Sotava na vei Draki ni Bula kei na Veitokani ni Yalo Tabu
Lotu e Vuravura Raraba me baleti ira na iTabagone Qase Cake
Sigatabu, 3 ni Me, 2020
Ni bula vinaka na taciqu kei na ganequ. Au vakavinavinakataka na sere. E dua noqu sere taleitaki ni veigauna, ka solia vei au na vakacegu kei na loloma ena gauna oqo. Au via vakaraitaka ena yalomalumalumu kei na loloma na neirau marautaka na mai tiko kei kemuni ena yakavi oqo. E dau ka ni marau ni kilai tu na masu e sa cabo mai vei ira na tu e vuravura raraba. Kau vinakata meu vakaraitaka na neirau loloma vei iratou na makubui keirau se bera ni keitou sota ena vica vata na vula. Au nuitaka ni ra vakarorogo tiko ka vakila na levu ni neirau lomani ira.
Kevaka era tiko eke, era na vakadinadinataka niu dau taleitaka na draki, na vei draki kece: na siga, mudre ni cagi, uca cevata, covulaca, kurukuru, kei na cagi mai na tokalau vaka kina na vodo mai ni ua lelevu ka mai roba toka na baravi. Sa sivi e 45 na yabaki ni keitou bula ena vanua duidui eso e Amerika kei na veiyasai vuravura, na vanua duidui oqo e tiko na kena veibolei ni draki. E Amerika, ena na Loma-e-ra e dau tibi na liva vakadomobula kei na covulaca; ena Ceva-tokalau na cagilaba; ena Vualiku-tokalau, na uca cevata, uca batabata kei na cava ni uca cevata; ena Ra, na dravuisiga e Santa Ana kei na uneune. Ena Ra kei Aferika e dau taubi na uca kei na cava ni kuvu ni soso mai na Harmattan, na nuku damudamu mai na Sahara ka liwa takosova tu na vanua; e Iurope e loma ni dua na siga e dau tau na uca, uca cevata, ka cila na matanisiga, eso na gauna era yaco vata ena loma ni dua na siga; kei Esia keitou dau vakila na kaukauwa ni cagilaba. Na vei draki duidui kece oqo e au dau nanamaki kina! Na cava meu tukuna? Au taleitaka na draki!
Ni’u sa tukuna na veika oya, e dina ga niu dau namaka meu sotava na Veika Bula e vuravura kei na kena cecere, au rokova na kaukauwa kei na leqa e rawa ni tiko ena gauna me dau yaco mai na draki voravora. Au na sega ni vakawalena na noqu bula, se mani cava sara na veitemaki se totoka ni ituvaki au raica ena kaukauwa oya. Au na sega ni digitaka meu tu ena loma ni dua na rara meu raica kina na totoka ni tibi ni liva; au na sega ni lade yani i waitui, ena gauna e veiseyaki tu kina na ua lelevu ni coko tiko na dobui e wai; kau na sega ni temaka na Veika Bula e vuravura ena noqu sega ni vakaruru ni sa lako mai na covulaca se cagilaba. Au raica tu vakamatata na noqu tawayaga ni vakatautauvatataki ki na kaukauwa kece ni draki e tu wavoliti au.
Vei au, na kaukauwa ni veisau ni draki e dua na vakatautauvata ni bula bibi sara. Ni da sa curu yani ki katuba e veisiga, sa sega ga ni kidavaki iko kei au na vei draki vakayago sega ni lewai rawa ia na kaukauwa ni veidraki vakayalo kei na veitemaki. E dina ni ituvaki kece e duidui vei keda yadua, ena vakavuna mo taroga, “E rawa vakacava meu vakavakarau vinaka cake ki na draki duidui e veisiga e tu wavolita na noqu bula?”
Au vakabauta ni da cakava oqo ena veika e vakasalataka vagumatua nanoda parofita, o Peresitedi Russell M. Nelson, ena koniferedi se qai oti toka ga oqo, meda muria na “ivakaro bibi ka dolava na itabagauna oqo ni kaya na … Kalou, ‘Oqo na Luvequ Lomani. Mo Rogoci Koya!’ [Josefa Simici—Ai Tukutuku 1:17].”1
Eda na sega ni raica kece se kila na cava eso e gole tiko mai, cake, se i muri, se meda rawa ni namaka na kaukauwa ka sega ni laurai ka gole mai ki na noda sala, ia keda sa yalodei ena noda ilakolako e veisiga kevaka eda “rogoci Koya.” Sa dau rogoci vakawasoma ni tukuna o Elder Boyd K. Packer, “Kevaka na veika ga o kila sa mai na veika o raica ena matamu vakavuravura ka rogoca ena daligamu vakavuravura, o na sega sara ni kila e levu na ka.”
