Na iLakolako ni Vakadidike ni Bula Vakayago

Elder Dieter F. Uchtdorf

Ena Kuoramu ni iApositolo Le Tinikarua

Dua na Bogi vata kei Peresitedi Dieter F. Uchtdorf

Lotu ni iTabagone Qase Cake e Vuravura Raraba • 14, ni Janueri, 2018 • Conference Center

Kemuni na taciqu, ganequ kei na itokani lomani, au kauta mai vei kemuni nikua nai loloma kei na veivakalougatataki ni Mataveiliutaki Taumada kei na Kuoramu ni iApositolo Le Tinikarua.

Sa dua na ka na noqu na dau vakananumi Peresitedi Thomas S. Monson. E a dua dina na itokani, qasenivuli ka dauveituberi mareqeti ka lomani sara o koya. Ia au na vakadeitaka vei kemuni, ni sa liutaka tiko na Nona Lotu na Turaga saraga vakataki Koya, Na Lotu i Jisu Karisito ni Yalododonu Edaidai. Esa dauvakarautaka tu na Turaga e dua nai tuvatuva vakalou me na rawa ni cicivaki tikoga na Nona Lotu mai vei ira na parofita, daurairai, ka dauvakatakila.

Keimami sa dau nanumi kemuni tikoga. Keimami dau masulaki kemuni, ka lomani kemuni talega ka dua na ka na neimami rokovi kemuni.

Na veivakasoqoni kei na veiwasei e vuravura raraba era sa vakayacori oti ka na vakayacori tikoga ni oti na soqoni oqo e dua na ivakaraitaki ni nomuni vinaka. E tini vakacaca na udolu vei kemuni o ni sa vakaitavi ena sala sa vakasakiti, mai na nodra vukei na vakaleqai, ki na laveti cake ni yalodra na tani ena sere. Esa nomuni tavi mo ni wasea na itukutuku vinaka ni kosipeli i Jisu Karisito ena tabana ni vakauitukutuku raaba kei na veisala tale eso ka vakakina nomuni ivakaraitaki yadua. Vinaka vakalevu na nomuni vakaraitaka ni o ni sa lomasoli mo ni qarava na nomuni Kalou kei na wekamuni.

Sa ka totoka dina na tiko kei kemuni nikua ka me keirau vakila na yalomuni, nomuni kaukauwa, kei na igu. Au marau ni rawa meda a vakarorogo vua na marama watiqu. O Harriet e matanisiga ni noqu bula. O ira kece na kilai koya, era taleitaki koya. O koya e dua e dau vakavinakataka ka vakamarautaki ira na tiko voliti koya.Sa dua na ka na nona vakauqeti au vaka oya.

Keirau se qai marautaka oti na 55 ni yabaki ni neirau vakamau. Ni keirau raica na luvei keirau kei na dui watidrau, ono na makubui keirau kei na nodra vuvale, tolu na makubui keirau vakarua, e veivakurabuitaki vei keirau na kena cecere na ilakolako ni neirau bula oqo.

Na Yabaki ni Bula ni Sau ni Taro Totolo

E dua na vakasama totoka e yaco mai vei au niu vakavakarau tiko kina soqoni oqo. E dina sara, ni sa sivi ka sega ni makare na noqu veigauna ni yabaki 18 ki na 30, ia se cava ga na noqu yabaki ni bula, au vakila niu se gone tiko e loma. Sa dina sara, ni vuqa vei keda na qase eda nanuma tiko ni da tamata gone sa dede sara na noda mai bula tiko.

O ira nai taba qasecake e levu cake na veika o ni tautauvata kina ka o ni sega ni kila tu. Au vakabauta ni duidui cava ga e tiko e kedra maliwa na luvena na Tamada Vakalomalagi, se yabaki ni bula cava ga, e lailai sara me vakatauvatani kei na veika e tautauvata. Me vakatautauvatataki, e vuqa vei kemuni e tiko na nomuni vakatataro me baleta na Kalou kei kemuni talega—na taro titobu, ka bibi o ni taroga era via tautauvata kei na kena era vakataroga talega o ira era qasecake sara mai vei iko:

“E tiko dina beka na Kalou? E kauwai tiko beka mai?”

“Au sa muri donu tiko beka?”

“Cava na vuna au dau lomalala, uabaleti, vakawaleni, se galili kina?”

