Ikaw Si Joseph
Usa ka Gabii uban ni Elder Kim B. Clark
Tibuok Kalibutan nga Debosyonal alang sa mga Young Adult • Mayo 7, 2017 • Salt Lake Tabernacle
Akong mga kaigsoonan, nagpasalamat ko nga gikauban kamo karon. Mibati ako og dakong gugma alang ninyo. Matag higayon nga makauban nako ang mga young adult niini nga simbahan, mobati ko og gugma ug kalipay!
Dapiton ko kamo nga makig-uban nako karon sa unsay akong gilauman nga usa ka panaw sa pagdiskubre, pagtuo, ug inspirasyon. Dad-on ko kamo og balik ngadto sa unang mga adlaw sa Pagpahiuli, diha nga si Joseph Smith usa ka young adult. Dapiton ko kamo nga mokuyog sa usa ka panaw nga nahimo na nako sa akong kaugalingon. Gigahin nako ang labing dakong bahin sa akong kinabuhi sa pagtuon ug pagtudlo bahin sa mga lider ug mga organisasyon nga ilang gipangulohan. Napanalanginan ko nga makaila og daghang talagsaong mga lider ug makatrabaho ang labing maayong mga organisasyon nga namugna sa mga tawo sa tibuok kalibutan. Apan kini nga panaw balik sa unang mga kasinatian ni Joseph sa Pagpahiuli milig-on sa akong konbiksyon nga kamo ug ako kabahin sa labing talagsaong organisasyon sa kalibutan, ang tinuod ug buhi nga Simbahan sa Ginoo.
Dad-on ko kamo og balik ngadto sa panahon sa kinabuhi ni Joseph dihang nag-atubang siya og pagduha-duha, ug kalisud. Panahon kadto dihang nagkat-on siya kon kinsa siya, ug kinsa ang Ginoo, ug sa unsang paagi ang Ginoo molihok pinaagi niya.
Moabut ang panahon nga si Joseph nahimong talagsaong propeta sa Pagpahiuli, dihang gibadlong niya ang armadong mga guwardiya sa Bilanggoan sa Richmond uban sa grabing gahum nga nangurog ang mga guwardiya, dihang iyang giestablisar ang Simbahan, mihimo og dagkong milagro, misangyaw sa ebanghelyo uban sa talagsaong panabut, mihimo og mga dakbayan ug mga templo, ug mipahimutang sa pundasyon alang sa pagpundok sa Israel ug sa buhat sa kaluwasan sa matag kilid sa tabil. Apan gusto kong dad-on kamo sa panahon nga wala pa kana, sa dihang wala pa mamahimo si Joseph kon si kinsa siya. Gusto kong mobalik niadtong mga adlawa tungod kay kadtong panahona mao ang kang Joseph sama nga karon mao ang inyong panahon. Nagtuo ko nga dunay importanting mga leksyon nga angay ninyong kat-unan mahitungod ni Jesukristo ug sa Iyang doktrina ug sa Iyang propeta, si Joseph Smith, sa panahon nga si Joseph usa pa ka young adult. Nasayud ko nga samtang maminaw kamo karong gabhiuna uban sa Espiritu sa Ginoo, ang inyong gugma alang sa Ginoo ug inyong pagtuo Kaniya ug sa Langitnong Amahan modako ug ang inyong pagsaksi sa Pagpahiuli ug ni Propeta Joseph Smith mas malig-on.
Ang Istorya
Akong sugdan sa istorya sa bulawang mga palid. Si Joseph Smith, sa edad nga 21, nakadawat sa mga palid gikan ni anghel Moroni niadtong Septyembre 1827, uban sa duha ka mga bato nga anaa sa bayanan nga plata, nga gitawag sa mga Nephite og mga tighubad, o ang Urim ug Thummim.1 Wala madugay niana nga tinglarag, si Joseph ug ang iyang asawa, si Emma, mibalhin ngadto sa Harmony, Pennsylvania, lungsod nga natawhan ni Emma, tungod sa grabeng pagpanggukod sa Palmyra.2
Sa Harmony, gikopya ni Joseph ang mga titik gikan sa mga palid ug gitun-an kini. Gihangyo niya ang iyang higalang si Martin Harris nga mangita og tawo nga mohubad sa mga palid, apan wala kakita si Martin.3
Pagka-Pebrero 1828 klaro na kang Joseph nga kinahanglang siya mismo ang mohubad sa rekord uban sa tabang sa mga tighubad.4 Paglabay sa panahon, nakat-on si Joseph sa paghubad sa rekord “pinaagi sa gasa ug gahum sa Dios.”5
Si Emma, kinsa mabdos sa ilang unang anak, maoy unang tigsulat ni Joseph. Siya ug si Joseph mitrabaho sa rekord hangtud Abril 1828, sa dihang miabut si Martin Harris sa Harmony aron maoy mosulat alang ni Joseph.
