Te mā’itira’a ’e te fafaura’a iāna iho
Purera’a nā te feiā ’āpī pa’ari ’ati ti’a i te ao nei
12 nō Tēnuare 2020
Tē ha’amāuruuru nei au i tō’u Metua i te Ao ra nō te taera’a mai i rotopū ia ’outou i teie pō. ’E tē hina’aro nei au e ha’amāuruuru i ta’u vahine, tē pāturu nei au i tāna mau parau. ’E māuruuru ta’a ’ē i teie pupu hīmene fa’ahiahia mau. E fa’a’itera’a rātou nō te faufa’a rahi o te Institut. E mea au nā’u te Institut. Maita’i pa’i ē, ’outou pā’āto’a tē nehenehe e haere, e’ita ’outou e tāpa’o noa i tō ’outou i’oa, e haere ato’a rā ’outou ’e e fa’aitoito roa ’outou i te Institut. Hō’ē teie o te mau mea maita’i roa a’e tā tātou e rave nei i roto i te ’Ēkālesia. Te hīmene i hīmenehia e te pupu hīmene nā mua atu, ’ua ’ite paha ’outou ē, e hīmene tei pāpa’ihia e te peresideni Russell M. Nelson. Nāna i pāpa’i i te mau parau, ’e ’ua putapū tō’u mana’o ’e tō’u ’ā’au, ’e tē ti’aturi nei au ’ua putapū ato’a ’outou i te reira. Tē fa’atae atu nei au ia ’outou i tōna here ’e te tāpa’o aroha. E parau ha’amāuruuru ato’a tā’u i te peresideni Astrid Tuminez ’e te fa’atereraa ’e te mau rave ’ohipa nō te fare ha’api’ira’a Utah Valley University, nō tō rātou fāri’i-maita’i-ra’a ia tātou.
E rave rahi matahiti i ma’iri, ’ua tere māua ’o Elder L. Tom Perry nō te hō’ē ’ohipa i New York City. I reira ’ua haere māua e māta’ita’i i te hō’ē sunago tahito i Brooklyn. E fare hi’ora’a tura taua sunago ra i te hō’ē vāhi tei riro na, ’e ’o tē riro nei, ’ei tuha’a ’oire nō te feiā moni. ’Ua fāri’i pōpou te rabi vahine nō te ’āmuira’a ’āti Iuda ’Āpī i reira ia māua, ’e ’ua fa’a’ite mai i terā fare. I te mātāmua, e fare nehenehe te reira, i teienei rā tītau-rahi-hia te tahi mau tātā’ira’a. ’Ua fa’a’ite mai te rabi ē, ’ua varavara noa te mau melo o tāna ’āmuira’a ’e ’aita atu ra i nava’i te ’āfata moni nō te ’atu’atu i te sunago, nā reira ato’a te mau fa’anahora’a mai te mahana ha’api’ira’a.
’A paraparau noa ai mātou, ’ua nā ’ō mai ’oia ē, nō te rahira’a o rātou, e mea ha’apa’o te feiā ’āpī pa’ari i tō rātou faufa’a tupuna ’āti Iuda, nō te tahi rā tumu, e mea ’ōtohe rātou nō te ’āmui mai ’e nō te riro ’ei melo fafau nō te sunago. ’Ātīrā noa atu, e fa’anaho pinepine rātou i te mau ’ohipa ri’i sōtiare i roto i terā fare. Mai te huru te reira i te hō’ē vāhi ’āmuira’a nō rātou, ’e e hōro’a mai rātou i terā taime ’e terā taime i te tahi moni tauturu nō te mau ha’amāu’ara’a e tū’ati i te fa’a’ohipara’a i te fare, e mea varavara rā o rātou tei ineine ’ia riro ’ei melo nō te ’āmuira’a ’o tē haere mai nei e ha’amori i reira.
’Ua paraparau māua Elder Perry ’e te rabi nō te aha pa’i te reira. ’Ua tāpe’a mai ’oia i roto i tāna mau ’āparaura’a ’e teie nau feiā ’āpī pa’ari e rave rahi ē, e ta’ata ’ōtahi te rahira’a o rātou, ’e e ’ere te ha’apa’ora’a fa’aro’o i te ’ohipa mātāmua roa i roto i tō rātou orara’a. ’E nō vetahi, ’aita rātou i hina’aro e fafau ia rātou i te hō’ē noa atu sunago. ’Ua uiui te mana’o o Elder Perry ē, terā ānei ïa te mana’o « FOMO »—te mata’ura’a ’ia ’ere i te hō’ē mea—’oia ho’i, ’ia fafau ana’e rātou i te hō’ē mea, e ’ere ïa rātou i te tahi atu mea.
