Vaaiga Mamao ma le Paleni
Faigalotu mo Talavou Matutua i le Lalolagi Atoa • 2 Me, 2021 • Nofoaga Autu o Paionia
Elder Gary E. Stevenson: O’u uso e ma tuafafine talavou pele, ua ma fiafia lava ma Lesa e faafeiloai atu ia te outou i lenei faigalotu i le lalolagi atoa mo talavou matutua. A o tatou amata, ma te aumaia ia te outou alofaaga faamaoni ma mafanafana o Peresitene Russell M. Nelson ma le Au Peresitene Sili. Latou te alolofa ia te outou, ma e ma te alolofa foi ia te outou, ma e tatou te faamamalu faatasi ma lagolagoina i latou.
Sister Stevenson: Ia, ua ma auai faatasi ma outou mai se nofoaga tulaga ese lava ma faapitoa i le tatou talafaasolopito o le Au Paia o Aso e Gata Ai. Ma o le uiga o la’u tala o le “nofoaga.”
Elder Stevenson: O loo ma iai iinei i le Nofoaga Autu o Paionia fou faatoa faapaiaina e sosoo ma le ma’a faamanatu i le This Is the Place Heritage Park i le auvae mauga i luga a’e o le Aai o Sate Leki, Iuta—o le nofoaga o loo faamanatuina lena folafolaga mata’ina a Peresitene Polika Iaga, “O le Nofoaga Lenei,”1 na tau mai i ai se alasopo faigata tele a le uluai vaega o paionia toeitiiti 175 tausaga ua mavae.
Sister Stevenson: I le vaivai tele ma mafatia, na sosola ‘ese ai nei uluai Au Paia o Aso e Gata Ai mai sauaga matautia ma nofoia iinei i lenei vanu lafulafuā. Mafaufau i foliga o le Vanu o Sate Leki na faatali atu ia i latou. O nofoaga taalaelae toafa faatasi ma laau talatala na maua ai le faamaoniga o le faato’aina o iinei o le a le faigofie.
Elder Stevenson: Peitai, sa faamanuiaina i latou i se vaaiga mamao faalelagi lemafaamatalaina, na lagolagoina e le valoaga a Isaia i le Feagaiga Tuai e faapea o le a “sii i luga foi e [le Alii] le tagavai i nuu.”2 Na toe iloa foi e nei Au Paia faatuatua le filemu ma le faamoemoega, faatasi ma se vaaiga mamao siitiaina o le talalelei na sili atu ona maualuga nai lo tumutumu o mauga na latou a’eina ia taunuu ai i le Vanu o Sate Leki.
Sister Stevenson: O nei paionia ma i latou na o mai mulimuli ane o le a faia le talafaasolopito i le atiaeina o lenei nofoaga i le toafa. Sa faamanuiaina i latou e le Atua a o amataina le faapotopotoina o Isaraelu.
Elder Stevenson: E oo lava foi i nei aso, ua mafai lava ona maua lena lava agaga o paionia ma le vaaiga mamao i Au Paia o Aso e Gata Ai i soo se mea i le lalolagi.
I nai vaiaso talu ai, sa faapaiaina ai e M. Russell Ballard, le Sui Peresitene o le Korama a Aposetolo e Toasefululua, lenei Nofoaga Autu fou o Paionia.
O iinei, e mafai ona o mai i ai tagata ma aiga ma malamalama ai i le mea faasolopito na ausia e uluai Au Paia o Aso e Gata Ai a o fetaiai ai ma faigata matuia. Sa feagai i latou ma mea faafeagai, na itiiti ai se manuia. Sa valaau atu paionia i le Alii i le ao ma le po a o latou agai atu pea e toto meaai; asu vai mai ālia i mauga; fausia fale ma malutaga, a’oga ma falelotu, faapea foi ma se malumalu.
Sister Stevenson: E toetoe lava a lē mafai ona mafaufauina mea na latou faia. O le vaaiga mamao faalelagi, na musuia ai e le Alii perofeta soifua—na faamanuiaina ai olaga o Ana fanau filifilia e aumaia Lona faamoemoega.
