E Dua na iVakatakilakila ni Lotu Dina e Bula ni Turaga

Elder Patrick Kearon

Ena Mataveiliutaki ni Vitusagavulu

E Dua na Bogi vata kei Elder Patrick Kearon

Lotu e Vuravura Raraba ni Tabagone Qasecake • 6 ni Me, 2018 • Brigham Young University–Vale ni Soqoni e Idaho

Au vakavinavinaka vakalevu vei Jen, o koya e sega ni vakabekataki, na nona dau bulataka na veika e vakavulica. E kilai koya vinaka tu ka rekitaka na nona kila se ocei o koya. E dau doudou o koya na wasea na veika oqori kei ira na tani ena vanua cava ga e tiko kina. Au vakavinavinaka ni keirau mai sota ni oti e yabaki rua noqu mai lewena na Lotu. Esa dua na ivakaraitaki kalougata vei au o koya ka vaka tikoga kina mai na gauna oya me yacova mai oqo.

Sa ka totoka dina nida vakasamataka ni o ni soqo vata tu e veiyasai vuravura. Sa noqu masu, ena yalo ni idolamasu totoka nei Landon, ni na soli vei iko na veika o gadreva, kevaka o gadreva na veivakauqeti, ni o na ciqoma. Kevaka o gadreva e dua na ka vakasakiti, ena yaco mai. E dua na kaukauwa mana sara nida dau soqo vata vakaoqo, nida vakavakarau mai kina veigauna vakaoqo. E tiko na kaukauwa ena soqoni vata. Kevaka o gadreva na veivakabula, mo na kunea na veivakabulai. Kevaka o gadreva na veivakacegui, mo na kunea na veivakacegui. Kevaka o gadreva na vakacegu, mo na kunea na vakacegu. Kevaka o gadreva na veivuke ena veitarogi—vaka vei au se vo levu tiko na gauna ni se qai tekivu e dua na iwasewase ni vuli vei kemuni, ia ni sa yaco mai na kena gauna, me na soli vei iko na veika oqori.

Sa noqu masu ni o sa vakauqeti, ka ciqoma na itukutuku e baleti iko, ni o na kunea na kaukauwa kei na mana mo cakacakataka, ka sega ni o lesuva tale na ivakarau esa matau tiko vei iko ena gauna oqo. Kevaka o gadreva na dua na gauna ni veisau, kevaka o gadreva na kaukauwa vakavoui kei na vakabauta, ni sai koya oqori ena soli vei iko.

Niu a se yabaki 15 se 16 kina, au a dau murimuri yaloqu tu ga ka bulataka tu e vuqa na yalo nuiqawaqawa, veilecayaki, ka vakaloloma ni sa tiki tu beka ni bula vagone. Eso vei ira na yalo vakaoqori a tu ga, ia era a kaukauwa sara ena veiyabaki ni tabagone o ya. Au a lecayaloqu, raici au ga, ka luluqa voli. A sega ni vukei au na noqu a curuibure e koronivuli vakatikitiki ena baravi kei Igiladi. Rau a tiko yawa na noqu itubutubu mai Saudi Arabia. Me baleta na vuli, e via vinaka cake o Hogwarts kei Snape.

Sa dau draki ca tu ga na baravi oya, ia ena dua na draki batabata a liwa kaukauwa mai e dua na cava ena Wasawasa Airisi ka kena kaukauwa e 12 na iTagede. A boloraka na veiitatarovi eso na ualelevu ka so era a vakacacani. E volekata na 5,000 na vale a luvu ena itikotiko raraba e kea, ka ra sa tiko leqa na tamata, ni sa boko na livaliva se na iyaya ni katakata kei na cina ni veivale, ka sa oti mai na kedra kakana.

