Salamo ma le Alofa Mama
O Se Afiafi ma Elder Kim B. Clark
Faigalotu i le Lalolagi Atoa mo Talavou Matutua • 7 Me, 2017 • Tapeneko i Sate Leki
Ua ma fiafia lava ma Elder Clark e faatasi ma outou i lenei faigalotu i le lalolagi atoa.
Ou te fia faasoa atua ni nai manatu ia te outou e uiga i mea e pele i lo’u loto ma ou te faamoemoe o le a aoga ia te outou.
Muamua, ou te fia faailoa atu le alofa mo outou: Ua ou maua se lagona faapitoa i lo’u loto mo talavou matutua o le Ekalesia. Ua outou i ai i le tulaga o le olaga tou te faia ai ni faaiuga taua—i le sailia o lou a’otauina, sailia o galuega, auauna atu i misiona, tafafao faamasani, faaipoipo, ma le amatalia o ni aiga. Ua ou lagonaina ma molimauina le mana tele ua ia te outou mo le lelei a o outou osia ma tausia feagaiga paia ma a o outou saili atu i le finagalo o le Alii i le faia o nei faaiuga. E ofoofogia lava outou! Ma o pele lava outou a le Alii. Ou te iloaina lenei mea.
Ou te fia faasoa atu foi ia te outou la’u molimau ma nisi upu o faamalosiauga. Ou te manao ia outou iloa ua ou iloa o le Atua o lo tatou Tama Soifua o i le Lagi. Ou te iloa ua Ia aumaia ia i tatou se ata o le faaolataga ma le meaalofa ofoofogia o Lona Alo, o Iesu Keriso, lo tatou Faaola ma le Togiola. Ou te iloa o le Perofeta o Iosefa Samita o le perofeta o le tisipenisione o le atoaga o taimi. Ou te iloa e toe afio mai Keriso. Ou te iloa e tatau ona tatou saunia mo Lona afio mai.
E faapefea la ona tatou saunia mo sea mea silisili o le a tupu? E ono lagonaina le lofituina! E matua anoanoai mea e fai! Ou te fia ofo atua se faamalosiauga ma se faamoemoe i ni mataupu faavae se lua o le a fesoasoani ia i tatou ina ia saunia: salamo ma le alofa mama.
Sa aoaoina i tatou e Peresitene Monson i le konafesi aoao ia Oketopa talu ai: “E taua i le fuafuaga lo tatou Faaola, o Iesu Keriso. A na le seanoa Lana taulaga togiola, semanu e maumau tagata uma [ma mea uma]. Peitai, e le lava le tau na o na talitonu ia te Ia ma Lana misiona. E manaomia ona tatou galulue ma aoao, saili ma tatalo, salamo ma faaleleia.”1
E tatau ona tatou salamo. Oka se na faamanuiaga! E ala i le mana o le Togiola a Iesu Keriso, e mafai ai ona tatou faatoilaloina vaivaiga uma, tiga, faanoanoa, ma le agasala. Ua ou aoaoina e ui o le salamo e tele lava ina faatatau i le taofia o se mea o loo e faia, ae e mafai foi ona faatatau i se mea e tatau ona e faia.
O se tasi o mea aupito sili ona taua e manaomia ona tatou amata faia o se vaega o le salamo o le auauna atu lea i isi tagata. O loo i ai i le auauna atu i isi, galulue faatasi ma le Alii, ma lagonaina Lona alofa lē pona tatou te iloa moni ai lava le Faaola. Sa ou vaaia le mana o le alofa lea e sau mai le auauna atu i isi i se sauniga faamanatuga i se masina talu ai.
Sa ma ulu atu i le falesa ma sa’u uo na tu ma faafeiloai se tasi o teineitiiti i lana vasega Peraimeri. I le taimi o le sauniga sa lagolagoina ai la’u uo o le peresitene fou o le Aualofa a le siteki. O le teineitiiti lea sa ia faafeiloaia a o ma ulu atu i le falesa sa faliu mai ma tilotilo mai i tua i la’u uo, o lana faiaoga lea. Sa amata ona tagi le teineitiiti lelei lea ma faananati atu i le pito o le nofoaumi ma lago atu lona ulu i le tauau o lona tina! Sa ou tepa atu i la’u uo, le peresitene fou o le Aualofa a le siteki, ma ou vaaia ai o ia o loo tagi foi! O lena molimau o le alofa sa matua mamana ia te au. Sa amata ona ou lagonaina le fatufatu mai o o’u loimata. Sa ou molimauina le meaalofa o le alofa le pona o Keriso lea e sau mai le Faaola i Ona soo moni a o latou auauna ai i Lona malo.
I le Moronae mataupu e 7, ua aoao ai i tatou e Mamona:
“O le mea lea, ou uso e pele e, afai e le ia te outou le alofa mama o ni mea noa outou, ona e le uma le alofa mama. O le mea lea, ia outou fusi ai i le Alofa mama—
“Ae o le alofa mama o le alofa le pona lea o Keriso, ma e tumau e faavavau.”2
Ou uso e ma tuagane, ou te tatalo o le a faatino e i tatou taitoatasi le faatuatua ia Iesu Keriso ia liliu atu ai ia te Ia, salamo ia tatou agasala, ma auauna atu ia te Ia ma o tatou loto atoa. Ou te iloa afai tatou te faia lenei mea, o le a tatou faatinoa, o le mea moni, o le a avea ma ni Ona soo moni. Ma afai tatou te “tatalo atu i le Tama ma le malosi atoa o le loto, ina ia faatumulia [i tatou] i [Lona] alofa,”3 Ou te iloa o le a faateleina lo tatou faatuatua, faateleina le faamoemoe, ma lagonaina se alofa faateleina—le alofa le pona o Keriso—i o tatou olaga. Ma o le a saunia i tatou e fetaiai ma lo tatou Faaola pe a toe afio mai o Ia. O la’u tatalo lea mo i tatou uma, i le suafa o Iesu Keriso, amene.
© 2015 Puletaofia e le Intellectual Reserve, Inc. Ua taofia aia tatau uma. Faamaonia le FaaPeretania: 3/17. Faamaonia le faaliliuga: 3/17. Faaliliuga o le “Repentance and Charity.” Samoan. PD00000000 890