Tuafafine i Siona
O le a avea outou ma se malosiaga taua i le faapotopotoina o Isaraelu ma le foafoaina o se nuu o Siona.
O’u tuafafine peleina, ua faamanuiaina a’u e lauga i lenei taimi matagofie i le talafaasolopito o le lalolagi. O aso uma lava, tatou te latalata atu ai i le taimi ofoofogia o le a toe afio mai ai le Faaola o Iesu Keriso i le lalolagi. Ua tatou iloa nisi o mea e uiga i mea leaga o le a muamua mai i Lona afio mai, peitai ua malena o tatou loto i le olioli ma le to’a i le iloa foi o folafolaga matagofie o le a faataunuuina a’o le’i toe afio mai o Ia.
I le avea ai o ni afafine faapelepele o le Tama Faalelagi, ma o le avea ai o ni afafine o le Alii o Iesu Keriso i Lona malo, 1 o le a outou faia ai se vaega taua tele i vaitaimi taua o lumanai. Ua tatou iloa o le a afio mai le Faaola i se nuu o e ua faapotopotoina ma saunia e nonofo e pei ona sa faia e tagata o le nuu o Enoka. O tagata iina sa tasi i le faatuatua ia Iesu Keriso ma na matuai mama atoatoa o lea na ave a’e ai i latou i le lagi.
O le fetalaiga lenei a le Alii na faaalia mai o le mea o le a tupu i le nuu o Enoka ma le mea o le a tupu i lenei tisipenisione faaiu o le atoatoaga o taimi:
“Ma o le a oo mai le aso o le a mapu ai le lalolagi, peitai ae lei oo mai lena aso o le a faapouliuligia le lagi, ma o le a ufitia le lalolagi i se veli o le pogisa; ma o le a luluina le lagi, ma le lalolagi foi; ma o le a i ai puapuaga e tele i totonu o le fanauga a tagata, ae o loʼu nuu o le a Ou faasaoina;
“Ma o le a Ou auina atu i lalo mai le lagi le amiotonu; ma o le a Ou auina atu le upumoni i fafo mai le eleele e molimau atu i laʼu Toatasi na Fanaua; lona toetu mai le maliu; ioe, ma le toetutu mai foi o tagata uma; ma o le a Ou faia ia tafi le lalolagi i le amiotonu ma le upumoni e pei o se lolo, e faapotopoto mai i fafo laʼu au filifilia mai itu e fa o le lalolagi, i se nofoaga o le a Ou saunia, o se Aai Paia, ina ia mafai e loʼu nuu ona fusia i o latou sulugatiti, ma tulimatai i le taimi o loʼu alu atu; ona o iina o le a i ai loʼu fale fetafai, ma o le a taʼua ai o Siona, o se Ierusalema Fou.
“Ma sa fetalai mai le Alii ia Enoka: Ona feiloaʼi ai lea o oe ma lou aai atoa ma i latou iina, ma o le a tatou talia i latou i o tatou loto, ma o le a latou vaai mai ia te i tatou; ma o le a tatou fusi i o latou ua, ma o le a latou fusi foi i o tatou ua, ma o le a tatou sogi foi le tasi i le isi;
“Ma o le a iina loʼu nofoaga, ma o le a avea ma Siona, lea o le a sau mai foafoaga uma ua Ou faia; ma o le a mapu le lalolagi i va o le afe tausaga.” 2
O outou tuafafine, o o outou tama teine, o fanau teine a o outou tama teine, ma tamaitai ua outou faafaileleina o le a i ai i le ogatotonu o le fatuina o lena nuu o tagata o le a auai i le fegalegaleaiga matagofie faatasi ma le Faaola. O le a avea outou ma se malosiaga taua i le faapotopotoina o Isaraelu ma le foafoaina o se nuu o Siona o e o le a mafuta i le filemu i Ierusalema Fou.
Ua faia e le Alii, e ala mai i Ana perofeta, se folafolaga ia te outou. I aso popofou o le Aualofa, sa saunoa atu ai le Perofeta o Iosefa Samita i tuafafine, “Afai tou te ola ai e tusa ai ma o outou avanoa manaomia, o le a le mafai ona taofia agelu mai le avea ma a outou aumea mamae.” 3
O lena gafatia ofoofogia o loo taoto lea i totonu o outou, ma o loo ua saunia outou mo lena mea.
Na saunoa mai Peresitene Gordon B. Hinckley:
“Outou tuafafine … e le umiaina se nofoaga e itiiti ifo sona taua i le fuafuaga a lo tatou Tama mo le fiafia e faavavau ma le manuia o Lana fanau. O outou o se vaega e matua taua lava o lena fuafuaga.
