O Sosaiete e Gafataulimaina
Afai e lava i tatou ma lava o tatou tuaoi e taiala o tatou olaga i le upumoni a le Atua, o le a anoanoai uiga mama ma paia o loo manaomia i sosaiete uma.
Oka se matagofie o le aufaipese o loo lagiina le Faaola matagofie.
I le 2015, sa faamaonia aloaia ai e Malo Aufaatasi le mea sa ta’ua “O Le Polokalama mo Atina’e Gafataulimaina 2030.” Sa faamatalaina o se “mamanu fefaasoaai mo le filemu ma le manuia o tagata ma le paneta, i le taimi nei ma i le lumanai.” O le Polokalama mo Atina’e Gafataulimaina e aofia ai sini e 17 e tatau ona oo atu i le tausaga e 2030 ua ausia, e pei o le leai se mativa, leai se fiaai, a’oga auau mama, avanoa tutusa mo itupa, suavai mamā ma le tumamā, ma galuega lelei. 1
O le manatu autu mo atina’e gafataulimaina, o se manatu malie ma le taua. Peitai, e sili atu ona faavavevave, o le fesili lautele atu o sosaiete e gafataulimaina [ia manaoga]. O a mea faavae e gafataulimaina ai se sosaiete ua tupu olaola, ua siitia ai le fiafia, alualu i luma, filemu, ma le soifua manuia o ona tagata? O loo i ai a tatou faamaumauga faatusipaia o ni sosaiete se lua na tupu olaola. O le a se mea e mafai ona tatou aoaoina mai ia i latou?
I aso anamua, sa tala’i atu ai e le peteriaka maoae, le perofeta o Enoka le amiotonu ma “sa fausia e ia se aai sa taʼua o le Aai Paia, o Siona lava” 2 Ua tusia faapea “sa taʼua e le Alii lona nuu o Siona, ona sa tasi o latou loto ma tasi le mafaufau, ma sa mau i le amiotonu; ma sa leai se mativa i totonu o i latou.” 3
“Ma sa faamanuia e le Alii le laueleele, ma sa faamanuiaina i latou i luga o mauga, ma i luga o mea maualuluga, ma sa olaola.” 4
O le seneturi-muamua ma le lona lua-i le Lalolagi i Sisifo sa lauiloa o sa Nifaē ma sa Lamanā o loo aumaia ai foi se isi faataitaiga iloga o se sosaiete na lauolaola. Ina ua tuanai le galuega ofoofogia a le Faaola toetu ia i latou, “sa latou savavali e tusa ma poloaiga na latou maua mai lo latou Alii ma lo latou Atua, ma ola pea i le anapogi ma le tatalo, ma i le potopoto soo e tatalo ma faalogologo i le afioga a le Alii. …
“Ma sa leai se matau’a, po o ni feeseeaiga, po o ni faanunununu, po o ni faitaaga, po o ni pepelo, po o ni fasiotiga tagata, po o soo se mea faamataaitu; ma e moni e le mafai ona i ai o ni tagata e sili atu ona fiafia i totonu o tagata uma na foafoa e le aao o le Atua” 5 [i lo latou].
O sosaiete i nei faataitaiga e lua sa lagolagoina i faamanuiaga mai le lagi na tutupu mai lo latou tuuto atoa e ola i poloaiga sili e lua: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa” ma le “E te alofa atu i lē lua te tuaoi, ia pei o oe lava ia te oe.” 6 Sa latou usiusitai i le Atua i o latou olaga patino, ma sa latou tausia o le tasi ma le isi i le uelefea faaletino ma faaleagaga. I upu o le Mataupu Faavae ma Feagaiga, o sosaiete nei “e taitoatasi le tagata ma saili i le lelei o le la te tuaoi, a o faia mea uma i le manatu tasi i le mamalu o le Atua.” 7
Ae paga lea, e pei ona ta’ua e Elder Quentin L. Cook i lenei taeao, o le sosaiete sili o loo faamatala mai i le 4 Nifae o le Tusi a Mamona sa le’i tumau i talaatu o lona seneturi lona lua. O le gafataulimaina e le mautinoa ma o se sosaiete olaola e mafai ona i ai le taimi e pa’ū ai pe afai na te lafoa’ia uiga mama silisili ia e faatumauina lona filemu ma le manuia. I le tulaga lea, o le gauai atu i faaosoosoga a le tiapolo, “na amata ai [e tagata] ona vaevaeina i ni vasega; ma sa amata ona latou faatutuina ni ekalesia mo i latou lava ia maua ai le oa, ma amata ai ona latou faafitia le ekalesia moni a Keriso.” 8
“Ma sa oo ina ua mavae atu le tolu selau o tausaga, sa matua amioleaga tele lava tagata uma o le nuu o Nifae ma sa Lamanā ua pei lava le tasi o le isi.” 9
E oo atu i le faai’uga o le isi seneturi, ua faitau miliona ua maliliu i lo latou lava fevataua’i, ma o lo latou malo sa nofofilemu ua tuuitiitia i ituaiga fetaua’i.
