Atunuu Uma, Ituaiga ma Gagana
E mafai ona avea i tatou i o tatou lava ala ma vaega o le faataunuuina o valoaga ma folafolaga a le Alii—o le vaega o le faamanuiaina e le talalelei o le lalolagi.
Uso e ma tuafafine pele, talu ai nei na ou taitaiina ai se faamauga i le malumalu, a o mulimuli ai i taiala o le KOVITI-19. Faatasi ai ma le tamaitai ma le alii faaipoipo, o ni faifeautalai ua foi manuia mai ni misiona, o o laua matua ma o laua tei uma lava. Sa lei faigofie lenei mea. O le tamaitai faaipoipo o le lona iva lea o se fanau e toasefulu. Sa saofafai ona tei e toaiva i le faasologa, mai le ulumatua e oo i le uii, ioe, sa nonofo vāvā.
Sa taumafai le aiga ia avea o ni tuaoi lelei i soo se mea lava sa latou aumau ai. Ae peitai, e tasi se pitonuu sa le’i agalelei—ona, na fai mai le tina o le tamaitai faaipoipo, o i latou o ni tagata O Le Ekalesia a Iesu Keriso o le Au Paia o Aso e Gata Ai.
Sa fai e le aiga mea uma ia faia ai ni uo i le aoga, saofaga ma ia taliaina, ae sa le’i manuia. Sa tatalo le aiga ma talosaga ina ia faamaluluina loto.
I se tasi po, na manatu ai le aiga ua talia a latou talosaga, e ui sa o se auala sa le’i mafaufauina lava. Na mu lo latou fale ma faatamaia atoa ai. Peitai sa i ai se isi mea na tupu. Na faamaluluina e le afi ia loto o o latou tuaoi.
Na aoina mai e o latou tuaoi ma le aoga i le lotoifale ni lavalava, seevae, ma isi mea na manaomia e le aiga lea na mu uma a latou mea. O le agalelei na matala ai le loto malamalama. Sa le o le auala lea na faamoemoeina pe na mafaufauina e le aiga e taliina ai a latou tatalo. Ae ui i lea, sa latou faailoa atu le lotofaafetai mo mea na latou aoaoina e ala mai i aafiaga faigata ma tali sa le’i mafaufauina i talosaga loto faamaoni.
E moni lava, mo i latou e loto faatuatua ma mata e vaai ai, o le alofa mutimutivale o le Alii e faaalia a o feagai ai ma luitau o le olaga. O le faafetaiaia ma le faatuatua o luitau ma osigataulaga e aumaia ai faamanuiaga o le lagi. I lenei olaga faitino, tatou te ono le maua pe faatalitali foi mo nisi o mea mo se taimi, ae i le faaiuga, o le a tatou maua ai mea e sili atu ona taua. 1 O Lana folafolaga lena. 2
O la tatou folafolaga mo le luaselau tausaga i le 2020 e amata i le faaaofia ai o le folafolaga o’oo’o e faapea, “E alofa le Atua i Ana fanau i atunuu uma o le lalolagi.” 3 Ia i tatou taitoatasi i atunuu, ituaiga, gagana, ma tagata, 4 ua folafola, osifeagaiga, ma valaaulia i tatou e le Atua ia o mai e tofo i le tele o Lona olioli ma le agalelei.
Ua faamaonia i tusitusiga paia uma le alofa o le Atua mo tagata uma. 5 O lena alofa ua afifi ai feagaiga faaAperaamo, faapotopotoina o Ana fanau ua faataapeapeina, 6 ma Lana fuafuaga o le fiafia.
I se aiga o le faatuatua e le tatau ona i ai ni tagata ese, ni tagata aumau, 7 leai ni mauoa ma ni matitiva, 8 leai ni “isi” tagata tua. I le avea ai ma “nuu faatasi ma le au paia,” 9 ua valaaulia ai i tatou e sui le lalolagi mo le lelei atu, mai i totonu i fafo, e tasi le tagata, tasi le aiga, tasi le pitonuu i le taimi.
E tupu lenei mea pe a tatou ola ma faasoa atu le talalelei. I le popofou o le tisipenisione lenei, na maua ai e le Perofeta o Iosefa se valoaga matagofie e faapea, e finagalo le Tama Faalelagi i tagata uma i soo se mea ia iloa le alofa o le Atua ma maua Lona mana e ola ma sui ai.