“A aunoa ma outou e le mafai ona faagaoioi le fuafuaga. A na le seanoa ma outou e lofituina le polokalama atoa. …
“O outou taitoatasi o se afafine o le Atua, ua faaee i ai se tofi paia.” 4
Ua tuuina mai e lo tatou perofeta o i ai nei, o Peresitene Russell M. Nelson, le faamatalaga lenei o le vaega tou te faia e sauniuni ai mo le afio mai o le Faaola:
“O le a le mafai ona fua le faatosinaga a … tamaitai, e le gata i aiga ae faapea i le Ekalesia a le Alii, o ni avā, tina, ma tinamatutua; o ni tuafafine ma ni aunts; o ni faiaoga ma taitai; aemaise ai o ni faataitaiga aupito silisili ma ē puipuia ma le faamaoni le faatuatuaga.
“Na moni lenei mea i tisipenisione uma talu mai ona po o Atamu ma Eva. Ae o tamaitai o lenei tisipenisione e tulaga ese mai isi lava tamaitai aua e tulaga ese lenei tisipenisione mai se isi lava tisipenisione. O lenei tulaga ese ua aumaia ai avanoa ma tiutetauave.” 5
O lenei tisipenisione e tulaga ese i le mea o le a taitai i tatou e le Alii ia faapea ona saunia ai ina ia pei o le nuu o Enoka. Ua Ia faamatalaina e ala mai i Ana aposetolo ma perofeta le mea o le a aofia ai i lena suiga i se nuu o Siona.
Na aoao mai Elder Bruce R. McConkie:
“O vaitaimi o [Enoka] sa o se vaitaimi o le amioleaga ma le faatiapolo, o se vaitaimi o le pogisa ma le fouvale, o se vaitaimi o taua ma faatafunaga, o se vaitaimi na taitai atu ai i le faamamaina o le lalolagi e le vai.
“Ae peitai, sa faamaoni pea Enoka. Sa Ia ‘vaai i le Alii,’ ma talanoa ‘faafesagai’ ma ia e pei ona talanoa se tasi tagata ma le isi. (Mose 7:4.) Sa auina atu o ia e le Alii e alaga atu le salamo i le lalolagi, ma faatonuina o ia ia ‘papatiso atu i le suafa o le Tamā, ma le Alo, o lē ua tumu i le alofa tunoa ma le upumoni, ma le Agaga Paia, o lē e molimau e uiga i le Tamā ma le Alo.’ (Mose 7:11.) Na osia e Enoka feagaiga ma faapotopotoina se faalapotopotoga o soo moni, o i latou uma o e na oo ina matuai faamaoni lava, o lea na ‘afio mai ai le Alii ma mafuta ma lenei nuu, ma latou nonofo ai i le amiotonu,’ ma sa faamanuiaina mai luga. ‘Ma sa taʼua e le Alii lona nuu o Siona, ona sa tasi o latou loto ma tasi le mafaufau, ma sa mau i le amiotonu; ma sa leai se mativa i totonu o i latou.’ (Mose 7:18.) …
“Ina ua uma ona ta’ua e le Alii lona nuu o Siona, fai mai le mau, sa ‘fausia e [Enoka] se nuu lea sa ta’ua o le Nuu o le Paia, o Siona lava;’ ma o Siona, ‘na aveina a’e i le lagi’ lea ‘ua aveina aʼe i luga e le Atua i lona lava loto;” ma “mai i le taimi lena na alu atu ai upu, Ua sola Siona.’ (Mose 7:19, 21, 69.) …
“O lenei lava Siona lea na aveina a’e i le lagi o le a toe foi mai … pe a toe aumaia e le Alii ia Siona, ma o le a auai faatasi ona tagata ma le Ierusalema fou, lea o le a faatuina ai.” 6
Afai e faatomua le taimi ua tuanai, i le taimi o le toe afio mai o le Faaola, o afafine o e ua tuuto a’ia’i i a latou feagaiga ma le Atua o le a sili atu ma le afa o i latou o e ua saunia e faafeiloai o Ia pe a Ia afio mai. Ae po o le a lava le fuainumera, o a outou saofaga i le fatuina o le lotogatasi i tagata ua saunia mo lena Siona o le a sili mamao atu lava ma le afa.