Pagka-Hunyo, nahuman ni Joseph og hubad ang unang bahin sa rekord, nga naglakip sa unsay iyang gitawag nga basahon ni Lehi. Gusto gyud kaayo ni Martin Harris nga dalhon ang manuskrito ngadto sa New York aron ipakita sa iyang asawa ug pamilya. Kaduha si Joseph nangayo sa pagtugot sa Ginoo, apan gibalibaran siya sa matag higayon. Si Martin namugos, ug si Joseph mihangyo sa Ginoo sa ikatulong higayon. Niining higayuna ang Ginoo mitugot uban sa kondisyon nga mosaad si Martin Harris nga ipakita lamang ang manuskrito ngadto sa iyang asawa ug sa pipila ka tawo. Nalipay, si Martin mibiya dayon sa Palmyra uban ang manuskrito.
Si Joseph, hinoon, nabalaka. Niining panahuna gibisita si Joseph ni Moroni ug gipanton tungod sa iyang pabalik-balik nga hangyo nga tugutan si Martin nga dad-on ang manuskrito. Kinahanglang iuli ni Joseph ang mga tighubad ug mga palid ngadto kang Moroni.6
Kon dili pa kana igo nga kabalaka, si Emma nanganak og batang lalaki, apan ang bata wala mabuhi. Si Emma mismo hapit mamatay, ug si Joseph migahin og duha ka semana nga kanunay nga naa sa iyang kiliran. Sa dihang naarang-arang na ang iyang gibati, giawhag ni Emma si Joseph sa pagsuta kon unsa ang nahitabo kang Martin ug sa manuskrito.
Sa adlaw sa pag-abut ni Joseph balik sa Palmyra, gikompirma ni Martin Harris ang labing gikahadlokan ni Joseph—nawala ang manuskrito. Gihulagway sa inahan ni Joseph ang talan-awon:
“Si Joseph … kalit nga mibarug gikan sa lamesa, nagsyagit, ‘Martin nawala ba nimo ang manuskrito? …’
“‘Oo, nawala kini,’ mitubag si Martin, ‘ug wala ko kahibalo kon asa.’
“‘O … !’ miingon si Joseph, nagkumot sa iyang mga kamot. ‘Wala na ang tanan! Wala na ang tanan! Unsay akong buhaton? Nakasala ko. … Natagbaw na unta ko sa unang tubag nga akong nadawat gikan sa Ginoo. …’ Naghilak siya ug nag-agulo, ug naglakaw nga pabalik-balik. …
“‘… Unsa nga kasuko nga ako dili takus gikan sa anghel sa Labing Halangdon?’
“… “… Unsay akong masulti aron sa paghupay kaniya, sa dihang nakita niya ang tibuok pamilya nga sama kaniya og sitwasyon sa hunahuna; kay ang mga pagbakho ug pag-agulo, ug ang labing pait nga pagbangutan mipuno sa balay. … Ug mipadayon siya, naglakaw pabalik-balik, padayon nga naghilak ug nagsubo, hangtud sa pagsalop sa adlaw, sa dihang, tungod sa pag-awhag, mikaon siya og gamay.
“Pagkasunod buntag [siya] mipauli. Nagbulag kami nga magul-anon, kay daw ang tanan nga malipayon namong gipaabut … sa usa ka higayon nahanaw, ug nahanaw sa hangtud.”7
Ang upat ka adlaw nga biyahe pauli sa Harmony lisud siguro kaayo alang ni Joseph. Nabalaka siya kang Emma, ug nasubo pa gihapon siya sa pagkamatay sa ilang unang anak. Nawala niya ang manuskrito ug wala na usab ang mga palid o mga tighubad. Taas kadto nga biyahe pauli.