Ni sa tekivu lutu na wai, a vakauti keimami na koronivuli me keimami veivuke. Au a se bera mada ni raica e dua na vakacaca levu me vaka oqo, kau kurabui niu sa raica dina sara ga. Na wai kei na dabibi sa robota tu na vanua. E laurai e matadra na luvu ena wai ni ra sa rere ka malumalumu. Era sa sega tu mai ni moce ena vica na siga. Keimami sa cakacaka yani na cauravou e koronivuli, vagalalataki na iyaya suasua ki na tabavale e cake mera vakamamacataki ka coki na kapeti a vakacacani ena ualuvu. Au nanuma lesu na kapeti suasua oqori ni ra sa bibi sara ga, kei na iboi ni loma ni vale sa bona sara ga.

A vakurabuitaki au talega na neimami yalo veilomani oi keimami a laki veivuke yani kei ira a ciqoma na veivukei. A yaco e dua dina na yalo totoka, ka loma vinaka ena kedra maliwa na tamata era sa duavata ena dua na inaki yaga ena loma ni ibolebole a sotavi. Au vakasamataka lesu ni yalo luluqa kece o ya ka a curuma tu vakalevu na noqu vakasama vagone a takali niu vakaitavi ena sasaga cecere mera vukei na noda.

Au a nanuma ni na takali yani na kila o ya, ia a sega. Na kilai ni vukei ira na tamata sa iwali bula ki na kequ ituvaki malumalumu, nanumi au ga a dodonu me veivakavoui. Ia a sega, baleta na kila o ya a sega ni titobu sara, kau a sega ni vakasamataka vakabibi na ka a yaco e kea. Na kila o ya a qai yaco mai e muri. Ko sa rairai kunea na dina oqo ena nomu bula vakai iko. Ena veivuke beka ni ko vakasamataka na kena a yaco vakacava vei iko.

Na Veisureti ena Koniferedi Raraba Baleta na Veiqaravi

Au a vakasamataka tiko oqo ena koniferedi raraba. Au kalougata vakalevu meu mai vosa vei kemuni ni oti toka ga na koniferedi raraba ni veigauna ena vica na macawa sa oti. Na vakanananu, vakacegu, kei na vakatikori ni kaukauwa se tu ga oqo vei au.

Na usutu ni itukutuku ni koniferedi sai koya na tokaruataki ni veikacivi ni veiqaravi me vaka na iVakabula—ka me caka ena loloma, me kilai ni oi keda kei ira na tiko voliti keda sa luvena na Tamada Vakalomalagi. Eda na veiqaravi sega ni baleta ni sa wili ka vakarautaki, ia ni da sa lomana na Tamada mai Lomalagi ka vakauqeti ena sasaga cecere vakaturaga, vukei na itokani mera kunea ka tiko ga ena sala ki Vua. Eda sa lomana ka qaravi ira na noda me vakataki Jisu ke a tu oqo me na cakava, ka saga dina me vinaka nodra bula na tamata ka mamada nodra icolacola. E tadu mai eke na reki kei na vakacegu tudei, vei koya a solia kei koya a ciqoma, ni da wasea na vua ni kena kilai ka vakilai na keda yaga tawayalani kei na loloma tawamudu ni Kalou vei keda yadua.

Na itukutuku oqo a usutu nei Peresitedi Nelson vakaoqo: “Duana ivakaraitaki ni Nona lotu dina na Turaga o ya na tuvalaki matau ni nodra qaravi yadudua na luve ni Kalou kei na nodra matavuvale. Me vaka ni oqo e Nona Lotu, o keda na Nona italai eda na qarava e dua, me vaka a cakava o Koya. Eda veiqaravi ena Yacana, ena Nona kaukauwa kei na lewa, kei na Nona loloma yalovinaka.”¹

Niu nanuma lesu na veika eda vakavulici kina, au kila kevaka meda cakava na kaci oqo ni veiqaravi, sa na yaco meda lasika cake; tubu ena vakabauta, yalo nudei, ka bula marau, ka uabaleta noda nanumi keda ga kei na yaloluluqa kei na butobuto e tiko kina. Au diva me a yaco vei au na kila oqo niu se qai tubu cake tiko. Ia au vakavinavinaka vakalevu niu sa mai kila ena itagede torocake veitaravi ena veiyabaki, kavakavotui tikoga vei keda na dina cecere oqo.

