O Se Uiga Iloga o le Ekalesia Moni ma le Ola a Le Alii
O Se Afiafi ma Elder ma Sister Kearon
Faigalotu i le Lalolagi Atoa mo Talavou Matutua • 6 Me, 2018 • Iunivesite o Polika Iaga-Idaho Center
Ou te matua faafetai mo Jen, e aunoa ma se tuusaunoaga, e ola i mea na te aoao atu. E na te iloa poo ai o ia ma olioli i le iloaina poo ai o ia. Ma e toa o ia i le faasoa atu o lena mea ma isi i soo se mea e i ai o ia. Ma ou te matua faafetai sa ma feiloai i le lua tausaga talu ona ou auai i le Ekalesia. Ua avea o ia o se faataitaiga faamanuiaina ia te au ma mo au talu mai lena taimi ma o loo faaauau pea.
E matagofie le mafaufau ia te outou o loo potopoto i le lalolagi atoa. Ou te tatalo, i le agaga o le tatalo amata matagofie a Landon, o le a tuuina atu ia te oe mea e te manaomia, ma afai e te manaomia le uunaiga, o le a faapea ona e mauaina. Afai e te manaomia se mea e tulaga ese, o le a oo mai. O loo i ai lea mana pe a tatou potopoto faapenei, pe a tatou saunia mo taimi faapenei. E i ai le mana i le potopoto ai. Afai e te manaomia le faamalologa, e mafai ona e maua le faamalologa. Afai e te manaomia le faamafanafanaga, e mafai ona e maua le faamafanafanaga. Afai e te manaomia le filemu, e mafai ona e maua le filemu. Afai e te manaomia le fesoasoani i suega—ou te talitonu e fai sina vave tele mo lena mea i le tele o au semesa, ae a oo mai lena taimi, ia mafai ona e mauaina foi.
Ou te tatalo a o uunaia ai oe, a o e maua se savali mo oe, o le a e maua le malosi ma le talitonuga e faatino ai, ae le na o le faaopeopea i tua i soo se mausa atonu o i ai nei. Afai e te manaomia se taimi e sui ai, afai e te manaomia se taimi o le malosi ma le faatuatua toe faafouina, ia avea lena mea ma lau meaalofa.
Ina ua 15 pe 16 o’u tausaga, sa ou matuai nopiai i o’u lava lagona, ma sa ou feagai ma na lagona felefele, e le mautonu ma e le faavaea, ia e mafai ona oo mai o se vaega o le talavou. O nisi na lagona sa faataupepe ai lava, ae sa atili matautia i na tausaga o le talavou. Sa ou lagonaina lo’u se, le pulea, ma le faaletonu. Sa lei fesoasoani lo’u i ai i se aoga nofotumau i se vaega mamao ese i le talafatai o Egelani. Sa nonofo mamao o’u matua i Saudi Arabia. E tusa ai ma le aoga, atonu o le a sili atu ona faafeiloai ia Hogwarts ma Snape.
Sa masani e leaga le tau i lena talafatai, ae i se tasi taumalulu sa agi se matagi malosi i le salafa o le Vasa Aialani ma sa oo le agi o matagi i le Malosi 12 faata’uta’u. Sa fesasa’i galu i papupuni ma i nisi taimi sa pasia. Pe tusa ma le 5,000 fale na tafefea i vaega lata ane, ma sa tuua tagata ua leai se eletise po o ni mea e faamafanafana ai ma faamalamalama ai o latou fale, ma sa leai ni a latou meaai.
Ina ua amata ona fai ifo le lolovaia, sa auina atu i matou e le aoga e fesoasoani. Ou te lei vaai i se mala faalenatura i lea maualuga muamua, ma sa ou ofo ina ua ou vaaitino i ai. Sa vaia ma palapala mea uma. O foliga o tagata sa i ai i tafega sa sesega ma sa paeee. Sa le mafai ona momoe mo le tele o aso. Sa matou galulue ma le matou au aooga, e la’u mea ua matua mamafa i le susu i falealuga i le mea sa mafai ai ona faamamago ma tautoso kapeta ua leaga uma i le lolovai. Ou te manatua le kapeta palavivi ua matua mamafa naua, ma le namu leaga o fale.