Nakahukom si Joseph nga modangup sa Ginoo.8 Gihulagway niya unsay nahitabo human sa iyang pagbalik sa Harmony niini nga mga pulong:
“Wala madugay sa akong pag-abut, misugod ko sa pagpaubos sa akong kaugalingon diha sa pag-ampo atubangan sa Ginoo, ug … Akong gibubu ang akong kalag sa pagpangamuyo sa Dios,… nga kon mahimo makaangkon ko og kalooy sa iyang mga kamot ug mapasaylo sa tanan nakong nabuhat nga supak sa iyang kabubut-on.”9
“Naglakaw ko og dili kaayo layo, sa diha nga … ang mao gihapong mensahero mipakita ug mihatag nako pag-usab sa Urim ug Thummim [ang mga tighubad]. … Nagpakisayud ko sa Ginoo pinaagi niini ug nakadawat sa mosunod nga pagpadayag.”10
Ang pinadayag nga nadawat ni Joseph girekord diha sa Doktrina ug mga Pakigsaad seksyon 3. Usa kini ka hait nga pagbadlong ug usa ka tawag sa dugang nga paghinulsol nga dunay saad. Una ang pagbadlong:
“Ug tan-awa, unsa ka kasagaran ikaw milapas sa mga sugo ug sa mga balaod sa Dios, ug nadala diha sa mga pagdani sa mga tawo.
“Kay, tan-awa, ikaw wala unta mahadlok sa tawo labaw pa kay sa Dios. Bisan pa og ang mga tawo mipahimutang sa mga tambag sa Dios sa walay kapuslanan, ug mitamay sa iyang mga pulong—
“Apan ikaw unta nagmatinud-anon; ug siya unta mitunol sa iyang bukton ug mitabang kanimo batok sa tanan nga nagdilaab nga mga pana sa kaaway; ug siya unta nag-uban kanimo sa matag panahon sa kasamok.”11
Nadasig si Joseph sa mga pagdani ug kahadlok sa tawo sa dihang gibalik-balik niya og hangyo ang Ginoo sa pagtugot nga ihatag ang manuskrito kang Martin Harris. Misugod na sa paghinulsol si Joseph, apan ang Ginoo mitudlo niya nga duna pay dugang nga buhaton:
“Tan-awa, ikaw si Joseph, ug ikaw napili sa pagbuhat sa buluhaton sa Ginoo, apang tungod sa kalapasan, kon ikaw wala masayud ikaw mapukan.
“Apan hinumdumi, ang Ginoo maloloy-on; busa, paghinulsol niana nga imong nabuhat nga supak ngadto sa sugo diin Ako mihatag kanimo, ug ikaw sa gihapon pinili, ug ikaw gitawag pag-usab ngadto sa buhat.”12
Gibawi ni Moroni gikan kang Joseph ang mga tighubad ug mga palid apan gisaaran siya, “Kon magmapainubsanon ka pag-ayo ug mahinulsulon, tingali madawat nimo kini pag-usab.”13 Mipadayon sa paghinulsol si Joseph ug sa wala madugay nadawat ang mga palid ug mga tighubad gikan ni Moroni.14
Wala madugay, nabalaka sa kahinay sa paghubad panahon sa tingtugnaw sa 1829, mihangyo si Joseph sa Ginoo sa pagpadala kaniya og usa ka tigsulat.15 Pagka-Abril, ang Ginoo mipadala kang Oliver Cowdery sa Harmony aron moalagad isip tigsulat ni Joseph human sa milagrosong pagkakabig ni Oliver.16
Sa pag-abut ni Oliver, ang proseso sa paghubad mipaspas og maayo.
Ang paghubad sa Basahon ni Mormon puno sa mga milagro ug mga panalangin alang ni Joseph.
Hinoon, ang pangutana kon unsay buhaton mahitungod sa basahon ni Lehi nakahasol gayud kaniya. Kon wala ang rekord ni Lehi, wala usab ang istorya sa pamilya ni Lehi, ang panaw padulong sa yutang saad, o ang gigikanan sa mga Nephite ug Lamanite.
Pagka-Mayo 1829 ang Ginoo mipadayag kang Joseph og usa ka plano, gihimo sulod sa gatusan ka mga tuig, aron mapulihan ang basahon ni Lehi sa unsay atong nailhan karon nga gagmay nga mga palid ni Nephi. Kini nga mga palid naglakip og summary sa basahon ni Lehi ug sa mga panagna ug mga pagtulun-an ni Nephi ug sa ubang mga propeta. Kini nga mga sinulat, nalakip diha sa Basahon ni Mormon gikan sa 1 Nephi ngadto sa mga Pulong ni Mormon, gidasig sa Ginoo, gipreserbar sulod sa gatusan ka mga tuig, ug gidugang ni Mormon ngadto sa rekord ubos sa mando sa Ginoo.17
Wala giusab og hubad ni Joseph ug Oliver ang basahon ni Lehi. Ang Ginoo mipasidaan kang Joseph nga giusab sa dautang mga tawo ang orihinal nga manuskrito ug naghulat lang kini aron sa pagbabag sa buhat sa Ginoo. Gihubad ni Joseph ang gagmay nga mga palid ni Nephi ug gibutang ang hinubad sa sinugdanan sa Basahon ni Mormon.
