Mafaufau i le Agalelei ma le Silisiliese o le Atua
Ou te valaaulia outou ia manatua i aso taitasi le silisiliese o le Tama Faalelagi ma Iesu Keriso ma mea ua La’ua faia mo outou.
I le aluga o taimi, aemaise lava i taimi faigata, ua uunaia i tatou e perofeta ina ia manatua le silisiliese o le Atua ma ia mafaufau i mea na Ia faia mo i tatou o ni tagata taitoatasi, o ni aiga, ma o se nuu.1 O lenei faatonuga o loo maua i totonu o tusitusiga paia ae o loo iloga le lauiloa i totonu o le Tusi a Mamona. Ua faamatalaina e le itulau autu o se tasi o faamoemoega o le Tusi a Mamona o le “faailoa atu i le toe vaega o le aiga o Isaraelu mea tetele na faia e le Alii mo o latou tamā.”2 O loo faaiu le Tusi a Mamona i le talosaga a Mamona: “Faauta, ou te apoapoai atu ia te outou pe a outou faitauina nei mea … ia outou manatua le alofa mutimutivale tele o le Alii i le fanauga a tagata, … ma manatunatu i ai i o outou loto.”3
O le i ai pea lava o aioiga mai perofeta ina ia tomanatu ai i le agalelei o le Atua e ofoofogia.4 E finagalo lo tatou Tama Faalelagi ia i tatou ia manatuaina Lona agalelei ma le agalelei a Lona Alo Pele, e le mo le faamalieina o i La’ua lava, ae mo le faatosinaga a lena manatuaga ia i tatou. E ala i le mafaufau i lo La’ua agalelei, e faateleina ai la tatou vaaiga ma le malamalamaaga. E ala i le manatunatu i lo La’ua agaalofa, o le a atili ai ona tatou lotomaualalo, lototatalo, ma tumau.
O se aafiaga faamomoiloto ma se tagata gasegase ua faaalia ai le ala e mafai ai ona suia i tatou e le lotofaafetai mo le agalelei ma le agaalofa. I le 1987, sa ou masani ai ia Thomas Nielson, o se tamalii lelei na manaomia se taotoga o le fatu. Sa 63 ona tausaga ma sa nofo i Logan, Iuta, i le Iunaite Setete. I le mavae ai o auaunaga faamiliteli i le taimi o le Taua Lona Lua o le Lalolagi, sa ia faaipoipo atu ai ia Donna Wilkes i le Malumalu i Logan Iuta. Na avea o ia ma se tagata lei piliki malosi ma faamanuiaina. I tausaga mulimuli ane na faapitoa lava lona fiafia e galulue faatasi ma le tama matua a lona afafine, o Ionatana, i taimi o tu’uaga o a’oga. Na atiae e le toalua se sootaga faapitoa i se vaega ona sa vaaia e Toma se vaega tele o ia lava ia Ionatana.
Na iloa e Toma o le faatalitali mo se fatu e foai mai sa o se tulaga faapopoleina. Sa lē o ia o se tagata e lava le onosa’i. Sa mafai lava ona ia setiina ma ausia ni sini e ala i le galue malosi ma le naunautai. O le tauiviga ma se fatu le lelei, ma le taofia o le agai i luma o lona olaga, na fesili mai ai Toma ia te a’u i nisi taimi po o le a se mea o o’u faia ia faatelea’i ai le faagasologa. Ma le fiamalie, sa ia fautuaina mai ni auala e mafai ona ou agai i ai ina ia vave ona maua se fatu mo ia.
I se tasi o aso fiafia ae matautia, na maua ai se fatu na foai mai mo Toma. Na tutusa le telē ma le ituaiga toto, ma e laitiiti le tagata e ona [le fatu] na o le 16 tausaga. O le tagata e ona le fatu na foaia atu, o Ionatana, le atalii faapelepele o le afafine o Toma. I le amataga o lena aso, na matua manu’a tigaina Ionatana ina ua lavea le taavale sa ia tietie ai i se nofoaafi.
