Paglahutay sa Kinabuhi pinaagi sa Pagpakig-uban sa Espiritu Santo
Tibuok Kalibutan nga Debosyonal alang sa mga Young Adult
Dominggo, Mayo 3, 2020
Maayong gabii, mga kaigsoonan. Mapasalamaton kaayo ko alang niana nga kanta. Usa kini sa akong paborito kaayo, ug nakahatag kini nako og usa ka pagbati sa kalinaw ug gugma niining panahona. Gusto usab nakong ipahayag ang akong pagpaubus ug gugma nga maania uban kaninyo niining gabhiuna. Sa pagkaila sa daghang tawo sa kalibutan, makapahimo kini nga magpaubos og maayo nga masayud nga ang mga pag-ampo nalitok. Ug gusto nakong ipadangat ang akong gugma ngadto sa among mga apo nga wala namo makita sulod sa daghang mga bulan. Hinaut nga naminaw sila ug masayud kon unsa kadako sa among paghigugma kanila.
Kon anaa sila dinhi, sila mopamatuod nga ako nahigugma sa panahon, tanang matang sa panahon: init, maanindot nga hoyohoy, mga unoson nga snow, mga unoson nga hangin, ug nga pagpanugdog, ug gani ang kabunghan nga unos [nor’easters], inubanan sa mga dagkong balud nga mohangpas sa baybayon. Kapin sa 45 ka tuig kami nagpuyo sa daghang nagkalain-laing bahin sa Estaos Unidos ug sa tibuok kalibutan, ug ang matag dapit may kaugalingong mga hagit sa panahon. Sa Estados Unidos, sa Tunga-tungang Kasadpan usa ka grabing lipak ug mga buhawi; sa Habagatang Silangan mga kusog nga bagyo, sa Amihanang Silangan, bug-at nga mga unos sa niebe, makakaging nga mga ulan, ug unos nga may dalang yelo; sa Kasadpan, init nga mga hangin sa Santa Ana ug mga linog. Sa Kasadpang Africa dunay grabing pagbunok sa ulan ug pag-unos sa abug nga naggikan sa Harmattan; nga mga pulahon nga mga balas gikan sa Sahara nga mihuros sa tibuok probinsya; sa Uropa dunay ulan, tibug-ok nga ulan, snow, ug silaw sa adlaw, usahay ang tanan sa mao ra nga adlaw; ug sa Asia mabatyagan namo ang kakusgan sa mga bagyo. Tanan kini nga managlahing kasinatian sa panahon kanunayng makapahinam kanako! Unsay akong ikasulti? Ganahan ko sa panahon!
Sa gikaingon na, sa ingon nga ako maglantaw sa pagsinati sa Inahang Kinaiyahan ug sa iyang katalagsaon, dako ang akong pagtahud sa gahum ug sa posibling peligro nga anaa kanunay sa bangis nga mga hitabo sa panahon. Dili gyud ko morisgo sa akong kinabuhi, bisan unsa pay tintasyon o katahum nga akong makita niana pwersa. Dili gyud ko mangahas sa pagpili nga ibutang ang akong kaugalingon sa taliwala sa hawan aron lang mag-obserbaran ang kanindot nga pagpakita sa liti; dili ko mosawom sa dagat samtang ang gamhanan, dagko kaayong mga balud peligrong mohampak sa baybayon; ug dili ko motintal sa Inahang Kinaiyahan pinaagi sa kapakyas nga mangita og kasilongan sa nagsingabut nga buhawi o kusog nga bagyo. Sigurado gyud ko nga nakalila ko sa akong kaugalingong kahuyang itandi sa tibuok pwersa sa panahon sa akong palibut.
Alang nako, ang pwersa sa pag-usab-usab sa panahon importanting simbolo sa kinabuhi. Samtang mogawas kita matag adlaw, ikaw ug ako dili lang makasugat sa dili makontrol nga pisikal nga dagan sa panahon apan usab sa impluwensyal nga espiritwal nga pwersa sa panahon ug mga tintasyon. Bisan og managlahi ang mga kahimtang sa matag usa kaninyo, makapangutana kamo, “Unsaon nako nga maandam sa inadlaw-adlawng panahon nga naglibut sa akong kinabuhi?”