Dua na dina levu mai na iMatai ni Raivotu oya: kevaka o vakanuinui ga ki na nomu raivotu kei na kilaka, ena yalani na nomu rawa ni raica na veika lelevu e tu wavoliti iko, ka sa vakarerevaki na vanua e rawa ni cava kina nayalomu. Ena koniferedi raraba sa qai oti walega oqo, e kaya o Peresitedi Nelson:
Se bera mada ni bau veivakauqeti cake me kilai na sala e vosa kina na Yalo vei iko me vakataka ena gauna oqo. Ena Lewe Tolu Vakalou, ei talai na Yalo Tabu. Ena kauta mai na vakanananu ki na nomu vakasama e gadreva na Tamada kei na Luvena mo na ciqoma. Sai Koya na Dauveivakacegui. Ena kauta mai e dua na yalo ni vakacegu ki na yalomu. Sa vakadinadinataka na dina ka na vakadeitaka na ka dina ni ko rogoca ka wilika na vosa ni Turaga.
“Au sa vakavoutaka na noqu kerekere ena ka mo cakava se cava ga ena taura me vakalevutaka nomu gugumatua vakayalo mo ciqoma kina na nomu ivakatakila yadua.”2
Dua na gauna e liu, ena veivakatavulici vakayalo ena vakatovolei yadua kei na isau ni masu, au sa mai kila na dina bibi oqo: Me vukei keda meda raica ka vakarau ki na veisau ni draki se cava, na Kalou e solia vei keda na iyalayala kei na isolisoli ni Yalo Tabu kei na vakatakila yadua. Sa dua na isolisoli tawavoli rawa ena noda bula e veisiga, “ena vakaraitaka vei [keda] na veika kece [meda] kitaka.”3
Niu tubu cake tiko mai, au dau nanuma ni ivatakila e nodra ga na iliuliu ni lotu se parofita, iapositolo, bisopi kei na tamata qase cake, ka sega ni baleti au dua se dua na gone. Nikua sa mai duidui na ka au kila, au vakadeitaka ena yakavi nikua na ivakatakila yadua e dua na veivakalougatataki e dodonu meda vakasaqara. Ni sa tiko na yalomalua e yaloda kei na noda vakasama, eda vakavulici rawarawa, ka tadola ena vakabauti Jisu Karisito, eda na vakatavulici ena dina ka liutaki mai vua na Yalo Tabu. Ena so beka vei kemuni o ni na nanuma ni sega ni o ni kilikili kaya mo ni rogoca na domo veidusimaki ni Kalou. Sa ko na vakila beka ni o vakataki Leimani kei Lemueli, ni na sega ni “vakatakila” na domona vei iko na Kalou. Kakua ni vakabauta oqori. Sa solia tu na Yalona vei keda kece. E kaya o Elder D. Todd Christofferson, “E sega ni da gadreva, e dua na ivakarau ni veika lailai duadua ni vinaka se caka vinaka me rawa ni vukei keda kina na Kalou—e rawa ni [nomu] ena vei auwa kei na vei siga na veivuke vakalou.” 4 Ena sotavi iko na Kalou na vanua o tiko kina ka sega na kena veitalanoa. E kaya ko Jisu, “Dou kerekere, ka na soli vei kemudou.”5 E dina, ni na voleka mai ka tadola ko lomalagi ni ko sa vakasaqaqara ena yalomalumalumu kei na yalodina mo kilai vakavinaka ka muria na Nona ivakaro.
