Mana e Mausali
Ua na o le faatuatua ma le afioga a le Atua e tumu ai o tatou agaga e lava ma totoe e lagolagoina ai i tatou—ma mafai ai ona tatou maua Lona mana
I le toeiloiloina o aoaoga a lo tatou perofeta pele, o Peresitene Russell M. Nelson, sa ou maua ai sa ia faaaogaina soo se upu i le tele o ana saunoaga. O le upu o le mana.
I le konafesi aoao muamua ina ua mavae le lagolagoina o ia o se Aposetolo sa talanoa ai Peresitene Nelson e uiga i le mana.1 Sa faaauau ai pea lava ona aoao mai o ia e uiga i le mana i le tele o tausaga. Talu mai ona tatou lagolagoina Peresitene Nelson e avea ma o tatou perofeta, sa ia aoao mai e uiga i le mataupu faavae o le mana—patino i le mana o le Atua—ma le ala e mafai ai ona tatou mauaina. Na ia aoao maia le ala e mafai ai ona tatou utuvai mai le mana o le Atua a o tatou auauna atu i isi,2 le auala e valaaulia ai e le salamo le mana o Iesu Keriso ma Lana Togiola i o tatou olaga,3 ma le ala--e faamanuiaina ai--e le mana o le perisitua ma le pule a le Atua tagata uma o e osia ma tausia feagaiga ma Ia.4 Na molimau mai Peresitene Nelson e faapea e tafe mai le mana o le Atua i tagata uma o e faaeeina i le malumalu pe a latou tausia a latou feagaiga.5
Sa faapitoa le uunaia malosi a’u i se lu’i na tuuina mai e Peresitene Nelson i le konafesi aoao ia Aperila 2020 Sa ia aoao mai i tatou e “suesue ma tatalo ia a’oa’o atili e uiga i le mana ma le poto lea na maua ai ou faaeega ia—pe o le a e maua ai ou faaeega paia.”6
I le tali atu i lenei lu’i, sa ou suesue ma tatalo sa ou aoaoina ai ni nai mea aoga e uiga i le mana ma le poto lea ua faaeeina ai a’u—pe o le a faaeeina ai a’u.
O le malamalama i mea e tatau ona tatou faia e maua ai le mana o le Atua i o tatou olaga e le faigofie, ae ua ou iloa e mafai e ala i le suesueina i o tatou mafaufau ma le tatalo ia faamalamalamaina i tatou e le Agaga Paia.7 Sa ofoina mai e Elder Richard G. Scott se faauigaga manino o le mana o le Atua: “o le mana e fai ai mea e tele atu nai lo o mea e mafai ona tatou faia na o i tatou lava.”8
O le faatumuina o o tatou loto ma o tatou agaga i le afioga a le Atua ma le faavae o le faatuatua ia Iesu Keriso e taua tele i le utuvai mai le mana o le Atua e fesoasoani ia i tatou i nei taimi faigata. A aunoa ma le mauaina o le afioga a le Atua ma le faatuatua ia Iesu Keriso ia o’oo’o ifo i o tatou loto, e mafai ona mou atu a tatou molimau ma le faatuatua, ma e mafai foi ona tatou le maua le mana o loo finagalo le Atua e tuu mai ia i tatou. E le lava le faatuatua e papa’u. Ua na o le faatuatua ma le afioga a le Atua e tumu ai o tatou agaga e lava ma totoe e lagolagoina ai i tatou—ma mafai ai ona tatou maua Lona mana
A o ma tausia ma Sister Johnson le ma fanau, sa ma faamalosiauina i latou taitoatasi e aoao ma tātā se mea faimusika. Ae na pau le taimi na ma faatagaina ai le ma fanau e fai lesona faamusika, pe afai e fai la latou vaega ma faata’ita’i a latou mea faimusika i aso taitasi. I se tasi Aso Toonai, sa fiafia lava le ma afafine o Jalynn e alu e taaalo ma ana uo, ae o la e le’i faata’ita’ia lana piano. O le iloaina sa ia tuuto atu i le faata’ita’i mo le 30 minute, sa ia manatu ai e seti le taimi ona sa lei manao o ia e silia le taimi e faata’ita’i ai, tusa lava pe tasi se minute e umi ai nai lo le mea e manaomia.
