Na Kemu Yaga Tawayalani kei na Loloma Tawayalani ni Kalou
E Dua na Bogi vata kei Elder Patrick Kearon
Lotu e Vuravura Raraba ni Tabagone Qasecake • 6 ni Me, 2018 • Brigham Young University-Valenisoqoni e Idaho
Sa vakavinavinakataki na matasere ena sere totoka ni vakalagilagia na noda Dauniveibuli.
Sa ka taleitaki dina ka madigi vinaka meu mai soqoni vata kei kemuni kece ena lotu oqo. E ka taleitaki me keimami tiko kei kemuni na itabagone qase cake ena Lotu. Keimami sa lomani kemuni! Sa ka marautaki na vakaitavi vagumatua vata kei kemuni ena gauna qaqa vakaoqo baleta na vakalesui tikoga mai ni kosipeli i Jisu Karisito.
Gone se qase, eda sa marautaka vata tiko na itukuni talei oqo vakabibi ni italanoa ni veidomoni. Meu na kaya eke ni neirau italanoa ni veidomoni a dua na itukuni totoka sega ni namaki. Au a susu mai California; ia o watiqu a susu mai Igiladi kei Saudi Arabia. Au a tubu cake mai ena Lotu niu se qai sucu; o watiqu a saumaki mai ki na Lotu ni sa yabaki 20 vakacaca. Keirau a lako mai na rua na vanua duidui ki na siti levu o Lodoni. A sa lewe ni Lotu tu mai ena rua na yabaki ka a lewena tiko na tabanalevu ni itabagone qase cake e Lodoni, ena gauna au a yaco yani kina e kea meu vuli vula ono baleta na cakacaka ni liga kei na itukutuku makawa. Au sega ni nakita, se namaka, meu veidomoni dina ena gauna ni’u tiko vakavuli mai Peretania, ia e rawa dina ni dau kauta mai eso na ka sega ni namaki na bula vei keda—ka talei sara—na tokavuki ni veisau.
Au vakavinavinaka ni a liutaki keirau mai na Turaga me keirau mai sota. Keirau a vakamau ena Valetabu e Oakland California, kau a lesu tale ki Igiladi ka keirau tiko e kea ena 19 na yabaki e tarava, me yacova ni sa kacivi o watiqu me dua na Vakaitutu Raraba ena 2010.
Keirau a vakalougatataki ena va na gone. A leqa na luvei keirau tagane ulumatua, ni a sele na utona ni se qai siga 19. Na malumalumu ni nona uto e a laurai ena gauna au kunekunetaki koya tiko kina, ia, na neirau valuta qaqa tiko na nona bula lekaleka a vakavulica vei keirau na cakamana, na lewa ni Kalou, kei na loloma, dina vakadeitaki ni Veisorovaki kei na Tucaketale i Jisu Karisito.
A muria mai na luvei keirau tagane e tolu na luvei keirau yalewa talei, keirau qoroya, doka, ka vuli mai kina e veisiga. E ratou sa neirau iyautalei. Ena vakabauta duatani, e ratou sa gu ki liu—ena yabaki taucoko ni nodratou itabagone—mai nodratou e Igiladi ki Utah, ki Jamani, ka lesu tale oqo ki Utah, ni sa mai lesi o tamadratou me laki veiqaravi ena veilesilesi ni Lotu.
Na Kemu Yaga Tawayalani kei na Loloma Tawayalani ni Kalou
Ena gauna oqo, eso beka na ka o a sega dina ni vinakata ni ko se gone ko sa mai taleitaka oqo ni ko sa qase? Vakacava na gauna ni moce vakalailai? Au kila ni ko sega ni via daumoce ni ko a se gone kina. Au a sega ni vinakata. Ia na madigi meda moce tale mada vakalailai sa iyaulevu sara!Au taleitaka na gauna ni moce vakalailai. Io, vakacava beka na kakana draudrau se so tale na kakana o a sega ni taleitaka ni ko se gone? Ia, o sa taleitaka beka nikua?
Se cava ga na nomu nanuma baleta na moce vakalailai se borokoli, e tiko na ka o a sega ni taleitaka ni ko se gone—ka e vuqa tale ga—o se sega tikoga ni taleitaka ni ko sa qase. Eda a sega ni taleitaka meda lutu e ra ka vakamavoataka na duruda. Eda a sega ni taleitaka meda via lewena e dua na timi ni qito ka qai sega ni digitaki. Eda a sega ni taleitaka meda vakacudrui, vakalialiai, ka guilecavi, se e dua e nakita me vakamavoataki iko. Ka da se sega tikoga ni taleitaka.