Ang paghubad sa Basahon ni Mormon nakahatag og talagsaon nga mga kasinatian. Napahiuli ang priesthood, ug si Joseph ug Oliver gibunyagan ug nakadawat sa gasa sa Espiritu Santo.18 Onse ka mga saksi nakakita sa mga palid ug mipamatuod sa katinuod niini.
Ang Basahon ni Mormon, uban sa pagpamatuod sa mga saksi, gimantala niadtong 1830. Si Martin Harris, kinsa usa sa mga saksi, miprenda sa iyang umahan aron mabayaran ang pag-imprinta.
Duna ko dinhi duha ka bililhong butang gikan sa koleksyon sa kasaysayan sa Simbahan nga gusto nakong ipakita ninyo. Ang una mao ang usa ka pahina sa orihinal nga manuskrito sa Basahon ni Mormon. Kini nga pahina naglakip sa Iningles nga hubad sa 1 Nephi 3:7:
“Ako moadto ug mobuhat sa mga butang nga ang Ginoo nagsugo, kay ako nasayud nga ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila.”
Ang ikaduhang bililhong butang mao ang unang edisyon nga kopya sa Basahon ni Mormon.
Ang nadawat ni Joseph pinaagi sa pagpadayag giimprinta sa Palmyra ug ania dinhi sa Basahon ni Mormon. Ang istorya nga akong gisulti kaninyo kabahin ni Joseph isip young adult pa, kabahin ni Emma, Martin Harris, Oliver Cowdery, Moroni, ug sa Basahon ni Mormon, tinuod.
Unsay Gipasabut Niini nga Istorya Kaninyo
Dapiton ko kamo, mga kaigsoonan, sa pagtan-aw sa inyong kaugalingong kasinatian sa konteksto niini nga istorya. Ang Ginoo nag-andam kaninyo ug nagtudlo kaninyo, sama sa Iyang gibuhat ni Joseph sa dihang young adult pa siya. Adunay importanting mga leksyon alang ninyo diha sa kasinatian ni Joseph. Karong gabhiuna gusto kong mo-focus sa tulo: pagtuo ug pagsalig kang Jesukristo, paghinulsol, ug ang espirituhanong gahum sa Basahon ni Mormon.
Leksyon 1: Pagtuo ug Pagsalig kang Jesukristo
Sugdan nako sa leksyon 1: Pagtuo ug pagsalig kang Jesukristo.
Gusto kong hunahunaon ninyo kadiyot ang sitwasyon ni Joseph sa dihang mihangyo si Martin Harris kang Joseph sa paghimo sa ikatulong paghangyo sa Ginoo. Ang Ginoo kaduha na mibalibad. Ang ikatulong hangyo ni Martin nakamugna og problema kang Joseph. Usa kadto ka pagsulay sa iyang pagtuo.
Hunahunaa kini. Sa usa ka bahin, si Joseph adunay pagtuo kang Jesukristo ug sa Langitnong Amahan ug napanalanginan og daghang talagsaon nga espirituhanong kasinatian. Nakakita ug nakigsulti siya sa Amahan ug sa Anak. Duna siyay pakig-istorya kang Moroni ug sa ubang mga propeta. Bag-o lang siyang nakasinati sa milagrusong paghubad sa Basahon ni Lehi gamit ang mga tighubad ug ang iyang bato sa manalagna.19
Sa laing bahin, si Joseph 22 anyos ang panuigon ug nabalaka. Duna siyay talagsaong asawa, kinsa mabdos sa ilang unang anak. Wala siyay kwarta, walay edukasyon, ug walay paagi sa pagsangkap sa iyang pamilya. Gilibutan siya sa mga maduhaduhaon ug mga tiggukod ug diyutay ra og mga higala. Walay consultant nga mahimong tawagan, walay board of director, ug walay mga banker nga makahatag kaniya og kwarta ug tambag. Nasayud siya nga kinahanglang mamantala ang rekord, apan wala siyay ideya kon unsaon pagbayad ang pag-imprinta kon biyaan siya ni Martin Harris. Daghang dili sigurado sa iyang kinabuhi.
