Ang Inyong Walay Katapusang Bili ug ang Walay Katapusang Gugma sa Dios
Usa ka Gabii uban ni Elder Patrick Kearon
Tibuok Kalibutan nga Debosyonal alang sa mga Young Adult • Mayo 6, 2018 • Brigham Young University–Idaho Center
Salamat sa choir alang sa maanindot nga musika sa pagdayeg sa atong Tiglalang.
Usa ka hingpit nga kalipay ug pribilehiyo nga ikauban kamo niini nga debosyonal. Dako kaayong among kalipay sa bisan unsang kahigayunan nga makauban ang mga young adult sa Simbahan. Kami nahigugma gayud kaninyo! Makapahinam kaayo ang mahimong aktibo nga mga partisipante uban kaninyo niining madasigon nga panahon sa nagpadayon nga pagpahiuli sa ebanghelyo ni Jesukristo.
Batan-on o tigulang, kitang tanan malingaw og nindot nga fairytale, ilabi na kon kini sugilanon sa gugma. Ako makaingon gayud nga ang among sugilanon sa gugma usa ka maanindot ug wala gayud damha nga fairytale. Nagdako ako sa California; ang akong bana sa England ug sa Saudi Arabia. Gipadako ko sa Simbahan gikan sa akong pagkatawo; ang akong bana usa ka kinabig sa Simbahan sa dihang siya kapin na sa 20 anyos. Nausa kami gikan sa duha ka managlahi nga mga kontinente diha sa dakong siyudad sa London. Siya nahimong miyembro na sa Simbahan sulod sa duha ka tuig ug mitambong sa young single adult ward sa London, sa dihang miabut ko didto aron sa pagtuon og art history ug English literature sulod sa unom ka bulan. Wala gayud nako tuyoa, o magdahum, nga mahigugma samtang nag-eskwela sa U.K., apan adunay dili gayud matag-an––ug talagsaon––nga mga panghitabo sa kinabuhi.
Mapasalamaton kaayo ako nga ang Ginoo midala namo sa usag usa. Nagminyo kami sa Templo sa Oakland California, ug mibalik dayon ko sa England kon diin namuyo kami sulod sa sunod nga 19 ka tuig, hangtud nga gitawag ang akong bana isip usa ka General Authority niadtong 2010.
Napanalanginan kami og upat ka mga anak. Namatay ang among kinamagulangan nga anak, usa ka lalaki, sa operasyon sa kasingkasing sa dihang 19 pa lang siya ka adlaw. Ang iyang depekto sa kasingkasing nadiskobrehan atol sa akong pagmabdos, ug ang among makalilisang ug lig-on nga pakigbisug sa iyang mubo nga kinabuhi mitudlo kanamo og mga milagro, ang kabubut-on sa Dios, ug ang kasuod, og personal nga kamatuoran sa Pag-ula ug Pagkabanhaw ni Jesukristo.
Ang among buotang anak nga lalaki gisundan sa among tulo ka bililhon nga mga anak nga babaye, kinsa among gidayeg, girespeto, ug nakakat-on kami matag adlaw. Sila among mga bahandi. Uban sa dili sagad nga hugot nga pagtuo, sila andam nga mibalhin—sa tibuok nilang katuigan isip mga tinedyer—gikan sa ilang panimalay sa England ngadto sa Utah, ngadto sa Germany, ug karon balik nasad sa Utah, samtang ang ilang amahan gitahasan sa pagserbisyo sa lain-laing mga kapasidad sa Simbahan.
Ang Inyong Walay Katapusang Bili ug ang Walay Katapusang Gugma sa Dios
Karon, aduna bay mga butang nga dili gayud kamo ganahan sa dihang bata pa nga karon inyo nang ganahan kaayo isip usa ka hamtong? Unsa kaha ang pagtagpilaw? Sigurado ko nga dili gayud kamo ganahan motagpilaw matag karon og unya sa dihang bata pa kamo. Kay ako dili! Apan karon ang makahigayon og bisan gamay lang nga dugang pagkatulog usa na ka dakong kalipay! Ganahan kaayo kong motagpilaw. OK, unsa kaha kon ang broccoli o laing pagkaon nga dili gayud mo ganahan isip usa ka bata? Unya, ganahan na ba kamo niini karon?
