Digidigi Kei Na Dinata
Lotu e Vuravura Raraba me baleti ira na iTabagone Qase Cake
12 ni Janueri, 2020
Au vakavinavinakataka na Tamaqu Vakalomalagi meu mai tiko kei kemuni ena bogi nikua. Kau vinakata meu vakavinavinaka vei na watiqu ka tokona na nona vosa. Kei na noqu vakavinavinaka vei na matasere vakasakiti oqo. E dua tale na ivakadinadina na yaga ni inisitute. Au taleitaka na inisitute. Au nuitaka ni o kemuni kece e tiko na nomuni madigi e sega walega ni dou vola yaca tu, ia ni gugumatua tiko na ivaka itavi tiko ena inisitute. Oqo e dua na ka vinaka duadua eda cakava ena Lotu. Na naba era a lagata na matasere ena dua na gauna sa oti, eso vei kemuni e rawa ni kila, ni serenilotu oqo a vola o Peresitedi Russell M. Nelson. Na vosa e nona, kei na ka e vakilai kei na ivakaraitaki e tara na yaloqu niu nuitaka ni na vakakina. Kau vakaraitaka vei kemuni na nona loloma kei na nona veikidavaki. Meu okata talega e dua na vosa ni vakavinavinaka vei Peresitedi Astrid Tuminez kei na nona veiqaravi kei na vakailesilesi ni buca o Utah ena Univesiti me baleta na nodra daulomasoli ena gauna eda mai sota kina ena soqo oqo.
Ena vica na yabaki sa oti, au a lako vata kei Elder L. Tom Perry ena dua na ilesilesi ena Siti o New York. E kea keirau a laki sikova sara e dua na valenilotu ni gauna makawa e Brooklyn. Na valenilotu oqo a dua na vale e nona na vanua ena dua na itikotiko a dua taumada, ka se vakatoka ga kina, me dua vei ira na vanua cecere cake ena qele ni matanitu o ya. A kidavaki keirau mai ena marau e dua na marama e italatala tiko ni ivavakoso ena Jewish Reform ka vakasarasarataki keirau sara ena valelevu vakairogorogo oqo. Ena gauna se tu donu kina, a dua sara na vale vakasakiti dina, ia oqo sa gadrevi sara me vakavinakataki. A kaya vei keirau o italatala oqo ni sa lutu sobu tiko na lewe ni nona ivavakoso ka sa sega ni veirauti tiko na ilavo mera qaravi kina na valenilotu kei na kena parokaramu, oka kina na kena koronivuli e veisiga.
Ni toso na neitou veivosaki, a kaya mai vakararaba, ni ra sa dinata tiko na itabagone qase cake na nodra iyau vaka-Jiu, ia o ya ena inaki cava ga, era sa sega tiko ni mai lewena ka yaco mera lewenilotu era dinata tiko nodra valenilotu. Dina ni yaco o ya, era sa dau vakayaco soqo tiko ni itaviqaravi ena valenilotu oqo. Sa vaka me sa vanua tiko ni nodra soqoni vata kina, ka vakawasoma mera cau vakailavo mai me veivuke ki na isau ni kena vakayagataki na vale oqo, ia e vica wale era vinakata se sa lomadra tiko mera lewe ni ivavakoso oqo era sokalou tiko e kea.
Keirau a qai veivosakitaka kei Elder Perry vata kei italatala oqo na vuna e rairai yaco tiko kina oqo. Ni sa vosa tiko a qai vakamacalataka ni vuqa vei ira na itabagone qase cake oqo, e vuqa vei ira se bera tiko ni vakamau, era se sega ni vakaliuca tiko na veika vakalotu ena nodra bula. Eso tale era sega ni vinakata mera dinata na veika oqo se na valenilotu cava ga. E vakasamataka kina o Elder Perry de rairai koya beka na ivakaraitaki ni veika rogolevu (se sega ni rogolevu) “RMNC”—rerevaka mo na calata—ni kevaka mera dinata oqo, era na rairai calata e dua tale na ka.
Oqo sara ga na ulutaga bibi au via vosa kina vei kemuni ena yakavi nikua—digidigi kei na dinata.
