![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F0b%2F9b%2F0b9b49c2ef0ab3b4804da87ba68d583a7a1ef631%2F0b9b49c2ef0ab3b4804da87ba68d583a7a1ef631.jpeg/full/!250,/0/default)
Onosaia o Faigata o le Olaga faatasi ma le Mafutaga a le Agaga Paia
Faigalotu i le Lalolagi Atoa mo Talavou Matutua
Aso Sa, 3 Me, 2020
Talofa uso e ma tuagane. Ou te matua faafetai lava mo lena pese. O se tasi o pese e sili ona ou fiafia i ai, ma ua aumaia ia te a’u se lagona o le filemu ma le alofa i lenei taimi. Ou te fia faailoa atu foi lo’u loto maualalo ma le alofa mo le faatasi ai ma outou i lenei afiafi. O le iloaina o le toatele o tagata i le lalolagi atoa, o se tulaga faamaualaloina le iloaina o tatalo na ofoina. Ma ou te fia auina atu lo’u alofa i fanau a le ma fanau ma te lei vaai i ai mo le tele o masina. Talosia o loo latou faalogologo mai ma ia iloa ma te alolofa tele ia i latou.
Pe ana faapea o latou i ai iinei, semanu latou te molimau atu i le tulaga o lo’u fiafia i le tau, ituaiga uma o tau: mugalā, savili manaia, matagi aisa, matagi afā, faititili, ma e oo lava i matagi mai matu sasae faatasi ma galu tetele ma galu e fafati i luga o le matafaga. I le silia ma le 45 tausaga ua mavae, sa matou nonofo i vaega eseese o le Iunaite Setete ma i le lalolagi atoa, ma o nofoaga taitasi sa i ai lona lava luitau o le tau. I le Iunaite Setete, i Sisifo Tutotonu sa matautia faititili o afa ma asiosio; i Saute Sasae sa afātia; i Matū i Sasae, o savili aisa malolosi, timu malulū ma afā aisa; i Sisifo, i matagi ma mafui’e o Santa Ana vevela. I Aferika i Sisifo sa i ai timuga mamafa ma afa oneone mai le Harmattan, o oneone mumu mai le Sahara o loo feagia’i solo i le atunuu atoa ; i Europa sa timuga, timuaisa, kiona, ma mugalā, o nisi taimi i le aso lava e tasi; ma i Asia na matou lagonaina le malosi o afā fulifaō. O nei aafiaga eseese uma o tau na faafiafiaina i taimi uma ia te a’u! O le a se tala e mafai ona ou fai atua? Ou te fiafia i tau!
I le fai atu o lena mea, e pei ona ou tulimatai atu i le iloaina o le Tina o le Natura ma lona maoae, ua ia te a’u se faaaloalo loloto mo le mana ma le tulaga lamatia e tupu i taimi uma i tau matautia. O le a ou lē lamatiaina lava lo’u ola, e tusa lava po o le a le faaosoosoga po o le matagofie ou te vaaia i lena malosiaga. O le a ou lē filifili lava ma le loto i ai e tuu a’u i le ogatotonu o se laufanua taalaelae e tau na ona matamata ai i se faaaliga ofoofogia o uila; o le a ou lē maulu lava i se sami a o fafati ma le matautia galu malolosi ma maoae i luga o le matafaga; ma ou te lē faaosoosoina le Tina o le Natura i le le lafi i se malutaga i le oo mai o se asiosio po o se afā. Ou te iloa lelei lo’u lava faatauvaa e faatusatusa i le malosiaga atoatoa o le tau o loo siomia ai a’u i lena lava taimi.
Mo a’u, o le malosiaga o le fesuisuiai o le tau o se faatusa taua o le olaga. A o tatou savavali atu i fafo o ō tatou faitotoa i aso taitasi, e faafeiloai oe ma a’u e le gata i gaoioiga o le tau faaletino e lē mapuleaina ae faapena foi e ala i malosiaga ma faaosoosoga o tau malolosi faaleagaga. E ui atonu e eseese ia tulaga mo outou taitoatasi, ae tatau ona faamatua’ia ai oe e fesili, “E mafai faapefea ona sili atu ona ou saunia mo tau o aso uma o loo siomia ai lo’u olaga?”
