5:54

Veivutuni kei na Loloma

Sue L. Clark

Dua na Bogi vata kei Elder Kim B. Clark

Lotu e Vuravura Raraba ni Tabagone Qasecake • 7 ni Me, 2017 • Valelaca e Salt Lake

Keirau marau vakalevu kei Elder Clark ni keirau rawa ni mai tiko vata kei kemuni ena lotu ni vuravura raraba.

Au via wasea vei kemuni eso na vakasama eso e voleka e utoqu kau nuitaka ni na rawa ni vukei kemuni.

Taumada, au via vakaraitaka vei kemuni na loloma: au sa yacova mai qo e dua na gauna niu dau kawaitaki ira vakalevu na tabagone qasecake ni Lotu. Kemuni sa yacova tu mai dua na vakatagedegede ni nomuni bula mo ni cakava kina eso na vakatulewa bibi—tosoi na nomuni vuli, vaqara cakacaka, kaulotu,veigadivi,vakamau, kei na tauyavu ni matavuvale. Au vakila ka vakadinadinataka na kaukauwa levu e tiko vei kemuni e vinaka ka maroroi tiko na veiyalayalati tabu ena nomu vakasaqara tiko na nona inaki na Turaga ena nomu vakatulewa. O ni sa totoka sara! Ka lomani kemuni na Turaga. Au kila o ya.

Au via wasea vei kemuni na noqu ivakadinadina kei na so na vosa ni veivakayaloqaqataki. Au gadreva mo ni kila niu kila ni Kalou e Tamada bula mai Lomalagi. Au kila ni o Koya e solia vei keda na yavu ni veivakabulai kei na isolisoli totoka ni Luvena, o Jisu Karisito, na noda iVakabula ka Dauveivueti. Au kila ni Parofita o Josefa Simici na parofita ena otioti ni tabagauna ni veigauna. Au kila ni O Karisito ena lesu mai, ka sa gadrevi meda vakavakarau kina nona lesu mai.

Meda vakavakarautaki keda vakacava ena gauna lavaki oqo? E rawa ni da vakadrukai! E se levu na ka meda vakayacora! Au via solia vei keda eso na veivakayaloqaqataki kei na nuinui ena rua na ivakavuvuli ka na rawa ni vukei keda meda vakavakarau: kina veivutuni kei na loloma.

E vakatavulica vei keda o Peresitedi Monson ena koniferedi raraba ena vula o Okotova sa oti: “Na tikina bibi ena nona ituvatuva na noda iVakabula, o Jisu Karisito. Kevaka e sega na Nona veisorovaki, ena yali na veika kece. E sega ni rauta, na noda vakabauti Koya walega kei na Nona ilesilesi. Eda gadreva meda cakacaka ka vuli, vakasaqaqara ka masu, veivutuni ka vakavinakataka.”¹

Sa dodonu meda veivutuni. A sa bau veivakalougatataki voli! Ena kaukauwa kei na Veisorovaki i Jisu Karisito, ena rawa kina ni da vorata na malumalumu, mosi, yaluma, kei na ivalavala ca. Au vulica ni veivutuni e vuqa na gauna e baleta na noda tarovi keda ena cakava voli e dua na ka, ia e sala talega ni nomu dodonu mo tekivu cakava e dua na ka o a sega ni cakava tiko.

Dua na ka bibi me da tekivu cakava ka tiki tiko ni veivutuni sa ikoya na noda qaravi ira na tamata. Na noda qaravi ira na tani, eda na cakacaka vata kina kei na Turaga, eda na vakila kina na Nona loloma eda na qai kila kina na noda iVakabula. Au raica rawa na kaukauwa ni loloma e gole mai ena noda qaravi ira na tani ena gauna ni sakaramede ena dua na vula sa oti.

Au curu yani ena lomani valenilotu kei na dua na noqu itokani e tu vakadua me vaka-bula vua e dua na goneyalewa lailai e tiko ena nona kalasi ni Lalai. Ena gauna ni lotu na noqu itokani e tokoni me Peresitedi vou ni Soqosoqo ni Veivukei ni iteki. Na goneyalewa lailai e a vakabula kina o koya ena gauna keirau curu mai kina ki valenilotu e vuki mai ka raici mai, na nona qasenivuli o noqu itokani. E sa kila na goneyalewa lalai oqo ni sa vakarau cegu ena nona itutu vakaqasenivuli ka tekivu tagi. Na goneyalewa lailai oqo e sa tekivu me tagi ka vakusakusa yani ki muani dabedabe ka cuvara yani na tabai tinana! Au raivuki yani vei noqu itokani, na peresitedi vou ni Soqosoqo ni Veivukei ni teki, kau raica ni drodro malua na wai ni matana! Na vakadinadina ni loloma oya e sa bau kaukauwa saraga vei au. Au vakila na tonawanawa ni wai ni mataqu. Au a vakadinadinataka tiko na isolisoli ni loloma dina va-Karisito ka lako mai vua na iVakabula vei ira na vakamuri Koya ena nodra veiqaravi voli ena Nona matanitu.

Ena Moronai wase 7, e vakavulica vei keda o Momani:

“O koya oqo, oi kemudou na wekaqu lomani, kevaka sa sega vei kemudou na loloma uasivi, dou sa ka wale ga, ni sa sega ni mudu na loloma uasivi. O koya mo dou kubeta matua kina na loloma uasivi ni sa ka cecere duadua sara vei ira kecega ni na mudu mai na ka kecega—

“Ia na loloma uasivi sa i koya na loloma taucoko i Karisito ka sa ia tiko ga ka sega ni mudu.”²

Kemuni na ganequ kei na taciqu, sa noqu masu ni da na cakava na ka ena noda vakabauti Jisu Karisito ka vuki Vua, veivutunitaka na noda ivalavala ca, ka qaravi Koya ena yalodina. Au kila kevaka eda na cakava oqo, ena yaloda taucoko eda na nona tamata dina. O koya oqo “mo dou masuta ena T amada e yalomudou taucoko me vakasinaiti kemudou ena [Nona] loloma oqo,”³ au kila ni tiko vei keda na vakabauta, na inuinui kei na noda vakila na nona loloma levu—eda na vakila talega na loloma savasava nei Karisito—ena noda bula. Ena yacai Jisu Karisito, emeni.