ការប្រែចិត្ត និង សេចក្ដីសប្បុរស

ស៊ូ អិល ក្លាក

ល្ងាចមួយជាមួយនឹងអែលឌើរ ឃីម ប៊ី ក្លាក

ការប្រជុំធម្មនិដ្ឋានសម្រាប់យុវមជ្ឈិមវ័យទូទាំងពិភពលោក • ថ្ងៃទី ៧ ខែ ឧសភា ឆ្នាំ ២០១៧ • រោងឧបោសថ សលត៍ លេក

អែលឌើរ ក្លាក និង ខ្ញុំ មានចិត្តរីករាយដែលមានវត្តមានជាមួយអ្នកទាំងអស់គ្នាក្នុងការប្រជុំធម្មនិដ្ឋានទូទាំងពិភពលោកនេះ ។

ខ្ញុំចង់ចែកចាយគំនិតខ្លះៗជាមួយប្អូនៗ អំពីអ្វីដែលមានក្នុងចិត្តខ្ញុំ ហើយខ្ញុំសង្ឃឹមថា វាក៏មានប្រយោជន៍សម្រាប់ប្អូនៗដែរ ។

ដំបូង ខ្ញុំចង់បង្ហាញអំពីក្ដីស្រឡាញ់ ៖ ខ្ញុំមានអារម្មណ៍ពិសេសមួយក្នុងចិត្តចំពោះយុវមជ្ឈិមវ័យនៃសាសនាចក្រ ។ ប្អូនៗស្ថិតក្នុងដំណាក់កាលមួយនៃជីវិតដែលត្រូវធ្វើការសម្រេចចិត្តដ៏សំខាន់មានដូចជា—បន្ដការសិក្សា ស្វែងរកការងារ បម្រើបេសកកម្ម ដើរលេងជាគូ រៀបអាពាហ៍ពិពាហ៍ និង ចាប់ផ្ដើមក្រុមគ្រួសារ ។ ខ្ញុំបានទទួលអារម្មណ៍ ហើយបានឃើញអំណាចដ៏មានអានុភាពដែលប្អូនៗមានសម្រាប់កិច្ចការល្អ នៅពេលប្អូនៗចុះ ហើយរក្សាសេចក្ដីសញ្ញាពិសិដ្ឋ និងពេលប្អូនៗព្យាយាមធ្វើតាមព្រះហឫទ័យព្រះអម្ចាស់ក្នុងការសម្រេចចិត្តទាំងនេះ ។ ប្អូនៗជាមនុស្សអស្ចារ្យ ! ប្អូនៗជាទីសំណព្វរបស់ព្រះអម្ចាស់ ។ ខ្ញុំដឹងរឿងនោះ។

ខ្ញុំក៏ចង់ចែកចាយជាមួយប្អូនៗនូវទីបន្ទាល់របស់ខ្ញុំ និង ពាក្យពេចន៍លើកទឹកចិត្តខ្លះៗ ។ ខ្ញុំចង់ឲ្យប្អូនៗដឹងថាខ្ញុំដឹងថា ព្រះគឺជាព្រះវរបិតាគង់នៅស្ថានសួគ៌ដែលមានព្រះជន្មរស់ ។ ខ្ញុំដឹងថា ទ្រង់បានប្រទានឲ្យយើងនូវផែនការនៃសេចក្ដីសង្គ្រោះ និង អំណោយដ៏អស្ចារ្យនោះដែលជាព្រះបុត្រាទ្រង់គឺ ព្រះយេស៊ូវគ្រីស្ទ ជាព្រះអង្គសង្គ្រោះ និង ព្រះអង្គប្រោសលោះយើង ។ ខ្ញុំដឹងថា ព្យាការី យ៉ូសែប ស៊្មីធ គឺជាព្យាការីក្នុងគ្រាកាន់កាប់ត្រួតត្រានៃពេលពេញកំណត់នេះ ។ ខ្ញុំដឹងថាព្រះគ្រីស្ទនឹងយាងមកម្តងទៀត ហើយថាយើងត្រូវតែរៀបចំខ្លួនសម្រាប់ការយាងមកនោះ ។