’O te tumu parau mau ïa tā’u e hina’aro e paraparau ia ’outou i teie pō—te mā’itira’a ’e te fafaura’a iāna iho.
E parau nā mua tātou ē, terā « mata’u ’ia ’ere i te hō’ē mea », i te hō’ē fāito, e mana’o ferurira’a pāpū ïa. Mai te mea e nehenehe, ’ua hina’aro iho ā tātou ’ia tupu te mau ’ohipa maita’i roa a’e ’e ’ia ra’ehia te mau mea maita’i roa i roto i te orara’a. Terā rā, e ’ere te fa’ataimera’a i te hō’ē mā’itira’a ’e te fa’ataimera’a i te fafaura’a iāna iho ē a muri noa atu, i te mea noa ē e ma’iri paha ’outou i te hō’ē mea maita’i a’e, i te mana’o ferurira’a pāpū. E ’ōpani te mau mā’itira’a ato’a i te tahi atu mau ’ē’a : mai te mea e mā’iti ’outou e haere i te ’ohipa ’aore rā i te ha’api’ira’a i te po’ipo’i, e’ita tā ’outou e nehenehe e māta’ita’i ia Netflix i terā taime (e ’ere ānei ?) ; mai te mea e haere ’outou i te ha’api’ira’a ’e e noa’a mai te parau tū’ite patu fare, e ’ere ’outou i te parau tū’ite tua’ā’ai, te anoihi ’aore rā te ihiora, ’aore rā te tahi atu mea (’aita rā e fa’aea noa ïa ’outou i te ha’api’ira’a) ; mai te mea e reva ’outou i Victoria Falls i Afirika i teienei, e’ita ïa e nehenehe e reva i te tahi atu vāhi i terā taime, ’e e ’ere iho ā ’outou i te haerera’a i te tahi atu vāhi tā ’outou e hina’aro e haere ; mai te mea e mā’iti ’outou e tāvini i te hō’ē misiōni, e vaiiho ’outou i te tahi atu mau ’ohipa ri’i sōtiare i terā taime ; ’e tē vai atu ra. Teienei, ’ia ’ore ’outou e rave i te hō’ē mā’itira’a ’e e fafau ia ’outou i te hō’ē ’avei’a, e aura’a ’ore ïa tō tō ’outou orara’a ’e i te hope’a, e ’ere mau ïa ’outou i te rahira’a o te mau mea maita’i roa a’e.
Mai tā ta’u vahine e parau nei : « E’ita e nehenehe e rave mai i te mau mea ato’a—i hea pa’i ’oe e tu’u ai i te reira ? » E’ita e nehenehe e rave mai i te mau mea ato’a e mea au ’ia fāna’o, ’e e’ita e nehenehe e rave i te mau mea ato’a e mea au, ’aore rā e mea ’ana’anatae ’ia rave. ’E noa atu ē e fa’aea ’outou i ni’a i te mau mā’itira’a « ro’o maita’i ’e te mau mea pōpouhia »,1 e’ita iho ā e nehenehe e rave i te mau mea ato’a. E mea ’ōhie roa, ’aita e taime, ’aita e rāve’a ’aore rā ’aita e vāhi i roto i te hō’ē orara’a tāhuti nei. ’E nō reira, tītau-roa-hia ’ia fafau tātou ia tātou i te tahi mau mā’itira’a ta’a ’ē ma te ’ite ē, ’ia nā reira tātou, e vaiiho iho ā tātou i te tahi atu mau mā’itira’a, noa atu ā te mata’i o te reira. ’Ia vai ato’a i roto i te ferurira’a ē, ’ia fa’ataime rahi ana’e tātou i te hō’ē mā’itira’a, e mā’itira’a ato’a ïa te reira.
E hi’ora’a rahi te fa’aipoipora’a. ’Ia mā’iti tātou i te hō’ē ’āpiti, e vaiiho tātou i te tahi atu mau pu’era’a. ’Ua parau te Fatu : « E here ’oe i tā ’oe vahine fa’aipoipo mai tō ’ā’au ato’a, ’e e ha’apa’o ho’i iāna ’e ’eiaha ’ei vahine ’ē atu ».2 Nō teie huru mā’itira’a hope’a, e ’ōtohe vetahi ’ia fafau ia rātou i te hō’ē ta’ata tā rātou i au roa, ’o tā rātou i here ’e ’o tā rātou e nehenehe e haere ’āpipiti i mua ma te ’oa’oa ē a muri noa atu, i te mea ho’i, e ha’ape’ape’a rātou penei a’e tē vai ra te ta’ata maita’i atu ā, ’eiaha ïa rātou ’ia ’ere i te reira. Tē ha’amana’o ra vau i te hō’ē taure’are’a tamāroa mai te reira tā’u i mātau ’a rave matahiti i ma’iri, tei ’ore i hina’aro i te hō’ē ’āpiti maita’i nō tōna mana’ora’a ē, ’ua rahi roa tō terā tamāhine niho rapa’auhia. Tā’u i mana’o, ’oia ho’i, ’aita e ta’ata fāito maita’i roa mai tā ’oe e hina’aro, ’e e pa’i, ’ua feruri ānei ’oe ’aita roa atu ’oe iho i tae i terā fāito maita’i roa ?