Ena vakalougatataki na nomu bula kei na nodra bula o ira na tani ena nomu cakacaka ena doudou ena veivakauqeti kece sara e soli vei iko mai na Yalo. Meu wasea mada e dua na ka au sotava ka vakavulica vei au na dina oqo ena vica na yabaki sa oti? Vuqa na yabaki sa oti, na luvei keirau yalewa a gonevuli ena univesiti e Utah, au a vakayadrati vakamalua ena lomaloma ni bogi ka ciqoma e dua veivakauqeti vakatotolo ka malumu baleti koya. Au sa yadra tu ia au sega ni vakila e dua na rere—na loloma ga vua—ia au sa vakauqeti ni rawa ni sotava okoya na veika rerevaki. Keitou tiko e Connecticut, ka sa tiko o koya mai na yasa ni vanua kadua e Utah. Ka qai votu mai e dua na vakasama vei au: “Qirita na ovisa. Tarogi iratou ke rawa ni ratou tala e dua na motoka ni ovisa me lai raica na vanua e tiko kina okoya.” Au lomalomarua mada, niu tovolea meu kila na veika au rogoca tiko, ka qai rogoca tale na domo: “Qirita na ovisa.” Au mani cakava vakakina. Au qirita na ovisa. Au sega ni rawa ni vakamacalataka vei turaga ni ovisa na inaki au kerea tiko kina na veika oqo ena bogilevu, ia au tukuna ga vua niu na marau kevaka e tala o koya e dua na motoka me rai mai ena vanua e tiko kina o luvequ yalewa. A vakadeitaka vei au okoya ni na cakava, kau mani gole lesu tale ki moce. Au yadra na mataka kadua ka sega soti ni nanuma vakavinaka na veika e yaco ena bogi.
Ni oti e vica na siga keirau gole ki Utah, ni keirau draiva tiko ki na otela sa rogo ena retio ni sa vesuka na ovisa e dua na tamata ka semati ki na veivakasaurarataki ka yaco tiko ena veivale volekata na Univesiti e Utah. Na ripote a kaya ni dua na gone yalewa a mai labati ena dua na yakavi ena macawa oya. E vakariseyate ki yaloqu na itukutuku oqo, kau mai nanuma sara na noqu qiri tu vaka bogilevu ki vei iratou na ovisa ena vica na siga sa oti Au sega ni kila kevaka a yakavi vata oya. Kau sega ni kila kevaka e taketetaki tiko mai na nodratou itikotiko vakasoqosoqo ni yalewa. Dina au na sega ni kila na ka a yaco, au kila na ka e vakayadrati au vakamalua ena bogi levu, ka vakaukauwataki au meu vakayacora na qiri me vukea na taqomaki ni luvequ yalewa ena gauna e matata ni sega ni vinaka.
Ena rawa ni dau veirawai ena so na gauna na dredre ni bula, ia e sega ni dua tale na kaukauwa e mana cake mai na kaukauwa vakamatabete kei na isolisoli ni Yalo Tabu ena nomu bula ena gauna saraga oqo. Ena bogi ni Nona Veisorovaki, na iVakabula a vakatavulica na isolisoli tawavoli rawa nei Tamada na Yalo Tabu e soli me kauta mai na “sautu” kei na “vakacegu” ki na yalomu, me “vakavulici … ka kecega” ka me “kauta lesu kece mai ki na nomu vakanananu,”6 me “tuberi kemudou ki na ka kecega e dina” ka na “vakatakila vei kemudou na veika ena yaco mai muri.”7 Sa soli vei keda na Yalo Tabu me “vakasinaiti na [yaloda] ena reki.”8
E dau kauta mai vei au na yalomalua ka vakasinaiti au ena so na gauna na veivakalougatataki eso oqo. E sa dua beka li na vuna ka sureti keda kina o Peresitedi Nelson meda rawa ni kitaka na veika kece meda ciqoma na ivakatakila yadua ka rogoca na domoni Kalou mai vua na Yalo Tabu e noda bula? O sa raica beka na itoko ni ivakatakila yadua kei na ivakasala mo kila na isolisoli ni Yalo ena nomu bula vure tiko mai ena tolu na yabaki ni koniferedi sa oti? Au sa vakila kau vakavinavinaka sara vakalevu ki na nodra veidusimaki meda vakadeitaka na noda ivakadinadina kei na noda bula yadua, inaki, kei na isolisoli yadua ni rarama ki na yaloda.
