E Dua na iSema Kaukauwa
Dua na Bogi vata kei Elder David A. Bednar
Lotu e Vuravura Raraba ni Tabagone Qase Cake • 10 ni Sepiteba, 2017 • Valenilotu ni iTeki e Apex Vualiku kei Karolaina
Nai Sema ni Veitabatamata
E yavutaki na noqu itukutuku mai na dua na ka keirau a sotava kei Susan ena Sepiteba ni 1999. E a gole yani ki Ricks College, ka sa kilai tiko oqo me o BYU–Idaho, o Peresitedi Gordon B. Hinckley, me vakatabuya na Vale na Spencer W. Kimball. Keirau kalougata sara vakalevu kei Susan me ciqomi Peresitedi kei Sister Hinckley ena dua na siga guiguilecavi dredre ka vakayalo dina.
Ena nona tiko voli e koronivuli, e vosa o Peresitedi Hinckley ena dua na soqoni ni lotu vei ira na gonevuli, tamata cakacaka kei na qasenivuli. Au dabe tu ena tavata kei koya na Peresitedi ni Lotu vakalesui mai ni Turaga ena nona tukuna na nona itukutuku. Ena siga nikua, niu raica yani na matamuni ena gauna saraga qo ka vosa vei kemuni, au nanuma sara tu ga vakamatata na nona duri tu o Peresitedi Hinckley ena tavata mai na itutu ni vunau ena Olo ni soqoni na Hart. Au nanuma rawa na ivakavuvuli e vakavulica o koya, na rorogo ni domona kei na irairai ni matana, kei na veika au vulica ena kaukauwa ni Yalo Tabu niu vakarogoci koya.
Au sureti kemuni ena gauna oqo mo ni vakaitavi ena dua na tikini lotu oya.
“Na Vakarauwai kei na Sigatabu sa oti keitou a tiko mai Columbus, Ohio, me vakatabuya e dua na valetabu vou ka totoka. Na valetabu kei na valenilotu voleka era sinai ena ono taucoko na soqoni. E tiko e kea na Yalo ni Turaga, e dua dina na ka cecere ka bibi me vakatabui na ikarua ni valetabu ena gauna taucoko ni Lotu ena vanua o Ohio.
“A tiko vata kei au na watiqu kei na luvequ yalewa, ka gole tiko me vukea na tinana. E ka marautaki talega vei keirau, ni a draiva mai St. Louis, na vanua eratou vakaitikotiko kina, e dua na makubui keirau yalewa kei rau na luvena, o rau na makubui keirau vakarua. …
“Niu dabe tiko ena valetabu mai Columbus, Ohio, ena siga ka dua, kau vakaraici rau tiko na makubuqu vakarua, e dua na ka vakasakiti e yacovi au. E vakasauri noqu vakila niu duri sara tu ga ena lomadonu ni tolu nai tabatamata kau kila, au vakanadakui ira kei na tolu nai tabatamata era tiko e liu vei au. E vuki saraga vakaidina na yaloqu vei ira na tamaqu. E vuki talega na yaloqu vei ira na noqu kawa. Au vakasamataka na isema ni veitabatamata; na isema oqori e lesu tale kina dua na gauna balavu sa oti ka lailai sara na veika eda kila kina. Ena gauna oqo e sa yaco tiko ena tolu na itabatamata e liu vei au. Au raitayalotaka na iyaloyalo oqori ena matani noqu vakasama, e sega ni cagutu ka caliva vinaka ka kaukauwa tu me yacova mai nikua. …
“Au vakasamataka, niu dabe tiko e valetabu, sai au na isema, ka semata tu na veitabatamata sa sivi kei na veitabatamata sa tiko mai liu. Na veika kece e tiko vei au me baleta na vakasama kei na yago, ena veimasela, liga kei na yava kei na veiisema ni yago kei na mona, e sa yaco mai baleti ira na sa tiko ni se bera o au. Kei ira kece na noqu kawa mai liu e sa lako mai vei au ki vei ira. Au sega ni rawa ni tagutuva nai sema oqo. O ira na noqu kawa mai liu e sega ni rawa ni ra tagutuva nai sema oqo. …
“Au diva me tiko vei au na vosa e matau meu wasea vei kemuni na itabagone o ni tiko nikua na veika au vakila ena valetabu, na gagadre vakaitamera me kua niu tagutuva, se tagutuva e dua noqu kawa, nai sema ni tabatamata ena neitou matavuvale.