“Cava e sega ni takoso kina na Kalou ena noqu bula?

“Na cava a sega ni sauma kina o Koya e dua na masu?”

“Na cava beka e vakatara kina o Koya meu sotava na rarawa, tauvimate, se na ka vakamosi yalo oqo?”

Oqo era taro e dau dredre me saumi mai.

Ena yabaki ni isaunitaro totolo oqo—na kila-ka e vaka me dodonu ka rawarawa ga sa na kena kunei ena Google—so na gauna eda loma rarawa ni isau ni taro baleti keda yadua, e bibi, ka vakatotolotaki e dau yaco berabera mai. Eda laveta na yaloda ki lomalagi ka qai yaco ga mai na veivakararawataki, cowiri, “ivakatakilakila ni wawa.”

Eda besetaka na wawa.

Ni da wawa toka me dua na gauna me qai sauma mai na misini na noda vakatataro, eda na nanuma ni sa ca se tarovi tu na isema ni initaneti. Ena noda cudru, ena rawa sara beka ga ni da biuta na vakasaqaqara oqori. Ia ni yaco mai ki na vakatataro tawamudu, na veika ni yaloda, e dodonu me da na vosota tiko vakadede.

Ia na isaunitaro taucoko era sega ni tautauvata na kena bibi. Nai saunitaro e lako mai ena vuku vakavuravura se nanuma kila levu e rawarawa na kena yaco mai, ia e totolo talega na kena yali yani baleta na veivakasama vovou kei na veiwalewale e veiganiti kei na gauna oqo. Nai saunitaro vakalomalagi—nai saunitaro tawamudu—e momona ka vakamareqeti sara. Me ciqomi na isaunitaro oqo, ena gadrevi kina na solibula, kei na vosota.

Na isaunitaro oqo sa dodonu mera waraki.

Sa noqu inaki nikua meu vakadinadinataka ni o Tamamuni mai Lomalagi e kilai kemuni, e rogoci kemuni, ka na sega ni biuti kemuni. Ni ko vagolea na yalomuni Vua ka saga mo muria na Nona sala, ena takosova nomuni bula ka dusimaka nomuni salatu ni ko lakova na ilakolako cecere ni bula oqo.

Semati ni Maka

Dua vei ira na dauvakasama vou cecere ni gauna oqo, o Steve Jobs ena Apple a kaya: “O na sega ni semata rawa na maka ni ko rai ki liu,” a kaya.“Ena rawa ga ni ko semata ni ko rai tiko ki muri. Mo sa na nuitaka ni ra na sema na maka ena nomu veisiga ni mataka.”¹

Na cava e vakaibalebaletaka kina o Koya? Ena veivuke beka ke dua na kena ivakaraitaki. Ena mua ni 19 ni senitiuri, rau a tekivu droini o Georges kei Paul Signat ena dua na kena iwalewale vou ka qai yaco me vakatokai na irairai-dina. Na iwalewale oqo e oka kina na vakadigotaki na droini ena veiroka eso.Ni laurai vakavoleka, na veidigo oqo e vaka era sega tu ni sema ka veituyaki tu. Ia, ena gauna o raica kina na boroboro taucoko, o na raica na kena waki vata na digo ki na roka kei na kena tuvanaka na kena irairai e vakaraitaka na ituvaki totoka. Na veika e a sega tu ni matata ka veilecayaki sa tekivu me matata mai. Eso na gauna ni noda bula sa vaka na droini ni kena irairai dina. Na digo ni roka e bulia na noda gauna ni veisiga ena rawa me tawa sema tu ka veilecayaki ena so na gauna.Eda sega ni raica rawa na kena ituvatuva dodonu. Eda sega ni rawa ni vakasamataka na kedra inaku kece.

Ia, ni da tu vakamalua ka raica yani na rai tawamudu, ni da raica na noda bula ena ituvaki ni kosipeli i Jisu Karisito, sa tekivu meda raica ni sa veisemati tiko na veidigo ena noda bula. Ena sega beka ni rawa meda raica nai yaloyalo levu ena gauna oqo, ia ena veirauti meda nuitaka ni sa tiko e dua nai yaloyalo totoka ka uasivi. Ni da sa saga meda nuitaka na Kalou ka muria na Luvena, o Jisu Karisito, ena dua na siga eda na raica na icavacava ni ka, ka da na qai kila ni sa dusimaki ka liutaki keda tiko na ligana na Kalou ena noda veikalawa.

