2:3

Pagpili og Matarung nga mga Tinguha

Tibuok Kalibutan nga Debosyonal alang sa mga Young Adult

Elder Robert C. Gay

Kapangulohan sa Seventy

Dominggo, Mayo 3, 2020

Akong minahal nga kaigsoonan, una gusto nakong pasalamatan ang akong talagsaon nga asawa alang niana nga talagsaon nga tambag. Lynette, salamat.

Kini dako kaayo nga panalangin og oportunidad nga ikauban kamo karong gabhiona. Kita tinuod gayud nga nagpuyo sa dili ordinaryong panahon, ug mituo gayud ko nga gipadako kamo alang niini nga panahon. Dili pa dugay, si Presidente M. Russell Ballard miingon, “nagtuo ko nga kini ang labing halangdon nga henerasyon sa mga young adult sa kasaysayan sa Simbahan. Tinuoray kong mibati nga tinuod kana.”¹ Kamo usa ka espesyal nga henerasyon nga gipatubo aron mosuhid sa samok nga mga panahon ug aron motabang og andam sa kalibutan alang sa ikaduhang pag-anhi ni Jesukristo. Siya nakaila gayud kaninyo ug nahigugma kaninyo.

Atong Panahon

Karong gabhiona, samtang kami mianhi niini nga sibya, kami giingnan nga kami nakadawat og napulo ug napulo ka liboan ka tweet sa mga pangutana mahitungod sa Espiritu ug mahitungod sa personal nga pagpadayag. Ako nanghinaut nga karong gabhiona samtang kamo maminaw sa akong asawa ug kanako nga kami makatubag niadto nga mga pangutana. Ako nag-ampo nga ang Espiritu Santo, kinsa mao ang magtutudlo, makatubag ngadto sa usa ug usab ngadto sa kadaghanan.

Sa atong bag-ohay lang nga mga adlaw ug mga bulan isip usa ka komunidad sa kalibutan, kita nakasinati og dili kasagaran nga pag-antus, walay kasiguroan, kagubot, ug mga hagit. Mao kini ang kapanahunan nga dugay nang gitagna, ug motapos kini sa mahimayaong Ikaduha nga Pag-anhi sa atong Manluluwas. Si Jesus Mismo nanagna niini nga mga panahon. Siya miingon, “Kamo usab makadungog og mga gubat, ug mga hungihong sa mga gubat; tan-awa nga kamo dili masamok, kay ang tanan nga Ako misulti kaninyo mahinabo gayud. … Ako mamulong tungod sa akong mga pinili; kay ang nasud moalsa batok sa nasud … ; adunay mga gutom, ug mga sakit, ug mga linog, sa nagkalain-lain nga mga dapit. … Ang gugma sa mga tawo mag-anam kabugnaw. … [A]ng tanan matuman.”² Gusto kong mopaambit og usa lamang ka panglantaw bahin niining tanan. Kini usa ka leksyon gikan sa atong kasaysayan sa Simbahan.

Si Amanda Barnes Smith, iyang bana, si Warren, ug ang ilang lima ka anak mga bag-ong kinabig sa Simbahan sa dihang mibiyahe sila padulong sa Missouri. Miuban sila sa mga Santos sa Haun’s Mill pila lang ka adlaw sa wala pa miabut ang mga manggugubot ug mipatay og daghan didto. Ang bana ni Amanda ug ang 10 anyos nga anak nga lalaki apil sa mga napatay. Lain usab sa iyang gagmayng mga anak nga lalaki ang naangol. Si Amanda nakadawat og gamhanang pagpadayag kon unsaon sa pagluwas ang iyang samaran nga anak. Atol nianang grabe nga kalisud, misulat siya sa mosunod:

“Sa hingpit namong kagul-anan, unsay mahimo namong mga babaye gawas sa pag-ampo? Ang pag-ampo lamang ang among tinubdan sa kahupayan; ang atong Langitnong Amahan lamang ang among katabang. Siya lang ang makaluwas ug makahaw-as kanamo.

“Usa ka adlaw usa ka manggugubot miabut dala ang mando sa kapitan. [Namalikas, naningka]: ‘Miingon ang kapitan nga kon kamong mga babaye dili mohunong sa inyong … pag-ampo mopadala siya og mga sundalo ug patyon … mong tanan!’

“Ug iya na lang unta kadtong gihimo, aron pahunungon kaming makalolooy nga kababayen-an sa pag-ampo niana nga oras sa among dako nga kasubo.

“Ang among mga pag-ampo gipahilum sa kalisang. Wala mi mangahas nga ipadungog ang among mga tingog ngadto sa Ginoo. Mahimo kong mag-ampo sa akong pagkatulog o sa hilum, apan dili ko makalahutay niini nga kahimtang. Ang kawalay dios nga kahilum mas dili maagwanta kay sa kadtong gabii nga nahitabo ang pagmasaker.

“Dili na ko makaantus niini. Nangandoy kong makadungog pag-usab sa akong tingog nga nangamuyo sa akong Langitnong Amahan.

“Sekreto kong miikyas ngadto sa usa ka kamaisan ug mikamang ngadto sa usa ka [binugkos nga dagami] sa mais. Sama kadto sa templo sa Ginoo alang kanako niadtong higayuna. Nag-ampo ko og kusog ug labing mainiton.

“Dihang migawas ko sa kamaisan usa ka tingog ang namulong kanako. Kadto tingog nga labing yano nga akong nadungog sukad. Dili kadto hilum, kusog nga impresyon sa espiritu, apan tingog, nga misubli sa bersikulo sa [atong] himno:

Kalag nga diha kang Jesus misalig,
Dili ako sa kaaway pakabig;
Kalag nga sa impyerno gitinguha,
Ako dili, dili gayud, mobiya!3

“Sukad nianang higayuna wala na akoy kahadlok. Gibati nakong walay makapasakit kanako.”⁴

Kini nga mga panahon makapabalaka, apan hibaloi nga unsay tinuod alang ni Amanda Barnes Smith tinuod usab kaninyo. Bisan unsay panghitabo sa inyong palibut, bisan unsay sagubangon ninyong pagsulay, ang Dios ang nagtimon. Dili Niya kamo biyaan, ug dili mo angayang mahadlok kon kamo matinud-anon ug motawag Kaniya. Kini mao gayud ang butang nga gusto nakong isulti kaninyo karon.

