2:3

E feiā fa’atere ’outou

Te tuahine Harriet Reich Uchtdorf

Te hō’ē ’āru’i ’e te peresideni Dieter F. Uchtdorf

Purera’a ’ati ti’a i te ao nō te Feiā ’Āpī Pa’ari • 14 nō tēnuare 2018 • Pū ’āmuira’a

E to’u mau taea’e, e mau tuahine here, to’u mau hoa taure’are’a !

E mea hāviti ’outou. E mea nehenehe mau ’outou. E mea fa’ahiahia mau ’outou. ’Auē te au ē ! Tē hia’ai nei au e tauahi ia ’outou tāta’itahi.

’Ua riro te hepetoma i ma’iri ’ei taime ’oto ’e te ha’amāuruuru. ’Ua here au i te peresideni Monson. E mihi au iāna. Pāpū roa rā iā’u ē, tē ’oa’oa nei ’ōna ia fārerei fa’ahou ia Frances, tōna ’āpiti mure ’ore.

E mea au roa ’ia tae mai i rotopū ia ’outou i teie mahana. E mea au ato’a nō’u tei ’ō nei tō’u ’āpōsetolo au roa a’e. ’Oia, ’eiaha tātou e mā’iti’iti i te ’āpōsetolo. Nō’u nei rā, ’aita paha e fifi, ’ua fa’aipoipo vau iāna.

Nō fa’ahanahana noa iho nei māua i te 55ra’a o tā māua fa’aipoipora’a, ’e tē here noa nei ā māua !

Nō ni’a i te mau hotu o te ’evanelia ! ’Ia fāri’i māua i te tāpa’o here ’e te parau fa’ahiahia i terā mau ’ōro’a mai roto mai i tō māua mau mo’otua ’e mau hina, e ’ite māua i te faufa’a rahi o te ha’amaita’ira’a ’ia riro ’ei melo nō te ’Ēkālesia ’e ’ia fāna’o i te ’ēvanelia.

’Outou te ta’ata ’ōtahi, te ta’ata i ta’a i te hoa fa’aipoipo ’e tē fa’aruru nei i te mau tāfifira’a ’utuāfare, ’ia ’ite ’outou ē, ’ua ’ite te Atua ia ’outou ’e ’ua here ’oia ia ’outou, ’e ’ia vai ha’apa’o noa ’outou i tā ’outou mau fafaura’a, e’ita te ’oa’oa orara’a ’utuāfare e fa’a’erehia ’outou ’aore rā e ’ōpanihia nō ’outou. ’Aita vau i ’ite pāpū nāhea te reira, ’ua ’ite mau rā vau ē, ’ua nava’i te maita’i ’e te aroha ’e te here o te Fatu nō tātou pā’āto’a nei. E fa’atupu ’oia i te reira, mai te au i tāna rāve’a ’e tōna taime.

’Ua pa’ari māua Dieter i roto i te hō’ē ā ’āma’a i Francfort, i Heremani. ’Ua ’ite au tē tupu ra tōna here iā’u, ’aita rā vau i tāu’a atu. E mea maita’i ’oia, e hoa māua. ’Ua ha’api’i māua i te ’ori i tā mātou mau fa’a’oa’oara’a i te fare purera’a. E tau nō te ’ori foxtrot, te boogie-woogie ’e te rock and roll.

I tōna ōra’a i roto i te nu’u nō te reva ’ei pairati, ’aita vau i ’ite iāna fātata e piti matahiti. E parau mau, i tōna ho’ira’a mai i Francfort, tō’u mana’o i reira ra, ’aita tō’u mana’o i pae nōna. Hōho’a ri’i ’oia i te mau ta’ata i roto i te hōho’a Top Gun.

I te paraparaura’a mai rā ’oia iā’u, ’ua maere ri’i au; e au ra ’ua pa’ari tōna ferurira’a i terā nā piti matahiti. ’Ua ’ite ’oia i tāna e hina’aro i tōna orara’a, ’e ’ua pūai ’oia i roto i te ’evanelia.

Nā roto i tōna onoonora’a, ’e te aravihi i te fa’aitoitora’a i te fa’a’ite mai i tōna here, tau ’āva’e i muri mai ’ua fa’aipoipo māua ’e ’ua taui tō’u pa’era’a Reich ’ei Uchtdorf. ’Aita vau i tātarahapa noa a’e i te hi’o-maita’i-ra’a iāna, noa atu tō’u mana’o pāpū ’ore mātāmua i te ha’amatara’a.

’O Dieter ta’u here ’e e metua tāne maita’i ’e te pāpā rū’au ho’i nō tā māua mau tamari’i ’e tā rātou ato’a mau tamari’i.

’Ia ’ite ’outou ē, tē au noa nei ā māua i te ’ori—tae roa mai i teie nei mahana.