Bisan pa sa kaabunda sa iyang espirituhanong mga kasinatian, si Joseph “[na]hadlok sa tawo labaw pa kay sa Dios”20 ug mihangyo sa ikatulong higayon, sa ingon nahiagum sa kasuko sa Ginoo ug nasugdan ang mga panghitabo nga miresulta sa pagkawala sa manuskrito. Apan ang Ginoo maloloy-on kang Joseph. Gitabangan Niya si Joseph sa paghinulsol pinaagi sa paggamit sa pagtuo nga diha na kang Joseph, ug giandam Niya ang paagi nga masulbad ang pagkawala sa manuskrito.
Sa daghang mga paagi ang inyong sitwasyon susama kang Joseph. Mga young adult kamo nga dunay mga kabalaka ug mga pagduhaduha mahitungod sa kaminyoon ug pamilya, mahitungod sa edukasyon ug trabaho, ug mahitungod sa pagpangita sa inyong dapit sa kalibutan ug sa gingharian sa Ginoo. Tingali duna pay ubang mga hagit ug mga problema sa inyong kinabuhi.
Sama ni Joseph, aduna kamoy espirituhanong mga kapanguhaan ug kasinatian. Inyong nabati ang Espiritu sa Ginoo diha sa pag-ampo, sa mga kasulatan, sa pagserbisyo sa ubang mga tawo. Inyong nasinati ang gugma, grasya, ug gahum ni Ginoong Jesukristo diha sa paghinulsol, sa sakrament, ug sa balaan nga templo.
Kon mag-atubang kamo og mga pagsulay, nga siguradong moabut, ayaw tuguti ang mga kahadlok nga moimpluwensya kaninyo o mosalig sa mga pag-agni sa tawo. Hinoon, dapiton ko kamo sa pagbuhat sa mga butang nga ang Ginoo mitabang kang Joseph sa pagbuhat. Mosaad ako ninyo nga makahatag kini og espirituhanong gahum sa inyong kinabuhi.
Una, gamita ang espirituhanong mga kasinatian ug kapanguhaan nga aduna na kamo aron makakita og dugang nga pagtuo ug pagsalig kang Jesukristo. Salig sa espirituhanong mga panalangin nga inyong nabati ug nasinati alang sa kalig-on sa pagpadayon sa unahan uban sa hugot nga pagtuo sa Manluluwas. Siya ang labing importanting panalangin sa tanan. Ang Iyang gugma dili gayud mapakyas. Magauban Siya kaninyo sa matag panahon sa kasamok.
Ikaduha, tan-aw sa umaabut gamit ang mata sa pagtuo aron makakita sa Manluluwas nga naglihok sa inyong kinabuhi. Hinumdumi kon giunsa sa Ginoo pag-andam si Oliver Cowdery aron mahimong tigsulat ni Joseph ug pagtabang ni Joseph nga mabuntog ang pagkawala sa 116 ka mga pahina gamit ang gagmay nga mga palid ni Nephi.21 Ang Ginoo naglihok diha sa kinabuhi ni Joseph, ug siya naglihok usab diha sa inyong kinabuhi. Duna kamoy mahangturong pagkatawo ug katuyoan ug balaang padulngan. Ang Ginoo naglihok diha sa inyong kinabuhi karon. Anaa Siya sa inyong atubangan, naningkamot sa pag-abli og mga pultahan, nag-andam sa ubang tawo aron motabang kaninyo, ug nag-andam sa agianan alang kaninyo.
Leksyon 2: Paghinulsol
Mamulong ako karon bahin sa leksyon 2: Paghinulsol.
Balikan nato ang higayon sa dihang nasayran ni Joseph nga nawala ang manuskrito. Nasayud si Joseph nga nakasala siya batok sa Ginoo ug nakalapas sa Iyang mga sugo. Nadaug siya sa kahasol sa tanlag ug kasubo. Apan midangup si Joseph sa Ginoo ug nakakaplag sa milagro sa pagpasaylo ug sa kalipay sa katubsanan.