O lena valoaga na maua iinei, i le fale ogalaau o le aiga o le au Samita, i Palamaira, Niu Ioka. 10
Faamaeaina i le 1998, o le fale o le au Samita ua toefauina i luga o lona uluai faavae. O le potumoe lenei i le fogafale lua e tutusa lava le tele e 18 i le 30 i le 10 futu (5.5 i le 9 i le 3m) ma le avanoa lea na sau ai Moronae o se avefeau faamamaluina mai le Atua i le taulealea o Iosefa i le afiafi o le aso 21 o Setema, 1823. 11
Tou te manatuaina le mea na faamatala e le Perofeta o Iosefa Samita:
“Sa fetalai mai [Moronae] … o i ai i le Atua se galuega mo ia e fai; ma e faapea o lona igoa o le a tauleleia ma tauleagaina i totonu o atunuu uma, ituaiga, ma gagana. …
“Sa fai mai [Moronae] o loo i ai se tusi ua teuina, … o loo i ai i totonu o lenei tusi le atoatoaga o le Talalelei tumau-faavavau.” 12
Tatou taofi ii. Tatou te tapuai i le Atua le Tama Faavavau ma Lona Alo o Iesu Keriso, ae le o le Perofeta o Iosefa po o se isi lava alii po o se tamaitai soifua.
Ae, mafaufau i auala ua faataunuuina ai valoaga ua tuuina mai e le Atua i Ana auauna. 13 O nisi e vave faataunuuina, o isi e mulimuli ane, ae e faataunuuina uma lava. 14 A tatou faalogo ma usitai i le agaga o valoaga a le Alii, e mafai ona avea i tatou i o tatou lava ala ma vaega o le faataunuuina o Ana valoaga ma folafolaga—o le vaega o faamanuiaina e le talalelei o le lalolagi.
O Iosefa sa o se alii talavou e 17 tausaga sa le’i mailoa, sa nofo i se nuu e tau le iloa, i se atunuu na fou lona tutoatasi. Vagana e moni, e mafai faapefea ona ia mafaufauina e faapea mai o le a avea o ia ma se meafaigaluega i le galuega a le Atua ma faaliliuina e ala i le meaalofa ma le mana o le Atua se tusitusiga paia o le a faapea ona lauiloa i soo se mea?
Ae peitai, ona e moni, e mafai e oe ma a’u ona molimau o lena valoaga ua faataunuuina e pei ona valaauliaina i tatou e fesoasoani ina ia faataunuuina.
Uso e ma tuafafine, i le salafa o le lalolagi, o i tatou taitoatasi ua auai i lenei konafesi aoao o Oketopa 2020 ua i ai i atunuu, ituaiga ma gagana o loo tautala i ai le valoaga.
O le taimi nei, e 196 atunuu ma teritori, o loo alala ai tagata O Le Ekalesia a Iesu Keriso o le Au Paia o Aso e Gata Ai, ma le 3,446 siteki o le Ekalesia i totonu o le 90 o i latou [atunuu ma teritori]. 15 Ua tatou aofia ai uma i le faataatiaga lautele ma totonugalemu o le malosiaga.
I le 1823, o ai na mafaufauina o le 2020 o le a tolu ni atunuu o le a silia ma le ta’i miliona tagata o lenei Ekalesia—o le Iunaite Setete, Mekisiko, ma Pasila?
Pe 23 ni atunuu, e sili atu ma le ta’i 100,000 tagata o le Ekalesia—tolu i Amerika i Matu, sefulufa i Amerika Tutotonu ma Amerika i Saute, tasi i Europa, fa i Asia, ma le tasi i Aferika? 16
Ua ta’ua e Peresitene Russell M. Nelson le Tusi a Mamona “o se vavega ofoofogia.” 17 Ua tautino mai ana molimau, “Ia iloa e atunuu uma, ituaiga, gagana, ma nuu.” 18 I aso nei, ua maua le konafesi aoao i gagana e 100. Ua molimau mai Peresitene Nelson e uiga ia Iesu Keriso ma Lana talalelei toefuataiina i atunuu e 138 ma e faaauau pea.
Na amatalia i kopi e 5,000 na lolomi o le uluai lomiga i le 1830 o le Tusi a Mamona, o nisi o le 192 miliona o kopi atoa po o vaega o le Tusi a Mamona ua lolomiina i gagana e 112. O faaliliuga o le Tusi a Mamona ua mafai foi ona mauaina e tagata lautele i le faatekinolosi. O lomiga lata mai nei o le Tusi a Mamona e aofia ai le tele o gagana e 23 o le lalolagi e tautatala ai le faitau 50 miliona pe sili atu foi, o gagana moni a nisi o le faitau 4.1 piliona o tagata.19
O mea laiti ma faatauvaa—ua faapea ona valaaulia ai i tatou taitoatasi e auai—e faataunuuina ai mea tetele.
Mo se faataitaiga, i se konafesi faalesiteki i Monroe, Iuta, e 2,200 le faitau aofai, sa ou fesili ai pe toafia na auauna atu faamisiona. Sa toetoe sii uma i luga lima. I tausaga e le’i mamao atu, mai le siteki lena e tasi, e 564 faifeautalai na auauna atu i setete uma e 50 o le I.S. ma atunuu e 53—i konetineta uma vagana ai le Anetatika.