O le mea na ou maofa ai, o le faauooga sa amatalia i le va o i matou sa fesoasoani ma i latou sa mauaina le fesoasoani. Sa na o se lagona matagofie, agalelei i le va o tagata sa tuufaatasia i se faamoemoe i lalo o tulaga faigata. Sa ou toe manatunatu mulimuli ane o na lagona le mautinoa uma sa alu uma ai le tele o o’u mafaufauga masani faaletalavou na o ese a’o ou auai ai i lenei taumafaiga tele e fesoasoani i o matou tuaoi.
Ma’imau pe ana tumau lena iloa, ae e leai. O le iloaina ai o le fesoasoani i isi o le vailaau lea i lo’u le fiafia, tulaga faavalea ia te au lava ia sa tatau ona suia. Ae e leai, talu ai e lei lava le gotouga ifo o le iloa, ma sa ou toilalo e mafaufau atili loloto i le mea sa tupu. Sa oo mai lena malamalama mulimuli ane. Masalo na e iloina lenei upumoni i lou lava olaga. Atonu e aoga mo oe le mafaufau e uiga i lenei mea pe a tupu ia te oe, ma pe faapefea.
O Le Valaaulia i le Konafesi Aoao e Auauna Atu
Sa ou mafaufau i lenei mea i le taimi o le konafesi aoao. Ua ou lagonaina le faamanuiaina i lenei avanoa e lauga atu ai ia te outou a o lei leva ona te’a atu lena konafesi faasolopito i nai vaiaso ua mavae atu. O uunaiga, toafilemu, ma le faasiliga malosi na maua ai o loo i ai pea faatasi ma a’u.
O le taulaiga o savali o le konafesi o le valaau faifai pea e auauna atu e faapei ona auauna atu le Faaola---ma ia faia ona o le alofa, e aloaia ai o i tatou ma i latou uma o loo vagaia i tatou o fanau a le Tama Faalelagi. O le a tatou auauna atu e le faapea ona ua faitaulia ma fuatuaina la tatou auaunaga, ae ona tatou te alolofa i lo tatou Tama oi le Lagi ma ua musuia i le taulaiga maualuga ma mamalu atu, fesoasoani ia tatou uo e saili ma tumau i le ala e toe foi atu ai i le aiga ia te Ia. Ua tatou alolofa ma auauna atu i o tatou tuaoi e pei o Iesu pe ana i ai o Ia i lo tatou tulaga, taumafai moni lava ia faaleleia olaga o tagata ma faamama a latou avega. O i o loo i ai le olioli ma aumaia ai le faataunuuina tumau, aua ua taufai fefaasoaai e le foai atu ma le e taliaina mai ia fua o le iloaina ma lagonaina o lo tatou taua e le i’u ma le alofa e faavavau o le Atua mo i tatou taitoatasi.
Na aoteleina mai e Peresitene Nelson lenei savali i le auala lenei: “O se faailoga o le Ekalesia moni ma le ola a le Alii o le a avea pea ma se taumafaiga faatulagaina ma faatonutonuina e auauna atu i fanau taitoatasi a le Atua ma o latou aiga. Ona o Lana Ekalesia lenei, o i tatou o Ana auauna o le a auauna atu i le tasi, e pei lava ona sa Ia faia. O le a tatou auauna atu i Lona suafa, i Lona mana ma le pule, ma i Lona agalelei alofa”1
A o ou mafaufau i mea sa aoaoina ai i tatou, ua ou iloa afai tatou te gauai atu i lenei valaau e auauna atu, ua tatou maua le avanoa e tulai ese ai mai ia i tatou lava; tuputupu ae i le faatuatua, talitonu mautinoa, ma le fiafia; ma faatoilalo lo tatou manatu ifo ia i tatou lava ma le lagona o le gaogao ii ma le faanoanoa e oo mai ai. Maimau e pe ana ou iloa lenei mea i le amataga o lo’u olaga. Ae ou te matua faafetai lava ua ou aoaoina e ala i le faateleina i le aluga o tausaga, ma ua tuuina mai ia i tatou se faamanatu faifai pea o lenei upumoni sili.
