បងប្អូនគឺជាអ្នកដឹកនាំ
ជំនួបជាមួយនឹងប្រធាន ឌៀថើរ អេហ្វ អុជដូហ្វ
ការប្រជុំធម្មនិដ្ឋានសម្រាប់យុវមជ្ឈិមវ័យទូទាំងពិភពលោក• ថ្ងៃទី ១៤ ខែមករា ឆ្នាំ២០១៨• មជ្ឈមណ្ឌលសន្និសីទ
បងប្អូនប្រុសស្រី និងមិត្តយុវវ័យជាទីស្រឡាញ់ !
ប្អូនៗអស្ចារ្យណាស់ ។ ប្អូនៗ ស្រស់ស្អាតណាស់ ។ អូនពូកែណាស់ ។ អស្ចារ្យមែន ! ខ្ញុំចង់ឱបបងប្អូនម្នាក់ៗ ។
កាលពីសប្ដាហ៍មុននេះ គឺជាគ្រាមួយដ៏សោកសៅ និងអំណរគុណ ។ ខ្ញុំស្រឡាញ់ប្រធាន ម៉នសុន ។ ខ្ញុំនឹងនឹកលោក ។ ប៉ុន្តែខ្ញុំដឹងច្បាស់ថា លោករីករាយដើម្បីនៅជុំគ្នានឹងហ្វ្រែនស៊ីស ដែលជាដៃគូអស់កល្បជានិច្ចរបស់លោកម្ដងទៀត ។
វាគឺជាដ៏ល្អណាស់ដែលជួបបងប្អូននាថ្ងៃនេះ ។ ខ្ញុំក៏ចូលចិត្តនៅជាមួយនឹងសាវកសំណព្វរបស់ខ្ញុំផងដែរ ។ ខ្ញុំដឹងថា យើងមិនគួរចូលចិត្តសាវករូបណាជាងរូបណានោះឡើយ ។ ប៉ុន្តែក្នុងករណីរបស់ខ្ញុំ វាដូចជាមិនថ្វីទេ ដោយសារខ្ញុំបានរៀបការនឹងគាត់ ។
ពួកយើងទើបតែធ្វើពិធីខួបអាពាហ៍ពិពាហ៍គម្រប់ ៥៥ ឆ្នាំរបស់យើង ហើយយើងនៅតែស្រឡាញ់គ្នា !
ពិភាក្សាអំពីផលផ្លែនៃដំណឹងល្អ ! នៅពេលយើងទទួលសារនៃ សេចក្ដីស្រឡាញ់ និងការអបអរសាទរសម្រាប់គ្រានេះមកពីចៅ និងចៅទួតរបស់យើង នោះយើងដឹងអំពីពរជ័យដ៏ធំធេងនៃសមាជិកភាពក្នុងសាសនាចក្រ និងដំណឹងល្អ ។
ចំពោះបងប្អូនដែលនៅលីវ បានលែងលះ គ្នា ឬរស់នៅក្នុងគ្រួសារមួយដែលជួបបញ្ហាពិបាក សូមដឹងថា ព្រះស្គាល់ ហើយស្រឡាញ់បងប្អូន ហើយនៅពេលបងប្អូនបន្តស្មោះត្រង់ចំពោះសេចក្ដីសញ្ញារបស់បងប្អូន នោះអំណរនៃជីវិតគ្រួសារនឹងកើតមានចំពោះបងប្អូន ។ ខ្ញុំពុំដឹងថា វាកើតឡើងយ៉ាងណាទេ ប៉ុន្តែខ្ញុំពិតជាដឹងថា ព្រះគុណ សេចក្ដីមេត្តាករុណា និងសេចក្ដីស្រឡាញ់របស់ព្រះមានគ្រប់គ្រាន់សម្រាប់យើងទាំងអស់គ្នា ។ ទ្រង់នឹងធ្វើឲ្យវាកើតឡើងស្របតាមរបៀប និងកាលវេលារបស់ទ្រង់ ។
ឌៀថើរ និងខ្ញុំបានធំដឹងក្ដីឡើងនៅក្នុងសាខាជាមួយគ្នានៅទីក្រុងហ្វ្រេងហ្វ៊ឺត ប្រទេសអាល្លឺម៉ង់ ។ ខ្ញុំបានដឹងថា គាត់បានលួចស្រឡាញ់ខ្ញុំ ប៉ុន្តែខ្ញុំពុំបានចាប់អារម្មណ៍លើគាត់ទេ ។ គាត់គឺជាមនុស្សល្អ ហើយយើងគឺជាមិត្តនឹងគ្នា ។ យើងហាត់រាំជាមួយគ្នានៅឯសកម្មភាពរបស់សាសនាចក្រ ។ វាគឺជាសម័យពេញនិយមនៃចង្វាក់ ហ្វកត្រូត, ប៊ូហ្គី-វ៉ូហ្គី និង រ៉ក់ អែន រ៉ូល ។