E putuputura’a teie nō te feiā ’āpī pa’ari. ’E nō te rahira’a o ’outou, ’o te orara’a ta’ata pa’ari te parau. Tē vai ra ’aore rā tē tāpapa ra ’outou i te mau hōpoi’a ta’ata pa’ari, te mau fa’aotira’a ta’ata pa’ari ’e te mau ’ohipa ta’ata pa’ari, ’e i te tahi pae, ’o te fa’ataimera’a ïa i te ti’ara’a ta’ata pa’ari ’e te tāpapara’a i te ’āreareara’a fa’aea ’ore. ’A ’ahuru matahiti i teienei, ’ua fa’ahiti te ta’ata pāpa’i ra ’e e ’aivana’a ho’i ’o Charles Murray i te aura’a nō te « orara’a tei ora-maita’i-hia ». ’Ua nā ’ō ’oia : « Tē fa’ahiti nei au i te mau huru mea e hi’o tātou i te taime o tō tātou ruhiruhiara’a ’e ’a fa’aoti ai tātou ē, ’ua ti’a ia tātou ’ia fa’ahiahia i te ta’ata tā tātou i riro na ’e te mea tā tātou i rave ».3
Tē ha’amana’o ra Murray i te paraparaura’a i te hō’ē ’āmuira’a i Zurich nō ni’a i te fa’ahiahia rahi e tae mai maoti te hō’ē orara’a tei ora-maita’i-hia. ’Ua parau ’oia ē : « I muri iho i tāna a’ora’a, ’ua haere mai vetahi o nā ta’ata e piti ’ahuru ti’ahapa i roto i te ’āmuira’a ma te parau pāpū ē, ’aita e aura’a nō rātou te parau ‘orara’a tei ora-maita’i-hia’. Tē ’ārearea maita’i ra rātou ’e tō rātou ’āpiti ta’oto ’e tō rātou pere’o’o ’āpī BMW ’e tō rātou fare ’ē i Majorca, ’e ’aita rātou e ’ite ra i te vāhi tē ’ere ra rātou. ’Ua huru ’ē roa vau », tē parau ra Murray, « i te fa’aro’ora’a i terā parau i mua i tō’u mata, ’aita rā vau i māere… Mai teie ri’i terā huru ferurira’a : E au te ta’ata i te ha’aputura’a tao’a himio e ha’utiiti, ē ’ia tae i te hō’ē taime, e fa’aea te reira. Te fā o te orara’a, ’o te ha’apaura’a ïa i te taime e he’e ra i roto i te ’āreareara’a e noa’a mai ».4
I te hope’a o tāna mau parau, ’ua fa’ahiti ’o Murray i teie parau māramarama mau : « ’Ua ta’a i te ta’ata pa’ari ’e te ruhiruhia ē, te hō’ē orara’a tei ora-maita’i-hia, tītauhia ïa te fafaura’a iāna i te mau ta’ata ’ati a’e ia tātou ».5 ’Ua ta’a i te ta’ata pa’ari mau te reira. ’Ua ta’a ia rātou ē, e’ita e haere e rave i te ’āreareara’a ’ei fa’atumura’a nō te orara’a, ’e e’ita te reira e nava’i ’ei fā nō te orara’a. Tē tūra’i nei teie parau mau i te parau nō nā fa’auera’a rahi e piti : e here i te Atua ma tō tātou ’ā’au ato’a ’e te vārua ’e te mana’o, ’e e here i tō ta’ata tupu mai iāna iho.6 Mai tā Iesu i parau : « Te ture ato’a ’e te mau peropheta, tei teie nei ïa pu’e ture e piti nei ».7 Tei ni’a te fafaura’a o te ’evanelia,8 ’e tōna parau fafau nō te ora mure ’ore, i teie nā fa’auera’a rahi e piti, mai te ’āpapara’a i hōro’ahia mai : te mātāmua ’e te piti. ’O te mana’o fa’atura i teie nā fa’auera’a e piti te fa’a’itera’a nō te orara’a tei ora-maita’i-hia, nā reira ato’a te aura’a nō te rirora’a ’ei ta’ata pa’ari.