O Aoga ma Faamanuiaga o Lenei Ituaiga o Auaunaga
O le matagofie o lenei ituaiga o tautua, auauna atu, po o le tulaga faalesoo e fesoasoani ai i isi i ni auala e le mafaitaulia, ae e suia ai foi i tatou e ala i le aveeseina o i tatou mai o tatou popolega, fefefe, atuatuvalega, ma masalosaloga.I le taimi muamua o le auauna atu sa na ona faalavelaveina ai i tatou mai o tatou lava faafitauli, ae vave ona liua i se mea e sili ona maualuga ma sili ona matagofie. Tatou te amata i le iloaina o le malamalama ma le toafilemu, toetoe lava ina a le iloaina. Tatou te toafimalie, mafanafana, ma le gaoia. Tatou te iloaina foi se olioli e leai se isi ala e maua ai. E mautu nei meaalofa i o tatou luga i se tulaga e sili atu nai lo lea mea moni sa tatou faia, e tusa ai ma le fesoasoani atu i se tasi.
Sa faamalamalama mai e Peresitene Spencer W. Kimball se vaega e faapea: “O le ola faateleina i tusitusiga paia o le aofaiga faaleagaga e taunuu i ai pe a faateleina la tatou auauna atu i isi ma e ala i le faaaogaina o a tatou taleni i le auauna atu i le Atua ma tagata.”2 “O le a avea atili i tatou ma ni tagata taua a o tatou auauna atu i isi—o le mea moni, e sili atu ona faigofie ona tatou “maua” i tatou lava aua foi e tele naua isi vaega o i tatou e tatau ona sailia!”3
Faataitaiga o le Suiga Tatou te Oo i ai Pe A tatou Auauna Atu ma le Eseesega Pe a Tatou Le Faia
O lenei suiga o le mea lea na maua e faifeautalai fou pe a tuu lo latou popole ia i latou lava ae fesili, “O ai e mafai ona ou fesoasoani i ai, ma pe faapefea?” O le mea e tupu latou te tuu le mafaufau ia i latou lava ae taulai atu i lo latou faamoemoega o le aumaia o agaga ia Keriso. O lea mea fou e tele ina maua e faifeautalai e ala i taumafaiga e tele. E mafai foi ona lofituina i latou i le i ai i se nofoaga fou ma tagata eseese, o meaai, o agaifanua, ma o le tele lava o se gagana faigata ma e faigata tele ia i latou ona taulai atu i isi ma auauna atu. Ae a oo ina latou faia, e suia mea uma mo i latou. Ua tuu lo latou popole, e o e galulue, e faatino le galuega o i o latou luma, ma latou te mauaina se vaaiga fou atoatoa ia latou misiona ma o latou olaga, ma le filemu ma le lagonaina o le faamoemoe.
O le mea e faanoanoa ai, o le faafeagai o le mauaina o lenei mea ua tele ina aafia ai faifeautalai pe a latou toe foi i le aiga ma amata ona taulimaina manaoga o le isi laasaga o o latou olaga, po o le aoga, faigaluega, po o popolega faaletagata lava ia ma faaleaiga. E 18 masina i le 2 tausaga sa latou aoaoina ai faapea ua tatou i ai i le taimi e sili ona fiafia ina ua tatou le popole mo i tatou lava, po o le, e pei ona faaupu ai e Peresitene Hinckley, ina ua tatou faagalo i tatou lava ae o e galulue. E tele taimi, pe a latou taliu mai ia latou misiona i le olaga sa latou tuua, latou te toe foi i le tele o mausa o le taulai ia te ia lava ia sa avea o se vaega o lena olaga. I se tulaga faapitoa, latou te toe foi mai ua faatumulia ia i latou lava, pe o a mai latou, pe o a o latou foliga po o leo, ma pe o a mafaufauga o isi ia i latou.
E pei ona moni le vaai atu ma fesoasoani i isi e aumaia ai le malamalama, filemu, ma le olioli, e faapena foi ona aumaia le masalosalo, atuatuvale, ma le le fiafia pe a vaai ifo ia te ia lava.
Sa i ai so’u aaafiaga i ni nai masina ua mavae atu, sa ou taoto ai o loo ala mo le tele o itula, sa ou taumafai e moe ae sa le mafai. Na iu ina ou tu ae i luga ma savalivali solo i le fale mo sina minute, ona toe foi lea i le moega ma toe taumafai e moe. A o faifai pea le le mafai ona ou moe, sa faafuasei ona oo mai se manatu e suia ai: “Soia e te mafaufau ia te oe lava.” Ona oo mai ai lea o le fesili, “O ai e mafai ona ou fesoasoani i ai?” Sa ou taoto iina ma tatalo, ma le malosi, “O ai e mafai ona ou fesoasoani nei i ai, ma e faapefea?” Sa oo mai se lagona e faafesootai ma faamalosiau atu i se uo. Sa le o se mea tele, ae i le taeao na sosoo ai, sa ou tali atu i ai ma sa faamoemoe sa faia ai sina lelei. O le mea ua ou iloa o le taimi lava na ou tatalo ai faapena, ma fesili ia iloa po o ai e mafai ona ou fesoasoani i ai, sa ou mauaina le filemu lea sa faigata ona ou maua, ma sa iu ina mafai ona ou moe.
