O Lou Taua e Le I’u ma le Alofa e Le I’u o le Atua
O Se Afiafi ma Elder ma Sister Kearon
Faigalotu i le Lalolagi Atoa mo Talavou Matutua • 6 Me, 2018 • Iunivesite o Polika Iaga-Idaho Center
Faafetai atu i le aufaipese mo lena musika musuia e vivii atu ai i lo tatou Foafoa.
O se fiafiaga maua’i ma se avanoa le laumaua lo tatou mafuta ai i lenei faigalotu. Ua ma fiafia lava i se avanoa e faatasi ai ma talavou matutua o le Ekalesia. Ma te alolofa ia te outou! O se tulaga faagaeetia le auai faatasi ma outou i se vaitau sagisagi o le gasologa faifaipea o le toefuataiga o le talalelei a Iesu Keriso.
Po o le a lo tatou matutua, tatou te fiafia uma lava i se talafaafagogo, aemaise lava o se tala nau alofa.Ou te fia fai atu o la ma tala nau alofa o se tala matagofie ma o se talafaafagogo e matuai lei faamoemoeina lava. Sa ou ola ae i Kalefonia, a o lo’u toalua o Egelani ma Saudi Arabia. Sa ou ola ae i le Ekalesia i lo’u fanau mai; o lo’u toalua o se tagata liliu maile Ekalesia i le 20 ma ona tupu o ona tausaga. Sa aumaia faatasi i ma’ua mai ni konetineta eseese se lua i le aai tele o Lonetona. Sa avea o ia o se tagata o le Ekalesia mo le lua tausaga ma sa auai i le uarota a le au talavou matutua nofofua i Lonetona, ina ua ou taunuu atu e faaalu le ono masina e suesue ai le talafaasolopito faafaatufugaga ma tusiga faaPeretania. Sa le’i i ai so’u manatu, po o se faamoemoe o le a ou ma’ivalea i se tasi a o suesue i le U.K, ae o le olaga e mafai ona avea ma ni mea e le faamoemoeina—ma ofoofogia.
Ae ou te faafetai tele sa taitai e le Alii i ma’ua i le tasi ma le isi. Sa ma faaipoipo i le Malumalu o Oakland Kalefonia, ma sa ou toe masii vave atu loa lava i Egelani i le mea sa ma nonofo ai mo le isi 19 tausaga, seia oo i le taimi na valaauina ai lo’u toalua o se Pulega Aoao i le 2010.
Ua faamanuiaina i ma’ua i se fanau e toafa. Ua maliu le ma ulumatua, o se atalii, i se taotoga o le fatu ina ua 19 aso o lona matua. O le faaletonu o lona fatu na maua i le taimi o lo’u ma’itaga, ma o la ma tauiviga malosi mausali mo si ona ola puupuu sa aoao ai i maua i vavega, o le finagalo o le Atua, ma le moni patino o le vavalalata o le Togiola ma le Toetu o Iesu Keriso.
Sa sosoo mai si o ma atalii pele ma afafine faapelepele e toatolu, o e ma te faamemelo, faaaloalo ma aoao mai ai i aso uma. O ni ‘oa lava i latou ia i ma’ua. Faatasi ai ma le faatuatua e le masani ai, sa latou loto e masii mai, o o latou tausaga uma o le talavou---mai lo latou aiga i Egelani i Iuta, i Siamani, ma o lea foi ua toe foi mai i Iuta, ao tofia lo latou tama e galue i avanoa eseese i le Ekalesia.
O Lou Taua e Le I’u ma le Alofa e Le I’u o le Atua
Pe o i ai ni mea sa e le manao moni i ai a o tamaitiiti ua e fiafia i ai o se tagata matua? Ae a taimi e fai ai sina malologa puupuu? Ou te talitonu e te lei manao lava e malolo a o e laitiiti. Ou te lei manao ai. Ae o le taimi nei o le avanoa e fai ai sina moe faasili o se laki! Ou te fiafia i taimi o malologa puupuu. Ae a brocolli po o nisi meaai sa e le manao ai a o laitiiti? Ia, pe ua e manao ai nei?
Po o a lava ou lagona e uiga i malologa pupuu po o brocolli, e tele mea—sa e lei manao ai—a o laitiiti e te le o manao ai lava o se tagata matua. Sa tatou le mananao lava e susulu ma mafoefoe tulivae. Sa tatou le mananao lava e taumafai i se ‘au taaalo ae le taulia. Sa tatou le mananao lava e soona fai i tatou, ulagia, le faitaulia, pe faatiga ma le loto e se isi tagata. Ma e tatou te le o mananao lava iai.