Meda dikeva mada na kena tekivu ni “rerevaka mo na calata” ena laki yaco sara, me dua na yalo vakayavutaki koya ga. Me yacova mai oqo, eda vinakata kece meda sotava na veika uasivi sara ka guta yani na digidigi vinaka sara ni ituvaki cava ga ni bula. Ia ni lokuyarataki sa vaka me dua na digidigi tawamudu se dinata baleta ni rawa me kena ibalebale ni sa calati tiko e dua na ka, ka rairai vinaka cake, e sega ni kena yavu oya. Na digidigi yadua ena sogota laivi na veimadigi tale eso; ke o sa digitaka mo laki cakacaka se laki vuli ena mataka lailai, sa rawa mo raica e dua na iyaloyalo ena Netflix ena gauna vata oqori (se o rawa beka?); ke mo laki vuli ka vakoroi ena idinia, o na calata beka mo vakoroi ena veika makawa, se cakacaka ni liga, se baioloji, se dua tale na ka (vakavo ga ke o sega ni biu vuli); kevaka mo na gole ki Victoria Falls e Aferika nikua, sa rawa talega mo gole ki na vanua tale eso ena gauna vata ga oqo, ka calata eso tale na vanua o via sikova; ke o digitaka mo laki kaulotu, o na vagalalataki iko mai na vuqa na itaviqaravi raraba ena gauna o ya; ka sa vaka tu oqori. Ia vakavo ga ke o sa digitaka ka dinata e dua na sala dei, na nomu bula ena via veilecayaki toka, ka kena iotioti, ena yaco dina mo calata e vuqa na veika vinaka duadua.
Me vaka a dau dikeva tu o watiqu ena veigauna, “Ena sega ni rawa me nomu na veika kecega—ena vanua cava mo na biuti ira kina?” Ena sega ni rawa me noda na veika kecega e totoka me na tiko vei keda, ka sega ni rawa meda cakava na ka kecega ni na totoka se talei meda cakava. Ena gauna mada ga o yalana kina na nomu digidigi ena veika e “rogorogo vinaka se daudokai,”1 e se sega tiko ga ni rawa mo rawata se sotava na veika kecega. E sega ni se veirauti tiko ga na gauna, inaki, se galala ena bula ni dua na tamata ena bula oqo. Sa yaco kina, meda sa dinata e dua na digidigi ni da sa kila ni da cakava oqo, eda na biuta kina na kena vo, dina ni ra ka vinaka beka. E dodonu meda na nanuma tiko ni da lokuyarataka tiko e dua na digidigi sa laki yaco me sa dua na digidigi o ya.
Na vakamau sa dua na kena ivakaraitaki cecere. Ni da sa digiaka e dua na itokani, eda sa vakatikitikitaka kina na veimadigi kece sara. Me vakataka, nona kaya na Turaga, “Mo lomana na watimu ena lomamu taucoko, ka mo kabiti koya duadua ga.”2 Ena vuku ga ni itinitini ni digidigi, eso era na sega ni dinata kina e dua era dau taleitaka sara, e dua era lomana ka mera na bula vata yani ena marau kei na tawamudu, ni ra leqataka tiko ni rawa me tiko e dua tale na itokani ni bula ena dua na vanua era sega ni via calata. Au nanuma kina e dua na cauravou ena vuqa na yabaki sa oti kau kila ni a besetaka e dua na itokani totoka baleta ni nanuma ni bulu vakalevu tu na batina. Au a kaya kina o sa vinakata tiko e dua na ka uasivi sara e sega ni tiko, ia, o sa tu mada vakadua ka vakasamataka ni o iko mada ga o sega sara ni yacova mo idigidigi uasivi sara?