Faataitaiga o le Auaunaga a le Faaola
O le Faaola “sa femaliuai ma agalelei,”4 e vaavaai e le aunoa mo se tasi e fesoasoani i ai, ma “faamalolo i latou uma sa faatoilaloina.”5 Sa Ia faamanuiaina e le aunoa, ma taiala isi ia suia la latou vaaiga ma o latou olaga. O se tulaga faagaeetia ina ua Ia valaauina Peteru, Aneterea, Iakopo, ma Ioane e mulimuli atu ia te ia, o le taimi foi lea na suia ai lo latou taitaiga ma le taulaiga: “Sa latou tuua loa lava o latou upega ae mulimuli atu ia te ia.”6
Mulimuli ane, ina ua mavae le faasatauroga, ina ua aveesea le Faaola mai ia i latou i se ala aupito mataga, sa latou toe foi ia latou faigafaiva, i mea sa latou manatu sa latou iloa. I se tasi taimi, sa afio atu ai le Faaola toetu ia i latou a o latou fagogota ae leai se mea na maua. “Ma sa ia fetalai atu ia te i latou Ina lafo ia le upega i le itu i matau o le vaa, ona outou maua ai lea. Ona latou lafo lea, a ua le toe mafai e i latou ona toso ae, ona o taumafa o i’a.”7 O se faataitaiga lea e leai se mea o Lona mana faapea na aveesea, ae faapea foi se ata mao’i sa sese le mea sa latou vaavaai i ai ma sa taulai atu i le mea sese. A o latou taumamafa faatasi i i’a i le matafaga, sa fesili faatolu le Faaola ia Peteru pe alofa ia te Ia. O taimi taitasi, ma faatasi ai ma se faateleina o le lagona atuatuvale, sa tali atu Peteru e alofa o ia. I le maea ai o tali taitasi a Peteru, sa fetalai atu ai Iesu ia Peteru e fafaga Ana mamoe.
Aisea na fesili faatolu ai le Faaola ia te ia pe alofa ia te Ia? Ia, sa valaauina Peteru e mulimuli ia Iesu muamua, sa vave ona ia tali atu ma sa tuua loa lava lana faigafaiva. Ae ina ua aveesea Iesu mai ia i latou, sa tiga Peteru; ua le maumanatu. Sa ia toe foi i le mea e tasi sa ia manatu sa ia iloa—faifaiva. O le taimi nei sa finagalo Iesu ia matua lagona lelei o Ia e Peteru ma ia malamalama i le mamafa o le valaaulia i le taimi lenei; sa Ia manaomia Peteru ia malamalama i le uiga o le avea o se soo ma se e mulimuli i le Keriso toetu, o lea o le a le toe i ai o Ia i la le tino faatasi ma i latou. O le a le mea na finagalo ai le Alii mai ia Peteru? Sa manao o Ia ia Peteru e fafaga Ana mamoe, Ana tamai mamoe. O le galuega lea sa manaomia ona fai. Sa iloa e Peteru lenei valaau le gaoia, tuusao a lona Matai, ma sa tali atu le Aposetolo sili, ma le lototoa ma le le fefe e tuuina atu aso o totoe o lona ola i le galuega sa valaauina i ai o ia.
E Faapefea Ona Faatatau Lenei Mea ia te Oe
E ala i le Toefuataiga, ua i ai nei se isi Aposetolo sili i le lalolagi i ona po nei. O loo ua tuuina atu e Peresitene Nelson le valaaulia ia te oe ma a’u e fafaga mamoe a Iesu. Sa tatou faalogo i ai i le konafesi aoao i le siufofoga aupito manino ma sili ona agaalofa. Sa tatou ootia ma musuia, ae pe ua tatou suia ea? O le luitau i le taimi nei, faatasi ai ma faalavefau uma o loo vagaia i tatou ma le tele naua o mea iti o loo tapa la tatou gauai, o le tali atu i lenei valaaulia ma galulue—ia faia moni se mea, ia matuai faia se suiga, ma ia ola i se tulaga ua ese.