Eda na kila kina ni a tiko na ituvatuva nei Dauboroboro Liu kina veidigo kece oqori. Eda na raica ni sa vakalevutaka na noda taledi, vakarautaka na veimadigi, ka vakaraitaka vei keda na veika lagilagi eda sega ni se bau tadra ni da na rawata vakataki keda.

Au sa raica dina sara oqo ena noqu bula.

Na iLakolako ni Bula Vakayago

E vuqa vei kemuni o ni kila niu se gone lailai, a vakarua na neitou dro vakavuvale mai neitou.Rua na gauna oqori, e laurai levu ni o ira era tiko voliti keitou era nanuma ni keitou “lolovira” mai na so tale. Mai na yabaki ni bula vakagone au tu kina, e vakaduiduitaki au na tautau ni noqu vosa, ka sa dua sara na ka e vakayagataki vakalevu meu dredrevaki kina mai vei ira.

E rau sotava na dredre na noqu itubutubu me rau vakarautaka na veika e veiganiti kina matavuvale. A tekivutaka o tinaqu e dua na bisinisi savaisulu, kau a vodo basikeli vakaqiqi, meu qarava na “vakau ki na veivale” na iyaya oya niu suka na vuli.

Na veisau levu ni neitou vanua kei na itikotiko a vakavuna meu lutu ena noqu vuli kau vakayalia e dua na yabaki ni vuli.

Mai na Tokalau kei Jamani, au a vulica na Vosa Vaka-Rusia me karua ni vosa. A dredre sara, ia au a rawata. Io oqo ena Ra kei Jamani, au gadreva meu vulica na Vosa Vaka-Valagi.

Esa dua dina na ka dredre oqo vei au! Au a vakadinata ni gusuqu a sega ni buli me vosa Vaka-Valagi.

Niu sa cauravou mai, au domona kina e dua na goneyalewa totoka yaloka ni mata lelevu barauni.E ka ni rarawa, o Harriet e sega mada ga ni bau via taleitaki au mai vakalailai. Se cava ga au saga, e vaka meu sega ni rawata rawa. Ia, o ni sa rogoca na nona italanoa.

Ia, sai au o ya, e dua na cauravou takiveiyaga ka sasaga tiko a bula voli e Jamani ni oti na ivalu ka vaka me sega na madigi me gugumatua rawa kina.

Ia, a vica toka na veika vinaka a yaco tiko vei au.

Au kila ni lomani au na noqu vuvale. E koronivuli kei na lotu era a tiko na qasenivuli era vakayaloqaqataki au me cecere na noqu lalawa.Au nanuma sara na daukaulotu gone mai Amerika a vakavulica na vakasama ni “kevaka sa totaki [kemuni] na Kalou, o cei me [kemuni] meca?”²

E dua na ka baleta na ka oqo a curumi au ena kaukauwa levu.Ke sa vakadina oqori, au a vakasamataka, cava meu rere kina?

Au qai cakava vakakina. Kau sa nuitaka na Kalou.

Ena gauna o ya au vuli-tara tiko ena dua na parokaramu.A bolei au e dua na qasenivuli meu vinaka cake ka meu vuli bogi meu vulica na idinia vakamekeniki.A taura e dua na cakacaka vakaitamera, ia a muataki au meu kila niu gadreva na vukataki waqavuka!E kani kidacala vei au niu sa mai kila ni dodonu meu kila na vosa Vaka-Valagi meu rawa kina ni pailate. Au vinakata saraga meu pailate, esa qai veisau mai ena cakamana na gusuqu, ka sa sega soti ni dredre na vosa Vaka-Valagi.

Ena veivakayaloqaqataki vou, dua na iyalayala ni cakacaka vakaukauwa bulabula, ka nuitaki tu na Tamada Vakalomalagi, sa tekivu meu taura na kalawa lalai ka vukei au meu taracake na yalo nuidei niu na rawata.

E dina sara, ni sega ni kena ibalebale oya ni sa maravu tu ga na ilakolako.

Niu a se yabaki 19 au a gole ki San Antonio, Texas, meu laki tekivu vuli Pailate ni Waqavuka ni Mataivalu. Ena loma ni waqavuka, au dabe volekata e dua na turaga ka vavaku na tautau ni nona vosa ni kai Texas. Au mai kila kina ni vosa Vaka-Valagi au sa cakacaka kina ena noqu igu meu vulica e sega ni tautau vata kei na kena era vosataka mai Texas!