Dili igsapayan kon unsay inyong gibati mahitungod sa mga pagtagpilaw o sa broccoli, adunay mga butang nga dili nimo ganahan isip usa ka bata––daghan kanila––nga dili gihapon nimo ganahan isip usa ka hamtong. Dili gayud kita ganahan sukad nga madagma ug mapaksit ang atong mga tuhod. Dili gayud kita ganahan sukad nga mosulay og apil sa usa ka team sa sports ug dili madawat. Dili gayud kita ganahan sukad nga daug-daugon, himuong kataw-anan, mag-inusara, o tuyuong pasakitan sa uban. Ug hangtud karon dili gihapon ta ganahan.
Nakahinumdom ko sa elementarya nga nagmalampuson ko sa klase, apan usa ako ka dancer, ug hingpit nga pakyas sa sports. Makahimo ko sa pag-pirouette [usa ka pagsayaw nga magtuyok gamit lang ang usa ka tiil unya ang pikas nagtandog sa tuhod sa pikas tiil], apan dili ko makapasa—o maka-itsa, o makalabay, o makapatid, o makasalo o makaigo sa bola. Ang ubang mga bata manungog nako ug magbugal-bugal sa akong niwang nga mga bukton. Aduna gayud akoy niwang nga mga bukton, tinuod kini, apan nasakitan gihapon ko! Ako gayung klarong mahinumduman nga kon magpili gayud kami og among kaugalingon nga team alang sa usa ka matang sa academic nga kompetisyon, usa ko sa unang mapilian sa akong mga kauban. Apan kon kami magpili og mga team alang sa kompetisyon sa mga dula, kanunay kong katapusang mapilian. Dili gayud maayo akong gibati niadto!
Karon, nganong akong gipaambit kini nganha kaninyo, pipila ka dekada human kini mahitabo? Tungod kay, sa inyo nang nakita, kining klase sa mga butang magpabilin kanato. Makahinumdom kita unsa ang bation kon masalikway o wala kinahanglana o wala magustuhi sa atong mga kaedad, ug tingali, subo kaayo, sa mga miyembro sa atong kaugalingong pamilya. Ug dili kana mausab tungod lang kay kita mitubo ug nahimong mga hamtong. Mahimong mibati ka niini kagahapon lang. Mga kaedad, mga ginikanan, mga igsoon, mga kapikas, mga magtutudlo, mga kauban sa trabaho, mga higala—silang tanan mahimong mosulti ug mobuhat og mga butang nga makapasakit pag-ayo. Kasagaran dili kini tinuyo. Apan usahay mahimo kining tinuyo kaayo. Ug usahay kita manimalos.
Ang pagkat-on sa pagkakita, pagbati, ug pagsabut sa atong indibidwal nga bili nga dili igsapayan kon unsa kaha ang gihunahuna o isulti sa laing mga tawo mahitungod kanato importante kaayo sa tibuok kinabuhi natong emosyonal ug espiritwal nga kaayuhan. Kon atong tugutan ang mga pulong, lihok, o opinyon sa uban nga modiktar kon unsa ang atong bation sa atong kaugalingon, mahimo kitang mahuyang nga mga biktima, nga dili gayud mahibalo kon ang pagdawat sa usa ka tawo kanato mahimong pagtamay.
Sa samang paagi, kon atong ibase ang atong bili sa atong mga kalampusan lamang, sa atong mga agi, o atong makita nga mga gasa, atong gibutang ang atong kaugalingon sa dalan sa kapakyasan ug kasagmuyo sa higayon nga dili nato maabut ang gilauman ug dili mahimutang sa kinatas-an.