E mafai ona faapea lau fesili, e tali atu i le valaau e auauna atu, “O fea ou te amata ai?” Amata i le tatalo. Na lu’iina i tatou e Peresitene Nelson “ia faateleina [o tatou] tomai faaleagaga o i ai nei e maua ai faaaliga faaletagata lava ia, aua ua folafola mai e le Alii e faapea ‘afai e te [saili] mai, o le a e maua lea faaaliga e faaopoopo i luga o lea faaaliga, lea malamalama e faaopoopo i luga o lea malamalama, ina ia mafai ona e iloa mealilo ma mea filemu—o mea ia e maua ai le olioli, o mea ia e maua ai le ola e faavavau.’ [MF&F 42:61].”8
Fesili i lou Tama i le Lagi po o le a se mea e mafai ona e faia, ma mo ai. Soo se galuega itiiti lava o le agalelei atu e mafua ai ona tatou mafaufau i isi ma oo mai ai ona lava faamanuiaga. Tali atu i soo se uunaiga e te mauaina, po o le a lava le itiiti e ono foliga mai ai. Galue ai. Atonu o se ituaiga o feau tesi i se tasi e lei faamoemoeina. Atonu o se feau o soo se ituaiga. Atonu o se fugalaau, ni nai kuki, po se upu alofa. Atonu e tele atu, pei o le faamamaina o se togalaau po o se laufanua, faia o se tagamea mo se tasi e le o mafai ona savali pei ona sa i ai, fufuluina o se taavale, sasaina o le vao, saluina o le kiona, po o le na o se faalogologo atu o se uo e uiga i se luitau o loo la feagai.
E pei ona ta’ua e Sister Jean B. Bingham, “O nisi taimi tatou te manatu ai e ao ona tatou faia se mea silisili ma toa e ‘faitaulia’ ai o se auaunaga i o tatou tuaoi. Ae o ni faatinoga faatauvaa o auaunaga e mafai lava ona i ai ni aafiaga loloto i isi—faapea ai foi ma i tatou lava ia.”9
Atonu e te tau musu e faia le la’a muamua, ua e talitonu e leai sou taimi pe e te le mafaia ona faia se eseesega, ae o le a e maofa i se mea e mafai ona fai e sina mea itiiti.
Ma afai e te iloa e te popole e uiga i se uo ua se ese mai le Lotu ma ua le o toe i ai lona faatuatua sa susulu ma le faamoemoe, valaaulia o ia lua te o i ni nai faatinoga o galuega fesoasoani po o le auaunaga. E leai se isi auala e sili atu ona faamaluluina ai loto i mea a le Atua ma toe iloa ai Lona alofa i o tatou olaga nai le punouai i auaunaga ‘anoa i se tasi e manaomia.
O Le Mafuaaga o le Auauna Atu ma le Auaunaga Mo i Tatou
E tatau ona tatou faamanatu ifo ia i tatou lava e le aunoa pe aisea tatou te galulue ai ma auauna atu. O i tatou o fanau a le Tama Faalelagi; i le lalolagi tatou te aoao ai ma tuputupu ae e ala i se anoanoai o aafiaga, ina ia tatou atoatoa atili ai pe a tatou toe foi atu ia te Ia. O le aoao e vaavaai i talaatu, ae le o oe lava, ma auauna atu i le tasi ma le isi o se vaega tele o lo tatou faamoemoega iinei. O le mea moni, o le fatu lea. O le vavega o le vaavaai i talaatu ma auauna atu i le isi tagata e manaomia, i le faagasologa, tatou te aoao ai e mafai ona tatou faagalo i tatou lava ma a tatou faafitauli.
Ua faataatia mai e Peresitene Nelson se mamanu e maualuga atu ma sili atu ona paia o le auaunaga mo oe ma au. Pe a tatou tali atu, o le a tatou iloa ai le faamalieloto, saoloto, ma le mafanafana mo i tatou, ma le ala e mafai ai ona avea i tatou o se sui mo le suiga ma le faamafanafanaga i olaga o isi.