Ang Antipara sa Akong Asawa

Sama sa akong giingon, ako mapasalamaton nga kuyog nako ang akong asawa karong gabhiona. Siya ang labing importante nga bahin sa akong kinabuhi. Nagkaila mi mga tuig ang milabay sa high school. Human sa among paggradwar sa high school, miadto siya sa Ricks College sa Rexburg, Idaho, ug ako miadto sa BYU sa Provo, Utah. Sa unang tuig namo sa kolehiyo mihukom ko nga moadto sa Rexburg sa pagbisita kaniya. Didto gitudloan ko niya og bililhon nga leksyon.

Wala siyay sakyanan ug dugay na siyang wala makadrayb. Sa pagbiya namo sa iyang apartment, mihangyo siya kon pwede bang siya ang modrayb sa akong sakyanan. Miingon ko, “Sige ba.” Wala madugay misugod mi sa palugsong sa bungtod duol sa iyang gipuy-an. Tunga-tunga sa paglugsong sa bungtod nangutana siya kanako, “Duna bay stop sign sa tumoy sa karsada?” Ang stop sign klaro kaayo, ug miingon dayon ko, “Oo, dunay stop sign.” Miingon siya, “OK, mao usab akong gihunahuna. Dili lang ko kakita niini.” Nangutana ko, “Nganong dili nimo kini makita?” Miingon siya, “Kay wala ko mag-antipara, ug dili kaayo ko makaklaro kon wala koy antipara.” Ako dayon murag miingon “Ug nganong wala man ka mag-antipara?” “Kay dili ko ganahan sa akong dagway kon naa kini, apan nalimot ko nga dili ko kakita sa tanan kon wala kini.” Miingon ko, “Nan, mas maayo kon ako ang imong padraybon.” Yano ra ang leksyon: gawas kon kamo makakita og klaro, kamo kanunayng anaa sa peligro.

Karon mangutana ko ninyo, “Giunsa man ninyo pagdala ang inyong kinabuhi?” Gigamit ba ninyo sa inyong kinabuhi ang panglantaw nga gikinahanglan aron klarong makita ang reyalidad sa kinabuhi? Sa karaang siyudad sa Laodicea ang mga Santos walay mga sala nga maklaro o makita kaayo, apan gibadlong sila sa Ginoo kay sila dagaang sa ilang pagkadisipulo. Mapasigarbuhon sa ilang kalibutanong mga nakab-ot ug kabatid, misalig na lang sila sa ilang kaugalingon ug dili sa Dios. Bisan og ang siyudad nailhan sa pagkahanas sa pag-atiman sa mata, ang Ginoo miingon kanila, “[tambali ang] ug tambal nga ikapadapat sa imong mga mata aron ikaw makakita.”⁵ Daw ang importanting pangutana alang sa matag usa kanato mao kini: “Gitan-aw ba nako ang akong kinabuhi pinaagi sa mga panglantaw sa kamatuoran sa Dios, mga sugo, ug mga pakigsaad, o pinaagi sa akong kaugalingong mga mata? Kanunay ba kong nagpatalinghug sa Iyang tingog nga nadawat pinaagi sa pag-ampo ug sa personal nga pagpadayag sa Espiritu o nagpatalinghug sa kaugalingong hunahuna o sa tingog sa mga maalamon sa kalibutan kinsa nagsinggit nga ang pamaagi sa Dios ug gani ang Iyang mga propeta wala sa saktong lugar, puol, wala kinahanglana, dili mapinanggaon, o gani, sa pulong sa kalibutan, malinglahon ug mapungtanon?”

Si Joseph Smith miingon kaniadto, “Ang Yawa maningkamot gayud og maayo sa pagbitik sa mga Santos. … Iyang mapausab ang mga butang nga makapahimo sa tawo nga mahingangha niadtong kinsa nagbuhat sa kabubut-on sa Dios.” Kon wala ang tabang sa Dios ug pagpadayag dili gayud ninyo makita ang “mga butang ingon nga sila gayud mao, ug … nga sila gayud mahimo unya.”⁶ Tuyo sa kaaway nga mahibulong kamo sa mga tawong nagbuhat sa kabubut-on sa Dios. Tuyo niya nga dili ninyo makita ug masabtan ang reyalidad, nga dili ninyo makita nga kamo pinangga gayud nga anak sa Dios. Iyang tinguha ang pagpalehitimo sa kalibutan; nga kamo mosalikway o moduol Dios nga walay tinuod nga tinguha; ug, ilabi na, sa paghulagway sa inyong kaugalingon ug sa panaw sa inyong kinabuhi sa politikal, kultural, o ubang kalibutanong tinguha, o sa simpling dili magpakabana.

