Agai i Luma i le Faatuatua
Ou te faamanuia ia te outou i le filemu ma le faateleina o le faatuatua i le Alii.
Ou uso e ma tuafafine pele, a o tatou oo mai ai i le faaiuga o lenei konafesi faasolopito, tatou te faailoa atu lo tatou lotofaafetai i le Alii. O musika sa maofa ma o savali sa musuia.
I lenei konafesi, ua tatou oo ai i le tele o mea tulaga ese. I lenei faamanatuina o le lua seneturi, ua matou folasia atu ai se folafolaga i le lalolagi e tautino atu ai le moni o le Toefuataiga o le talalelei a Iesu Keriso i lona atoatoaga.
Na tatou faamanatuina ai le Toefuataiga i le Alalaga Osana.
Na tatou faalauiloaina ai se faatusa fou e faailoa ai lo tatou faatuatua i le Alii o Iesu Keriso ma mo le aloa’iaina faavisio o faamatalaga ma anomea aloaia o le Ekalesia.
Ua matou valaau atu mo se aso o anapogi ma tatalo i le lalolagi atoa, ina ia mafai ona togafitia le faama’i pipisi o i ai nei, ia puipuia tausima’i, faamalosia le tamaoaiga, ma toe foi i le olaga masani. O lenei anapogi o le a faia i le Aso Maliu, Aso Faraile, 10 Aperila. E ma’eu lenei Aso Faraile o le a i ai!
O le Aso Sa a sau nei o le Aso Sa o le Eseta, lea o le a tatou toe faamanatuina ai le Togiola ma le Toetu o lo tatou Alii o Iesu Keriso. Ona o Lana Togiola, o le a oo mai ai Lana meaalofa o le toetu i tagata uma o ē soifua mai. Ma o Lana meaalofa o le ola e faavavau o le a oo mai i tagata uma o ē agavaa e ala i le faamaoni a’ia’i i sauniga ma feagaiga na osia i totonu o Ona malumalu paia.
O vaega e tele o lenei koanfesi aoao ia Aperila 2020—atoa ai ma le vaiaso paia lea ua tatou amataina nei—e mafai ona aoteleina i upu paia faapoloaiga se fa: “Faalogo ia te Ia.”1 Matou te tatalo mo la outou taulaiga i le Tama Faalelagi, o lē na fetalaia mai na upu, ma i Lona Alo Pele, o Iesu Keriso, ia avea ma mea sili ona taua e manatua pea mai mea uma na tutupu. Matou te tatalo ia amata ona outou toetuuto atu moni e faalogo, lagona, ma usitai i afioga a le Faaola.2 Ou te folafola atu o le a mulimuli mai le faaitiitia o le fefe ma le faatuatua faateleina.
Faafetai atu mo lo outou naunautaiga ia faia o outou fale o ni malutaga moni o le faatuatua, lea e mafai ona afio ai le Agaga o le Alii. O le tatou mataupu talanoaina mo suesuega o le talalelei, Sau, Mulimuli Mai ia te A’u, o le a faaauau pea ona faamanuiaina ai o outou olaga. O a outou taumafaiga faifai pea i lenei galuega—e oo lava i na taimi e te lagonaina ai e te le o manuia patino—o le a suia ai lou olaga, le olaga o lou aiga, ma le lalolagi. O le a faamalosia i tatou pe a tatou avea atili ma ni soo totoa o le Alii, e tutu atu ma tautatala atu mo Ia, i soo se mea tatou te i ai.
Ia, sei o tatou talanoa i malumalu. E 168 tatou malumalu ua faapaiaina i le lalolagi atoa. O isi o loo i ai i le tele o tulaga eseese o le fuafuaina ma le fauina. A faasilasila atu ni fuafuaga e fausia se malumalu fou, e avea ma se vaega o la tatou talafaasolopito paia.
Atonu e foliga lē talafeauga le faasilasila atu o malumalu fou a o tapunia ai a tatou malumalu uma mo se taimi.
E silia ma se seneturi talu ai, sa muai vaai ai Peresitene Uilifoti Uitilafi i tulaga e pei o o tatou tulaga i nei vaitaimi, e pei ona faamaumauina i lana tatalo o le faapaiaga o le Malumalu o Sate Leki, na tuuina atu i le 1893. O nisi o outou atonu ua outou tagai talu ai nei i ni vaega mai lenei tatalo ofoofogia i luga o ala o faasalalauga faaagafesootai.
Faalogo i nei olega mai se perofeta malosi a le Atua: “Afai o le a lē maua e Lou nuu le avanoa e ulufale mai ai i lenei maota paia … ma ua sauāina i latou ma oo i puapuaga, ma siomia e faafitauli … ma o le a liliu mai o latou fofoga agai mai i Lou maota paia nei ma ōle atu i Lau Afio mo se laveaiga, mo se fesoasoani, mo Lou mana ina ia faaloaloa mai mo i latou, matou te aioi faatauanau atu i Lau Afio, ia silasila mai ou fofoga mai Lou afioaga paia i le alofa mutimutivale … ma faafofogaina a latou tagi. Po o se taimi foi i ni tausaga a sau, o le a vavaeeseina ai le fanau a Lou nuu, e ala i soo se mafuaaga, mai lenei maota, … ma o le a latou tagi atu i Lau Afio mai le loloto o latou mafatiaga ma faanoanoaga e faamatuu mai se toomaga ma se laveaiga ia i latou, matou te faatoga atu ma le faamaulalo i Lau Afio ia … faafofogaina a latou tagi, ma faamatuu mai ia i latou faamanuiaga ua latou ōle atu ai.”3
Uso e ma tuafafine, i taimi o o tatou tiga pe a tapunia malumalu, e mafai lava ona e utuvai mai le mana o au feagaiga ma faaeega paia o le malumalu pe a e faamamaluina au feagaiga. Faamolemole ia faaaoga lenei taimi a o tapunia ai malumalu ia faaauau ai ona ola i se olaga agavaa mo le malumalu, pe ia faaagavaa foi mo le malumalu.