Ina ua faaeeina oe i le malumalu ma auauna atu i se misiona, e i ai le faaosoosoga e fai atu ai, “Ia, ua uma nei au. Sa ou galue auauna atu mo le 18 masina po o le 2 tausaga. O le taimi o se isi tagata.” E mafai foi ona fai atu le mea lava lea pe a uma ona faaipoipo. Atonu tatou te mafaufau, “Ia, ua uma ona ou faia. Ua oo mai le taimi mo se malologa.” Ae o le ituaiga auaunaga lenei e le mapu. O se ala o le olaga. E mafai ona tatou mapu mai a tatou gaoioiga masani ma aso malolo e malolo ai ma toe faafou, e “talatala ai le nonoa” e pei ona faaupu ai e Iosefa Samita.10 Ae o la tatou tiutetauave faalefeagaiga e alofa i le tasi ma le isi e pei ona Ia alofa mai ia i tatou ma ia fafaga Ana mamoe e leai se malolo.
O au o se tasi na mauaina lenei auaunaga, ma sa ou iloaina foi le filemu ma le olioli e maua mai i le avea ai o se meafaigaluega i aao o le Atua mo se isi tagata.
Sa faamatala e Jen le tauiviga sa ma feagai ai mo le ola o le ma atalii pepe. Ina ua mavae lona maliu, sa ma taumanatunatu pe mata o le a mafai ona galo atu. O lena taimi sa ma mauaina ai le sasaa mai o se alofa maoae, agalelei, ma le fesoasoani mai aiga ma uo, faapea foi tagata sa ma le iloa lelei. Sa i ai se ulugalii sa o ni uo mamae, sa auauna mai e le aunoa i lena vaitau atoa. Sa i ai pea i o ma autafa, tatalo faatasi ma i ma’ua ma mo i maua, ma aumaia faamanuiaga, o taumafa, upu faalaeiau faapea le filemu. Sa foliga mai e o mai lava i taimi uma pe a maua atu sina fasi faamatalaga taua pe ua ma nonofo ifo ma le le lavava ma le tiga alofa. Sa la faaalia i le tele o tausaga o le ala lea la te ola ai. Sa la auauna atu pea ma le le gaoia.
O Le Galuega o Auaunaga i le Ekalesia Atoa
A o ma galulue ai i le eria a Europa o le Ekalesia i nai tausaga ua mavae atu, ma nonofo i Siamani sa ou molimauina ai le mataupu faavae lenei o faaaogaina i se aafiaga ao o atu tagata o le Ekalesia ma a matou uo ma isi faatuatuaga e fesoasoani i le fiaafe e le mafaitaulia o tagata sulufai, o e sa leiloloa uma a latou mea a o sosola ese mai le faatafunaga o uafana o taua sa matamataita i Sasae Tutotonu. Sa latou o mai, o nisi taimi e savavali i le fiaafe o maila e amo mai na o nai ato laiti o a latou meatotino. O le vaaia o le tulaga manaomia, o le vaaia o uso ma tuafafine, vaaia o Ana tamai mamoe, sa o atu o tatou tagata e fesoasoani, faalavalava, fafaga, ma faamalumalu, ma faamafanafana nei tagata sulufai o e sa leiloloa mea uma. O le faia o lena mea, o i latou sa avatu i ai le fesoasoani sa suia. Sa faamanuiaina i le malamalama, malosi, ma le olioli latou te lei mauaina muamua, pe sa mou atu a o latou taulai atu ia i latou lava po o mea masani o le olaga. E faaauauina e o tatou tagata lenei taumafaiga matagofie o le toomaga i le lalolagi atoa.
O tagata sulufai e vavave ma iloagofie mea e manaomia, ae e i ai foi isi o loo siomia ai i tatou, atonu e le iloagofie o latou luitau e manaomia ai la tatou fesoasoani, ma e faapena foi ona i ai se tulaga manaomia tatou te fesoasoani ia i latou. O la tatou galuega auauna atu ma le tautua e le faapea e tatau ona faia i le isi itu o le lalolagi. I le tele lava o tulaga, e sili atu pe afai e latalata mai i le fale.
