O Le A Fesoasoani Mai le Alii Ia i Tatou e Atiina A’e Lona Malo
Faigalotu i le Lalolagi Atoa mo Talavou Matutua
12 Ianuari, 2020
Faafetai, aufaipese, mo lena musika matagofie. O le pese lena e sili ona ma fiafia i ai. Faafetai mo le matua matagofie o le lagiina. O’u uso e ma tuagane pele, ua ou fiafia lava ua mafai ona ou talanoa atu ia te outou i lenei afiafi. Sa ou mafaufau loloto lava lata mai nei i na mea na faamalosia ai lo’u faatuatua i lo’u olaga. O le tasi o mea ua ou iloa o le, e fesoasoani moni mai lava lo tatou Tama oi le Lagi ia i tatou, ae maise lava i taimi tatou te taumafai ai e faia mea uma tatou te mafaia e tausi ai Ana poloaiga ma atiina ae Lona malo iinei i le fogaeleele.
Sa faaalia e le Perofeta o Nifae lenei faatuatua i lona olaga. E ui ina sa tigaina o ia i le tele o puapuaga ma le tetee, ae sa tumau mausali o ia ma faafetaia e le aunoa le Atua mo Ana faamanuiaga. Sa faapea mai o ia i le mavae ai o le valu tausaga o feoai i le toafa tuufua.
“Ma … afai e tausi e le fanauga a tagata poloaiga a le Atua, e tausi o ia ia te i latou, ma faamalolosi i latou, ma fai ala e mafai ai ona latou faataunuuina o le mea ua ia poloaiina ai i latou; o le mea lea, sa faia ai e ia ala mo i matou aʼo matou aumau i le vao.”1
Ou te iloa e moni lenei mataupu faavae. Se’i o’u faasoa atua se tala mai le talafaasolopito o le Ekalesia. I le faaiuga o e vaitau o le 1830, sa faapotopoto ai le toatele o tagata o le Ekalesia i le setete o Misuri, lea sa latou faamoemoeina e faavae ai Siona. Peitai i le 1839, sa faamalosi ai i latou e tagata faatupu vevesi e o ese ma le setete. Faatasi ai ma le faaleagaina o o latou fale, ma le gaoia o a latou lafu ma meafale, sa latou malaga atu ai i matusasae i Ilinoi, lea sa latou faamautu ai i luga o fanua faataufusi i luga o auvai o le Vaitafe o le Misisipi. Sa latou faamamāina taufusi ma faatuina ai se aai matagofie sa latou ta’ua o Navu. Peitai sa i ai pea lagona le lelei e faasaga i le Ekalesia, ma sa maliufasia le Perofeta o Iosefa Samita faatasi ai ma lona uso o Ailama i le na’o le lima tausaga mulimuli ane. Faatasi ai ma le latou malumalu na faatoa faamaeaina lava, sa toe tutuli faamalosi ese ai foi i latou ia Fepuari o le 1846, ma sa sopo atu i le Vaitafe o le Misisipi e sosola ese ai i le ogatotonu o le taumalulu. Sa i ai faatasi ma i latou se alii na igoa ia Peniamina F. Johnson, o le tamā, o le tamā, o lo’u tamamatua, faatasi ai ma lona aiga o se fanau laiti. Sa ia faamatalaina lena vaitaimi i le talaaga o lona soifuaga:
“Ia o lenei la, ua amatalia i le ogatotonu o le taumalulu ma e aunoa ma se pa’utalā, i se malaga e aunoa ma se malamalama i lona umi po o le taimi o le a faamautu ai … ma na’o ni sapalai e lava e tausi ai i matou mo ni nai vaiaso pe a umi, ma faatasi ai ma le leaga o le soifua maloloina lea na matuai le mautinoa talu mai lava le tausaga ua te’a pe sili atu. Sa masani ona ou tigaina i le tiga tutui tele o lo’u manava, lea e i ai taimi e mafua ai ona ou afu e amata mai i puafu uma lava. … O lenei mea faatasi ai ma isi faafitauli o le laualo na ou le gafatiaina ai ni galuega mamafa faapea. O tiute lava foi o le vaaiga o manu toso taavaletoso ma isi tiute i le tolauapiga, na foliga lofituina moni lava ia te a’u. …
“I le mavae ai o ni nai aso i le tolauapiga, sa amata ona faitio nisi i le faigata ma le iuga le lelei, ae sa alaga atu Peresitene Polika Iaga ia i latou e pei o se leona, ma fai atu ia i latou, o i latou uma e le mafaia i lena taimi ona amata ola i pi ma sana faasua, ua tatau ona faalagolago i le Atua ma ia faafetai mo mea ua latou maua, a le o lena, ua tatau loa ona latou toe foi, aua o le tolauapiga a Siona o le a avea o se nofoaga leaga mo i latou. Na oo mai lenei mea ia te a’u, o se afioga a le Alii, ae o le a sa’u mea na tatau ona fai? Mo se taimi umi lava, sa le mafai ona ou ‘aia ai ni falaoa e fai i sana po o pi, ona o mea na na mafua ai le tiga tetele o lo’u manava. E mafai la faapefea ona ou alu, ona sa matele lava a matou meaai i sana ma pi? Sa ou lagonaina ia te a’u lava ia, sa o se mataupu lea na tau i le ola ma le oti.”