E faatatau i le Anetatika, e oo lava i Ushuaia i le faatausiusiuga o le itu i saute o Atenitina, sa ou vaaia ai le faataunuuina o valoaga a o faasoa atu e o tatou faifeautalai le talalelei toefuataiina a Iesu Keriso i se nofoaga e ta’u “o le tulu’iga o le lalolagi.” 20
O le ata tele na faia e faavaa o a tatou voluma e fa o le Au Paia 21 ua faaalia ai se ie lalaga o le lalolagi atoa o fua o le talalelei ola e sau mai i Au Paia faamaoni i soo se mea lava. O le talafaasolopito o la tatou Ekalesia ua taulaina i molimau ola ma malaga o le talalelei a tagata taitoatasi o le au paia, e aofia ai Maria Uitimera, le tuafafine faamaoni o le na faaali i ai e Moronae papatusi o le Tusi a Mamona. 22
O le a oo mai ia Ianuari 2021, ia a tatou mekasini fou e tolu mo le Ekalesia i le lalolagi atoa—o le Uo, Mo Le Malosi o le Autalavou, ma le Liahona—e valaaulia tagata uma ia auai ma faasoa mai aafiaga ma molimau i la tatou faalapotopotoga o le faatuatua i le lalolagi atoa. 23
Uso e ma tuafafine, a o faateleina lo tatou faatuatua i le Tama Faalelagi ma Iesu Keriso, ola i upumoni o le talalelei ma maua feagaiga paia, ma suesue, manatunatu loloto, ma faasoa atu e uiga i le Toefuataiga faifai pea, ua tatou auai i le faataunuuina o le valoaga.
Ua tatou suia i tatou lava ma le lalolagi i se mamanu o le talalelei e faamanuiaina ai olaga i soo se atunuu.
Fai mai se tuafafine Aferika, “O le auaunaga faaleperisitua a lo’u toalua ua faateleina ai lona onosai ma lona agalelei. Ae ua avea au o se avā ma se tina lelei atu.”
Fai mai se tagata faufautua i pisinisi faavaomalo taualoa i le taimi nei i Amerika Tutotonu, ao le’i ona mauaina le talalelei toefuataiina a le Atua, sa ola o ia i magaala ma sa leai se faamoemoe. O le taimi nei ua maua e lona aiga le faasinomaga, faamoemoe, ma le malosi.
E tausi e se tama talavou i Amerika i Saute se lafu moa ma faatau atu o latou fuamoa e fesoasoani e faatau ai faamalama mo le fale o loo fau e lona aiga. Na te totogi muamua lana sefuluai. O le a ia vaai moni lava i le matala mai o pupuni o le lagi.
I Four Corners, i sautesisifo i le Iunaite Setete, e toto ai e se aiga o Tagatanuu moni o Amerika se toga rosa matagofie e totogoa’e i le toafa, o le faailoga o le faatuatua i le talalelei ma le ola faalagolago o le tagata ia te ia lava.
O se tagata na sao mai le matuitui oona o taua faavaomalo, o se uso i Sautesasae i Asia, sa faanoanoa i le leai o se uiga o le olaga. Na ia maua le faamoemoe i se miti faapea na uu e se tagata sa la vasega se fata faamanatuga ma molimau atu e uiga i sauniga faaola ma le Togiola a Iesu Keriso.
Ua valaaulia i tatou i soo se mea e le Tama Faalelagi ia lagona Lona alofa, ia aoao ma tuputupu a’e e ala i le aotauina, galuega faamamaluina, auaunaga o le ola tutoatasi, ma mamanu o le agalelei ma le fiafia tatou te maua i Lana Ekalesia toefuataiina.
A o tatou agai atu e faalagolago i le Atua, o nisi taimi e ala atu i aioiga i o tatou taimi e sili ona pogisa, tuuatoatasi, ma le le mautonu, tatou te iloa ai e silafia lelei e Ia i tatou ma alofa ia i tatou e sili atu i lo tatou iloa po o lo tatou alofa ia i tatou lava.
O le pogai lea tatou te manaomia ai le fesoasoani a le Atua i le fatuina o le faamasinoga tonu tumau, tutusa, le faaituau, ma le filemu i o tatou aiga ma afioaga. O lo tatou tala aupito moni, nofoaga ma le aofia ai, sili ona moni, ma sili ona loloto, e oo mai pe a tatou lagonaina le alofa togiola o le Atua, saili le alofa tunoa ma vavega e ala i le Togiola a Lona Alo, ma faatuina ni sootaga tumau e ala i feagaiga paia.