Oqo e dua na soqoni ni itabagone qase cake. Vei kemuni e vuqa, sa vakamatatataki tiko kina na qase. Sa tiko vei kemuni se ko ni sa sasagataka tiko na ilesilesi ni qase, na rawa-ka ni qase, kei na cau ni qase, ni saqati tiko na lokuyarataki tiko na bula ni qase ka sasagataki na ito tawamudu. Ena tini na yabaki sa oti, a vosa kina o Charles Murray e dua na dauvolaivola ka tamata vuku me baleta na ibalebale ni “dua na bula e bulataki vinaka.” A kaya o koya, “Au tukuna tiko na veimataqali ka eda dau nanamaki kina ni da sa yacova na yabaki ni qase ka rawa meda lewa na ka meda na doka tiko na keda ituvaki taumada kei na veika eda sa cakava.”3
A nanuma lesu o Murray na nona a vosa ki na dua na ivavakoso mai Zurich me baleta na vakacegu titobu ni bula e lako mai ena dua na bula e bulataki vakavinaka. A kaya “Ni oti noqu vosa, a vica vei ira na le ruasagavulu vakacaca na lewe ni ivavakoso a lako mai vei au ka kaya vakamatata ni malanivosa ‘e dua na bula e bulataki vakavinaka’ e sega ni vakaibalebale vei ira. Era sa tiko vakacegu sara vata kei na nodra dui itokani watidra kei na nodra BMW vou kei na itikotiko ni gagade e Majorca, ka sega na luluqa era raica ena nodra bula e gadrevi me vaqaqacotaki. A ka talei sara,” a kaya o Murray, “meu rogoca ni tukuni e mataqu, ia e sega ni kurabuitaki. Na itovo ni rai e vakatoka oqo: O ira na tamata era sa dua na isokomuni ni gacagaca e vakayaco-ka, ni oti e dua na gauna, sa na caka oti. Na inaki ni bula sai koya me vakayawataki sara na veigauna veivakataotaki ena kena rawati vakavinaka sara.”4
Ena itinitini ni nona vosa, a qai kaya kina o Murray na malanivosa matata oqo: “Na vuku vakatamata taumada sa kila vinaka tu ni bula e bulataki vakavinaka e gadrevi kina na veisemati kei ira era tiko voliti keda.”5 Era kila vinaka tu oqo o ira na qase dina. Era kila vinaka ni marau yadua ni tamata e sega ni yaco me dua na rai ni bula ka sega ni rawa me veiraurau ki na inaki ni bula. Na dina oqo sa yavu tiko ni ivakaro levu e rua: mo lomana na Kalou ena yalomu taucoko, lomamu, kei na vakasama, ka mo lomana na wekamu me vakataki iko.6 A kaya kina o Jisu, “Sa vu ni vunau taucoko kei ira na parofita na vunau e rua oqo.”7 Na veiyalayalati ni kosipeli,8 vata kei na kena yalayala ni bula tawamudu, era sa vakarurugi ena rua na ivakaro cecere oqo ena kena veitarataravi taumada: imatai kei na ikarua. Na yalodina ki na rua na ivakaro cecere oqo sa tukuna tiko e dua na bula sa bulataki vakavinaka tiko kei na cava na ibalebale mo dua na qase.
Ena kena iotioti, e sega na sala e vakaikoya ga, sega ni dinati me na vakamuri, ena gauna mada ga ni veika tawamudu e tarava mai. A vakaraitaka o Alama na vakasama oqo ni a vakavulica ni o Karisito, na iVakatawa Vinaka, sa kacivi keda meda muri Koya ena salatu ni bula vakatisaipeli kei na marau:
“Raica, au sa kaya vei kemuni, sa kacivi kemuni tiko na ivakatawa vinaka; io, sa kacivi kemuni ena yacana, oqori na yacai Karisito; ia kevaka dou sa sega ni vakarorogo ki na domona na ivakatawa vinaka, ki na yaca sa kacivi kemudou kina, raica, o ni sa sega ni sipi nei koya na ivakatawa vinaka.