Sei ou see ese mai ma le tala ae faapea atu, e le’i tele ni tausaga na muamua atu, na maliu ai lona tuafafine e 22 tausaga le matua i ni faafitauli faapena tau i le manava foi, o lona uiga la, atonu la sa le’i faateleina e ia ona popolega. Sa faaauau ona ia faapea mai:
“Sa ou talanoa atu i lo’u aiga e uiga i lea mataupu. Sa ou fai atu ia i latou, sa ou i ai iina e faalagolago i le Alii, ma afai sa le’i i ai o Ia faatasi ma i matou, e mautinoa foi sa le’i i ai o Ia i tua atu o i matou, ma e le tatau ona ou toe foi. Sa ou naunau e ai i meaai faapena e pei ona sa i ai ma ia faafetai mo na meaai. Ma afai e le tausia i tatou e le Alii i le taimi nei, o le vave lava ona matou feoti, o le lelei foi lea, aua o le a le mafai ona matou tausia i matou lava pe puipuia o matou ola i lenei malaga.”
O se masina mulimuli ane, sa ia lipotia ai le mea lenei i lana api talaaga:
“O pi ma sana ia sa le mafai ona ou ‘aia muamua, ua mafai nei ona ou ‘aia ma le fiafia, ma mai lava i lena taimi ou te le’i toe faalogoina lava lena aafiaga tuai, ao i ai i le malaga. Sa ou ta’u atu i le Alii le mea na fai mai ai Lana auauna, e faapea, o Lana fesoasoani o le a mafai ai ona ou faataunuuina mea uma e manaomia, ma afai o Lona finagalo e tatau ona ou ola e avea ma Ana auauna, e ao ona Ia faia a’u meaai ia fetaui lelei i le tulaga o lo’u manava, lea ou te iloa sa Ia faia.”
O le faatuatua o o’u tuaa ma le faataitaiga a perofeta ua faamalosia ai a’u i lo’u olaga ma fesoasoani ou te faalagolago ai i le Alii, e oo lava i taimi faigata. Ou te manatua le taimi popofou o le ma faaipoipoga na faapea ona faapitoa ai le utiuti o a ma seleni. Sa maua le ma fanau laiti e toalua i le tolu o tausaga sa i ai Elder Christofferson i le aoga mo tagata aoga ua maua faailoga muamua. Sa ma filifili e faapea, e amata loa le ma aiga, o le a ou le faigaluega i fafo atu o le aiga, o lea sa ou taumafai ai e fai ni mea na mafai ona ou faia i le fale, e maua ai se seleni itiiti e fesoasoani ai i le tausiga o i matou. O lo’u toalua foi sa i ai ni ana galuega faavaitaimi se lua ma se galuega i le taumafanafana, lea sa tuuina mai ai se vaega tele o le matou tupe maua. Ae, sa le’i tele lava ni a matou mea na i ai. Sa i ai se matou ‘agaga e faapea, a faapea sa le o se meaai, totogi o le fale po o le penisini mo le matou taavale tuai, matou te le’i manaomia ona faatau mai [po o le a lava lea mea].
I se tasi o Aso Sa, i le toe lua lea o masina ona faauu lea o Elder Christofferson, sa faailoa mai ai e le matou epikopo se fuafuaga tau tupe mo falelotu, e toe faafou ai le matou falesa ua leva. O le a manaomia ai e aiga taitasi ona totogi se vaega tupe e totogi ai tau o le [galuega]. Ua le toe i ai ni vaega [iloiloga] tupe mo le fauga o falelotu, ae i aso la, sa fesoasoani uarota ma siteki e totogi vaega o le tau o fale po o le toe faafouga o falelotu, e ese mai i foai o sefuluai, lea sa matou totogiina foi.