“Vei iko au kaya ena igu kece au rawata, mo kakua ni isema malumalumu ena isema ni veitabatamata. O lako mai ki na vuravura oqo kei na dua na isolisoli vakawa totoka. O lako mai vei ira na turaga kei na marama cecere, o ira na turaga qaqa, o ira na marama era rawa ka kei na vakabauta vakaitamera. Kakua ni vakadrukai ira. Mo kakua ni cakava e dua na ka ena vakamalumalumutaka na isema o sa dua na kena tikina bibi.”1
Na iyaloyalo ni isema ni veitabatamata e matata tu ena noqu vakasama. Na ivakaro me kakua ni isema malumalumu ena isema ni veitabatamata e kaukauwa e lomaqu. Na ivakasala me kua ni caka e dua na ka me vakamalumalutaki kina na isema ni veitabatamata e tara vakalevu na yaloqu. Kivei au kei Susan, na veilesoni rawarawa ka mana keitou vulica ena yakavi ni Sepiteba oya esa vakayarayarataka na neirau vakamau ki na veika vinaka, na neirau matavuvale, kei na veitikina kece sara ni neirau bula.
Na Matavuvale na Call
Ni goneyalewa lailai ka tubucake tiko ena nona tauni mai Afton, Wyoming, e kila o Susan ka dau rokova e dua na vuvale ena nona tabanalevu ka ivakaraitaki vinaka ni isema ni veitabatamata.
Vosa nei Sister Susan K. Bednar
E tiko ena tabanalevu au tubu cake kina e dua na vuvale vakasakiti ka 14 na gone. E rau vakamau e valetabu na tama kei na tina, o Bessie kei Evan Call, ka rau dina ka yalodei ki na nodrau veiyalayalati. E rau vakavulici ira na luvedrau ena ivakavuvuli ni kosipeli vakalesui mai ka kalougata ena nodrau susuga e dua na vuvale yalododonu.
Ena vica na yabaki sa oti, au a sotava e dua na goneyalewa totoka ena soqoni ni sakaramede. Ena nona vakamacalataki koya vei au, e tukuna mai niu kila na tinana. Na tinana e dua vei ira na luvei Brother kei Sister Call ka itokani vinaka sara mai na noqu gauna vakaitabagone. Na goneyalewa au sotava ena soqoni ni sakaramede e makubudrau na Call. Ni oti noqu vakatarogi koya, au kila kina ni naba 44 mai na 96 na makubudrau o koya, kei na luvena se qai sucu e ika 230 ni makubudrau vakarua o Bessie kei Evan Call. E vakidacalataki au nai wiliwili oqo. Sa dua dina na kawatamata levu!
Au dau vakasamataka vakavuqa mai na gauna oya: Vakacava kevaka e rau a sega ni vakamau e valetabu se maroroya na nodrau veiyalayalati o Brother kei Sister Call? Vakacava kevaka e rau a sega ni dina ki na “veivakabauta vakaitamera” ni tubudra era sa liu? Vakacava kevaka e rau a sega ni vakavulica vei ira na luvedra na kosipeli ena sala donu kei na nodrau ivakaraitaki? Vakacava kevaka e rau a isema malumalumu ki na isema ni veitabatamata? Ena vica beka na tamata ena rawa ni tatara kina? E matata na kena isau. Na digidigi e rau vakayacora na veiwatini oqo esa tara e sivia ni 300 na leweni vuvale—ka tubu cake tiko ga na iwiliwili ni sa levu cake na makubudrau vakarua ka vakatolu talega era kidavaki mai kina vuvale oqo.
Vakatauvatana oqo kei na dua tale na ituvaki, e dua na noqu itokani sega ni lewenilotu, kau sa kila tu mai na dua na gauna balavu. Vakasamataka na noqu kidroa ni tukuna vakarawarawa mai vei au ni a Momani talega na buna. Au a kidacala baleta ni sega ni kila tu o koya e dua na ka, ka sega ni via kila na ivunau kei na ivakavuvuli ni kosipeli. E dina niu sega ni kila na kena isau, au dau vakananuma tu, “E vei beka na vanua e mai cagutu kina na isema ena nona veitabatamata?” Na kena itinitini, e sega ni marautaka na veivakalougatataki ni kosipeli i Jisu Karisito na noqu itokani ena nona bula baleta eso na vakatulewa era cakava o ira na liu vua.