Na Yaga kei na Veivakalougatataki ni Mataqali Veiqaravi Vakaoqo

Na totoka ni cakacaka vakaoqo, veiqaravi, se bula vakatisaipeli o ya ni ra vukei na tamata ena sala e vuqa, ia e vakavoutaki keda talega ni kauta tani noda lomaleqa, rere, lomaoca, kei na vakatitiqa. Na veiqaravi ena vagolei keda taumada mai na noda lomaleqa, ia sa na saumaki me dua na ka cecere cake ka totoka sara. Eda na tekivu vakila na rarama kei na vakacegu, ka voleka ni da sega ni kila rawa. Eda sa tiko vinaka, vakatakatari, ka vakacegui. Ka da vakila e dua na reki e sega ni tadu cala mai. Na isolisoli oqo e soli vei keda ena veitikina kecega eda sa cakava dina, ena veivukei vakai keda.

O Peresitedi Spencer W. Kimball a kaya vakatikina: “Na bula levu e tukuni ena ivolanikalou sa kena taucoko vakayalo e yaco ni vakavuqataki na noda qaravi ira na tamata ka vakatubu taledi ni qaravi na Kalou kei na tamata.”² “Eda na gumatua cake ni da qaravi ira na tamata—e dina, ni rawarawa cake meda ‘kunei’ keda baleta ni vuqa na veika baleti keda meda kunea!”³

Na iVakaraitaki ni Vakavoui Eda Sotava ni Da Veiqaravi kei na Veibasai ni Da Sega ni Cakava

Na veivakavoui oqo sa ka vou era na kunea na daukaulotu ni ra tarova nodra lomaleqataki ira tikoga ka taroga, “O cei meu na vukea, kei na sala cava?” Ia era na sega ni vakasamataki ira tikoga ka raica na nodra inaki mera kauta mai na tamata vei Karisito. Na ka sa kunei oqo sa dredre vei ira na daukaulotu. Era rawa ni solegi na yalodra ena vuku ni dua na vanua vou ka duatani na tamata, kakana, itovo, kei na ibolebole ni vosa vou e dredre sara kina mera gole yani ka laki veiqaravi. Ia ni ra cakava, sa veisau na ka kecega ena vukudra. Era sa sega ni lomaleqa, era sa cakacaka, ka tosoya yani na sasaga veinanumi mera cakava, ka kunea na ituvatuva vou ni nodra kaulotu kei na nodra bula, ena vakacegu kei na yalo vakainaki.

Ka ni rarawa, na veibasai ni ka vou oqo e dredre vei ira na kaulotu ni ra lesu i vale ka tekivu mera cakava na tuvai ni bula e tarava, ena vuli, cakacaka, se gagadre ni tamata yadua kei na matavuvale.Ena loma ni 18 na vula ki na 2 na yabaki era vulica ni da na marau vakalevu ena gauna eda sega ni nanumi keda tikoga kina, se nona kaya o Peresitedi Hinckley, meda guilecavi keda kina ka cakacaka yani. Vakavuqa, ni ra lesu yani ena nodra kaulotu ki na bula era a biuta mai, era dau lesu vakakina ki na vuqa na itovo mera nanumi ira ga kina ka a tiki ni bula o ya. Me vakataka, era lesi mera solegi ira ga, era sa vakacava tiko, na kedra irairai kei na ivosavosa, kei na veika era nanuma na tamata baleti ira.

Na nodra rai yani ka vukei ira na tamata ena kauta mai na rarama, vakacegu, kei na reki, ia ni ra nanumi ira ga, era na vakatitiqa, lomaocaoca ka luluqa.