Kanunay kong mangutana niini sa akong kaugalingon: “Unsay nakahimo kang Nephi nga usa ka tumutuo ug dili sa usa ka Laman o Lemuel?” Silang tulo ka managsoon nga lalaki natawo sa parehong buotan nga mga ginikanan. Usa ka gabii nakadungog kong gitubag ang akong pangutana. Didto ko sa Bangkok, Thailand, sa usa ka assignment uban ni Presidente M. Russell Ballard, diin gipaambit niya kini nga kasulatan:

“Ug nahinabo nga ako, si Nephi, … adunay dako nga tinguha nga mahibalo sa mga misteryo sa Dios, busa, ako nangamuyo ngadto sa Ginoo; ug tan-awa siya miduaw kanako, ug nalumoy ang akong kasingkasing nga ako mituo sa tanan nga mga pulong nga gilitok sa akong amahan; busa, wala ako mosukol batok kaniya sama sa akong igsoon nga mga lalaki.”⁷

Mao kadto ang akong tubag. Mopakita Mismo ang Dios kanato sumala sa atong mga tinguha. Si Nephi nagtinguha, labaw sa tanan, nga masayud sa mga kamatuoran ug mga misteryo sa Dios ug gipanalanginan sa presensya sa Dios, kalipay, gahum, ug kamatuoran. Si Laman ug Lemuel nagtinguha sa mga pangbitik sa kalibutan ug nakadawat sa ganti niini. Kon gusto ninyo makauban ang Dios, nan kinahanglan ninyo ihiusa ang inyong mga tinguha ngadto sa Iyang kabubut-on.

Asa, ug sa unsa, ninyo ibutang ang mga tinguha sa inyong kasingkasing maoy motino kon sa unsang paagi kamo mahatagan og gahum nga makapadayon ug magmadaugon sa kinabuhi. Busa, karong gabhiona dapiton ko kamo sa pagpili sa pagtukod sa inyong kinabuhi pinaagi niining nagsuporta nga tinguha nga mahimong makabig ug sa paglig-on sa uban. Mahinumduman ninyo nga kini mao ang gihangyo sa Manluluwas sa Iyang pangulo nga Apostol, si Pedro, sa dihang miingon Siya, “Simon, Simon, … Gipangayo kamo ni Satanas, sa pagbaton kaninyo aron iya kamong alig-igon ingon sa trigo: Apan nangamuyo ako alang kanimo nga unta dili makabsan ang imong pagsalig; ug sa mahibalik na ikaw kanako, lig-ona ang imong mga igsoon.”⁸

Ang Tinguha nga Makabig ug Molig-on sa Uban

Dili ko makalimot dihang ang akong asawa ug ako giinterbyu sa usa ka senior nga sakop sa Korum sa Napulog Duha ka mga Apostoles mahitungod sa akong kaandam nga moserbisyo isip usa ka presidente sa misyon. Ang akong asawa ug ako adunay daghang mga kalihokan sa among kinabuhi. Sa panahon sa among interbyu apil kami sa mahagiton kaayong mga relasyon sa pamilya, apil kami sa dakong makatawhanon [humanitarian] nga mga paningkamot sa tibuok kalibutan nga nagkinahanglan sa among dakong atensyon ug kapanguhaan, ug usa ako ka senior managing partner sa usa ka tibuok kalibutan nga investment nga negosyo, wala pay labut sa mga katungdanan sa Simbahan nga among gipaningkamutan. Nagtuo ko nga nahimo na namo ang tanan nga posible namong mahimo. Samtang naglingkod mi didto niadtong adlawa uban niining minahal nga Apostol ug namalandong sa among mga kalihokan sa kinabuhi, kaming duha matinahuron nga miingon nga tingali dili pa kini ang labing maayong panahon nga kami moserbisyo og misyon. Sa walay pagpanuko, kini nga sakop sa Napulog Duha miatubang sa akong asawa ug miingon, “Lynette, mahimo ikaw nga talagsaong misyonaryo ug kompanyon sa imong bana.” Dayon miatubang siya nako ug miingon, “Kahibalo ka, wala pa gayud ka makasabut. Ang Ginoo nagtawag kanimo aron sa pagluwas sa imong kinabuhi. Mahimo kang magpuyo sa imong kinabuhi pinaagi sa pakigsaad o pinaagi sa kaharuhay. Wala gayuy haruhay nga panahon sa pagserbisyo. Kini usa ka butang sa hugot nga pagtuo. Mahimo kang motuo nga ang Ginoo mopanalangin sa imong kinabuhi uban sa mga panalangin nga imong gikinahanglan samtang buhaton nimo ang Iyang mga prayoridad o dili.”

Hilum kong naglingkod didto, nakalitan. Bag-o lang kong giingnan nga ang Ginoo naningkamot sa pagluwas sa akong kinabuhi. Maayo ang akong kinabuhi niadto, apan ako wala gayud sa balanse. Nianang hapona dihang si Lynette ug ako mibiya sa opisina sa Apostol, namauli mi aron mainampuong ikonsiderar kon unsaon namo pagpuyo ang among kinabuhi. Kami dayon mihimo sa pagpili nga moserbisyo ug magpuyo sa among kinabuhi pinaagi sa pakigsaad, mohimo sa bisan unsang butang nga hangyoon sa Ginoo kanamo. Ang gipakigsaad nga kinabuhi usa ka mas balanse nga kinabuhi, nga gipakabuhi sumala sa mga prayoridad sa Dios, dili among mga motibo. Lahi na ang among kinabuhi sukad niadto. Hingpit kaming napanalanginan sa Iyang gugma ug sa Iyang pagtudlo. Kon may nahibaloan ako, nahibalo ko nga kini nga samang panalangin inyong maangkon kon matinud-anon kamong magpabilin sa Iyang dalan sa pakigsaad. Ang Dios gustong moluwas sa inyong kinabuhi.

Unsa ang buot pasabut nga mahimong makabig, nga magpuyo pinaagi sa pakigsaad ug dili sa kaharuhay? Si Jesus miingon, “Paghunahuna ngari kanako sa matag hunahuna.”⁹ Sama sa gisulti sa usa ka maalamon nga magtutudlo kanako, “Wala siya moingon, ‘Hunahunaa ko panagsa, ug ang akong Espiritu magauban kaninyo.’ Miingon Siya, ‘Kon kamo kanunay mahinumdom kanako, kamo makaangkon sa akong Espiritu uban kaninyo.’”¹⁰ Nagpasabut kini nga kon kamo mohinumdom Kaniya, kamo kanunay makabaton sa gahum sa langit nga mag-uban kaninyo nga motabang matag adlaw sa bisan unsa ug sa matag gagmay o lisud nga hagit nga inyong giatubang—bisan unsa pa ang impluwensya niini diha kaninyo. Naglakip kini sa bisan unsang kahadlok, pagkaadik, walay kasiguroan, o bisan unsa nga hagit nga lisud sagubangon. Busa pamalandungi karon kon unsa ang labing importante nga butang nga inyong kinahanglan buhaton aron hingpit Siyang mahinumduman, ug lihoka kini.