Ou te talitonu tatou te faia lenei mea e ala i le mea na fautua malosi mai e lo tatou perofeta, o Peresitene Russell M. Nelson, i le tatou konafesi talu ai nei, e mulimuli i le “folafolaga loloto na tatalaina lenei tisipenisione [ina ua] fetalai mai le Atua … , ‘O Lo’u Atalii Pele Lenei. Faalogo ia te Ia!’ [IosefaSamita—Talafaasolopito 1:17].”1
Atonu tatou te le vaai atoatoa pe malamalama i mea atonu o loo taavilivili mai ia i tatou, i luga a’e o i tatou, po o tua atu o i tatou, po o le mafai ona tatou vaai i taimi uma i malosiaga malolosi ma lē mavaaia o agai mai i lo tatou ala, ae e mafai ona tatou toamalie i la tatou malaga i aso taitasi pe afai tatou te “faalogo ia te Ia.” Sa masani ona faalogo o saunoa mai Elder Boyd K. Packer, “Afai o mea uma e te iloa o mea ia e te vaaia i ou mata faalenatura ma faalogo ai i ou taliga faalenatura, o le a le tele la se mea e te iloaina.”
O se upumoni maoae o le Uluai Faaaliga o le mea moni lenei: afai e te faalagolago atoa i lau lava vaaiga mamao ma le malamalama, o le a matua tapulaa lava lou tagai atu i le ata telē o loo siomia ai oe, ma atonu e lamatia ai lou agaga. I se konafesi aoao talu ai nei, na toe saunoa mai ai Peresitene Nelson:
“E leai lava se isi taimi ua sili ona matua taua ai le iloa o le auala e fetalai mai ai le Agaga ia te oe nai lo le taimi nei. I le Aiga Atua, o le Agaga Paia o le avefeau. O le a Ia aumaia mafaufauga i lou mafaufau ia e finagalo le Tama ma le Alo e te mauaina. O Ia o Lē Faamafanafana. O le a Ia aumaia se lagona o le filemu i lou loto. E molimau mai o Ia i le upumoni ma o le a faamautu mai mea e moni a o e faalogo ma faitau i le afioga a le Alii.
“Ou te toe faafou atu la’u aioiga mo outou ia fai po o le a lava le mea e faateleina ai lo outou gafatia faaleagaga e maua ai faaaliga faaletagata lava ia.”2
I se taimi ua leva, e ala i aoaoga faaleagaga faatasi ai ma tauiviga patino ma tali i tatalo, sa oo ina ou nofouta ai i lenei mea moni ma upumoni loloto: Ina ia fesoasoani ia i tatou ia iloa ma saunia mo soo se taaviliga o tau po o afā, na tuuina mai ai e le Atua ia i tatou le folafolaga ma le meaalofa o le Agaga Paia ma faaaliga faaletagata lava ia. O se meaalofa e lē mafaatauina i o tatou olaga i aso taitasi, e mafai ona “faaali mai e ia ia te [i tatou] mea uma e tatau ona [tatou] faia.”3
A o ou tuputupu a’e, sa ou mafaufau i faaaliga o se mea mo na o taitai o le Ekalesia po o perofeta, aposetolo, epikopo, ma tagata matutua, ae e mautinoa lava e le mo a’u o se tagata talavou. O le asō, ua ese mea ua ou iloa, ma ou te molimau atu i lenei afiafi, o faaaliga faaletagata lava ia o se faamanuiaga e tatau ona tatou sailia. Pe a lotomaualalo, aoaoina, ma tatala o tatou loto ma mafaufau i le faatuatua ia Iesu Keriso, o le a aoaoina i tatou i upumoni ma taialaina e le Agaga Paia. Atonu e lagona e nisi o outou le le agavaa mo le siufofoga taiala a le Atua. Atonu tou te lagona e pei o Lamana ma Lemuelu, o le a le “faaalia” e le Atua lona siufofoga ia te outou. Aua nei talitonu i lena mea. Ua avanoa Lona Agaga mo tagata uma. Na saunoa talu ai nei Elder D. Todd Christofferson, “Tatou te le manaomia … nisi o tulaga o tomai po o ni lelei ao lei fesoasoani mai le Atua—e mafai ona avea fesoasoaniga faalelagi ma a [outou] i itula uma o aso uma.”4 O le a faafeiloai oe e le Atua i le mea o e i ai, e aunoa ma ni tuutuuga. Na fetalai Iesu, “Ole mai, ma o le a outou maua ai.”5 E moni, e latalata ma tatala atili mai le lagi a o e saili ma le lotomaualalo ma le maelega ina ia malamalama ma tausi i Ana poloaiga.