បន្ទាប់ពីគាត់បានចូលក្នុងទ័ពអាកាសដើម្បីក្លាយជាអ្នកបើកយន្តហោះ ខ្ញុំពុំបានឃើញគាត់ជិតពីរឆ្នាំ ។ និយាយឲ្យស្មោះចុះ នៅពេលគាត់ត្រឡប់មកទីក្រុងហ្វ្រេងហ្វឺតវិញ ខ្ញុំពុំសូមមានចំណាប់អារម្មណ៍លើគាត់ប៉ុន្មានទេ ។ គាត់មានរូបរាងដូចជាបុរសនៅក្នុងខ្សែភាពយន្ត Top Gun ។
ប៉ុន្តែនៅពេលគាត់មកនិយាយនឹងខ្ញុំ ខ្ញុំមានការស្ងើចសរសើរ ពិតណាស់គាត់មានភាពចាស់ទុំច្រើនក្នុងរយៈពេលពីរឆ្នាំនោះ ។ គាត់បានដឹងអ្វីដែលគាត់ចង់ធ្វើចំពោះជីវិតរបស់គាត់ ហើយគាត់រឹងមាំ នៅក្នុងដំណឹងល្អ ។
គាត់បានខិតខំ ហើយមានគំនិតច្នៃប្រឌិតជាខ្លាំងក្នុងការសុំស្រឡាញ់ខ្ញុំ ហើយប៉ុន្មានខែក្រោយមក យើងបានរៀបការ ហើយខ្ញុំបានប្ដូរត្រកូលពី រីច ទៅជាអុជដូហ្វ ។ ខ្ញុំពុំដែលសោកស្ដាយឡើយ ដែលខ្ញុំបានមើលទៅចំណុចល្អរបស់គាត់ ទោះជាបានគិតអវិជ្ជមានកាលជួបគាត់លើកដំបូងក្ដី ។
ឌៀថើរ គឺជាម្ចាស់ជីវិតខ្ញុំ និងជាឪពុក និងជាជីតាដ៏មានមោទនភាពសម្រាប់កូនៗព្រមទាំងចៅៗរបស់យើង ។
ហើយបងប្អូនត្រូវដឹងថា យើងនៅតែចូលចិត្តរាំជាមួយគ្នា—ទោះជានៅសព្វថ្ងៃនេះក្ដី ។
ខ្ញុំសូមនាំបងប្អូនត្រឡប់ទៅគ្រាមួយ ពេលខ្ញុំមានអាយុ ១២ ឆ្នាំ ។ វាគឺជាគ្រាមួយដ៏សោកសៅក្នុងជីវិតវ័យក្មេងរបស់ខ្ញុំ ។ ឪពុករបស់ខ្ញុំបានចែកឋានទៅដោយសារជំងឺមហារីកកាលពីរបីខែមុននោះ ។ គាត់គឺជាឪពុកម្នាក់ដ៏ល្អ ជាស្វាមីដ៏គួរឲ្យស្រឡាញ់ និងជាបុរសម្នាក់ដ៏ល្អ ។ គាត់មានការអប់រំខ្ពស់ ចេះនិយាយប្រាំភាសា ចេះលេងឧបករណ៍តន្ត្រីយ៉ាងស្ទាត់ជំនាញនៅក្នុងក្រុមតន្ត្រីមួយ ហើយបានរស់នៅក្នុងគ្រួសារតន្ត្រីករដ៏ល្បីល្បាញមួយនៅទីក្រុងហ្វ្រេងហ្វឺត ។
ឪពុកម្ដាយរបស់ខ្ញុំមានផែនការដ៏ធំសម្រាប់យើង ។ អនាគតមើលទៅដូចជាមានភាព ភ្លឺស្វាង និងប្រកបដោយកិច្ចសន្យា សូម្បីតែក្រោយពីគ្រាដ៏បំផ្លិចបំផ្លាញនៃសង្គ្រាមលោកលើកទី២ ក្ដី ។ ប៉ុន្តែគ្រាដែលឪពុករបស់ខ្ញុំមានជំងឺបានធ្វើឲ្យគ្រួសាររបស់យើងធ្លាក់ទៅក្នុងការរងទុក្ខ ភាពសោកសៅ និងភាពអស់សង្ឃឹម ។