I te pae hope’a, ’aita e ’ē’a rōpū noa ’e te fafau ’ore i te hō’ē pae, nō te parau a’e o te mau fa’ahope’ara’a mure ’ore. ’Ua ha’apāpū Alama i te reira i tōna ha’api’ira’a ē, e pi’i te Mesia, te Tīa’i māmoe maita’i, ia tātou ’ia pe’e iāna i ni’a i te ’ē’a nō te ti’ara’a pipi ’e te ’oa’oa :
« Tē parau atu nei au ia ’outou na ē, tē ti’aoro noa mai nei te tīa’i māmoe maita’i ia ’outou na, ’e tē ti’aoro nei ho’i ’oia ia ’outou i tōna iho i’oa, ’oia ho’i, i te i’oa o te Mesia ; ’e mai te mea, e ’ore ’outou e fa’aro’o i te reo o te tīa’i māmoe maita’i ra, i te i’oa i parauhia ’outou ra, inaha, e ’ere ïa ’outou i te māmoe a te tīa’i māmoe maita’i ra.
« E mai te mea e ’ere ’outou te māmoe a te tīa’i māmoe maita’i ra, ’o tā vai atu nana māmoe ’outou ? Tē fa’a’ite atu nei au ia ’outou na ē, ’o te diabolo tā ’outou ïa tīa’i māmoe, ’e nō tāna nana māmoe ho’i ’outou ; ’e ’o vai tē ti’a ’ia pāto’i mai i teie ? »9
Tē ha’api’i ra Alama i te parau pāpū ē, e piti ana’e mā’itira’a, ’e ’o te Mesia noa te mā’itira’a maita’i. Mai te mea ’aita ’outou e mā’iti i te Mesia, tē pe’e ra ïa ’outou i te atua ha’avare, e ’ē’a hape ’o tē arata’i, i te hope’a ē a muri noa atu ato’a, i te ’aupari, nō te fa’ahiti i teie noa a’e. Nō reira, tē pe’e ra ’outou i te Fa’aora, ’aita ana’e, tē pāto’i ra ’outou iāna.10
Nō te mea ’ua ’ite tātou i te reira, ’aita tō tātou ’ōtohera’a e fafau ia tātou i te Fatu ’e e ’imi i te riro ’ei hō’ē ’e ana. Mai tāna i pure i te Tāmā’ara’a hope’a nō tāna mau ’āpōsetolo ’e te mau ta’ata ato’a e ti’aturi i tāna mau parau : « ’Ia riro rātou ato’a ’ei hō’ē ; mai ia ’oe, e tā’u Metua, i roto iā’u nei ra, ’e mai iā’u ho’i i roto ia ’oe na, ’ia hō’ē ato’a rātou i roto ia tāua ».11 Terā tō tātou hina’aro, e ’ere ānei ? E aha ïa te mana’o e tūtāperepere ai ’ia fafau hope ia tātou ma te tāhono’a ’ore ? E aha e ’ōtohetohe ai i te rave i tāna zugo i ni’a ia tātou, ’ua ’ite ho’i tātou ē, « tē marū nei ho’i [tāna] zugo ’e te māmā » ?12
Te mata’u i te manuia-’ore-ra’a
Nō te pāhono i tā’u iho uira’a, tē ’ite nei au ē, noa atu ā te ferurira’a pāpū ’e noa atu ā te mau tāparura’a a te Vārua i te fa’aitoitora’a ia tātou, tē vai nei e piti tumu e titotito nei te mana’o o vetahi. ’A tahi, ’o te māna’ona’ora’a ïa i tō tātou ’aravihi e tāpe’a i terā fafaura’a rahi ’ino. E tae ānei tātou i te hope’a, ’e mai te mea e’ita tātou e manuia, e mea maita’i a’e paha ïa ’eiaha e fafau atu ia tātou ?
E māna’ona’ora’a pāpū te reira, terā rā nō te pāhono, e parau noa atu vau i teie parau faufa’a rahi ē, ’ua oti a’ena ’outou i te tu’ura’a i tō ’outou ’āvae i roto. Hou te orara’a tāhuti nei, ’ua mā’iti ’outou i te fāri’i i te fa’anahora’a nō te fa’aorara’a ’e te fa’ateiteira’a, tei fa’aineinehia e te Metua ’e tei pāruruhia e te Tamaiti, ’ua mā’iti ’outou i te Mesia. E fa’a’itera’a tō ’outou fānaura’a ē, ’ua fafau a’ena ’outou ia ’outou iho. ’Ua ha’apa’o ’outou i tō ’outou « ’āi’a mātāmua »,13 ’e te uira’a i teienei, ’oia ho’i, e ha’apa’o ānei ’outou i te « piti o te ’āi’a » ’e « e fa’arahihia te hanahana [i ni’a i tō ’outou upo’o] a muri, ē a muri noa atu » ?14 ’Eiaha na tātou e taiā i te ha’apāpū fa’ahou i tā tātou fafaura’a ia tātou iho hou te tāhuti nei, inaha ho’i tē ’ite ato’a ra tātou i te ’ino o te tahi atu mā’itira’a.