Elder Stevenson: E pei ona outou tagai mai, na o ni nai futu mai le mea o loo ou tu ai ii i le Nofoaga Autu o Paionia o le tioata tele o loo faasaga atu i le ma’a faamanatu o le O Le Nofoaga Lenei (This Is the Place). Ma i lalo ifo o lena, tatou te maua ai sina vaaiga mata’ina o se aai na latou amata fausiaina i se taimi ua leva lava. Ma i tala atu o lena, e te maua ai se vaaiga lautele—o se vaaiga mamao, pe afai e te finagalo i ai—e taulai atu i sisifo ma le tafa’ilagi o le lagoto. O lenei vaaiga siitiaina, vaavaalua ma lo tatou malamalamaaga o le tuanai, ua faalauteleina ai ma faaoaina ai o tatou manatu e uiga i le vaaiga mamao a paionia. E mafai foi ona avea ma se faatusa e fesoasoani e faalolotoina ai lo tatou vaaiga mamao patino o le talalelei ma taiala ai i tatou a o tatou feagai ai ma faai’uga ma lu’itau i o tatou olaga. I totonu o aso talu le folafolaga a le perofeta, “O le nofoaga lenei,”3 o le vaaiga mamao mo se malumalu, laumua o le Ekalesia, ma se nofoaga e avea ma se tagāvai i malo na amataina ōna uluai laasaga e avea ai ma se mea moni.
O lenei la afiafi, o le a ma faaaogaina le tuanai, le vaaiga mamao a o tatou tama paionia, e fesoasoani ai ia i tatou ia maua se manino o le vaaiga mamao mo lo tatou lumanai. O upu musuia a Winston Churchill e foliga mai sa fitoitonu faapitoa i le tatou talanoaga i le po nei: O le mamao i tua e mafai ona e vaai i ai, o le mamao foi lena i luma e mafai ona e vaai i ai.4
Sister Stevenson: E leai se fesiligia o lo tatou feagai ai ma le lē mautonu i le lalolagi. I le mavae ai o le silia ma se tausaga ma le afa o se faama’i oti, o le a se mea o i luma atu? E taufai manaomia e i tatou taitoatasi lea vaaiga mamao faalelagi lava e tasi ma le taitaiga faalelagi na oo i ai na uluai Au Paia pe a tatou vaai agai atu i lo tatou lumanai.
Elder Stevenson: Atonu e te lagonaina le lē mautonu po o lē fea le itu e alu i ai. E te ono uu mau lava i miti o le auauna atu i se misiona, o le a’otauina, o le amataina o se matata. Pe e te ono mafaufau foi i le alofa faamama’i i lau uo, faaipoipo ma faia se aiga, ma vaai i faamanuiaga uma o le malumalu ua oo mai ia te oe ma ē pele ia te oe. Pe masalo ua e amataina lou aiga e faavavau ma ua e oo nei i lu’itau o le tausiga o fanau laiti.
O le tatou sini silisili e tutusa lava: ia alualu i luma i luga o le ala o feagaiga, ma saunia ma le faamaoni mo le faaeaga. O se vaaiga faaletalalelei e maua ai le vaaiga mamao mo oe ma a’u e iloa manino ai lena ala.
Sister Stevenson: Ina ua saunoa e uiga i le tumau i luga o le ala o feagaiga, sa saunoa Peresitene Nelson e faapea, “O le ki o le osia ma le tausia o feagaiga paia. Tatou te filifili e ola i luga o le ala o feagaiga a le Alii ma tumau ai iina. E le o se auala faigata. O le auala lea i le olioli moni i lenei olaga ma talaatu o le ola e faavavau.”5
Elder Stevenson: O lo ma faamoemoe o le faasoa atu ia te oe nisi o o ma’ua aafiaga patino e mafai ona ofo atu ai le taitaiga a o e taulimaina ai manaoga uma i lou olaga e fesoasoani ai ia te oe e agai i luma i le vaaiga mamao ma le paleni.
“O Mai, O Mai, Outou o le ‘Au Paia”—lagiina e le Aiga o Bonner:
O mai, o mai, outou le Au Paia;
Galulue fiafia.
E ui ina mata faigata,
O le a manuia.
Ua sili lava le taumafai
Ia tiai ia le faavaivai;
Ae faia pea, ma fiafia—
Ua Lelei! Ua Lelei!
Tou te manatu ea ua faigata?
E leai; ua lelei.
Pe maua ea se taui e lelei
Pe a solomuli nei?
Ia tatou tau; finau finau.
O le Atua tatou te au;
Ma tatou tau atua—
Ua Lelei! Ua Lelei!
E i ai se nuu ua saunia e le Atua,
Mo tatou i Sisifo,
E le i ai ni e faasaua mai;
Manuia ai tatou.
Tatou te lagi ma pese i viiga,
I lo tatou Matai;
Ma lagi ai o upu nei—
Ua Lelei! Ua Lelei!
A tatou oti ae lei au i ai,
Ua lelei, faafetai! Ua Lelei!