“Ia oqo kevaka dou sa sega ni nona sipi na ivakatawa vinaka, ko ni sa qele ni sipi nei cei oi kemuni? Raica, au sa kaya vei kemuni, sa nomuni ivakatawa na tevoro, ka ko ni sa lewe ni nona qele ni sipi; ia oqo, ko cei me cakitaka na ka oqo?”9
Sa vakavulica tiko o Alama na ka dina ni sa rua ga na digidigi, ni sai Karisito ga sa digidigi vinaka duadua. Ke o sa sega ni digitaki Karisito, o sa muria sara tiko ga e dua na kalou lasu, e dua na sala cala e mua tiko ki na dua na rarawa e vakamalua ka laki tawamudu sara, ni sa kena itekivu tiko oqo. O koya gona, vakavo ga ke o muria na iVakabula, o sa besetaki Koya tiko.10
Ni da sa kila oqo, meda sa qai kakua ni lomalomarua meda dinata na Turaga ka vakasaqara meda sa duabau kei Koya. Ni sa masu o Koya ena iOtioti ni Kana Vata baleti ira na Nona iapositolo kei ira kece era sa vakadinata na nodra vosa, “Me ra dua bau kecega; me vaka edaru sa dua bau, Tamaqu, me ra dua bau kei kedaru.”11 E sega beka ni vanua o ya eda vinakata meda tiko kina? Sa qai cava beka na vuna mo lomalomarua vakataucoko kina ka sega ni via dinata? Na cava beka na vuna mo vakaulubale kina mo taura vei iko na Nona ivua, ni ko sa kila tiko ni “sa rawarawa na [nona] ivua, ka mamada na [nona] icolacola”?12
Rerevaka na Druka
Niu sauma ga na noqu taro, au sa rawa ni raica ni dina ga sa dodonu ka veivakauqeti na Yalo ni tiko vata kei keda, e tiko e vica na vuna vua e dua e rawa ni se lomatarotaro tiko ga. E dua o ya na kauwai me baleta na noda saga tiko meda maroroya noda dinata na veika cecere vakaoqo. Eda rawa beka meda muria tiko yani, ka da na rawa beka meda vinaka cake meda kakua ni dinata kevaka eda na laki druka yani?
Oqo e dua na kauwai eda sa kila vinaka, ia na kena ciqomi au na kaya ena kena vakasama bibi, o sa kosova oti na ikakalawa o ya. Ni nomu a tiko mai na vuravura taumada o a digitaka mo ciqoma na ituvatuva ni veivakabulai kei na bula vakacerecerei, a vakarautaka na Tamana ka vakacerecerea na Luvena, o sa digitaki Karisito kina. Na nomu a mai sucu vakayago sa ivakadinadina ni dina o sa mai dinata. O ya maroroya na nomu “itutu taumada,”13 sa qai taro oqo o na maroroya beka mo dinata na “ikarua ni itutu” ka “rawata na lagilagi e vakaikuritaki e [ulumuni] me sega ni mudu ka sega ni mudu”?14 Me da sa qai kakua ni rere meda vakadeitaka tale na noda dina taumada, vakabibi ni da raica na kena ca na digidigi tale e dua.
Ka sa sega ni gadrevi meda bula ka rerevaka tiko na druka. Eda sega ni tiko duadua. Eda sega ni tiko meda sega ni vukei. Ke dua sa dinata vakaidina na Karisito, me bula vakatisaipeli vakataucoko, ena sega ni druka. Keda sa vauci ki Vua sa biuti Koya sobu mai ena ka kecega, sa uabaleta na ka kecega, ka sa tu Vua na kaukauwa kecega, eda sa sega ni druka.15 Na Tamada Vakalomalagi kei na iVakabula rau sa sega ni raica vakawalena ena lomatarotaro kevaka sa na cakacaka se sega na veika eso kivei keda. E rawa beka mo raitayalotaka ni rau sa rai tiko mai ra mai lomalagi ka kaya tiko, “Raici Sam mada. A vakacala ka e liu ena gauna a sotava kina na ituvaki oqo, na ca oqo e tukuna ni na cakava tale o koya,” se “Io, raica. O ira na itokani nei Sandra era sa vauci koya sara. Ena ka taleitaki me laurai ke rawa mena cakacakataki koya tani mai na kena oqo.” E dina, ni oqo e sega sara ni dina. Era sa solia vakawasoma tiko na nodra veivuke, veidusimaki, kei na ivurevure, ka rairai solia vakalevu cake vei keda ke da na ciqoma.