O le a faamanuiaina lou olaga ma olaga o isi a o e galue ma le lototele i soo se ma musumusuga uma ua tuuina atu ia te oe e le Agaga. E mafai ona ou faasoa atu se aafiaga na aoaoina ai a’u i lenei upumoni i tausaga ua mavae? I le tele o tausaga ua mavae, a o a’oga le ma tama teine matua i le Iunivesite o Iuta, sa fagua a’u ma le filemu i le tuneva o le po ma maua ai se uunaiga vave, ma toafimalie e uiga ia te ia. Sa ou ala a’e ou te le’i lagonaina se fefe—na o le alofa mo ia—ae sa ou lagona atonu o loo i ai o ia i se tulaga lamatia. Sa matou nonofo i Connecticut, ma sa i ai o ia i le isi itu o le atunuu, i Iuta. Ona oo mai lea o le manatu lenei ia te a’u: “Vili leoleo. Fai atu ia i latou pe mafai ona latou auina atua se taavale leoleo e siaki le eria o loo nofo ai o ia.” Sa ou taofi mo se minute, ma taumafai ia malamalama i le mea o ou faalogoina, ma sa ou toe faalogoina foi le leo: “Vili leoleo.” O lea na ou faia ai lena mea. Sa ou vili i leoleo. Sa le mafai ona ou faamatalaina tonu i le leoleo le mafuaaga sa ou fesili ai i lenei mea i le ogatotonu o le po, ae sa ou fai atu ia te ia, faamolemole, ou te matua talisapaia pe afai e na te auina atua se taavale e siaki le eria i autafa o le fale o la’u tama teine. Sa ia faamautinoa mai ia te a’u o le a ia faia, ma sa ou toe moe ai ma le toafimalie. Sa ou ala a’e i le aso e sosoo ai, ma sa tau lē manatua le mea na tupu i le po.
I ni nai aso mulimuli ane, ao malaga atu i Iuta, ma a o matou tietie atu i lo matou faletalimalo sa matou faalogo i le leitio e faapea, na pu’e e leoleo se tagata e fesootai ma osofaiga i le nofoaga e lata ane i le lotoa o le Iunivesite o Iuta. Na fai mai le lipoti sa fasiotia ma le matautia se tamaitai talavou i se tasi o afiafi o lena vaiaso. Sa nofo lo’u fatu, ma na vave ona ou manatua la’u valaau i le tuneva o le po i leoleo i nai aso na muamua atu. Ou te le’i iloa pe o le afiafi lava lea e tasi. Ou te le’i iloa pe o lo latou atufale o se tasi o fale na taulai atu i ai. O le a ou le iloa moni lava po o le a le mea na tupu i lena po, ae ou te iloa o se uunaiga filemu na ou ala ai i le tuneva o le po ma musuia a’u e fai se valaau e fesoasoani ia mautinoa le saogalemu a la’u tama teine i se tulaga na manino lava sa lē saogalemu.
E ono foliga malosi mai afā o le olaga i nisi taimi, ae e leai se isi malosiaga sili atu nai lo le mana o le perisitua ma le meaalofa o le Agaga Paia i lou olaga i le taimi nei. I le po o Lana Togiola, sa aoao atu le Faaola e faapea, o le meaalofa e lē mafaatauina a le Tama o le Agaga Paia ua tuuina mai e aumaia ai le filemu ma le mafanafana i lou agaga, e “a’oa’o … i mea uma lava” ma ia “faamanatu mai foi ia te outou i mea uma,”6 e “taitai e ia ia te outou i upu moni uma” ma “faailoa mai ia te outou mea e oo mai.”7 Ua tuuina mai ia i tatou le Agaga Paia e “faatumulia ai [o tatou agaga] i le olioli.”8
O nei faamanuiaga e faalotomaualalo ai ma lofituina ai a’u i nisi taimi. Pe o se mea e ofo ai le valaauliaina o i tatou e Peresitene Nelson e faia mea uma tatou te mafaia ia maua ai faaaliga patino ma faalogo i le siufofoga o le Atua e ala i le Agaga Paia i o tatou olaga? Pe na e matauina le autu o faaaliga faaletagata lava ia ma le fautuaga ia iloa le meaalofa a le Agaga i lou olaga ua alia’e mai mai konafesi o le tolu tausaga ua tuanai? Ou te matua faafetai tele mo a latou fautuaga ina ia taula a tatou molimau ma le olaga ia tatou lava meaalofa patino, aoga, ma taitoatasi o le malamalama ma le agaga.