O le mafaufau i lenei mea ma isi faataitaiga o sosaiete na lauolaola muamua ae mulimuli ane toilalo, ou te manatu ai e saogalemu le faapea atu, pe a oo ina fulitua tagata ma liliuese mai le lagona o lo latou tiute o le tali atu i le Atua ma amata ona faalagolago i le “lima o le tagata,” e oo mai puapuaga. O le faalagolago i le lima o le tagata o le le amanaiaina lea o le Tusitala paia o aia tatau a tagata ma le malualii o tagata ma o le tuu atu lea o le faamuamua aupito maualuga i ‘oa, pule, ma viiga o le lalolagi (ae masani ona ulagia ma sauaina i latou o e mulimuli i se isi tulaga faatonuina. Ae ui i lea, o i latou o i sosaiete ua gafataulimaina o loo sailia, e pei ona fai mai le Tupu o Peniamina, ina ia “tuputupu ae i le malamalama o le mamalu oi ia na foafoaina [i latou], po o i le malamalama o le mea ua tonu ma moni.” 10
O faalapotopotoga o aiga ma tapuaiga na taua tele mo le faamanuiaina o tagata taitoatasi ma nuu i uiga mama e lagolagoina ai se sosaiete malosi. O nei uiga, ua mauaa i tusitusiga paia, e aofia ai le amiosa’o, tiutetauave ma le tali atu o le tagata lava ia, agaalofa, faaipoipoga ma le faamaoni a’ia’i i le faaipoipoga, faaaloalo mo isi ma meatotino a isi, auaunaga, ma le tatau ai ma le malualii o le galue, faatasi ma isi.
Na tusia e se Faatonu mo soo se lomiga, o Gerard Baker se koluma i le amataga o le tausaga nei i le Wall Street Journal e faamamaluina ai lona tama, o Frederick Baker, i le aso soifua lona 100 o lona tama. Sa taumatemate e Baker ia mafuaaga o le umi o le soifua o lona tama ae ona ia faaopoopo lea i ai o mafaufauga nei:
“E ui atonu o loo matou mananao uma e fia iloa le mealilo o se olaga umi, e tele taimi ou te lagona ai e sili atu pe a o matou tuutoina se taimi tele e tau fuafua ai po o le a le mea e ala ai ona lelei se olaga. O iina la, ua ou mautinoa ai ua ou iloaina le mealilo a lo’u tama.
“E sau o ia mai se vaitau sa iloga i tiute, ae le o mea e maua fua; i tiutetauave faaagafesootai, ae le o avanoa mo le tagata lava ia. O le mataupu faavae faaosofia muamua lava i le aluga o lona seneturi atoa o se faautautaga o matafaioi—i le aiga, Atua, atunuu.
“I se vaitau sa fuaao ai taunuuga o aiga malepelepe, o lo’u tama o se tane tuuto i lona toalua o le 46 tausaga, o se tama sa tumu i tiute mo se fanau e toaono. Sa lei i ai se taimi na sili ona mata’ituina ma taua nai lo le taimi na mafatia ai o’u matua i le mala sa le’i mafaufauina o le maliu o se la tama. …
“Ma i se vaitau sa matuai faateteleina ai le uiga ese o lotu, sa ola lo’u tama o se Katoliko mao’i, faamaoni, ma se talitonuga e le maluelue i folafolaga a Keriso. E moni, o nisi taimi ou te mafaufau ai sa umi tele ona ola o ia ona sa saunia lelei o ia e oti nai lo se isi lava na ou iloa.