Gipasunod sa Ginoo kang Joseph ang taas kaayo nga sumbanan, nga walay pasumangil. Gitratar Niya nga halangdong propeta si Joseph sama sa gusto Niya nga mamahimo si Joseph. Mas nahadlok si Joseph sa tawo kay sa Dios. Misalig siya sa iyang kaugalingong pagsabut ug wala sa Dios. Alang kang Joseph, ang paghinulsol sobra pa kay sa yanong pagsulti og, “Nakahimo ko og sayop. Sorry kay nawala nako ang manuskrito.” Kinahanglang mabuntog ni Joseph ang mga pamatasan, kahadlok, ug mga gawi sa iyang kinabuhi nga maoy hinungdan sa iyang mga sala. Ug kinahanglan niyang motubo ug magkat-on ug mag-usab sa tibuok niyang kinabuhi.
Nagkinahanglan si Joseph og kausaban sa kasingkasing nga posible lamang pinaagi sa kalooy, gugma, ug gahum ni Jesukristo. Mao gayud kana ang nadawat ni Joseph. Ang Ginoo nasayud sa potensyal sa halangdong kinaiya ni Joseph. Dihang miingon Siya kang Joseph, “Ikaw si Joseph. … Paghinulsol … , ug ikaw sa gihapon pinili,”22 inyong madungog niadto nga mga pulong ang Manluluwas nga nagtabang ni Joseph uban sa Iyang gugma ug kalooy, nangandoy nga mag-usab si Joseph.
Madungog usab ninyo ang Ginoo nga nagtudlo ni Joseph kon kinsa gayud siya. Tingali nagdako siya nga pobre, walay grado nga batang mag-uuma, apan dili kana ang iyang tinuod nga pagkatawo. Siya mao si Joseph ang Propeta, pinili nga manalagna diin pinaagi kaniya ipahiuli ni Jesukristo ang kahingpitan sa Iyang ebanghelyo dinhi sa yuta.
Dihang gitawag sa Ginoo si Joseph aron maghinulsol, usa kini ka tawag kang Joseph sa paghimo sa mga kausaban nga gikinahanglan aron mobarug ug mahimong iyang tinuod nga pagkatawo pinaagi sa gahum sa Pag-ula ni Jesukristo. Giantus na sa Manluluwas ang tanan nga gisinati ni Joseph, nga tinuod gayud ug lisud kaayo. Gitanyag ni Jesukristo kang Joseph ang dalan sa kapasayloan ug katubsanan. Sulod sa daghang mga adlaw ug mga semana ug mga bulan, gitinguha ni Joseph ang pagpasaylo sa Ginoo ug ang Iyang matubsanong gahum, ug nakadawat siya niini.
Mga kaigsoonan, ang Ginoo mihatag usab og taas kaayo nga mga sumbanan alang kaninyo, nga walay pasumangil. Gitratar kamo Niya sama sa maisugon, maloloy-ong disipulo nga gusto Niya nga kamo mamahimo. Apan nahigugma usab Siya kaninyo, sama sa Iyang paghigugma kang Joseph. Masayop kita matag karon ug unya, ug ang matag usa kanato nagkinahanglan sa mga panalangin sa paghinulsol.
Sama sa inyong makita sa kasinatian ni Joseph, ang paghinulsol sobra pa kay sa pagsulti lang sa Ginoo ug sa inyong bishop nga duna kamoy nabuhat nga sayop. Ang pagpakasala mao ang pagpalayo gikan sa Ginoo. Ang paghinulsol mao ang pagbalik ngadto Kaniya. Ang paghinulsol nagkinahanglan og kausaban sa kasingkasing ug hunahuna, kausaban sa kinabuhi nga gipahaum sa inyong sitwasyon.
Dugang pa, ang paghinulsol kanunay nga mopanalangin kaninyo. Kini ang paagi nga ang Ginoo motabang kanato nga mobuhat og mas maayo ug mahimong mas maayo sa tibuok natong kinabuhi. Kini ang paagi nga mobarug kamo ug mahimo nga inyong mahangturong pagkatawo isip mga anak sa Dios ug tinuod nga mga sumusunod ni Jesukristo.
Ang mga saad tinuod, mga kaigsoonan. Dangup ngadto sa Ginoong Jesukristo, paghinulsol sa inyong mga sala, ug sunda ang Iyang mga sugo. Aduna Siyay walay kinutubang kalooy,23 ug sama sa gitudlo ni Joseph wala madugay, “Ang atong langitnong Amahan labaw pa nga … walay kinutuban sa iyang kalooy ug panalangin, kay sa atong kaandam nga motuo o modawat.”24 Si Jesukristo mipili nga mag-antus alang sa inyong mga sala ug sa tanan ninyong kasakit ug kasub-anan aron Siya makapasaylo, makaayo, makausab, makalig-on, ug makapanalangin kaninyo og kalipay. Siya sa tinuod ang atong Manluluwas ug Manunubos.