Elder Stevenson: “Aso Fiafia! Ua lelei!”6 ua moni lava, o se faamatalaga o le vaaiga mamao ofoofogia mai uluai paionia. O lo latou vaaiga mamao “ua lelei mea uma” i le lotolotoi ai o luitau ma mafatiaga, sa mafai ona o lo latou vaaiga faaletalalelei.
E mafai ona tatou faaaluina se itula e talanoa ai e uiga i le vaaiga mamao, lea e faauigaina e isi “o le ute o le vaaitino i mea e le o vaaia e isi.”7 O lena mea e tau atu i se fesili lea tou te fesili uma ai ia te outou lava i se taimi: “O le a se mea ou te vaai i ai i le taimi nei mo a’u lava i tausaga o i luma atu? O fea na ou i ai Ma o fea o o’u alu i ai
Sister Stevenson: O nisi taimi e manaomia ona tatou iloaina o le i ai o se vaaiga o le talalelei ma le meaalofa o le Agaga Paia, tatou te maua ai se vaaiga sili atu o mea e mafai ona fai. O le tulaga lena a o e tuuina atu oe lava ia i au taumafaiga o le aoaoina i le taimi nei pe faalegaluega, e ui lava atonu o loo e lagonaina pea lou ala.
Elder Stevenson: Sa ou oo foi i lea tulaga i le popofou o la’u matata faalegaluega. Sa amata lo’u olaga faalegaluega ma se uo mai le taimi a o ma laiti, ma amata se pisinisi a o ma aooga i le iunivesite, i le aumaia o mea faimealofa mai Asia. I le isi 30 tausaga na sosoo ai, sa matua ola lava le ma pisinisi. O se fesili sa tele ina fesiligia ai i ma’ua o le “Ina ua lua amataina le lua pisinisi, pe sa i ai i totonu o le lua vaaiga mamao?” Ia, o le tali puupuu sa “le’i atoa.”
E manaomia ona fetuunaia soo le vaaiga mamao ma fai soo. I le amataina o se tamai pisinisi e oka maia mea faimeaalofa apamemea ona ola ai lea ma avea ma se kamupani tele e sapalaia oloa mo toleniga na manaomia ai le tele o manuia ma fetuunaiga i e tova i la ma vaaiga mamao. O le lafoa’ia ma amata se fuafuaga fou, toefatufatu, ma fetuunaiga o se malosiaga e le o se vaivaiga.
Sister Stevenson: Ae, o i na ma iloa ai avanoa taua na ma tofusao ai i le ma vaaiga mamao. Ona ua i ai lou iloa i le talalelei, pei o paionia, ua faamanuiaina oe i se vaaiga i le talalelei. O lou avanoa o le vaai i lau malaga i le tino ma se vaaiga e tino mai faalelagi
Elder Stevenson: O se vaaiga faavavau pe faaletalalelei e maua mai ai le manino aoga ia e le o maua e isi tagata—e oo lava i mataupu faaletino o a’oga ma galuega. Tatou taumafai e faapupula i ata nai lo upu.
Ma te talosaga atu e vaai i le ata lea. Ia o le a la le mea e te vaai i ai? E te iloa le mea o faaali mai e le ata lea?
Pe, o fesoasoani le vaaiga fou lea e faamaino ai? Na pau lea o mea e vaai i ai? Le a sou manatu? Tatou matamata i le faasologa a ‘o alia’e mai.
Elder Stevenson: Ia, o lenei faataitaiga faigofie, ua mafai ai ona e iloa—tino mai—i talaatu o le mea moni o i ou luma i le taimi nei. E lautele lau vaaiga mamao i le mamao e te alu ai.
Fai mai se anaga poto i le Faataoto, “A leai se faaaliga, e faasalaina le nuu.”8
Na faamatalaina atili lenei mataupu faavae i o tatou taimi e Peresitene M. Russell Ballard ina ua ia saunoa, “O i latou e ausiaina mea aupito sili i lenei lalolagi o i latou e i ai se vaaiga mamao mo o latou olaga.”9 Oka se moni o lena mea!
O la tatou vaaiga mamao faaleagaga lea e maua mai la tatou vaaiga faaletalalelei, e maua ai le malamalamaaga i faamuamua uma o le olaga. E mafai ai ona faaogatusa na faamuamua ma faapaleni lelei ai. Le ala lena tatou te vaai ai i se sootaga lalata o le vaaiga mamao ma le paleni.
Ou te fia faasoa atu le mataupu faaae o le paleni i le faamatalaina o so’u aafiaga patino.