E koronivuli ni pailate, a dredre talega na toso.Esa dua dina na vuli ka levu saraga kina na veisisivi, ka ra sasaga kece tiko me ra rawata na kena vinaka duadua. Au kila sara vakatotolo niu sega ni kalougata vakalevu baleta ni lewe vuqa vei na lewe ni noqu kalasi e nodra vosa na vosa Vaka-Valagi.

Era vakaroti au talega o ira na noqu qasenivuli ni vuka me baleta e dua tale na ka au sega ni kalougata vakalevu kina—sa rui levu na gauna au solia tiko ena Lotu. Era kidavaki au o ira na lewe ni lotu kina nodra tabana kei na nodra vale, ka keimami tara vata e dua na vale ni lotu e Big Spring. Era leqataka o ira na noqu qasenivuli ni veitaviqaravi oqori era na vakacacana na noqu sasaga meu dua vei ira na toka e cake ena rawaka ena vuli oqo. Au sega ni nanuma ni vakakina. Ia, au a nuitaka tale na Kalou, ka cakava na noqu vinaka duadua.

Au sa qai vulica na vosa Vaka-Valgi (e dina ga niu se cakacaka tiko kina nikua). Au vakacava na noqu vuli pailate (kau matai ena noqu kalasi). Au yaco meu dua na pailate ni mataivalu ka qai yaco meu kavetani ena waqavuka. Ka qai vakacava na goneyalewa mata totoka au diva tu? Esa tiko saraga qo o koya kei au.

Cakava Vakavinaka na Veika Lalai

E dua beka na lesoni eke? Au kila ni na so na beka na vakasama vakaoqo!

E dua na vakaoqo: Kakua ni o lomaocaocataka na veitavi lelevu, e vuqa ka dredre ni bula. Kevaka o yalayala mo vakayacora na veika “rawarawa”—na veika “lalai” e kerei kemuni na Kalou mo cakava—ka o qai cakava ena kena vinaka duadua o rawa ni rawata, ena rawa ni muria mai na veika lelevu.

Eso vei ira na ka “lalai ka rawarawa” o ya na masu e veisiga, wili ivolanikalou, bulataka na Vosa ni Vuku, laki lotu, masu ena yalodina, ka sauma na ikatini kei na isolisoli ni lolo.

Cakava na ka oqo ena gauna mada ga o sega ni vinakata kina. Ena rawa ni vakatokai na veika “lalai”, ia era bibi sara, baleta na “solibula e kauta mai na veivakalougatataki kei lomalagi.”³

Dua na kena vakasama, na nomu solibula “lalai ka rawarawa” era tiki ni veidigo ni bula ni veisiga yadua me qai caka kina nai yaloyalo vakasakiti ni nomu bula. O na sega beka ni raica na nodra rawa ni veisemati ena gauna oqo, na digo ka sega talega ni gadrevi beka mo raica ena gauna oqo. Mo na vakabauta tikoga, vakabauta talega me veirauti kei na gauna o bula tiko kina oqo. Nuitaka na Kalou, ka ena qai yaco mai “ena ka lalai ka rawarawa na veika lelevu.”⁴

Vakanuinui Vua na Kalou

“Io, Peresitedi Uchtdorf,” o na vakasamataka beka, “e vinaka sara la vakalevu vei iko. Ia o iko o iApositolo. Au sega ni vaka oqori. Au tabogo vua na Kalou. E sega ni saumi mai na noqu masu. E sega ni dusimaki na noqu bula. Kevaka e tiko e dua na ituvatuva me baleti au, e kena e volitaki tu ena sitoa.E dua na ituvatuva sobu mai.E dua na ituvatuva ni lomavinakataka na veika sa tu vei iko.”

Oi kemuni na noqui tokani lomani, nanuma tiko ni a kaya o Steve Jobs: “Ena rawa ga ni ko semata ni ko rai tiko ki liu; o na rawata ga ni ko sa rai tiko ki muri.”

Niu a se yabaki vata kei kemuni au a sega tu ni kila meu na kalawa kivei.Au sega saraga ni bau raica na nodra veisemati tiko na digo e mataqu.