Dua na gauna ena vica na vula sa oti au a sega tu ni moce ena vuqa na auwa, niu a saga tiko meu moce ia a sega ni rawa. Oti o ya au a qai tucake ka lako wavokita vakalailai na vale, ka lesu tale meu saga meu moce. Ia ni sa sega ni rawa meu moce, a qai yaco mai e dua na vakasama vou: “Kakua ni vakasamataki iko tiko.” A qai yaco mai na taro, “O cei meu na vukea?” Au a davo tu, ka masu vagumatua, “Meu na vukei cei, kei na sala cava?” E dua na veivakauqeti e yaco mai me semata ka vakauqeta e dua na itokani. A sega ni dua na ka levu, ia ena mataka lailai au a cakava sara ka yaco kina eso na ka vinaka. Na ka au kila ni gauna au masu kina vaka o ya, niu kerea o cei meu na vukea, au a kunea na vakacegu a sega ni lako tu mai vei au, kau sa qai moce rawa.

iVakaraitaki ni Veiqaravi ni iVakabula

Na iVakabula a “lako voli ka daucaka vinaka,”⁴ me raica me vukea e dua, ka “vakabulai ira kecega sa vakasaurarataki.”⁵ Sa dau vakalougatataka, vakavulica, ka dusimaka na tamata mera veisautaka na nodra rai kei na nodra bula. Sa ivakasala ni sa kacivi Pita, kei Adriu, Jemesa, kei Joni me ratou muri Koya, na veisau ni nodratou ilakolako kei na rai a totolo sara: “A rau sa biuta sara tu na nodrau lawa, ka muri koya.”⁶

E muri, ni sa mate ena kauveilatai, ni sa kau tani maivei iratou na iVakabula ena sala voravora, e ratou sa laki qoli ika tale, na ka e ratou nanuma ni ratou kila. Dua na gauna, a lako mai na iVakabula ni sa sega tiko ni katoa na nodratou qoli. “A sa kaya vei ira ko koya, Dou viritaka na lawa ki nai matau ni waqa, ka dou na kunea kina. Era sa qai viritaka, a ra sega ni yavia rawa ni sa ka levu sara na ika.”⁷ Oqo e dua na ivakaraitaki ni a sega ni yali mai Vua e dua na Nona kaukauwa, ia sa ivakaraitaki qaqa sara ni ratou sa raica tiko na vanua cala ka raicamatua tiko na ka cala. Ni ratou sa kana ika vata tiko e baravi, a tarogi Pita kina vakatolu na iVakabula ke sa lomani Koya. Ena gauna yadua oqori, sa tubu tiko na nuiqawaqawa nei Pita, a sauma ka vakadonuya. Ni oti na isaunitaro yadua nei Pita, a kerei Pita o Jisu me vakani ira na Nona sipi.

Cava na vuna a tarogi koya kina vakatolu na iVakabula ke sa lomani Koya? Ia, a kacivi taumada o Pita e liu me muri Jisu, ka a vakaio kina vakatotolo, ka biuta na nona qoli ika. Ia ena gauna sa kau tani ko Jisu maivei ira, a rarawa o Pita; ka veilecayaki. A lesu tale ki na ka duadua ga a kila tu—na qoli ika. Ia oqo sa gadrevi Pita o Jisu me rogoci koya ka vakasamataka na bibi ni veisureti ena gauna oqo; sa gadrevi Pita me kila vinaka na ibalebale ni dua na tisaipeli ka muria na Karisito sa tucaketale, ni sa na sega tale ni tiko vata e yasadra. Na cava e vinakata na Turaga vei Pita? A gadrevi Pita me vakania na Nona sipi, na Nona lami. Oqo na cakacaka sa gadrevi me vakayacori. Sa kila rawa o Pita na veikacivi malumu, ka dodonu ni nona iVakavuvuli, ka a vakaio na iApositolo iliuliu, ka yaloqaqa ka sega ni rere me solibula ki na cakacaka vakalotu sa kacivi kina.

E Vakayaco-ka Vakacava Oqo Vei Iko.

Mai na Veivakalesuimai, sa tiko nikua e dua tale na iApositolo iliuliu e vuravura. O Peresitedi Nelson sa sureti iko tiko kei au me daru vakania na sipi i Jisu.Eda sa rogoca oqo ena koniferedi raraba ena voqa e matata ka lomani duadua. Eda a vakayavalati ka uqeti, ia eda sa veisau beka? Ena veivagolei tani e voliti keda tu kei na vuqa na veika wale sa gadreva meda vakarorogo kina, na ibolebole o ya meda vakaio ki na veisureti oqo ka cakavacakava dina, yaco na veisau dina, ka bula duatani.