E pei foi o isi tagata o le uarota, sa matou saofafai i lalo faatasi ma le epikopo e talanoa i se mea matou te mafai ona foaia e faavae lea i la matou tupe maua. Sa le’i maualuga le matou iloiloga fautuaina, ae na iu ina matuai itiiti ai le matou tupe na totoe. Sa manatu nisi o tagata aoga o e sa i ai foi i lo matou tulaga ma sa le toe umi ona malaga ese lea, sa le fea le totogiina atu o ni tupe i le tupe mo le fauga o falelotu ona o le a latou le i ai i le taimi e faamaeaina ai le faafouga. Ae, sa ma filifili lava e totogi le foai i le tupe mo falelotu, e tusa lava pe sa ma le iloaina pe o le a faapefea ona matou oo atu i le faaiuga o le tausaga aoga. I le taimi nei, atonu tou te manatu e mafai lava ona se’i mai i fafo le kata fai faatau faaaitalafu ma pili mai ai a matou tupe faaalu o le masina ona togitogi ai lea i le aluga o le taimi, peitai, sa matou o mai i se vaitau ese. I aso na, e le mafai ona maua sau kata fai faatau faaaitalafu sei vagana na i ai se faamaoniga o sau galuega tumau, ma i ai lau tupe maua i se maualuga atofaina. O lea sa le mafai ai ona matou agavaa mo se kata fai faatau faaaitalafu. Atonu e foliga mai e faalealofa lena mea, ae o se tulafono malosi teisi atu i le po o ai e mafai ona maua se kata fai faatau faaaitalafu i aso nei, atonu e laveai ai le toatele o tagata mai faanoanoaga tele o aitalafu ua latou oo nei i ai.
Ia, i le na’o le lua vaiaso talu ona mavae lena mea, sa matou tietie atu i se auala filemu i se tasi o po ma tutu i se faailo taofi. O le taimi lava lena na matou faalogoina ai i o matou tua atu le feī o taofi, ma le so’aga mai o tua o le matou taavale tuai. Sa oso i fafo Elder Christofferson e vaai ae ou nofo i le taavale. Ina ua mavae sina taimi, sa toe oso mai o ia i totonu o le taavale, ma sa ou fesili atu ia te ia po o le a le mea na tupu. Na pau lava lana tala ua leaga le bumper. O le tamaloa na soaga matou o se tagata faatau oloa fealuai, ma sa nofo i se isi aai. Sa ia iloaina na leaga taofi [o lana taavale] ae na te le’i iloa sa leaga faapea. Sa ia manaomia lana taavale mo le galuega ma na faamoemoe e mafai ona matou soalaupulea e i matou lava ina ia le telē atili ai se totogi o le inisiua o lana taavale ma ia le tuuina atu ia te ia se pepa o le sala e tatau foi ona ia totogiina. O le mea taua, na leai se isi na lavea. Ou te manatu sa fai foi si fufusi o lana ia paketi. Sa ia fai mai, a mafai ona matou tuuina atu se tau faataitai tusitusia o le tau o le lipea ma aumai i lona potu i le fale talimalo i le faatausiusiuga o le taulaga, o le a ia totogiina mai lava i matou.
Ia, e le faavaleaina gofie a’u. Sa ou manatu o si o’u toalua pele o lē sa ou faalagolago i ai ma le atoatoa, sa fai si vasi i le mataupu lenei. Pe na mafaufau moni o ia o le a tausisi le alii lenei i lana folafolaga? Mata o le a lē sola ese lenei alii mai le taulaga? Ia, sa maua mai e Elder Christofferson le tau faataitai mo le lipea, ma sa alu o ia i lena fale talimalo ma maua i ai le alii. Sa tusi mai e le alii se siaki mo le aofaiga, ma tou te iloa? E le’i toe fiti mai le siaki!
Mo le vaega o loo totoe o le tala. O le siaki sa toeitiiti lava tutusa ma le aofaiga o le iloiloga o le tupe mo le fauga o falelotu lea sa matou totogiina. E mautinoa e ono mafai ona matou faatali seia ona [Elder Christofferson] maua se siaki [totogi] mautu e taulima ai le lipea, ma i le taimi lea e ono mafai ona matou ola i tupe na maua, lea sa matou masalosalo e mafai ona faia. Sa o se molimau lenei mea ia i matou e faapea, e mafai e le Alii, e pei ona fai mai Nifae, ona “fai ala e mafai ai ona [tatou] faataunuuina o le mea ua Ia poloaiina.”2 Na ou aoaoina faapea o le faatuatua e masani ona faauigaina o le laa atu i le pogisa, ae ao tatou faia, ou te iloa o le a faamalamalamaina e le Alii le ala i o tatou luma. Ou te faafetai mo se Tama Faalelagi alofa o lē e leoleo mai ia i tatou ma alofa ia i tatou. Ua ou iloa o Lana Ekalesia lenei ma o loo soifua lo tatou Faaola. Ou te faafetai i le Alii mo faamanuiaga ua aumaia e le talalelei i o tatou olaga. I le suafa, o Iesu Keriso, amene.