Ou te mitamita lava i le avea ai o se tasi o se ekalesia e faata’ita’ia lenei mea. Na o le tausaga ua tuanai atu, e silia ma le 7 miliona itula ofofua atu i le foai atu mo le totoina, seleseleina, ma le faasoasoaina o meaai i e matitiva ma le tagolima. I le tausaga foi lea ua tuanai atu, na saunia ai e le Ekalesia vai mama mo le afa miliona o tagata e le o maua. E fasefulu iva afe tagata na tuuina atu ai nofoa faataavalevale i atunuu e 41. Na toefuatai e volenitia le vaaiga ma aoaoina tagata e tausia e 97,000 mo i latou e i ai luitau i le vaaiga i atunuu e 40. E tolusefulu tolu afe o tagata e tausia sa aoaoina i le tausiga o tina ma pepe fou i atunuu e 38. Ae le taua ai Lima Fesoasoani lea, i tausaga talu ai, e faitau selau o le afe o a tatou tagata na foai atua le miliona o itula. Latou te o atu e fesoasoani ia i latou na aafia i faalavelave tetele ma laiti, e faapena foi ona latou faaleleia o latou tuaoi ma nuu.
O le galuega taimua folafolaina a le Ekalesia o le JustServe, lea o se nofoaga maoae e saili ai mo ni avanoa o auaunaga pe a lata atu ia te outou, ua i ai le silia ma le 350,000 volenitia ua lesitalaina, o e na foai atua le miliona o itula e fesoasoani ai i o latou nuu i le lotoifale.
O le ekalesia lenei o faatinoga! O le mea lenei tatou te faia. O le mea lenei o loo outou faia. Ia avea lenei mea ma se uiga iloga o lou lava tagata. Ma o le ala lea tatou te maua ai le olioli ma le filemu, aua o se tasi lenei o auala aupito maualuga, silisili ma mao’i e mulimuli ai i le faataitaiga a le Faaola.
Na saunoa Peresitene M. Russell Ballard, “E tutupu mea sili e ala i mea faigofie laiti. E pei o fasi auro ninii lea e faaputuputu i le aluga o taimi ma avea ai ma se oa tele, o a tatou auaunaga agalelei iti ma faatauvaa e faaputuputu e avea o se olaga e faatumulia i le alofa mo le Tama Faalelagi, ma tuuto atu i le galuega a le Alii o Iesu Keriso, ma lagona ai le filemu ma le fiafia i taimi uma lava tatou te aapa atu ai le tasi i le isi.”11
Ituaiga e Tolu o Auaunaga
Ou te fia faamamafa atu ituaiga e tolu o auaunaga lautele e tofu maua e i tatou le avanoa e punouai ai.
O le muamua o le ituaiga o auaunaga e tofia tatou i ai pe valaaulia e faatino o se tiutetauave i le lotu. Sa matagofie ma musuia le fofogaina i le konafesi aoao. O le a tatou taumafai mo le ituaiga o auaunaga e faatauaina, ae le fuaina, lea tatou te mafaufau ai e uiga i ai, tatalo mo, ma fesoasoani ia i latou ua tuuina mai le tiutetauave tatou te vaaia.
O le lona lua o le ituaiga o auaunaga tatou te filifili e faia ia tatou lava filifiliga. O se faalautelega o le muamua, lea o le a tafe atu ia tatou taga fai uma i aso taitasi ma fegalegaleaiga a o tatou saili atili ma le loto e faagalo i tatou lava ae vaavaai atu i talaatu i isi. E leai se tofiga aloaia, ae e faaosofia i tatou e le faataitaiga lava e tasi faaKeriso, e amata i le agalelei atili ma le manatu ia i latou o vagaia i tatou. O aga laiti o le agalelei ma le agalelei le leoa e taitai atu ai i sootaga sili atu ona mafanafana, ma sili atu ona ‘anoa.
Lona tolu o le tautua lautele. E oo lava i lo outou matutua, e mafai ona outou tautua i au ofisa o aoga, o faalapotopotoga fesoasoani, e oo i faigamalo i le lotoifale, faaitulagi, ma faaleatunuu. Ou te fautuaina alii ma tamaitai ia gauai atu i le ala lea. O mea e talafeagai ai, faaaofia ai oe lava i tulaga faaupufai ma se faamoemoe e auauna atu ma fausia tagata taitoatasi ma nuu. Aloese mai fevaevaeaiga faaupufai ia e oo ina fai faamalosi ma faatuiese, ma faataumaoia ai nuu, atunuu, ma konetineta. Auai faatasi atu ma isi au faapolotiki o e o sue se faamoemoega lelei e aumaia ai le faamalologa i ola ua mafatia i e latou te vaaia ma talaatu. E mafai ona avea oe ma leo o le faapaleniina ma le faautautaga, lagolagoina le le faaituau i tulimanu uma o sosaiete. E i ai se manaoga tuputupu ae mo oe e tuuina atu ai lou malosi i lenei ituaiga gaoioiga faitele.