Mituo ko nga kita mobuhat niini pinasikad sa unsay kusganong gitambag sa atong propeta, si Presidente Russel M. Nelson, atol sa atong bag-uhay nga komperensya, sa pagsunod sa “tin-aw nga pamahayag nga miabli niini nga dispensasyon [dihang] ang Dios … miingon, ‘Kini ang Akong Hinigugma nga Anak. Paminaw Kaniya!’ [Joseph Smith—Kasaysayan 1:17].”1
Tingali dili nato hingpit nga makita o masabtan unsay nagtuyok nga nagsingabut kanato, sa ibabaw nato, o sa atong luyo, o kanunayng mabantayan ang kusog ug dili makitang mga pwersa nga padulong kanato, apan makasalig kita sa atong inadlaw nga panaw kon kita maka “paminaw Kaniya.” Si Elder Boyd K. Packer kanunayng madunggan nga moingon, “Kon ang tanan nimong nahibaloan mao lang ang unsay makit-an sa natural nimong mga mata ug madungog sa natural nimong mga dunggan, nan dili kaayo daghan ang imong mahibaloan.”
Ang talagsaong kamatuoran sa Unang Panan-awon mao kining reyalidad: Kon magsalig ka lang sa kaugalingon nimong panan-awon ug kahibalo, limitado kaayo ang imong pagsabut sa mas dakong panghitabo sa imong palibut, ug mameligro ang imong kalag. Sa bag-ohay nga kinatibuk-ang komperensiya, si Presidente Nelson miingon pag-usab:
“Wala gayud sukad nga mas importante nga makahibalo kon sa unsang paagi ang Espiritu nga mamulong kaninyo kay sa karon. Sa Dios nga Kapangulohan, ang Espiritu Santo mao ang mensahero. Siya modala sa mga hunahuna diha sa inyong alimpatakan nga gusto sa Amahan ug sa Anak nga inyong madawat. Siya mao ang Maghuhupay. Siya mohatag og usa ka pagbati sa kalinaw sa inyong kasingkasing. Siya mopamatuod sa kamatuoran ug mokumpirma unsa ang tinuod samtang kamo maminaw ug mobasa sa pulong sa Ginoo.
“Ako mousab sa akong hangyo alang ninyo nga inyong buhaton bisan unsa ang makapadugang sa inyong espirituhanong kapasidad sa pagdawat og personal nga pagpadayag.”2
Dugay na, pinaagi sa espiritwal nga giya pinaagi sa personal nga mga panglimbasug ug mga tubag sa pag-ampo, nakamatikod ko niining lawom nga reyalidad ug kamatuoran: Sa pagtabang kanato nga atong makita ug makaandam sa bisan unsang nagtuyok nga panahon o mga nga unos, ang Dios mihatag nato sa saad ug gasa sa Espiritu Santo ug personal nga pagpadayag. Gasa kining dili mapalit sa inadlaw natong kinabuhi, nga “mopakita nganha [kanato] sa tanan nga mga butang nga kinahanglan [natong] buhaton.”3
Sa akong pagdako, abi nako og ang pagpadayag para lang sa mga lider sa Simbahan o mga propeta, mga apostoles, mga bishop, ug mas gulang nga mga tawo, apan dili para nako isip usa ka batan-on. Karon lahi ang akong nahibaloan, ug mopamatuod ko karong gabhiona nga ang personal nga pagpadayag usa ka panalangin nga ato gayung tinguhaon. Kon ang atong mga kasingkasing ug mga hunahuna mapaubsanon, matudloan, ug abli uban sa pagtuo kang Jesukristo, matudloan kita og mga kamatuoran ug giyahan sa Espiritu Santo. Ang pipila kaninyo tingali mobati nga kamo dili takus sa makagiya nga tingog sa Dios. Kamo tingali mobati sama ni Laman ug ni Lemuel, nga ang Dios dili “mopahibalo” sa iyang tingog nganha kaninyo. Ayaw og tuo niana. Ang Iyang Espiritu magamit alang sa tanan. Si Elder D. Todd Christofferson bag-o lang miingon, “Wala kinahanglana … og lebel sa kapasidad o kamaayo sa dili pa motabang ang Dios—ang balaang tabang [nyong] masinati bisan kanus-a.”4 Ang Dios motagbo kaninyo kon asa man kamo, nga walay mga kondisyon. Si Jesus miingon, “Pangayo, ug kamo makadawat.”5 Dayag lang, nga ang langit mas magpaduol ug mas bukas samtang kamo mapainubsanon ug makugihon sa pagtinguha sa pagsabut ug sa pagtuman sa Iyang mga sugo.