Ang akong labing suod nga higala sa pagkabata mipaila-ila kanako sa akong asawa. Pagka-high school, ako siyang gibunyagan nga miyembro sa Simbahan, apan kanunay siyang naglisud sa hingpit nga pagpasalig sa pagsunod sa ebanghelyo—kanunayng ipangatarungan niya ang iyang kaugalingon pinaagi sa pagsulti nga wala siyay gihimong dautan kaayo, diin wala gayud. Dayon usa ka gabii sa usa ka party, nakainom siya og daghan ug aksidenting natagak sa usa ka bung-aw ug namatay. Siya sama og edad sa kadaghanan kaninyo. Kini nga trahedya dili unta mahitabo ug wala unta mahitabo kon ang pakigsaad pa unta ang naggiya sa kinabuhi sa akong higala, dili ang kaharuhay.

Asa ninyo gibutang ang mga utlanan sa inyong kinabuhi kalabut sa mga sugo sa Dios? Tingali ang uban kaninyo nagtan-aw sa kinabuhi sama sa paghunahuna sa kadaghanan sa atoa mahitungod sa pagtuman sa mga speed limit sa highway. Duna bay naghunahunang mopadagan sa aktwal nga speed limit? Wala. Hinoon, gusto kitang masayud kon pila ka kilometro lapas sa gitakda nga limit ang atong daganon nga dili makakuha og tiket. Kana mao ang paagi nga ang akong labing suod nga higala nagpuyo sa iyang kinabuhi. Sa ebanghelyo, dili gayud kita maghunahuna kon unsa kadaghan sa kalibutan ang mahimo natong dawaton nga dili molapas sa linya tali sa pagkamasulundon ug pagkamasinupakon. Kita simple lang nga mosalikway sa kalibutan.

Gawas kon inyong dawaton sa inyong kaugalingon ang mga pakigsaad sa Dios nga kamo makabaton og mga mata nga motugot kaninyo nga makakita og klaro lapus sa mga makabalda niini nga kalibutan. Ang Biblia nagtudlo, “Kay ang paghigugma alang sa Dios mao kini, nga pagabantayan ta ang iyang mga sugo.”¹¹ Kadtong nagpuyo pinaagi sa pakigsaad wala nagpuyo og hingpit nga mga kinabuhi, apan sila nagpalambo sa ilang kinabuhi pinaagi sa kada adlaw nga paghinulsol. Kana nga pagpalambo nag-abli kanila ngadto sa labing buhong nga mga panalangin sa Dios ug sa tinuod nga mga gahum sa langit. Duna ba kaninyo nga naminaw karong gabhiona, niining samok nga mga panahon, kinsa wala magkinahanglan sa giya ug gahum sa Dios?

Mga tuig ang milabay, ang akong kasosyo sa negosyo nga nasakit misulti nako nga si Presidente Boyd K. Packer mihapit sa iyang balay sa paghatag niya og panalangin. Miingon siya, “Dihang gihatod nako siya sa iyang sakyanan, si Presidente Packer miingon, Ayaw dayon og balik gikan sa Getsemani. Pagkat-on og mga leksyon didto.’” Nangutana ang akong higala, “Unsa kahay iyang ipasabut?” Sa wala pa ko katubag, yano siyang midugang, “Tingali kinahanglan lamang kitang mohimo sa kabubut-on sa Dios, ug kana lang ang gusto nakong buhaton.”

Dihang gisulti kini sa akong kasosyo, nasayud ko nga husto siya. Ang katapusang pagsulay sa atong kinabuhi mao ang kon motugyan ba kita sa kabubut-on sa Dios o molihok sumala sa atong kaugalingon. Si Elder Neal A. Maxwell dugay na nga mitudlo, “Ang pagtugyan sa kabubut-on mao lang ang personal nga butang nga mahalad nato sa altar sa Dios.”¹²

Apan unsay ipasabut sa pagkaandam nga mobuhat sa kabubut-on sa Dios? Gikan sa kasinatian sa atong Manluluwas sa Tanaman sa Getsemani, nagtuo ko nga kita, sa usa ka bahin, angay nga makasabut nga ang pagtugyan ngadto sa kabubut-on sa Dios nagpasabut nga ikaw ug ako kinahanglan andam nga moantus ug molahutay sa katapusan sa bisan unsay hangyoon sa Dios kanato, bisan kon ang gihangyo nga lahutayon nato dili resulta sa atong nabuhat nga sayop. Naglakip kini sa pisikal nga mga kakulangan o mga tinguha, sayop nga mga pasangil, mga paghukom, o mga panginsulto gikan sa mga higala, lider, o gani sa mga sakop pamilya.