Au nanuma sara ena paraimari e koronivuli niu a gone vuku sara ena neitou kalasi, ia au daudanisi, kau dau guce sara ena rara ni qito. Au rawa ni danisi titeqe, ia au sega ni rawa ni pasi—se vakacuru polo, se viri, se caqe, se ciqo, se tavi. Eso na gone era dau vakatokayacataki au ka vakalialia na ligaqu lila.Au liga lila sara ga, e dina o ya, ia se mosi tikoga! Au nanuma vinaka tiko kevaka me keimami digitaka ga na neimami timi me baleta na veisisivi eso vakavuli, era dau digitaki au na noqu icaba meu toka voleka e cake.Ia kevaka me keimami dau digitaka na timi niu veitau cici, au otioti sara ni tamata meu digitaki. Au sa rarawa dina!
Ia, cava na vuna meu wasea kina oqo vei kemuni, ni a yaco ena vuqa na yabaki sa oti? Baleta, me vaka o ni rawa ni kila, na veimataqali ka vakaoqo e tu vakadua vei keda. Eda nanuma na noda dau vakanadakui se cati se vakawaleni maivei ira na noda icaba, ka rairai, e ka ni rarawa, maivei ira na lewe ni noda vuvale. Ka sega ni veisau oqo baleta ga ni da sa tubu cake tiko ka yaco meda sa tamata qase. E rairai beka o a vakila vakaoqo e nanoa. Na icaba, tacida, watida, qasenivuli, icaba vakacakacaka, itokani—era rawa ni kaya se cakava na veika rarawa titobu.E vakavuqa na kena sega ni nakiti. Ia eso na gauna e dau rawa ni nakiti. Ka so na gauna eda dau sauma lesu.
Noda vulica meda vakasaqara, vakila, ka kila vinaka na keda yaga vakayadua se cava ga era nanuma se kaya na tamata baleti keda sa ka bibi sara ki na ituvaki vakabalavu ni noda vakasama kei na yaloda. Ni da vakatara na vosa, ivalavala, se nanuma e baleti keda me lewa na noda nanuma baleti keda, eda yaco meda sa rawai vakaloloma sara, ka sega ni kila ni nodra vakadonui keda eso sa vuki me tawawili.
Sa vakakina, ke da vakayavutaka vakatabakidua na keda yaga ena noda rawa-ka, noda cakacaka, se noda isolisoli vakayago, eda sa tuvanaki keda meda druka ka rarawa ena gauna ga eda sega ni vakatagedetaki ka lamata cake mai.
O ni sa kila tiko, ia oi kemuni o ni sotava dredre tiko mo ni rogoca tikoga ka vakadeitaka na kemuni yaga tawayalani, ni sa sega ni semati vakadua ki na nomuni rawa-ka ia sa semati vakadodonu sara vua na Kalou.Na cava na ibalebale ni tawavakaiwiliwili? Sega ni vakaiyalayala, sega ni kovuti, ka sega ni mudu. O kemuni yadua, e sega ni yalani, sega ni kovuti, ka tawacava nomu yaga. Kivei cei? Kivei koya beka sa kacivi iko ena yaca vakaibalebale e rara ni qito? Sega. Na kemu yaga sa tawayalani, sega ni kovuti rawa, ka tawamudu sa vua na Tamamu Vakalomalagi, e kilai iko vakavinaka, se cava o nanuma se kaya baleti iko.Me sa solega na yalomuni ena gauna oqo na totoka kei na vakacegu ni dina o ya. Eda sa “sa ka talei ena [Nona] iserau.”1
Ena gauna e vakararawataki iko kina e dua, se o vakadrukai ena so na ka, lako ki na vanua o na sega ni cati se vakalialiai kina. E lomani iko na Tamamu Vakalomalagi, se o cei ga o iko, se cava o sasaga dredre tiko kina. O ni sa totoka sara! O ni sa totoka sara! E lomani iko ena kemu ituvaki oqori, ena gauna oqo, nikua, ena nomu veilecayaki totoka kece. Ia sa lomani iko vakalevu o Koya mo kakua ni tao toka vakadua eke, ena gauna sara ga oqo. Sa tiko na Nona ituvatuva levu cake baleti iko! Ko ni sa “taukena na veika ni Kalou, sai taukei vata kei Karisito,”2 ka mo vulica tiko mo cakava na ivakaro, caka cala, tubu, sasaga dredre, ka veisau, me yacova na kemu ituvaki vakalou, dodonu ka savasava—ena siga tawamudu mo uasivi sara—ena loloma soli wale i Karisito.3
Kevaka eda tuvanaka noda ivakarau ni bula, eda na rawa ni tuva vakai keda e dua na bula marau, rawa-ka, kei na vakacegu, ka rairai vakataotaki ena dredre eso eda rawa ni uabaleta vakarawarawa tu ga.O cei e vinakata me sotava na druka, sasaga dredre, se dua na leqa se rarawa? O cei e via cakava na ka dredre? Kevaka eda bula ena kena eda vinakata, eda na dau ciqomi ki na noda univesiti se koronivuli ni qeretueti, taura na cakacaka a tadrai tiko, ka vakamautaka na noda daulomani uasivi eda na sega ni veileti kaya. Ena sega ni dredre na noda veikacivi ni lotu, ka ra saumaki tudei tiko vakayago vakayalo na noda daulomani ki na kosipeli i Jisu Karisito, kei koya eda wasea kina noda vakabauta ena papitaiso ena loma ni dua na macawa.Era na sega ni tauvi kenisa na tinada, era na sega ni biubiu na tamada, ka ra sega ni mate dole na tacida ena vakacala-ka. Eda na sega ni vakayalia na gone lalai ena sele ni utodra, ka da na sega ni waraka na gauna ni Turaga. Ni sa taura rawa na ivakaraitaki. Ia eda na sega ni tauyavutaka e dua na itagede vakaibalebale ni vosota, yalololoma, yalomalumalumu, vosota vakadede, yalovinaka, gugumatua, dauveinanumi, se vakabauta, inuinui, kei na loloma. Eda na lesu tale vei Tamada mai Lomalagi ena ituvaki vata ga eda a biuti Koya mai kina, baleta ni da sega ni sotava e dua na ka e gadrevi kina na veisau se tubu se vakataucoko na vakararavi tabakidua vua na Kalou.