Au a kaya taumada ni gauna eda doka kina na veiyalayalati e vauci keda vei Karisito kei na Nona kaukauwa, eda na sega ni druka. Oqo e ka dina ena kena iotioti, ia au vakadinata ni so na gauna, eda na sotava kece kina na druka—na noda cala ga kei na ivalavala ca, kei na revurevu ni nodra caka cala kei na ivalavala ca eso kivei keda. Ia ena isolisoli ni veivutuni kei na veivosoti, na veidruka kece oqo kei na malumalumu era sa ka wale ga oqo. E sega ni dua vei ira mena kauta tani vei keda na bula tawamudu ke sega ni da vakadonuya galugalu ga. Cava na vuna? Me baleta ga ni da cakava na ka eda rawa ni cakava meda vakabulai kina, sa soli kina vei keda na loloma soliwale i Karisito me na walia ka vakavinakataka na veika cava ga e sega ni rawa meda cakava. Me nanumi tiko, ni kaukauwa ni veisorovaki se loloma soliwale i Karisito e sega walega ni kauta laivi na cala ni ivalavala ca kei na caka cala, ia sa veivakasavasavataki ka cakava meda sa tamata vakalou, sa rawa kina meda laki tiko vata kei na Kalou.16
Ia oqo, au sega ni kaya tiko ni sa rawarawa kece sara oqo. E daru sa kila vinaka sara tiko ni bula oqo sa sinai tu ena sasaga bula kei na so na ka dredre sara, vakakina na veivakaleqai. Ni da sa tisaipeli yalodina tiko i Jisu Karisito sa rawarawa sara meda tukuna tiko mai na noda na cakava yani. A sega sara ni rawarawa vei Jisu me dua na tisaipeli nei Tamana ka me gunuva na Mena “bilo wiwi.”17 Ia a cakava o Koya, ka sa kila vinaka na sala mena vukei keda rawa meda lakova na salatu ni bula vakatisaipeli. Me kena ikuri, sa tu vua na iVakabula na kaukauwa ka sa lomana me veivuke. Ena tiko vata kei keda ka vukei keda vakalevu ni da sa gadreva sara kei na balavu ni gauna ena taura. A kaya o Koya, “Io, ena veigauna kece era veivutuni kina na noqu tamata au na vosota kina na nodra lako sese vei au.”18 Na rerevaka na druka e sega ni vuna mo kakua kina ni cakava kina me taucoko ka matata kina nomu dinata na Karisito. Tomana tikoga nomu veivutuni ka cakava tiko nomu vinaka taucoko mo na vinaka—sa rauta vinaka o ya.
Solibula
Au vakasamataka rawa e dua tale na vuna ena dredre vua e dua me rogoca na kaci mai vua na iVakatawa Vinaka me lewena na Nona qele ni sipi: na rerevaka na solibula ena rawa me umanaki kina. Ko ni nanuma kece tiko na cauravou a tarogi Jisu, ena yalona taucoko, “A cava tale sa vo vei au?” me rawata kina na bula tawamudu.19 E kaya vei keda o Marika ni “Sa vakaraici koya ko Jisu, a sa lomana” [Au nanuma ni sa ka bibi sara oqo], “a sa kaya vua, E dua na ka sa sega vei iko: mo lako, mo volitaka na ka kecega sa tu vei iko, ka solia vei ira sa dravudravua, ko na qai vakaiyau mai lomalagi: ia mo lako mai, taura na kauveilatai, ka muri au.”20 Ko ni nanuma tiko na ka a qai yaco: “A sa vakaveveku mata e na vuku ni vosa ko ya, a sa lako tani a sa rarawa na lomana, ni sa levu na nona iyau.”21
Au nuitaka na kena vakasama, ni o cauravou vutuniyau oqo sa veisau na yalona e muri a qai ciqoma na veisureti ni iVakabula. Ena sala cava ga, eda sa kila taucoko ni noda dina tiko vua na Karisito ena oka kina na solibula. E dua na ka meda na solibula kina o ya meda kakua ni “rerevaka mo na calata” baleta ni da sa kila ni da na calata e vuqa na ka. E vuqa na digidigi ena bula oqo era sega ni lako vata kei na bula vakatisaipeli, ka dina ni vuqa na veika vinaka era sa sega ni yaco ena gagadre ni bula vakatisaipeli e vakayaco-ka ena noda gauna kei na ivurevure ena vuku ni ka era vinaka cake se vinaka duadua.
