Tō ’outou faufa’a mure ’ore ’e te here mure ’ore o te Atua
Hō’ē ’āru’i ’e ’o Elder Patrick Kearon
Purera’a nō te Feiā ʼĀpī Paʼari ’ati a’e i te ao• 6 nō Mē 2018 • Brigham Young University–Idaho Center
Māuruuru i te pupu hīmene nō teie hīmene nehenehe ’e te ha’amori i tō tātou Rahu nui.
’Ua ’oa’oa mau vau i te ti’a i rotopū ia ’outou i roto i teie purera’a. E mea au noa nā māua ’ia ’āmui i te feiā ’āpī pa’ari o te ’Ēkālesia. ’Ua here mau māua ia ’outou ! ’Auē ïa ’ana’anatae rahi te ’āmuira’a ia ’outou i teie tau fa’ahiahia nō te fa’aho’i-fa’ahou-ra’a o te ’evanelia a Iesu Mesia, ’o tē tāmau noa nei.
Tātou te feiā pa’ari ’e te feiā ’āpī, e mea au nā tātou te mau ’ā’ai moeā, te ’ā’ai iho ā rā nō te here. ’Ia ’ite ’outou, tō māua ’ā’amu, mai te hō’ē ïa ’ā’ai moeā nehenehe ’e te mana’o-’ore-hia. ’Ua pa’ari au i California ; ’ua pa’ari ta’u tāne i Peretāne ’e i Arabia Saudi. ’Ua pa’ari au i roto i te ’Ēkālesia mai tō’u fānaura’a ; ’ua fa’afāriuhia tō’u hoa i te 20ra’a o tōna matahiti, mai te reira. ’Ua fa’afārereihia māua mai terā fenua ’e terā fenua i te ’oire rahi ra nō Lonedona. E piti matahiti tōna melora’ahia ’e tei roto ’oia i te pāroita feiā ’āpī pa’ari nō Lonedona, tae atura vau i reira nō e ono ’āva’e tuatāpapara’a i te ’ā’ai ’e te parau nō te reo peretāne. ’Aita vau i ’ōpua ’e i mana’o e topa i roto i te here ’a haere ai i te ha’api’ira’a i te fenua Peretāne, te orara’a rā tōna parau—e parau fa’ahiahia.
’Ua māuruuru roa vau i te Fatu i te fa’afārereira’a ia māua. ’Ua fa’aipoipo māua i roto i te hiero nō Oakland (California), ’ei reira ’ua ho’i ti’a atu māua i Peretāne nō e 19 matahiti ē tae roa mai i te taime ’a pi’ihia ai tō’u hoa ’ei Hui mana fa’atere rahi i te matahiti 2010.
’Ua ha’amaita’ihia māua, e maha tamari’i tā māua. ’Ua fa’aru’e mai tā māua tamaiti matahiapo i roto i te hō’ē tāpū māfatu, e 19 matahiti tōna. ’Ua ’itehia mai tōna ma’i māfatu i te hapūra’a vau, ’e ’ua ha’api’i mai mātou i roto i tā mātou ’arora’a ’āueue ’ore nō tōna orara’a tau poto, i te mau semeio, nā reira ato’a te pāpūra’a te tāra’ehara ’e te ti’a-fa’ahou-ra’a mau o Iesu Mesia nō te ta’ata hō’ē.
E toru tamāhine tao’a rahi i nā muri mai i tā māua tamaiti, ’o tā māua ïa e here roa nei ’e e fa’atura nei ho’i, ’e tā māua i ’apo mai i te ha’api’ira’a pauroa te mahana. E tao’a faufa’a rahi rātou nō māua. Ma te fa’aro’o fāito ’ore, ’ua ineine noa rātou i te nu’u—i tō rātou ’āpīra’a—mai Peretāne i Utah ’e i Heremani ’e i teienei, i Utah fa’ahou ā, nō te mau pi’ira’a rau o tō rātou metua tāne i roto i te ’Ēkālesia.
