O Se Taeao Fou
Ou te valaaulia oe ia faateleina le liliu atu o lou loto, mafaufau, ma le agaga i lo tatou Tama Faalelagi ma Lona Alo, o Iesu Keriso.
O’u uso e ma tuafafine pele, ua mamalu lava nei aso e lua o le konafesi aoao! Ou te au ma Elder Jeffrey R. Holland. E pei ona ia ta’ua, o savali, tatalo, ma musika na musuia uma e le Alii. Ou te faafetai atu i tagata uma o ē ua auai mai i soo se auala.
I le gasologa o taualumaga, ua ou vaai faalemafaufau ia te outou o faafofoga i le konafesi. Ua ou ōle atu i le Alii e fesoasoani mai ia ou malamalama po o a mea o outou lagonaina, o popole ai, pe o taumafai foi e foia. Sa ou tomanatu po o le a se mea ou te ta’u atu e faai’u ai lenei konafesi lea o le a auina atu ai outou e ō ma le faamoemoe e uiga i le lumanai ua ou iloa ua finagalo i ai le Alii ia outou lagonaina.
O loo tatou ola i se vaitau mamalu, na muai vaaia e perofeta mo le tele o seneturi. O le tisipenisione lenei o le a lē taofia ai lava se faamanuiaga faaleagaga mai ē amiotonu.1 E ui i le vavaō o le lalolagi,2 ae finagalo le Alii ia tatou tulimata’i atu i le lumanai “ma se faamoemoega e tumu i le olioli.”3 Aua ne’i o tatou nopia’i i manatuaga o ananafi e leai se alualu i luma. O loo agai i luma le faapotopotoina o Isaraelu. O loo taitaia e le Alii o Iesu Keriso mataupu o Lana Ekalesia ma o le a ausia lava ona faamoemoega paia.
O le lu’i mo oe ma a’u ia mautinoa o le a ausia e i tatou taitoatasi lona lava gafatia paia. O aso nei ua tele ina tatou faalogo e uiga i “se taeao fou.” Afai e te manao moni lava e opogi se taeao fou, ou te valaaulia oe ia faateleina le liliu atu o lou loto, mafaufau, ma le agaga i lo tatou Tama Faalelagi ma Lona Alo, o Iesu Keriso. Ia avea lena mea ma ou taeao fou.
Opogi lou taeao fou e ala i le salamo i aso taitasi. Saili ia faateleina le mamā i mafaufauga, upu, ma amioga. Auauna atu i isi. Ia tausisia se vaaiga e faavavau. Faalautele ou valaauga. Ma po o a lava ou luitau, o’u uso e ma tuafafine pele, ola i aso taitasi ina ia e saunia atili e feiloai ma lou Foafoa.4
O le mafuaaga lena ua i ai ai a tatou malumalu. O sauniga ma feagaiga a le Alii e tapenaina i tatou mo le ola e faavavau, o le meaalofa sili lea meaalofa uma a le Atua.5 E pei ona outou silafia, o le faama’i o le KOVITI na manaomia ai ona tapunia lē tumau a tatou malumalu. Ona tatou amatalia lea o se toe tatalaga faavaega na faamaopoopoina ma le faaeteete. I le vaega 2 lea ua faagaoioia nei i le tele o malumalu, e faitau afe ulugalii ua faamauina, ma le faitau afe ua mauaina o latou lava faaeega paia i le na o ni nai masina ua tuanai ai nei. Matou te tulimatai atu i le aso e mafai ai e tagata agavaa uma o le Ekalesia ona toe auauna atu i o latou augatuaa ma tapuai i totonu o se malumalu paia.
Ua ou fiafia nei e faasilasila atu fuafuaga mo le fauina o malumalu fou e ono ina ia fausia i nofoaga nei: Tarawa, Kiripati; Port Vila, Vanuatu; Lindon, Iuta; Aai Tele o Kuatemala, Kuatemala; Sao Paulo Sasae, Pasila; ma Santa Cruz, Polivia.
A o tatou fausiaina ma tausiaina nei malumalu, matou te tatalo ia fausia foi e outou taitoatasi ma tausia oe lava ia ina ia e agavaa e ulufale atu i le malumalu paia.
O lenei, o’u uso e ma tuafafine pele, ou te faamanuia ia te outou ina ia faatumuina i le filemu o le Alii o Iesu Keriso. O Lona filemu e le mafai ona malamalama atoa i ai le tagata soifua.6 Ou te faamanuia ia te outou i se mana’o faateleina ma le gafatia e usitai ai i tulafono a le Atua. Ou te folafola atu a outou faia, o le a lilofia outou i faamanuiaga, e aofia ai le lototele sili atu, faateleina o faaaliga faaletagata lava ia, o le fealofani sili atu i totonu o o outou aiga, ma le olioli e ui i le lotolotoi ai o le lē mautonu.
Tau ina ia tatou agai atu i luma e faataunuu lo tatou tiute paia—o le sauniaina lea o i tatou lava ma le lalolagi mo le Afio Mai Faalua o le Alii. Ou te tatalo ai, faatasi ma le faailoaga o lo’u alofa mo outou, i le suafa paia o Iesu Keriso, amene.