Ia, au a nuitaka na Kalou. Ia au a nuitaka na Kalou, rogoca na ivakasala loloma ni vuvale kei na itokani vuku, ka kalawa yani ena vakabauta, niu vakadinata keu cakava noqu vinaka e kea, ena tinia na ka kece na Kalou.

A vakakina.

E kila o Koya na itinitini mai na ivakatekivu kau sega ni kila.

Au sega ni raica rawa na mataka, ia e rawa Vua.

Ena gauna mada ga ni dredre niu nanuma niu tu taudua, biu tu mai, ka yalolailai, a tiko kei au—au sa mai raica oqo.

Ena Vakailabebale, e tiko kina na yalayala cecere oqo: “Vakararavi vei Jiova ena vu ni yalomu; ka mo kakua ni vakararavi ki na nomu yalomatua. Mo vakarogotaka vua na nomu sala kecega, ia ena vakadodonutaka na nomu ilakolako ko koya.”⁵

Au sega ni vakadinata ni tiko e dua na cegu taro ena tikina o ya.

Au nanuma me tiko e dua na vanua ni kidroa!

Mo qai tarogi iko kina, “E rawa beka meu gu ena vakabauta meu vakadinata kina na Kalou? Au sa nuitaka beka ni sa lomani au o Koya ka gadreva me dusimaka noqu sala?”

Ena dina beka, ni sa na Daumaka tiko na nomu qarava tiko e levu na ka. Ia, au vakauqeti kemuni mo ni vakabauta ni na vinaka sara na nomuni bula kevaka o ni vakararavi tiko vua na Kalou me dusimaka nomu sala. E kila o Koya na veika o na sega ni rawa ni kila vakataki iko, ka sa vakarautaka tu o Koya nomu veisiga ni mataka o na sega ni rawa ni vakasamataka rawa o iko. A kaya na iApositolo qaqa o Paula, “Sa sega na mata sa kunea, se na daliga sa rogoca, sa sega ni curu ki na loma ni tamata, na veika sa vakarautaka na Kalou me nodra era sa lomani koya.”⁶

O vinakata me dusimaki iko na Tamada Vakalomalagi, vakalougatataki iko, ka tauri iko cake?

Ia mo vakadinata.

Lomani Koya.

Vakasaqarai Koya mai vu-ni-yalomu.

Lako ena Nona sala—o ya, mo muria na ivakaro, doka nomu veiyalayalati, muria nodra ivakavuvuli na parofita, ka rogoca na veivakauqeti ni Yalo.

Cakava oqo, na Kalou ena “vakaikuritaki kemuni mada vakaudolu ka vakalougatataki kemuni me vaka sa vosataka vei kemuni!”⁷

Eda na Saumi Taro Vua na Kalou

Au kila ni so era na rairai rawarawa mera kaya ka dredre mera cakava.E sega ni gadrevi mo ni curuma na itovo vakavuravura mo rogoca na domo veibasai e vakaluluqataka se vakalewa na vakabauta na Kalou kei na noda lotu.

Na veidomo oqori era rogovaki ena noda gauna ena tabana ni vakauitukutuku e sega ni vakasamataki rawa.

Ko ni sa bolei tiko kina. Ia sa nomu madigi talega.

Au sa nuidei tu ni o na rawa ni kunea na sala mo sotava ka veiganiti kei na sala ni Turaga!

E tiki ni nomu ilakolako ni bula oqo. Na iwalewale o na cakava kina ena veivakayarayarataki kina nomu veisiga ni mataka kei na nomu itavi o qarava tiko ena cakacaka ni Kalou ena vuravura oqo.

Ia, na veika o sotava tiko ena nomu bula e sega ni duatani. E sega walega ni nomuni tabatamata e bolei ka vakalialiai na nomuni vakabauta na Kalou. E dina sara, e vaka tiko oqo ni tiki ni veivakatovolei vei ira na luve ni Kalou.

E veivakasalataki talega: “Kevaka dou sa vakavuravura ena lomana na kai nona ko vuravura, ia ni dou sa sega ni vakavuravura ia kau sa digitaki kemudou mai vuravura, sa ikoya oqo sa cati kemudou kina ko vuravura.”⁸

Esa na vinakacake beka ga mo ciqoma ni gauna ga o yalataka mo muria na iVakabula, o ira era tiko ena vale vakaitamera era na sega ni duavata kina—ena domo levu, ena so na gauna.⁹ Era na saga mera veivakasaurarataki ka vakamadualaki iko.