Tō ’outou faufa’a mure ’ore ’e te here mure ’ore o te Atua
I teienei, e mau mea ānei tā ’outou i ’ore i au roa ’ei tamari’i, ’e mea au nā ’outou i teienei ? E aha te huru te taime tā’oto’otora’a ? ’Aita paha ’outou i au roa i te reira i tō ’outou tamari’ira’a. ’Aita vau i au. I teienei rā, e’ita ïa e haere fa’ahou e ta’oto maoro ri’i noa ! E mea au nā’u te taime tā’oto’otora’a. Nā reira, ’e te brocoli ’aore rā te tahi mā’a tā ’outou i ’ore i au ’ei tamari’i ? E mea au ānei nā ’outou i teienei ?
Ta’a ’ē noa atu te taime tā’oto’otora’a ’e te brocoli, tē vai atu ā te tahi mau mea e rave rahi tā ’outou i ’ore i au i te tamari’ira’a—e rave rahi roa—’aita iho ā e au i teienei ’ei ta’ata pa’ari. ’Aita e ta’ata i au a’enei i te topa ’e i te ha’apahure i te turi ’āvae. ’Aita e ta’ata i au a’enei i te tītau ’ia haere i roto i te hō’ē pupu ha’uti ’e ’aita i ravehia. ’Aita e ta’ata i au a’enei ’ia ’a’ahia mai, ’ia fa’ao’ō’ohia mai, ’ia tu’uhia tātou i te hiti ’aore rā ’ia rave-’ino-hia tātou. ’E ’aita iho ā tātou e au i te reira.
Tē ha’amana’o nei au i te ha’api’ira’a tuatahi, e mea tere maita’i tā’u ha’api’ira’a, ’e ta’ata ’ori au, e mea ma’ua rā i te ’ohipa tu’aro. E haere iā’u e ’autāripo, e’ita rā e nehenehe e tāora—e tītō i roto i te ’ete, e tīria, e tu’e ’aore rā e ’apo ’aore rā e hui i te pōpō. E pi’i i’oa te mau tamari’i iā’u ’e e fa’ao’ō’o mai rātou i tō’u rima ivi. E rima ivi iho ā tō’u, e parau mau, e mea māuiui rā ! Tē ha’amana’o maita’i nei au ē, mai te peu e mā’iti mātou i tō mātou pupu nō te tahi tata’ura’a i te pae ha’api’ira’a, e mā’itihia vau e rātou i te mau ti’ara’a ni’a roa. Mai te peu rā e mā’iti mātou i tō mātou pupu tū’aro, ’o vau ïa te hope’a roa ’ino e mā’itihia. E mea ha’amā roa nō’u !
Nō te aha vau e fa’a’ite ai ia ’outou i te reira, e rave rahi ’ahuru matahiti i muri mai ? Nō te mea, mai tā ’outou i ’ite, e mau noa te reira i ni’a ia tātou. E ha’amana’o tātou ’ua tu’uhia tātou i te hiti, ’aore rā ’aita tātou i hina’arohia ’aore rā i auhia e te tahi mau tamari’i, ’e i te tahi taime, e tō tātou iho ’utuāfare. ’E ’aita te reira e taui nō te mea noa tē rahi ra tātou ’e tē pa’ari ra. ’O teie paha tō ’outou mana’o i nanahi ra. Te ta’ata tupu, te metua, te taea’e ’e te tuahine, te hoa fa’aipoipo, te ’orometua, te hoa ’ohipa, te mau hoa—pauroa rātou tē nehenehe e parau ’e e rave i te tahi mea e ha’amāuiui roa ia tātou. Pinepine e ’ere i te mea ’ōpuahia. I te tahi rā taime e mea ’ōpua-mau-hia. ’E i te tahi taime, e fa’aho’i atu tātou.