Kahibalo kamo niini, apan niadtong kinsa ninyo nga nakigbisog niini kinahanglan makadungog kanunay ug mahatagan og kasiguruhan sa inyong walay kinutubang bili, nga wala gayuy koneksyon sa inyong mga nakab-ot apan natural nga konektado sa inyong relasyon sa Dios. Unsay ipasabut sa walay kinutuban? Walay kahutdanan, walay utlanan, walay katapusan. Ang bili sa matag usa kanato walay kahutdanan, walay utlanan, walay katapusan. Alang kang kinsa? Alang sa tawo kinsa sa mahulagwayon nga paagi manungog ninyo diha sa playground? Dili. Ang inyong bili walay kahutdanan, walay utlanan, walay katapusan alang sa inyong Amahan sa Langit, ang Usa nga labing nakaila kaninyo, dili igsapayan kon unsa ang gihunahuna o gisulti sa uban mahitungod kaninyo. Hinuklugi lang sa makadiyot ang katahum ug kalinaw niini nga kamatuoran nga maghatag og gibug-aton sa inyong kalag. Kamo mga “bililhon sa [Iyang] panan-aw.”1
Kon adunay usa ka tawo nga nakapasakit kaninyo, o kamo nakasinati og kapakyasan sa lain-laing matang, duol ngadto diin kamo dili gayud isalikway ug dili gayud biay-biayon. Ang Inyong Amahan sa Langit nahigugma kaninyo, bisan kinsa pa kamo, bisan unsa pa ang inyong kalisud. Igo na kamo. Igo na kamo. Siya nahigugma kaninyo sa inyong pagka kamo, karon dinhi, karon mismo, sa inyong tanang maanindot nga kasamok. Apan sa Iya usab nga tumang gugma kaninyo dili niya buot nga magpabilin kamo kon unsa kamo karon dinhi, karon mismo. Siya adunay mas dako pa nga plano alang kaninyo! Kamo “mga manununod sa Dios, ug mga isigkamanununod uban kang Kristo”2 ug sa ingon kinahanglan kamong magpadayon sa pagkat-on sa pagbuhat sa mga sugo, makahimo og mga kalapasan, molambo, makigbisog, ug mausab, hangtud inyong maabut ang inyong balaang potensyal, gisala ug gilimpyuhan—ug sa ubang mahangturong mga adlaw mahingpit—pinaagi sa grasya ni Kristo.3
Kon atong imuntar ang laraw alang sa atong kaugalingon nga mga kinabuhi, malagmit magplano kita alang sa atong kaugalingon og kinabuhi nga puno sa kalipay, kalampusan, ug igong kasayon, tingali uban sa gamay nga kalisdanan nga atong mabuntog sa walay dakong paningkamot. Kinsa ang buot makasinati og kapakyasan, kalisud o bisan unsa nga klase sa kapildihan o pag-antus? Kinsa ang buot mobuhat og lisod nga mga butang? Kon buot nato nga magpakabuhi sa kinabuhi nga atong gusto, kanunay kitang madawat sa atong nag-unang gipili nga unibersidad o graduate school, makuha ang atong gipangandoy nga trabaho, ug maminyo sa atong hingpit nga soulmate kinsa dili gayud nato makalalis. Dili na gayud kita magkalisud sa atong calling sa simbahan, ang tanan natong mga minahal sa kinabuhi magpabilin nga hingpit nga nakabig sa ebanghelyo ni Jesukristo, ug ang tanan nga atong gipakigbahinan sa atong hugot nga pagtuo mabunyagan sulod sa usa ka semana. Ang atong mga inahan dili magkakanser, ang atong mga amahan dili mobiya, ug ang atong mga igsoon dili mamatay og sayo sa makalilisang nga mga aksidente. Dili kita mawad-an og mga anak sa pag-opera sa kasingkasing, ug dili gayud kita kinahanglan nga maghuwat sa panahon sa Ginoo. Nakasabut mo sa akong gipasabut. Apan dili usab kita makapalambo og bisan unsa nga makahuluganon nga ang-ang sa pailub,kapuangod, kamapainubsanon, kamainantuson, mahigugmaong-kalolot, paglahutay, disiplina, pagka dili hakog, o hugot nga pagtuo, paglaum, ug putli nga gugma. Mobalik kita ngadto sa atong Amahan sa Langit sa susama nga kahimtang sa atong pagbiya sa Iyang presensya, tungod kay dili unta kita makasinati og bisan unsa nga nanginahanglan og kausaban o paglambo o hingpit ug tumang pagsalig [dependence] sa Dios.
