E Alu Atu o Ia i o Tatou luma
O loo taitaia e le Alii le Toefuataiga o Lana talalelei ma Lana Ekalesia. Na te silafia lelei le lumanai. Na te valaauliaina oe i le galuega.
Ou uso e ma tuafafine pele, ou te faafetai i le faatasi ai ma outou i lenei konafesi aoao o Le Ekalesia a Iesu Keriso o le Au Paia o Aso e Gata Ai. I lana valaaulia e manatunatu i le auala ua faamanuiaina ai i tatou ma ē pele ia i tatou e le Toefuataiga a le Alii o Lana Ekalesia i lenei tisipenisione mulimuli, ua folafola mai ai e Peresitene Russell M. Nelson faapea o o tatou aafiaga e le gata e manatua pea ae o le a lē galo lava.
O lo’u aafiaga e manatua pea, ou te mautinoa e faapena foi outou. Ae o le lē galo o le a faalagolago lava ia i tatou taitoatasi. E taua lena ia te a’u ona o aafiaga o le sauniuni mo lenei konafesi ua suia ai a’u i se ala ou te manao ai ia tumau. Se’i o’u faamatala atua.
O a’u sauniuniga na ou oo atu ai i faamaumauga o se mea na tupu i le Toefuataiga. Na ou faitau i lena mea na tupu i le tele o taimi, ae na foliga mai lava ia te a’u o se lipoti o se sauniga taua lea na aofia ai Iosefa Samita, le perofeta o le Toefuataiga. Ae o le taimi la lea, sa ou vaai i le tala i le auala na taitai ai e le Alii i tatou, o Ona soo, i Lana Ekalesia. Sa ou vaai i le uiga o le taitaia o i tatou o tagata soifua e le Faaola o le lalolagi, le Foafoa—o lē silafia mea uma, tuanai, taimi nei, ma le lumanai. Na te a’oa’o mai i tatou i lea laasaga ma lea laasaga ma taialaina i tatou, ae lē faamalosia.
O le sauniga o loo ou faamatalaina o se taimi taua lea i le Toefuataiga. O se sauniga na faia i le aso Sapati i le aso 3 Aperila, 1836, i le Malumalu o Katelani i Ohaio, e fitu aso talu ona maea lona faapaiaina. Na faamatalaina e Iosefa Samita lenei taimi maoae i le talafaasolopito o le lalolagi i se auala faigofie. O le tele o lana tala o loo tusia i le Mataupu Faavae ma Feagaiga vaega e 110.
“I le aoauli, sa ou fesoasoani atu i isi Peresitene i le tufatufaina atu o le Tausamaaga a le Alii i le Ekalesia, sa mauaina mai i le Toasefululua, o e sa ā latou le avanoa e galulue ai i le laʼoʼai paia i lea aso. Ina ua uma ona faatino o lenei auaunaga i oʼu uso, sa ou tuumuli atu i le pulelaa, sa tuu i lalo veli, ma ou punou ifo, faatasi ma Oliva Kaotui, i se tatalo mamalu ma lē leoa. Ina ua mavae ona ma tutu aʼe mai i le tatalo, sa tatala mai le faaaliga vaaia lenei ia i maʼua uma.”1
“Sa aveesea le veli mai i o maʼua mafaufau, ma sa tatalaina mata o o maʼua malamalama.
“Sa ma vaai i le Alii o tu mai i luga o le siʼofatafata o le pulelaa, i o maua luma; ma o lalo ifo o ona vae sa i ai se mea sa faia sa teuteuina i le auro maoʼi, i le lanu e pei e mūmū sesega.
“O ona fofoga sa pei o se afi mumū; o lauao o lona ao sa papaʼe e pei o le kiona mamā; o ona fofoga sa susulu e sili atu i lo le pupula o le la; ma o lona siufofoga sa pei o le leo o le tafe-taalili o vai tetele, o le siufofoga lava o Ieova, ua fetalai mai:
“O a’u lē muamua ma lē mulimuli; o a’u o lē o loo ola, o a’u o lē na fasiotia; o a’u o lo outou fautua i le Tamā.