Ina ua ou asiasi atu ia Toma ma Donna i le falema’i, sa lofituina i la’ua. E ese le faigata o le vaai faalemafaufau atu i lagona sa la aafia ai, i le iloaina o le ola o Toma e mafai ona faaumiumi i le faaaogaina o le fatu o le tama a le la tama. I le taimi muamua, sa la mumusu e mafaufau i le fatu na ofoina mai e matua faavauvau o Ionatana, le la afafine ma le la atalii faaletulafono. Na iloa lelei e Toma ma Donna, e ui, e le o toe iloa e Ionatana se mea, ma ua la malamalama o a la tatalo mo se fatu foai mo Toma sa le’i mafua ai le faalavelave faafuasei a Ionatana. Leai, o le fatu o Ionatana o se meaalofa e mafai ona faamanuia ai Toma i lona taimi o mafatiaga. Sa la iloaina atonu o le a oo mai se mea lelei mai lenei faalavelave ma filifili ai ia faia loa.
Sa sologa lelei le taotoga. Mulimuli ane, sa avea Toma ma se tagata ese. O le suiga na sili atu nai lo le faaleleia o le soifua maloloina po o le lotofaafetai. Sa ia ta’u mai ia te a’u na te mafaufau ia Ionatana i taeao uma, i lona afafine ma lona atalii faaletulafono, i le meaalofa na ia mauaina, ma le mea na manaomia ai lena meaalofa. E ui lava na manino mai pea ona uiga lelei malie masani ma le lototele, ae na ou matauina Toma ua sili atu ona naunautai, manafanafa, ma agalelei.
Na soifua Toma mo le isi 13 tausaga faaopoopo i le mavae ai o le taotoga, o tausaga semanu na te le mauaina. I lana saafiafiga na ia ta’ua ai o nei tausaga na tuu atu ai ia te ia ina ia pa’i atu i olaga o lona aiga ma isi i le agalelei ma le alofa. O ia o se tagata limafoai patino i le toatele ma o se faataitaiga o le faamoemoe ma le naunautaiga.
E pei foi lava o Toma, ua tatou tofu maua uma ni meaalofa e mafai ona tatou saunia ai i tatou lava, meaalofa mai lo tatou Tama Faalelagi ma Lona Alo Pele, e aofia ai le faaolataga e ala i le taulaga togiola a Iesu Keriso.5 Ua tatou mauaina le ola i lenei lalolagi; o le a tatou maua le ola faaletino i le olaga a sau; ma le faaolataga ma le faaeaga e faavavau—pe afai tatou te filifili i ai—o ia mea uma ona o le Tama Faalelagi ma Iesu Keriso.
Soo se taimi lava tatou te faaaoga ai, faamanuiaina ai, pe mafaufau foi i nei meaalofa, e tatau ona tatou mafaufau i le taulaga, agalelei, ma le alofa o ē na foaia maia. O le migao mo ē na foai maia e sili atu nai lo lo tatou lagonaina o le lotofaafetai. O le manatunatu i a La’ua meaalofa e mafai ma e tatau ona suia ai i tatou.
O le tasi suiga ofoofogia o le suiga o Alema le Itiiti. A o alu atu Alema “i lea mea ma lea mea ma le fouvale faasaga i le Atua,”6 sa faaali mai se agelu. Faatasi ma “se leo o se faititili,”7 sa a’oa’i ai e le agelu Alema mo le sauaina o le Ekalesia ma “gaoi ese o loto o tagata.”8 Na faaopoopo atu e le agelu lenei apoapoaiga: “Alu ia, ma ia e manatua le faatagataotauaina o ou tamā …; ma manatua mea tetele na fai e [le Atua] mo i latou.”9 Mai apoapoaiga uma e mafai ai, o le mea lea na faamamafa atu e le agelu.
Na salamo ma manatua e Alema. Na faasoa mulimuli atu e Alema le apoapoaiga a le agelu i lona atalii o Helamana. Sa fautua atu Alema, “Ou te manao ina ia e faia e pei ona ou faia, i le manatuaina o le faatagataotauaina o o tatou tamā; ona sa i ai i latou i le pologa, ma sa leai se tasi sa mafai ona laveaiina i latou vagana ai le Atua o Aperaamo, … Isaako, ma … Iakopo; ma sa ia laveaiina moni i latou i o latou puapuaga.”10 Sa fai atu ma le faigofie Alema, “Ou te tuu atu lo’u faalagolago ia te ia.”11 Sa malamalama Alema e ala i le manatuaina o le laveaiga mai le nofopologa ma le lagolago i le taimi o “tofotofoga ma faalavelave o ituaiga eseese uma,” tatou te iloa ai le Atua ma le mautinoa o Ana folafolaga.”12
O nisi o i tatou ua i ai se aafiaga e matautia e pei o Alema, ae o lo tatou suiga e ono tutusa le loloto. Na folafola mai e le Faaola anamua:
“Ou te avatu foi ia te outou le loto fou, ma ou tuu i totonu ia te outou le agaga fou; ou te aveesea le loto maaa … , ma ou avatu ia te outou le loto aano.