E iai sa’u uo, e iloga i lana matata, o ia foi o se pailate helikopa. I se aso o le tautoulu, sa ia valaau mai ai ma fai mai o la e lele i le Aai o Sate Leki ma pe ma te mananao na te tuuina ma’ua ma la’u paaga faapisinisi i se mea o le mauga i lana malaga.
E lua itula e alu ai i se loli iina. O le helikopa, na o le 15 minute. Na tonu ai loa matou te o.
O se aso manaia i le lele. Sa matou vaaia lanu o lau o le tautoulu a o amata ona tulaueleele. E le atoa se minute ona tulaueleele lea, ae gau loa le tapili i le taumuli o le helikopa. O iina na le mataofiofia ai le taavilivili o le helikopa. O ni tulaga matautia nei.
O le mea e lelei ai, sa toetoe ina otometi aoaoga faamasani mo faalavelave faafuasei a le pailate ia te ia. Sa ia iloa afai matou tuu muamua le isu i lalo, po o le ogatotonu, o le a matou le ola.
I le totonugalemu o le taavilivili le mataofiofia, sa ia faaliliu ai le helikopa i lona itu, ma sa matou patatu ai i le eleele.
Sa mama le suauu ma sa mumu mai le afi i le enesini. Sa mafai ona ia tape le enesini, ma sa matou o ese mai le vaa e aunoa ma se mu. E ala i le faatinoga a le pailate ma le aao o le Alii, sa faamanuiaina i matou ma sao mai le pa o le helikopa
E tele mea na ou aoaoina e uiga i le helikopa talu mai lena aso. O lo matou aafiaga i le pa o le helikopa o le taunuuga o se le paleni o elemene taua e tausisia ai le helikopa i luga o le ea. A ausia le paleni i le va o le saosaoa o le tapili autu, le tapili i tua ma le tulimanu, e mafai ona fiafia le malaga i se helikopa. A leai, e taufaafefe! E mafai ona ou molimau atu patino atu i lena mea.
Sei tatou vaevaeina nei elemene taua i se auiliiliga sili.
Muamua o le tapili autu. O feuia’iga ma le umi o le lauma’ai e afua ai ona masi’i ma mimilo. Peitai, o le milosaga e le tapili autu e tatau ona paleni, a leai o le a mafai ona faatonutonu le taavili o le helikopa.
Sister Stevenson: O le mea lena e i ai se tapili i le taumuli o le helikopa. Na te fatua le faafeagai ma le milosaga o le tapili autu. O le saosaoa o le tapili autu e faafoe e le pailate e ala i le taofilima. O le saosaoa o le tapili i le taumuli e faafoe e le isi vae. O fetuunaiga faifaipea i le saoasaoa o nei tapili e lua e matuai tatau ai.
A leai, e toe fai atu, e le lelei se taunuuga.
Elder Stevenson: O le isi o le kia. O le kia e faafoe ai le tulimanu o le helikopa, lea e faafoe ai le itu e alu ai le helikopa, le mafai ona liliu, ma le mausali, e galulue faatasi ma le tapili autu ma le tapili i le taumuli. E faagaoioi e le pailate le kia i lona lima taumatau.
Ma le mea mulimuli, o le mamafa o le uta ma le tulimanu o le vaalele e fuama’oti i ai le saoasaoa ma le malosi e manaomia i le tapili autu ma le tapili i le taumuli.
Sister Stevenson: A ogatusa lelei uma nei elemene, e manaia foi le paleni. Tapili autu, tapili i le taumuli, kia, mamafa, ma le tulimanu—lu’i tino ai le kalave.
E mafai faapefea ona e faafesoota’ia le malaga manaia ae lavelave a se helikopa i le i ai o le paleni i o tatou olaga?
Elder Stevenson: Se’i ou folasia atu ni nai mafaufauga na musuia i se savali a Peresitene Gordon B. Hinckley i se konafesi faaleautaitai sa ou auai i le tele o tausaga ua mavae e fatu ai se sootaga. Atonu o le a fatuina ai lenei sootaga mo oe.
Sa ia faamatala mai “e tofu i tatou taitoatasi ma se tiutetauave e fa ona tafa. Muamua, e i ai la tatou tiutetauave i o tatou aiga. Lona lua, e i ai la tatou tiutetauave taua i a tatou pule o galuega. Lona tolu, e i ai la tatou tiutetauave i le galuega a le Alii. Fa, e i ai lo tatou tiutetauave ia i tatou lava.”10
O le faaaogaina o le talafaatusa lava lea o le paleni e ala i le fefaalagolagoa’i o elemene taua o se helikopa, tatou tilotilo la i tiutetauave e fa i lea lava ala.