I aso ma tausaga o i luma, o le a e maua ai aafiaga o le a faaalia ai auala eseese e galue ai le Agaga ma fetalai mai i lou olaga. ‘Aua ne’i [e] lē amanaiaina nei uunaiga. Atonu o se musumusu laitiiti po o se uunaiga filemu. Atonu o se lagona po o se manatu e oo lava i faatonuga tuusa’o ma manino. Atonu o se uunaiga e toe tupu pea po o se igoa o se tagata. E mautinoa lava e aumaia e le Agaga Paia le atamai ma le malamalama vave lea e faamalamalamaina o tatou mafaufau. Ua ou oo patino i le tele o nei faaaliga ma ua ou aoaoina afai e oo mai pea le igoa po o foliga o se tagata i le mafaufau, ona manaomia lea ona ou pikia le telefoni ma valaau atu ia i latou. Ua ou aoao e mulimuli i manatu ma musumusuga e tusa pe leai se faamatalaga po o taunuuga faapitoa o mafai ona ou vaai atu i ai. Ua lapataia a’u e le Agaga e ‘aua ne’i ou alu i ni nofoaga faapitoa ma ia liliu ese mai i tagata ma gaoioiga faapitoa. O lenei aafiaga o le musumusu mai o le Agaga ia te oe ma talanoa mai ia te oe o se aafiaga o le olaga atoa. E le te’ite’i lava tupu. O le a tele ni taimi mo oe e aoao ai ia iloatino mea o e faalogoina ma le auala o taialaina ai oe.
Aisea na ou filifili ai e talanoa atu ia te outou e uiga i lenei mea? E pei lava ona le mafai ona tatou vaai atoatoa pe faalogo i ituaiga uma o tau faigata i le tafailagi ma e le o taimi uma e iloa ai tulaga uma o le a tutupu i o tatou luma atu, pe afai e na ona faaaoga o tatou mata faalenatura ma taliga e malamalama ai i tulaga, o le a tatou lē saunia la mo malosiaga o le olaga ma afā o siomia i tatou. Ua faagaeetia lava a’u ona o le gagana moni e tasi e tatau ona tatou faalogo, iloa, ma malamalama ai, o le gagana lea a le Agaga. Tau ina ia e faaatoatoaina lena gagana i lou olaga. A o e faia, o le a taialaina, puipuia, ma siitia oe i auala uma e tatau ai.
Uo pele, ou uso e ma tuagane pele, e lē o a’u o se tagata atamai. E le o a’u o se tagata silisili o tusitusiga paia. Ae o a’u o se tagata e talitonu. Ou te iloa o le Ekalesia moni ma ola lenei a Iesu Keriso, e moni lava faaaliga, ma e tatala mai le lagi ia te oe. Ou te iloa o Iesu Keriso o lo’u Faaola. O Ia o lou Faaola, ma e finagalo o Ia e faamanuia oe, puipui oe, puluvaga mo oe, taiala oe, ma siitia oe. Pe a leai se tagata e malamalama ia te oe, e Na te faia. E malamalama o Ia. Ou te uunaia ma le alofa ia e faasaga atu i le Faaola i aso taitasi—ae le o le faasaga ese. Liliu atu ia te Ia faatasi ma le faatuatua i na upumoni ua e iloa e moni. Aua ne’i faatagaina ou masalosaloga, ou popolega, po o mea na e atuatuvale ai, e liliu ese oe mai le puipuiga ma le mana o le Agaga Paia ma folafolaga a lo tatou Faaola, o Iesu Keriso. Ua alofagia moni i tatou taitoatasi e lo tatou Tama Faalelagi ma lo tatou Faaola.
Ou te tatalo ia tali mai le Atua i a outou tatalo i lo se isi taimi muamua ma tuuina mai ia te outou meaalofa uma o le Agaga Paia e te manaomia e agai ai i luma i le olaga ma e fai atu ai nei upu ma le alofa tele mo outou taitoatasi. O le a i ai aso faigata i luma atu. Ae ou te folafola atu o le a tele naua aso matagofie, fiafia, filemu ma lagi lanumoana ma savali mafanafana pe a e liliu atu ia te Ia o le o i ai le malosi uma i luga o le lagi ma le lalolagi.
Ou te fai atu ai lenei tautalaga ma le alofa, i le suafa paia o lo tatou Faaola o, Iesu Keriso, amene.