O na taroga kina, ena nomu vakaiko ki na veikacivi ni veiqaravi, “Meu na tekivu beka evei?” Tekivu ena masu E bolei keda o Peresitedi Nelson meda “vadodo yani me sivia na [noda] rawa ka vakayalo edai mo ciqoma na ivakatakila vakai iko, ni sa yalataka na Turaga ni ‘kevaka ko na [vakasaqara], ko na ciqoma na ivakatakila ena ivakatakila, na kila ka ena kila ka, me da kila na veika vuni ka veivakacegui—na kena ena kauta mai na reki, ka na kauta mai na bula tawamudu’ [V&V 42:61].”⁸

Kerea na Tamamu Vakalomalagi na ka mo na cakava, ka baleti cei. Na caka vinaka lalai ena vakavuna meda raici ira na tamata ka kauta mai na kalougata.Cakava na veivakauqeti o sa ciqoma, se cava sara na kena ka lailai.Cakava sara. Sa rawa me teks vinaka vua e dua a sega tiko ni namaka. Ena rairai me dua na itukutuku totoka.E rawa me senikau, bisikete kamica, se vosa vinaka. Ena rairai vinaka cake, me vakataka na samaki ni dua na teitei se matanivale, savata nona isulu e dua sa sega ni kaukauwa me vaka e liu, sava motoka, koti co, vagalalataki uca cevata, se vakarorogo vua e dua na itokani baleta na ibolebole e sotava tiko.

Me vaka a kaya o Sister Bingham, “Eso na gauna eda nanuma meda cakava na ka cecere ka qaqa me ‘wiliki’ ni da sa qaravi ira na wekada. Ia na veiqaravi lalai e rawa ni mana sara vakalevu vei ira na tamata—ka vakakina kivei keda”⁹

O na rairai sega beka ni taura na imatai ni kalawa, ka o vakadeitaka ni sa sega nomu gauna se sega ni veisautaka rawa e dua na ka, ia o na kurabui ni so na ka lalai era vakayaco-ka.

Ke sa yaco mo lomaleqataka e dua na itokani sa lako tani tiko mai na Lotu ka sa yali na nona rarama ni vakabauta kei na inuinui, sureta me tomani iko ena cakacaka eso ni veiqaravi. E sega tale na sala vinaka me vakamalumalumutaki na yalo ki na veika ni Kalou ka kunea tale na Nona loloma ena noda bula me vakataka noda vakaitavi ena veiqaravi vakaibalebale vua e dua e tiko leqa.

Na Vu ni Veiqaravi kei na Veiqaravi Vei Keda

E dodonu meda dau nanuma tiko na vuna eda veiqaravi kina. Eda sa luvena na Tamada Vakalomalagi, ena vuravura oqo meda vuli ka tubu ena vuqa na veika meda sotava, meda na taucoko ni da lesu tale Vua.Noda vulica meda raici ira na tamata, sega ni o keda, ka veiqaravi vakai keda sa inaki levu ni noda tiko eke. E dina, ni oqo sa kena usutu sara. Na cakamana ni raici ira na tamata ka qarava e dua tale e tiko leqa sa na yaco kina, meda vulica na guilecavi keda kei na noda dui leqa vakai keda.

Sa tuvanaka tiko o Peresitedi Nelson e dua na ituvatuva cecere ka vakalou ni nodaru veiqaravi. Ni da vakaio, eda na kunea na kena maucokona, galala, ka veivakacegui vei keda, meda matataka na veisau kei na vakacegu ena nodra bula na tamata.