Sister Stevenson: Tatou amata i le fale ma le aiga, o elemene taua i o outou olaga taitasi. E taua lou le tuulafoaia o le aiga. E leai lava se mea o ia te outou e sili atu ona taua. … O le faiā faaleaiga o le a e aveina … i le olaga i talaatu.”11 Tele naua mea na faia i tausaga talu ai e taitai o le Ekalesia e faamamafa mai ai le taua o le aiga ma auaiga.
O le taiala talu ai nei pe a fua i le paleni fou i le va o aoaoga faaletalalelei i le aiga ma le Ekalesia ma le faasologa ua fetuunai o sauniga o se faailoga tele lea e ao ona faitaulia le aiga o le tapili autu i o tatou olaga.
Ua lu’iina i tatou e Peresitene Nelson e “galulue maelega e toepoupou [o tatou] aiga e avea o se totonugalemu o le aoaoina o le talalelei.” A tatou faia, ua ia folafola mai faapea “e oo mai taimi o touaso Sapati o le a o se fiafiaga moni. O le a fiafia lau fanau e aoao ma ola i aoaoga a le Faaola, ma o le a faaitiitia le faatosinaga a le fili i lou olaga ma i lou aiga. O suiga i lou aiga o le a iloga ma tumau.”12
Elder Stevenson: Le isi, tatou mafaufau i lau galuega po o lou olaga galue faapolofesa—lau matata, pe mo tamaiti a’oga, o le a’oga o loo e sailia lea o le a tau atu ai i lau galuega po o le matata mo le olaga. E moni, o le a’otauina e faalautele ai lou gafatia e faigaluega ai. O le galuega e mafai ona e tausia oe lava, lou aiga, ma isi. O le faigaluega e tau atu i le ola tutoatasi, i le faaletino ma le faaleagaga. I lou siomaga faalegaluega e i ai sau matafaioi i lou pule, ia e faamaoni ma lotonuu, ia tuuina atu taunuuga faamoemoeina o mea o oo totogi ai oe. E te taumafai malosi e faaali lou tagata silisili i lau galuega.
Ma la tatou faapupulaga, manatu i le galuega o le tapili i le taumuli o le helikopa.
Sister Stevenson: Ina ia mafai ona avea ma ou tagata silisili ma lou aiga, e fesoasoani le silisili i lau galuega. E fesootai vavalalata na mea e lua, ma e taua le paleni o mea e lua. Ua faaopoopo pea falefaigaluega, au suesue o faalapotopotoga, ma faufautua faapisinisi ua latou faalauiloa penefiti o le paleni o le olaga-galue.
Elder Stevenson: O le elemene taua lona tolu o le paleni o le olaga e mo le Alii ma Lana galuega. O se tasi lea o faamoemoega autu na taitasi ai i tatou ma o mai i le lalolagi. Ua tatou iai iinei e alolofa atu, āva, usitai, ma auauna atu ia te Ia ma fanau a lo tatou Tama Faalelagi, o tatou uso ma tuafafine i le lalolagi atoa. E manaomia e le Alii a tatou taumafaiga ma taleni e fau ai Lona malo.
“Paketi lou taimi e fai ai ou tiutetauave i le Ekalesia.”13 Ua ou manatu o le upu paketi e fai a si aoga. E manaomia ai se filifiliga magafagafa mo i tatou ia taufai “faaavanoa se taimi” mo le auaunaga i le Alii ma Lana Ekalesia ma ia faafoe lelei lena taimi.
Sister Stevenson: O tulaga faaletaitai e le totogia o se tasi o elemene iloga o le Ekalesia toefuatai a Iesu Keriso. O le a tofu talosagaina outou e saofagā atu i le malo i ni ala eseese. O valaauga e oo atu ia te oe ma isi i lou aiga, e ono oo atu i taimi atonu e le faigofie. E ui o lea, “afai ua ia te outou le manao e auauna atu i le Atua, ua valaaulia outou i le galuega.”14
E le gata i lea, na aoao mai lo tatou perofeta pele, Peresitene Russell M. Nelson ua matua suia le lalolagi, faapea foi i la tatou auaunaga i le Ekalesia. Na ia fautuaina tatou e talia “se taeao fou.” Na ia lu’iina i tatou e “auauna atu i isi. Ia tausisia se vaaiga e faavavau. [Ma] faalautetele [o tatou] valaauga.”15
Elder Stevenson: O lea uunaiga ua maua ai e i tatou taitasi se vaaiga mamao e fai mea ua valaauina i tatou e fai ae ua fautuaina foi tatou e tausisia se vaaiga e faavavau, pe i se isi faaupuga, ia faapaleniina ma isi o tatou tiutetauave ogaoga. Ou te manatu i le auaunaga i le Ekalesia o le kia o le helikopa, lea e faamautu ma feulia’i ai i tatou.