“O a’u o se tagata laki—na faamanuiaina i le lelei o se a’oga, o lo’u lava aiga matagofie, o ni nai manuia faalelalolagi sa le’i onomea mo au. Ae po o le a lava lo’u mitamita ma le lotofaafetai na ou lagonaina, sa gase lava i lo’u mitamitaga ma le lotofaafetai i le tagata o lē, sa le’i faafitauli, sa aunoa ma se faamoemoeina o se taui po o se faailoaga aloaia, ae sa ola lava—mo se seneturi—faatasi ma tiute faatauvaa, matafaioi ma, taualuga i olioliga o le ola i se olaga mama.” 11
O le taua o lotu na manatu ai ma le faatuatuaga faalelotu, sa lilifa ifo i le tele o atunuu i tausaga talu ai nei. Ua manatu se faitau faatupulaia o tagata e faapea o le talitonuga i ma le lotonuu i le Atua e le manaomia mo le faamaoni e tatau ai i tagata taitasi po o sosaiete i le lalolagi i ona po nei. 12 Ou te manatu o le a tatou ioe uma e faapea o i latou o ē le faailoa maia se talitonuga faalelotu, e mafai ona avea, ma e tele lava o ni tagata lelei, ma amio mama. Peitai, o le a tatou le ioe, faapea e tupu lenei mea e aunoa ma le tosinaga faalelagi. O loo ou faasino atu i le Malamalama o Keriso. Na tautino mai le Faaola, “O au o le malamalama moni ua faamalamalama ai tagata uma e o mai i le lalolagi.” 13 Pe o silafia pe leai, o alii uma, tamaitai, ma tamaiti o talitonuga faalelotu uma, nofoaga, ma taimi ua faatumulia i le Malamalama o Keriso ma o le mea lea, ua i ai le lagona o le sa’o ma le sese lea e tele ina tatou ta’ua o le lotofuatiaifo. 14
Ae ui o lea, a oo ina tuueseese e le lalolagi le uiga mama faaletagata lava ia ma faalenuu mai se matafaioi o le tali atu i le Atua, ua na tipiesea le laau mai ona a’a. O le na o le faalagolago i le aganuu ma aga masani, o le a lē lava lea e lagolago ai le uiga mama i le sosaiete. Pe a oo ina leai se atua maualuga atu i lo se tasi ma ua le sailia se mea sili atu ona lelei nai lo le faamalieina o ona lava mana’oga ma mea e fiafia i ai, o le a faaalia lava aafiaga i se taimi.
Mo se faataitaiga, o se sosaiete lea e na o le pau le popo’ega e uiga i gaoioiga faalefeusuai o le ioega a le tagata, o se sosaiete ua fano. O le mulilua, feusuaiga faataaloga i vai, faapa’ū pepe i le faitalia, 15 o fanau e fananau mai i matua nonofo faapouliuli, o nisi ia o fua oona e tulai mai i le ola lē mama e faatagaina e fouvalega faalefeusuai. O isi taunuuga e ese mai ai ia e galulue faasagatau i le gafataulimaina o se sosaiete ola maloloina, ua aofia ai le faatupula’ia o fanau o loo ola a’e i le mativa e aunoa ma faatosinaga lelei a ni tamā, o nisi taimi i le gasologa o ni augatupulaga se tele, o fafine e tauamoina na o i latou mea e tatau ona avea o ni tiutetauave e tausoa faatasi; ma matua’i lē lava ai le a’otauina a o poloaiina a’oga, pei o isi faalapotopotoga, e tau faufau le toilalo popo i totonu o le aiga. 16 E faaopoopo atu i nei faaletonu faaleagafesootai, o tulaga e le mafaufauina o le lotomomoia ma le faanoanoa taitoatasi—le faatafunaga faalemafaufau ma faalelagona e oo mai i ē ta’usalaina ma ē ta’umamaina.
