5:54

Paghinulsol ug Gugmang Putli

Sue L. Clark

Usa ka Gabii uban ni Elder Kim B. Clark

Tibuok Kalibutan nga Debosyonal alang sa mga Young Adult • Mayo 7, 2017 • Salt Lake Tabernacle

Si Elder Clark ug ako nalipay nga gikauban kamo niining tibuok kalibutan nga debosyunal.

Mopaambit ko’g mga hunahuna bahin sa mga butang nga importante kanako nga unta makahuluganon kaninyo.

Una, mopahayag ko sa akong gugma: Duna koy espesyal nga pagbati sa mga young adult sa Simbahan. Anaa kamo sa panahon diin mohimo kamo’g mga desisyon nga lisud—magpadayon sa edukasyon, mangitag trabaho, magmisyon, makig-date, magminyo, ug maghimo’g pamilya. Mibati ug nakasaksi ko sa inyong dakong impluwensya sa paghimo ug pagtuman sa sagradong mga pakigsaad ug pagtinguha sa gusto sa Ginoo sa paghimo niining mga desisyon. Mga talagsaon kamo! Ug gipangga kamo sa Ginoo. Nasayud ako niana.

Gusto sab kong mopaambit sa akong pagpamatuod ug mga pulong sa pag-awhag. Gusto kong masayud mo nga ang Dios mao ang buhi natong Amahan sa Langit. Nasayud kong gihatag Niya ang plano sa kaluwasan ug ang talagsaong gasa sa Iyang Anak, si Jesukristo, atong Manluluwas ug Manunubos. Nasayud kong si Propeta Joseph Smith ang propeta niini nga dispensasyon sa kahingpitan sa panahon. Nasayud kong mobalik si Jesus ug kinahanglan kitang mangandam alang niana nga pag-abut.

Unsaon nato nga maandam nianang importanting hitabo? Daw bug-at nga buluhaton! Daghan kaayong buhatunon! Moawhag ko ug manghinaot gamit ang duha ka baruganan aron maandam kita: paghinulsol ug gugmang putli.

Gitudloan kita ni Presidente Monson sa Oktubre nga kinatibuk-ang komperensya: “Ang mahinungdanong bahin sa plano mao ang atong Manluluwas, si Jesukristo. Kon wala ang Iyang maulaong sakripisyo, ang tanan mawala. Hinoon, dili igo, ang magtuo lamang Kaniya ug sa Iyang misyon. Kinahanglan kitang molihok ug magkat-on, mangita ug mag-ampo, maghinulsol ug molambo.”¹

“Maghinulsol gayud kita. Ug pagkanindot niana nga gasa! Pinaagi sa Pag-ula ug gahum ni Jesukristo, mabuntog nato ang tanang kahuyang, kasakit, kasubo ug, sala. Nakakat-on ko nga samtang ang paghinulsol kasagaran usa ka paghunong sa imong gibuhat, mahitungod usab kini sa pagsugod sa wala pa nimo mahimo.

Usa ka pinakaimportanting butang nga angay natong sugdan og himo nga kabahin sa paghinulsol mao ang pagserbisyo sa uban. Diha sa pagserbisyo sa uban, sa pakigtambayayong sa Ginoo, ug pagsinati sa Iyang putli nga gugma tinuoray natong mailhan ang Manluluwas. Nakita nako ang gahum sa gugma gumikan sa pagserbisyo sa uban sa sakrament miting sa milabay lang nga bulan.

Misulod ko sa chapel kuyog sa akong higala nga mihunong aron sa pagtimbaya sa usa ka gamayng bata sa Primary class. Atol sa miting gi-sustain ang akong higala isip bag-ong stake Relief Society president. Ang gamayng bata nga iyang gitimbaya sa agianan sa chapel milingi ug mitan-aw sa akong higala, nga iyang titser. Kanang matahum nga gamayng babaye nasayud nga i-release ang iyang titser ug nagsugod siya sa paghilak. Miadto dayon siya sa tumoy sa iyang lingkuranan ug gipasok ang iyang ulo sa abaga sa iyang mama! Mitan-aw ko sa akong higala, ang bag-ong stake Relief Sociey president, ug nakita nakong nagluha usab siya! Kadto nga testamento sa gugma impluwensyal para nako. Misugod sab og hulma ang akong mga luha. Nagsaksi ko sa gasa sa gugmang putli ni Kristo nga naggikan sa Manluluwas ngadto sa tinuod Niyang mga sumusunod sa ilang pagserbisyo sa Iyang gingharian.

Sa Moroni kapitulo 7, mitudlo si Mormon kanato:

“Busa, akong hinigugma nga mga kaigsoonan, kon kamo walay gugma nga putli, kamo walay kapuslanan, kay ang gugma nga putli dili mopakyas. Busa, unong ngadto sa gugma nga putli, nga mao ang labing mahinungdanon sa tanan, kay ang tanan nga mga butang gayud mapakyas—

“Apan ang gugma nga putli mao ang tiunay nga gugma ni Kristo, ug kini molahutay sa kahangturan.”²

Minahal kong mga igsoon, akong pag-ampo nga matag usa kanato molihok uban sa pagtuo kang Jesukristo, moduol Kaniya, maghinulsol sa atong mga sala, ug moserbisyo sa kinasingkasing. Nasayud ko nga kon kita mobuhat niini, kita mamahimong tinuod Niyang mga sumusunod. Ug kon kita “mag-ampo sa Amahan nga kinasingkasing, [kita] mapuno sa [Iyang] gugma,”³ Nasayud kong mohugot ang atong pagtuo, paglaum, ug mas dakong gugma—gani sa gugmang putli ni Kristo—sa atong kinabuhi. Sa pangalan ni Jesukristo, amen.