O le a ou ta’u atu ia te outou le mafuaaga ou te talitonu ai o le a faapena. O loo ta’u mai i le Tusi a Mamona se tala e uiga i se nuu o Siona. Tou te manatua o le mavae ai o le aoaoina, alofaina, ma le faamanuiaina o i latou e le Faaola toetu lea “sa oo ina leai se finauga i le laueleele, ona o le alofa o le Atua sa mau i loto o tagata.” 7
O lo’u aafiaga ua aoaoina ai a’u e i ai i afafine o le Tama Faalelagi se meaalofa e tuuitiitia ai fouvalega ae uunaia ai le amiotonu faatasi ma lo latou alofa i le Atua, faapea ai ma le alofa o le Atua latou te faatupuina i totonu o i latou latou te auauna i ai.
Sa ou vaaia i lo’u talavou i taimi na faapotopoto ai si a matou paranesi toaitiiti i le fale na ou ola a’e ai. Sa na’o i ma’ua ma lo’u uso le au Perisitua Arona, sa na’o lou tamā le Perisitua Mekisateko. O le peresitene o le Aualofa o le paranesi sa o se tagata liliu mai, o lana tane sa le fiafia i lana auaunaga i le Ekalesia. O tagata o le au paia o tuafafine matutua uma lava sa leai se tasi na umia le perisitua i totonu o o latou aiga. Sa ou vaai i lo’u tina ma na tuafafine o alolofa, sii a’e, ma tausi e le tasi le isi i taimi uma. Ua ou iloa nei sa tuuina mai ai ia te a’u se vaaiga amata o Siona.
O la’u aoaoga i faatosinaga o tamaitai faamaoni sa faaauauina i se paranesi toaitiiti o le Ekalesia i Albuquerque, Niu Mekisiko. Sa ou maitauina le faletua o le peresitene o le paranesi, le faletua o le peresitene o le itu, ma le peresitene o le Aualofa o faamafanafanaina loto o tagata fou uma ma tagata liliu mai. O le Aso Sa na ou tuua ai Albuquerque, i le mae’a ai o le lua tausaga o le maitauina o faatosinaga a tuafafine iina, na fatuina ai loa le siteki muamua. O lea ua tuuina e le Alii se malumalu iina.
Na ou me’i atu i Boston, lea sa ou auauna ai i le au peresitene o le itu lea sa pulefaamalumalu i ni paranesi laiti na taape solo i setete e lua. Sa i ai finauga sa sili atu ma le faatasi ona fofoina e tamaitai agaalofa ma lotofaamagalo o e sa fesoasoani e faamalulu loto. O le Aso Sa sa ou tuua ai Boston, sa faatulagaina ai e se sui o le Au Peresitene Sili le uluai siteki i Masatusa. O loo i ai se malumalu iina i le taimi nei, e latalata i le mea sa nofo ai le peresitene o le itu. Na faatoagaina o ia i le Ekalesia, ma mulimuli ane valaauina e auauna o se peresitene o le siteki, sosoo ai ma le avea ma se peresitene o le misiona, sa faatosinaina e se ava faamaoni ma agaalofa.
Tuafafine, na tuuina mai ia te outou le faamanuiaga o le avea ma ni afafine o le Atua faatasi ma ni meaalofa faapitoa. Na outou aumaia ma outou i le lalolagi faitino se gafatia faaleagaga e faafailele ai isi ma ia sii a’e maualuga ai i latou agai atu i le alofa ma le mama lea o le a latou agavaa ai e nonofo faatasi i se faalapotopotoga o Siona. E le’i faafuaveta ona i ai le anavatau a le Aualofa, le uluai faalapotopotoga a le Ekalesia ua faapatino tonu mo afafine o le Tama Faalelagi, “E Le Uma le Alofa.”
O le alofa mama o le alofa le pona lea o Keriso. Ma o le faatuatua ia te Ia ma aafiaga atoatoa o Lana Togiola e le iu, o le a faaagavaa ai outou, ma i latou tou te alolofa ma auauna i ai, mo le meaalofa e sili ona matagofie ia nonofo i lena fegalegaleaiga ua loa ona faatalitali i ai ma folafolaina mai o Siona. O iina o le a outou avea ai outou ma tuafafine i Siona, e alofaina e le Alii lava ia ma i latou ua outou faamanuiaina.
Ou te molimau atu o outou o tagatanuu o le malo o le Alii i le lalolagi. O outou o afafine a se Tama Faalelagi agaalofa, o lē na auina mai outou i le lalolagi ma ni meaalofa tulaga ese sa faapea ona outou tautino atu e faaaoga e faamanuia ai isi. Ou te folafola atu ia te outou, o le a taitai outou e le Alii i le lima, e ala i le Agaga Paia. O le a muamua atu o Ia i o outou luma a o outou fesoasoani ia te Ia e saunia Lona nuu ia avea ma Lana Siona folafolaina. O lea ou te molimau atu ai i le suafa paia o Iesu Keriso, amene.