Me vaka ni o isema ni dua na veisemati ni nomu veitabatamata, e dodonu mo kila na vakatulewa o vakayacora ena gauna oqo kei na kena ena veisiga ni mataka e sega walega ni baleti iko. Na nomu vakatulewa e tarai ira na sa yali yani kei ira era se bera mai. Na nomu ivakaraitaki kei na veivakayarayarataki ni nomu talairawarawa kina ivakavuvuli ni kosipeli, na kaukauwa ni nomu bula dodonu, kei na isau ni veidigidigi o cakava vinaka se ca ena tatara yani kina veitabatamata. Yalovinaka, mo isema kaukauwa ena isema ni nomu veitabatamata.
E tiko na noqu ivakadinadina ni kosipeli vakalesui mai i Jisu Karisito. Au vakadinadinataka ni vakamau ni dua na turaga kei na marama e vakatabui mai vua na Kalou ka sa usutu ni noda icavacava tawamudu na vuvale ni da luveni Kalou.
Au vakadinadinataka, baleta na Nona veisorovaki, e vueti keda mai na noda ivalavala ca kei na veidigidigi dravudravua o Jisu Karisito, ka solia vei keda na kaukauwa e sivia na noda meda dinata tiko na kosipeli kei na veiyalayalati eda cakava, vakabibi ena gauna eda kunea na dredre ena noda bula.
Au kila ni kauta mai na Yalo Tabu kina noda vakasama kei na yaloda na veika vakayalo me vukei keda ena noda kunea ka vakamuria na sala me rawa nida isema yalodina ena isema ni noda veitabatamata. Ena yaca i Jisu Karisito, emeni.
Sa Cava na Vosa nei Sister Susan K. Bednar
E Dua na iSema Kaukauwa
Au nuitaka ena gauna oqo meu tatara mai na yavu ni veivakavulici i Peresitedi Hinckley me baleta na noda ‘isema ni veitabatamata.” E vakamacalataka vakamatata sara o koya na veika e sega ni dodonu meda cakava, meda kakua ni isema malumalumu ki na isema ni veitabatamata. Au via vakanamata ena veika e dodonu meda cakava, meda dua na iwalewale ni veisemati ki na isema ni veitabatamata.
Eda vulica ena Vunau kei na Veiyalayalati wase 128:18, “ni na vakanakuitataki ko vuravura ena dua na cudruvi, vakavo kevaka sa dua na isema kaukauwame umani ira vata na qase kei ira na gone, ena dua na ulutaga se dua tale—ia raica na ulutaga cava oqori? Sai koya nodra papitaisotaki na mate. Ni da na sega ni rawa ni vakavinakataki sara koi keda kevaka e sega o ira; era na sega talega ni vakavinakataki sara ko ira kevaka e sega o keda. Ia era na sega ni vakavinakataki sara ko ira se koi keda, ke sega ko ira sa mate ka ra vakabauta tu na kosipeli; ni sa gadrevi me baleta na kena vakacurumi mai na itabagauna ni taucoko ni gauna, io na itabagauna sa tekivu tiko oqo na kena vakacurumi mai, me vakayacori mada e dua na veisemati e taucoko, ena nodra umani vata na itabagauna, na idola, kei na kaukauwa, kei na lagilagi, ka vakatakilai mai ena gauna i Atama ki na gauna oqo.”2
Au sureti iko mo vakasamataka e rua na taro rawarawa e tubu mai ena tikini ivolanikalou oqo.