បន្ទាប់ពីឪពុកខ្ញុំបានស្លាប់ទៅ ម្ដាយរបស់ខ្ញុំមានការថប់បារម្ភយ៉ាងខ្លាំង ។ នៅថ្ងៃអាទិត្យ យើងបានទៅព្រះវិហារប្រូតេស្តង់របស់យើង ប៉ុន្តែយើងរកមិនឃើញនូវការលួងលោមចិត្តឡើយ ។ វាហាក់ដូចជាគ្មានអ្វី ឬក៏នរណាម្នាក់ដែលអាចលួងលោមចិត្តម្ដាយរបស់ខ្ញុំបានឡើយ ។
មែនហើយ វាពុំស្កប់ចិត្តសោះឡើយ ! ដោយសេចក្ដីស្រឡាញ់ដ៏ធំធេងរបស់ទ្រង់ ព្រះវរបិតាសួគ៌យើង ពុំបានភ្លេចយើងឡើយ ។
បន្ទាប់ពីឪពុករបស់ខ្ញុំបានចែកឋានទៅបានប្រាំបីខែ ក៏មានពួកអ្នកផ្សព្វផ្សាយសាសនាជនជាតិអាមេរិកពីរនាក់មកគោះទ្វារផ្ទះរបស់យើងនៅទីក្រុងហ្វ្រែងហ្វើត ។ ពួកអ្នកផ្សព្វផ្សាយសាសនាពីរនាក់នោះ បានដឹកនាំដោយព្រះវិញ្ញាណ ហើយបានរៀបចំ ខ្លួនយ៉ាងល្អ បានដឹងយ៉ាងប្រាកដនូវអ្វីដែលគ្រួសារដ៏តូចរបស់យើងត្រូវការ ។ ពួកគេបានទុកព្រះគម្ពីរមរមនដ៏មានតម្លៃឲ្យម្ដាយរបស់ខ្ញុំ ។
ម្ដាយរបស់ខ្ញុំចូលចិត្តអានសៀវភៅណាស់ ។ ហើយគាត់ស្រឡាញ់ព្រះគម្ពីរប៊ីប ។ រំពេចនោះ គាត់មានការចាប់ចិត្តនឹងព្រះគម្ពីរថ្មីនោះ ។ កាលគាត់បានចាប់ផ្ដើមអានព្រះគម្ពីរមរមន គាត់អានមិនឈប់សោះរហូតដល់គាត់អានវាចប់ ។ ម្ដាយរបស់អ្នកមានចិត្តរំភើបជាខ្លាំងអំពីមាតិកា និង សារលិខិតនៃព្រះគម្ពីរមរមននោះ ដែលជារឿយៗគាត់ឲ្យបងស្រីរបស់ខ្ញុំ និងខ្ញុំអង្គុយចុះស្ដាប់ កាលគាត់អានខគម្ពីរដែលទំនងជាសរសេរសម្រាប់យើង ។
នៅប៉ុន្មានសប្ដាហ៍ចុងក្រោយនៃជីវិតរបស់ឪពុកខ្ញុំ ជារឿយៗ ខ្ញុំបានឈរនៅក្បែរមាត់បង្អួចផ្ទះរបស់យើង អធិស្ឋានសូមឲ្យព្រះបន្ធូរការឈឺចាប់របស់យើង ។
ហើយចម្លើយបានកើតមាន ។ វាមានតាមរយៈសារលិខិតនៃដំណឹងល្អនៃព្រះយេស៊ូវគ្រីស្ទដែលបានស្ដារឡើងវិញ ។ ខ្ញុំស្រឡាញ់ព្រះគម្ពីរមរមនខ្លាំងណាស់ ។ ខ្ញុំស្រឡាញ់នូវសារលិខិតរបស់វាស្ដីពីផែនការនៃសេចក្ដីសង្គ្រោះ ជាផែនការនៃសុភមង្គលខ្លាំងណាស់ ។ ឱ! នេះគឺជាសារលិខិតនៃសេចក្ដីសង្ឃឹម និងពន្លឺដ៏ស្រស់បំព្រង ហើយមានអនុភាពអ្វីម្ល៉េះ ដែលព្រះវរបិតាសួគ៌បានប្រទានដល់យើង ។ នៅពេលយើងសិក្សាព្រះគម្ពីរមរមន វាបានរម្ងាប់ចិត្តឈឺចាប់របស់យើង ហើយបានព្យាបាលភាពអស់សង្ឃឹម និងភាពសោកសៅរបស់យើងដែលបណ្ដាលមកពីមរណភាពរបស់ឪពុកខ្ញុំ ។