Ni ko sa vakaedaumeni ena valetabu ka oti mai nomu kaulotu, o na temaki mo kaya, “Ia, sa na yaco eke oi au.Au a misini tudei tu ni veiqaravi ena 18 na vula se 2 na yabaki. Sa nona gauna tale edua oqo.” Sa rawa ni tukuni talega oqo ni da vakamau oti. Eda na nanuma beka, “Ia, au sa cakava. Sa gauna ni cegu oqo.” Na mataqali veiqaravi oqo e sega ni cegu. E dua na ivakarau ni bula. Eda na cegu beka vakalailai mai na itaviqaravi kei na olidei meda cegu ka vakasuka kaukauwa, meda “sere wa mada” a kaya o Josefa Simici.¹⁰ Ia na noda itavi ni veiyalayalati me da veilomani me vaka sa lomani keda o Koya, ka vakania Nona sipi e sega ni dua kina na vakacegu.

Au a taura ruarua na yaga ni mataqali veiqaravi oqo, kau sa kunea talega na vakacegu kei na reki e lako mai ni ko iyaya ni cakacaka ena liga ni Kalou ena vukuna e dua tale.

A talanoataka o Jen na neirau a saga me bula na luvei keirau tagane lailai. Ni sa leqa, keirau a lomatarotaka na neirau rawa ni vueti. Ena loma ni gauna oqo keirau a lomani vakalevu, kauwaitaki, ka vukei maivei ira na matavuvale kei na itokani, vakakina o ira keirau a sega ni kilai ira. E dua na veiwatini daulomani sa neirau itokani lomani a veiqaravi tikoga ena gauna taucoko oqori. Rau a mai tiko kei keirau, masu vata ka masulaki keirau, ka veivakalougatataki, ena kakana, vosa veivakacegui kei na vakanomodi. E rau dau basika mai ena gauna a tukuni yani kina na itukutuku bibi eso se ena gauna keirau sa oca sara tu ga ka rarawa.Rau sa vakaraitaka tiko ena veiyabaki ni sa nodrau bula oqo. Era veiqaravi tiko ga ka ra sega ni kacivaka.

Na Veiqaravi ni Lotu ni Vuravura Raraba

Niu a veiqaravi tiko ena iwasewase ni Lotu e Iurope ena vica na yabaki sa oti, ka tiko e Jamani au a vakadinadinataka na kena mana na bulataki na ivakavuvuli oqo ni ra kalawa yani na lewe ni Lotu kei na itokani ni matalotu tale eso mera vukea e udolu na isenivalu era sa vakayalia na nodra ka kece ni ra dro mai na veivaluvaluti kei na vakacaca ni ivalu ena Tokalau e Loma. Era a lako mai, ni ra taubaletaka e udolu na maile ka dreketa toka na nodra kato lalai ni iyaya.Ni ra raica na tiko leqa, ira na baraca kei na sisita, ni ra raica na Nona lami, era sa vukea, vakaisulutaka, vakania, vakavaletaka, ka vakacegui ira na senivalu sa yali nodra ka kece. Ni caka oqo, era sa vakavoui o ira era a veivuke. Era a vakalougatataki ena rarama, kaukauwa, kei na reki era a vakila taumada e liu, se sa seyavu yani ni ra nanumi ira ga kei na veika wale ni bula oqo. Era tomana tiko na sasaga ni veivakacegui oqo e vuravura taucoko o ira na noda tamata.

Era gadreva tu na isenivalu na veivuke totolo kei na kena e cecere, ia era voliti keda tu eso tale, era bolei sega ni kilai era gadreva na noda veivuke, ka sa vakakina noda gagadre meda vukei ira.Na noda veiqaravi kei na cakacaka e sega ni gadrevi me yaco ena yasa kadua kei vuravura. Ena vuqa na vakasama ena vinaka ke voleka e vale.

Au doka vakalevu niu mai lewena e dua na lotu e bulataka oqo.Ena yabaki sa oti, e sivia e 7 na milioni na auwa ni volodia a teivaki, tamusuki, ka kau na kakana vei ira na dravudravua kei na tiko leqa. Ena yabaki talega sa oti, e vakarautaka na Lotu na wai savasava ki na veimama na milioni na tamata a sega vei ira oqo. E vasagavulukaciwa na udolu na tamata e vakarautaki vei ira na dabedabe qiqi ena 41 na matanitu. Era vakalesuya na rai ka tubera e 97,000 na dauniveiqaravi me baleti ira era bolei tu na matadra ena 40 na matanitu. E tolusagavulukatolu na udolu na dauniveiqaravi era tuberi ena veiqaravi ni vakasucu gone kei na nodra karoni ena 38 na matanitu. E vakakina na Liga Dauveivuke, ena veiyabaki sa oti, e drau vakaudolu na tamata era sa soli wale e milioni vakamilioni na auwa ni veivuke. Era totolo yani me ra veivuke vei ira era vakaleqai ena leqa tubukoso lelevu lalai, ka veivuke talega ena kena vakavinakataki na nodra itikotiko wavoliti ira kei na itikotiko raraba.