Ia, nanuma tiko ni o sega ni saumi taro vei ira. Eda na saumi taro vua na Kalou. Dua na siga o na tu e Matana ka saumi taro me baleta na nomu bula.

Ena taroga o a rawa beka mo valuta na veitemaki ni vuravura ka muria na sala ni ivalavala dodonu.Ena tarogi iko o Koya kevaka o vakamuria na iVakabula, kevaka o lomana na wekamu, kevaka o a tovolea mo muria tiko na salatu ni bula vakatisaipeli.

Oi kemuni na taciqu kei na ganequ lomani, ena sega ni rawa ni o muria na sala ruarua. E sega ni rawa mo ciqoma na kalougata tawa-vakamacalataki rawa ni tisaipeli ka taura tikoga nomu itukutuku lewenilotu ena Babylon First Ward. Oi kemuni noqu itokani lomani, oqo sa kena gauna mo yalayala mo muria na Nona salatu o Karisito.

Ena yaco mai na siga era na kila kece kina na luve ni Kalou na veika e dodonu—oka talega kina o ira era sa vakalialia tiko na dina. Era na tekiduru ka vakatusa dina o ya, ni o Jisu na Karisito, na Dauveivueti, na Yalo Savasava kei Isireli.¹⁰ Era na kila ni a mate ena vukudra.

Ena siga o ya o na kila kina na Domona ga ena ka dina.

Ena gauna o ya, o na kila vakaidina ni ko sa kalougata dina ni ko vakabauta tiko ga, maroroya na ivakaro ni Kalou, qaravi ira na wekamu, ka tara cake na matanitu ni Kalou e vuravura.Kemuni na itokani lomani, vakadinata—ena tiko kei iko na Kalou. Vagolea na yalomu ki Vua—ka na dusimaki iko o Koya ni ko lakova na ilakolako cecere ni bula oqo.

E Sega ni Dua na Ka

Ena gauna oqo, ni da veitalanoataka meda biuta me dusimaka noda bula na Kalou, au vinakata meu vakamatatataka e dua na ka. O na sega beka ni taleitaka na veika au vakarau tukuna vei iko. Ni o taroga na Kalou na cava me caka ena veivakatulewa ni nomu bula—eso sara madaga na vakatulewa bibi—ena sega beka ni rawa ni solia vei iko Koya e dua na isaunitaro matata. Na dina oqo e sega ni bibi vua na Kalou na nomu vakatulewa, e bibi ga mo na vakayacora na nomu vakadinadina ena loma ni bai ni veiyalayalati kei na ivakavuvuli ni kosipeli.

Na kena dina, o ya ni nomu digidigi ena sega beka ni bibi me vakataka na ka o na cakava ni ko sa digidigi oti.

Me ivakaraitaki, erau sa digitaka e rua me rau vakamau, e dina ga ni so ena nodrau matavuvale era sega ni nanuma ni rau veirauti. Sa tiko na noqu vakanuinui levu vei ira na veitau vakaoqo, ni sa vakayacori oti na vakatulewa, me rau sa na dau gumatua tiko vakairau ka vakakina vua na Turaga ena yalodrau kei na nodrau vakanananu kecega. Ni rau sa veilomani ka veikauwaitaki tiko vakairau ka vakanamata tiko ena tarai cake ni gagadre vakayalo, vakayago kei na veika e vakilai e loma—ena nodrau cakava vakawasoma tiko na veika lalai—erau sa na yaco me rau sa veidonui saraga.

Me qai vakatautauvatataki oqo veirau na veitau erau nanuma ni rau sa digitaka na tamata e “taucoko” tu ka qai nanuma ni sa oti na icolacola bibi. Kevaka sa mai mudu na nodrau veikilai vakavinaka, kei na veitaratara tiko vakairau, ka qai lesuva tale na bula ni qaciqacia kei na bula vakadonui koya—na veitau oqo erau sa lakova e dua na salatu e veimuataki kina rarawa kei na veivutuni.

E dina talega oqo ena digidigi vakacakacaka. Sa ka levu na noqu vakanuinui vei ira na digia na cakacaka e sega soti ni dokai ia era cakava ena nodra vinaka taucoko ka kunea na sala me ra taleitaka ka sotava na kena veibolebole.