iMatai ni taro: Na cava na isema kaukauwa? E vakavulica o Peresitedi Joseph F. Smith, “Me tiko e dua na sala ni veisemati vata kaukauwa kei na nodra semati vata na itubutubu me yacova ni sa vakacokotaki vata na itui ni matavuvale ni Kalou kina na dua na vuvale, me ra na mai matavuvale ni Kalou kei na Nona Karisito.”3
Na vakalesui mai ni lewa kei na idola ni matabete ena iotioti ni tabagauna e vakatara vei keda yadua meda ciqoma, nanuma, ka rokova na cakacaka vakalotu ruarua ni vakabulai ni tamata yadua kei na vakacerecerei ni vuvale. E sa lako vakaidina mai o Ilaija me vaka a yalataki me solia na idola vakamatabete kei na lewa ni veivauci ena vukica na yalo ka semata vata vakaukauwa na veitabatamata. Sa tiko tale e vuravura edaidai na italai vakadonui era rawa ni kauta mai na veivakalougatataki tabu e solia na iVakabula, “a ka kecega ko sa vauca e vuravura ena vauci mai lomalagi; ia na ka kecega ko sa vesuka e vuravura, ena yacaqu kei na noqu vosa, sa kaya na Turaga, ena vesuki tawamudu mai lomalagi.”4
“Na cakacaka veisosomitaki vakalotu e vakayacori e valetabu, tekivu mai na papitaiso, e vakatara e dua na isema kaukauwa ena maliwa ni veitabatamata ka vakataucokotaka na inaki ni kena buli na vuravura.”5
Na ikarua ni taro: E taqomaka vakacava na vuravura na isema kaukauwa mai na kena cudruvi na vuravura? E cauraka o Peresitedi Joseph Fielding Smith, “E sega walega ni baleta na papitaiso ni mate, ia sa baleta talega na nodra vauci na itubutubu kei ira na luvedra vei ira na itubutubu, ni gadrevi me na “yaco na duavata, maucokona ka tudei sara na isema ni veika kecega e vakayacori, io, na kaukauwa kei na lewa kei na lagilagi,’ mai na ivakatekivu me yacova mai na gauna oqo. Kevaka me sega ni tiko e vuravura na idola ni veivauci oqo [vakalesuya mai o Ilaija], sa na dua na veilecayaki levu e vuravura, sa na qai lako mai na Turaga ia me kilai tiko ni na sega ni rawa ni vaka o ya ni veika kece e liutaki tiko ka vakatulewataki ena nona lawa ena matanitu ni Kalou.”6
Na cava me cudruvi kina na vuravura? Baleta ga qo, kevaka me sega ni tiko na isema ena kedra maliwa na tama kei ira na gone— sa ikoya na cakacaka baleti ira na mate—eda sa na qai druka vakaidina; sa na qai sega tu ni yaga na cakacaka ni Kalou ka sa na vakarusai. … Na vakalesui mai ni dodonu ni [veivauci] sa ikoya na leveni [se veivakauqeti dodonu] me na vakabulai vuravura mai na veivakarusai ena nona lako mai o Jisu Karisito.”7
E vukei keda na dina ni veiyavu ni kosipeli me da kila na vuna e “qisia na Kalou me vakawati na tagane kei na yalewa, me vaka ni suitu tiko ni nona yavu ni bula oqo na Dauniveibuli na tiko vakamatavuvale, me da cokonaki kina ena noda ilakolako ki na bula tawamudu na Luvena vakayadua.”8
Ia, eso vei kemuni o ni sa sotava oti na yaluma ni veivakalolomataki se na vuvale sega ni veimaliwai vinaka. Ka kena isau, ni vakalailai beka ga nomu via sema se sega sara ga ni o via sema vei ira era vakavuna vei iko na mosi ni yalo kei na rarawa o a sotava.
Yalovinaka rogoca oqo: na isema ni matavuvale tawamudu e veisemati vata ga ena dodonu vakamatabete kei na yalododonu ni tamata yadua. Na ka ca cava ga e a yaco ena nomu vuvale, au vakadinadinataka ka yalataka na Turaga o Jisu Karisito sai vurevure ni veivakabulai, veivakavoui, kei na veivakalesui mai o gadreva.
E sa yaco tiko beka na tagi ena bogi ena nomu vakatovolei, ia ena yaco na marau ena mataka ena nomu bula vou ka sa rawa ga vua na noda iVakabula ka Dauveivueti.9
Ia, na Cava Sara?
