Kune Reki ena Bula ni Veisiga

Mary G. Cook

Dua na Bogi vata Kei Elder Quentin L. Cook

Lotu ni iTabagone Qase Cake e Vuravura Raraba • 11 ni Sepiteba , 2016 • Valenilotu ni iTeki e Washington D.C

Sa dua dina na veivakalougatataki cecere meda soqoni vata kei kemuni ena bogi nikua.

Ni da lako mai ki na bula ni vuravura oqo, eda kauta vata mai na noda ituvaki vakalou ni da luvena na Kalou. Na keda yaga vakayadua a lako mai lomalagi. Ni da kila vakamatata na noda ituvaki vakalou kei na inaki ni mai tiko eke, sa rawa ni da ulabaleta na bolebole kei na veivakatovolei e so ka tiko dodonu ka yalodina ki na noda veiyalayalati. Na iwalewale ni noda vakilai keda e vakavurea na sala eda na rawaka kina ena noda ilakolako ni bula vakayago. Sa levu cake na noda marau eloma ni sotavi e so na gagadre ni bula. Au na tukuna e tolu: na gagadre me lomani, na gagadre me ciqomi, kei na gagadre me rawaka se rawata.

Ni ra sega ni sotavi na veigagadre oqo, eda yalo tawalomani, tawaciqomi, se tawarawata. Oqo e vakavuna na veilecayaki, yalolailai, vakalomalomani koya, veitawasei, kei na galili. Eda sotava taucoko na veiyalo vakaoqo.

Au a laki sikova e dua na itokani ena siga kadua ka wasea vei au e dua na vakadidike baleti ira na gonevuli ena yabaki ni koronivuli torocake. Ni tarogi se cava era a navuca me nodra kauwai levu duadua, vuqa era vakaraitaka na “galili.” Eda rawa ni galili tu se da sa vakawati se sega.

Eda vakila na galili ena gauna duidui e so ni noda bula. A kaya ena dua na gauna o Peresitedi Gordon B. Hinckley: “Au vakabauta ni sa iwali vinaka duadua vei keda ni galili oya na cakacaka kei na veiqaravi ena vukudra na tani.” ¹

Au nanuma ni sa ivakasala vinaka oya.

A kaya vakaoqo o Peresitedi Thomas S. Monson: “Ena so na gauna ena vakabutobutotaka na noda salatu na yalolailai; na veilecayaki ena rairai dua na itokani voleka. … Ni nuitaki tu na Turaga, meda sa … vakadeitaka ni sa teivaki dei tu na yavada ena sala ni veiqaravi ka da sa solia na lomada kei na yaloda meda muria na ivakaraitaki ni Turaga.”²

Vakaogai iko ka gugumatua ena cakacaka ni Lotu. Toka voleka ga vua na Tamamu Vakalomalagi ena masumasu kei na vuli ivolanikalou. Vakaraica na ivakaraitaki e so ena ivolanikalou era a ulabaleta se lakosivita kina e so tale na galili. Vakasamataki Moronai kei na nona a galili tu ni vakavola na nona ivolatukutuku me baleta na vakarusai ni nona tamata. A vola o koya:

“O koya au sa vola kina na itukutuku ka buluta ena loma ni qele; ia sa veitalia na ka e qai yaco vei au.

“… Niu tiko taudua voli ga. Raica sa mate ena ivalu ko tamaqu, kei ira kece na wekaqu, a sa sega na wekaqu se na vanua meu lako kina; ia au sa sega ni kila na balavu ni gauna sa lewa na Turaga meu bula voli kina.³

Au nanuma ni sa bibi me vakasamataki ni da sa sega ni tiko taudua voli vakaidina. Sa yalataka na iVakabula me vakacegui keda. Ke da sa bula kilikili, sa noda itokani voleka na Yalo Tabu. Sa vukei keda na Nona veivakayarayarataki ena veigauna ni galili. Sa rawa ni da tiko taudua voli, ia sa sega ni dodonu meda galili. Au taleitaka na sere ni lotu “Au Rai Vei Kemuni”⁴

Na gadrevi ni loloma kei na veiciqomi sa ka dina saraga.

Tiko volekata na nomu matavuvale, na vanua o lomani ka ciqomi tawacavuti rawa kina. Vakaogai iko ena nomu tabanalevu se tabana. Dau bula kilikili vakavaletabu. Ke o tiko duadua, veibukutaki ira ka bula kilikili vakavaletabu. Kakua ni yalolailai mai na nodra tawadodonu o ira o sotava; eda tubu ena sasaga ka vakavinakataki keda ni da lako curuma na bula.

Na gadrevi ni rawaka e sa kaukauwa sara ka veivakauqeti.

Sa tiko na isolisoli ki na tamata yadua mai vua na Kalou.⁵ Vaqara na nomu isolisoli vakaiiko ka rekitaki ira. Raica na nomu veivakalougatataki vaka-peteriaki, ka vulica na kedra ivakasala, ivakaro, isolisoli, kei na yalayala.

Rau a sega ni gole ki na valetabu na noqu itubutubu me yacova niu sa vakamau oti ka ra sa sucu na luvei keirau. Au sega ni vakasamataka ni keitou na vauci vata me dua na matavuvale tawamudu. Sa dodonu meu na vosota ka waraka na veivakalougatataki oqo ni Turaga.

Au dau vakasamataka vakawasoma na ivakarau ni yalovosota kei na sala e vuqa e vakatavulici keda kina na Turaga meda dau vosota. Au taleitaka na sala e vakamacalataki kina ena Vunautaka na Noqu Kosipeli: “Na yalovosota sa ikoya na kaukauwa mo vosota vakadede na bera, leqa, duidui, se rarawa ka sega ni yaco na cudru, yaloca, se taqaya. Sa ikoya na kaukauwa mo vakayacora na lewa ni Turaga ka duavata kei na Nona gauna. Ni ko dau vosota, ko na rawata na vakatovolei e yaco vei iko ka rawa ni ko sotava na rarawa ena vakacegu kei na inuinui. … Mo na waraka na yalayala ni veivakalougatataki ni Turaga me na yaco mai.”⁶

Au dau taleitaka tu ga na Same 27:14: “Mo waraki Jiova: gugumatua, ena qai vakataudeitaka na yalomu ko koya: Io, mo waraki Jiova ga.”

Se vakacava sara na nomu ituvaki ena gauna oqo, kune reki ena bula ni veisiga. Ena sega li ni ka totoka mo na yadra ena veimataka ka kaya, “Au vakila niu lomani, au vakila niu ciqomi, kau vakila niu sa rawaka.” Sa rawa ni da cakava kece oqo!

Mo ni na kune reki kei na marau ena nomuni lakova na itosotoso ni bula vakayago oqo. Mo ni sa bula kilikili me tiko vei kemuni na Yalo Tabu me nomuni tokani voleka ka ciqoma na veivakalougatataki kece sa vakarautaka tu vei kemuni na Turaga sa noqu masu ena yaca i Jisu Karisito, emeni.