E mea faufa’a roa ’ia ha’api’i tātou ’ia ’ite mai, ’ia putapū ’e ’ia māramarama i tō tātou iho faufa’a ma te ’ore e hi’o i tā te ta’ata e mana’o ’aore rā e parau nei nō ni’a ia tātou, nō tō tātou maita’i pae manava ’e pae vārua. I te taime e vaiiho tātou i te mau parau, te mau ’ohipa ’e te mau mana’o nō ni’a ia tātou ’ia fa’atere i tō tātou hi’ora’a ia tātou iho, ’ua riro ïa tātou ’ei tītī tei ta’a ’ore i te taime e au mai te ta’ata ’e te taime e au ’ore mai rātou.
Nā reira ato’a, mai te peu e fa’atumu noa tātou i tō tātou faufa’a i ni’a i tā tātou mau manuiara’a, i ni’a i tā tātou i rave ’aore rā i ni’a i tā tātou mau tārēni e mana’ohia, tē fa’aineine ra ïa tātou ia tātou iho nō te manuia ’ore ’e nō te mana’o paruparu i te taime ra iho ā tātou e ’ore e tāpae i terā fāito ’e ’ia manuia roa.
’Ua ’ite ’outou i te reira, ’outou rā e fa’aruru nei i teie mana’o, tītauhia ’ia fa’aro’o pinepine ’outou i te reira ’e ’ia ha’apāpūhia atu ia ’outou i tō ’outou faufa’a mure ’ore, e faufa’a ho’i tei ’ore e faatumuhia i ni’a i tā ’outou mau manuiara’a, i tō ’outou rā aura’a mau ’e te Atua. E aha te aura’a o terā parau mure ’ore ? ’Aita e ’ōti’a, ’aita e hope’a, ’aita e hope. E faufa’a ’ōti’a ’ore ’e te hope’a ’ore ’e te hope ’ore tō ’outou tāta’itahi. Nō vai ? Nō te ta’ata e pi’i ia ’outou i te tahi i’oa i ni’a i te mahora tū’aro ? ’Aita. E faufa’a ’ōti’a ’ore ’e te hope’a ’ore ’e te hope ’ore tō ’outou nō tō ’outou Metua i te Ra’i, ’ōna tei ’ite maita’i ia ’outou, ta’a ’ē noa atu tā vera mā e mana’o ’aore rā e parau nō ni’a ia ’outou. E vaiiho noa na i te nehenehe ’e te hau o terā parau mau ’ia teimaha i ni’a i tō ’outou vārua nō te hō’ē taime. E « mea here [’outou] i mua [iāna] ».1
’Ia ha’amāuiui te tahi ta’ata ia ’outou ’aore rā ’ia huru manuia ’ore ’outou, ’a haere mai i te vāhi e’ita roa atu ’outou e tu’uhia i te hiti ’e e fa’ao’ō’ohia. ’Ua here tō ’outou Metua i te Ra’i ia ’outou, noa atu ’o vai ’outou, noa atu te fifi tā ’outou e fa’aruru nei. E mea nava’i ’outou. E mea nava’i ’outou. ’Ua here ’oia ia ’outou i terā vaira’a tō ’outou i ’ōnei, i teienei, i roto i te nehenehe o tō ’outou huera’a. ’Ua nava’i ato’a rā tōna here ia ’outou nō te ’orera’a e vaiiho ia ’outou i’ō nei, i teienei. E ’ōpuara’a rahi a’e tāna nō ’outou ! E « feiā tufa’a [’outou] i te Atua ra, e feiā tufa’a… ’e te Mesia »,2 nō reira tītauhia ia ’outou ’ia tāmau noa i te ha’api’i ’ia ha’apa’o i te mau fa’auera’a, ’ia hape, ’ia tupu, ’ia fifi ’e ’ia taui ē tae roa i tō ’outou fāito pūai hanahana, i te ha’amaita’ihia ’e i te tāmāhia—ē i te tahi mahana mure ’ore ra, ’ia maita’i-roa-hia—nā roto i te aroha o te Mesia.3