Ua folafola mai e Nifae:
“Oi talofa ia te ia o lē e faalogo i mataupu a tagata, ma teena le mana o le Atua, ma le meaalofa a le Agaga Paia! …
“… Oi talofa ia te i latou uma o ē e tetete, ma ua feitai ona o le upumoni a le Atua!” 17
I se eseesega, o la tatou savali fiafia i a tatou fanau, ma i tagata soifua uma e faapea “o le upumoni a le Atua” e faasino mai ai se ala e sili atu, pe faapei o la Paulo, “o se ala e silisili ona lelei,” 18 o se ala i le fiafia patino ma le soifua manuia o le nuu i le taimi nei ma i le filemu e faavavau ma le olioli i le olaga a sau.
O le afioga a le Atua e faasino i upumoni autu o loo fatu ai Lana fuafuaga o le fiafia mo Lana fanau. O nei upumoni e faapea, o loo soifua le Atua; o Ia o le Tama Faalelagi o o tatou agaga; e avea o se faaaliga o Lona alofa, ua Ia tuuina mai ai poloaiga ia e taitai atu ai i se atoaga o le olioli faatasi ma Ia; o Iesu Keriso o le Alo o le Atua ma o lo tatou Togiola; na puapuagatia o Ia ma sa maliu e togiola ai mo agasala i luga o tuutuuga o lo tatou salamo; na toetu mai o Ia mai le oti, ma faataunuuina ai le Toetutu o tagata uma; ma o le a tatou tutu uma atu i Ona luma ina ia faamasinoina, o lona uiga, e tali atu mo o tatou olaga. 18
E iva tausaga i le mea sa faaigoa “o le nofoaiga a faamasino,” i le Tusi a Mamona, na faamavae mai ai le perofeta o Alema i lona tulaga o le faamasino sili ae tuuina atu lona taimi atoa i lana taitaiga o le Ekalesia. O lona faamoemoega o le tautalagia o le faamaualuga, sauaga, ma le losilosi ua tuputele i tagata aemaise i totonu lava o tagata o le Ekalesia. 20 E pei ona matau i se taimi e Elder Stephen D. Nadauld, “O le faai’uga musuia [a Alema] e le ina ia faaalu ai se taimi tele e taumafai ai e faia ma faamalosia nisi tulafono e faasa’o ai amioga a lona nuu, ae ia tautala atu ia i latou i le afioga a le Atua, e aoao atu le aoaoga faavae ma ia avea lo latou malamalama i le fuafuaga o le togiola e taitai atu ai i latou ia suia a latou amioga.” 21
E tele na’ua mea e mafai ona tatou faia o ni tuaoi ma tagatanuu e saofagā ai i le gafataulimaina ma le manuia o sosaiete o loo tatou ola ai, ma e mautinoa o la tatou auaunaga e sili ona taua ma tumau, o le aoao atu lea ma ola i upumoni ua i ai faatasi i le fuafuaga sili a le Atua o le togiola. E pei ona ta’ua mai i upu o le viiga:
Faatuatua o tatou tama, tatou alofaina
O le uo ma le fili i a tatou tauiviga,
Ma aoao atu oe, aua e mafai e le alofa,
I upu agalelei ma le ola mama. 22
Afai ua lava i tatou ma lava o tatou tuaoi e tauivi e faia a tatou faaiuga ma taiala o tatou olaga i le upumoni a le Atua, o le a anoanoai uiga mama ma paia o loo manaomia i sosaiete uma.
I Lona alofa, na ofoina mai ai e lo tatou Tama Faalelagi Lona Alo Pele e Toatasi na Fanaua, o Iesu Keriso, ina ia tatou maua le ola e faavavau. 23
“E lē faia e [Iesu Keriso] se mea vagana ai ua mo le manuia o le lalolagi; ona ua alofa o ia i le lalolagi, e oo ina tuu ai lava e ia i lalo lona lava soifua ina ia mafai ona ia aumai o tagata uma ia te ia. O le mea lea, ua lē poloaia ai e ia se tasi ia latou lē taumamafa i lana olataga.
“Faauta, po ua fetalai mai ea o ia i se tasi, fai mai: Alu ese atu mai ia te a’u? Faauta, ou te fai atu ia te outou, E leai; ae ua fetalai mai o ia: O mai ia te a’u outou tuluiga uma o le lalolagi, faatau le susu ma le meli, e aunoa ma se tupe ma aunoa ma se tau.” 24
Tatou te tautino atu lenei mea ma le “paia o le loto, i le agaga o le agamalu,” 25 ma i le suafa o Iesu Keriso, amene.