Sa Tanaman sa Getsemani, gihangyo sa Langitnong Amahan ang atong Manluluwas sa pag-inom sa pait nga kopa sa mga sala ug kasakit nga dili Iyaha. Niana nga proseso si Jesus “[mi]bati sa kakulba” sa unsay naghulat Kaniya. Siya mibati “sa kasubo nga ikamatay” ug nag-ampo nga “kon mahimo” “ilikay unta gikan kaniya ang maong takna sa kasakit” nag-ingon sa Amahan, “Ang tanang butang mahimo mo; kuhaa kanako kining kopa.” Apan dayon midugang Siya niini, “Apan dili sumala sa akong pagbuot, kondili sa imo.”¹³ Sa atong panahon, sa usa ka pagpadayag nga gihatag ngadto kang Joseph Smith, miingon ang Manluluwas, “buot nga Ako unta dili moinom sa mapait nga kopa, ug mobiya—Bisan pa niana, himaya ngadto sa Amahan, ug Ako nakaambit ug nakahuman sa akong mga pagpangandam alang sa mga katawhan.”¹⁴

Ang pag-ambit ug paghuman sa mga pagpangandam nga gihimo sa Amahan para nato, bisan unsa kapait, usa ka bahin sa plano sa Amahan para sa atong mahangturong kalipay. Naghunahuna o nagtuo ba kamo nga ang Langitnong Amahan mosagang kaninyo gikan sa mga higayon sa kasakit ug pag-antus nga gikinahanglan aron matabangan kamong mas mahisama Kaniya? Si Presidente John Taylor miingon nga si Propeta Joseph Smith misulti kaniya, “‘Kamo adunay daghan nga nagkalain-laing pagsulay nga labangunon. … Ang Dios mosulay kaninyo, ug Siya mo-kontrolar kaninyo ug sutaon ang kinahiladman sa inyong kasingkasing.” Ang pagkadisipulo ni Kristo nagpasabut nga kita “manunuton, maaghup, mapainubsanon, mapailubon, puno sa gugma, mauyunon sa pagdawat sa tanan nga mga butang diin ang Ginoo makakita nga angay ipahamtang [kanato].”¹⁵

Ang atong gimahal nga propeta, si Presidente Russell M. Nelson, bag-o lang miingon, “Lisud nga mga adlaw ang moabut. Panagsa ra unya sa umaabut nga mahimong sayon o sikat ang mamahimong Santos sa Ulahing mga Adlaw. Matag usa kanato pagasulayan. … Kadtong matinguhaon nga nagsunod sa Ginoo ‘“pagalutuson.’¹⁶ Kana nga paglutos mahimong mobitad kaninyo ngadto sa pagkahuyang o modasig kaninyo nga mas sulundon ug maisugon sa inyong inadlaw-adlaw nga kinabuhi. Unsaon ninyo pag-atubang ang mga pagsulay sa kinabuhi mao ang usa ka bahin sa pagpalambo sa inyong pagtuo.”¹⁷

Si Apostol Pablo nangutana niini: “Kinsa ba ang makapahimulag kanato gikan sa gugma ni Kristo? ang pag-antus ba, o ang kasakitan, o ang paglutos, o ang gutom, o ang kahubo, o ang katalagman, o ang espada ba?”¹⁸ Sa sinultihan karon tingali makasulti kita sa ingon niini nga paagi: “Itugot ba nako ang kalisud sa pagpangitag kaminyoan, o ang tinguha sa pakigrelasyon nga wala gitugot sa Ginoo, o usa ka panghitabo gikan sa kasaysayan sa Simbahan, o dili giniyahang buhat sa usa ka lider o magtutudlo, o akong kalibutanon nga mga tinguha, o ang pagkawala sa trabaho, o lisud nga sakit, o grabing kasagmuyo nga maoy mopugong nako sa makugihon nga pagsunod sa Manluluwas ug sa hingpit nga pag-apil sa Iyang Simbahan?”

Ang inyong tanang sala, inyong tanang sakit, kasakit, ug mga kahuyang mga kabahin sa gitawag ni Elder Maxwell nga “lisud sulbaron nga aritmetik” sa Pag-ula [ni Jesukristo],”¹⁹ usa ka aritmetik nga giingon niyang makarkulo lamang isp ang “hilabihan kadako nga i-multiply sa walay katapusan.”²⁰ Ang inyong kahasol o mga hagit gikan sa mga pagsulay sa kinabuhi dili gayud molabaw pa kay sa Iyaha. Busa, ang pangutana sa langit kaninyo mao ang sundon ba ninyo ang mga tunob sa Manluluwas ug mosulti uban Kaniya: “Gani, dili sumala sa akong pagbuot kondili sa imo.”²¹

Ang laing pagkasulti niini tingali ang pagpangutana, “Mosalig ba ko sa Dios ug mosalig usab sa Iyang plano para nako?”

Kon mag-atubang kamo og mga hagit ug mga pagsulay, hibaloi nga ang Dios aduna sa tanang gahum sa pagsuporta kaninyo—bisan og dili mausab ang mga kahimtang sa inyong palibut. Misaad Siya, bisan taliwala sa lisud o sakit nga mga pagsulay nga Siya “mopagaan sa mga alantuson nga gitungtong sa inyong mga abaga, gani kamo dili mobati niini diha sa inyong mga buko-buko, … nga kamo mahimo nga masayud sa pagkatinuod nga Ako, ang Ginoong Dios, moduaw sa akong mga katawhan diha sa ilang kasakit.”²² Ayaw duhaduhai nga ang Ginoo makaabli sa matag masangputon nga pultahan; mosiguro kaninyo pag-usab kon may mga pagduda sa pagtuo; ug motabang kaninyo nga makaangkon og panarbaho, edukasyon, ug kusog sa pagpakabuhing matarung o sa bisan unsang inyong gikinahanglan aron makab-ot ang inyong kinatas-ang potensyal. Ang Manluluwas misaad nga Siya moandam og paagi.²³ Aduna bay bisan kinsa o bisan unsang butang nga makahatag kaninyo nianang sama nga saad? Salig Kaniya sa pagtudlo ug pagsuporta kaninyo samtang kamo mapainubsanong motugyan ngadto sa Iyang kabubut-on.