Ena gauna ni so na veitalanoa bibi ena Kuoramu ni Apositolo Le Tinikarua, e dau taroga vakawasoma o Peresitedi Boyd K. Packer, “Ia na cava sara?” Na ibalebale ni taro oqo vei au, “Na veisau bibi cava sara vakayalo ena kauta mai na vakasama, vakatutu, se vakatulewa oqori ena nodra bula na leweni Lotu? Ena vakalougatataki ira dina beka eda veiqaravi kina? Ni da raica vakamatata, e sureti keda tiko o koya meda vakasamataka na isau kei na irevurevu ni ulutaga e veitalanoataki tiko. Au sa kunea na taro oqo “ia na cava sara?” e sa veivuke vakalevu me vakanamatataki na noqu vakasama me baleta na leqa kei na dusia donu na veika e bibi.
Ia, o ni sa na taroga tiko beka, “Brother Bednar, na cava sara beka na ‘ia na cava sara?’ ni nomu itukutuku vei keimami?” Au vakabauta na isau ni taro oqori ena rawa ni kune ena tolu na taro, era sa taroga tiko beka eso vei kemuni ena gauna oqo.
Era vakaitavi tiko ena lotu oqo e levu na cauravou kei na goneyalewa o ni matai ni tabatamata mo ni lewe ni Lotu i Jisu Karisito ni Yalododonu Edaidai. O sa rogoca ka ciqoma na itukutuku ni kosipeli vakalesui mai i Jisu Karisito, sa papitaiso ka vakadeitaki ena dodonu kei na lewa vakamatabete, ka o sa toso tiko ki liu ena vakabauta tudei vei Karisito. Kevaka o se qai saumaki mai se sa dede nomu saumaki mai, o iko na isakisaki ni Lotu kei na nuinui ni veivakabulai ni nomu vuvale ena gauna oqo kei na veisiga ni mataka. O iko na imatai ni isema kaukauwa ena itui ni nomu veitabatamata.
Ia, e rawa ni o tarogi iko tiko, “Niu lewe ni Lotu duadua ena noqu vuvale kau sotava na veisaqasaqa kaukauwa mai vei rau noqu itubutubu kei ira na taciqu, ena rawa vakacava meu isema kaukauwa?”
Ni o wilika ka rogoca na italanoa me baleti ira na painia ena gauna e liu era sotava na veivakaduiduitaki, ka sotava na dredre ni tuvaki vakayago, ka taubale kosova na veibuca e Salt Lake, o na rawa ni vakasamataka kevaka o rawa ni cakava na veika era cakava. Ia, e levu vei kemuni o ni sa cakava tiko na veika era a cakava! Na ituvaki matata kei na mataqali bolebole o sotava e duidui mai vei ira na painia, ia na veisaqasaqa ki na dina vakalesui mai e tautauvata nikua ka na tubu cake tiko ga na kena kaukauwa.
Ena Epereli ni 1986, e mate e dua na tui ni dua na yavusa mai Ghana. E veivuke tiko ena vakavakarau ni veibulu e dua na tacina gone na tui, o Fred Antwi, ka a papitaiso ka vakadeitaki me lewena na Lotu i Jisu Karisito ni Yalododonu Edaidai ena dua na yabaki sa oti. E sega ni kila tiko o Fred, ni sa tuvatuva ka tiko o ganena o koya e gone vua na tui, na tinani tui, me sa na buli me tui vou ni yavusa o Fred.
Ena yakavi ni siga ni se bera ni bulu, e rau veitalanoa lo kei Fred e dua na leweni matavuvale ka qai taroga, “O kila tiko beka na ituvatuva e vakayacora tiko na matavuvale baleti iko?” E sauma yani o Fred, “E sega, e sega vakavo ke dua sa tukuna vei au.” E qai tukuna vua na wekana oya, “O sa na buli mo tui vou.” E kidroa o Fred ka qai kaya vakaukauwa, “Sega! Ena sega ni vakatara na noqu lotu meu vakayacora oqo.”
Me tui e dua sa dua dina na ka dokai. Na tui e lewa na veika kece ena koro, ena gauna e vosa kina, era cakava na tamata na veika e vinakati. E dau ciqoma na veitokoni vakailavo na tui, kei na veika e nanuma o koya ni gadreva ena vakarautaki vua. E veiqaravi tiko vakaperesitedi ni tabana ena gauna e kila kina o koya ni na rawa me buli me tui. Ka sega dina ni via vakaitavi o koya ena ivakarau vakayavusa ka sega ni salavata kei na ivakavuvuli ni kosipeli ni Vakabula.