Mai te peu nā tātou iho e fa’ata’a i te terera’a o tō tātou iho orara’a, e fa’ata’a mau paha tātou i te orara’a ’oa’oa ’e te manuia ’e te ’ōhie, ma te tahi ri’i noa fifi ri’i e upo’oti’a ma te rohirohi ’ore rahi. ’O vai te ta’ata tei hina’aro e fa’aruru i te manuia ’ore, te tāfifi ’aore rā te tahi atu huru mo’era’a ’aore rā māuiui ? ’O vai te ta’ata tei hina’aro i te mau mea pa’ari ? ’Ahani ’ua ora tātou i te orara’a tā tātou i hina’aro, e fāri’i-noa-hia tātou i roto i te fare ha’api’ira’a teitei ’e tuatoru tā tātou i mā’iti, e roa’a mai te ’ohipa i moemoeāhia ’e e fa’aipoipo tātou i te hoa maita’i roa, ’aita hō’ē a’e māniania. E’ita roa tātou e taputō ’e tā tātou pi’ira’a i roto i te ’ēkālesia, pauroa tō tātou feiā here iti e vai pāpū noa i roto i te ’evanelia a Iesu Mesia ’e te ta’ata ato’a tā tātou e paraparau i te ’evanelia, e bāpetizo rātou i roto i terā noa hepetoma. E’ita tō tātou mau metua vahine e ro’ohia i te mariri ’aita’ata, e’ita te mau metua tāne e fa’aru’e i te fare ’e e’ita tō tātou mau taea’e ’e tuahine e pohe i roto i te tahi ’ati. E’ita te mau ’aiū e pohe i roto i te hō’ē tāpū māfatu, e e’ita roa e tītauhia ’ia tīa’i i te tārena a te Fatu. Tē ta’a ra ia ’outou. Terā rā e’ita ato’a tātou e fa’atupu i te tahi noa atu fāito fa’a’oroma’i ’e te aumihi ’e te ha’eha’a ’e te fa’a’oroma’i rahi roa ’e te au ’e te tāpe’a ’e te tītī’aifaro ’e te ’ā’au ’uraeva ’e te fa’aro’o ’e te tīa’i ’e te aroha. E ho’i tātou i tō tātou Metua i te Ra’i mai tō tātou vaira’a i te fa’aru’era’a tātou i tōna aro, inaha e’ita tātou e fa’aruru i te hō’ē noa a’e mea e fa’atupu i te tauira’a ’aore rā i te tupura’a ’aore rā i te fa’ahopera’a ’aore rā i te tūru’i-hope-ra’a i ni’a i te Atua.
Nō reira, ’aita tātou e ora nei i te orara’a ’ōhie tā tātou iho i mana’o. Tē ora nei rā tātou i te ora tā te Atua i ’ōpua nō tō tātou ’oa’oa hope’a roa ’e te nu’ura’a i mua. Nō reira, ’ia vai noa te mana’o ē, e tītau manihini te here mure ’ore ’e te marū o te Atua ia ’outou ’ia fa’atupu i te tauira’a i roto i tō ’outou orara’a nā roto i te mau ’ohipa e fa’aruru atu ’outou, te mea maramara ’e te mea monamona. E tītau manihini noa rā ’oia i te tauira’a nā roto i te here, te fa’aitoitora’a ’e te ’ē’a pāpū. ’Eiaha e fa’aro’o i te mau reo i roto i tō ’outou upo’o—tei vai noa paha mai tō ’outou tamari’ira’a ra—’o tē parau nei e’ita e haere ia ’outou e taui, ’aita tō ’outou maita’i ’e e hi’a noa ā ’outou. E fa’aro’o noa i te mau muhumuhu o te Vārua Maita’i ’e « te parau ha’amāuruuru a te Atua, ’oia ïa, te parau e fa’aora i te ’ā’au putahia ra »4 ’o tē ha’apāpū mai i tō ’outou faufa’a mure ’ore, nā reira ato’a te ha’apāpūra’a here a te Atua ē, e ti’a ia ’outou e rave i te reira.