Leksyon 3: Ang Espirituhanong Gahum sa Basahon ni Mormon
Maghisgut na ko karon sa leksyon 3: Ang espirituhanong gahum sa Basahon ni Mormon.
Sa dihang si Joseph gipasaylo sa iyang mga sala, nalipay siyang modawat pag-usab sa mga palid ug mga tighubad.25 Ang iyang kasinatian sa nawala nga manuskrito mipatuhop sa iyang kalag sa kaimportante sa Basahon ni Mormon sa buhat sa Ginoo. Ang sentrong mensahe sa mga propeta sa Basahon ni Mormon mao ang ilang pagsaksi ni Jesukristo ug sa Iyang doktrina. Adunay espirituhanong gahum niana nga basahon.
Makita nato kana nga gahum sa kasinatian ni Joseph sa paghubad. Ang paghubad niini dili mekanikal. Espirituhanon kini nga kasinatian, ug nagtudlo kini ni Joseph sa mga kahimoan sa Ginoo ug sa Espiritu Santo. Ang Basahon ni Mormon usa ka kasinatian sa pagpadayag alang ni Joseph gikan sa sinugdanan hangtud sa katapusan. Ang Basahon ni Mormon mitudlo ni Joseph sa doktrina ni Jesukristo, ug gisugo siya sa Ginoo sa pagsunod niini—nga molihok uban sa pagtuo diha kang Jesukristo, maghinulsol, magpabunyag, ug modawat sa Espiritu Santo.26
Ang Ginoo mipanalangin ni Joseph og dugang espirituhanong gahum niini nga mga kasinatian. Human siya mabunyagi, pananglitan, miingon siya nga siya “napuno sa Espiritu Santo,” ug “ang tinuod nga kahulugan ug katuyoan [sa mga kasulatan]” “gipadayag [sa iyang panabut].”27
Gigamit sa Ginoo ang pagtungha sa Basahon ni Mormon aron sa pagbayaw ni Joseph ug aron mas mapaduol si Joseph Kaniya. Ang Ginoo mitudlo ni Joseph ug milig-on kaniya sa pagpatungha niana nga basahon pinaagi sa gahum sa Espiritu Santo.
Ang Basahon ni Mormon mahimo usab nga kasinatian sa pagpadayag alang kaninyo, sama kang Joseph.
Ang mga propeta nga misulat sa Basahon ni Mormon nakakita sa atong panahon. Misulat sila kanato. Ang ilang mga pulong namulong sa atong panahon, atong mga panginahanglan, ug atong mga katuyoan. Kon bukas ang inyong kasingkasing samtang magbasa ug mag-ampo kamo mahitungod sa Basahon ni Mormon, ang Espiritu Santo28 “mopakita sa kamatuoran niini nganha kaninyo.”29 Masayud kamo nga ang Ginoong si Jesukristo mao ang inyong Manluluwas ug Manunubos ug nga si Joseph Smith mao ang Propeta sa Pagpahiuli.
Kon dili pa kamo miyembro sa Simbahan o namiyembro na sa dugay o mubong panahon, dapiton ko kamo sa paghimo sa gibuhat ni Joseph—mobasa sa Basahon ni Mormon, mag-ampo mahitungod niini, ug molihok uban sa pagtuo kang Jesukristo aron maghinulsol, magpabunyag, ug modawat sa Espiritu Santo. Unya padayon sa pagdawat ug pagsunod sa tanang mga ordinansa ug mga pakigsaad sa kaluwasan, lakip ang ordinansa sa pag-seal diha sa templo.
Nasayud ko sa gahum sa Basahon ni Mormon gikan sa daghan kaayong personal nga mga kasinatian. Gusto nakong ipaambit ang usa niini kaninyo karong gabhiuna nga nahitabo sa dihang young adult pa ko. Duha na ko ka bulan sa akong misyon sa Germany. Lisud kadto nga duha ka bulan, ug nawad-an ko sa kadasig. Usa ka buntag nag-ampo ko ug gisultihan ang Langitnong Amahan sa akong mga problema. Miingon ko Kaniya, “Langitnong Amahan, palihug tabangi ko.” Samtang nag-ampo ko, nakadungog ko og klarong tingog nga daw dunay tawo nga nagbarug tupad kanako. Ang tingog miingon: “Tuo sa Dios.”