Au na cavuta oqo na veika a tukuna o Fred ena itukutuku veivakakidacalataki nei ganena. “Ena yakavi oya, au kauta noqu motoka ka draiva yani meu sikova e dua vei ira na qase ni yavusa ena dua na koro voleka. Au vinakata me keirau veitalanoa me baleta na itukutuku e sa mai wasei vei au. E vakamacalataka o koya, au kila na ituvatuva oqori, ka sega ni dua na ka au rawa ni vukei iko kina mo levea na nomu buli me tui.’”
E qai kaya o Fred, “O kila niu Lotu Vakarisito, ka sega ni vakatara na noqu lotu meu tui baleta ni tiko e levu na ka e dodonu me cakava na tui au na sega ni cakava.” E sauma na qase ni yavusa, “Sa donu, lesu tale vei ira na nomu iliuliu ka tukuna vei ira ni o sa Lotu Vakarisito ka o sa sega ni rawa ni tui.” E qai sauma o Fred, “Au lesu kau tukuna vei ira na iliuliu, ia era sega ni via rogoca na noqu itukutuku.”
E tomana sara o Fred, “Na tuakaqu [na tui sa bale] me bulu ena bogi oya, kau draiva tiko ena noqu motoka ka muri ira tiko na leweni matavuvale ena nodra motoka. Ni yaco yani ena dua na gaunisala veilatai ki na ibulubulu, au sega ni gole ena yasana imawi me vakataki ira na kena vo, au vuki ena imatau ka gole tiko ki Cape Coast kau sa siviti sara yani.”
Ena vula ono ka tarava, e sega ni veitaratara kei ira na matavuvale raraba o Fred. E qai kila e muri o koya ke me a gole ki na veibulu ena bogi oya, ke sa buli me tui, ka sa na biuti koya sara ena dua na ituvaki dredre. E qai kila e muri o koya ni qai buli e dua na vugona, na luvei ganena, me tui vou.
Ni a vuki yani ki na imatau o Fred ka gole ki Cape Coast, e vakaukauwataka tiko o koya na imatai ni isema ni itui ni nona itabatamata. Ni dei tu ena nona ivakadinadina kei na ivakavuvuli kei na ivunau ni kosipeli vakalesui mai, e veisau sara ena mana na ilakolako ni nona bula o Fred. E rau imatai ni daukaulotu tudei o koya kei Sister Antwi mai na Ra kei Aferika e rau lesi me veiqaravi ena Valetabu e Ghana. Ena gauna qo, erau veiqaravi tiko vakaveiwatini ena mataveiliutaki ni Valetabu e Accra Ghana ka ivukevuke ni metereni.
Ni rau saumaki vou ki na Lotu vakalesui mai ni Vakabula, e vakalougatataki o Fred ka vakaukauwataki me ulabaleta na veisaqasaqa kaukauwa mai na nona vuvale, tokani kei ira era dau veimaliwai vata. Ka rau yalodina ena vakavulici ira na luvedrau o Brother kei Sister Antwi ena kosipeli i Jisu Karisito ka tauyavutaka na iwalewale ni yalododonu ena nodrau vuvale ka na yaco kosova yani na veitabatamata. Me vaka ga e tekivu mai vei Fred kei watina, ena tekivu vakakina vei iko!
Vei kemuni na lewenilotu o ni imatai ni tabatamata ena Lotu ena tekivu vei iko! O sa painia vei ira na nomu qase e liu ka vakakina vei ira nomu kawa ena veisiga ni mataka. O ira na leweni vuvale era sa liu vei iko ena itui ni nomu veitabatamata era masuta tiko na nomu veivuke, kei ira era na qai muri mai era vakanuinui tiko ena nomu yalodina. E tiko dina vei iko na kaukauwa mo isema kaukauwa. Nanuma tiko, e tekivu mai vei iko. Ena veivuke ni Turaga, o na rawata kina.
Eso vei kemuni ena vakataroga, “Ena rawa vakacava meu nuitaka niu na tauyavutaka e dua na vuvale tawamudu niu sega ni lewena e dua na vuvale kaukauwa ni Yalododonu Edaidai?” Eso na ka au raica rawa ena veika au sotava ka na rawa ni vukei iko.