Ena veisiga kei na vei yabaki mai iliu, ena duidui na vei sala o na sotava na ivakatakila mai na Yalo ena nona cakacaka ka vosa ena nomu bula. Kakua ni vakawalena na veivakauqeti va oqo. E rawa ni dua na vakasolokakana lailai se dua na bili malua. E rawa ni dua na ka o vakila se vakasama, se veidusimaki ka matata. E rawa ni dua na veivakauqeti e yaco tiko ga se na yaca ni dua na tamata. Na Yalo Tabu e dau kauta mai na tiki ni vuku kei na kilaka e dau vakararamataka na noda vakasama. Au vakataki au sa sotava e levu na veivakauqeti va qo ka sa vulica kevaka sa lako tiko ga mai ki na noqu vakasama na yaca ni dua na tamata se matana, sa gadrevi vei au meu tomika na talevoni ka qiriti ira. Au sa vulica meu dau muria na vakanananu kei na veivakauqeti dina ni au sega ni raica rawa e dua na kena ivakamacala dina se na kena i cavacava. Na Yalo e sa vakaroti au meu kakua ni lako e so na vanua ka gole tani mai na so tamata kei na itaviqaravi. Na veika oqo ena nomu mai vakila ni vakasolokakana vei au na Yalo ka vosa vei iko e dua na ka o na sotava tiko ena nomu bula taucoko. E sega ni yaco ga mai vakasauri. Ena taura e vuqa na gauna mo vuli mai kina ka vakaduiduitaka na veika o rogoca kei na sala o dusimaki tiko kina.
Na cava na vuna au digitaka kina meu vosa vei kemuni baleta na ka oqo? Me vaka ga ni da sega ni raica se rogoca rawa na vei mataqali draki voravora ena vunilagi ka sega ni dau kila na ituvaki ni ka ena yasana kadua, kevaka eda vakayagataka na matada kei na daligada vakavuravura meda kila kina na ituvaki, eda sa sega ni tu vakarau ki na veidredre ni bula kei na cava tu wavoliti keda. Au sa mai kila ni vosa dina ga e dodonu meda rogoca kece, kila, kei na kila ka oya na vosa ni Yalo. Mo ni uasivi sara ena vosa oya ena nomuni bula. Ni ko kitaka vakakina, sa rawa ni o liutaki, taqomaki, ka laveti ena veisala e gadrevi.
Kemuni na noqu itokani, na taciqu kei na ganequ, au sega ni dua na daunivuli. Au sega ni dua na ivakavuvuli ni ivolanikalou. Ia au dua na dauvakabauta. Au kila ni oqo na Lotu dina ka bula ni Jisu Karisito, ni ivakatakila e ka dina, kei na lomalagi sa dola tu vei iko. Au kila ni o Jisu Karisito na noqu iVakabula. O Koya na nomu iVakabula, ka gadreva o Koya me vakalougatataki iko, taqomaki iko, dautataro vei iko, idusidusi vei iko, ka laveti iko. Ena gauna mada ga ni sega ni dua e kilai iko, e dau kila o Koya. E kila o Koya. Au vakauqeti kemuni mo ni vuki vua na iVakabula e veisiga—sega ni tani. Vuki Vua ena vakabauta ki na dina o kila ni ka dina. Kakua ni vakatara na vakatitiqa, nomu rere, se na veika e vakavuna mo yadra tu vei bogi me vukici iko tani mai na tataqomaki kei na kaukauwa ni Yalo Tabu kei na iyalayala ni noda iVakabula, Jisu Karisito. Sa lomani kemuni yadua ena loloma dina sara na Tamada Vakalomalagi kei na noda iVakabula.
Au masu ni na sauma na Kalou na nomuni masu me sega ni vaka eliu ka solia vei iko na isolisoli kece ni Yalo Tabu o gadreva mo tosoya na nomu bula i liu kau kaya na veika oqo ena loloma levu vei kemuni yadua. Ena basika na veigauna voravora ka dredre. Ia, au yalataka ni na yaco mai e levu cake sara na veigauna talei, rekitaki, ka veivakacegui kei na rarama ni lomalagi makare kei na cagi liwa malumu ni o lako yani Vua ka sa tiko vei koya na kaukauwa kece ni lomalagi kei vuravura.
Au wasea ena loloma na veika oqo ena yaca tabu ni Turaga o Jisu Karisito, emeni.