Hōho’i na tātou i te 12ra’a o tō’u matahiti. E taime ’oto te reira i roto i tō’u ’āpīra’a. ’Ua fa’aru’e mai tō’u metua tāne i te ma’i mariri ’aita’ata ma’a ’āva’e nā mua atu. E metua tāne maita’i roa, e tāne fa’aipoipo here rahi ’e e ta’ata maita’i. ’Ua manuia maita’i ’oia i te ha’api’ira’a, e paraparau ’oia e pae reo, e ha’uti ’oia e rave rahi ’upa’upa ta’a ’ē i roto i te hō’ē pupu ’upa’upa, nō roto mai ’oia i te hō’ē ’utuāfare ’upa’upa tu’i ro’o nō Francfort.

E mau ’ōpuara’a rahi tā tō’u nā metua nō mātou. E mea ’ana’ana te ananahi ’e te rahi, noa atu terā nau matahiti ha’amoura’a o te Tama’i Rahi II o te ao. I terā rā mau matahiti ’a ma’ihia ai tō’u metua tāne, ’ua riro tō mātou fare ’ei fare nō te māuiui ’e te ’oto ’e te tapineva.

I te fa’aru’era’a mai tō’u metua tāne, ’ua fa’aturuma roa tō’u metua vahine. I te sābati, e haere mātou i tā mātou purera’a porotetani, ’aita rā te rā’au i Gileada i ’itehia mai. Mai te huru ē, ’aita hō’ē noa a’e mea ’e hō’ē noa a’e ta’ata e nehenehe e tāmarū i tō’u metua vahine.

’Eiaha i terā taime !Nō tōna rā here rahi, ’aita tō tātou metua i te Ao ra i ha’amo’e ia mātou.

E va’u ’āva’e i muri mai i te fa’aru’era’a mai tō’u metua tāne, ’ua haere maira e piti misiōnare marite e pātōtō i tō mātou ’ūputa i Francfort. Arata’ihia e te Vārua ’e ma te fa’aineine maita’i, ’ua ’ite pāpū roa teie nā misiōnare e piti i te hina’aro o tō mātou ’utuāfare iti. ’Ua vaiiho mai rāua i terā Buka a Moromona tao’a rahi i tō’u metua vahine ra.

E mea au nā tō’u metua vahine i te tai’o. ’E ’ua here ’oia i te Bibilia. ’Ua au ’oi’oi ’oia i teie buka pāpa’ira’a mo’a ’āpī. I te ha’amatara’a iho ā ’oia i te tai’o i te Buka a Moromona, e’ita tāna e nehenehe fa’ahou e fa’aea ē oti roa atu te buka i te tai’ohia. ’Ua au roa tō’u metua vahine i te mea i roto i te Buka a Moromona ’e tō te reira poro’i, nō reira ’ua fa’apārahi pinepine mai ’oia iā māua tō’u tuahine nō te fa’aro’o iāna ’ia tai’o i te tahi mau ’īrava, mai te huru ’ua pāpa’i-ta’a-’ē-hia nō mātou.

I te hepetoma hope’a o tō’u metua tāne i ni’a i te fenua nei, ’ua ti’a pinepine au i te ha’amāramarama o tō mātou fare tahua nō te pure māite i te Atua ’ia tātarahia tō mātou māuiui.

’E ’ua tae mai te pāhonora’a. E mea nā roto i te poro’i a te ’evanelia a Iesu Mesia i fa’aho’i-fa’ahou-hia mai. ’Ua here roa vau i te Buka a Moromona. ’Ua here roa vau i tō te reira poro’i nō te fa’anahora’a nō te fa’aorara’a, te fa’anahora’a ’oa’oa. ’Auē ïa poro’i nehenehe ’e te mana rahi nō te tīa’i ’e te māramarama tei hōro’ahia ia mātou e te Metua i te Ao ra. I tō mātou fāri’ira’a i te Buka a Moromona, ’ua marū tō mātou ’ā’au ’e ’ua fa’aorahia tō mātou taiā ’e te ’oto i tupu nō te pohera’a tō’u metua tāne.

Maoti te Buka a Moromona i roto i tō mātou fare, ’aita fa’ahou e pōiri i roto i tō mātou ’utuāfare, e’ita ho’i te māramarama ’e te pōiri e nehenehe e vai i te vāhi hō’ē i te hō’ē ā taime. ’Ua putapū pūai roa mātou i te Vārua ’e ’ua ’ite mātou ma tō mātou ’ā’au ato’a ’e i tō mātou ferurira’a ē, e parau mau te poro’i a teie mau misiōnare.

’Ua tupu fa’ahou te hau i tō mātou fare. ’Ua fa’atae te poro’i o te ’evanelia ’e te melora’a i roto i te ’Ēkālesia a Iesu Mesia i te Feiā Mo’a i te mau Mahana Hope’a Nei i te hō’ē semeio mau i tō mātou nei ’utuāfare. Mai te huru ’ua tonohia mai te mau melahi ia mātou.