Na noqu “itui ni veitabatamata” e duidui mai na yasana vei tinaqu kei tamaqu ni vakamuri na nodrai laini noqu qase eliu. Ena itui mai vei tinaqu, au kalima ni tabatamata e lewena na Lotu. E lewena na Lotu o ira na tubuna mai Igiladi kei Siwiteni ena gauna taumada ni Veivakalesui mai. Sai koya, ena laini nei tinaqu au dua na isema ena dua na itui balavu ni tabatamata yalodina.
Ena itui mai vei tamaqu, au imatai ni tabatamata e lewena na Lotu. Baleta ni a sega ni lewena na Lotu o tamaqu me yacova ni sa qase, keirau imatai ena vuvale na Bednar me keirau ciqoma kei taciqu na matabete. Au matai ni daukaulotu tudei ena noqu vuvale. Sa vakakina, vei kemuni na lewevuqa, au matai ni isema vakosipeli ena itui ni tabatamata ena Bednar.
E tamata vinaka, dina, ka daucakacaka na tamaqu. Au lomani koya kau vulica e vuqa na lesoni cecere ena noqu cakacaka kei koya ka sa vukei au ena noqu yacova na kequ ituvaki nikua. A vakavulici au na tinaqu meu dau masu ka mareqeta na ivolanikalou. Au lomani koya kau vakavinavinakataka na waqawaqa ni vakabauta e udreva vei au. Ia, au sega ni nanuma rawa ni keitou vakayacora vata vakavuvale na masumasu, vulici ni volanikalou, se na lotu vakavuvale ena Moniti. Au masu ka wilika vata kei tinaqu na iVola i Momani, ia, keitou a sega ni cakava vata o tamaqu, tinaqu kei keirau na gone.
Ena veivuke ni Turaga, e rawa ni o tauyavutaka na vuvale tawamudu, kevaka madaga o sega ni lako mai ena mataqali vale ni Yalododonu Edaidai e dau vakaraitaki tu ena so na gauna ena waqani Ensign se Liaona. Yalovinaka mo dau nanuma: ni na dau tekivu mai vei iko!
Baleta saraga niu a sega ni sotava na iwalewale ni vuvale yalododonu ena noqu vale niu se cauravou lailai e bucina vei au e dua na gagadre kaukauwa meu cakacaka vagumatua kei Susan me vakadeitaki na iwalewale eso oqori me tikini ni vale keirau a tauyavutaka vata. Ni keirau veitalanoa vata ka vakatakerekere ena masu me keirau vukei, keirau vakauqeti ka vakalougatataki me vukei ira na luvei keirau ena nodra vulica na ivakavuvuli ni kosipeli vakalesui mai ni iVakabula. Keirau a sega ni taucoko tu vakaitubutubu, ia keirau ciqoma na isolisoli vakayalo e gadrevi ka kunea na “veivuke … nomuni kaukauwa ga.”10
E daru sega ni coko tu ena veika e sa sotavi oti. Eda sega ni bobula ki na veika sa sotavi se lako curumi oti se vesuki tu ena veika e wavoliti keda. Ena vakavulici keda na Yalo Tabu ena veika kece e dodonu meda cakava, oka kina na iwalewale ni vuvale buladodonu eda a se sega mada ni vakaitavi kina. E tekivu mai vei iko! Ena veivuke ni Turaga, o na rawata kina.
Eso vei kemuni e sotava na mosi ni yalo baleta e dua na lewe ni vuvale se iliuliu dokai e sega ni rokova na veiyalayalati tabu ni vakamau. Ena rawa ni o tarogi iko, “Kevaka erau a vauci e valetabu na noqu itubutubu se eso tale na veiwatini au kila, ka sega ni dede na vakamau oya sa kasura, na inuinui cava e noqu ni na tawamudu na noqu vakamau?”
Kivei kemuni o ni sa sotava na mosi ni yalo ena veisere ni vakamau ena nomu vuvale se o vakila na voroki ni veivakabauti, yalovinaka nanuma tiko ni na tekivu tale vei iko! E dua vei ira na isema ni itui ni nomu tabatamata e sa cagutu beka, ia, na veiisema dodonu kei na kena e se vo tiko e bibi ka tawamudu. Ena rawa ni o tomana na kaukauwa ki na nomu itui ka rawa tale beka ga ni o semata na isema e sa cagutu. Na cakacaka oqori ena vakayacori yadudua.