Ou te manatua i le aoga tulagalua sa fai lava si faamanuiaina o au faaakatemia i le potuaoga, ae o a’u o se tagata siva, ma e matua augapiu ma se iloa o taaloga i le malae. E mafai ona ou siva milo i le vae e tasi, ae ou te le mafai ona pasi---pe fana, pe togi, pe kiki, pe sapo, pe suigi. E laulau a’u e nisi tamaiti ma fai o’u pona ma ula i o’u lima mimiti. Sa mimiti o’u lima, e moni, ae sa ou tiga ai lava! Ou te manatua lelei lava afai matou te filifilia a matou lava ‘au mo se tauvaga faaakatemia, sa filifili au e a’u uo i se mea e lata i le pito i luga. Ae afai matou te filifilia ni ‘au mo se tauvaga faaafeleti, e le filifilia lava a’u. Sa ou lagonaina le le fiafia!
Ia, aisea ua ou faasoa atu ai nei mea ia te outou, a ua fiasefulu tausaga talu ona uma? Aua, e pei ona outou vaai i ai, o ituaiga mea na e mau ma i tatou. Tatou te manatua o tatou lagona pe a teenaina pe le manaomia pe le faamaonia e a tatou paaga, ma atonu foi o se tulaga matautia, e tagata o o tatou lava aiga. Ma e le suia lava lena mea ona faapea ua tatou ola ae ma ua matutua. Atonu o ni ou lagona na ananafi. O paaga, matua, tei, taitoalua, faiaoga, o e faigaluega faatasi, o uo—e mafai uma lava e i latou ona fai atu ma faia mea e loloto se tiga. E tele taimi e lei faamoemoeina. Ae o nisi taimi e mafai ona faia ma le loto. Ma o nisi taimi tatou te faataututu atu i ai.
O le aoao ia maua, lagona, ma malamalama i lo tatou taua taitoatasi tusa lava po o a mafaufauga po o tala a isi tagata e uiga ia i tatou, e taua lava i o tatou lagona o’oo’o i le olaga atoa ma lo tatou soifua manuia faaleagaga. A tatou faatagaina upu, faatinoga po o manatu o isi e taitai ai o tatou lagona e uiga ia i tatou lava, ona avea lea o i tatou o ni tagata maaleale ua aafia fua, ma le le iloa lava o le taimi o se faamaoniga a se tasi o i tatou o le a liua i se faamamasagiaina.
E faapena foi afai e faavae lo tatou taua i le na o mea tatou te ausia, o a tatou faatinoga po o a tatou meaalofa e vaaia e mata, ua tatou saunia i tatou lava mo le toilalo ma le le fiafia i le taimi lava tatou te le talafeauga ai ma tulaga faamoemoeina.
Ua outou iloa lenei mea, ae o outou o loo tauivi ma ia mea, e moomia ona faalogo soo i ai ma toefaamautinoa lo outou taua e le i’u, lea e le o fesootai atoa ma mea e te maua ae e fesootai moni lava i la outou sootaga ma le Atua. O le a le uiga o le le i’u? E le muta, e leai se tuaoi, e leai se gataaga. O outou taitoatasi e leai se muta, e leai se tuaoi, e leai se gataaga o le taua. Ia te ai? I le tagata e laulauina oe i le malaetaalo? Leai. E le muta, leai se tuaoi, e leai se gataaga o lou taua i lou Tama i le Lagi, o Le e sili le silafiaina o oe, e le afaina po o le a lava se manatu poo se tala a soo se tasi e uiga ia te oe. Manatu i le matagofie ma le moni a’ia’i o lena upumoni mo sina minute. E “taua i tatou i [Lana] silafaga.”1
A faatiga oe e se tasi, pe e te oo foi i se toilalo o soo se ituaiga, sau i le mea e le teena ai lava oe e le ulagia ai foi. E alofa lou Tama i le Lagi ia te oe, po oai lava oe, po o le a foi le mea o oulua tauivi. E te lelei. E te lelei. E alofa o Ia ia te oe i lou tagata o i ai, i le taimi nei, i le po nei, i lou ve’uve’ua matagofie uma. Ae ua lava foi Lona alofa ia te oe e le faatagaina ai oe e te tumau ai i le mea o e i ai iinei, i le taimi nei. E i ai Ana fuafuaga sili atu mo oe! O outou o “suli o le Atua, ma suli-faatasi ma Keriso,”2 ma o lea e tatau ai ona outou faaauau ona aoao ia tausi ia poloaiga, faia mea sese, tuputupu ae, tauivi, ma suia, seia iu ina outou tau atu i lo outou gafatia paia, ua faaleleia ma faamamaina—ma i ai se aso e faavavau e faaatoatoaina ai—e ala i le alofa tunoa o Keriso.3
Afai tatou te faataatitiaina le mamanu mo o tatou lava olaga, e ono foliga mai ua tatou fuafuaina mo i tatou lava se olaga o le fiafia, manuia, ma faigofie, atonu e i ai ni nai faigata e mafai ona tatou faatoilaloina e aunoa ma se taumafaiga tele. O ai e manao e oo i le toilalo, po o se isi ituaiga gau po o mafatiaga? O ai e manao e fai ni mea faigata? Afai tatou te ola i se olaga tatou te mananao e ola ai, o le a taliaina lava i tatou e le aunoa i a tatou iunivesite muamua tatou te filifilia po o aoga mo faailoga maualuluga, maua galuega e moemiti i ai, ma faaipoipo i la tatouuo atoatoa o le a tatou le femisaai lava. O le a tatou le tauivi lava ma se valaauga i le ekalesia, o le a tumau le liua loloto o a tatou pele i le talalelei a Iesu Keriso, ma soo se tasi tatou te faasoa i ai lo tatou faatuatuaga o le a papatiso i totonu o le vaiaso.O le a le maua o tatou tina i le kanesa, o le a le tuua e o tatou tama, ma o le a le feoti laiti nai o tatou tei i ni faalavelave matautia. O le a le feoti a tatou pepe i ni taotoga o le fatu, ma o le a tatou le faatalitali lava i le taimi a le Alii. Ua outou maua mai le ata. Ae o le a tatou le atiina ae se tikeri ‘anoa o le onosai, agaalofa, lotomaualalo, mapuitiga, agalelei ma le alofa, tumau, amio pulea, le manatu faapito, po o le faatuatua, faamoemoe, ma le alofa mama. O le a tatou toe foi atu i lo tatou Tama i le Lagi toetoe o le tulaga lava e tasi sa tatou i ai ina ua tatou tuua Lona afioaga, aua o le a tatou le maua le poto masani o se mea sa manaomia ai le suiga po o le tuputupuae po o le faalagolago atoatoa i le Atua.