“Ou te tuuina atu lo’u agaga i totonu ia te outou. …
“… E fai foi outou mo’u nuu, e fai foi a’u mo outou Atua.”13
Na ta’u atu e le Faaola toetu ia sa Nifae le auala e amatalia ai le suiga. Na ia faailoa atu se vaega taua i le fuafuaga a le Tama Faalelagi ina ua Ia fetalaiga:
“Na auina mai a’u e lo’u Tama, ina ia sii ae a’u i luga o le satauro; ma a mavae ona sii ae o a’u i luga o le satauro, ina ia mafai ona aumai o tagata uma ia te a’u. …
“Ma le pogai lenei na sii ai a’u i luga, o lea, e tusa ai ma le mana o le Tamā, o le a ou aumai ai tagata uma ia te a’u.”14
O le a le mea e manaomia e aumai ai oe i le Faaola? Mafaufau i le gauai atu o Iesu Keriso i le finagalo o Lona Tama, Lona manumalo i le oti, Lona tauaveina i Ona lava luga o au agasala ma mea sese, Lona mauaina o le mana mai le Tama e faia ai aioiga mo oe, ma Lana togiola sili e lē i’u mo oe.15 Pe le o lava ea nei mea e aumai ai oe ia te Ia? Ua lava mo a’u. O Iesu Keriso o loo “tu mai ma aao mafola, ma le faamoemoe ma le naunautai e faamalolo, faamagalo, faamamā, faamalosia, faaleleia, ma faapaiaina [oe ma a’u].”16
O nei upumoni e tatau ona aumaia ia i tatou se loto fou ma uunaia i tatou e filifili e mulimuli i le Tama Faalelagi ma Iesu Keriso. Ae e oo lava i loto fou atonu e “faigofie ona se ese, … faigofie ona tuua le Atua [tatou te] alolofa i ai.”17 Ina ia tetee atu i lenei lagona, e manaomia ona tatou manatunatu i aso uma i meaalofa ua tatou maua ma mea e manaomia e na meaalofa. Na fautua mai le Tupu o Peniamina, “E faapea lava ona ou manao ia outou manatua, ma manatua pea lava pea, le silisiliese o le Atua … ma lona agalelei ma lona tali-tiga ia te outou.”18 Afai tatou te faia, tatou te agavaa mo faamanuiaga faalelagi ofoofogia.
O le mafaufau i le agalelei ma le alofa mutimutivale o le Atua e fesoasoani ia i tatou ina ia faateleina ai le nofouta faaleagaga. O se taunuuga, o le faateleina o le nofouta faaleagaga e mafai ai ona tatou iloa le moni o mea uma lava e ala i le mana o le Agaga Paia.19 E aofia i lea mea se molimau o le moni o le Tusi a Mamona, iloaina o Iesu o le Keriso, o lo tatou Faaola ma le Togiola patino, ma le taliaina o Lana talalelei na toefuatai mai i nei aso e gata ai.20
Pe a tatou manatua le silisiliese o lo tatou Tama Faalelagi ma Iesu Keriso ma mea ua La faia mo i tatou, o le a tatou lē faasamasamanoa ia i La’ua, e pei lava ona lē faasamasamanoa Toma i le fatu o Ionatana. I se auala fiafia ma migao, na manatua ai e Toma i aso taitasi le faalavelave na aumaia ia te ia se ola faaumiumi. I le faagaeetia tele i le iloaina e mafai ona faaolaina ma faaeaina i tatou, e ao ona tatou manatuaina e oo mai le faaolataga ma le faaeaga i se tau maoae.21 E mafai ona tatou olioli ma le migao a o tatou iloaina a aunoa ma Iesu Keriso o le a tatou malaia, ae o Ia, e mafai ai ona tatou maua le meaalofa silisili e mafai ona aumai e le Tama Faalelagi.22 E moni, o lenei migao e mafai ai ona tatou olioli i le folafolaga “o le ola faavavau i le lalolagi lenei” ma i’u ai ina maua le “ola faavavau … o le mamalu ola pea lava” i le lalolagi a sau.23
Pe a tatou mafaufau i le agalelei o lo tatou Tama Faalelagi ma Iesu Keriso, e faateleina lo tatou faalagolago ia te i La’ua. E suia a tatou tatalo ona ua tatou iloa o le Atua o lo tatou Tama ma o i tatou o Ana fanau. Tatou te le saili e suia Lona finagalo ae ia ogatusa o tatou loto ma Lona [finagalo] ma faamautinoa mo i tatou lava faamanuiaga e finagalo o Ia e faamatuu mai, e fua lea i lo tatou ōle atu mo na faamanuiaga.24 Tatou te naunau ia agamalu atili, mama atili, mausali atili, ma FaaKeriso atili.25 O nei suiga e faaagavaa ai i tatou mo isi faamanuiaga faalelagi.