Na sasaga vou ni Lotu na JustServe, e dua na vanua totoka me vasaqarai kina na madigi ni veiqaravi kevaka e tiko volekati iko, e sara volayaca kina e 350,000 na volodia, ka ra sa solia oti e milioni vakamilioni na auwa ena veivuke ena nodra itikotiko raraba.

Oqo na lotu ni cakacaka. Oqo na ka meda cakava. Oqo na ka mo cakava. Me sa yaco na itovo vinaka oqo me kemu ituvaki. Eda na kune reki ka vakacegu kina, ni oqo sa sala cecere duadua, vinaka, ka rawarawa vakayago meda muria na ivakaraitaki ni iVakabula.

A kaya kina o Peresitedi M. Russell Ballard, “Na veika lelevu era tekivu mai ena veika lalai ka rawarawa. Me vaka na tiki ni koula e vakasokumuni ena veigauna me yau levu sara, na noda cakacaka ni veiqaravi ni caka vinaka lalai ka rawarawa ena dua na bula sa vakasinaiti tu ena lomana na Tamada Vakalomalagi,ena cakacaka ni Turaga o Jisu Karisito, kei na yalo ni vakacegu kei na marau ena veigauna eda dodoliga yani kina kivei ira tale e so.”¹¹

Na Mataqali ni Veiqaravi e Tolu

Meu vakamatatataka e tolu na mataqali veiqaravi raraba e noda yadua meda vakaitavi kina.

Na imatai ni mataqali veiqaravi oqo sa lesi vei keda se sureti meda cakava ni sa ilesilesi ena lotu. E a vakaraitaki vakavinaka ka veivakauqeti ena koniferedi raraba. Eda na saga na mataqali veiqaravi vakamareqeti, sega ni vakarautaki, ka da vakasamataka, masulaka, ka vukei ira sa soli vei keda meda karona.

Na kena ikarua o ya na veiqaravi eda cakava ena noda lewa ga. Sa sema ki na imatai, ka drodrova yani na noda cakacaka ni veisiga kei na veimaliwai ni da saga meda guilecavi keda mada ka raici ira yani na tamata. E sega na ilesilesi tudei, ia eda sa vakauqeti ena gagadre me da vakamuria na Karisito, ka tekivu ena lomavinaka cake ka kauwaitaki ira sa tiko voliti keda. Na cakacaka lalai ni lomavinaka kei na loloma vakanomodi e rawa ni veisautaka na yalo ka mua ki na veimaliwai vinaka, ka vakaibalebale cake.

Nai ka tolu na qaravi ni lewenivanua. Ena nomu yabaki ni bula, sa rawa mo veiqaravi ena matabose ni koronivuli, loloma, ena tikina, yasana, kei na matanitu. Au vakayaloqaqataki ira na tagane kei na marama mera vakaitavi kina. Ni sa gadrevi, vakaitavitaki iko ena politiki ka raicamatua na veiqaravi kei na tarai cake ni tamata yadua kei na itikotiko raraba. Kakua ni malele ki na politiki vakavanua sa veitawasei vakalevu, kaukauwa, ka veivakarusai ena itikotiko raraba, matanitu, kei na veivanua lelevu. Sema vei ira na daunipolitiki sa nodra inaki ga mera vakasaqara tiko na inaki cecere mera vueti era sa tiko leqa. Sa rawa mo domo ni veisaututaki kei na inaki, mo valataka na tautauvata ena yasa kece ni bula. E tiko na gagadre levu mo soli igu ki na mataqali itavi ni veiqaravi raraba vakamatanitu vakaoqo.