E lailai na noqu vakanuinui vei ira era digitaka na cakacaka e rogorogo dokai ia ka qai sega ni rawa ni ra vakabula tiko na caudre me ra rawa ni rawaka kina ena nodra cakacaka. E dina sara, na noda rawa ni sotava na veisau ena vanua ni cakacaka e dua ka na ituvaki ni itovo bibi me ra tauyavutaka o ira nomu tabatamata oqo.

Ena vinakata mo sotava vakacava na veivakatulewa bibi na Turaga?

Na Nona veidusimaki vei Oliva Kauderi kei Josefa esa veivuke vakalevu sara vei au. A kaya na Turaga vei rau, “Sa dodonu mo vakasamataka vakavinaka ena nomu vakasama; oti e dodonu mo qai taroga vei au kevaka e sa dodonu.”¹¹

Na Tamada Vakalomalagi sa solia vei kemuni e dua na mona kei na yalo.Ke o sa nuitaka na Turaga, ena vukei iko mo vakayagataka ruarua vakavinaka ena nomu vakatulewa.

Ena levu na vakatulewa, sa levu talega na digidigi mo digidigi mai kina. Ni yaco na veika oqo vei Josefa kei na nona itokani, e vakayagataka na Turaga e dua na malanivosa vakavure vakasama ni ra vakasaqara na Nona veidusimaki. Na malanivosa “E sega ni dua na ka.”¹²

Ia, ka qai tomana na Turaga, “Ia mo dou yalodina tikoga.”¹³

Na nomu cakacaka sai koya mo vakayacora na vakatulewa vinaka duadua ena itukutuku sa tiko rawa vei iko ka vakadeitaki tu ena yavu vakamareqeti kei na vakavuvuli ni kosipeli. Ka qai sasaga ena gumatua mo rawata na veika osa tuvatuva ka kina—ka mo qai yalodina.

Cakava o ya, era na qai sema na digo.

Ena veivakayalolailaitaki beka nomu rogoca ni na sega ni solia vei iko na Kalou na matailalai ni nomu ilakolako ni bula. O gadreva dina beka mo dusimaki ena ituvaki kece ni nomu bula?

O gadreva dina beka e dua me solia vei iko na kila ni lawaki ni bula ni bera ni ko qai mai kila ga vakai iko?Ena qai mataqali ilakolako ni vakadidike vakacava oqori?

Oi kemuni na noqu itokani lomani, o na lakova ga vakadua ilakolako ni vakadidike ni bula vakayago. Ena dua beka sa namaki ena lako curuma ena taucoko ni itukutuku cala kei na isau ni taro ni bula oqo me kauta laivi nomu gugumatua kei na torocake ni nomu yalonuidei¹⁴vua na Turaga kei iko?

Baleta ga ni sa solia na Kalou na nomu galala, sa vuqa na sala mo na digitaka mo gole kina ka se rawa tikoga mo bula gugumatua. Na bula oqo e dola raraba, digia ga na kemu italanoa ni ilakolako ni vakadidike.Esa toka oqori vei iko nai vunau, veiyalayalati, kei nai vakasala veivakauqeti vakaparofita, kei na solisoli ni Yalo Tabu. Oqori sa veirauti saraga me muataki iko kina marau ni bula oqo kei na reki tawamudu. Ni oti oya, kakua ni yalolailai ni ko vakayacora eso na vakatulewa e sega soti ni vinaka sara. Oqori o na vuli kina. Oqori e tiki ni lakolako ni nomu vakadidike!

E sega, ni dua nai lakolako ni vakadidike ena maravu tu ga, ia kevaka eda sa yalodina, ena rawa ni vakadeitaka na noda icavacava marautaki. Vakasamataka mada na veika e yaco vei Josefa mai Ijipita. Ena vuqa sara na sala, e vakacacani na nona bula. E volitaki koya vakabobula o iratou na tuakana. E biu yani ki valeniveivesu ena dua na cala e sega ni vakayacora. Na levu ni veituvaki caca e biliraki kina, e yalodina tikoga o koya. A nuitaka na Kalou. E vakayacora o koya na nona vinaka duadua. Ena veiyabaki yadua—ena gauna mada ga ni vaka me sa guilecavi ka biu tu o Josefa—a vakadinata. Sa dau vagolea na yalona o Josefa vua na Kalou. E qai vakaraitaka na Kalou ni rawa ni veisautaka o Koya na ca kina vinaka.¹⁵

Nikua, ni oti e 4,000 na yabaki, eda kunea tikoga na veivakauqeti ena talanoa kei Josefa.