Vei cauravou yalodina a taroga na iVakabula, “A cava tale sa vo vei au?” sa mate. Na iyau cava soti a tu vua sa sega beka ni tiko ena gauna oqo, se cava ga e yaco, sa sega ni tu vua, sa sega talega ni yaga vua. Me vaka ni sa na solibula beka kina o koya ena gauna o ya, a tu beka vua e dua na digidigi vinaka cake ni vakatauvatani kei na veisureti nei iVakavuvuli? E rawa beka ki na dua na ka a taukena tu se rawa mena taukena ena nona iyau me vakatauvatani kei na ka sa solia tiko vua na Turaga? Eda sa kila tiko ni cava ga e kerea vei keda na iVakabula, oka kina na noda bula sara ga, sa tawayaga sara ni vakatauvatani ki na bula vakacerecerei. Eda sega ni raitayalotaka rawa, “Sa sega na mata sa kunea, se na daliga sa rogoca, ka sa sega ni curu ki na loma ni tamata, na veika sa vakarautaka na Kalou me nodra sa lomani Koya.”22
Meda kakua ni rerevaka na solibula ena bula vakatisaipeli, ia meda kidavaka na veimadigi meda tubu ena kaukauwa vakayalo, meda sotava na reki e titobu, ka meda kunea, oi keda yadua, na ibalebale dina ni noda bula. Na solibula, vakabibi na solibula ena inaki i Karisito, sa tukuna tiko na yalodina—eda sa dinata meda maroroya na ivakaro cecere e rua meda lomana na Kalou kei ira na wekada. Na solibula sa kena ibalebale ni da na cakava dina eso na vinaka ena vuravura oqo.
Ni da lomana na Tamada Vakalomalagi kei na Luvena Lomani ena yaloda, kaukauwa, vakasama, kei na kaukawa sa vakadeitaka kina ki lomada na cava kei cei oi keda. Sa solia kina vei keda e dua na mataqali veitaqomaki sa rawa kina meda tarova noda raici keda tikoga ka meda rai yani vei ira na tamata, meda raica vakaidina—na nodra gagadre kei na veika dina era sotava tiko, ena gagadre meda kilai ira vinaka ka vukei ira. Ena vosa vakatautauvata ni kai Samaria Vinaka, rau a raica na bete kei koya na Livai na tamata sa mavoa tu ena yasa ni gaunisala, ia rau a sega ni raici koya dina. O koya ga na kai Samaria a raica dina na tamata mavoa oqo, ka yaco kina me “sa lomana sara, a sa lako mai, ka vauca na tikina sa mavoa.”23 E vuqa era sotava tu na galili e veigauna. Sa dina sara ni noda solibula ena vakayaco veisau.
Dinata
Na noda dinata cecere e vakadeitaka na reki eke kei na bula sa bera mai eda sa dinata tiko na Kalou na Tamada Tawamudu kei na Luvena, na Turaga o Jisu Karisito. Ena Omanai eda raica kina na vakamamasu veiuqeti oqo:
“Au gadreva mo dou lako mai vua na Karisito o koya na Yalosavasava ni Isireli, mo dou vakaivotavota ena nona veivakabulai, kei na kaukauwa ni nona veivueti. Io, dou lako mai vua, ka cabora na yalomudou taucoko me ivakacacabo kivei koya, ka ia tiko ga na lolo kei na masumasu, ka vosota me yacova na ivakataotioti; ia me vaka ni sa bula na Turaga dou na vakabulai.”24
Na italanoa ni dua na tama a vakamoceri luvena tagane lailai ena loga, a biuta na rumu ka rogoca ni sa cabolo e dua na ka. Ni lesu, a raici luvena ni sa tu ena vuloa ka taroga a lutu vakacava mai na loga. A sauma mai o cauravou, “Au a sega ni tiko sara yani e loma.” Mo vakadeitaka mo dinata na Kalou ka mo tiko sara yani e loma
O sa tiki tiko ni yago i Karisito.25 O sa itaukei. Mo tiko kece kina, ena soli-ka ka ciqoma ena bula galala. Mo raici ira dina era tiko voliti iko ka mo laurai me yaco na nomu bula me bulataki vinaka, na bula ni veiqaravi kei na veivakalougatataki, na bula sa vakalougatataki ka vakasavasavataki mai vua na iVakabula sa uabaleta na ka kecega kei na nona loloma soliwale o na uabaleta talega. E dua na bula e vakalougatataki ka vakatabui mai vua na iVakabula ka sa vorata rawa na veika kecega kei na nona loloma soli wale talega o na vorata rawa kina na veika kecega.