E ala i le faailoaina atu o mea lelei uma e mai ia Iesu Keriso, o le a tatou faafesootai atili atu ai ma le mataalia lo tatou faatuatua i isi.26 O le a tatou maua le lototele pe a fetaiai ma galuega ma tulaga e ono foliga faigata.27 O le a tatou faamalosia lo tatou naunautaiga e tausia feagaiga ua uma ona tatou osia e mulimuli i le Faaola.28 O le a faatumuina i tatou i le alofa i le Atua, mananao e fesoasoani ia i latou e lē tagolima e aunoa ma le faamasino atu, alofa i a tatou fanau ma faafailele i latou i le amiotonu, faatumauina le faamagaloina o a tatou agasala, ma ia olioli pea.29 O fua ofoofogia nei o le manatuaina o le agalelei ma le alofa mutimutivale o le Atua.
I se faatusatusaga na lapatai mai ai le Faaola, “Ua leai se mea e faatausuai ai le tagata i le Atua, pe ua leai ni isi e faamumu faasaga i ai lona toasa, tau lava o i latou o e latou te lē tautinoina lona aao i mea uma.”30 Ou te lē manatu e tiga le Atua pe a tatou faagaloina o Ia. Ae, ou te manatu e matua lē fiafia lava o Ia. Na te silafia ua tatou taofia i tatou lava mai le avanoa e faalatalata atili atu ai ia te Ia e ala i le manatuaina o Ia ma Lona agalelei. Ona tatou misia foi lea o Lona faalatalata mai ia i tatou faapea ma faamanuiaga patino ua Ia folafola mai.31
Ou te valaaulia outou ia manatua i aso taitasi le silisiliese o le Tama Faalelagi ma Iesu Keriso ma mea ua La’ua faia mo outou. Ia tuu atu ou mafaufauga o lo La’ua agalelei ia fusifusia mausali ai lou loto le matonu ia i La’ua.32 Mafaufau loloto i lo La’ua agaalofa, ma o le a faamanuaina oe i se nofouta faaopoopo faaleagaga ma avea atili ai faapei o Keriso. O le manatunatu ai i lo La’ua tiga alofa o le a fesoasoani ia te oe e “tutumau [ai] i le faamaoni e oo i le iuga,,” seia “talia [oe] i le lagi” ina ia “mau faatasi ma le Atua i se tulaga o le fiafia e lē gata.”33
Na fetalai mai lo tatou Tama Faalelagi, a o faasino atu i Lona Alo Pele, “Faalogo ia te Ia!”34 A o e galue i na upu ma faalogo ia te Ia, ia manatua, i le olioli ma le migao, e fiafia le Faaola e toefuatai mea e le mafai ona e toefuataia; e fiafia o Ia e faamalolo i manu’a e le mafai ona e faamaloloina; e fiafia o Ia e faaleleia mea ua gausia e le mafai ona toe faaleleia;35 Na te totogia soo se mea lē talafeagai e oo atu ia te oe;36 ma e Na te fiafia e faaleleia tumau loto ua nutimomoia.37
A o o’u mafaufau i meaalofa mai lo tatou Tama Faalelagi ma Iesu Keriso, ua ou iloa ai lo La’ua alofa le mafuatia ma lo La’ua agaalofa lemafaatusalia mo fanau uma a le Tama Faalelagi.38 O lenei malamalama ua suia ai a’u, ma o le a suia ai foi oe. I le suafa o Iesu Keriso, amene.