Sister Stevenson: O le elemene faai’u e faamautinoa ai le paleni o se matafaioi lea ia i tatou lava.
E mafai ona matuai pisi le olaga. E taua lo tatou faifai malie i taimi e toefafaga ma vaavaai totoa i o tatou lava manaoga faaletagata, pei o le malolo, faamalositino, faafiafiaga, ma atina’ega faaleagaga patino. Na tuuina mai talu ai nei e taitai o le Ekalesia ni fautuaga taua ma le tinoa e fesoasoani ia i tatou e faia ai.
Elder Stevenson: Sa’o Lesa. Talu ai nei na fautuaina mai ai e Peresitene Ballard le taua o le sailia o se taimi paganoa. Sa Ia saunoa:
“E ui o se faamanuiaga le tekinolosi i lo’u olaga, ae e mafai foi ona avea o se faalavefau e tuuina se papupuni i lo tatou va ma le gafatia e faalogo i le siufofoga o le Alii. Ou te ta’u i fanau a la’u fanau e tatau ona latou tuu ese se taimi paganoa i aso taitasi e mafaufau ai i o latou olaga ma manatunatu i mea e finagalo le Alii latou te fai. …
“… E le mafai ona ou fesootai i le lagi i se mano o lavasiga. … Pe a ou … taumafai malosi e fifilemu, o le taimi lea ou te maua ai uunaiga.”16
Ua talanoa Elder Jeffrey R. Holland e uiga i le tatalo filima’oti. Na ia saunoa: “E i ai se lesona tele i le … tatalo faanatinati, filima’oti e tauivi ma le … tetee a le fili, o gasu o le aso, po o fililavefau o o tatou mafaufau.”17
Sister Stevenson: Na faamatala e Sister Jean Bingham, le Peresitene Aoao o le Aualofa ni elemene se tolu e fesoasoani ia i tatou lava ia e taitasi ma taua tele.
Muamua, ua ia valaaulia le Agaga e ala i tusitusiga paia. Na ia saunoa mai: “O se tasi o mea muamua sa ou te faia i taeao ina ia maua le Agaga o le faitau o tusitusiga paia. E fesoasoani ia te au ia maua le faavaa tonu o le mafaufau ina ia mafai ai ona ou maua faaaliga.”
O lona elemene lona lua o le tapuai i le malumalu. “O se tasi ala ofoofogia e mafai ai ona faalogoina ma le manino le siufofoga o le Faaola o le alu i le malumalu. O nisi taimi pe a ou nofonofo i le malumalu, o le a ou maua se tali i se tatalo po o le a oo mai se mea i lo’u mafaufau a o ou fifilemu ma faalogo i le Agaga.”
Tolu, fai mai o ia: “Musika … e fesoasoani ou te lagona ai le siufofoga o le Faaola. Ou te fiafia lava e faalogologo i viiga, tusa pe na o musika i meafai faaili e leai ni upu. Ou te iloa na upu aua ua leva ona ou usuina, e oo mai lava la i lo’u mafaufau.”18
Elder Stevenson: E foliga mai o le faaalu o taimi mo i tatou lava e tele ina faigata tele, ae e ese le taua. Ua ou faalogo o faamatala mai ai pe a lava se taimi e taofi ai mai le galuega pisi o le ‘ili e faama’ai le lau o le ‘ili.
Sister Stevenson: O le manatua e i ai lo tatou tiutetauave mo i tatou lava ma le faafetauia o laa i lea laa i o tatou olaga o le a o se faamanuiaga. Ua ou iloaina a o o’u atiina a’e a’u lava faaletino, faalelagona, ma le faaleagaga, e le gata ina ou maua ai le manuia tele faaletagata lava ia, ae e mafai ai foi e a’u ona faafailele lo’u aiga ma uo.
Vaai i le sologa lelei o nei itutino e fa o o tatou olaga pe afai e faaaoga ma le vaaiga mamao ma le paleni! E matuai ogatusa lelei, a ea?
Elder Stevenson: Ioe. Ia, tusa foi a o tatou talanoa e uiga i le paleni i nei itu eseese o o tatou ola, e ao ona tatou tuuina i le vaaiga sa’o.