Ang inyong kinabuhi ug mga kinabuhi sa uban mapanalanginan samtang kamo maisugon nga molihok sa bisan unsa ug sa tanang mga pag-aghat nga nahatag nganha kaninyo pinaagi sa Espiritu. Tuguti ko nga mopaambit og usa ka kasinatian nga nagtudlo kanako niining kamatuoran mga tuig na ang milabay? Dugay na nga katuigan, sa dihang ang among kinamagulangn nga anak nga babaye usa ka estudyante sa University of Utah, malinawon kong nakamata sa tungang gabii ug nakadawat og dinalian, kalma nga impresyon mahitungod kaniya. Nahigmata na kaayo ko apan wala ko mobati og bisan unsang kahadlok—gugma lamang alang kaniya—apan mibati nga tingali anaa siya sa peligro. Nagpuyo mi sa Connecticut, ug klaro nga siya naa tabok sa nasud, sa Utah. Dayon kining hunahuna misantop kanako: “Tawaga ang pulis. Hangyoa sila kon makapadala ba sila og pulis nga mosusi sa dapit sa palibut sa iyang gipuy-an.” Nagpanuko ko og kadiyot, misulay sa pagsabut sa unsay akong nadunggan, ug nadungog na usab ang tingog: “Tawaga ang pulis.” Busa gibuhat lang gyud nako kana. Mitawag ko sa pulis. Dili gyud nako eksaktong mapasabut ngadto sa officer kon ngano nga naghangyo ko niini sa tungang gabii, apan miingon ko niya magpasalamat ko kon magpadala siya og sakyanan sa pulis aron sa pagsusi sa dapit libut sa balay sa akong anak nga babaye. Misiguro siya nga iyang buhaton, ug kalma kong natulog og balik. Ningmata ko pagkaugma nga dili na kaayo kahinumdom sa nahitabo nianang gabhiona.
Pipila ka adlawng milabay, samtang mibiyahe ngadto sa Utah ug samtang nagdrayb padulong sa among hotel, nakadungog mi sa radyo nga ang pulis nakadakop og tawo nga may kalabutan sa mga pag-atake nga nahitabo libut sa mga balay duol sa kampus sa University of Utah. Ang report nag-ingon nga usa ka batan-ong babaye ang looy kaayong gipatay usa ka gabii nianang semanaha. Mikulba ang akong kasingkasing, ug diha dayon nahinumdom sa akong tungang gabii nga pagtawag og pulis sa milabay nga pipila ka adlaw. Wala koy ideya kon tumong ba gyud to niadtong gabhiona. Ug wala koy ideya kon ang iyang sorority mao ang usa sa gitumbok nga mga balay. Wala gayud ko nasayud sa eksakto unsay nahitabo nianang gabhiuna, apan nasayud ko nga usa ka hilom nga pag-aghat nakapukaw nako sa tungang gabii ug mipugos nako sa pagtawag og tabang aron masiguro ang siguridad sa akong anak sa klaro kaayong nga dili luwas nga sitwasyon.
Ang mga unos sa kinabuhi tingali ingon og makabuntog usahay, apan walay mas gamhanan pa nga pwersa kay sa gahum sa pagkapari ug sa gasa sa Espiritu Santo sa inyong kinabuhi karon. Sa gabii sa Iyang Pag-ula, ang Manluluwas mitudlo nga ang dili mapalit nga gasa sa Amahan sa Espiritu Santo gihatag aron modala og kalinaw ug kahupayan sa inyong kalag, sa “pagtudlo … sa tanang butang” ug “magapahinumdom kaninyo sa tanan,”6 nga “magatultol kaninyo sa tanang kamatuoran” ug “mga butang nga umalabut iyang igatug-an kaninyo.”7 Gihatagan kita sa Espiritu Santo nga “mopuno sa [atong kalag] uban sa hingpit kalipay.”8
Kini nga mga panalangin nakapahimo nako nga magmapainubsanon ug mobuntog kanako usahay. Dili ba ikatingala nga si Presidente Nelson nagdapit nato sa paghimo sa tanan aron makadawat og personal nga pagpadayag ug madungog ang tingog sa Dios pinaagi sa Espiritu Santo sa atong kinabuhi? Nabantayan ba ninyo ang tema sa personal nga pagpadayag ug ang tambag sa pag-ila sa gasa sa Espiritu sa inyong kinabuhi nga mitumaw gikan sa katapusang tulo ka tuig sa komperensya? Nakabantay ko ug mapasalamaton kaayo ko sa ilang tambag sa pagpalig-on sa atong mga pagpamatuod ug kinabuhi uban sa atong personal, mapuslanon, ug indibidwal nga mga gasa sa kahayag ug sa espiritu.
