

Ang panginahanglan sa gugma ug pagdawat tinuod gayud.

Pakigsuod sa inyong pamilya, diin kamo gihigugma ug gidawat labaw pa sa tanan. Apil sa inyong ward o branch. Magpakatakus kanunay sa templo. Kon wala pa maminyo, pakig-date niadtong takus sa templo. Ayaw pagpawala sa kadasig sa pagkadili hingpit niadtong inyong makaila; motubo ang atong abilidad ug molambo samtang kita nag-ugmad sa kinabuhi.

Ang panginahanglan nga molampus gamhanan ug makapadasig.

Ang tanan adunay gasa gikan sa Dios.⁵ Pangitaa ang inyong piho nga mga gasa ug pagmaya kamo niini. Palamboa kini. Tan-awa ang inyong patriyarkal nga panalangin, ug kat-uni ang tambag, mga pasidaan, mga gasa ug mga saad.

Ang akong mga ginikanan wala moadto sa templo hangtud nga ako naminyo ug ang among mga anak natawo. Wala ko maghunahuna nga ma-seal mi ingon nga usa ka mahangturon nga pamilya. Ako nagpailub ug naghulat sa panalangin sa Ginoo.

Naghunahuna ko makadaghan sa hiyas sa pailub ug sa makadaghan nga paagi ang Ginoo nagtudlo kanato sa pagpailub. Ganahan kaayo ko sa paagi kini gihulagway sa Isangyaw ang Akong Ebanghelyo: “Ang pailub mao ang kapasidad sa paglahutay sa kadugay, kasamok, oposisyon, o pag-antus nga dili masuko, mahigawad o mabalak-on. Mao kini ang abilidad sa pagbuhat sa kabubut-on sa Dios ug sa pagdawat sa Iyang tayming. Kon mapailubon ka, makasugakod ka kon ubos sa pressure ug makahimo sa pagsagubang sa kalisdanan sa kalma ug malaumong paagi. …Kinahanglan ka maghulat nga matuman ang gisaad nga mga panalangin sa Ginoo.”⁶

Ganahan ko kanunay sa Salmo 27:14: “Maghulat ka sa Ginoo: Magmalig-on ka, ug paisugon mo ang imong kasingkasing: Oo, maghulat ka sa Ginoo.”

Bisan unsa ang inyong sitwasyon karong panahona, pangitaa ang hingpit nga kalipay sa matag adlaw nga kinabuhi. Dili ba maanindot nga mobangon kada buntag ug mosulti, “akong gibati nga gihigugma, akong gibati nga gidawat, ug akong gibati nga malampuson.” Kitang tanan makahimo niini!

Hinaut inyong makaplagan ang hingpit nga kalipay samtang nagpadayon niining mortal nga panaw. Hinaut magpuyo kamo nga takus nga makabaton sa Espiritu Santo isip inyong kanunay nga kauban ug madawat ang tanang panalangin nga giandam sa Ginoo para kaninyo mao ang akong pag-ampo sa pangalan ni Jesukristo, amen.