Hō’ē ā fāito tō ’outou ’e nā misiōnare e piti tei haere mai i tō mātou fare. ’Aita e parau ta’a ’ē nō ni’a ia rāua. ’Ua riro rā rāua ’ei melahi hanahana tei tonohia mai ia mātou e te Atua. ’Ua hōpoi mai rāua i te mau ha’amaita’ira’a nō te ’evanelia a Iesu Mesia tei fa’aho’ihia mai.

E au mau hoa taure’are’a, ’ua hāmani-ato’a-hia i te reira mātēria hanahana. Tē vai ra vetahi o ’outou tei fa’aipoipo, tē vai ra te ’ōtahi, pauroa rā ’outu e ora nei i rotopū i te mau ta’ata o teie nei ao. ’O ’outou tei mā’itihia i tō tātou nei mahana, ’o ’outou te ha’api’i atu ’e te ora atu i te poro’i o te ’evanelia i rotopū i tō ’outou feiā, nā roto i te parau ’e te ’ohipa. Nō reira ’outou i tu’uhia ai i roto i tō ’outou mau ’oire iti, mau ’oire, mau fare ha’api’ira’a ’e mau vāhi ’ohipara’a, mau nūna’a, mau ’utuāfare. ’Eiaha ’ia mo’ehia ia ’outou, e fāito pūai tō ’outou nō te riro ’ei mau melahi hanahana nō te feiā i pīha’i iho ia ’outou.

Tē ti’a nei ’outou nō te ’Ēkālesia a Iesu Mesia, ’e e mau feiā fa’atere pūai ’outou i te porora’a i te poro’i o te ’evanelia nā roto i tō ’outou ora ’e te itoitora’a i tō ’outou ’itera’a pāpū.

Te ti’a fa’atere, e ta’ata ïa e tauturu ia vetahi ’ē ’ia ’ite, ’ia putapū ’e ’ia ’ite mai i te ’ē’a ti’a. E tauturu na te tahi i te tahi ’ia vai pāpū noa i roto i te ’Ēkālesia ’e i roto i te ’evanelia. ’Ua tu’u te Atua ia ’outou i te hō’ē vāhi e fāna’o ’outou i te mau rāve’a e rave rahi nō te riro ’ei mauha’a i roto i te rima o te Fatu Iesu Mesia. Tē tūru’i nei ’oia i ni’a ia ’outou, ’ua ’ite ’oia ia ’outou, ’ua ti’aturi ’oia ia ’outou ’e e ha’amana ’oia ia ’outou. Tē ora nei ’oia. Tē vai pāpū nei ’oia !

E nehenehe te mau parau ri’i ’e te mau ’ohipa ri’i ’ōhie ato’a ’e te pāpū nō te maita’i, te huru parau ti’a, te aroha, te hāmani maita’i, te tāvinira’a, te here ’e te aumihi ’ia riro ’ei ’ohipa fa’aterera’a i roto i te bāsileia o te Atua. ’Eiaha e hi’o fa’aiti i tā ’outou fa’aurura’a ’e tō ’outou mana nō te maita’i. Nā teie e piti taure’are’a misiōnare i tauturu iā’u ’ia ’ite i te ’ē’a e arata’i i tō tātou Fa’aora nō te ho’i i te Metua i te Ao ra.

Parau mau, nā’u i haere i terā ’ē’a, e upo’oti’a i te mau tāmatara’a, e ’imi i te pāhonora’a i te mau uira’a, e fa’aruru i te mau mā’itira’a teimaha ’e e rave i te mau fa’aotira’a. Mai te reira ato’a nō ’outou ! E mau mātēria pūai rahi mau tā te ’Ēkālesia ’e tā te Fatu e pūpū nei ia ’outou nō te fa’atupu i tā ’outou fā i roto i te orara’a. ʼO te Buka a Moromona hō’ē o te reira, ’e ’ua tu’uhia te reira i mua noa ia ’outou. ’A toro i te rima ’e ’a fāri’i i te reira i tō te reira mau ha’api’ira’a. ’A toro i te rima i te Metua i te Ao ra ’e nāna e arata’i ia ’outou. ’A ti’aturi i te Fatu !

E au mau hoa iti ē, ’ia pāpū ’ia ’outou tō’u here ’e tō’u māuruuru ia ’outou tāta’itahi. Tei ia ’outou na ta’u mau pure ’e mau ha’amaita’ira’a. E mau tuha’a faufa’a rahi ’outou nō teie ’ohipa fa’ahiahia ’e te mo’a a tō tātou Tāra’ehara. ’O teie ïa tō’u ’itera’a pāpū, i te i’oa o Iesu Mesia, ’āmene.