O le agalelei ma le atamai faalelotu e manaomia i le lalolagi gaogaosa, vavaō, ma leaga i aso nei. O le a se isi auala e mafai ai ona tatou faafouina, musuia, ma faamalamalama le agaga o le tagata? 24
O le totoina o laau i Haiti ua na’o le tasi lea o faataitaiga mai le faitau selau o faataitaiga o tagata e o mai faatasi e fai mea lelei. O tagata i le lotoifale, e aofia ai le 1,800 o tagata o la tatou Ekalesia, lea na foaiina atu laau, na faapotopoto e toto ni laau na lata i le 25,000. 25 O le galuega faatino i tausaga e tele o le toe totoina o le vaomatua, ua uma ona totoina le silia ma le 121,000 o laau. Ua faamoemoe ia toto nisi laau e faitau sefulu afe.
O le taumafaiga tuufaatasi ua maua ai le paolo, faasao ai le palapala, ma tuuitiitia ai lologa i le lumanai. Ua faamatagofie ai afioaga, atinae ai alalafaga, faamalie ai le fiaai, ma faafailele ai le agaga. A e fesili i tagata Haiti po o ai o le a seleselea fualaau ‘aina mai nei laau, latou te fai mai, “O ai lava e fia taumafa.”
O le 80 pasene o le faitauaofai o le lalolagi e fesootai i mea taulotu. 26 E faigofie ona tali atu faalapotopotoga taulotu i manaoga faavavave pe a mavae ni faalavelave faalenatura, faapea foi ma manaoga faaumiumi mo taumafa, malutaga, aoga, faitau ma le tusitusi, ma aoaoga faamasani mo galuega. I le salafa o le lalolagi, ua fesoasoani ai o tatou au paia, uo, ma le Ekalesia i afioaga ia lagolago i tagata sulufa’i ma tuuina atu le suavai, mea mo le tausiga o le tumama, feaveaiga o tagata e le atoatoa le malosi, tausiga o vaaiga—e tasi le tagata, tasi le afioaga, tasi le laau i le taimi. 27 O soo se mea, tatou te taumafai ai ia avea o ni matua lelei ma ni tagatanuu lelei, ia saofaga i o tatou pitonuu ma faalapotopotoga, e aofia ai le ala atu i Galuega Alofa a le Au Paia o Aso e Gata Ai. 28
Ua tuuina mai e le Atua ia i tatou le faitalia e fai ai faaiuga lelei—ma le tiutetauave o faaiuga lelei. Ua fetalai mai le Alii, “O A’u, o le Alii le Atua, ua faasaolotoina outou, o lea ua outou saoloto moni ai.” 29 I le folafolaina atu o le “saolotoga i le tafeaga,” 30 ua folafola mai ai e le Alii Lana Togiola ma o ala o le talalelei e mafai ona motusia ai noataga faaletino ma faaleagaga. 31 O le alofa mutimutivale, o lenei saolotoga togiolaina e tau atu ia i latou o e ua mavae atu ma le olaga faitino.
I ni nai tausaga ua mavae atu, na ta’u mai ai ia te au e se faifeau i Amerika Tutotonu, o loo ia suesueina “le papatisoga mo e ua maliliu” a le Au Paia o Aso e Gata Ai. “E foliga mai e tauamiotonuina,” le tala a le faifeau, “e ofoina atu e le Atua i tagata uma le avanoa e maua ai le papatisoga, e le afaina po o anafea po o fea foi na latou ola ai, vagana ai fanau iti, o e ‘o ola ia Keriso.’ 32 Na ta’ua e le faifeau, “O loo tautala le Aposetolo o Paulo e uiga i le faatalitali o e ua maliliu i le papatisoina ma le toetu.” 33 Ua folafola atu e sauniga sui o le malumalu o atunuu uma, ituaiga ma gagana e leai se tasi e tatau ona “tumau, i le oti, o seoli, ma le tuugamau.” 34
A o tatou maua le Atua, o nisi taimi o tali e le’i mafaufauina o tatalo e ave atu ai i tatou mai le auala, aumai i tatou i afioaga, tuli ese le pogisa mai o tatou loto, ma taiala i tatou ia maua le sulufaiga faaleagaga ma aofia ai i le agalelei o Ana feagaiga ma le alofa tumau.
O mea maoae e masani ona amatalia i mea iti, ae e faaalia vavega a le Atua i aso uma lava. Tatou te matuai faafetai mo le meaalofa faalelagi o le Agaga Paia, le Togiola a Iesu Keriso, ma le aoaoga faavae ua faaalia mai, sauniga, ma feagaiga o loo maua i Lana Ekalesia toefuataiina ua faaigoaina i Lona suafa.
Tau ina ia tatou talia ma le olioli le valaaulia a le Atua ia maua ma fesoasoani e faataunuu Ana faamanuiaga folafolaina ma valoiaina i atunuu, ituaiga ma gagana uma, ou te tatalo atu ai i le suafa paia ma le mamalu o Iesu Keriso, amene.