ដោយមានព្រះគម្ពីរមរមននៅក្នុងផ្ទះរបស់យើង នោះភាពងងឹតនៅក្នុងគ្រួសាររបស់យើងលែងមានទៀតហើយ ដោយសារពន្លឺ និងភាពងងឹតពុំអាចនៅកន្លែងតែមួយក្នុងពេលតែមួយបានឡើយ ។ យើងទទួលអារម្មណ៍ពីព្រះវិញ្ញាណយ៉ាងខ្លាំង ហើយយើងបានដឹងដោយអស់ពីចិត្ត និងគំនិតរបស់យើងថា សារលិខិតដែលពួកអ្នកផ្សព្វផ្សាយសាសនាបាននាំយកមកគឺជាការពិត ។
សេចក្ដីសុខសាន្តបានកើតមានក្នុងផ្ទះរបស់យើង ។ សារលិខិតនៃដំណឹងល្អ និងសមាជិកភាពក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយបាននាំមកនូវអព្ភូតហេតុដ៏ពិតមួយដល់គ្រួសាររបស់យើង ។ វាហាក់ដូចជា មានពួកទេវតាត្រូវបានបញ្ជូនមកជួយយើងដូច្នោះដែរ ។
អ្នកផ្សព្វផ្សាយសាសនាទាំងពីរនាក់ដែលបានមកផ្ទះរបស់យើងមានវ័យស្របាលនឹងបងប្អូន ។ ពួកគេគឺជាមនុស្សដែលមានប្រវត្តិធម្មតា ។ ប៉ុន្តែពួកគេប្រៀបបានទៅនឹងពួកទេវតានៃសិរីល្អដែលបានបញ្ជូនមកឲ្យជួយយើងដូច្នោះដែរ ។ ពួកគេបាននាំមកឲ្យយើងនូវពរជ័យនៃដំណឹងល្អនៃព្រះយេស៊ូវគ្រីស្ទដែលបានស្ដារឡើងវិញ ។
មិត្តយុវវ័យជាទីស្រឡាញ់របស់ខ្ញុំអើយ បងប្អូនត្រូវបានធ្វើឡើងដោយអង្គធាតុដ៏ទេវភាពដូចគ្នានេះ ។ បងប្អូនមួយចំនួនបានរៀបការរួចហើយ ខ្លះទៀតនៅលីវ ប៉ុន្តែបងប្អូនទាំងអស់គ្នាកំពុងរស់នៅក្នុងចំណោមប្រជាជននៃពិភពលោកនេះ ។ បងប្អូនគឺជាពួកជម្រើសសម្រាប់ជំនាន់របស់យើង ដែលបង្រៀន ហើយរស់នៅតាមសារលិខិតនៃដំណឹងល្អដល់ប្រជាជនរបស់បងប្អូនតាមពាក្យសម្ដី និងទង្វើ ។ ដោយសារគោលបំណងនេះ ទើបបងប្អូនត្រូវបានដាក់នៅក្នុងភូមិ ឬទីក្រុងសាលារៀន ឬកន្លែងការងារ ប្រជាជាតិ និងគ្រួសាររបស់បងប្អូន ។ សូមកុំខ្លាច បងប្អូនមានសក្ដានុពលដើម្បីធ្វើជាពួកទេវតាដ៏រុងរឿងដល់មនុស្សដែលនៅក្បែរបងប្អូន ។
បងប្អូនតំណាងឲ្យសាសនាចក្រនៃព្រះយេស៊ូវគ្រីស្ទ ហើយបងប្អូនគឺជាអ្នកដឹកនាំដ៏មានអនុភាពនៅក្នុងការប្រកាសសារលិខិតដំណឹងល្អតាមរយៈជីវិតដ៏ប្រពៃ និងទីបន្ទាល់ដ៏ក្លៀវក្លារបស់បងប្អូន ។