Ia eda sega ni bulavoli vakacegu tiko vakai keda ga. Eda sa bulataka tiko na bula sa tuvanaka na Kalou meda reki ka tubu cecere sara kina. Ni yalo vakacegu ni loloma tawayalani vakaturaga ni Kalou sa sureti kemuni mo ni veisautaka na nomuni bula ena veika ko ni na sotava ena nomuni ilakolako gaga ka kamica. Ia e dau sureta o Koya meda veisau ena sala ni loloma, yaloqaqa, kei na veivakadeitaki. Kakua ni vakarorogo ki na nomu vakasama—ka a rairai tiko mai na gauna o se gone kina—ka kaya tiko ni ko sega ni veisau rawa, e sega ni ko yaga, ko na druka tale. Rogoca ga na domomalua ni Yalo Tabu kei “na vosa talei ni Kalou … sa vakamamacataka na yalo sa mavoa”4 sa vakadeitaka na kemu yaga tawayalani ka vakadeitaka na loloma ni Kalou ni rawa ni o na rawata.
Ena gauna o sa oca kina ka vakila ni sega ni dua na ka vinaka e sa yaco tiko ena nomu sasaga mo bula dodonu tiko, ka kua ni guce. Kakua ni volitaka na nomu tatadra kei na lalawa. Vakalevutaka na nomu vakabauta, e dau daumaka sara na waraka tiko na nona gauna na Turaga.
Kei na gauna e yaco kina na veika e duatani, rarawa, kei na veivakalewai ena nomuni bula, ka o sega dina ni kila na sala mo bula mai na salatu ena nomu Kecisemani vakai iko, nanuma tiko ni Karisito, o Koya na iLumuti, sa ciqoma oti na nomu rarawa ka colata na nomuni tagi.5 A sa mavoa ena vuku ni nomuni caka cala, kei na we ni kena kuita ko ni sa vakabulai kina.6 E kila o Koya, ena loloma ka vakaidina, na nomu rarawa. O Koya na Ulumatua nei Tamada, ka sa colata taumada na nomuni rarawa taucoko, ni vakasama, vakayago, lomamuni, se vakayalo. Kua ni vakatitiqataka Nona yalayala ni inuinui kei na veivakabulai. O a buli mo mai bula voli ena reki, sa vakalevutaki. Sa tawayalani na kemu yaga, vakakina na loloma ni Kalou me baleti iko.
iTinitini
Au marautaka ko ni na vakarorogo kivei watiqu. Mo ni kila—ena yabaki ni nomu bula kei na kena itagede, ni ko vakaitau ka na vakamau—nitagane oqo au domona vakalevu sa lomani au tu ga ena 27 na yabaki ni neirau vakamau. Se bera vakadua, me vosabeci au se vakawaleni au, ka se sega vakadua me veiwalitaka noqu volivoli. Au nuitaka ko sa na vuli mai kina.
Au vakaraitaka niu vakabauta bula tiko na Karisito sa Bula, na “rarama, na bula, kei na inuinui kei vuravura. Na Nona sala e mua ki na marau ni bula oqo, kei na bula tawamudu ena bula sa bera mai.”7 Oqo na Nona Lotu e liutaka tiko na Nona parofita.
Ena yaca tabu, veivakabulai i Jisu Karisito, emeni.
© 2018 mai na Intellectual Reserve, Inc. Dodonu kece e taqomaki. Vakadonui me vaka-Valagi: 2/18. Vakadonui me vakadewataki: 2/18. iVakadewa ni “Your Infinite Worth and God’s Infinite Love.” Fijian. PD60005945 858