Ena sega beka ni vakarisa-ate sara vakataki Josefa na nomu ilakolako ni vakadidike, ia ena tiko na kena vinaka kei na ca. Mo nanuma tiko na ivakaraitaki i Josefa: Mo yalodina tikoga. Vakadinata ga.Mo dina. Kakua ni ko yaloca. Kakua ni veivakaogai. Lomana na Kalou, ka lomana na wekamu. Nuitaka tikoga na Kalou, ena gauna sa madaga ni veilecayaki.

O na qai raica sara beka e muri, ia o na railesu ka qai kila ni a dusimaka dina tiko na Turaga na nomu sala.

A sema dina na digo.

Lima na Ka me Nanumi Tiko

Na cava o na cakava mo nanuma kina na nodatou gauna vata nikua?

IMatai, mo kila ni isaunimasu ni Kalou vei iko ena taura na gauna ka ra na lako mai ena sala o na sega ni namaka.Ia na isaunimasu ni Kalou era sa yavubula tawamudu.Sai yaulevu mera waraki.

IKarua, me tiko nomu vakabauta. Vagolea na yalomu vua na Kalou. Vakabauta ni o sa bibi vua na Kalou, ka nuitaka ni na rawa ni vakalevutaki iko o Koya mai na kena o rawa ni rawata vakataki iko. Vuli mai Vua. Lomani Koya. Vakadinati Koya. Vosa vakawasoma kei Koya, ka vagumatua. Rogoca na Domona.

Katolu, mo lako vakavinaka sara ena sala ni bula vakatisaipeli. Mo kakua ni yalolailai. Mo cakava ga na veika lalai ena kena taucoko sara o rawa ni rawata, ka na qai muria ga mai na veika lelevu.

IKava, kakua ni vakatara me vakatanitaka na nomu sala na domodra na dauveivakayalolailaitaki ena nomu ilakolako ni vakabauta.Nanuma tiko, o sega ni saumitaro vei ira na tani.O saumitaro vua na Tamamu mai Lomalagi.Na Nona yavu vakamareqeti e bibi cake.

iKalima, vakayacora na digidigi vinaka duadua o rawata ena nomu vakamuria na veivakauqeti e lako mai yalomu kei na nomu vakanananu. Solia na nomu vinaka duadua me na yaco. Mo vakabauta tiko, ena qai vakatabuya na Kalou na nomu sasaga ena yalodina me baleta na nomu vinaka tawamudu.¹⁶

Cakava na ka oqo, e muri, ena vinaka na ka kece.

Au sa vakalougatataki kemuni nikua kei na yabaki vou oqo ni ko saga vakaidina mo kila na Kalou, ena tubu na nomu vakabauta. Ni ko saga mo muria na nomu iVakabula, ena tubu nomu yalonuidei.¹⁷ Ni ko lako ena savasava ka dolava na yalomu ki na Rarama i Karisito o sa lomana na Kalou ena vuku ka o gu mo lomana na wekamu ena savasava mai.

Na ka kece oqo o na reki kina.

O na kune vakacegu kina.

Dua na siga, o na kune lagilagi tawamudu.

Ena siga oya, o na railesuva na ilakolako mareqeti ka marautaki ni lakolako ni vakadidike ena bula oqo, ka o na qai kila vinaka. O na qai raica ni ra veisemati na veidigo ena dua na iyaloyalo vakasakiti sara, e totoka uasivita na veika o rawa ni qai vakasamataka. Ena yalo ni vakavinavinaka sega ni tukuni rawa, o na raica ni Kalou vakataki Koya, ena Nona loloma, loloma soliwale, kei na loloma uasivi, ea dau wanonovi iko tu, ka vakalougatataki iko tiko, ka dusimaki iko ena nomu veikalawa ena nomu ilakolako Vua.

Au vakadinadinataka oqo ka solia vei kemuni e dua na veivakalougatataki vaka-iApositolo ni Turaga, ena yaca tabu ni noda iVakavuvuli, ena yaca ni noda Dauveivueti kei na iVakabula, o Jisu Karisito, emeni.