Mga tuig ang milabay, si Presidente Henry B. Eyring mihimo niining makaimpluwensya nga oberbasyon: “Kon ang pundasyon sa pagtuo wala makulit sa kasingkasing, ang gahum sa paglahutay mapakyas.”²⁴ Ang pagtuo usa ka baruganan sa paglihok, ug ang pagtuo usa ka pagpili. Ang pagtuo wala sukda kon pila ka miting ang atong gitambungan o mga ritwal nga atong gituman. Ang pagtuo dili gani ang pag-ila nga buhi ang Dios ug si Jesukristo. Ang inyong pagtuo maoy gidak-on sa inyong pagsalig ug hingpit nga pagtugyan sa Dios ug sa inyong Manluluwas, si Jesukristo. Kitang tanan makalahutay o mapakyas sigun sa kadak-on sa atong personal nga pagsalig ug pagtugyan Kanila.

Sa pagpalig-on og pagtuo diha Kanila kinahanglang wad-on ninyo sa inyong kinabuhi ang bisan unsang pagpangatarungan sa kaugalingon nga mga kinaiya. Kamo gayud kinahanglang manag-iya sa inyong kinabuhi ug dili motugot nga diktahan sa uban ang inyong mga buhat ug mga pagpili. Ang inyong mga panglantaw, kinaiya, reaksyon, pagbati, hunahuna, ug mga tinuohan tanan naa sa inyong pagkontrol. Ang pagkasilo ug pagpalayo dili sa Dios. Ang Iyang tingog kanunayng nagdapit kanato nga “sunod Kanako!” Ang Dios andam motubag sa bisan unsang pangutana, mohupay sa bisan unsang panglimbasug, ug motubos sa tanang tawo. Walay sayop o panglimbasug nga dili mahimong maayo pinaagi Kaniya. Ang tanang pagsiksik sa internet niini nga kalibutan sa hapit bilyon ug tunga ka site sa web dili makasulti ninyo kon tinuod ba kini nga Simbahan o kon buhi ba si Kristo, ang Dios lang ang makabutyag niana kaninyo. Ug ang labing importaning butang mao kini: Ang Dios dili mosulti kaninyo og usa ka kamatuoran ug mosulti kanako og lain. Kitang tanang makadawat sa samang mga tubag samtang kita mangutana ug magtinguha Kaniya sa kasinsero, pagtuo, ug tinuorayng katuyoan. Mahimo ninyo kini, sa usa ka bahin, kon tangtangon ninyo ang tanan ninyong mga istorya sa pagpangatarungan sa kaugalingon.

Mga tuig ang milabay, samtang gi-assign sa Africa, nakadungog ko og taho bahin sa usa ka tawo nga may kargang duha ka giraffe sa iyang trak; ang usa ka giraffe mas taas kay sa usa. Samtang nagbiyahe siya sa highway, miagi siya ilawom sa usa ka tulay, apan ang tulay dili kaayo taas para sa mas taas nga giraffe. Sa dihang miagi ang trak ilawom sa tulay, naigo ang ulo sa mas taas nga giraffe sa tulay ug kini diha-diha namatay. Pagkahuman gipangutana ang drayber sa trak kon nganong wala siya nag-amping og mas maayo aron malikayan ang kamatayon sa giraffe. Miingon siya, “Dili kadto akong sayop. Gitukod nila ang tulay nga mubo ra kaayo.”

Ang pangatarungan niining tawhana daw kataw-anan, apan nakasulay ba kamo nga dili resonable usab ang pagpangatarungan sa sayop ninyong mga pagpili? Ayaw pasanginli ang mubo mga tulay alang sa kahimtang sa mga butang. Kondili, tinguhaang makab-ot ang inyong hingpit nga potensyal pinaagi sa pagkahimong angayan sa matag gikinahanglang gahum, panalangin, ug milagro sa langit nga gisaad pinaagi sa pagpalambo sa malahutayong pagtuo o pagsalig diha Kaniya. Ang Ginoo misulti kang Joseph Smith “Unsa ka kasagaran ikaw … nadala diha sa mga pagdani sa mga tawo. … Ikaw wala unta mahadlok sa tawo labaw pa kay sa Dios. Bisan pa og ang mga tawo mipahimutang sa mga tambag sa Dios sa walay kapuslanan, ug mitamay sa iyang mga pulong—Apan ikaw unta nagmatinud-anon; ug siya unta mitunol sa iyang bukton ug mitabang kanimo batok sa tanan nga nagdilaab nga mga pana sa kaaway; ug siya unta nag-uban kanimo sa matag panahon sa kasamok.”²⁵

Karon, ako ganahan mopasabut og dugang gawas sa pagsusi sa kaugalingon ug mobilin kaninyo sa akong pagsaksi nga ang usa ka bahin sa pagtuman sa pakigsaad ug pagtugyan sa kabubut-on sa Dios mao usab ang kaandam sa dili paghunahuna lang sa inyong kaugalingon ug mobuhat sa gisulti sa Ginoo kang Pedro, nga “lig-ona ang imong mga igsoon.” Bag-o lang miingon si Presidente Nelson, “Kita kinahanglang mahimong mga tigpalig-on sa … hugot nga pagtuo kang Ginoong Jesukristo ug hugot nga pagtuo sa Iyang Simbahan. … Kinahanglan kitang motukod sa Simbahan ug gingharian sa Dios dinhi sa yuta.”²⁶ Mipamatuod usab siya nga “walay laing panghitabo dinhi sa kalibutan karon nga mas importante kay [sa pagpundok sa Israel]. Wala nay mas dakong sangputanan. Wala gayud. Kini nga pagpundok kinahanglang importante kaayo kaninyo. Kini mao ang misyon diin gipadala kamo dinhi sa yuta.”²⁷ Sa samang paagi, ang Manluluwas nangutana kang Pedro, “Gihigugma mo ba ako?” ug dayon miingon, “Pakan-a ang akong mga karnero.”²⁸

