2:3

O Ni Sa iLiuliu

Sister Harriet Reich Uchtdorf

Dua na Bogi vata kei Elder Dieter F. Uchtdorf

Lotu ni iTabagone Qase Cake e Vuravura Raraba • 14, ni Janueri, 2018 • Conference Center

Kemuni na taciqu kei na ganequ lomani, noqu itokani lomani!

O ni sa vakasakiti. O ni sa rairai totoka. O ni sa totoka sara! Sa dina! Au diva saraga meu mokoti kemuni yadudua.

Na macawa sa qai oti oqo e dua na gauna ni rarawa kei na vakavinavinaka.Au lomani Peresitedi Monson. Au sa na dauvakananumi koya. Ia, au kila ni sa marau me sa tiko tale kei Frances, nona itokani tawamudu.

Sa dua na ka talei dina na tiko kei kemuni nikua. Au taleitaka talega niu tiko kei noqu iApositolo taleitaki duadua. Au kila, ni sega ni dodonu me tiko noda iApositolo taleitaki. Ia, vei au, ena DONU beka baleta ni sa watiqu o koya.

Keirau se qai marautaka wale tikoga nai ka 55 ni yabaki ni neirau vakamau, ka keirau se veidomoni tikoga!

Sa vakacava mada oya ni vua ni kosipeli! Ena gauna eda ciqoma kina na itukutuku ni loloma kei na vakanuinui vinaka ni veigauna vakaoqo mai vei ira na makubui keirau kei ira na makubui keirau vakarua, keirau sa kila kina na talei ni veivakalougatataki ni lewena na Lotu oqo kei na kosipeli.

Vei kemuni o ni sega ni vakawati, sa sere ena vakamau, se o ni sotava tiko na veibolebole ena ituvaki cava ga ni matavuvale, mo ni kila ni kilai kemuni ka lomani kemuni na Kalou, ka nomuni na dina tikoga kina nomuni veiyalayalati, na reki ni bula vakamatavuvale ena sega ni vakalekalekataki se vakuwai vei iko. Au sega ni kila vakavinaka sara ena rawa vakacava, ia au kila ena loloma soliwale kei na loloma veivueti, kei na loloma e veiganiti ka veirauti vei keda kece. Ena cakava o Koya me yaco ena Nona gauna kei na Nona sala.

Keirau a tubu cake vata mai kei Dieter ena tabana ni lotu mai Frankfurt, Jamani. Au kila ni a dau vinakati au, ia au a sega sara ni malele. E tamata vinaka, ka keirau veitokani. Keirau vulica vata na danisi ena itaviqaravi ni Lotu. Oya na gauna ni foxtrot, boogie-woogie, kei na rock and roll.

E qai lewena o koya na Mataivalu e Macawa me pailate, au sega ni raici koya me rauta e rua na yabaki. Na kena dina, nona lesu mai ki Frankfurt, e a sega soti ni vinaka na noqu nanuma taumada. E a rairai vakai ira na tagane ena iyaloyalo na Top Gun.

Ia, ena gauna keirau veitalanoa kina, esa tekivu meu malele mai vakalailai; e matata sara ni sa yalomatua sara ena rua na yabaki oya. E kila vinaka tu o koya na veika e vinakata me cakava ena nona bula, ka sa dei tu ena kosipeli.

Sa dua na ka na nona gumatua ka veiveisau na nona sasaga ni veikilai titobu, qai vica na vula ka tarava, sa veisau na yacaqu mai na Reich kina Uchtdorf. Au sega ni veivutunitaka na noqu raici koya matua, e dina ga niu a sega madaga ni malele taumada vua.

Na noqu daulomani o Dieter ka sa tama ni luvei keirau ka tubudra na makubui keirau.

Mo ni kila, ni keirau se dau taleitaka tikoga na danisi vata—me yaco mai na siga oqo.

Meu kauti kemuni mada kina gauna au se qai yabaki 12. E dua na gauna ni rarawa ena noqu bula vakagone. E mate o tamaqu ena vica na vula yani ki liu ena kenisa. E a dua na tama cecere, e tagane vakawati dau lomani tinaqu, ka dua na tamata vinaka sara. E tamata vuli vinaka, vosataka e lima na vosa duidui, vakatagitaka e va na ivakatagi duidui ena dua nai mata vakatagi saumi, ka lewe ni dua na matavuvale kilai ena ivakatagi e Frankfurt, Jamani.

Sa dua na ka na nodrau lalawaka tu na noqu itubutubu me baleti keitou. Sa totoka tu ka matatata na irairai ni veisiga ni mataka, ena gauna sara madaga ni oti na ika II ni Valu Levu. Ia na veiyabaki ni nona tauvimate levu na tamaqu sa yaco na neitou vuvale me vanua ni rarawa, yaluma ka yali na inuinui.

Ni oti na mate nei tamaqu, sa rarawa sara vakalevu na tinaqu. Ena vei Sigatabu keitou dau lako ki na neitou lotu protestant, ia keitou sega ni kunea na vakacegu i Kilioni.E vaka e sega ni dua na tamata se ka e rawa ni kauta mai na vakacegu vei tinaqu.

Ia, sega soti sara! A sega ni guilecavi keitou na Tamada Vakalomalagi, ena Nona loloma cecere.

Sa sivi e walu na vula ena nona mai leqa na tamaqu, ni rau mai tukituki ena neitou mata ni katuba e Frankfurt, Jamani e rua na daukalotu mai Amerika. E rau liutaki mai na Yalo na kaulotu ka rau vakavakarau vinaka tu, ka rau kila vinaka na veika e gadreva na neitou matavuvale lailai. Erau biuta tu mai na iVola i Momani mareqeti kei tinaqu.