Talatalanoa e uiga i le malumalu faatasi ma lou aiga ma uo. Ona o Iesu Keriso o loo i le totonugalemu o mea uma tatou te faia i totonu o le malumalu, a e mafaufau atili e uiga i le malumalu o le a e mafaufau atili foi e uiga ia te Ia. Suesue ma tatalo ia a’oa’o atili e uiga i le mana ma le poto lea na maua ai ou faaeega paia—pe o le a e maua ai ou faaeega paia.
O le asō, matou te fiafia lava e faasilasila atu ni fuafuaga e fausia ni malumalu fou se valu i nofoaga nei: Bahía Blanca, Atenitina; Tallahassee, Florida; Lubumbashi, Democratic Republic of the Congo; Pittsburgh, Penisilevania; Benin City, Nigeria; Syracuse, Iuta; Dubai, United Arab Emirates; ma Shanghai, People’s Republic of China.
I nofoaga uma e valu, o le a galulue ai tusiata o le Ekalesia faatasi ma taitai i le lotoifale ina ia mafai ona ogatusa ma ia avea ma se faaopoopoga matagofie i nuu taitasi.
O le fuafuaga mo se malumalu i Dubai ua oo mai i se tali atu i la latou valaaulia mamalu, lea na matou aloaiaina ma le lotofaafetai.
O anotusi mo le fuafuaga mo Shanghai e taua tele. Mo le silia ma le luasefulu tausaga, o tagata agavaa o le Ekalesia i le Malo o Saina na auai i le Malumalu o Hong Kong i Saina. Ae ia Iulai 2019, na tapunia ai lena malumalu mo ni faaleleiga ua loa ona fuafuaina ma sili ona manaomia.
I Shanghai, o se nofoaga tauagafau e feiloai ai mo ni faamoemoega se tele o le a saunia se ala mo tagata o Saina e faaauau ai ona auai i sauniga o le malumalu—i le People’s Republic of China—mo i latou ma o latou tuaa.4
I atunuu uma, ua aoao ai e lenei Ekalesia ona tagata ia faamamalu, usitai ma lagolagoina le tulafono.5 Tatou te aoao atu le taua o le aiga, le avea ma matua lelei, ma ni tagatanuu lelei. Ona tatou te faaaloalogiaina tulafono a le Malo o Saina, e le auina atua ai e le Ekalesia ni faifeautalai e tala’i iina; pe o le a tatou auina atua i le taimi nei.
O tagata faigaluega mai fafo i totonu o Saina ma aulotu i Saina o le a faaauau pea ona feiloai i nofoaga eseese. O le tulaga faaletulafono o le Ekalesia iina e tumau pea le le suia. I se uluai tulaga o le faaaogaina o fale, o le ulufale atu i ai i le maota e mo na o taimi faatulagaina. O le maota o le Alii i Shanghai o le a le avea ma se nofoaga o taunuuga mo tagata tafafao mai i isi atunuu.
O nei malumalu fou e valu o le a faamanuiaina ai olaga o le toatele o tagata i itu uma e lua o le veli o le oti. O malumalu o se vaega silisili o le Toefuataiga o le atoatoaga o le talalelei a Iesu Keriso. I le lelei ma le agaalofa o le Atua, o loo Ia aumaia ai faamanuiaga o le malumalu ia latalata atili mai i Ana fanau i soo se mea.
A o faaauau pea le Toefuataiga, ou te iloa o le a faaauau pea ona faaali mai e le Atua le tele o mea silisili ma le taua tau i Lona malo iinei i le lalolagi.6 O lena malo o le Ekalesia a Iesu Keriso o le Au Paia o Aso e Gata Ai.
Uso e ma tuafafine pele, ou te faailoa atu lo’u alofa mo outou. I lenei taimi o popolega ma le lē mautonu, ma i le faaaogaina o le pule ua tuuina mai ia te a’u, ou te fia faaee atu ai i o outou luga se faamanuiaga faaaposetolo.
Ou te faamanuia ia te outou i le filemu ma le faateleina o le faatuatua i le Alii.7
Ou te faamanuia ia te outou i se manao ia salamo ma avea atili teisi e faapei o Ia i aso taitasi.8
Ou te faamanuia ia te outou ia iloa o le Perofeta o Iosefa Samita o le perofeta o le Toefuataiga o le talalelei a Iesu Keriso i lona atoatoaga.
Afai o i ai se ma’i ia te outou po o sē pele ia te outou, ou te tuua se faamanuiaga o le faamalologa, e ogatusa ma le finagalo o le Alii.
Ou te faamanuia ai ia te outou, ma toe faaopoopo tasi atu le faailoaga o lo’u alofa mo outou taitoatasi, i le suafa paia o Iesu Keriso, amene.