Sa ebanghelyo ni Juan, atong mabasa diin si Maria ug Marta nagsugo og tawo sa pagkuha sa Manluluwas dihang ang ilang igsoon nga lalaki, si Lazaro, nahimong nasakit og grabe. Ang iyang mga disipulo mihangyo kaniya sa dili pag-adto, kay ang mga Judeo nagtinguha sa iyang kinabuhi, apan miadto gihapon si Jesus sa gilubngan ni Lazaro. Didto ang atong Manluluwas mibakho ug nagbangutan uban sa iyang mga higala. Dayon, sa gahum sa Dios, gimandoan niya si Lazaro sa pagbangon gikan sa patay, nag-ingon: “Lazaro, gula ngari.” Ang mga kasulatan mirekord dayon, “Ug ang namatay migula, ang iyang mga kamot ug mga tiil binugkosan ug mga bendahi. … [Ug] si Jesus miingon kanila, Badbari ninyo siya, ug palakta siya.”²⁹

Minahal kong mga higala, walay mas makahatag og kinabuhi kay sa pagpaambit sa Kahayag ni Kristo ug kahayag sa Iyang ebanghelyo. Walay lain kondili ang ebanghelyo ni Kristo ang makadala og kalinaw ngadto sa mga nasud, makaluwas sa kalibutan gikan sa kakabus, o mobayaw sa uban ngadto sa malungtarong kalipay. Ang mga organisasyon nga naglihok pinaagi sa lahi nga mga baruganan mapakyas. Ang ebanghelyo ra ang makatangtang sa “mga tuo-tuo o mga binuhatan nga nagpugong sa paglambo” niadtong anaa sa inyong palibut. Dapita ang uban ngadto sa Iyang kahayag. Kon inyong buhaton, misaad ang Dios nga kamo magdala og “kaluwasan sa [inyong] kalag,”³⁰ nga ang inyong mga sala mapasaylo,³¹ ug nga ipadala Niya ang iyang “mga anghel anaa libut kaninyo, aron sa pagtabang kaninyo.”³²

Paglaum

Karon, nasayud kaayo ko nga bisan sa inyong, akong, o ni bisan kinsang maayo nga mga intensyon, ang pagpamugos aron mapahisama sa opinyon sa kalibutan ug dili sa mga sugo sa Ginoo mahimong dako kaayo. Si Pedro, sa tataw nga paghukom, miingon kang Jesus, “Bisan pa kon mosibug silang tanan tungod kanimo, ako dili gayud hinoon mosibug. … Bisan pa kon gikinahanglan nga mamatay ako uban kanimo, dili ko gayud ikaw igalimod.”³³ Apan wala madugay human niadto napakyas si Pedro, nga gilimud ang Manluluwas sa tulo ka higayon. Unsay inyong makat-unan niini?

Nagtuo ko nga ang Ginoo gusto nga masayud kamo nga nakasabut Siya nga ang pagtugyan ngadto sa Iyang kabubut-on—pagsunod sa pakigsaad o ang pagkahimong hingpit nga makabig—usa ka proseso dili usa ka hitabo. Gihatag ni Jesus ang Iyang kinabuhi aron dili kita mosukod sa atong kinabuhi pinaagi sa atong mga kahuyang o mga imperpeksyon, apan aron makahinulsol kita kada adlaw ug mahimong mas lig-on pinaagi sa paghinusol ug nga kini mohimo kanato nga makabaton og dili matarug nga pagtuo. Mahimong gusto ninyong isulat diha sa inyong kasingkasing kining salabuton nga instruksyon gikan ni Elder Jeffrey R. Holland sa Abril 2016 nga kinatibuk-ang komperensya:

“Kita mobati og kahupayan sa kamatuoran nga kon ang Dios moganti lamang sa hingpit nga matinud-anon, wala unta Siya’y daghang lista sa hataganan og ganti. Palihug hinumdumi ugma, ug ang tanang mga adlaw human niana, nga ang Ginoo mopanalangin niadtong kinsa gusto nga molambo, kinsa modawat sa mga panginahanglan sa mga sugo ug mosulay aron sa pagsunod kanila, kinsa mipakabililhon sa Kristohanong mga hiyas ug maningkamot sa pag-angkon niini. Kon kamo nasayop niana nga paningkamot, mao usab ang tanan; ang Manluluwas anaa sa pagtabang kaninyo sa pagpadayon. Kon kamo nadagma, pangayoa ang Iyang kalig-on.”³⁴

Si Lynette ug ako diha sa tupad ni Elder Holland sa Johannesburg dihang ang usa ka young single adult sister returned missionary mibarug ug mipamatuod, “Wala ko miabut niini nga gilay-on aron lang moabut niini nga gilay-on.” Palihug hinumdumi, “bisan unsa ang hagit nga inyong giatubang karon … padayon lang. Padayon sa pagpaningkamot. Padayon sa pagsalig. Padayon sa pagtuo. Padayon sa paglambo. … Ang langit nagsuporta kaninyo karon, ugma, ug sa kahangturan.”³⁵ Anaa kamo sa palad sa kamot sa Dios, ug Siya makahaw-as kaninyo gikan sa bisan unsang hudno nga nagadilaab sa kalayo.