អ្នកដឹកនាំម្នាក់គឺជាបុគ្គលដែលជួយមនុស្សដទៃឲ្យមើលឃើញ ទទួលអារម្មណ៍ ហើយរកឃើញផ្លូវត្រូវ ។ សូមជួយគ្នាឲ្យចាក់គ្រឹះយ៉ាងជ្រៅនៅក្នុងសាសនាចក្រ និងក្នុងដំណឹងល្អ ។ ព្រះដាក់បងប្អូននៅកន្លែងមួយដែលបងប្អូនមានឱកាសជាច្រើនធ្វើជាឧបករណ៍ក្នុងព្រះហស្ដនៃព្រះអម្ចាស់ ព្រះយេស៊ូវគ្រីស្ទ ។ ទ្រង់ពឹងផ្អែកលើបងប្អូន ទ្រង់ស្គាល់បងប្អូន ទ្រង់ទុកព្រះទ័យលើបងប្អូន ហើយទ្រង់នឹងធ្វើឲ្យបងប្អូនមានអនុភាព ។ ទ្រង់មានព្រះជន្មរស់ ។ ទ្រង់មានពិត ។
រាល់ពាក្យសម្ដី ឬទង្វើដ៏សាមញ្ញ ហើយច្បាស់នៃសេចក្ដីល្អ សេចក្ដីថ្លែថ្នូរ សេចក្ដីសប្បុរស សន្ដានចិត្តល្អ ការបម្រើ សេចក្ដីស្រឡាញ់ និងសេចក្ដីមេត្តាករុណាអាចក្លាយជាសកម្មភាពរបស់បងប្អូននៃភាពជាអ្នកដឹកនាំក្នុងនគរព្រះ ។ សូមកុំមើលងាយចំពោះឥទ្ធិពល និងអនុភាពរបស់បងប្អូនសម្រាប់សេចក្ដីល្អឡើយ ។ អ្នកផ្សព្វផ្សាយសាសនាវ័យក្មេងទាំងពីរនាក់នេះដែលមានវ័យស្របាលនឹងបងប្អូនបានជួយខ្ញុំឲ្យមើលឃើញផ្លូវដែលដឹកនាំទៅរកព្រះអង្គសង្គ្រោះរបស់យើង ហើយត្រឡប់ទៅរកព្រះវរបិតាសួគ៌វិញ ។
ពិតណាស់ ខ្ញុំត្រូវដើរនៅលើផ្លូវនេះដោយខ្លួនឯង យកឈ្នះការប្រឈមនានា ស្វែងរកចម្លើយចំពោះសំណួរទាំងឡាយ ជួបនឹងការជ្រើសរើសសំខាន់ៗ ហើយធ្វើការសម្រេចចិត្ត ។ ហើយបងប្អូននឹងធ្វើដូចគ្នាដែរ ! សាសនាចក្រ និងព្រះអម្ចាស់ផ្ដល់ធនធានដ៏មានអនុភាពដល់បងប្អូន ដើម្បីសម្រេចគោលបំណងរបស់បងប្អូននៅក្នុងជីវិត ។ ព្រះគម្ពីរមរមនគឺជាធនធានមួយក្នុងចំណោមធនធានទាំងនោះ ហើយវាត្រូវបានដាក់នៅពីមុខបងប្អូន ។ សូមឈោងទៅឱបក្រសោបវា និងការបង្រៀនរបស់វា ។ សូមឈោងទៅរកព្រះវរបិតាសួគ៌ ហើយទ្រង់នឹងដឹកនាំបងប្អូន ។ សូមទុកចិត្តលើព្រះអម្ចាស់ !
មិត្តវ័យក្មេងរបស់ខ្ញុំអើយ សូមដឹងថា ខ្ញុំស្រឡាញ់ ហើយមានអំណរគុណចំពោះបងប្អូនគ្រប់គ្នាម្នាក់ៗ ។ ការអធិស្ឋាន និងពរជ័យរបស់ខ្ញុំនៅជាមួយនឹងបងប្អូន ។ បងប្អូនគឺជាផ្នែកមួយដ៏សំខាន់នៃកិច្ចការពិសិដ្ឋដ៏អស្ចារ្យនេះនៃព្រះដ៏ប្រោសលោះរបស់យើង ។ ខ្ញុំសូមថ្លែងទីបន្ទាល់អំពីការណ៍នេះនៅក្នុងព្រះនាមនៃព្រះយេស៊ូវគ្រីស្ទ អាម៉ែន ។
© 2018 by Intellectual Reserve, Inc. All rights reserved. អនុមតិជាភាសាអង់គ្លេស ៖ ៩/១៧ ។ អនុមតិការបកប្រែ ៖ ៩/១៧ ។ ការបកប្រែនៃ« You Are Leaders » ។ Cambodian ។ PD60005038 258