Sa mga adlaw ug katuigang moabut, makabaton kamo og mga kasinatian nga magpakita og lain-laing mga paagi nga ang Espiritu molihok ug moistorya sa inyong kinabuhi. Ayaw ibaliwala kini nga mga impresyon. Tingali hinay kini nga hagawhaw o malumo nga pag-aghat. Tingali usa kini ka pagbati o hunahuna o gani direkta ug klaro nga instruksyon. Tingali binalik kini nga impresyon o ngalan sa tawo. Ang Espiritu Santo siguradong magdala og gamhanang kahibalo ug panabut nga modan-ag sa atong mga hunahuna. Personal akong nakasinati og daghan niini nga mga pagpakita ug nakakat-on nga kon ang ngalan sa usa ka tawo o dagway magsige og santop sa hunahuna, kinahanglan nga manawag ko nila sa telepono. Nakakat-on ko sa pagsunod sa mga hunahuna ug mga pag-aghat bisan og walay piho nga pagpasabut o sangputanan nga akong makita. Ang Espiritu mipasidaan kanako sa dili pag-adto og pihong mga dapit ug mopalayo sa pihong mga tawo ug piho nga mga kalihokan. Kini nga kasinatian sa pagbaton sa Espiritu nga mohunghong nganha kaninyo ug makig-istorya kaninyo mao ang usa ka tibuok kinabuhi nga kasinatian. Dili lang kana kausa mahitabo. Magkinahanglan kini sa daghang higayon aron kamo makat-on sa pag-sabut unsa ang inyong nadunggan ug sa unsang paagi kamo gigiyahan.
Nganong mipili man ko sa pagpamulong diha kaninyo mahitungod niini? Sama nga kita dili hingpit nga makakita o makadungog sa tanang matang sa grabe nga panahon diha sa kapunaw-punawan ug dili kanunay nga makabantay sa mga kahimtang sa atong palibut, kon mogamit lang kita sa atong natural nga mga mata ug mga dalunggan aron makasabut sa mga kahimtang, dili kita maandam sa mga pwersa sa kinabuhi ug sa mga unos sa atong palibut. Nadasig ako nga ang bugtong tinuod nga pinulongan nga angay natong madunggan, mahibaloan, ug masabtan mao ang pinulongan sa Espiritu. Hinaut inyong maperpekto kana nga pinulongan sa inyong kinabuhi. Kon buhaton ninyo kini, magiyahan kamo, maprotektahan, ug mabayaw sa tanang paagi.
Minahal kong mga higala, minahal kong mga kaigsoonan, dili ako eskolar. Dili ako batid sa mga kasulatan. Apan usa ako ka tumutuo. Nasayud ko nga kini mao ang tinuod ug buhi nga Simbahan ni Jesukristo, nga ang pagpadayag tinuod, ug nga ang langit abli alang kaninyo. Nasayud ko nga si Jesukristo akong Manluluwas. Siya inyong Manluluwas, ug nagtinguha Siya sa pagpanalangin kaninyo, pagpanalipud, pagpangaliya, paggiya, ug pagbayaw kaninyo. Kon walay makasabut kaninyo, Siya anaa. Siya makasabut. Ako mahigugmaong moawhag ninyo sa pag-atubang paingon sa Manluluwas matag adlaw—dili motalikod. Atubanga Siya uban sa pagtuo niana nga mga kamatuoran nga nasayran ninyong tinuod. Ayaw itugot nga ang inyong pagduha-duha, kahadlok, o kadtong mga butang nga nakapabalaka kaninyo mopalayo ninyo sa proteksyon ug gahum sa Espiritu Santo ug sa mga saad sa atong Manluluwas, si Jesukristo. Matag usa kaninyo tinuod nga gihigugma sa atong Langitnong Amahan ug sa atong Manluluwas.
Ako nag-ampo nga ang Dios motubag sa inyong mga pag-ampo sa paagi nga wala pa sukad ug moganti kaninyo sa matag gasa sa Espiritu Santo nga inyong gikinahanglan aron magpadayon sa kinabuhi ug mosulti niini inubanan sa talagsaong gugma alang sa matag usa kaninyo. Adunay mga malisud nga mga panahon sa unahan. Apan mosaad ako ninyo nga adunay daghan nga mas maanindot, malipayon, malinawon nga mga adlaw inubanan sa maayong panahon ug mahiniton nga hoyohoy kon kamo mobalik ngadto Kaniya kinsa aduna sa tanang gahum sa langit ug sa yuta.
Ako mosulti niini inubanan sa gugma, sa sagrado nga ngalan sa atong Manluluwas nga si Jesukristo, Amen.