“Faauta, ua faamagaloina a oulua agasala mai ia te oulua; ua oulua mama i o’u luma; o lea, ia sii i luga o oulua ulu ma olioli.
“Ia olioli loto o oulua uso, ma ia olioli loto o lo’u nuu uma, o e na latou fausia lenei fale i lo’u igoa, ma lo latou malosi.
“Aua faauta, ua Ou talia lenei fale, ma o le a i ai iinei loʼu igoa; ma o le a Ou faaali atu aʼu lava i loʼu nuu i lenei fale i le alofa mutimutivale.
“Ioe, o le a Ou oo atu i aʼu auauna, ma tautala atu ia te i latou i loʼu lava leo, pe afai e tausi loʼu nuu i aʼu poloaiga, ma ia lē faaeleeleaina lenei fale paia.
“Ioe o le a matua olioli tele lava loto o afe ma sefulu o afe ona o faamanuiaga o le a sasaa atu, ma le faaeega ua faaeeina ai aʼu auauna i lenei fale.
“Ma o le a salalau atu le taʼutaʼua o lenei fale i atunuu ese; ma o le amataga lenei o le faamanuiaga o le a sasaa mai i luga o ulu o loʼu nuu. E faapea lava. Amene.
“Ina ua tapunia lenei faaaliga vaaia, sa toe tatala mai le lagi ia i maʼua; ma sa oo mai Mose i o maʼua luma, ma tuu mai ia i maʼua ki o le faapotopotoina o Isaraelu mai vaega e fa o le lalolagi, ma le taitaiga mai o ituaiga e sefulu mai le laueleele i matu.
“Ina ua mavae lea, sa oo mai Elaia, ma tuu mai le tisipenisione o le talalelei a Aperaamo, fai mai o le a faamanuiaina ia i maʼua ma a maʼua fanau, tupulaga uma mulimuli mai pe a mavae atu i maʼua.
“Ina ua tapunia lenei faaaliga vaaia, sa oo mai i o maʼua luga se isi faaaliga vaaia tele ma le mamalu; ona sa tu mai i o maʼua luma Elia le perofeta, o lē na aveina i le lagi e aunoa ma le tofo i le oti, ma fetalai mai:
“Faauta, ua oo atoa mai le taimi, lea na fetalaia e le fofoga o Malaki—na molimau mai e tatau ona auina mai o ia [Elia], ae lei oo mai le aso tele ma le mataʼutia o le Alii—
“E liliu loto o tamā i fanau ma fanau i tamā, ne’i taia le lalolagi atoa i se fetuu—
“O lea, ua tuu atu i o oulua lima ki o lenei tisipenisione; ma o lenei mea o le a mafai ona outou iloa ai ua lata mai lava le aso tele ma le mataʼutia o le Alii, ua i faitotoa lava.”2
Ia, ua ou faitau faafia i lena tala. Ua faamaonia mai e le Agaga Paia ia te a’u e moni le tala. Peitai a’o ou suesue ma saunia mo lenei konafesi, sa oo ina ou vaai manino atili i le mana o le Alii e taitai ai i auiliiliga Ona soo i Lana galuega.