Eda sa luvena tagane kei na yalewa na Kalou. Mai na Nona ituvatuva tawamudu ni marau na Tamada, e noda na isolisoli ni galala ka da lesi meda cakacakataka ena kena levu. Eda sega ni dua na iyaya me tukuni vei keda na ka meda cakava. Meda vakayacora ga na ka eda gadreva, me da gumatua ena cakacaka vinaka kei na dodonu.11
Na vakawati marau ka taucoko e sega ni kunei, ia, e rau taracake e dua na tagane kei na yalewa dau rokova nodrau yalayala. Au leqataka de so vei kemuni o ni vakasaqara tiko e dua na ka e sega dina ni tiko. E sega ni dua na tamata e taucoko tu me rawa ni vakawati ka na rawa ni taqomaki iko mai na mosi ni lomamu kei na cudru vakayalo. Ia, ena kaukauwa ni Turaga, ena rawa vua e dua na turaga kei na marama yalodina me rau vakatulewa vakataki rau me rau taracake na bulavakamau e taucoko kei na vuvale tawamudu e rau nuitaka ka guta.
Na veiqaravi sega ni nanumi koya ga ena vakamau e gadrevi kina na dauvosota vakadede kei na gugumatua ena dua na vuravura e vakauqeta na dau nanumi koya ka sasagataki koya ga vakataki koya. Ia, e tekivu vei iko ni o cakacaka tiko ka toso tiko ki liu ena vakabauta vua na iVakabula, ka vakasaqara tiko ga na veivuke vakalomalagi, ka vakayagataka ena dodonu na nomu galala. O na rawa ni cakava ena veivuke ni Turaga.
Na Yalayala, Veivakalougatataki, kei na iVakadinadina
Kemuni na taciqu kei na ganequ, au kerei kemuni ena vuniyaloqu taucoko mo ni isema kaukauwa ni nomu veitabatamata.
Na nomu rawa ni isema kaukauwa ena tekivu mai na veika rawarawa me vaka rau cakava o Brother kei Sister Call ni rau rokova na veiyalayalati tabu ka vakavulici ira na luvedrau me ra bulataka ka lomana na kosipeli vakalesui mai i Jisu Karisito.
Na nomu rawa ni isema kaukauwa ena tekivu ni tiko vei iko na yalodei kei na vakabauta na iVakabula mo vuki ki na imatau, me vakataki Brother Antwi.
Na nomu rawa ni isema kaukauwa ena tekivu ni o nuitaka na Yalo Tabu me vakavulici iko ena veika kece ga ka vakararamataka nomu salatu, ena gauna sara mada ga o sega ni o kila na vanua mo lakova se na ka mo cakava.
Na kena rawa na isema kaukauwa e tekivu mai vei iko ena nomu cemuria na butobuto mai vei iko ena gugumatua kei na qaqa12 ka tudei tu mai na veivakayarayarataki ni vunica ena iotioti ni tabagauna.
Au solia vei iko e dua na veivakalougatataki vakaiapositolo, ena kaukauwa ni Yalo Tabu o na kila vakavinaka na bibi ni nomu itutu ena itui ni veitabatamata. Au kila ni o na kalougata ka vakaukauwataki ena nomu saga mo isema kaukauwa. Kau yalataka ena veivuke ni Turaga o na rawata dina!
Au vakadinadinataka ena reki ni o Jisu Karisito na Luvena Bula na Kalou Bula. Au kila ni bula tiko o Koya, e sa tucake tale o Koya, ka sa kilai keda ka lomani keda yadua o Koya. Au vakadinadinataka ni dodonu kei na idola vakamatabete e veivauci e vuravura kei lomalagi e sa vakalesui mai ena vuravura oqo ena iotioti ni tabagauna. Kau kila ni da muria na nona ituvatuva tawamudu na Tamada, eda marau ena bula oqo, ka rawa ni tawamudu na noda vuvale. Au sa yalataka ka vakadinadinataka ena yaca tabu ni Turaga o Jisu Karisito, emeni.
© 2017 mai na Intellectual Reserve, Inc. Dodonu kece e taqomaki. Vakadonui me Vakavalagi: 6/17. Vakadonui me vakadewa: 6/17. Na ivakadewa ni “E Dua na iWalewale ni Veisemati.” Fijian. PD60004410 858