I te taime e rohirohi ’outou i te orara’a ’e mai te huru ē ’aita hō’ē a’e ’ohipa maita’i tā ’outou e hi’o ra i roto i tā ’outou mau tauto’ora’a i te ora parau ti’a, ’eiaha e fa’aru’e. ’Eiaha e ha’afifi i tō ’outou mau moemoeā ’e mau fā. E fa’arahi i tō ’outou fa’aro’o ē, e mea ho’ona noa te tīa’ira’a i te tārena a te Fatu.
’E ’ia tupu mau te tahi ’ohipa hā’iri’iri ’e te māuiui ’e te ’ati rahi i roto i tō ’outou orara’a, e ’aita roa ’outou i ’ite nāhea i te ora mai i teie ’ē’a Getesemane nō ’outou, ’a ha’amana’o i te Mesia, tei Fa’atāhinuhia, tei amo a’ena i tō ’outou mau pe’ape’a ’e mau ’oto.5 ’Ua ta’irihia ’oia nō tā ’outou mau ’ohipa ’ī’ino ’e nā roto i tāna mau tore, ’ua fa’aorahia ’outou.6 ’Ua ta’a pāpū ’oia i roto iāna i te māuiui tā ’outou e fa’aruru nei. ’O ’oia te Fānau tahi a te Metua ’e ’ua fa’aruru nā mua ’oia i tō ’outou māuiui i tōna hopera’a, i te pae ferurira’a, i te pae tino, i te pae manava ’e i te pae vārua. ’Eiaha roa atu e fēʼaʼa i tāna i parau nō ni’a i te tīa’ira’a ’e te fa’aorara’a i te māuiui. ’Ua hāmanihia ’outou nō te vaira’a ’oa’oa ’e te ’auhune. E mea mure ’ore tō ’outou faufa’a, mai te here o te Atua ia ’outou.
’Ei fa’aotira’a
’Ua ’ana’anatae roa vau e fa’aro’o mai ’outou i tā’u tāne. ’Ia ’ite ’outou ē—e mea au nō tō ’outou fāito matahiti ’e te taime o tō ’outou orara’a—’ua hāmani maita’i teie ta’ata tā’u e here roa nei iā’u i roto i tā māua 27 matahiti fa’aipoipora’a. ’Aita hō’ē a’e taime ’oia i fa’aiti iā’u ’e i hi’o ’ē iā’u, ’e ’aita hō’ē a’e taime ’oia i fa’ao’ō’o i tō’u mau hapehape. Maita’i ē e ha’api’ira’a tā ’outou e ’apo mai.
Tē hina’aro nei au e fa’a’ite i tō’u fa’aro’o ora i te Mesia ora, ’oia mau « te māramarama, te ora ’e te ti’aturira’a o te ao nei. Tōna haere’a, ’o te ’ē’a ïa ’o tē arata’i i te ’oa’oa i roto i teie orara’a ’e i te ora mure ’ore i roto i te ao e haere mai nei ».7 ’O tāna ’Ēkālesia teie tei arata’ihia e tāna peropheta.
Nā roto i te i’oa mo’a ’e te fa’aora o Iesu Mesia, ’āmene.
© 2018 nā Intellectual Reserve, Inc. Fatura’a pāruruhia. Parau fa’ati’a nō te reo peretāne : 2/18. Parau fa’ati’a nō te ’īritira’a : 2/18. ’Īritira’a nō « Your Infinite Worth and God’s Infinite Love ». Tahitian PD60005945 895