’E ’aita e faufa’a e ora i roto i te mata’u ’e te manuia-’ore-ra’a. ’Aita tātou i te mea ’ōtahi noa. ’Aita tātou i te mea rāve’a ’ore. Te ta’ata ato’a e fafau mau iāna i te Mesia, i te ti’ara’a pipi hope, e’ita ’oia e ’ore e manuia. Mai te mea e tā’amu tātou iāna tei pou i raro i te mau mea ato’a, tei upo’oti’a i te mau mea ato’a, ’e i teienei tei mau i te mana ato’a, e’ita tātou e ’ore e manuia.15 E ’ere tō tātou Metua i te Ao ra ’e te Fa’aora i te ta’ata māta’ita’i noa, e hi’opo’a ē e tere maita’i ānei te ’ohipa nō tātou ’aore rā ’aita. E feruri pa’i ’outou tē hi’o nei rāua mai ni’a mai i te ra’i ’a parau ē : « ’A hi’o na ia Sam. Ha’apa’ora’a ’ore tōna fa’arurura’a i terā ’ohipa i te taime i ma’iri a’enei, e hape fa’ahou terā ’ōna », ’aita rā, « ’A hi’o na. E vaira’a fifi iti rahi tō Sandra i te ravera’a a tōna hoa. Mai, e hi’o ana’e e matara ānei iāna terā fifi ». E ’ohipa ma’ama’a mau ïa. Tē ha’a rahi nei rāua i tō tātou pae, tē hōro’a tāmau nei rāua i te tauturu, te arata’ira’a ’e te mau rāve’a, ’e rahi atu ā tā rāua e hōro’a mai, mai te mea e fāri’i tātou.
’Ua parau vau ē, ’ia fa’atura tātou i te mau fafaura’a e tā’amu ia tātou i te Mesia ’e i tōna mana, e’ita tātou e ’ore e manuia. E parau mau teie i te hope’a, ’ua ’ite rā vau ē, i te tahi taime, e fa’aruru tātou pā’āto’a i te manuia-’ore-ra’a—tā tātou iho mau hape ’e te mau hara, ’e te ’ohipa a te mau hape ’e te mau hara a te ta’ata i ni’a ia tātou, i te tahi taime. Maoti a’e rā te mau hōro’a nō te tātarahapara’a ’e te fa’aorera’a hara, e tau poto noa tō teie mau manuia-’ore-ra’a ato’a ’e te mau hape. ’Aita hō’ē o te reira e fa’a’ere ia tātou i te ora mure ’ore ma te ’ore tātou e fāri’i. Nō te aha ? Nō te mea ’ia rave ana’e tātou i tei noa’a ia tātou nō te ti’a fa’ahou mai i ni’a, e matara mai te aroha o te Mesia nō te fa’a’āfaro ’e nō te tātā’i i te mau mea ato’a e’ita e noa’a ia tātou ’ia rave. E ha’amana’o tātou ē, ’aita te mana tāra’ehara ’aore rā te aroha o te Mesia e tātara noa i te mana’o hara ’e te hape, e ha’amo’a ato’a rā te reira ’e e fa’ariro ia tātou ’ei ta’ata mo’a ’o tē nehenehe e ora i mua i te aro o te Atua.16
I teienei, ’aita vau e parau nei ē, e mea ’ōhie. ’Ua ’ite ’outou mai iā’u ato’a nei ē, ’ua pu’e noa te fifi ’e te mau ’ohipa pa’ari i roto i te orara’a, e mau ’ati rahi ato’a ho’i. ’E e mea ’ōhie a’e ’ia paraparau nō ni’a i te rirora’a ’ei pipi ha’apa’o maita’i nō Iesu Mesia, i te rirora’a ’ei pipi ha’apa’o maita’i. ’Aita roa i ’ōhie nō Iesu ’ia riro ’ei pipi nō tōna Metua ’e ’ia inu i tāna « ’āu’a maramara ».17 ’Ua rave rā ’oia i te reira ’e ’ua ’ite ’oia nāhea i te tauturu ia tātou ’ia haere i ni’a i te ’ē’a nō te ti’ara’a pipi. Hau atu, e mana tō te Fa’aora ’e ’ua ineine ho’i ’oia nō te tauturu ia tātou. E fa’aea ’oia i pīha’i iho ia tātou ma te tauturu tei hina’arohia, ’e te maoro e tītauhia. ’Ua parau ’oia ē : « ’Ē, ’ua tātarahapa ana’e tō’u mau ta’ata, e fa’a’ore au i tā rātou mau hara iā’u ».18 E ’ere ē, e mata’u ’outou i te manuia ’ore ra, e’ita ïa ’outou e fafau hope ’e e fafau pauroa ia ’outou i te Mesia. E tātarahapa noa ’e e fa’aitoito roa i te rave i te maita’i—e nava’i te reira.