Milingkod ko sa higdaanan, ug mipakli sa Basahon ni Mormon ngadto sa Mosiah, kapitulo 4, bersikulo 9 ug 10, ug mibasa sa mga pulong ni Haring Benjamin:
“Tuo sa Dios; tuo nga siya mao, ug nga siya ang milalang sa tanan nga mga butang, lakip sa langit ug sa yuta; tuo nga siya aduna sa tanan nga kaalam, ug sa tanan nga gahum, sa langit ug sa yuta; …
“… Tuo nga kamo kinahanglan gayud maghinulsol sa inyong mga sala ug mobiya kanila, ug magpaubos sa inyong mga kaugalingon sa atubangan sa Dios; … ug karon, kon kamo motuo sa tanan niini nga mga butang tan-awa nga kamo mobuhat kanila.”30
Samtang nagbasa ko niadto nga mga pulong daw gibati nako nga si Haring Benjamin namulong kanako. Gibati nako ang gahum sa Espiritu Santo diha sa akong kasingkasing. Nasayud ko nga kini ang tubag sa akong pag-ampo. Kinahanglan kong mosalig sa Ginoo, maghinulsol, ug motrabaho. Sugod niadtong adlawa hangtud karon, ang Basahon ni Mormon nahimong tinubdan sa espirituhanong gahum diha sa akong kinabuhi.
Mga kaigsoonan, nasayud ko nga ang Basahon ni Mormon mogiya kaninyo ngadto kang Jesukristo ug sa Iyang doktrina. Basaha ang Basahon ni Mormon, tun-i kini, pag-ampo bahin niini, mahala kini sa inyong mga hunahuna ug kasingkasing matag adlaw, sama nga gitambag ni Presidente Monson kanato nga buhaton. Sa matag higayon sa inyong kinabuhi, ang atong Ginoo ug Manluluwas mamulong og kalinaw sa inyong kalag, mobayaw kaninyo ug molig-on kaninyo, ug mas mopaduol kaninyo ngadto Kaniya, niana nga basahon, pinaagi sa gahum sa Espiritu Santo.
Pagpamatuod
Kining tulo ka mga leksyon gikan sa katuigan nga si Joseph young adult pa mopamatuod sa gahum ni Jesukristo ug sa Iyang doktrina. Mosaksi ko nga si Jesus mao ang Kristo, ang Anak sa buhi nga Dios. Adunay Manunubos. Siya buhi!
Manghinaut ug mag-ampo ko nga makakat-on kamo gikan sa kinabuhi ni Joseph. Bisan og nanlimbasug siya sa iyang pagka-young adult, misalig siya sa Ginoo, ug ang Ginoo mipanalangin kaniya nga mahimong mahinungdanong propeta sa Pagpahiuli. Gihimo ni Joseph ang balaang buhat sa Dios. Ang Pagpahiuli tinuod! Hinumdumi kini: Si Jesus mao ang Kristo, ug si Joseph Iyang propeta. Walay putol ang kutay sa mga yawe, awtoridad, ug gahum sa priesthood nga nagsumpay ni Joseph Smith ngadto ni Thomas S. Monson. Si Presidente Monson mao ang propeta sa Ginoo sa kalibutan karon. Kining tanan tinuod.
Ug busa, minahal nga kaigsoonan sa tibuok yuta, moingon ko ninyo karong gabhiuna, salig ni Ginoong Jesukristo. Nakaila Siya sa ngalan ni Joseph; naka-ila Siya sa inyong ngalan. Nagmahal Siya ninyo ug naglihok Siya diha sa inyong kinabuhi. Pinaagi sa Iyang kalooy, grasya, ug gugma, makabarug kamo ug, sama ni Propeta Joseph, makabuntog sa matag pagsulay ug mamahimo kon unsa kamo tuyo nga mamahimo: maisugon, matinud-anong mga Santos sa Ulahing mga Adlaw, mga lider sa inyong mahangturong mga pamilya ug sa Iyang tinuod ug buhi nga Simbahan, tinuod nga mga disipulo ni Jesukristo, puno sa Iyang kahayag ug sa Iyang gugma, andam nga modawat sa Manluluwas sa Iyang pagbalik. Sa ingon ako mopamatuod, sa pangalan ni Jesukristo, amen.
© 2017 sa Intellectual Reserve, Inc. Tanang katungod gigahin. Pagtugot sa Iningles: 3/17. Pagtugot sa paghubad: 3/17. Hubad sa “Thou Art Joseph.” Cebuano. PD60003848 853