Pe a tatou faitauina talafou, atonu tatou te manatu ua faateleina le leaga o le lalolagi. Afai tatou te taitasi ma galulue i ala tetele ma laiti i aso taitasi, e mafai ona tatou suia lo tatou lava lalolagi ma i latou o siomia ai i tatou. A o e tautuaina lou tuaoi ma tautua faatasi ma lou tuaoi i lou nuu, o le a avea oulua o se uo e fefaasoaai lou lua manao e fesoasoani atu. O le a avea na ma faauooga malolosi, e fauina sootaga o aganuu ma talitonuga.
Fai mai Antoine de Saint-Exupéry, “Ua aoao mai e le olaga i tatou o le alofa e le aofia ai le pulatoa atu o le tasi i le isi, ae i le vaavaai atu i talaatu faatasi i le itu e tasi. E leai ni faauooga vagana i le tuufaatasia i le taumafaiga maualuga e tasi. E oo lava i lo tatou vaitau o le manuia i oa o le lalolagi, ua tatau ai, a leai o le a le isi auala tatou te faamatala ai le fiafia tatou te maua i le faasoa atu o a tatou toe momoi mea i le toafa?”12
Faaiuga
Afai o le a taitasi ma outou tali atu i le valaaulia e auauna atu e pei ona faia e Iesu, o le a outou liua, avea atili ma e le manatu faapito. O le a outou mauaina le olioli lea e sau mai le auauna atu i le ala a le Faaola, tuua o outou popolega ma le mautonu ma faanoanoaga lea e sau mai le le atoatoa.
Atonu, ao e faalogologo, ua oo mai i le mafaufau se igoa po o se mafuaaga. E foliga mai o se valaaulia mai le Agaga, ma atonu ua e mauaina muamua. Aapa, atu, vaavaai atu, ma siitia i luga. Ia filifili e tali atu i lenei valaaulia ma tatalo i le aso ia iloa mea e mafai ona e faia. Pe a e vaai ma lagona ia faamanuiaga e aumaia e lenei mea ia te oe ma i latou e te auauna atu i ai, o le a e manao ia avea ma se mamanu i aso taitasi.
O la tatou taumafaiga aupito maualuga ma aupito sili o le faasoa atu o le malamalama, faamoemoe, olioli ma le faamoemoega o le talalelei a Iesu Keriso i fanau uma a le Atua. O le fesoasoani atu, tautua, ma le auaunaga ia i latou o faaaliga ia o le talalelei i lona faatinoga. A o tatou faia lea mea o se ala o le olaga, o le a tatou iloa ai e matuai faamalieina lava, ma o le ala lea e mafai ai ona tatou maua le filemu ma le olioli atonu sa faigata mo i tatou.
Sei ou toe tau atu le aoaoga a Peresitene Nelson: “O se faailoga o le Ekalesia moni ma le ola a le Alii o le a avea pea ma se taumafaiga faatulagaina ma faatonutonuina e auauna atu i fanau taitoatasi a le Atua ma o latou aiga. Ona o Lana Ekalesia lenei, o i tatou o Ana auauna o le a auauna atu i le tasi, e pei lava ona sa Ia faia. O le a tatou auauna atu i Lona suafa, i Lona mana ma le pule, ma i Lona agalelei alofa”13
O le ala lea sa soifua ai le Faaola, ma o le mafuaaga lea sa Ia soifua ai—ia aumaia le pulupasama atoatoa ma le faamalologa moni e ala i Lana meaalofa togiola sili, e le i’u, mo oe ma a’u. Ia tatou mulimuli atili i le Keriso soifua, ma le naunautaiga atili, ma le mataalia atili, ao tatou taumafai e avea ma Ona soo moni e ala i le auauna atu e faapei ona Ia faia.
I le suafa, o Iesu Keriso, amene.
© 2018 Puletaofia e le Intellectual Reserve, Inc. Ua taofia aia tatau uma. Faamaonia le faaperetania: 2/18. Faamaonia le faaliliuga: 2/18. Faaliliuga o le “A Hallmark of the Lord’s True and Living Church.” Samoan. PD60005945 890