តើយើងត្រៀមខ្លួនយ៉ាងដូចម្ដេច សម្រាប់ព្រឹត្តិការណ៍ដ៏មហស្ចារ្យនេះ ? យើងអាចមានអារម្មណ៍ស្មុគស្មាញ ! មានកិច្ចការជាច្រើនដែលត្រូវធ្វើ ! ខ្ញុំចង់ផ្ដល់ការលើកទឹកចិត្ត និង ក្ដីសង្ឃឹមនៅក្នុងគោលការណ៍ចំនួនពីរ ដែលនឹងជួយយើងឲ្យត្រៀមខ្លួនគឺ ៖ ការប្រែចិត្ត និង សេចក្តីសប្បុរស ។

ប្រធាន ម៉នសុន បានបង្រៀនយើងក្នុងសន្និសីទទូទៅកាលពីខែតុលាមុនថា « ផ្នែកសំខាន់នៃផែនការនេះគឺព្រះអង្គសង្គ្រោះរបស់យើង ព្រះយេស៊ូវគ្រីស្ទ ។ បើគ្មានពលិកម្មធួនរបស់ទ្រង់ទេ នោះមនុស្សទាំងអស់នឹងត្រូវវង្វេង ។ ទោះជាយ៉ាងណាក្តី វាពុំគ្រប់គ្រាន់ទេ បើគ្រាន់តែជឿទៅលើទ្រង់ និងបេសកកម្មរបស់ទ្រង់នោះ ។ យើងចាំបាច់ខិតខំ ហើយរៀន ស្រាវជ្រាវ ហើយអធិស្ឋាន ប្រែចិត្ត ហើយកែលម្អ » ។^១

យើងត្រូវតែប្រែចិត្ត ។ នោះគឺជាពរជ័យដ៏អស្ចារ្យ ! តាមរយៈដង្វាយធួន និងព្រះចេស្ដារបស់ព្រះយេស៊ូវគ្រីស្ទ យើងអាចយកឈ្នះលើរាល់ភាពទន់ខ្សោយ ការឈឺចាប់ ទុក្ខព្រួយ និង អំពើបាប ។ ខ្ញុំបានរៀនថា ទោះជាការប្រែចិត្តជាញឹកញាប់គឺជាទង្វើដែលបញ្ឈប់សកម្មភាពដែលប្អូនៗកំពុងធ្វើ វាក៏អាចជាទង្វើដែលប្អូនពុំធ្លាប់ធ្វើ ហើយត្រូវចាប់ផ្ដើមធ្វើវាផងដែរ ។

កិច្ចការដ៏សំខាន់បំផុតមួយដែលយើងត្រូវចាប់ផ្ដើមធ្វើ ដែលជាចំណែកនៃការប្រែចិត្តនោះ គឺការបម្រើដល់មនុស្សដទៃ ។ នោះជាការបម្រើដល់មនុស្សដទៃ ការធ្វើការជាមួយព្រះអម្ចាស់ និង ការមានបទពិសោធន៍នៃក្ដីស្រឡាញ់ដ៏សុទ្ធសាធរបស់ទ្រង់ ទើបយើងអាចស្គាល់ព្រះអង្គសង្គ្រោះយ៉ាងពិតប្រាកដ ។ ខ្ញុំបានឃើញអំណាចនៃក្ដីស្រឡាញ់ដែលកើតមានពេលកំពុងបម្រើដល់មនុស្សដទៃក្នុងការប្រជុំសាក្រាម៉ង់ទើបតែមួយខែកន្លងទៅ ។