Ni da wilika na itukutuku kaburaki, eda nanuma sa sisi tiko o vuravura. Kevaka eda caka ka lelevu ka lalai e veisiga o keda yadua, eda rawa ni veisautaka na noda vuravura kei ira era tiko voliti keda. Ni ko qaravi ira na wekamu ka veiqaravi vata kei ira ena nomuni itikotiko raraba, o na kune itokani era gadreva vata kei iko mo veivukei. Ena yaco oqo me dua na veimaliwai kaukauwa, tarai cake na ikakalawa ni vanua kei na lotu.

E kaya o Antoine de Saint-Exupéry, “Sa vakavulica na bula ni loloma e sega ni noda veiwanonovi mata ia noda raici ira vata na tamata ena muana vata ga. E sega na duavata vakacakacaka vakavo ga ena lomavata ena sasaga cecere vata. Ena gauna mada ga ni noda yabaki ni bula vakayago e dodonu kina oqo, ke sega meda qai vakamacalataka vakacava noda bula marau eda na vakila ni da wasea na iotioti ni keda vei ira ena vanua dravuisiga?”¹²

iTinitini

Ke o ni vakaio ki na veisureti ni veiqaravi me vakataka a cakava o Jisu, o na vakavoui, ka yaco mo dauveinanumi cake ka sega ni o kocokoco. O na kunea na reki e tadu mai na veiqaravi ena ivakarau ni iVakabula, ka biu na nomu lomaoca kei na veilecayaki kei na luluqa e tadu mai na nomu malumalumu a vakaogai tu kina.

E rairai, nomu vakarorogo tiko, o na nanuma beka e dua na yaca se inaki. Oqo e dua beka na veisureti mai na Yalo, ka rawa beka ni o sa ciqoma oti e liu. Dolele yani, raica yani, ka veilaveti cake. Digitaka mo vakayacora na veisureti oq ka masulaka nikua mo kila na veika o rawa ni cakava. Ni ko sa raica ka vakila na kalougata sa kauta maivei iko oqo kei ira o qarava, o na gadreva mo cakava oqo e veisiga.

Na noda sasaga cecere ka vinaka duadua o ya meda wasea na rarama, inuinui, reki, kei na inaki ni kosipeli i Jisu Karisito vei ira taucoko na luve ni Kalou ka vukei ira me ra kunea na sala lesu ki vale. Na nodra vukei, cakacakataki, ka qaravi sai koya na ivakaraitaki ni kosipeli sa cakacaka tiko. Ni sa dua oqo me ivakarau ni bula, eda na kunea ni sa veivakacokotaki duatani, ka sa sala eda na kune vakacegu kei na reki a yali tu mai vei keda.

Meu tokaruataka na ivakasala nei Peresitedi Nelson: “Duana ivakaraitaki ni Nona lotu dina na Turaga sai koya na kena tuvalaki vakamatau na nodra qaravi yadudua na luvena na Kalou kei ira nodra matavuvale. Me vaka ni oqo e Nona Lotu, o keda na Nona italai eda na qarava e dua, me vaka a cakava o Koya. Eda na veiqaravi ena Yacana, ena Nona kaukauwa kei na lewa, kei na Nona loloma yalovinaka.”¹³

Oqo na nona bula na iVakabula, ka oqo na vuna e bula kina o Koya—me ibotani uasivi ka veivakabulai cecere ena Nona isolisoli cecere, tawayalani, veisorovaki vei keda. Me sa qai lomada vakalevu meda muria na Karisito sa bula tiko, ka me mana sara, ni da saga meda sa Nona tisaipeli dina ni veiqaravi me vakataki Koya.

Ena yacai Jisu Karisito, emeni.

© 2018 mai na Intellectual Reserve, Inc. Dodonu kece e taqomaki. Vakadonui me vaka-Valagi: 2/18. Vakadonui me vakadewataki: 2/18. iVakadewa ni “A Hallmark of the Lord’s True and Living Church.” Fijian. PD60005945 858