Ae tatou te le o ola i ni olaga faigofie e mamanu e oe lava. O loo tatou ola i ni olaga sa fuafuaina e le Atua mo le tele o lo tatou olioli ma le alualu i luma. O le mea lea, ia mautinoa o le alofa e le iu ma le agamalu o le Atua o le a valaaulia ai oe e faia suiga i lou olaga e ala i aafiaga e oo mai i lou ala, e oona ma suamalie. Ae o le a Ia valaaulia lava oe e le aunoa ia suia i se ala alofa, faamalosiau, ma le mautinoa. Aua le faalogologo i leo i lou ulu—ia atonu e mai i lou laitiiiti—lea e fai atu ia te oe e le mafai ona e sui, e te le aoga i se mea, ma o le a e toe toilalo foi. Faalogologo ia tau lava o musumusuga a le Agaga Paia ma “le afioga malie a le Atua … lea e faamalolo ai le agaga ua manualia”4 lea e faamautuina lou taua e le i’u ma le faamautinoaga a le Atua e mafai ona e faia.
A e le lava i le olaga ma lagona e te le mafai ona vaai i soo se lelei e sau mai i au taumafaiga uma ina ia ola amiotonu, aua le fiu. Aua ne’i fetu’unaia au miti ma sini. Faateleina lou faatuatua e aoga i taimi uma le faatalitali mo le taimi a le Alii.
Ma a tutupu mea le lelei, tiga, ma le matautia i lou olaga, ma ua e iloa moni le ala e te ola ai i le ala e ala i lou lava Ketesemane patino, manatua o Keriso, Le ua Faauuina, ua uma ona ia tauaveina o tatou tiga ma na tauaveina o tatou faanoanoa.5 Sa momomo o ia ona o a tatou amioleaga, oona faalavalava foi ua malolo ai tatou.6 Ua Ia silafia lelei ma le patino, le tiga e te tauaveina. O Ia o le Ulumatua a le Tama, ma na Ia muai tauaveina ou mafatiaga i lona atoatoa, pe faalemafaufau, faaletino, faalelagona, pe faaleagaga. Aua nei masalosalo i Ana folafolaga o le faamoemoe ma le faamalologa. Na foafoaina oe mo se olaga fiafia, ma faamanuiaina. O lou taua e le i’u, ma e faapena foi le alofa o le Atua mo oe.
Faaiuga
Ua ou fiafia lava o le a outou faalogo i lo’u toalua. Ou te manao ia outou iloa—e talafeauga ma lo outou matutua ma le tulaga o le olaga, a o outou tafafao faamasani ma faaipoipo—o lenei alii ua ou matuai alofa loloto i ai e lei uma lava lona agalelei mo au mo le 27 tausaga o le ma faaipoipoga. E lei i ai lava se taimi, e lei faatasi ona ia faia ia ou lagona le maasiasi pe le alofagia ma na te lei faia lava se talaula e uiga ia te au. Ou te faʻamoemoe e mafai ona e aʻoaʻo mai lena mea.
Ou te fia faailoa atu lo’u faatuatua ola i le Keriso Soifua, o le “o le malamalama, o le ola, ma le faamoemoe moni o le lalolagi. O Lona ala o le auala e tau atu i le fiafia i lenei olaga ma le ola e faavavau i le lalolagi a sau.”7 O Lana Ekalesia lenei o loo taitaia e se perofeta.
I le suafa paia o Iesu Keriso, amene.
© 2018 Puletaofia e le Intellectual Reserve, Inc. Ua taofia aia tatau uma. Faamaonia le faaperetania: 2/18. Faamaonia le faaliliuga: 2/18. Faaliliuga o le “Your Infinite Worth and God’s Infinite Love.” Samoan. PD60005945 890