Te tusia
E tumu ’ē ato’a tā’u e mana’o ra e mea ’ōtohetohe te ta’ata ’ia pāhono i te pi’ira’a a te Tīa’i māmoe maita’i ’e ’ia ’āmui i tāna nana : ’o te mata’u i te tusia e tū’ati i te reira. Tē ha’amana’o ra tātou pā’āto’a i te taure’are’a tei ani ia Iesu, ma te pāpū : « E aha iho ā tei toe iā’u » ’ia noa’a te ora mure ’ore.19 Tē nā ’ō ra te Mareko ē « ’ua hi’o atu ra Iesu iāna ’e ’ua aroha atura iāna » [iā’u e mana’o, e mea faufa’a te reira], « nā ’ō atu ra, tē toe ra te hō’ē mea ia ’oe : ’a haere ’a ho’o atu i tā ’oe ra e hope roa ’e ’a hōpoi atu ai nā te ta’ata ri’i ’e e tao’a tā ’oe i te ao i reira ; ’a haere mai ai, ’a rave ai i tō satauro, ’a pe’e mai ai iā’u ».20 Tē ha’amana’o ra ’outou i te pāhonora’a : « Taiā atu ra ’oia i te reira parau, haere atu ra ma te ’oto, e tao’a rahi ho’i tāna ».21
Maita’i ē, ’ua feruri fa’ahou ā ’oia ’e ’ua taui te ’ā’au o teie ta’ata tao’a rahi ’e ’ua fāri’i i muri iho i te anira’a a te Fa’aora. ’Ātīrā noa atu, ’ua ’ite tātou pā’āto’a ē, te fafaura’a iāna i te Mesia, e fa’atusiara’a ïa tō muri mai. Hō’ē mea e fa’atusiahia, ’oia ho’i, te « mata’u ’ia ’ere i te hō’ē mea » inaha ’ua ’ite tātou ē, e ’ere iho ā tātou e rave rahi mea. E rave rahi ho’i mā’itira’a i roto i te orara’a tei tū’ati ’ore i te ti’ara’a pipi, ’e e rave rahi ato’a mau mea maita’i tē nehenehe e ’ōpanihia nō te mau tītaura’a ti’ara’a pipi i ni’a i tō tātou taime ’e tā tātou mau rāve’a, e mau tītaura’a maita’i a’e ’e te maita’i roa a’e.
’Ua pohe i teienei taua tāne ra tei ui i te Fa’aora : « E aha iho ā tei toe iā’u ? ». E mea pāpū ē, te mau tao’a nāna ra, ’aita fa’ahou ïa, ’e mai te mea tē vai ra, ’aita fa’ahou iāna ra ’e ’aita fa’ahou ’ōna e fa’a’ohipa i te reira. Noa atu ā pa’i te rahi o te fa’atusiara’a tāna i taiā i terā taime, e mā’itira’a maita’i a’e ānei tāna maori rā te fāri’ira’a i te anira’a a te ’Orometua ? E nehenehe ānei e fa’aau i te mau mea ato’a nāna ra, ’aore rā te mea e noa’a iāna, i te mea tā te Fatu e hōro’a iāna i te hope’a ? ’Ua ’ite tātou ē, te mau mea ato’a tā te Fa’aora e ani ia tātou, mai tō tātou iho orara’a, e mea na’ina’i ïa ’ia fa’aauhia i te fa’ateiteira’a. E’ita ho’i e nehenehe e feruri : « ’O te mau mea ’aore i hi’ohia e te mata ra, ’aore i fa’aro’ohia e te tari’a ra, ’aore ho’i i ō i roto i te ’ā’au o te ta’ata ra,’o tā te Atua ïa i vaiiho nō te feiā i hina’aro iāna ra ».22
’Eiaha e mata’u i te mau fa’atusiara’a ti’ara’a pipi, e fāri’i maoti rā i te rāve’a ’ia tupu i roto i te mana pae vārua, ’ia ’ite i te ’oa’oa hōhonu a’e ’e ’ia ’ite mai, tātou tāta’itahi, i te aura’a mau o tō tātou orara’a. Te fa’atusiara’a, te fa’atusiara’a iho ā rā nō te ’ohipa a te Mesia, e fa’a’itera’a ïa nō te mana’o pa’ari—e ha’apa’o mau tātou i nā fa’auera’a rahi e piti ’ia here i te Atua ’e i tō tātou ta’ata tupu. Fa’atusia, te aura’a ra, e rave mau tātou i te tahi ’ohipa maita’i i roto i teie nei ao.