E fitu tausaga a o le’i tuuina atu e Mose ia Iosefa ki o le faapotopotoina o Isaraelu i le Malumalu o Katelani, “na aoaoina e Iosefa mai le itulau autu o le Tusi a Mamona o lona faamoemoega o le “faailoa atu ai i le toe vaega o le aiga o Isaraelu … ina ia latou iloa ai foi feagaiga a le Alii, ua lē lafoaiina ese i latou e faavavau.’ I le 1831, na fetalai atu ai le Alii ia Iosefa o le faapotopotoina o Isaraelu o le a amata i Katelani, ‘Ma mai iina [Katelani], soo se tasi Ou te loto i ai, o le a o atu i totonu o atunuu uma … ona o le a laveaiina Isaraelu, ma o le a Ou taitaia i latou.’”3
E ui o le galuega faafaifeautalai na manaomia e faapotopoto ai Isaraelu, ae na musuia e le Alii Ana taitai e aoao atu le Toasefululua, o ē na avea ma nisi o o tatou faifeautalai anamua, “Manatua, ia ē lē alu atu i isi atunuu, seiiloga ua e mauaina ou faaeega paia.”4
Na foliga mai o le Malumalu o Katelani sa taua i le fuafuaga auauai a le Alii mo ni mafuaaga se lua: Muamua, sa faatali Mose seia maea le malumalu e toefuatai mai ai ki o le faapotopotoina o Isaraelu. Ma le lona lua, na a’oa’o mai Peresitene Iosefa Filitia Samita e faapea “na poloaiina e le Alii le Au Paia e fausia se malumalu [le Malumalu o Katelani] lea e mafai ona ia faaali atu ai ki o le pule ma e mafai ona faia ai faaeega paia a aposetolo ma saunia ai e teu ma tausia lana togaolive mo le toe taimi.”5 E ui o faaeega paia o le malumalu e pei ona tatou iloa ai i le taimi nei e lei faatautaia i le Malumalu o Katelani, i le faataunuuina ai o le valoaga, ae o sauniga sauniuni o le malumalu na amata ona faailoa atu iina, faatasi ai ma le liligi mai o faailoaaga faaleagaga lea na faaauupega ai i latou na valaauina i misiona faatasi ai ma le faaeega folafolaina o le “mana mai luga”6 lea na taitai atu i se faapotopotoina maoae e ala i le auaunaga faafaifeautalai.
Ina ua uma ona tuuina atu ki o le faapotopotoina o Isaraelu ia Iosefa, na musuia e le Alii le Perofeta e auina atu uso o le Toasefululua i misiona. A o ou suesue, na manino mai ia te a’u ua saunia e le Alii i auiliiliga le ala mo le Toasefululua e o atu ai i misiona i atunuu mamao lea na saunia ai tagata ia talitonu ma lagolagoina i latou. I taimi tatau ai, e ala mai ia i latou, le faitau afe o tagata na aumaia i totonu o le Ekalesia toefuataiina a le Alii.
E tusa ai ma a tatou faamaumauga, ua fuafuaina e i le va o le 7,500 ma le 8,000 na papatisoina i le taimi o misiona e lua a le Toasefululua i Atumotu o Peretania [British Isles]. Ma faataatia e lenei mea le faavae mo le galuega faafaifeautalai i Europa. E oo atu i le faaiuga o le seneturi lona 19 e tusa ma le 90,000 tagata na potopoto i Amerika ma o le toatele na malaga mai i Atumotu o Peretania ma Scandinavia.7 Na musuia e le Alii Iosefa ma na faifeautalai faamaoni o e na galulue e ausia se seleselega na atonu na foliga, i lena taimi, e sili atu nai lo lo latou gafatia. Ae o le Alii, faatasi ai ma Lana muai silafaga atoatoa ma sauniuniga, na mafai ai.
E te manatuaina le gagana faigofie ma toetoe lava o se solo mai le vaega e 110 o le Mataupu Faavae ma Feagaiga:
“Faauta, ua oo atoa mai le taimi, lea na fetalaia e le fofoga o Malaki—na molimau mai e tatau ona auina mai o ia [Elia], ae lei oo mai le aso sili ma le mataʼutia o le Alii—
“E liliu loto o tamā i fanau ma fanau i tamā, ne’i taia le lalolagi atoa i se fetuu—
“O lea, ua tuu atu i o oulua lima ki o lenei tisipenisione; ma o lenei mea o le a mafai ona outou iloa ai ua lata mai lava le aso tele ma le mataʼutia o le Alii, ua i faitotoa lava.”8
Ou te molimau atu na silasila mamao atu le Alii i le lumanai ma le auala Na te taitaiina ai i tatou e fesoasoani ia te Ia e faataunuu Ona faamoemoega i aso e gata ai.
A o o’u auauna atu i le Au Epikopo Pulefaamalumalu i le tele o tausaga ua mavae, sa tofia a’u e vaaia le vaega o mamanu ma atinaega lea na fatuina le mea ua tatou faaigoaina o le FamilySearch. Ou te faaeteete e fai atu na ou “vaavaaia” lona fatufatuga nai lo le faapea atu na ou “faatonuina.” E toatele tagata atamamai na tuua matata ma o mai e fausia le mea na finagalo i ai le Alii.