Ena vakatasuasua ni Siga ni Painia ena vulai katakata sa oti ni Matasere ni Tabernacle kei na Mataivakatagi ena Rara ni Valetabu a lagasere kina o Sissel na daulagasere vakasakiti mai Norway. A tarai na yalodra na vakarorogo, vakakina vei au, ena nona sere dokai e vakatokai na “Slow Down” eda vakananuma kina na ivolanikalou mai na Same, “Dou tiko lo, mo dou kila niu sa Kalou.”26
Au vinakata meu vakaraitaka mada na vidio ni nona lagasere o Sissel ena soqo o ya, ka mo ni rogoca sara, kau kerea mo ni tugana na itukutuku ni sa rawa meda vakararavi vakatabakidua vua na Kalou kei na Nona loloma totoka ka sa lomana me vakalougatataka ka tokoni keda se cava ga e yaco. Ka tugana na kena vakatabui nomu soli bula vakakina o iko ki Vua se cava ga e yaco.
Ena noqu veilecayaki
Ena gauna niu gagadre kina
Ni sega ni matata na vakasama
Na domo malua sa rogo mai
Vakamalua mada, ka tiko lo
Tiko lo ga, na Yalo ni Turaga sa voleka
Vakamalua mada, rogoca na Domona
Kila ni o Koya na Kalou
Ena gauna ni dredre
Ni sega na ivakadei
Ka luluqa wavoliti au
Yaco mai domo e malua, ka uasivi
Vakamalua mada, tiko lo, na luvequ
Tiko lo ga, na Yalo ni Turaga sa voleka
Vakamalua mada, rogoca na Domona
Kila ni o Koya na Kalou
Ka kila ni ko koya sa Kalou27
Vakamalua mada. Vakadeitaka nomu nanuma ka vakarautaka na yalomu mo digitaka na Kalou. Taura e dua na gauna vakanomodi mo tekiduru kina ena dua na vanua vakatikitiki ka kaya vua na Tamamu Vakalomalagi, ena yaca i Jisu Karisito, ni ko sa Nona, ni ko sa dinata, na yagomu kei na yalomu, ki Vua, na Luvena, kei na salatu ni kosipeli. Ka qai muria na Nona veiliutaki, nikua kei na vo ni nomu bula taucoko. Kakua ni lomalomarua se yalolailai tale ia mo lakova yani na nomu inaki kei na ilesilesi ni bula oqo. Na bula vakayago e rui lekaleka. Me yaga sara na gauna oqo me yaco nomu bula tawamudu me dua na reki e sega ni vakalailaitaki, ka sega ni ka vakacala ka. O sega beka ni vakila ni sa tukuna tiko na Yalo vei iko ni dina oqo? Mo qai lako yani ki liu ena nuidei.
Au sa yalataka vei kemuni ni nona sausaumi na Turaga ena nomu soli ka taucoko ena kena kece sa na solia mai o Koya, e “nai vakarau vinaka, ka tabaki sobu, ka kuretaki vata, ka vuabale.”28 Na dina ni Nona tucaketale sa ivakadinadina ni sa tu Vua na kaukauwa kecega, ni sa rawa me solia na veika sa yalataka, ni sa na dau solia ga o Koya. Sai Koya na bula, ka sa yaco mai o Koya meda rawata na bula ka “ia me rawa vakalevu sara”.29 Au sa kaya kina vei kemuni niu sa kila vakai au ni o Jisu Karisito na Dauveivueti sa tucaketale. Na dina oqo sa vakayaco veisau kece kina e vuravura kei na veigauna tawamudu. Au sa solia vei kemuni na Nona veivakalougatataki kei na noqu ivakadinadina ena yaca i Jisu Karisito, emeni.