Tē ha’apāpū nei tō tātou here i tō tātou Metua i te Ao ra ’e i tāna Tamaiti, tō tātou here ma te ’ā’au ’e te pūai ’e te mana’o ’e te itoito, i tō tātou vārua ē, e aha ’e ’o vai tātou. E fa’atae mai te reira i te mana’o ri’i atāta ’ore ’o tē tauturu ia tātou ’ia fa’aea i te rōtahi noa i ni’a ia tātou ’e ’ia hi’o ’ati a’e ia tātou, nō te ’ite mau ia vetahi ’ē—tō rātou mau hina’aro ’e te orara’a tā rātou e fa’aruru nei, ma te hina’aro ’ia māramarama ’e ’ia tauturu ia rātou. I roto i te parabole nō te ta’ata nō Samaria, ’ua ’ite te tahu’a ’e te ’āti Levi i te rātere pēpē i ni’a i te pae purūmu, ’aita rā rātou i ’ite mau iāna. ’O te ta’ata nō Samaria ana’e tei ’ite mau i teie ta’ata pēpē, ’e nō reira, « aroha atu ra, haere atu ra i pīha’i iho… vehi ihora [i tōna mau pēpē] ».23 E rave rahi roa ho’i e ’ite nei i te mana’o ’ōtahi fa’aea ’ore. E nehenehe mau tā tātou fa’atusiara’a e fa’atupu i te ’ohipa ta’a ’ē.
Te fafaura’a iāna iho
Te fafaura’a iāna iho rahi roa ’ino e ha’apāpū mai i te ’oa’oa i’ō nei ’e i muri iho, ’o te fafaura’a ïa iāna i te Atua tō tātou Metua mure ’ore ’e i tāna Tamaiti, te Fatu ra Iesu Mesia. I roto i te Omoni, tē vai nei teie tāparura’a rahi :
« ’Ua hina’aro vau ’ia haere mai ’outou i te Mesia, ’oia tei Mo’a i ’Īserā’ela nei, e rave i tāna ora, ’e te mana o tāna fa’aorara’a. ’Oia ïa, e haere mai iāna, ’a pūpū mai ai i tō ’outou ’ā’au ato’a ’ei ō nāna ; ’e e pure, ’e e ha’apae i te mā’a, ’e e ha’apa’o maita’i ē tae noa atu i te hope’a ra ; ’e tē ora ra te Fatu, e ora ai ïa ’outou ».24
Tē fa’ati’ahia nei te ’ā’amu nō te hō’ē metua tei tu’u i tāna tamaiti iti i roto i te ro’i, ’e ’a haere ai ’oia i rāpae, ’ua fa’aro’o ’oia i te hō’ē taparuru. Ho’i mai nei ’oia i roto i te piha ’e ’ite a’era i tāna tamaiti i ni’a i te tahua, ui a’era ’oia nāhea ’oia i te topara’a. ’Ua nā ’ō te tamaiti ē : « ’Aita pa’i ’oia i haere roa i roto ». E hi’o maita’i i tā ’outou fafaura’a ia ’outou i te Atua, ’ua haere roa i roto.
E tuha’a ’outou nō te tino o te Mesia.25 E tā’amura’a tā ’outou. ’A haere roa i roto, ma te hōro’a hua atu ’e te fāri’i hua mai. E hi’o mau i te ta’ata ’ati a’e ia ’outou ’e ’ia ’itehia ’outou, ’ia riro tō ’outou orara’a ’ei orara’a tei ora-maita’i-hia, e orara’a tāvinira’a ’e te ha’amaita’ira’a ’e te au. E orara’a tei ha’amaita’ihia ’e tei ha’amo’ahia e te Fa’aora tei upo’oti’a i te mau mea ato’a, ’e maoti tōna aroha e upo’oti’a ato’a ai ’outou i te mau mea ato’a.