A o savali e pasi atu i le ogaumu faavevela meaai agai i le piano, sa tu o ia ma oomi ni faamau. Ae nai lo le setiina o le taimi, sa ia setiina le ogaumu faavevela meaai e kuka ai mo le 30mminute ma oomi loa le ki amata. Pe tusa ma e 20 minute o le faataitaiga, sa toe savali atu o ia i le umukuka e siaki pe toe fia se taimi o totoe ae alu atu ua mumu le ogaumu.
Ona ia faataalise atu lea i tuafale a o fai a’u galuega i tua, ma faataio atu ua mu le fale. Sa ou tamoe vave i totonu o le fale, ma e sa’o lava la, ua talali le ogaumu faavevela.
I se taumafaiga e laveai lo matou fale mai le mu, sa ou aapa atu ai i tua o le ogaumu, ma se’i ese le palaka ae faaaoga le uaea e sisi ese ai le ogaumu mai le fata. Ma le faamoemoe e avea ma tama toa ma faasaoina le aso faapea lo matou fale, sa ou lialia’ia faataamilo ai le ogaumu i le uaea o le paoa e faamamao ese ai mai lo’u tino, alu atu i tuafale, ma ou lia’ia loa le ogaumu i le mutia. O iina sa mafai ai ona matou tapeina le sasao o le afi i se faagaau.
O le a le mea na sese? E manaomia e le ogaumu faavevela se mea e mitiia ai lona malosiaga, ma ina ua leai se mea na i ai i totonu e mitiia ai le malosiaga, o lea na mitiia ai e le ogaumu lava ia le malosiaga, ma oo ai ina aasa, ma mafai ai ona mumu, ma faatamaiaina ai ia lava i se afimumu ma le lefulefu.9 Sa sasao ma mu atoa le matou ogaumu aua sa leai se mea na i totonu.
E faapena foi, o i latou e i ai le faatuatua ma le afioga a le Atua i le ta’ele o o latou loto, o le a mafai ona mitiia ma faatoilaloina u fanafana mu, lea o le a auina moni mai e le fili e faaumatia i tatou.10 A leai, e mafai ona le tumau lo tatou faatuatua, faamoemoe, ma le talitonuga maumaututu, ma e faapei o le ogaumu faavevela na leai se mea e i ai, e mafai foi ona tatou pagatia ai.
Ua ou aoaoina e faapea, o le teulotoina o le afioga a le Atua i le taele o lo’u agaga, faaopoopo i ai ma le faatuatua i le Alii o Iesu Keriso ma Lana Togiola, e mafai ai ona ou utuvai mai le mana o le Atua e faatoilalo ai le fili ma soo se mea na te ono tau’ai mai ia te au. A o tatou fetaiai ma luitau, e mafai ona tatou faalagolago i folafolaga a le Alii na aoao mai e Paulo: “Aua ua le foaiina mai e le Atua ia te i tatou le Agaga e mata’u ai, a o le Agaga e faamaosi ai, ma alofa ai, ma mafaufau tonu ai.”11
Ua tatou iloa o le Faaola na “tupu, ma ua malosi Lona loto, ua tumu i le poto; ua ia te Ia foi le alofa o le Atua.”12 Ua tatou iloa a o tupu o Ia ma ua matua, “Na tupu le poto ma le tino o Iesu, ma ua alofagia o ia e le Atua atoa ma tagata.”13 Ua tatou iloa foi e oo atu i le taimi e amata ai Lana galuega, o i latou na faalogo ia te ia “sa matuā ofo i latou i lana mataupu: aua o lana fetalaiga sa i ai le pule.”14
E ala i sauniuniga, sa tupu a’e ai le Faaola i le mana ma sa mafai ai ona ia teena faaosoosoga uma a Satani.15 A o tatou mulimuli i faataitaiga a le Faaola ma sauniuni e ala i le suesue i le afioga a le Atua ma ia loloto lo tatou faatuatua, e mafai foi ona tatou utuvai mai le mana o le Atua e teena ai faaosoosoga.