Apan wala kita mabuhi sa kaugalingon nga gidesinyo nga mga kinabuhi sa kasayon. Nagpuyo kita sa mga kinabuhi nga giplano sa Dios alang sa atong kinadak-ang kalipay ug paglambo. Busa salig nga ang walay kinutuban ug malumo nga gugma sa Dios magdapit kaninyo sa paghimo og mga kausaban sa inyong kinabuhi pinaagi sa mga kasinatian nga inyong masugatan, ang pait ug ang tam-is. Apan Siya sa kanunay mag-awhag og kausaban sa mahigugmaon, makapadasig, mapamatud-anon nga paagi. Ayaw paminaw sa mga tingog sa inyong hunahuna—nga tingali anaa sukad pa sa inyong pagkabata—nga nagsulti kaninyo nga dili kamo mahimong magbag-o, dili pa igo ang inyong bili, ug mapakyas na usab kamo. Paminaw lamang sa mga hinagawhaw sa Espiritu Santo ug “ang makapahimuot nga pulong sa Dios … nga makapaalim sa samaran nga kalag”4 nga nagkompirmar sa inyong walay kinutubang bili ug pagsiguro sa Dios nga makahimo kamo niini.
Kon kamo maluya sa kinabuhi ug mobati nga mora og wala nay maayo nga moabut gikan sa tanan ninyong mga paningkamot sa pagpakabuhi sa pagkatamarung, ayaw og hunong. Ayaw ikompromiso ang inyong mga pangandoy ug mga tumong. Palamboa ang inyong hugot nga pagtuo nga kanunay nga adunay bili ang paghulat sa panahon sa Ginoo.
Ug sa dihang ang makalilisang, sakit, dautang mga butang mahitabo sa inyong kinabuhi, ug sa tiunay wala kamo mahibalo unsaon ninyo pagkalingkawas sa dalan padulong sa inyong kaugalingon nga personal nga Getsemani, hinumdumi nga si Kristo, ang Usa nga Dinihugan, mipas-an na sa inyong mga kagul-anan ug midala sa inyong mga kasub-anan.5 Siya nangapangos tungod sa inyong mga kasal-anan, ug tungod sa Iyang mga labod kamo nangaayo.6 Siya tinud-anay ug personal, nga nahibalo, sa mga kasakit nga inyong giantus. Siya ang Unang Natawo sa Amahan, ug Siya ang unang mipas-an sa inyong pag-antus sa kinatibuk-an niini, ma mental, pisikal, emosyunal, o espiritwal man kini. Ayaw gayud dudahi ang Iyang mga saad sa paglaum ug pagkaayo. Kamo gilalang alang sa usa ka malipayon, buhong nga kinabuhi. Ang inyong bili walay kinutuban, ug mao usab ang gugma sa Dios alang kaninyo.
Sa pagtapus
Naghinam-hinam ko alang kaninyo sa pagpaminaw sa akong bana. Gusto kong mahibalo kamo—may kalabutan sa inyong edad ug panahon sa inyong kinabuhi, samtang kamo mag-date ug magminyo—nga kining tawhana nga akong gimahal pag-ayo walay puas nga nagmabination kanako sulod sa 27 ka tuig namong kaminyoon. Wala pa gayud siya bisan kausa, wala bisan kausa, mihimo nga mobati ako og kaminos o wala higugmaa, ug wala gayud siya mihimo og mga komedya nga makapa-ubos kanako. Nanghinaut ko nga kamo makakat-on gikan niana.
Buot kong mopahayag sa akong buhi nga pagtuo sa Buhi nga Kristo, kinsa sa tinud-anay “mao ang kahayag, ang kinabuhi, ug ang paglaum sa kalibutan. Ang Iyang dalan mao ang agianan paingon sa kalipay dinhi niini nga kinabuhi ug sa kinabuhing dayon sa kalibutan nga moabut.”7 Kini ang Iyang simbahan nga gipangulohan sa Iyang propeta.
Sa sagrado, makaluwas nga pangalan ni Jesukristo, amen.
© 2018 pinaagi sa Intellectual Reserve, Inc. Tanang mga katungod gigahin. Pagtugot sa Iningles: 2/18. Pagtugot sa paghubad: 2/18. Hubad sa “Your Infinite Worth and God’s Infinite Love.” Cebuano. PD60005945 853