I te ’āru’i ha’amana’ora’a i te mau pionie nō te tau ve’ave’a i ma’iri, tei hōro’ahia e te Pupu hīmene o te Fare menemene ’e te pupu ’upa’upa nō Temple Square, ’ua hīmene mai te ta’ata hīmene Norovetia ra ’o Sissel. ’Ua putapū roa te ’āmuira’a, ’e ’o vau ato’a ho’i, i tāna hīmenera’a ma te mana’o tura i te hō’ē hīmene te i’oa ’o « Slow Down [Haere marū] » tei fa’aha’amana’o i te Salamo : « ’A fa’atupua na, ’ia ’ite mai ē, ’o vau te Atua ».26
Tē hina’aro nei au e ha’uti i te hōho’a tāvirihia nō Sissel tei hīmene i terā ’āru’i, ’e ’a fa’aro’o ai ’outou, tē ani nei au ia ’outou ’ia feruri i terā poro’i ē, e ti’a ia tātou ’ia ti’aturi hope i te Atua i tōna here māere ’e tōna ineine ’ia ha’amaita’i ’e ’ia pāturu ia tātou, ’a tupu noa atu ai tē tupu mai. ’E ’a feruri i te huru mo’a nō te fafaura’a i tō ’outou ’e ’outou iho nei iāna ra, ’a tupu noa atu ai tē tupu mai.
I roto i tō’u ’āhuehuera’a
I te taime nō te hō’ē hina’aro rahi mau
’Aita ana’e e pāpū roa tō’u feruria’a
E fa’aō mai te hō’ē reo marū
Haere marū, haere marū, ’ia vai te hau
’Ia vai te hau ’e ’a tīa’i, i ni’a i te Vārua o te Fatu
Haere marū ’e ’a fa’aro’o i tōna reo
’E ’a ’ite ē ’o te Atua ’oia
I te tau nō te ’ati rahi
’Ia fāri’i ana’e au i te pāpū-’ore-ra’a
’Ia ha’avitiviti ana’e te mau mea iā’u
Tae mai te hō’ē reo marū hau mau, te mā mau
Haere marū, haere marū, ’ia vai hau noa, tā’u tamari’i
’Ia vai hau noa ’e ’a tīa’i, i ni’a i te Vārua o te Fatu
Haera marū ’e ’a fa’aro’o i tōna reo
’E ’a ’ite ē ’o te Atua ’oia
’E ’a ’ite ē ’o te Atua ’oia27
’A haere marū. ’A feruri ’e ’a fa’aoti i roto i tō ’outou ’ā’au ē e mā’iti ’outou i te Atua. ’A hi’o i te taime hau e nehenehe ai ’outou e tūturi i raro i te hō’ē vāhi ’ōmo’e ’e e parau i tō ’outou Metua i te Ao ra, nā roto i te i’oa o Iesu Mesia ē, nōna ’outou, ’e ’ua fafau ’outou ia ’outou, te tino ’e te vārua, iāna ra, i tāna Tamaiti ’e i te ’ē’a ho’i nō te ’evanelia. ’Ei reira e pe’e atu ai i te vāhi e arata’i mai ’oia, i teienei ’e hope noa atu tō ’outou orara’a. ’Eiaha e tūtāperepere te mana’o ’aore rā e ’ōtohetohe maoro atu ā, ’a fa’aitoito i tā ’outou fā ’e te misiōni i roto i te orara’a. E mea poto te orara’a tāhuti. ’A fa’aho’ona i teie taime ’ia riro te tau mure ’ore nō ’outou ’ei tau nō te ’oa’oa, ’aita e tātarahapara’a. ’Aita ānei ’outou e ’ite ra i te Vārua tē parau ra ia ’outou ē, ’ua tano te reira ? ’E ’a haere i mua ma te ’ana’anatae.
Tē parau nei au ia ’outou ē, te fa’autu’ara’a maita’i a te Fatu nō te hōro’ara’a pauroa ’outou i tā ’outou, ’o te mau mea ato’a ïa tāna nō te hōro’a, « e ’ī te fāito, e nene’ihia, e uiuihia, e mani’i noa atu ».28 E fa’a’itera’a te pāpūra’a o tōna ti’afa’ahoura’a ē, tē mau nei ’oia i te mau mana ato’a, e nehenehe tāna e hōro’a i tāna parau, ’e tē hōro’a mau nei ’oia. E ora ’oia, ’e ’ua tae mai ’oia ’ia noa’a ia tātou te ora ’e ’ia « rahi atu ā te ora ».29 Tē parau nei au ia ’outou ’ei ta’ata tei ’ite ē, ’o Iesu Mesia te Tāra’ehara ti’afa’ahou. ’O te mea ïa e fa’atupu nei i te ’ohipa ta’a ’ē rahi i roto i teie nei ao ’e te tau mure ’ore. Tē vaiiho nei au i tā’u ha’amaita’ira’a ’e tō’u ’itera’a pāpū ia ’outou nā roto i te i’oa o Iesu Mesia.