Na aotele e Elder Bednar lenei mea i se tala na tuu i luga i faasalalauga faaagafesootai talu ai nei: Na ia saunoa mai: “O nisi taimi, tatou te faaatagia i o tatou tiutetauave uma i le fale, a’oga, galuega, ma le lotu ma taumafaufau pe mafai faapefea ona tatou ausia se paleni i le lotolotoi o le mau uunaiga faatautava o o tatou taimi. Nai lo le tatou lofituina ia faia mea uma i le taimi e tasi, e tatau ona tatou faailoa nai mea taua ua avea ma o tatou faamuamua aupito maualuluga. Ona mafai lea ona tatou taumafai malosi e tuu atu i mea taitasi se gauai e manaomia ai—auaua’i.”19
Lesa, ua faamanatu mai ai se aafiaga e le galo ma lo’u tama. O a’u o se tamā talavou faatoa tofia o se epikopo ma se pisinisi e matua moomia ai a’u. I se tasi o po sa ou savali atu ua tuai i se pati a le aiga o se aso fanau. Sa salalau solo le ma fanau ma o latou tausoga. Ae sa ou savali i totonu o le fale ma le faaleāno, ma nofo i se tulimanu o le potu, ma popole lofituina i la’u pisinisi ma mea na tutupu i le uarota.
Sa sau lo’u tama ia te au ma se leo pāū e le masani ai ma fai mai, “Gay, o a au mea na e fai?” Ina ua ou ta’u atu i ai o’u popolega ma tiutetauave i le lotu ma le galuega, sa foliga mai o ia ua matua gaualofa lava. Ia, o le mea moni e leai, sa nofo mai i o’u autafa ma fai mai sa popole o ia e uiga ia te au, ma sa manaomia ona ou faia ni fetuunaiga ina ia aua ai ne’i ou le ano atu i lo’u aiga pe a ou i ai faatasi ma i latou. E te manatua lenei mea, Lesa?
Sister Stevenson: Ou te manatua lelei lava.
Elder Stevenson: Fai mai a ia, “A e i ai i le fale, ia faamuamua le aiga, ae le o le lotu po o le galuega. A e i ai i le galuega, ia faamuamua le galuega, ae le o le aiga ma le lotu. A e i ai i le lotu, filifili e faamuamua le lotu, ae le o le galuega ma le aiga.”
O lea fautuaga na aveesea ai la’u avega i lena taimi ma ou maua ai faamanuiaga e tele i lo’u olaga, ae na fesoasoani moni ia te a’u. O lea fautuaga na aveesea ai la’u avega i lena taimi ma ou maua ai faamanuiaga e tele i lo’u olaga. Ou te valaaulia outou ia outou taumafaia e outou lava.
E malie, toetoe o le mea tonu lea na fautuaina e Elder Bednar i lana tala talu ai i luga o fesootaiga faaagafesootai Na ia faasoa mai, “Atonu e foliga faatauvaa, ae e le tatau ona tatou le fiafia ma faamaimau taumafaiga ma le taimi e taumafai ai ia ausia se paleni atoatoa i mea taua uma e manaomia ona tatou faia. A tatou tatalo ma le faamaoni mo le fesoasoani a le Atua e faailoa mai mea e sili ona taua, o le a Ia taialaina ma lagolago i tatou e taulai a tatou taumafaiga i lea aso ma lea aso.”20
Sister Stevenson: Ia, e i ai si a’u tala le manuia e faasoa atu. Afai e te mulimuli i lea fautuaga ma agai i luma ma le paleni ma le vaaiga mamao, atonu o le a iai lava ni nai ou toilalo laiti. O le a lu’itauina oe ma lofituina.
Atonu e i ai taimi e foliga nenefu ai lau vaaiga mamao i se ala puaoa pe atonu foi ua le mau lau pipii. Ae o le tala fiafia lea: o outou o atalii ma afafine o se Tama Faalelagi alofa.
Ua aoao mai i tatou e tusitusiga paia, “Aua ua le foaiina mai e le Atua ia te i tatou le Agaga e mata’u ai, a o le Agaga e faamalosi ai, ma alofa ai, ma mafaufau tonu ai.”21 O le manatua pea o o tatou vaivaiga i le olaga faaletino, sa folafola mai ai e le Alii, “Ia fiafia, ma aua le fefefe, aua o Aʼu o le Alii ua Ou faatasi ma outou, ma o le a tu i tafatafa o outou.”22 Ma o lea, ua ia te outou se punavai faalelagi e le uma, o le malosi i lo tatou Faaola pele—o Iesu Keriso.