Na setiina e le Au Peresitene Sili se sini e faaitiitia le faia faalua o ni sauniga. O lo latou popolega sili o le le mafai ona tatou iloa pe ua uma ona faia sauniga a se tagata. Mo ni tausaga—pe foliga mai o le tele o tausaga—na fesili mai ai le Au Peresitene Sili ia te a’u, “O afea o le a e faia ai?”
Faatasi ai ma le tatalo, maelega, ma le ositaulaga patino a tagata o le tomai sili, na faataunuuina ai le galuega. Na oo mai i lea laasaga ma lea laasaga. O le galuega muamua o le faia lea o le FamilySearch ma se fiafiaga mo i latou o ē lē fiafia tele i komepiuta. Ua tele suiga na oo mai, ma ou te iloa o le a faaauau pea ona latou o mai, aua soo se taimi lava matou te agai atu ai e foia se tasi o faafitauli musuia, matou te tatalaina le faitotoa mo nisi faaaliga mo le alualu i luma e talitutusa lava le taua ae e lē vaaia. E oo lava i le asō, o loo ua avea le FamilySearch ma mea e manaomia e le Alii mo se vaega o Lana Toefuataiga—ma e le na o le aloese mai le toe faia faalua o sauniga.
E faatagaina i tatou e le Alii e faia ni faaleleiga e fesoasoani ai i tagata ia maua ni lagona o le masani ma alofa foi mo o latou tuaa ma faamaeaina a latou sauniga o le malumalu. I le taimi nei, e pei ona silafia e le Alii o le a tupu, o le a avea tagata talavou ma faiaoga o komepiuta i o latou matua ma tagata o le uarota. Ua latou maua uma le olioli tele i lenei auaunaga.
Ua suia e le agaga o Elia loto o talavou ma tagata matutua, tamaiti ma matua, fanau a fanau ma matua matutua. O le a toe faatulagaina ma le fiafia e malumalu i se taimi e le o toe mamao ia avanoa o papatisoga ma isi sauniga paia. O le naunau e auauna atu i o tatou tuaa ma le sootaga o matua ma fanau o loo faatupulaia pea.
Na silafia e le Alii le oo mai o mea uma. Na Ia fuafuaina, i lea laasaga ma lea laasaga, e pei ona Ia faia i isi suiga i Lana Ekalesia. Na Ia tausia ma saunia tagata faamaoni o ē filifili e fai ia lelei mea faigata. E onosa’i ma alofa mai pea o Ia e fesoasoani mai ia i tatou e a’oa’o i “lea fuaitau i luga o lea fuaitau, ma lea mataupu i luga o lea mataupu, o sina mea itiiti i i ma sina mea itiiti i o.”9 E mausali o Ia i le faatulagaina o taimi ma le faagasologa o Ona faamoemoega, ae Na te faamautinoaina mai o le ositaulaga e masani ona aumaia pea faamanuiaga tatou te le muai vaaia.
Ou te faaiu atu i le faailoaina o lo’u lotofaafetai i le Alii—o Ia o lē na musuia Peresitene Nelson e valaaulia a’u e faia se ositaulaga e saunia ai mo lenei konafesi. O itula uma ma tatalo uma i taimi o a’u sauniuniga na aumaia ai se faamanuiaga.
Ou te valaaulia tagata uma o ē faalogo i lenei savali pe faitau i nei upu ina ia faatuatua o loo taitaiina e le Alii le Toefuataiga o Lana talalelei ma Lana Ekalesia. E Alu Atu o Ia i o Tatou Luma. Na te silafia lelei le lumanai. Na te valaauliaina oe i le galuega. Na te faatasi mai ma oe. Ua Ia faia se fuafuaga mo lau auaunaga. Ma e oo lava i au osigataulaga, o le a e lagona le olioli a o e fesoasoani atu i isi ia tulai a’e e saunia mo Lona afio mai.
Ou te molimau atu o loo soifua le Atua le Tama. O Iesu o le Keriso. O Lana Ekalesia lenei. Na te silafia ma alofa ia te oe. Na te taialaina oe. Ua Ia saunia le ala mo oe. I le suafa paia o Iesu Keriso, amene.