Si Elder Holland namulong usab bahin sa dugang nga malumong kalooy ug kasiguroan gikan sa Ginoo nga mahimo ninyong itisok sa inyong kasingkasing:

“Ang Espiritu dili mababagan sa usa ka kagaw o sa nasyonal nga mga utlanan o sa medikal nga mga banabana. [Adunay] mga gasa gikan sa langit nga wala nalimitahan sa kagubot sa yuta o sa sakit nga anaa sa hangin. … Siya nga milalang niining kahibulongang kalibutan nga atong gipuy-an makasulti ngadto sa bisan unsang elemento niini: ‘Kini lang ang gidugayon ug ayaw na og lapas.’ Mao kana unsay Iyang isulti niining problema nga atong giatubang. Sa presensya sa Iyang kahalangdon, bisan ang mga gilalang nga mas gagmay pa sa atom kinahanglang mobawog—gani kon pinasumbingay lang—ug ang matag usa sa kaugalingong paagi niini ‘mokumpisal’ nga si Jesus mao ang Kristo, ang Anak sa Dios, ang talagsaong Manunubos sa tanan. Ubos sa direksyon sa Amahan, ang Manluluwas ang tigdumala sa kapalaran niini nga kalibutan. Anaa kita sa sigurado kaayo ug mapinanggaong mga kamot.”³⁶

Panapos

Gusto nakong motapus kon diin ko nagsugod. Nagtuo ko nga kamo ang labing halangdong henerasyon sa mga young adult sa kasaysayan sa Simbahan. Kamo usab tingali ang henerasyon nga nag-atubang sa kinadak-ang mga hagit. Sa inyong pagpamalandong sa mga hagit nga naglibut kaninyo, hinumdumi nga ang Dios miingon, “Kay Ako, ang Ginoo, mohukom sa tanan nga mga tawo sumala sa ilang mga buhat, sumala sa tinguha sa ilang mga kasingkasing.”³⁷ Ang Espiritu makatabang sa pag-ugmad sa inyong mga tinguha, apan kamo ray makapili unsay inyong tinguha, ug kamo lang ang manubag sa Dios niana nga pagpili. Mipahayag usab Siya nga “ sumala sa [inyong] mga tinguha … kini pagahimoon nganha [kaninyo].”³⁸ Nagpasabut kini nga “mas maayong magtinguha [kamo] sa mga sangputanan nga [inyong] ganahan!”³⁹

Akong tapuson uban niining personal nako nga kasinatian ug pagpamatuod gikan sa akong kinabuhi. Mga tuig ang milabay, samtang anaa sa ikaduhang tuig sa kolehiyo, nagtuon ko alang sa mga final exam diha sa apartment nga ako ra. Init kadto nga adlaw, ug samtang nagribyu ko sa akong mga papel, may tagnok [gnat] nga nagsauysaoy sa akong nawong. Ang kanunay nga pagsauysaoy sa tagnok nakapalagot nako. Sa katapusan, napuno na ko. Akong giisa ang akong mga kamot ug gihampak ug napatay ang tagnok. Dili nako mapasabut hangtud karon unsay nahitabo sunod: Gitan-aw nako ang patayng tagnok diha sa akong palad ug mibati og dakong kalooy. Miingon ko sa akong kaugalingon, “Kadto nga tagnok dili kinahanglanang mamatay. Namatay lang kini tungod sa akong kalagot ug kawalay pailub.” Dayon miluhod ko ug nag-ampo sa Dios nga pasayloon ko ug tugutan nga mabuhi pag-usab ang tagnok. Pagkahuman nako niana nga pag-ampo, ang tagnok milupad gikan sa akong kamot.

Nakapangutana ko sulod sa katuigan, nganong gihimo kadto sa Dios alang kanako? Daghang tubag ang miabut, apan walay laing mas importante kay sa niini: Gusto Niya nga akong masabtan sa akong kinahiladman nga Siya aduna sa tanang gahum sa pagbayaw kanako o ni bisan kinsa, bisan sa labing ubos. Gusto Niya nga masayud ko nga Siya dunay hingpit nga kalooy alang sa atong mga kahuyang ug Siya makaihap sa matag buhok sa atong mga ulo. Karon kon mabuhi niya og balik ang usa ka tagnok, Siya dili gayud mobiya kaninyo—bisan asa ka pa kamo sa kinabuhi.

Ayaw pagpahisama sa mga taga-Laodicea ug motugot sa pagkakampante sa kaugalingon nga maghari kaninyo. Mao kini ang akong pagpamatuod kaninyo. Kon inyong ihikling ang pagpangatarungan sa kaugalingon ug garbo, kon kamo mangutana ug maminaw sa Iyang tingog, dili sa inyoha, kon kamo molihok subay sa Iyang mga paagi, makita ninyo ang mga butang kon unsa gayud kini. Kon magtinguha kamo nga mahimong makabig gayud, magpuyo pinaagi sa pakigsaad ug dili sa kaharuhay, ug motugyan ngadto sa kabubut-on sa Dios samtang nagpalig-on sa uban, makaplagan ninyo ang matag panalangin ug milagro nga inyong gikinahanglan aron molampus niining kinabuhia ug makabalik sa inyong Amahan sa Langit ug makadawat og mahangturong kalipay.

Si Jesukristo ang atong Manluluwas. Siya buhi. Iya kini nga Simbahan, ug kini ang Simbahan nga dawaton sa Manluluwas sa Iyang Ikaduhang Pag-anhi. Ang Atong Langitnong Amahan kanunayng anaa sa atong kinabuhi. Ang Iyang plano mao lamang ang plano sa kalipay. Pinaagi sa Espiritu Santo, kamo mahimo nga masayud sa kamatuoran sa tanan nga mga butang ug sa tanan nga mga butang nga inyong buhaton. Ang akong pag-ampo mao nga makabaton kamo og kaisug sa paghinulsol sa bisan unsang dili matarung nga mga tinguha ug hulipan kini og diosnong mga tinguha sa pagpuyo pinaagi sa pakigsaad ug motugyan ngadto ug molahutay sa Iyang makapalunsay nga kamot sa inyong kinabuhi. Mopamatuod ko kaninyo, sama nga si Alma nagpamatuod sa iyang anak nga si Helaman sa iyang pagkabatan-on: “Ako nasayud nga kinsa ang mobutang sa ilang pagsalig diha sa Dios pagabuligan sa ilang mga pagsulay ug sa ilang mga kasamok, ug sa ilang mga kasakit, ug pagabayawon sa katapusan nga adlaw.”⁴⁰

Hinaut nga ang Dios mopanalangin kaninyo mao ang akong pag-ampo sa ngalan ni Jesukristo, amen.