Aga’i i Luma
O le galuega a le Alii o loo agai pea i luma ma le mausali.
O’u uso e ma tuafafine pele, e ma’eu le olioli i le faatasi ai ma outou a o tatou amataina le Konafesi Aoao Faaleafatausaga Lona 190 O Le Ekalesia a Iesu Keriso o le Au Paia o Aso e Gata Ai. Ou te fiafia e faatasi ma outou i o outou maota ma laoa po o fea lava o outou alala ai, e faafofoga faatasi i savali a perofeta, tagatavaai, ma talifaaaliga ma isi taitai o le Ekalesia.
E ma’eu lo tatou lotofaafetai mo tekinolosi ua mafai ai ona tatou fesootai o se faatasiga tele e tasi i le lalolagi atoa o soo o Iesu Keriso. O le Konafesi Aoao ia Aperila talu ai sa sili atu tagata na maimoaina i lo se isi lava konafesi na muamua atu, ma ua i ai foi lo matou faamoemoega o le a toe tupu foi.
I le gasologa o masina talu ai, o le faama’i pipisi i le lalolagi, afi matautia, ma isi faalavelave faalenatura ua ū ai i luga ma lalo lo tatou lalolagi. Ou te faavauvau faatasi ma outou taitoatasi ua maliu se tasi e pele ia te outou i le gasologa o lenei taimi. Ma ou te tatalo mo tagata uma o ē o loo mafatia i le taimi nei.
Ae, o le galuega a le Alii o loo agai pea i luma ma le mausali. I le lotolotoi ai o le vavamamao faaleagafesootai, o tali fofoga, ma fonotaga i le Zoom, ua tatou aoaoina ai e faia nisi mea i se faiga e ese ai ma nisi mea ia mataalia atili. O taimi e masani ai e mafai ona aumaia ni taui e lē masani ai.
O a tatou faifeautalai ma taitai o misiona ua matua aoga tele, totoa, ma ofoofogia moni lava. E ui sa ao ona sailia e le toatele o faifeautalai ni auala fou fatufatuai e fai ai le latou galuega, ae tele misiona na lipoti mai ua tele atu lesona o loo aoao atu nai lo le taimi muamua.
Sa ao ona tatou tapunia malumalu mo se taimi, ma o nisi o poloketi o le fausiaina sa taofia teisi, ae o le taimi nei ua toe agai uma i luma. I le kalena faaletausaga 2020, o le a tatou suatiaina ai le eleele mo malumalu fou e 20!
Ua matua faateleina lava galuega o talafaasolopito o aiga. Ua tele uarota ma siteki ua faavaeina. Ma ua faamalieina i matou e lipoti atu ua tuuina atu e le Ekalesia ni fesoasoani agaalofa mo le faama’i pipisi mo poloketi e 895 i atunuu e 150.
O le faateleina o le suesueina o le talalelei i totonu o le tele o aiga ua tino mai i molimau ma mafutaga faaleaiga malolosi atu. Sa tusia e se tasi o tina: “Ua ma lagona le vavalalata atili i le ma fanau ma fanau a fanau i le taimi nei ina ua matou potopoto i le Zoom i Aso Sa uma. E tofu le tagata ma le avanoa e faasoa mai ai o latou manatu i le Sau, Mulimuli mai ia te A’u. O tatalo mo tagata o le matou aiga ua suia ona ua matou malamalama atili i mea latou te manaomia.”
Ou te tatalo o loo faaaogaina e i tatou o se nuu lenei taimi tulagaese e tuputupu ae ai faaleagaga. Ua tatou i ai iinei i le lalolagi ina ia tofotofoina, e vaai pe o le a tatou filifili e mulimuli ia Iesu Keriso, ia salamo soo, ia aoao, ma ia alualu i luma. Ua faananau o tatou agaga ia alualu i luma. Ma e tatou te faia lena mea i le tulaga silisili e ala i le tumau mausali i luga o le ala o feagaiga.
I na mea uma, e alofa lo tatou Tama Faalelagi ma Lona Alo, o Iesu Keriso, ia i tatou! E popole i La’ua mo i tatou! O loo La leoleoina ma a La agelu paia i tatou. 1 Ou te iloa e moni lena mea.
A o tatou potopoto ai e faalogologo i afioga ua musuiaina ai e le Alii Ana auauna e momoli atu, ou te valaaulia outou ia mafaufau loloto i se folafolaga na faia e le Alii. Sa Ia folafola mai “e mafai esoo se tasi e manao i ai ona piimau i luga i le afioga a le Atua, lea ua vave ma mamana, lea o le a veteina ai le poto leaga ma … fuafuaga uma a le tiapolo, ma taitai atu ai le [au soo] o Keriso i le ala lauitiiti ma vaapiapi.” 2
Ou te tatalo ia outou filifili e piimau i luga o le afioga a le Atua e pei ona folafola atu i lenei konafesi aoao. Ma ou te tatalo ina ia mafai ona outou lagonaina le alofa atoatoa o le Alii mo outou, 3 i le suafa paia o Iesu Keriso, amene.