ខ្ញុំបានដើរចូលក្នុងសាលាប្រជុំជាមួយមិត្តម្នាក់ មិត្តខ្ញុំបានឈប់ ហើយស្វាគមន៍ក្មេងស្រីតូចម្នាក់ក្នុងថ្នាក់បឋមសិក្សារបស់នាង ។ អំឡុងការប្រជុំ មិត្តខ្ញុំនោះត្រូវបានគាំទ្រឲ្យធ្វើជាប្រធានសមាគមសង្គ្រោះថ្មីរបស់ស្តេក ។ ក្មេងស្រីតូចដែលនាងបានស្វាគមន៍នៅផ្លូវចូលក្នុងសាលាប្រជុំនោះ បានងាកក្រោយ ហើយសម្លឹងមើលមិត្តខ្ញុំ ដែលជាគ្រូរបស់នាង ។ ក្មេងស្រីគួរឲ្យស្រឡាញ់នោះបានដឹងថា គ្រូបង្រៀនរបស់នាងនឹងត្រូវបានដោះលែង ហើយនាងបានចាប់ផ្ដើមយំ ។ នាងបានរត់ទៅចុងម្ខាងទៀតនៃកៅអីវែង ហើយបានកើយស្មាម្ដាយរបស់នាង ! ខ្ញុំបានមើលទៅមិត្តខ្ញុំ ដែលជាប្រធានសមាគមសង្គ្រោះថ្មីរបស់ស្តេក ហើយខ្ញុំបានឃើញនាងក៏ស្រក់ទឹកភ្នែកដែរ ! សក្ខីបទនៃក្ដីស្រឡាញ់នោះមានអំណាចខ្លាំងមកលើរូបខ្ញុំ ។ ទឹកភ្នែកខ្ញុំក៏បានស្រក់មកដែរ ។ ខ្ញុំបានឃើញអំណោយទាននៃក្ដីស្រឡាញ់ដ៏សុទ្ធសាធរបស់ព្រះគ្រីស្ទ ដែលចេញពីព្រះអង្គសង្គ្រោះទៅដល់ពួកអ្នកដើរតាមដ៏ពិតរបស់ទ្រង់ នៅពេលពួកគេបម្រើក្នុងនគររបស់ទ្រង់ ។

មរមនបានបង្រៀនយើងនៅក្នុងមរ៉ូណៃជំពូក ៧ ដូចនេះ ៖

« ហេតុដូច្នោះហើយ ឱ បងប្អូនដ៏ជាទីស្រឡាញ់របស់ខ្ញុំអើយ បើសិនជាអ្នករាល់គ្នាគ្មានសេចក្ដីសប្បុរសទេ នោះអ្នករាល់គ្នាគ្មានជាអ្វីទាំងអស់ ដ្បិតសេចក្ដីសប្បុរសពុំបាត់បង់ទៅឡើយ ។ ហេតុដូច្នោះហើយ ចូរតោងជាប់សេចក្ដីសប្បុរសដែលជាសេចក្ដីដ៏មហិមាបំផុត ដ្បិតអ្វីផ្សេងៗទៀតនឹងត្រូវខូចបង់—

« ប៉ុន្តែ សេចក្ដីសប្បុរស គឺជាសេចក្ដីស្រឡាញ់ដ៏សុទ្ធសាធនៃព្រះគ្រីស្ទ ហើយស្ថិតស្ថេរនៅជានិច្ច » ។^២

ប្អូនប្រុសស្រីជាទីស្រឡាញ់ ខ្ញុំអធិស្ឋានសូមឲ្យយើងម្នាក់ៗនឹងប្រព្រឹត្តដោយក្ដីជំនឿលើព្រះយេស៊ូវគ្រីស្ទដើម្បីត្រឡប់ទៅរកទ្រង់វិញ ប្រែចិត្តពីអំពើបាប ហើយបម្រើទ្រង់ដោយអស់ពីចិត្ត ។ ខ្ញុំដឹងថា បើយើងធ្វើដូចនេះ ប្រាកដណាស់ យើងនឹងក្លាយជាអ្នកដើរតាមទ្រង់ដ៏ពិត ។ ហើយបើយើង « អធិស្ឋានដល់ព្រះវរបិតាដោយអស់ពីកម្លាំងចិត្តដើម្បីឲ្យ [ យើង ] បានពោរពេញដោយសេចក្ដីស្រឡាញ់ [ របស់ទ្រង់ ] »^៣ នោះខ្ញុំដឹងថា យើងនឹងមានក្ដីជំនឿកាន់តែរឹងមាំ ក្ដីសង្ឃឹមកាន់តែខ្លាំង ហើយទទួលអារម្មណ៍ក្ដីស្រឡាញ់កាន់តែអស្ចារ្យ—ជាក្ដីស្រឡាញ់ដ៏សុទ្ធសាធរបស់ព្រះគ្រីស្ទ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។