Elder Stevenson: Ia faalogo mai nei i faamalosiauga musuia mo outou taitoatasi iinei i le aso mai ia Peresitene Nelson. Na ia saunoa mai: “Na silafia e le Atua … o le ala o feagaiga o le a le faigofie ona maua pe tumau ai luga. Na Ia auina mai Lona Alo Pele e Toatasi na Fanaua, e togiola mo i tatou ma faaali mai ia i tatou le ala sa’o. O le mana faaleatua o loo avanoa mo tagata uma, o e alolofa ma mulimuli ia Iesu Keriso o le mana lea e faamalolo ai i tatou, faamalolosia ai i tatou, faamama ai i tatou mai agasala, ma faalauteleina ai i tatou e faia mea sa le mafai lava ona tatou faia e i tatou lava.”23
Sister Stevenson: Faataga le malamalama o lou tagata moni, ma lē o i lou itu, e fesoasoani ia e ola ai i lou olaga ma se vaaiga manino mamao ma se paleni mautu. “O le a faateleina [e le Alii] o outou avanoa, faalautele la outou vaai mamao, ma faamalolosia outou.”24
Elder Stevenson: Ia, ua matagofie le faatasi ai ma outou i lenei po. Ia, ua matagofie le faatasi ma outou i lenei po. Ma e ma te fia faamaea atu nei i le faailoa atu o le ma lotofaafetai, ma tuu atu se valaaulia ia te outou uma, ma ofo atu a ma molimau. Ou te valaaulia outou ia iloilo muamua le auala e faamautinoa ai e le vaaiga mamao o le talalelei ma faamautu la outou faasinomaga o se atalii ma se afafine o le Atua, ma se atalii o le Atua.
Lua, iloilo le auala e te taulimaina ai lou tiutetauave faatafafa i le aiga ma le auaiga, i le a’oga ma le galuega, i le Ekalesia, ma ia oe lava. O le lona tolu, ou te valaaulia outou ia maua se nofoaga filemu ma tusi i lalo nisi o uunaiga ua e lagonaina i le taimi o le faigalotu.
O le lona tolu, ou te valaaulia outou ia maua se nofoaga filemu ma tusi i lalo nisi o uunaiga ua e lagonaina i le taimi o le faigalotu. Manatua i le avea ai ma tagata O Le Ekalesia a Iesu Keriso o le Au Paia o Aso e Gata Ai, ua faamanuiaina outou taitoatasi ma faamealofaina i le mafutaga a le Agaga Paia.
Sister Stevenson: A outou faatinoina valaaulia mai ia Elder Stevenson, aua nei galo ia paionia na muamua atu ia i tatou—i latou na tatou talanoa ai no nofoia lenei vanu, faapea ma i latou i o outou aiga patino ma atunuu moni. O o latou agaga faapaionia ma faataitaiga o le faia o mea faigata e mafai ona outou maua ai le talitonuga e faia ai mea faigata.
Elder Stevenson: E pei la o uluai au paia o aso e gata ai, tatou te vaai mo isi. Tatou vaai i luga Ma e tatou te vaai i totonu ifo mo le vaaiga mamao o le talalelei ma le paleni.
Sister Stevenson: Ou te tuu atu lau molimau e mafai ona e maua lena “susulu atoatoa o le faamoemoe.”25 E silafia outou taitoatasi e le Tama Faalelagi i tou igoa, ma e alofa o Ia ia te outou. Ou te molimau atu ia Iesu Keriso o le Alo e Toatasi o le Atua soifua. Ma ou te molimau atu ai i le suafa o Iesu Keriso, amene.
Elder Stevenson: Amene. Faafetai lava, Lesa. Ou te tuu atu foi lau molimau ma le tautinoga ia te outou, o matou uso ma tuafafine lelei. Ou te molimau atu o tatou o fanau a ni matua faalelagi alofa, e alofa le Tama Faalelagi ia te outou, ma o le mataupu faavae a le Tama e finagalo o Ia ia foi atu uma ana fanau ia te Ia.
Ia, o le mataupu faavae lenei ua faia e Lona Alo,lo tatou Faaola alofa, o Iesu Keriso. E ala i Lana Togiola ua mafai ai ona tatou toefoi atu i le afioaga o lo tatou Tama Faalelagi alofa. Ou te ofo atu lau molimau ia te outou. Ou te ofo atu la’u molimau ia Iesu Keriso, faapea ma Lana matafaioi paia o lo tatou Faaola ma lo tatou Togiola. Ma ou te faia ai i Lona suafa, o Iesu Keriso, amene.