E dau taleitaka na wilivola o tinaqu. Ka dau taleitaka na Volatabu. E ovigi koya totolo sara na ivolanikalou vou oqo. Ena gauna sa tekivu wilika kina na iVola i Momani, e sega ni rawa ni tarova nona wiliwili me yaco ni sa wilika oti sara na ivola. Sa dua na ka na nona marautaka na lewe ni itukutuku ka dau vinakata me keirau mai dabe vakaveitacini ka rogoci koya ena nona wilika na veitikina eso ka vakaga e volai tu me baleti koya.

Ena iotioti ni macawa ni bula nei tamaqu, au dau tu wasoma e katubaleka ni neitou vale ka masu vagumatua vua na Kalou me vakacegua neitou mosi.

Qai yaco mai na kena isau. E tiko na noqu ivakadinadina ni kosipeli vakalesui mai i Jisu Karisito. Sa dua na ka noqu taleitaka na iVola i Momani. Sa dua na ka na noqu taleitaka na ituvatuva ni veivakabulai, na ituvatuva ni marau. E dua na itukutuku totoka ka mana sara ni nuinui kei na rarama ka soli vei keda mai vei Tamada Vakalomalagi. Ni keitou ciqoma nai Vola i Momani, e vakamalumutaka na mosi ni yaloi keitou ka vakaseavutaka na yaluma kei na rarawa e vakavuna na mate nei tamaqu.

Sa sega na butobuto ena neitou vale, ni sa sega ni rawa ni tiko vata na butobuto kei na rarama ena vanua vata ga ena dua na gauna ni sa tiko na iVola i Momani. Keitou vakila na Yalo ena kena kaukauwa, keitou kila ena vuni yaloi keitou kei na neitou vakasama ni sa dina na itukutuku e vakavulica tiko vei keitou na daukaulotu.

E lesu tale mai kina neitou vuvale na vakacegu. Na itukutuku ni kosipeli kei na neitou lewe ni lotu ni Lotu i Jisu Karisito ni Yalododonu Edaidai e kauta mai na cakamana dina ki na neitou vuvale. E vaka me ra a talai mai vei keitou na agilosi.

O rau na rua na daukaulotu e rau lako mai ki neitou vale mai Frankfurt, Jamani, e rau yabaki vata kei kemuni. E sega ni vakasakiti na itukutuku ni nodrau bula. Ia erau vaka e rua na agilosi lagilagi e vakatala mai vei keitou na Kalou. E rau kauta mai vei keitou na veivakalougatataki ni kosipeli vakalesui mai i Jisu Karisito.

Kemuni na noqu itokani lomani, o ni a buli talega mai ena veigacagaca vakalou. Eso vei kemuni o ni sa vakamau, eso o ni sega ni vakamau, ia oi kemuni kece o ni tiko maliwai ira na tamata ena vuravura oqo. O ni sa tamata digitaki ni noda gauna, ena vosa kei na cakacaka o ni na vakavulica ka bulataka na kosipeli ena kedra maliwa na nomuni tamata. Ena inaki oqo, o ni sa vakatikori kina ena nomu koro se tauni, koronivuli se vanua ni cakacaka, nomuni matanitu, kei na vuvale. Kakua ni guilecava, e rawa ni o yaco mo agilosi ni lagilagi vei ira na tiko volekati iko.

O sa matataka tiko na Lotu i Jisu Karisito, ka o ni sa iliuliu mana ena kena vakatetei nai tukutuku ni kosipeli ena nomuni bula vinaka kei na veivakadinadina qaqa.

E dua na iliuliu e vukei ira na tani me ra raica, vakila, ka kunea na sala dodonu. Ni yalovinaka mo ni veivukei mo ni na veivukei mo ni sa tudei tiko ena Lotu kei na kosipeli. Esa biuti kemuni na Kalou ena dua na vanua e levu tu kina na madigi mo ni iyaragi ena liga ni Turaga o Jisu Karisito. Esa nuitaki iko, e kilai iko, e yalonuidei, ka na vakaukauwataki iko o Koya. Ni sa bula tiko o Koya. Sa tiko vakaidina o Koya!

Na vosa kei na caka vinaka yadua e rawarawa ni yalodina, loloma uasivi, yalovinaka, veiqaravi, loloma kei na yalololoma ena rawa ni nomu cakacaka ni veiliutaki ena matanitu ni Kalou. Kakua ni beca na nomu veivakayarayarataki kei na mana ni caka vinaka. E rua na cauravou gone ka yabaki vata kei kemuni a vukei au meu raica na salatu e veimuataki vua noda iVakabula ka lesu tale vei Tamada Vakalomalagi.

E dina ga, niu lako duadua na salatu, lako curu na veibolebole, kunea vakataki au na saunitaro, cakava eso na digidigi dredre, ka vakatulewa vakataki au. Oi kemuni talega! Na Kalou kei na Lotu e solia tu vei iko na ivurevure mana mo rawata kina na inaki ni nomu bula. Nai Vola i Momani e dua vei ira oqo, ka sa biu sara tu ga e matamu. Dolele yani ka ciqoma kei na kena ivakvuvuli. Dolele yani vua na Tamada Vakalomalagi ka na qai dusimaki iko o Koya. Vakabauta na Turaga!

Kemuni na noqu itokani lomani, yalovinaka mo ni kila na noqu loloma kei na vakavinavinaka vei kemuni yadua. Na noqu masu kei na veivakalougatataki sa tiko kei kemuni. O ni sa tiki bibi ni cakacaka totoka ka vakatabui ni noda Dauveivueti. Au vakadinadinataka oqo ena yaca i Jisu Karisito, emeni.