I le taimi o le tapui o tauaofiaga ua le mafai ai ona auai atu pea i le malumalu, sa ou faia se taumafaiga faaopoopo e suesue ma aoao atili e uiga i le mana o le Atua lea e oo mai ia i tatou a o tatou osia ma tausia feagaiga o le malumalu. E pei ona folafola mai i le tatalo o le faapaiaga o le Malumalu o Katelani, tatou te tuua le malumalu ua faaauupegaina i le mana o le Atua.16 E leai se aso faatulagaina e uma ai le fesootai ma le mana o le Atua e faaee atu i luga o i latou o e osia ma tausia feagaiga o le malumalu, e leai foi se tapu mai le mauaina o lena mana i le taimi o se faama’i oti. Na pau le taimi e tuuitiitia ai Lona mana i o tatou olaga, pe a tatou le tausia a tatou feagaiga ma tatou le ola i se ala e mafai ai ona tatou agavaa pea lava pea e talia Lona mana.
A o ma galulue ai ma si o’u toalua pele o ni taitai o le misiona i Taialani, Lao, ma Maiama, sa ma molimauina tonu le mana o le Atua e oo mai ia i latou o e osia ma tausia feagaiga paia i le malumalu. O le Tupe e Lagolagoina ai Tagata Ulu i le Malumalu na mafai ai e le toatele o le Au Paia i nei atunuu e tolu ona auai atu i le malumalu ina ua mavae ona latou faia o mea uma sa latou mafaia e ala i osigataulaga ma tapenapenaga a le tagata lava ia. Ou te manatua se fonotaga a se vaega o le Au Paia faamaoni e 20 mai Laos i se malaevaalele i Bangkok, Taialani, e fesoasani ia i latou e o atu ai i le isi malaevaalele i Bangkok e pu’e la latou vaalele i Hong Kong. Sa tutumu nei tagata i le sagisagi fiafia ina ua i’u ina malaga i le maota o le Alii.
Ina ua matou feiloai ma nei Au Paia lelei i lo latou toe taliu atu, sa iloagofie le tulaga matua faaletalalelei na fesootai ma le mana na afua mai le mauaina o o latou faaeega paia i le malumalu ma le ulu atu i feagaiga ma le Atua. Na manino le foi atu o nei Au Paia mai le malumalu “ua faaauupegaina i [Lona] mana.”17 O lea mana e faia ai isi mea e tele nai lo le mea sa mafai ona latou faia na o i latou lava, na avatu ai ia i latou le malosiaga e onosaia ai luitau o le avea ai ma tagata o le Ekalesia i o latou atunuu, ma fetuleni atu ai ua tauaaoina ma mamalu naua, i le upumoni,”18 a o latou faaauau pea ona fausia le malo o le Alii i Laos.
I le taimi ua le mafai ai ona tatou auai atu i le malumalu, pe o tatou faalagolago ea i luga o feagaiga sa tatou osia i le malumalu e faatuina se ala manino e le masuia o le faasinoga i o tatou olaga?” O nei feagaiga, afai e tausia, tatou te maua ai le vaaiga mamao ma faamoemoega e tusa ai ma le lumanai ma se naunautaiga manino ia agavaa ai mo le mauaina o mea uma ua folafola mai e le Alii e ala i lo tatou faamaoni.
Ou te valaaulia outou ina ia saili le mana e finagalo le Atua e tuu atu ia te outou. Ou te molimau atu a o tatou saili atu mo lea mana, o le a faamanuiaina i tatou i se malamalama sili atu i le alofa o lo tatou Tama Faalelagi mo i tatou.
Ou te molimau atu ona e alofa le Tama Faalelagi ia te oe ma a’u, na Ia auina mai ai Lona Alo Pele, o Iesu Keriso, e avea ma o tatou Faaola ma Togiola. Ou te molimau atu ai ia Iesu Keriso, o Ia o lē ua i ai le mana uma,19 ma ou te faia ai i le suafa o Iesu Keriso, amene.